| Library / Tipiṭaka / திபிடக • Tipiṭaka / வினயாலங்கார-டீகா • Vinayālaṅkāra-ṭīkā |
13. தா³னலக்க²ணாதி³வினிச்ச²யகதா²
13. Dānalakkhaṇādivinicchayakathā
69. ஏவங் ரூபியாதி³படிக்³க³ஹணவினிச்ச²யங் கதெ²த்வா இதா³னி தா³னவிஸ்ஸாஸக்³கா³ஹலாப⁴பரிணாமனவினிச்ச²யங் கதே²துங் ‘‘தா³னவிஸ்ஸாஸக்³கா³ஹேஹீ’’திஆதி³மாஹ. தத்த² தீ³யதே தா³னங், சீவராதி³வத்து²ங் ஆரம்மணங் கத்வா பவத்தோ அலோப⁴ப்பதா⁴னோ காமாவசரகுஸலகிரியசித்துப்பாதோ³. ஸஸனங் ஸாஸோ, ஸஸு ஹிங்ஸாயந்தி தா⁴து, ஹிங்ஸனந்தி அத்தோ², விக³தோ ஸாஸோ ஏதஸ்மா கா³ஹாதி விஸ்ஸாஸோ. க³ஹணங் கா³ஹோ, விஸ்ஸாஸேன கா³ஹோ விஸ்ஸாஸக்³கா³ஹோ. விஸேஸனே செத்த² கரணவசனங், விஸ்ஸாஸவஸேன கா³ஹோ, ந தெ²ய்யசித்தவஸேனாதி அத்தோ². லச்ச²தேதி லாபோ⁴, சீவராதி³வத்து², தஸ்ஸ லாப⁴ஸ்ஸ. பரிணமியதே பரிணாமனங், அஞ்ஞேஸங் அத்தா²ய பரிணதஸ்ஸ அத்தனோ, அஞ்ஞஸ்ஸ வா பரிணாமனங், தா³பனந்தி அத்தோ². தா³னவிஸ்ஸாஸக்³கா³ஹேஹி லாப⁴ஸ்ஸ பரிணாமனந்தி எத்த² உத்³தே³ஸே ஸமபி⁴னிவிட்ட²ஸ்ஸ ‘‘தா³ன’’ந்தி பத³ஸ்ஸ அத்த²வினிச்ச²யோ தாவ பட²மங் ஏவங் வேதி³தப்³போ³தி யோஜனா. அத்தனோ ஸந்தகஸ்ஸ சீவராதி³பரிக்கா²ரஸ்ஸ தா³னந்தி ஸம்ப³ந்தோ⁴. யஸ்ஸ கஸ்ஸசீதி ஸம்பதா³னநித்³தே³ஸோ, யஸ்ஸ கஸ்ஸசி படிக்³கா³ஹகஸ்ஸாதி அத்தோ².
69. Evaṃ rūpiyādipaṭiggahaṇavinicchayaṃ kathetvā idāni dānavissāsaggāhalābhapariṇāmanavinicchayaṃ kathetuṃ ‘‘dānavissāsaggāhehī’’tiādimāha. Tattha dīyate dānaṃ, cīvarādivatthuṃ ārammaṇaṃ katvā pavatto alobhappadhāno kāmāvacarakusalakiriyacittuppādo. Sasanaṃ sāso, sasu hiṃsāyanti dhātu, hiṃsananti attho, vigato sāso etasmā gāhāti vissāso. Gahaṇaṃ gāho, vissāsena gāho vissāsaggāho. Visesane cettha karaṇavacanaṃ, vissāsavasena gāho, na theyyacittavasenāti attho. Lacchateti lābho, cīvarādivatthu, tassa lābhassa. Pariṇamiyate pariṇāmanaṃ, aññesaṃ atthāya pariṇatassa attano, aññassa vā pariṇāmanaṃ, dāpananti attho. Dānavissāsaggāhehi lābhassa pariṇāmananti ettha uddese samabhiniviṭṭhassa ‘‘dāna’’nti padassa atthavinicchayo tāva paṭhamaṃ evaṃ veditabboti yojanā. Attano santakassa cīvarādiparikkhārassa dānanti sambandho. Yassa kassacīti sampadānaniddeso, yassa kassaci paṭiggāhakassāti attho.
