| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༩. དཱནམཧཔྥལསུཏྟཾ
9. Dānamahapphalasuttaṃ
༥༢. ཨེཀཾ སམཡཾ བྷགཝཱ ཙམྤཱཡཾ ཝིཧརཏི གགྒརཱཡ པོཀྑརཎིཡཱ ཏཱིརེ། ཨཐ ཁོ སམྦཧུལཱ ཙམྤེཡྻཀཱ ཨུཔཱསཀཱ ཡེན ཨཱཡསྨཱ སཱརིཔུཏྟོ ཏེནུཔསངྐམིཾསུ; ཨུཔསངྐམིཏྭཱ ཨཱཡསྨནྟཾ སཱརིཔུཏྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣཱ ཁོ ཙམྤེཡྻཀཱ ཨུཔཱསཀཱ ཨཱཡསྨནྟཾ སཱརིཔུཏྟཾ ཨེཏདཝོཙུཾ – ‘‘ཙིརསྶུཏཱ ནོ, བྷནྟེ 1, བྷགཝཏོ སམྨུཁཱ དྷམྨཱིཀཐཱ། སཱདྷུ མཡཾ, བྷནྟེ, ལབྷེཡྻཱམ བྷགཝཏོ སམྨུཁཱ དྷམྨིཾ ཀཐཾ 2 སཝནཱཡཱ’’ཏི། ‘‘ཏེནཧཱཝུསོ, ཏདཧུཔོསཐེ ཨཱགཙྪེཡྻཱཐ, ཨཔྤེཝ ནཱམ ལབྷེཡྻཱཐ བྷགཝཏོ སམྨུཁཱ 3 དྷམྨིཾ ཀཐཾ སཝནཱཡཱ’’ཏི། ‘‘ཨེཝཾ, བྷནྟེ’’ཏི ཁོ ཙམྤེཡྻཀཱ ཨུཔཱསཀཱ ཨཱཡསྨཏོ སཱརིཔུཏྟསྶ པཊིསྶུཏྭཱ ཨུཊྛཱཡཱསནཱ ཨཱཡསྨནྟཾ སཱརིཔུཏྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐམིཾསུ།
52. Ekaṃ samayaṃ bhagavā campāyaṃ viharati gaggarāya pokkharaṇiyā tīre. Atha kho sambahulā campeyyakā upāsakā yena āyasmā sāriputto tenupasaṅkamiṃsu; upasaṅkamitvā āyasmantaṃ sāriputtaṃ abhivādetvā ekamantaṃ nisīdiṃsu. Ekamantaṃ nisinnā kho campeyyakā upāsakā āyasmantaṃ sāriputtaṃ etadavocuṃ – ‘‘cirassutā no, bhante 4, bhagavato sammukhā dhammīkathā. Sādhu mayaṃ, bhante, labheyyāma bhagavato sammukhā dhammiṃ kathaṃ 5 savanāyā’’ti. ‘‘Tenahāvuso, tadahuposathe āgaccheyyātha, appeva nāma labheyyātha bhagavato sammukhā 6 dhammiṃ kathaṃ savanāyā’’ti. ‘‘Evaṃ, bhante’’ti kho campeyyakā upāsakā āyasmato sāriputtassa paṭissutvā uṭṭhāyāsanā āyasmantaṃ sāriputtaṃ abhivādetvā padakkhiṇaṃ katvā pakkamiṃsu.
