| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
9. දානසුත්‌තං
9. Dānasuttaṃ
98. වුත්‌තඤ්‌හෙතං භගවතා, වුත්‌තමරහතාති මෙ සුතං –
98. Vuttañhetaṃ bhagavatā, vuttamarahatāti me sutaṃ –
‘‘ද්‌වෙමානි , භික්‌ඛවෙ, දානානි – ආමිසදානඤ්‌ච ධම්‌මදානඤ්‌ච. එතදග්‌ගං, භික්‌ඛවෙ, ඉමෙසං ද්‌වින්‌නං දානානං යදිදං – ධම්‌මදානං.
‘‘Dvemāni , bhikkhave, dānāni – āmisadānañca dhammadānañca. Etadaggaṃ, bhikkhave, imesaṃ dvinnaṃ dānānaṃ yadidaṃ – dhammadānaṃ.
‘‘ද්‌වෙමෙ, භික්‌ඛවෙ, සංවිභාගා – ආමිසසංවිභාගො ච ධම්‌මසංවිභාගො ච. එතදග්‌ගං, භික්‌ඛවෙ, ඉමෙසං ද්‌වින්‌නං සංවිභාගානං යදිදං – ධම්‌මසංවිභාගො.
‘‘Dveme, bhikkhave, saṃvibhāgā – āmisasaṃvibhāgo ca dhammasaṃvibhāgo ca. Etadaggaṃ, bhikkhave, imesaṃ dvinnaṃ saṃvibhāgānaṃ yadidaṃ – dhammasaṃvibhāgo.
‘‘ද්‌වෙමෙ , භික්‌ඛවෙ, අනුග්‌ගහා – ආමිසානුග්‌ගහො ච ධම්‌මානුග්‌ගහො ච. එතදග්‌ගං, භික්‌ඛවෙ, ඉමෙසං ද්‌වින්‌නං අනුග්‌ගහානං යදිදං – ධම්‌මානුග්‌ගහො’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Dveme , bhikkhave, anuggahā – āmisānuggaho ca dhammānuggaho ca. Etadaggaṃ, bhikkhave, imesaṃ dvinnaṃ anuggahānaṃ yadidaṃ – dhammānuggaho’’ti. Etamatthaṃ bhagavā avoca. Tatthetaṃ iti vuccati –
‘‘යමාහු දානං පරමං අනුත්‌තරං, යං සංවිභාගං භගවා අවණ්‌ණයි 1;
‘‘Yamāhu dānaṃ paramaṃ anuttaraṃ, yaṃ saṃvibhāgaṃ bhagavā avaṇṇayi 2;
අග්‌ගම්‌හි ඛෙත්‌තම්‌හි පසන්‌නචිත්‌තො, විඤ්‌ඤූ පජානං කො න යජෙථ කාලෙ.
Aggamhi khettamhi pasannacitto, viññū pajānaṃ ko na yajetha kāle.
‘‘යෙ චෙව භාසන්‌ති සුණන්‌ති චූභයං, පසන්‌නචිත්‌තා සුගතස්‌ස සාසනෙ;
‘‘Ye ceva bhāsanti suṇanti cūbhayaṃ, pasannacittā sugatassa sāsane;
තෙසං සො අත්‌ථො පරමො විසුජ්‌ඣති, යෙ අප්‌පමත්‌තා සුගතස්‌ස සාසනෙ’’ති.
Tesaṃ so attho paramo visujjhati, ye appamattā sugatassa sāsane’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. නවමං.
Ayampi attho vutto bhagavatā, iti me sutanti. Navamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 9. දානසුත්‌තවණ්‌ණනා • 9. Dānasuttavaṇṇanā