யதி³த³ங் ‘‘தா³ன’’ந்தி வுத்தங், தத்த² கிங் லக்க²ணந்தி ஆஹ ‘‘தத்ரித³ங் தா³னலக்க²ண’’ந்தி. ‘‘இத³ங் துய்ஹங் தே³மீ’’தி வத³தீதி இத³ங் திவங்க³ஸம்பன்னங் தா³னலக்க²ணங் ஹோதீதி யோஜனா. தத்த² இத³ந்தி தெ³ய்யத⁴ம்மனித³ஸ்ஸனங். துய்ஹந்தி படிக்³கா³ஹகனித³ஸ்ஸனங். தே³மீதி தா³யகனித³ஸ்ஸனங். த³தா³மீதிஆதீ³னி பன பரியாயவசனானி. வுத்தஞ்ஹி ‘‘தெ³ய்யதா³யகபடிக்³கா³ஹகா விய தா³னஸ்ஸா’’தி, ‘‘திண்ணங் ஸம்முகீ²பா⁴வா குஸலங் ஹோதீ’’தி ச. ‘‘வத்து²பரிச்சாக³லக்க²ணத்தா தா³னஸ்ஸா’’தி இத³ங் பன ஏகதே³ஸலக்க²ணகத²னமேவ, கிங் ஏவங் தீ³யமானங் ஸம்முகா²யேவ தி³ன்னங் ஹோதி, உதா³ஹு பரம்முகா²பீதி ஆஹ ‘‘ஸம்முகா²பி பரம்முகா²பி தி³ன்னங்யேவ ஹோதீ’’தி. துய்ஹங் க³ண்ஹாஹீதிஆதீ³ஸு அயமத்தோ² – ‘‘க³ண்ஹாஹீ’’தி வுத்தே ‘‘தே³மீ’’தி வுத்தஸதி³ஸங் ஹோதி, தஸ்மா முக்²யதோ தி³ன்னத்தா ஸுதி³ன்னங் ஹோதி, ‘‘க³ண்ஹாமீ’’தி ச வுத்தே முக்²யதோ க³ஹணங் ஹோதி, தஸ்மா ஸுக்³க³ஹிதங் ஹோதி. ‘‘துய்ஹங் மய்ஹ’’ந்தி இமானி பன படிக்³கா³ஹகபடிப³ந்த⁴தாகரணே வசனானி. தவ ஸந்தகங் கரோஹீதிஆதீ³னி பன பரியாயதோ தா³னக்³க³ஹணானி, தஸ்மா து³தி³ன்னங் து³க்³க³ஹிதஞ்ச ஹோதி. லோகே ஹி அபரிச்சஜிதுகாமாபி புன க³ண்ஹிதுகாமாபி ‘‘தவ ஸந்தகங் ஹோதூ’’தி நிய்யாதெந்தி யதா² தங் குஸரஞ்ஞோ மாது ரஜ்ஜனிய்யாதனங். தேனாஹ ‘‘நேவ தா³தா தா³துங் ஜானாதி, ந இதரோ க³ஹேது’’ந்தி. ஸசே பனாதிஆதீ³ஸு பன தா³யகேன பஞ்ஞத்தியங் அகோவித³தாய பரியாயவசனே வுத்தேபி படிக்³கா³ஹகோ அத்தனோ பஞ்ஞத்தியங் கோவித³தாய முக்²யவசனேன க³ண்ஹாதி, தஸ்மா ‘‘ஸுக்³க³ஹித’’ந்தி வுத்தங்.
Yadidaṃ ‘‘dāna’’nti vuttaṃ, tattha kiṃ lakkhaṇanti āha ‘‘tatridaṃ dānalakkhaṇa’’nti. ‘‘Idaṃ tuyhaṃ demī’’ti vadatīti idaṃ tivaṅgasampannaṃ dānalakkhaṇaṃ hotīti yojanā. Tattha idanti deyyadhammanidassanaṃ. Tuyhanti paṭiggāhakanidassanaṃ. Demīti dāyakanidassanaṃ. Dadāmītiādīni pana pariyāyavacanāni. Vuttañhi ‘‘deyyadāyakapaṭiggāhakā viya dānassā’’ti, ‘‘tiṇṇaṃ sammukhībhāvā kusalaṃ hotī’’ti ca. ‘‘Vatthupariccāgalakkhaṇattā dānassā’’ti idaṃ pana ekadesalakkhaṇakathanameva, kiṃ evaṃ dīyamānaṃ sammukhāyeva dinnaṃ hoti, udāhu parammukhāpīti āha ‘‘sammukhāpi parammukhāpi dinnaṃyeva hotī’’ti. Tuyhaṃ gaṇhāhītiādīsu ayamattho – ‘‘gaṇhāhī’’ti vutte ‘‘demī’’ti vuttasadisaṃ hoti, tasmā mukhyato dinnattā sudinnaṃ hoti, ‘‘gaṇhāmī’’ti ca vutte mukhyato gahaṇaṃ hoti, tasmā suggahitaṃ hoti. ‘‘Tuyhaṃ mayha’’nti imāni pana paṭiggāhakapaṭibandhatākaraṇe vacanāni. Tava santakaṃ karohītiādīni pana pariyāyato dānaggahaṇāni, tasmā dudinnaṃ duggahitañca hoti. Loke hi apariccajitukāmāpi puna gaṇhitukāmāpi ‘‘tava santakaṃ hotū’’ti niyyātenti yathā taṃ kusarañño mātu rajjaniyyātanaṃ. Tenāha ‘‘neva dātā dātuṃ jānāti, na itaro gahetu’’nti. Sace panātiādīsu pana dāyakena paññattiyaṃ akovidatāya pariyāyavacane vuttepi paṭiggāhako attano paññattiyaṃ kovidatāya mukhyavacanena gaṇhāti, tasmā ‘‘suggahita’’nti vuttaṃ.
ஸசே பன ஏகோதிஆதீ³ஸு பன தா³யகோ முக்²யவசனேன தே³தி, படிக்³கா³ஹகோபி முக்²யவசனேன படிக்கி²பதி, தஸ்மா தா³யகஸ்ஸ புப்³பே³ அதி⁴ட்டி²தம்பி சீவரங் தா³னவஸேன அதி⁴ட்டா²னங் விஜஹதி, பரிச்சத்தத்தா அத்தனோ அஸந்தகத்தா அதிரேகசீவரம்பி ந ஹோதி, தஸ்மா த³ஸாஹாதிக்கமேபி ஆபத்தி ந ஹோதி. படிக்³கா³ஹகஸ்ஸபி ந படிக்கி²பிதத்தா அத்தனோ ஸந்தகங் ந ஹோதி, தஸ்மா அதிரேகசீவரங் ந ஹோதீதி த³ஸாஹாதிக்கமேபி ஆபத்தி நத்தி². யஸ்ஸ பன ருச்சதீதி எத்த² பன இமஸ்ஸ சீவரஸ்ஸ அஸ்ஸாமிகத்தா பங்ஸுகூலட்டா²னே டி²தத்தா யஸ்ஸ ருச்சதி, தேன பங்ஸுகூலபா⁴வேன க³ஹெத்வா பரிபு⁴ஞ்ஜிதப்³ப³ங், பரிபு⁴ஞ்ஜந்தேன பன தா³யகேன புப்³ப³அதி⁴ட்டி²தம்பி தா³னவஸேன அதி⁴ட்டா²னஸ்ஸ விஜஹிதத்தா புன அதி⁴ட்ட²ஹித்வா பரிபு⁴ஞ்ஜிதப்³ப³ங் இதரேன புப்³பே³ அனதி⁴ட்டி²தத்தாதி த³ட்ட²ப்³ப³ங்.