ཨཐ ཁོ ཙམྤེཡྻཀཱ ཨུཔཱསཀཱ ཏདཧུཔོསཐེ ཡེནཱཡསྨཱ སཱརིཔུཏྟོ ཏེནུཔསངྐམིཾསུ; ཨུཔསངྐམིཏྭཱ ཨཱཡསྨནྟཾ སཱརིཔུཏྟཾ ཨབྷིཝཱདེཏྭཱ ཨེཀམནྟཾ ཨཊྛཾསུ། ཨཐ ཁོ ཨཱཡསྨཱ སཱརིཔུཏྟོ ཏེཧི ཙམྤེཡྻཀེཧི ཨུཔཱསཀེཧི སདྡྷིཾ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ སཱརིཔུཏྟོ བྷགཝནྟཾ ཨེཏདཝོཙ –
Atha kho campeyyakā upāsakā tadahuposathe yenāyasmā sāriputto tenupasaṅkamiṃsu; upasaṅkamitvā āyasmantaṃ sāriputtaṃ abhivādetvā ekamantaṃ aṭṭhaṃsu. Atha kho āyasmā sāriputto tehi campeyyakehi upāsakehi saddhiṃ yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā sāriputto bhagavantaṃ etadavoca –
‘‘སིཡཱ ནུ ཁོ, བྷནྟེ, ཨིདྷེཀཙྩསྶ ཏཱདིསཾཡེཝ དཱནཾ དིནྣཾ ན མཧཔྥལཾ ཧོཏི ན མཧཱནིསཾསཾ; སིཡཱ པན, བྷནྟེ, ཨིདྷེཀཙྩསྶ ཏཱདིསཾཡེཝ དཱནཾ དིནྣཾ མཧཔྥལཾ ཧོཏི མཧཱནིསཾས’’ནྟི? ‘‘སིཡཱ, སཱརིཔུཏྟ, ཨིདྷེཀཙྩསྶ ཏཱདིསཾཡེཝ དཱནཾ དིནྣཾ ན མཧཔྥལཾ ཧོཏི ན མཧཱནིསཾསཾ; སིཡཱ པན, སཱརིཔུཏྟ, ཨིདྷེཀཙྩསྶ ཏཱདིསཾཡེཝ དཱནཾ དིནྣཾ མཧཔྥལཾ ཧོཏི མཧཱནིསཾས’’ནྟི། ‘‘ཀོ ནུ ཁོ, བྷནྟེ, ཧེཏུ ཀོ པཙྩཡོ ཡེན མིདྷེཀཙྩསྶ ཏཱདིསཾཡེཝ དཱནཾ དིནྣཾ ན མཧཔྥལཾ ཧོཏི ན མཧཱནིསཾསཾ; ཀོ ནུ ཁོ, བྷནྟེ, ཧེཏུ ཀོ པཙྩཡོ ཡེན མིདྷེཀཙྩསྶ ཏཱདིསཾཡེཝ དཱནཾ དིནྣཾ མཧཔྥལཾ ཧོཏི མཧཱནིསཾས’’ནྟི?
‘‘Siyā nu kho, bhante, idhekaccassa tādisaṃyeva dānaṃ dinnaṃ na mahapphalaṃ hoti na mahānisaṃsaṃ; siyā pana, bhante, idhekaccassa tādisaṃyeva dānaṃ dinnaṃ mahapphalaṃ hoti mahānisaṃsa’’nti? ‘‘Siyā, sāriputta, idhekaccassa tādisaṃyeva dānaṃ dinnaṃ na mahapphalaṃ hoti na mahānisaṃsaṃ; siyā pana, sāriputta, idhekaccassa tādisaṃyeva dānaṃ dinnaṃ mahapphalaṃ hoti mahānisaṃsa’’nti. ‘‘Ko nu kho, bhante, hetu ko paccayo yena midhekaccassa tādisaṃyeva dānaṃ dinnaṃ na mahapphalaṃ hoti na mahānisaṃsaṃ; ko nu kho, bhante, hetu ko paccayo yena midhekaccassa tādisaṃyeva dānaṃ dinnaṃ mahapphalaṃ hoti mahānisaṃsa’’nti?
