| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৯. দানসুত্তং
9. Dānasuttaṃ
৯৮. ৰুত্তঞ্হেতং ভগৰতা, ৰুত্তমরহতাতি মে সুতং –
98. Vuttañhetaṃ bhagavatā, vuttamarahatāti me sutaṃ –
‘‘দ্ৰেমানি , ভিক্খৰে, দানানি – আমিসদানঞ্চ ধম্মদানঞ্চ। এতদগ্গং, ভিক্খৰে, ইমেসং দ্ৰিন্নং দানানং যদিদং – ধম্মদানং।
‘‘Dvemāni , bhikkhave, dānāni – āmisadānañca dhammadānañca. Etadaggaṃ, bhikkhave, imesaṃ dvinnaṃ dānānaṃ yadidaṃ – dhammadānaṃ.
‘‘দ্ৰেমে, ভিক্খৰে, সংৰিভাগা – আমিসসংৰিভাগো চ ধম্মসংৰিভাগো চ। এতদগ্গং, ভিক্খৰে, ইমেসং দ্ৰিন্নং সংৰিভাগানং যদিদং – ধম্মসংৰিভাগো।
‘‘Dveme, bhikkhave, saṃvibhāgā – āmisasaṃvibhāgo ca dhammasaṃvibhāgo ca. Etadaggaṃ, bhikkhave, imesaṃ dvinnaṃ saṃvibhāgānaṃ yadidaṃ – dhammasaṃvibhāgo.
‘‘দ্ৰেমে , ভিক্খৰে, অনুগ্গহা – আমিসানুগ্গহো চ ধম্মানুগ্গহো চ। এতদগ্গং, ভিক্খৰে, ইমেসং দ্ৰিন্নং অনুগ্গহানং যদিদং – ধম্মানুগ্গহো’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Dveme , bhikkhave, anuggahā – āmisānuggaho ca dhammānuggaho ca. Etadaggaṃ, bhikkhave, imesaṃ dvinnaṃ anuggahānaṃ yadidaṃ – dhammānuggaho’’ti. Etamatthaṃ bhagavā avoca. Tatthetaṃ iti vuccati –
‘‘যমাহু দানং পরমং অনুত্তরং, যং সংৰিভাগং ভগৰা অৰণ্ণযি 1।
‘‘Yamāhu dānaṃ paramaṃ anuttaraṃ, yaṃ saṃvibhāgaṃ bhagavā avaṇṇayi 2;
অগ্গম্হি খেত্তম্হি পসন্নচিত্তো, ৰিঞ্ঞূ পজানং কো ন যজেথ কালে॥
Aggamhi khettamhi pasannacitto, viññū pajānaṃ ko na yajetha kāle.
‘‘যে চেৰ ভাসন্তি সুণন্তি চূভযং, পসন্নচিত্তা সুগতস্স সাসনে।
‘‘Ye ceva bhāsanti suṇanti cūbhayaṃ, pasannacittā sugatassa sāsane;
তেসং সো অত্থো পরমো ৰিসুজ্ঝতি, যে অপ্পমত্তা সুগতস্স সাসনে’’তি॥
Tesaṃ so attho paramo visujjhati, ye appamattā sugatassa sāsane’’ti.
অযম্পি অত্থো ৰুত্তো ভগৰতা, ইতি মে সুতন্তি। নৰমং।
Ayampi attho vutto bhagavatā, iti me sutanti. Navamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৯. দানসুত্তৰণ্ণনা • 9. Dānasuttavaṇṇanā