Sace pana ekotiādīsu pana dāyako mukhyavacanena deti, paṭiggāhakopi mukhyavacanena paṭikkhipati, tasmā dāyakassa pubbe adhiṭṭhitampi cīvaraṃ dānavasena adhiṭṭhānaṃ vijahati, pariccattattā attano asantakattā atirekacīvarampi na hoti, tasmā dasāhātikkamepi āpatti na hoti. Paṭiggāhakassapi na paṭikkhipitattā attano santakaṃ na hoti, tasmā atirekacīvaraṃ na hotīti dasāhātikkamepi āpatti natthi. Yassa pana ruccatīti ettha pana imassa cīvarassa assāmikattā paṃsukūlaṭṭhāne ṭhitattā yassa ruccati, tena paṃsukūlabhāvena gahetvā paribhuñjitabbaṃ, paribhuñjantena pana dāyakena pubbaadhiṭṭhitampi dānavasena adhiṭṭhānassa vijahitattā puna adhiṭṭhahitvā paribhuñjitabbaṃ itarena pubbe anadhiṭṭhitattāti daṭṭhabbaṃ.
இத்த²ன்னாமஸ்ஸ தே³ஹீதிஆதீ³ஸு பன ஆணத்யத்தே² பவத்தாய பஞ்சமீவிப⁴த்தியா வுத்தத்தா ஆணத்தேன படிக்³கா³ஹகஸ்ஸ தி³ன்னகாலேயேவ படிக்³கா³ஹகஸ்ஸ ஸந்தகங் ஹோதி, ந ததோ புப்³பே³, புப்³பே³ பன ஆணாபகஸ்ஸேவ, தஸ்மா ‘‘யோ பஹிணதி, தஸ்ஸேவ ஸந்தக’’ந்தி வுத்தங். இத்த²ன்னாமஸ்ஸ த³ம்மீதி பன பச்சுப்பன்னத்தே² பவத்தாய வத்தமானவிப⁴த்தியா வுத்தத்தா ததோ பட்டா²ய படிக்³கா³ஹகஸ்ஸேவ ஸந்தகங் ஹோதி, தஸ்மா ‘‘யஸ்ஸ பஹீயதி, தஸ்ஸ ஸந்தக’’ந்தி வுத்தங். தஸ்மாதி இமினா ஆயஸ்மதா ரேவதத்தே²ரேன ஆயஸ்மதோ ஸாரிபுத்தஸ்ஸ சீவரபேஸனவத்து²ஸ்மிங் ப⁴க³வதா தே³ஸிதேஸு அதி⁴ட்டா²னேஸு இத⁴ வுத்தலக்க²ணேன அஸம்மோஹதோ ஜானிதப்³ப³ந்தி த³ஸ்ஸேதி.
Itthannāmassa dehītiādīsu pana āṇatyatthe pavattāya pañcamīvibhattiyā vuttattā āṇattena paṭiggāhakassa dinnakāleyeva paṭiggāhakassa santakaṃ hoti, na tato pubbe, pubbe pana āṇāpakasseva, tasmā ‘‘yo pahiṇati, tasseva santaka’’nti vuttaṃ. Itthannāmassa dammīti pana paccuppannatthe pavattāya vattamānavibhattiyā vuttattā tato paṭṭhāya paṭiggāhakasseva santakaṃ hoti, tasmā ‘‘yassa pahīyati, tassa santaka’’nti vuttaṃ. Tasmāti iminā āyasmatā revatattherena āyasmato sāriputtassa cīvarapesanavatthusmiṃ bhagavatā desitesu adhiṭṭhānesu idha vuttalakkhaṇena asammohato jānitabbanti dasseti.
தத்த² த்³வாதி⁴ட்டி²தங், ஸ்வாதி⁴ட்டி²தந்தி ச ந திசீவராதி⁴ட்டா²னங் ஸந்தா⁴ய வுத்தங், அத² கோ² ஸாமிகே ஜீவந்தே விஸ்ஸாஸக்³கா³ஹசீவரபா⁴வேன ச ஸாமிகே மதே மதகசீவரபா⁴வேன ச க³ஹணங் ஸந்தா⁴ய வுத்தங், ததோ பன த³ஸாஹே அனதிக்கந்தேயேவ திசீவராதி⁴ட்டா²னங் வா பரிக்கா²ரசோளாதி⁴ட்டா²னங் வா விகப்பனங் வா காதப்³ப³ங். யோ பஹிணதீதி தா³யகங் ஸந்தா⁴யாஹ, யஸ்ஸ பஹீயதீதி படிக்³கா³ஹகங்.
Tattha dvādhiṭṭhitaṃ, svādhiṭṭhitanti ca na ticīvarādhiṭṭhānaṃ sandhāya vuttaṃ, atha kho sāmike jīvante vissāsaggāhacīvarabhāvena ca sāmike mate matakacīvarabhāvena ca gahaṇaṃ sandhāya vuttaṃ, tato pana dasāhe anatikkanteyeva ticīvarādhiṭṭhānaṃ vā parikkhāracoḷādhiṭṭhānaṃ vā vikappanaṃ vā kātabbaṃ. Yo pahiṇatīti dāyakaṃ sandhāyāha, yassa pahīyatīti paṭiggāhakaṃ.
