| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. தா³னமஹப்ப²லஸுத்தவண்ணனா
9. Dānamahapphalasuttavaṇṇanā
52. நவமே ஸாபேகோ²தி ஸதண்ஹோ. படிப³த்³த⁴சித்தோதி விபாகே ப³த்³த⁴சித்தோ. ஸன்னிதி⁴பேகோ²தி நிதா⁴னபேகோ² ஹுத்வா. பேச்சாதி பரலோகங் க³ந்த்வா. தங் கம்மங் கே²பெத்வாதி தங் கம்மவிபாகங் கே²பெத்வா. இத்³தி⁴ந்தி விபாகித்³தி⁴ங். யஸந்தி பரிவாரஸம்பத³ங். ஆதி⁴பச்சந்தி ஜெட்ட²பா⁴வகாரணங். ஆக³ந்தா இத்த²த்தந்தி இத்த²பா⁴வங் இமே பஞ்சக்க²ந்தே⁴ புன ஆக³ந்தா, ந தத்ரூபபத்திகோ ந உபரூபபத்திகோ, ஹெட்டா²கா³மீயேவ ஹோதீதி அத்தோ². ஸாஹு தா³னந்தி தா³னங் நாமேதங் ஸாது⁴ ப⁴த்³த³கங் ஸுந்த³ரங். தானி மஹாயஞ்ஞானீதி தானி ஸப்பினவனீதத³தி⁴மது⁴பா²ணிதாதீ³ஹி நிட்டா²னங் க³தானி மஹாதா³னானி. சித்தாலங்காரசித்தபரிக்கா²ரந்தி ஸமத²விபஸ்ஸனாசித்தஸ்ஸ அலங்காரபூ⁴தஞ்சேவ பரிவாரபூ⁴தஞ்ச. ப்³ரஹ்மகாயிகானங் தே³வானங் ஸஹப்³யதந்தி ந ஸக்கா தத்த² தா³னேன உபபஜ்ஜிதுங். யஸ்மா பன தங் ஸமத²விபஸ்ஸனாசித்தஸ்ஸ அலங்காரபூ⁴தங், தஸ்மா தேன தா³னாலங்கதேன சித்தேன ஜா²னஞ்சேவ அரியமக்³க³ஞ்ச நிப்³ப³த்தெத்வா ஜா²னேன தத்த² உபபஜ்ஜதி. அனாகா³மீ ஹோதீதி ஜா²னானாகா³மீ நாம ஹோதி. அனாக³ந்தா இத்த²த்தந்தி புன இத்த²பா⁴வங் ந ஆக³ந்தா, உபரூபபத்திகோ வா தத்ரூபபத்திகோ வா ஹுத்வா தத்தே²வ பரினிப்³பா³யதி. இதி இமேஸு தா³னேஸு பட²மங் தண்ஹுத்தரியதா³னங், து³தியங் சித்தீகாரதா³னங், ததியங் ஹிரொத்தப்பதா³னங், சதுத்த²ங் நிரவஸேஸதா³னங் , பஞ்சமங் த³க்கி²ணெய்யதா³னங், ச²ட்ட²ங் ஸோமனஸ்ஸுபவிசாரதா³னங், ஸத்தமங் அலங்காரபரிவாரதா³னங் நாமாதி.
52. Navame sāpekhoti sataṇho. Paṭibaddhacittoti vipāke baddhacitto. Sannidhipekhoti nidhānapekho hutvā. Peccāti paralokaṃ gantvā. Taṃ kammaṃ khepetvāti taṃ kammavipākaṃ khepetvā. Iddhinti vipākiddhiṃ. Yasanti parivārasampadaṃ. Ādhipaccanti jeṭṭhabhāvakāraṇaṃ. Āgantā itthattanti itthabhāvaṃ ime pañcakkhandhe puna āgantā, na tatrūpapattiko na uparūpapattiko, heṭṭhāgāmīyeva hotīti attho. Sāhu dānanti dānaṃ nāmetaṃ sādhu bhaddakaṃ sundaraṃ. Tāni mahāyaññānīti tāni sappinavanītadadhimadhuphāṇitādīhi niṭṭhānaṃ gatāni mahādānāni. Cittālaṅkāracittaparikkhāranti samathavipassanācittassa alaṅkārabhūtañceva parivārabhūtañca. Brahmakāyikānaṃ devānaṃ sahabyatanti na sakkā tattha dānena upapajjituṃ. Yasmā pana taṃ samathavipassanācittassa alaṅkārabhūtaṃ, tasmā tena dānālaṅkatena cittena jhānañceva ariyamaggañca nibbattetvā jhānena tattha upapajjati. Anāgāmī hotīti jhānānāgāmī nāma hoti. Anāgantā itthattanti puna itthabhāvaṃ na āgantā, uparūpapattiko vā tatrūpapattiko vā hutvā tattheva parinibbāyati. Iti imesu dānesu paṭhamaṃ taṇhuttariyadānaṃ, dutiyaṃ cittīkāradānaṃ, tatiyaṃ hirottappadānaṃ, catutthaṃ niravasesadānaṃ , pañcamaṃ dakkhiṇeyyadānaṃ, chaṭṭhaṃ somanassupavicāradānaṃ, sattamaṃ alaṅkāraparivāradānaṃ nāmāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. தா³னமஹப்ப²லஸுத்தங் • 9. Dānamahapphalasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. தா³னமஹப்ப²லஸுத்தவண்ணனா • 9. Dānamahapphalasuttavaṇṇanā