‘‘ཨིདྷ, སཱརིཔུཏྟ, ཨེཀཙྩོ སཱཔེཁོ 7 དཱནཾ དེཏི, པཏིབདྡྷཙིཏྟོ 8 དཱནཾ དེཏི, སནྣིདྷིཔེཁོ དཱནཾ དེཏི, ‘ཨིམཾ པེཙྩ པརིབྷུཉྫིསྶཱམཱི’ཏི དཱནཾ དེཏི། སོ ཏཾ དཱནཾ དེཏི སམཎསྶ ཝཱ བྲཱཧྨཎསྶ ཝཱ ཨནྣཾ པཱནཾ ཝཏྠཾ ཡཱནཾ མཱལཱགནྡྷཝིལེཔནཾ སེཡྻཱཝསཐཔདཱིཔེཡྻཾ། ཏཾ ཀིཾ མཉྙསི, སཱརིཔུཏྟ, དདེཡྻ ཨིདྷེཀཙྩོ ཨེཝརཱུཔཾ དཱན’’ནྟི? ‘‘ཨེཝཾ, བྷནྟེ’’།
‘‘Idha, sāriputta, ekacco sāpekho 9 dānaṃ deti, patibaddhacitto 10 dānaṃ deti, sannidhipekho dānaṃ deti, ‘imaṃ pecca paribhuñjissāmī’ti dānaṃ deti. So taṃ dānaṃ deti samaṇassa vā brāhmaṇassa vā annaṃ pānaṃ vatthaṃ yānaṃ mālāgandhavilepanaṃ seyyāvasathapadīpeyyaṃ. Taṃ kiṃ maññasi, sāriputta, dadeyya idhekacco evarūpaṃ dāna’’nti? ‘‘Evaṃ, bhante’’.
‘‘ཏཏྲ, སཱརིཔུཏྟ, ཡྭཱཡཾ སཱཔེཁོ དཱནཾ དེཏི , པཏིབདྡྷཙིཏྟོ དཱནཾ དེཏི, སནྣིདྷིཔེཁོ དཱནཾ དེཏི, ‘ཨིམཾ པེཙྩ པརིབྷུཉྫིསྶཱམཱི’ཏི དཱནཾ དེཏི། སོ ཏཾ དཱནཾ དཏྭཱ ཀཱཡསྶ བྷེདཱ པརཾ མརཎཱ ཙཱཏུམཧཱརཱཛིཀཱནཾ དེཝཱནཾ སཧབྱཏཾ ཨུཔཔཛྫཏི། སོ ཏཾ ཀམྨཾ ཁེཔེཏྭཱ ཏཾ ཨིདྡྷིཾ ཏཾ ཡསཾ ཏཾ ཨཱདྷིཔཙྩཾ ཨཱགཱམཱི ཧོཏི ཨཱགནྟཱ ཨིཏྠཏྟཾ།
‘‘Tatra, sāriputta, yvāyaṃ sāpekho dānaṃ deti , patibaddhacitto dānaṃ deti, sannidhipekho dānaṃ deti, ‘imaṃ pecca paribhuñjissāmī’ti dānaṃ deti. So taṃ dānaṃ datvā kāyassa bhedā paraṃ maraṇā cātumahārājikānaṃ devānaṃ sahabyataṃ upapajjati. So taṃ kammaṃ khepetvā taṃ iddhiṃ taṃ yasaṃ taṃ ādhipaccaṃ āgāmī hoti āgantā itthattaṃ.
‘‘ཨིདྷ པན, སཱརིཔུཏྟ, ཨེཀཙྩོ ན ཧེཝ ཁོ སཱཔེཁོ དཱནཾ དེཏི, ན པཏིབདྡྷཙིཏྟོ དཱནཾ དེཏི, ན སནྣིདྷིཔེཁོ དཱནཾ དེཏི, ན ‘ཨིམཾ པེཙྩ པརིབྷུཉྫིསྶཱམཱི’ཏི དཱནཾ དེཏི; ཨཔི ཙ ཁོ ‘སཱཧུ དཱན’ནྟི དཱནཾ དེཏི…པེ॰… ནཔི ‘སཱཧུ དཱན’ནྟི དཱནཾ དེཏི; ཨཔི ཙ ཁོ ‘དིནྣཔུབྦཾ ཀཏཔུབྦཾ པིཏུཔིཏཱམཧེཧི ན ཨརཧཱམི པོརཱཎཾ ཀུལཝཾསཾ ཧཱཔེཏུ’ནྟི དཱནཾ དེཏི…པེ॰… ནཔི ‘དིནྣཔུབྦཾ ཀཏཔུབྦཾ པིཏུཔིཏཱམཧེཧི ན ཨརཧཱམི པོརཱཎཾ ཀུལཝཾསཾ ཧཱཔེཏུ’ནྟི དཱནཾ དེཏི; ཨཔི ཙ ཁོ ‘ཨཧཾ པཙཱམི, ཨིམེ ན པཙནྟི, ནཱརཧཱམི པཙནྟོ ཨཔཙནྟཱནཾ དཱནཾ ཨདཱཏུ’ནྟི དཱནཾ དེཏི…པེ॰… ནཔི ‘ཨཧཾ པཙཱམི, ཨིམེ ན པཙནྟི, ནཱརཧཱམི པཙནྟོ ཨཔཙནྟཱནཾ དཱནཾ ཨདཱཏུ’ནྟི དཱནཾ དེཏི; ཨཔི ཙ ཁོ ‘ཡཐཱ ཏེསཾ པུབྦཀཱནཾ ཨིསཱིནཾ ཏཱནི མཧཱཡཉྙཱནི ཨཧེསུཾ, སེཡྻཐིདཾ – ཨཊྛཀསྶ ཝཱམཀསྶ ཝཱམདེཝསྶ ཝེསྶཱམིཏྟསྶ ཡམདགྒིནོ ཨངྒཱིརསསྶ བྷཱརདྭཱཛསྶ ཝཱསེཊྛསྶ ཀསྶཔསྶ བྷགུནོ, ཨེཝཾ མེ ཨཡཾ དཱནསཾཝིབྷཱགོ བྷཝིསྶཏཱི’ཏི དཱནཾ དེཏི…པེ॰… ནཔི ‘ཡཐཱ ཏེསཾ པུབྦཀཱནཾ ཨིསཱིནཾ ཏཱནི མཧཱཡཉྙཱནི ཨཧེསུཾ, སེཡྻཐིདཾ – ཨཊྛཀསྶ ཝཱམཀསྶ ཝཱམདེཝསྶ ཝེསྶཱམིཏྟསྶ ཡམདགྒིནོ ཨངྒཱིརསསྶ བྷཱརདྭཱཛསྶ ཝཱསེཊྛསྶ ཀསྶཔསྶ བྷགུནོ, ཨེཝཾ མེ ཨཡཾ དཱནསཾཝིབྷཱགོ བྷཝིསྶཏཱི’ཏི དཱནཾ དེཏི; ཨཔི ཙ ཁོ ‘ཨིམཾ མེ དཱནཾ དདཏོ ཙིཏྟཾ པསཱིདཏི, ཨཏྟམནཏཱ སོམནསྶཾ ཨུཔཛཱཡཏཱི’ཏི དཱནཾ དེཏི…པེ॰… ནཔི ‘ཨིམཾ མེ དཱནཾ དདཏོ ཙིཏྟཾ པསཱིདཏི, ཨཏྟམནཏཱ སོམནསྶཾ ཨུཔཛཱཡཏཱི’ཏི དཱནཾ དེཏི; ཨཔི ཙ ཁོ ཙིཏྟཱལངྐཱརཙིཏྟཔརིཀྑཱརཾ དཱནཾ དེཏི། སོ ཏཾ དཱནཾ དེཏི སམཎསྶ ཝཱ བྲཱཧྨཎསྶ ཝཱ ཨནྣཾ པཱནཾ ཝཏྠཾ ཡཱནཾ མཱལཱགནྡྷཝིལེཔནཾ སེཡྻཱཝསཐཔདཱིཔེཡྻཾ། ཏཾ ཀིཾ མཉྙསི, སཱརིཔུཏྟ, དདེཡྻ ཨིདྷེཀཙྩོ ཨེཝརཱུཔཾ དཱན’’ནྟི? ‘‘ཨེཝཾ, བྷནྟེ’’།
‘‘Idha pana, sāriputta, ekacco na heva kho sāpekho dānaṃ deti, na patibaddhacitto dānaṃ deti, na sannidhipekho dānaṃ deti, na ‘imaṃ pecca paribhuñjissāmī’ti dānaṃ deti; api ca kho ‘sāhu dāna’nti dānaṃ deti…pe… napi ‘sāhu dāna’nti dānaṃ deti; api ca kho ‘dinnapubbaṃ katapubbaṃ pitupitāmahehi na arahāmi porāṇaṃ kulavaṃsaṃ hāpetu’nti dānaṃ deti…pe… napi ‘dinnapubbaṃ katapubbaṃ pitupitāmahehi na arahāmi porāṇaṃ kulavaṃsaṃ hāpetu’nti dānaṃ deti; api ca kho ‘ahaṃ pacāmi, ime na pacanti, nārahāmi pacanto apacantānaṃ dānaṃ adātu’nti dānaṃ deti…pe… napi ‘ahaṃ pacāmi, ime na pacanti, nārahāmi pacanto apacantānaṃ dānaṃ adātu’nti dānaṃ deti; api ca kho ‘yathā tesaṃ pubbakānaṃ isīnaṃ tāni mahāyaññāni