பரிச்சஜித்வா…பே॰… ந லப⁴தி, ஆஹராபெந்தோ ப⁴ண்ட³க்³கே⁴ன காரேதப்³போ³தி அத்தோ². அத்தனா…பே॰… நிஸ்ஸக்³கி³யந்தி இமினா பரஸந்தகபூ⁴தத்தங் ஜானந்தோ தெ²ய்யபஸய்ஹவஸேன அச்சி²ந்த³ந்தோ பாராஜிகோ ஹோதீதி த³ஸ்ஸேதி. போராணடீகாயங் பன ‘‘ஸகஸஞ்ஞாய வினா க³ண்ஹந்தோ ப⁴ண்ட³ங் அக்³கா⁴பெத்வா ஆபத்தியா காரேதப்³போ³’’தி வுத்தங். ஸகஸஞ்ஞாய வினாபி தாவகாலிகபங்ஸுகூலஸஞ்ஞாதி³வஸேன க³ண்ஹந்தோ ஆபத்தியா ந காரேதப்³போ³. அட்ட²கதா²யங் பன பஸய்ஹாகாரங் ஸந்தா⁴ய வத³தி. தேனாஹ ‘‘அச்சி²ந்த³தோ நிஸ்ஸக்³கி³ய’’ந்தி. ஸசே பன…பே॰… வட்டதீதி துட்ட²தா³னங் ஆஹ, அத² பனாதிஆதி³னா குபிததா³னங். உப⁴யதா²பி ஸயங் தி³ன்னத்தா வட்டதி, க³ஹணே ஆபத்தி நத்தீ²தி அத்தோ².
Pariccajitvā…pe… na labhati, āharāpento bhaṇḍagghena kāretabboti attho. Attanā…pe… nissaggiyanti iminā parasantakabhūtattaṃ jānanto theyyapasayhavasena acchindanto pārājiko hotīti dasseti. Porāṇaṭīkāyaṃ pana ‘‘sakasaññāya vinā gaṇhanto bhaṇḍaṃ agghāpetvā āpattiyā kāretabbo’’ti vuttaṃ. Sakasaññāya vināpi tāvakālikapaṃsukūlasaññādivasena gaṇhanto āpattiyā na kāretabbo. Aṭṭhakathāyaṃ pana pasayhākāraṃ sandhāya vadati. Tenāha ‘‘acchindato nissaggiya’’nti. Sace pana…pe… vaṭṭatīti tuṭṭhadānaṃ āha, atha panātiādinā kupitadānaṃ. Ubhayathāpi sayaṃ dinnattā vaṭṭati, gahaṇe āpatti natthīti attho.
மம ஸந்திகே…பே॰… ஏவங் பன தா³துங் ந வட்டதீதி வத்து²பரிச்சாக³லக்க²ணத்தா தா³னஸ்ஸ ஏவங் த³த³ந்தோ அபரிச்சஜித்வா தி³ன்னத்தா தா³னங் ந ஹோதீதி ந வட்டதி, ததோ ஏவ து³க்கடங் ஹோதி. ஆஹராபேதுங் பன வட்டதீதி புப்³பே³ ‘‘அகரொந்தஸ்ஸ ந தே³மீ’’தி வுத்தத்தா யதா²வுத்தஉபஜ்ஜா²யக்³க³ஹணாதீ³னி அகரொந்தே ஆசரியஸ்ஸேவ ஸந்தகங் ஹோதீதி கத்வா வுத்தங். கரொந்தே பன அந்தேவாஸிகஸ்ஸ ஸந்தகங் ப⁴வெய்ய ஸப்³ப³ஸோ அபரிச்சஜித்வா தி³ன்னத்தா. ஸகஸஞ்ஞாய விஜ்ஜமானத்தா ‘‘ஆஹராபேதுங் வட்டதீ’’தி வுத்தங் ஸியா. டீகாயங் (ஸாரத்த²॰ டீ॰ 2.635) பன ‘‘ஏவங் தி³ன்னங் ப⁴திஸதி³ஸத்தா ஆஹராபேதுங் வட்டதீ’’தி வுத்தங். ப⁴திஸதி³ஸே ஸதிபி கம்மே கதே ப⁴தி லத்³த⁴ப்³பா³ ஹோதி, தஸ்மா ஆரோபேதுங் ந வட்டெய்ய. விமதிவினோத³னியங் (வி॰ வி॰ டீ॰ 1.635) பன ‘‘ஆஹராபேதுங் வட்டதீதி கம்மே அகதே ப⁴திஸதி³ஸத்தா வுத்த’’ந்தி வுத்தங், தேன கம்மே கதே ஆஹராபேதுங் ந வட்டதீதி ஸித்³த⁴ங். உபஜ்ஜ²ங் க³ண்ஹிஸ்ஸதீதி ஸாமணேரஸ்ஸ தா³னங் தீ³பேதி, தேன ச ஸாமணேரகாலே த³த்வா உபஸம்பன்னகாலே அச்சி²ந்த³தோபி பாசித்தியங் தீ³பேதி. அயங் தாவ தா³னே வினிச்ச²யோதி இமினா தா³னவினிச்ச²யாதீ³னங் திண்ணங் வினிச்ச²யானங் ஏகபரிச்சே²த³கதபா⁴வங் தீ³பேதி.
