| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
९. दानसुत्तं
9. Dānasuttaṃ
९८. वुत्तञ्हेतं भगवता, वुत्तमरहताति मे सुतं –
98. Vuttañhetaṃ bhagavatā, vuttamarahatāti me sutaṃ –
‘‘द्वेमानि , भिक्खवे, दानानि – आमिसदानञ्च धम्मदानञ्च। एतदग्गं, भिक्खवे, इमेसं द्विन्नं दानानं यदिदं – धम्मदानं।
‘‘Dvemāni , bhikkhave, dānāni – āmisadānañca dhammadānañca. Etadaggaṃ, bhikkhave, imesaṃ dvinnaṃ dānānaṃ yadidaṃ – dhammadānaṃ.
‘‘द्वेमे, भिक्खवे, संविभागा – आमिससंविभागो च धम्मसंविभागो च। एतदग्गं, भिक्खवे, इमेसं द्विन्नं संविभागानं यदिदं – धम्मसंविभागो।
‘‘Dveme, bhikkhave, saṃvibhāgā – āmisasaṃvibhāgo ca dhammasaṃvibhāgo ca. Etadaggaṃ, bhikkhave, imesaṃ dvinnaṃ saṃvibhāgānaṃ yadidaṃ – dhammasaṃvibhāgo.
‘‘द्वेमे , भिक्खवे, अनुग्गहा – आमिसानुग्गहो च धम्मानुग्गहो च। एतदग्गं, भिक्खवे, इमेसं द्विन्नं अनुग्गहानं यदिदं – धम्मानुग्गहो’’ति। एतमत्थं भगवा अवोच। तत्थेतं इति वुच्चति –
‘‘Dveme , bhikkhave, anuggahā – āmisānuggaho ca dhammānuggaho ca. Etadaggaṃ, bhikkhave, imesaṃ dvinnaṃ anuggahānaṃ yadidaṃ – dhammānuggaho’’ti. Etamatthaṃ bhagavā avoca. Tatthetaṃ iti vuccati –
‘‘यमाहु दानं परमं अनुत्तरं, यं संविभागं भगवा अवण्णयि 1।
‘‘Yamāhu dānaṃ paramaṃ anuttaraṃ, yaṃ saṃvibhāgaṃ bhagavā avaṇṇayi 2;
अग्गम्हि खेत्तम्हि पसन्नचित्तो, विञ्ञू पजानं को न यजेथ काले॥
Aggamhi khettamhi pasannacitto, viññū pajānaṃ ko na yajetha kāle.
‘‘ये चेव भासन्ति सुणन्ति चूभयं, पसन्नचित्ता सुगतस्स सासने।
‘‘Ye ceva bhāsanti suṇanti cūbhayaṃ, pasannacittā sugatassa sāsane;
तेसं सो अत्थो परमो विसुज्झति, ये अप्पमत्ता सुगतस्स सासने’’ति॥
Tesaṃ so attho paramo visujjhati, ye appamattā sugatassa sāsane’’ti.
अयम्पि अत्थो वुत्तो भगवता, इति मे सुतन्ति। नवमं।
Ayampi attho vutto bhagavatā, iti me sutanti. Navamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ९. दानसुत्तवण्णना • 9. Dānasuttavaṇṇanā