ahesuṃ, seyyathidaṃ – aṭṭhakassa vāmakassa vāmadevassa vessāmittassa yamadaggino aṅgīrasassa bhāradvājassa vāseṭṭhassa kassapassa bhaguno, evaṃ me ayaṃ dānasaṃvibhāgo bhavissatī’ti dānaṃ deti…pe… napi ‘yathā tesaṃ pubbakānaṃ isīnaṃ tāni mahāyaññāni ahesuṃ, seyyathidaṃ – aṭṭhakassa vāmakassa vāmadevassa vessāmittassa yamadaggino aṅgīrasassa bhāradvājassa vāseṭṭhassa kassapassa bhaguno, evaṃ me ayaṃ dānasaṃvibhāgo bhavissatī’ti dānaṃ deti; api ca kho ‘imaṃ me dānaṃ dadato cittaṃ pasīdati, attamanatā somanassaṃ upajāyatī’ti dānaṃ deti…pe… napi ‘imaṃ me dānaṃ dadato cittaṃ pasīdati, attamanatā somanassaṃ upajāyatī’ti dānaṃ deti; api ca kho cittālaṅkāracittaparikkhāraṃ dānaṃ deti. So taṃ dānaṃ deti samaṇassa vā brāhmaṇassa vā annaṃ pānaṃ vatthaṃ yānaṃ mālāgandhavilepanaṃ seyyāvasathapadīpeyyaṃ. Taṃ kiṃ maññasi, sāriputta, dadeyya idhekacco evarūpaṃ dāna’’nti? ‘‘Evaṃ, bhante’’.
‘‘ཏཏྲ, སཱརིཔུཏྟ, ཡྭཱཡཾ ན ཧེཝ 11 སཱཔེཁོ དཱནཾ དེཏི; ན པཏིབདྡྷཙིཏྟོ དཱནཾ དེཏི; ན སནྣིདྷིཔེཁོ དཱནཾ དེཏི; ན ‘ཨིམཾ པེཙྩ པརིབྷུཉྫིསྶཱམཱི’ཏི དཱནཾ དེཏི; ནཔི ‘སཱཧུ དཱན’ནྟི དཱནཾ དེཏི; ནཔི ‘དིནྣཔུབྦཾ ཀཏཔུབྦཾ པིཏུཔིཏཱམཧེཧི ན ཨརཧཱམི པོརཱཎཾ ཀུལཝཾསཾ ཧཱཔེཏུ’ནྟི དཱནཾ དེཏི; ནཔི ‘ཨཧཾ པཙཱམི, ཨིམེ ན པཙནྟི, ནཱརཧཱམི པཙནྟོ ཨཔཙནྟཱནཾ དཱནཾ ཨདཱཏུ’ནྟི དཱནཾ དེཏི; ནཔི ‘ཡཐཱ ཏེསཾ པུབྦཀཱནཾ ཨིསཱིནཾ ཏཱནི མཧཱཡཉྙཱནི ཨཧེསུཾ, སེཡྻཐིདཾ – ཨཊྛཀསྶ ཝཱམཀསྶ ཝཱམདེཝསྶ ཝེསྶཱམིཏྟསྶ ཡམདགྒིནོ ཨངྒཱིརསསྶ བྷཱརདྭཱཛསྶ ཝཱསེཊྛསྶ ཀསྶཔསྶ བྷགུནོ, ཨེཝཾ མེ ཨཡཾ དཱནསཾཝིབྷཱགོ བྷཝིསྶཏཱི’ཏི དཱནཾ དེཏི; ནཔི ‘ཨིམཾ མེ དཱནཾ དདཏོ ཙིཏྟཾ པསཱིདཏི, ཨཏྟམནཏཱ སོམནསྶཾ ཨུཔཛཱཡཏཱི’ཏི དཱནཾ དེཏི; ཨཔི ཙ ཁོ ཙིཏྟཱལངྐཱརཙིཏྟཔརིཀྑཱརཾ དཱནཾ དེཏི། སོ ཏཾ དཱནཾ དཏྭཱ ཀཱཡསྶ བྷེདཱ པརཾ མརཎཱ བྲཧྨཀཱཡིཀཱནཾ དེཝཱནཾ སཧབྱཏཾ ཨུཔཔཛྫཏི། སོ ཏཾ ཀམྨཾ ཁེཔེཏྭཱ ཏཾ ཨིདྡྷིཾ ཏཾ ཡསཾ ཏཾ ཨཱདྷིཔཙྩཾ ཨནཱགཱམཱི ཧོཏི ཨནཱགནྟཱ ཨིཏྠཏྟཾ། ཨཡཾ ཁོ, སཱརིཔུཏྟ, ཧེཏུ ཨཡཾ པཙྩཡོ ཡེན མིདྷེཀཙྩསྶ ཏཱདིསཾཡེཝ དཱནཾ དིནྣཾ ན མཧཔྥལཾ ཧོཏི ན མཧཱནིསཾསཾ། ཨཡཾ པན, སཱརིཔུཏྟ, ཧེཏུ ཨཡཾ པཙྩཡོ ཡེན མིདྷེཀཙྩསྶ ཏཱདིསཾཡེཝ དཱནཾ དིནྣཾ མཧཔྥལཾ ཧོཏི མཧཱནིསཾས’’ནྟི། ནཝམཾ།
‘‘Tatra, sāriputta, yvāyaṃ na heva 12 sāpekho dānaṃ deti; na patibaddhacitto dānaṃ deti; na sannidhipekho dānaṃ deti; na ‘imaṃ pecca paribhuñjissāmī’ti dānaṃ deti; napi ‘sāhu dāna’nti dānaṃ deti; napi ‘dinnapubbaṃ katapubbaṃ pitupitāmahehi na arahāmi porāṇaṃ kulavaṃsaṃ hāpetu’nti dānaṃ deti; napi ‘ahaṃ pacāmi, ime na pacanti, nārahāmi pacanto apacantānaṃ dānaṃ adātu’nti dānaṃ deti; napi ‘yathā tesaṃ pubbakānaṃ isīnaṃ tāni mahāyaññāni ahesuṃ, seyyathidaṃ – aṭṭhakassa vāmakassa vāmadevassa vessāmittassa yamadaggino aṅgīrasassa bhāradvājassa vāseṭṭhassa kassapassa bhaguno, evaṃ me ayaṃ dānasaṃvibhāgo bhavissatī’ti dānaṃ deti; napi ‘imaṃ me dānaṃ dadato cittaṃ pasīdati, attamanatā somanassaṃ upajāyatī’ti dānaṃ deti; api ca kho cittālaṅkāracittaparikkhāraṃ dānaṃ deti. So taṃ dānaṃ datvā kāyassa bhedā paraṃ maraṇā brahmakāyikānaṃ devānaṃ sahabyataṃ upapajjati. So taṃ kammaṃ khepetvā taṃ iddhiṃ taṃ yasaṃ taṃ ādhipaccaṃ anāgāmī hoti anāgantā itthattaṃ. Ayaṃ kho, sāriputta, hetu ayaṃ paccayo yena midhekaccassa tādisaṃyeva dānaṃ dinnaṃ na mahapphalaṃ hoti na mahānisaṃsaṃ. Ayaṃ pana, sāriputta, hetu ayaṃ paccayo yena midhekaccassa tādisaṃyeva dānaṃ dinnaṃ mahapphalaṃ hoti mahānisaṃsa’’nti. Navamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༩. དཱནམཧཔྥལསུཏྟཝཎྞནཱ • 9. Dānamahapphalasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༩. དཱནམཧཔྥལསུཏྟཝཎྞནཱ • 9. Dānamahapphalasuttavaṇṇanā