Mama santike…pe… evaṃ pana dātuṃ na vaṭṭatīti vatthupariccāgalakkhaṇattā dānassa evaṃ dadanto apariccajitvā dinnattā dānaṃ na hotīti na vaṭṭati, tato eva dukkaṭaṃ hoti. Āharāpetuṃ pana vaṭṭatīti pubbe ‘‘akarontassa na demī’’ti vuttattā yathāvuttaupajjhāyaggahaṇādīni akaronte ācariyasseva santakaṃ hotīti katvā vuttaṃ. Karonte pana antevāsikassa santakaṃ bhaveyya sabbaso apariccajitvā dinnattā. Sakasaññāya vijjamānattā ‘‘āharāpetuṃ vaṭṭatī’’ti vuttaṃ siyā. Ṭīkāyaṃ (sārattha. ṭī. 2.635) pana ‘‘evaṃ dinnaṃ bhatisadisattā āharāpetuṃ vaṭṭatī’’ti vuttaṃ. Bhatisadise satipi kamme kate bhati laddhabbā hoti, tasmā āropetuṃ na vaṭṭeyya. Vimativinodaniyaṃ (vi. vi. ṭī. 1.635) pana ‘‘āharāpetuṃ vaṭṭatīti kamme akate bhatisadisattā vutta’’nti vuttaṃ, tena kamme kate āharāpetuṃ na vaṭṭatīti siddhaṃ. Upajjhaṃ gaṇhissatīti sāmaṇerassa dānaṃ dīpeti, tena ca sāmaṇerakāle datvā upasampannakāle acchindatopi pācittiyaṃ dīpeti. Ayaṃ tāva dāne vinicchayoti iminā dānavinicchayādīnaṃ tiṇṇaṃ vinicchayānaṃ ekaparicchedakatabhāvaṃ dīpeti.
விஸ்ஸாஸக்³கா³ஹலக்க²ணவினிச்ச²யகதா²
Vissāsaggāhalakkhaṇavinicchayakathā
70. அனுட்டா²னஸெய்யா நாம யாய ஸெய்யாய ஸயிதோ யாவ ஜீவிதிந்த்³ரியுபச்சே²த³ங் ந பாபுணாதி, தாவ வுச்சதி. த³த³மானேன ச மதகத⁴னங் தாவ யே தஸ்ஸ த⁴னே இஸ்ஸரா க³ஹட்டா² வா பப்³ப³ஜிதா வா, தேஸங் தா³தப்³ப³ந்தி எத்த² கே க³ஹட்டா² கே பப்³ப³ஜிதா கேன காரணேன தஸ்ஸ த⁴னே இஸ்ஸராதி? க³ஹட்டா² தாவ கி³லானுபட்டா²கபூ⁴தா தேன காரணேன கி³லானுபட்டா²கபா⁴க³பூ⁴தே தஸ்ஸ த⁴னே இஸ்ஸரா, யேஸஞ்ச வாணிஜானங் ஹத்த²தோ கப்பியகாரகேன பத்தாதி³பரிக்கா²ரோ கா³ஹாபிதோ, தேஸங் யங் தா³தப்³ப³மூலங், தே ச தஸ்ஸ த⁴னே இஸ்ஸரா, யேஸஞ்ச மாதாபிதூனங் அத்தா²ய பரிச்சி²ந்தி³த்வா வத்தா²னி ட²பிதானி, தேபி தஸ்ஸ த⁴னஸ்ஸ இஸ்ஸரா. ஏவமாதி³னா யேன யேன காரணேன யங் யங் பரிக்கா²ரத⁴னங் யேஹி யேஹி க³ஹட்டே²ஹி லபி⁴தப்³ப³ங் ஹோதி, தேன தேன காரணேன தே தே க³ஹட்டா² தஸ்ஸ தஸ்ஸ த⁴னஸ்ஸ இஸ்ஸரா.
70.Anuṭṭhānaseyyā nāma yāya seyyāya sayito yāva jīvitindriyupacchedaṃ na pāpuṇāti, tāva vuccati. Dadamānena ca matakadhanaṃ tāva ye tassa dhane issarā gahaṭṭhā vā pabbajitā vā, tesaṃ dātabbanti ettha ke gahaṭṭhā ke pabbajitā kena kāraṇena tassa dhane issarāti? Gahaṭṭhā tāva gilānupaṭṭhākabhūtā tena kāraṇena gilānupaṭṭhākabhāgabhūte tassa dhane issarā, yesañca vāṇijānaṃ hatthato kappiyakārakena pattādiparikkhāro gāhāpito, tesaṃ yaṃ dātabbamūlaṃ, te ca tassa dhane issarā, yesañca mātāpitūnaṃ atthāya paricchinditvā vatthāni ṭhapitāni, tepi tassa dhanassa issarā. Evamādinā yena yena kāraṇena yaṃ yaṃ parikkhāradhanaṃ yehi yehi gahaṭṭhehi labhitabbaṃ hoti, tena tena kāraṇena te te gahaṭṭhā tassa tassa dhanassa issarā.
பப்³ப³ஜிதா பன பா³ஹிரகா ததே²வ ஸதி காரணே இஸ்ஸரா. பஞ்சஸு பன ஸஹத⁴ம்மிகேஸு பி⁴க்கூ² ஸாமணேரா ச மதானங் பி⁴க்கு²ஸாமணேரானங் த⁴னங் வினாபி காரணேன தா³யாத³பா⁴வேன லப⁴ந்தி, ந இதரா. பி⁴க்கு²னீஸிக்க²மானஸாமணேரீனம்பி த⁴னங் தாயேவ லப⁴ந்தி, ந இதரே. தங் பன மதகத⁴னபா⁴ஜனங் சதுபச்சயபா⁴ஜனவினிச்ச²யே ஆவி ப⁴விஸ்ஸதி, ப³ஹூ பன வினயத⁴ரத்தே²ரா ‘‘யே தஸ்ஸ த⁴னஸ்ஸ இஸ்ஸரா க³ஹட்டா² வா பப்³ப³ஜிதா வா’’தி பாட²ங் நிஸ்ஸாய ‘‘மதபி⁴க்கு²ஸ்ஸ த⁴னங் க³ஹட்ட²பூ⁴தா ஞாதகா லப⁴ந்தீ’’தி வினிச்சி²னந்தி, தம்பி வினிச்ச²யங் தஸ்ஸ ச யுத்தாயுத்தபா⁴வங் தத்தே²வ வக்கா²ம.
Pabbajitā pana bāhirakā tatheva sati kāraṇe issarā. Pañcasu pana sahadhammikesu bhikkhū sāmaṇerā ca matānaṃ bhikkhusāmaṇerānaṃ dhanaṃ vināpi kāraṇena dāyādabhāvena labhanti, na itarā. Bhikkhunīsikkhamānasāmaṇerīnampi dhanaṃ tāyeva labhanti, na itare. Taṃ pana matakadhanabhājanaṃ catupaccayabhājanavinicchaye āvi bhavissati, bahū pana vinayadharattherā ‘‘ye tassa dhanassa issarā gahaṭṭhā vā pabbajitā vā’’ti pāṭhaṃ nissāya ‘‘matabhikkhussa dhanaṃ gahaṭṭhabhūtā ñātakā labhantī’’ti vinicchinanti, tampi vinicchayaṃ tassa ca yuttāyuttabhāvaṃ tattheva vakkhāma.
அனத்தமனஸ்ஸ ஸந்தகந்தி ‘‘து³ட்டு² கதங் தயா மயா அதி³ன்னங் மம ஸந்தகங் க³ண்ஹந்தேனா’’தி வசீபே⁴தே³ன வா சித்துப்பாத³மத்தேன வா தோ³மனஸ்ஸப்பத்தஸ்ஸ ஸந்தகங். யோ பன பட²மங்யேவ ‘‘ஸுட்டு² கதங் தயா மம ஸந்தகங் க³ண்ஹந்தேனா’’தி வசீபே⁴தே³ன வா சித்துப்பாத³மத்தேன வா அனுமோதி³த்வா பச்சா² கேனசி காரணேன குபிதோ, பச்சாஹராபேதுங் ந லப⁴தி. யோபி அதா³துகாமோ, சித்தேன பன அதி⁴வாஸேதி, ந கிஞ்சி வத³தீதி எத்த² து போராணடீகாயங் (ஸாரத்த²॰ டீ॰ 2.131) ‘‘சித்தேன பன அதி⁴வாஸேதீதி வுத்தமேவத்த²ங் விபா⁴வேதுங் ‘ந கிஞ்சி வத³தீ’தி வுத்த’’ந்தி வுத்தங். ஏவங் ஸதி ‘‘சித்தேனா’’தி இத³ங் அதி⁴வாஸனகிரியாய கரணங் ஹோதி. அதா³துகாமோதி எத்தா²பி தமேவ கரணங் ஸியா, ததோ ‘‘சித்தேன அதா³துகாமோ, சித்தேன அதி⁴வாஸேதீ’’திவசனங் ஓசித்யஸம்போஸகங் ந ப⁴வெய்ய. தங் ட²பெத்வா ‘‘அதா³துகாமோ’’தி எத்த² காயேனாதி வா வாசாயாதி வா அஞ்ஞங் கரணம்பி ந ஸம்ப⁴வதி, தத³ஸம்ப⁴வே ஸதி விஸேஸத்த²வாசகோ பன-ஸத்³தோ³பி நிரத்த²கோ. ந கிஞ்சி வத³தீதி எத்த² து வத³னகிரியாய கரணங் ‘‘வாசாயா’’தி பத³ங் இச்சி²தப்³ப³ங், ததா² ச ஸதி அஞ்ஞங் அதி⁴வாஸனகிரியாய கரணங், அஞ்ஞங் வத³னகிரியாய கரணங், அஞ்ஞா அதி⁴வாஸனகிரியா, அஞ்ஞா வத³னகிரியா, தஸ்மா ‘‘வுத்தமேவத்த²ங் விபா⁴வேது’’ந்தி வத்துங் ந அரஹதி, தஸ்மா யோபி சித்தேன அதா³துகாமோ ஹோதி, பன ததா²பி வாசாய அதி⁴வாஸேதி, ந கிஞ்சி வத³தீதி யோஜனங் கத்வா பன ‘‘அதி⁴வாஸேதீதி வுத்தமேவத்த²ங் பகாஸேதுங் ந கிஞ்சி வத³தீதி வுத்த’’ந்தி வத்துமரஹதி. எத்த² து பன-ஸத்³தோ³ அருசிலக்க²ணஸூசனத்தோ². ‘‘சித்தேனா’’தி இத³ங் அதா³துகாமகிரியாய கரணங், ‘‘வாசாயா’’தி அதி⁴வாஸனகிரியாய அவத³னகிரியாய ச கரணங். அதி⁴வாஸனகிரியா ச அவத³னகிரியாயேவ . ‘‘அதி⁴வாஸேதீ’’தி வுத்தே அவத³னகிரியாய அபாகடபா⁴வதோ தங் பகாஸேதுங் ‘‘ந கிஞ்சி வத³தீ’’தி வுத்தங், ஏவங் க³ய்ஹமானே புப்³பா³பரவசனத்தோ² ஓசித்யஸம்போஸகோ ஸியா, தஸ்மா எத்தகவிவரேஹி விசாரெத்வா க³ஹேதப்³போ³தி.
