| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9. தா³னமஹப்ப²லஸுத்தவண்ணனா
9. Dānamahapphalasuttavaṇṇanā
52. நவமே ‘‘ஸாஹு தா³ன’’ந்தி தா³னங் தே³தீதி ‘‘தா³னங் நாம ஸாது⁴ ஸுந்த³ர’’ந்தி தா³னங் தே³தீதி அத்தோ². தா³னஞ்ஹி த³த்வா தங் பச்சவெக்க²ந்தஸ்ஸ பாமோஜ்ஜபீதிஸோமனஸ்ஸாத³யோ உப்பஜ்ஜந்தி, லோப⁴தோ³ஸஇஸ்ஸாமச்சே²ராத³யோ விதூ³ரீப⁴வந்தி. இதா³னி தா³னங் அனுகூலத⁴ம்மபரிப்³ரூஹனேன பச்சனீகத⁴ம்மவிதூ³ரீகரணேன ச பா⁴வனாசித்தஸ்ஸ உபஸோப⁴னாய ச பரிக்கா²ராய ச ஹோதீதி ‘‘அலங்காரபூ⁴தஞ்சேவ பரிவாரபூ⁴தஞ்ச தே³தீ’’தி வுத்தங். ஜா²னானாகா³மீ நாம ஹோதி ஜா²னங் நிப்³ப³த்தெத்வா ப்³ரஹ்மலோகூபபன்னானங் அரியானங் ஹெட்டா² அனுப்பஜ்ஜனதோ. இமங் பேச்ச பரிபு⁴ஞ்ஜிஸ்ஸாமீதி ஸாபெக்க²ஸ்ஸ தா³னங் பரலோகப²லாஸாய ஸாதிஸயாய ச புப்³பா³சாரவஸேன உப்பஜ்ஜமானாய அனுப⁴வத்தா தண்ஹுத்தரங் நாம ஹோதீதி ஆஹ ‘‘பட²மங் தண்ஹுத்தரியதா³ன’’ந்தி. தா³னங் நாம பு³த்³தா⁴தீ³ஹி பஸத்த²ந்தி க³ருங் சித்தீகாரங் உபட்ட²பெத்வா தா³தப்³ப³த்தா ‘‘து³தியங் சித்தீகாரதா³ன’’ந்தி வுத்தங். புப்³ப³கேஹி பிதுபிதாமஹேஹி தி³ன்னபுப்³ப³ங் கதபுப்³ப³ங் ஜஹாபேதுங் நாம நானுச்ச²விகந்தி அத்தபா⁴வஸபா⁴க³வஸேன ஹிரொத்தப்பங் பச்சுபட்ட²பெத்வா தா³தப்³ப³தோ ‘‘ததியங் ஹிரொத்தப்பதா³ன’’ந்தி வுத்தங். ‘‘அஹங் பசாமி, ந இமே பசந்தி, நாரஹாமி பசந்தோ அபசந்தானங் தா³னங் அதா³து’’ந்தி ஏவங்ஸஞ்ஞீ ஹுத்வா தெ³ந்தோ நிரவஸேஸங் கத்வா தே³தீதி ஆஹ ‘‘சதுத்த²ங் நிரவஸேஸதா³ன’’ந்தி. ‘‘யதா² தேஸங் புப்³ப³கானங் இஸீனங் தானி மஹாயஞ்ஞகானி அஹேஸுங், ஏவங் மே அயங் தா³னபரிபோ⁴கோ³ ப⁴விஸ்ஸதீ’’தி ஏவங்ஸஞ்ஞினோ தா³னங் த³க்கி²ணங் அரஹேஸு தா³தப்³ப³தோ ‘‘பஞ்சமங் த³க்கி²ணெய்யதா³ன’’ந்தி வுத்தங். ‘‘இமங் மே தா³னங் த³த³தோ சித்தங் பஸீத³தீ’’திஆதி³னா பீதிஸோமனஸ்ஸங் உப்பாதெ³த்வா தெ³ந்தஸ்ஸ தா³னங் ஸோமனஸ்ஸபா³ஹுல்லப்பத்தியா ஸோமனஸ்ஸுபசாரங் நாம ஹோதீதி ஆஹ ‘‘ச²ட்ட²ங் ஸோமனஸ்ஸுபவிசாரதா³ன’’ந்தி வுத்தங்.
52. Navame ‘‘sāhu dāna’’nti dānaṃ detīti ‘‘dānaṃ nāma sādhu sundara’’nti dānaṃ detīti attho. Dānañhi datvā taṃ paccavekkhantassa pāmojjapītisomanassādayo uppajjanti, lobhadosaissāmaccherādayo vidūrībhavanti. Idāni dānaṃ anukūladhammaparibrūhanena paccanīkadhammavidūrīkaraṇena ca bhāvanācittassa upasobhanāya ca parikkhārāya ca hotīti ‘‘alaṅkārabhūtañceva parivārabhūtañca detī’’ti vuttaṃ. Jhānānāgāmī nāma hoti jhānaṃ nibbattetvā brahmalokūpapannānaṃ ariyānaṃ heṭṭhā anuppajjanato. Imaṃ pecca paribhuñjissāmīti sāpekkhassa dānaṃ paralokaphalāsāya sātisayāya ca pubbācāravasena uppajjamānāya anubhavattā taṇhuttaraṃ nāma hotīti āha ‘‘paṭhamaṃ taṇhuttariyadāna’’nti. Dānaṃ nāma buddhādīhi pasatthanti garuṃ cittīkāraṃ upaṭṭhapetvā dātabbattā ‘‘dutiyaṃ cittīkāradāna’’nti vuttaṃ. Pubbakehi pitupitāmahehi dinnapubbaṃ katapubbaṃ jahāpetuṃ nāma nānucchavikanti attabhāvasabhāgavasena hirottappaṃ paccupaṭṭhapetvā dātabbato ‘‘tatiyaṃ hirottappadāna’’nti vuttaṃ. ‘‘Ahaṃ pacāmi, na ime pacanti, nārahāmi pacanto apacantānaṃ dānaṃ adātu’’nti evaṃsaññī hutvā dento niravasesaṃ katvā detīti āha ‘‘catutthaṃ niravasesadāna’’nti. ‘‘Yathā tesaṃ pubbakānaṃ isīnaṃ tāni mahāyaññakāni ahesuṃ, evaṃ me ayaṃ dānaparibhogo bhavissatī’’ti evaṃsaññino dānaṃ dakkhiṇaṃ arahesu dātabbato ‘‘pañcamaṃ dakkhiṇeyyadāna’’nti vuttaṃ. ‘‘Imaṃ me dānaṃ dadato cittaṃ pasīdatī’’tiādinā pītisomanassaṃ uppādetvā dentassa dānaṃ somanassabāhullappattiyā somanassupacāraṃ nāma hotīti āha ‘‘chaṭṭhaṃ somanassupavicāradāna’’nti vuttaṃ.
தா³னமஹப்ப²லஸுத்தவண்ணனா நிட்டி²தா.
Dānamahapphalasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. தா³னமஹப்ப²லஸுத்தங் • 9. Dānamahapphalasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. தா³னமஹப்ப²லஸுத்தவண்ணனா • 9. Dānamahapphalasuttavaṇṇanā