Anattamanassa santakanti ‘‘duṭṭhu kataṃ tayā mayā adinnaṃ mama santakaṃ gaṇhantenā’’ti vacībhedena vā cittuppādamattena vā domanassappattassa santakaṃ. Yo pana paṭhamaṃyeva ‘‘suṭṭhu kataṃ tayā mama santakaṃ gaṇhantenā’’ti vacībhedena vā cittuppādamattena vā anumoditvā pacchā kenaci kāraṇena kupito, paccāharāpetuṃ na labhati. Yopi adātukāmo, cittena pana adhivāseti, na kiñci vadatīti ettha tu porāṇaṭīkāyaṃ (sārattha. ṭī. 2.131) ‘‘cittena pana adhivāsetīti vuttamevatthaṃ vibhāvetuṃ ‘na kiñci vadatī’ti vutta’’nti vuttaṃ. Evaṃ sati ‘‘cittenā’’ti idaṃ adhivāsanakiriyāya karaṇaṃ hoti. Adātukāmoti etthāpi tameva karaṇaṃ siyā, tato ‘‘cittena adātukāmo, cittena adhivāsetī’’tivacanaṃ ocityasamposakaṃ na bhaveyya. Taṃ ṭhapetvā ‘‘adātukāmo’’ti ettha kāyenāti vā vācāyāti vā aññaṃ karaṇampi na sambhavati, tadasambhave sati visesatthavācako pana-saddopi niratthako. Na kiñci vadatīti ettha tu vadanakiriyāya karaṇaṃ ‘‘vācāyā’’ti padaṃ icchitabbaṃ, tathā ca sati aññaṃ adhivāsanakiriyāya karaṇaṃ, aññaṃ vadanakiriyāya karaṇaṃ, aññā adhivāsanakiriyā, aññā vadanakiriyā, tasmā ‘‘vuttamevatthaṃ vibhāvetu’’nti vattuṃ na arahati, tasmā yopi cittena adātukāmo hoti, pana tathāpi vācāya adhivāseti, na kiñci vadatīti yojanaṃ katvā pana ‘‘adhivāsetīti vuttamevatthaṃ pakāsetuṃ na kiñci vadatīti vutta’’nti vattumarahati. Ettha tu pana-saddo arucilakkhaṇasūcanattho. ‘‘Cittenā’’ti idaṃ adātukāmakiriyāya karaṇaṃ, ‘‘vācāyā’’ti adhivāsanakiriyāya avadanakiriyāya ca karaṇaṃ. Adhivāsanakiriyā ca avadanakiriyāyeva . ‘‘Adhivāsetī’’ti vutte avadanakiriyāya apākaṭabhāvato taṃ pakāsetuṃ ‘‘na kiñci vadatī’’ti vuttaṃ, evaṃ gayhamāne pubbāparavacanattho ocityasamposako siyā, tasmā ettakavivarehi vicāretvā gahetabboti.
லாப⁴பரிணாமனவினிச்ச²யகதா²
Lābhapariṇāmanavinicchayakathā
71. லாப⁴பரிணாமனவினிச்ச²யே தும்ஹாகங் ஸப்பிஆதீ³னி ஆப⁴தானீதி தும்ஹாகங் அத்தா²ய ஆப⁴தானி ஸப்பிஆதீ³னி. பரிணதபா⁴வங் ஜானித்வாபி வுத்தவிதி⁴னா விஞ்ஞாபெந்தேன தேஸங் ஸந்தகமேவ விஞ்ஞாபிதங் நாம ஹோதீதி ஆஹ ‘‘மய்ஹம்பி தே³தா²தி வத³தி, வட்டதீ’’தி.
71. Lābhapariṇāmanavinicchaye tumhākaṃ sappiādīni ābhatānīti tumhākaṃ atthāya ābhatāni sappiādīni. Pariṇatabhāvaṃ jānitvāpi vuttavidhinā viññāpentena tesaṃ santakameva viññāpitaṃ nāma hotīti āha ‘‘mayhampi dethāti vadati, vaṭṭatī’’ti.
‘‘புப்ப²ம்பி ஆரோபேதுங் ந வட்டதீதி இத³ங் பரிணதங் ஸந்தா⁴ய வுத்தங், ஸசே பன ஏகஸ்மிங் சேதியே பூஜிதங் புப்ப²ங் க³ஹெத்வா அஞ்ஞஸ்மிங் சேதியே பூஜேதி, வட்டதீ’’தி ஸாரத்த²தீ³பனியங் (ஸாரத்த²॰ டீ॰ 2.660) வுத்தங். அட்ட²கதா²யங் (பாரா॰ அட்ட²॰ 2.660) பன நியமெத்வா ‘‘அஞ்ஞஸ்ஸ சேதியஸ்ஸ அத்தா²ய ரோபிதமாலாவச்ச²தோ’’தி வுத்தத்தா ந கேவலங் பரிணதபா⁴வோயேவ கதி²தோ, அத² கோ² நியமெத்வா ரோபிதபா⁴வோபி. புப்ப²ம்பீதி பி-ஸத்³தே³ன குதோ மாலாவச்ச²ந்தி த³ஸ்ஸேதி. விமதிவினோத³னியங் (வி॰ வி॰ டீ॰ 1.660) பன ‘‘ரோபிதமாலாவச்ச²தோதி கேனசி நியமெத்வா ரோபிதங் ஸந்தா⁴ய வுத்தங், அனோசிதங் மிலாயமானங் ஓசினித்வா யத்த² கத்த²சி பூஜேதுங் வட்டதீ’’தி வுத்தங். டி²தங் தி³ஸ்வாதி ஸேஸகங் க³ஹெத்வா டி²தங் தி³ஸ்வா. இமஸ்ஸ ஸுனக²ஸ்ஸ மா தே³ஹி, ஏதஸ்ஸ தே³ஹீதி இத³ங் பரிணதேயேவ, திரச்சா²னக³தஸ்ஸ பரிச்சஜித்வா தி³ன்னே பன தங் பலாபெத்வா அஞ்ஞங் பு⁴ஞ்ஜாபேதுங் வட்டதி, தஸ்மா ‘‘கத்த² தே³மாதிஆதி³னா ஏகேனாகாரேன அனாபத்தி த³ஸ்ஸிதா. ஏவங் பன அபுச்சி²தேபி ‘அபரிணதங் இத³’ந்தி ஜானந்தேன அத்தனோ ருசியா யத்த² இச்ச²தி, தத்த² தா³பேதுங் வட்டதீ’’தி தீஸுபி க³ண்டி²பதே³ஸு வுத்தங். யத்த² இச்ச²த², தத்த² தே³தா²தி எத்தா²பி ‘‘தும்ஹாகங் ருசியா’’தி வுத்தத்தா யத்த² இச்ச²தி, தத்த² தா³பேதுங் லப⁴தி.
‘‘Pupphampi āropetuṃ na vaṭṭatīti idaṃ pariṇataṃ sandhāya vuttaṃ, sace pana ekasmiṃ cetiye pūjitaṃ pupphaṃ gahetvā aññasmiṃ cetiye pūjeti, vaṭṭatī’’ti sāratthadīpaniyaṃ (sārattha. ṭī. 2.660) vuttaṃ. Aṭṭhakathāyaṃ (pārā. aṭṭha. 2.660) pana niyametvā ‘‘aññassa cetiyassa atthāya ropitamālāvacchato’’ti vuttattā na kevalaṃ pariṇatabhāvoyeva kathito, atha kho niyametvā ropitabhāvopi. Pupphampīti pi-saddena kuto mālāvacchanti dasseti. Vimativinodaniyaṃ (vi. vi. ṭī. 1.660) pana ‘‘ropitamālāvacchatoti kenaci niyametvā ropitaṃ sandhāya vuttaṃ, anocitaṃ milāyamānaṃ ocinitvā yattha katthaci pūjetuṃ vaṭṭatī’’ti vuttaṃ. Ṭhitaṃ disvāti sesakaṃ gahetvā ṭhitaṃ disvā. Imassa sunakhassa mā dehi, etassa dehīti idaṃ pariṇateyeva, tiracchānagatassa pariccajitvā dinne pana taṃ palāpetvā aññaṃ bhuñjāpetuṃ vaṭṭati, tasmā ‘‘kattha demātiādinā ekenākārena anāpatti dassitā. Evaṃ pana apucchitepi ‘apariṇataṃ ida’nti jānantena attano ruciyā yattha icchati, tattha dāpetuṃ vaṭṭatī’’ti tīsupi gaṇṭhipadesu vuttaṃ. Yattha icchatha, tattha dethāti etthāpi ‘‘tumhākaṃ ruciyā’’ti vuttattā yattha icchati, tattha dāpetuṃ labhati.
பரிவாரே (பரி॰ அட்ட²॰ 329) பன நவ அத⁴ம்மிகானி தா³னானீதி ஸங்க⁴ஸ்ஸ பரிணதங் அஞ்ஞஸங்க⁴ஸ்ஸ வா சேதியஸ்ஸ வா புக்³க³லஸ்ஸ வா பரிணாமேதி, சேதியஸ்ஸ பரிணதங் அஞ்ஞசேதியஸ்ஸ வா ஸங்க⁴ஸ்ஸ வா புக்³க³லஸ்ஸ வா பரிணாமேதி, புக்³க³லஸ்ஸ பரிணதங் அஞ்ஞபுக்³க³லஸ்ஸ வா ஸங்க⁴ஸ்ஸ வா சேதியஸ்ஸ வா பரிணாமேதீதி ஏவங் வுத்தானி. நவ படிக்³க³ஹா பரிபோ⁴கா³ சாதி ஏதேஸங்யேவ தா³னானங் படிக்³க³ஹா ச பரிபோ⁴கா³ ச. தீணி த⁴ம்மிகானி தா³னானீதி ஸங்க⁴ஸ்ஸ நின்னங் ஸங்க⁴ஸ்ஸேவ தே³தி, சேதியஸ்ஸ நின்னங் சேதியஸ்ஸேவ தே³தி, புக்³க³லஸ்ஸ நின்னங் புக்³க³லஸ்ஸேவ தே³தீதி இமானி தீணி. படிக்³க³ஹபடிபோ⁴கா³பி தேஸங்யேவ படிக்³க³ஹா ச பரிபோ⁴கா³ சாதி ஆக³தங்.
Parivāre (pari. aṭṭha. 329) pana nava adhammikāni dānānīti saṅghassa pariṇataṃ aññasaṅghassa vā cetiyassa vā puggalassa vā pariṇāmeti, cetiyassa pariṇataṃ aññacetiyassa vā saṅghassa vā puggalassa vā pariṇāmeti, puggalassa pariṇataṃ aññapuggalassa vā saṅghassa vā cetiyassa vā pariṇāmetīti evaṃ vuttāni. Nava paṭiggahā paribhogācāti etesaṃyeva dānānaṃ paṭiggahā ca paribhogā ca. Tīṇi dhammikāni dānānīti saṅghassa ninnaṃ saṅghasseva deti, cetiyassa ninnaṃ cetiyasseva deti, puggalassa ninnaṃ puggalasseva detīti imāni tīṇi. Paṭiggahapaṭibhogāpi tesaṃyeva paṭiggahā ca paribhogā cāti āgataṃ.
இதி வினயஸங்க³ஹஸங்வண்ணனாபூ⁴தே வினயாலங்காரே
Iti vinayasaṅgahasaṃvaṇṇanābhūte vinayālaṅkāre
தா³னலக்க²ணாதி³வினிச்ச²யகதா²லங்காரோ நாம
Dānalakkhaṇādivinicchayakathālaṅkāro nāma
தேரஸமோ பரிச்சே²தோ³.
Terasamo paricchedo.
