| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೭. ದಾನಸುತ್ತವಣ್ಣನಾ
7. Dānasuttavaṇṇanā
೩೭. ಸತ್ತಮೇ ವೇಳುಕಣ್ಡಕೀತಿ ವೇಳುಕಣ್ಡಕನಗರವಾಸಿನೀ। ಛಳಙ್ಗಸಮನ್ನಾಗತನ್ತಿ ಛಹಿ ಗುಣಙ್ಗೇಹಿ ಸಮನ್ನಾಗತಂ। ದಕ್ಖಿಣಂ ಪತಿಟ್ಠಾಪೇತೀತಿ ದಾನಂ ದೇತಿ। ಪುಬ್ಬೇವ ದಾನಾ ಸುಮನೋತಿ ದಾನಂ ದಸ್ಸಾಮೀತಿ ಮಾಸಡ್ಢಮಾಸತೋ ಪಟ್ಠಾಯ ಸೋಮನಸ್ಸಪ್ಪತ್ತೋ ಹೋತಿ। ಏತ್ಥ ಹಿ ಪುಬ್ಬೇಚೇತನಾ ದಸ್ಸಾಮೀತಿ ಚಿತ್ತುಪ್ಪಾದಕಾಲತೋ ಪಟ್ಠಾಯ ‘‘ಇತೋ ಉಟ್ಠಿತೇನ ದಾನಂ ದಸ್ಸಾಮೀ’’ತಿ ಖೇತ್ತಗ್ಗಹಣಂ ಆದಿಂ ಕತ್ವಾ ಚಿನ್ತೇನ್ತಸ್ಸ ಲಬ್ಭತಿ। ದದಂ ಚಿತ್ತಂ ಪಸಾದೇತೀತಿ ಏವಂ ವುತ್ತಾ ಮುಞ್ಚಚೇತನಾ ಪನ ದಾನಕಾಲೇಯೇವ ಲಬ್ಭತಿ। ದತ್ವಾ ಅತ್ತಮನೋ ಹೋತೀತಿ ಅಯಂ ಪನ ಅಪರಚೇತನಾ ಅಪರಾಪರಂ ಅನುಸ್ಸರನ್ತಸ್ಸ ಲಬ್ಭತಿ। ವೀತರಾಗಾತಿ ವಿಗತರಾಗಾ ಖೀಣಾಸವಾ। ರಾಗವಿನಯಾಯ ವಾ ಪಟಿಪನ್ನಾತಿ ರಾಗವಿನಯಪಟಿಪದಂ ಪಟಿಪನ್ನಾ। ಉಕ್ಕಟ್ಠದೇಸನಾ ಚೇಸಾ, ನ ಕೇವಲಂ ಪನ ಖೀಣಾಸವಾನಂ, ಅನಾಗಾಮಿ-ಸಕದಾಗಾಮಿ-ಸೋತಾಪನ್ನಾನಮ್ಪಿ ಅನ್ತಮಸೋ ತದಹುಪಬ್ಬಜಿತಸ್ಸ ಭಣ್ಡಗಾಹಕಸಾಮಣೇರಸ್ಸಾಪಿ ದಿನ್ನಾ ದಕ್ಖಿಣಾ ಛಳಙ್ಗಸಮನ್ನಾಗತಾವ ಹೋತಿ। ಸೋಪಿ ಹಿ ಸೋತಾಪತ್ತಿಮಗ್ಗತ್ಥಮೇವ ಪಬ್ಬಜಿತೋ।
37. Sattame veḷukaṇḍakīti veḷukaṇḍakanagaravāsinī. Chaḷaṅgasamannāgatanti chahi guṇaṅgehi samannāgataṃ. Dakkhiṇaṃ patiṭṭhāpetīti dānaṃ deti. Pubbeva dānā sumanoti dānaṃ dassāmīti māsaḍḍhamāsato paṭṭhāya somanassappatto hoti. Ettha hi pubbecetanā dassāmīti cittuppādakālato paṭṭhāya ‘‘ito uṭṭhitena dānaṃ dassāmī’’ti khettaggahaṇaṃ ādiṃ katvā cintentassa labbhati. Dadaṃ cittaṃ pasādetīti evaṃ vuttā muñcacetanā pana dānakāleyeva labbhati. Datvā attamano hotīti ayaṃ pana aparacetanā aparāparaṃ anussarantassa labbhati. Vītarāgāti vigatarāgā khīṇāsavā. Rāgavinayāya vā paṭipannāti rāgavinayapaṭipadaṃ paṭipannā. Ukkaṭṭhadesanā cesā, na kevalaṃ pana khīṇāsavānaṃ, anāgāmi-sakadāgāmi-sotāpannānampi antamaso tadahupabbajitassa bhaṇḍagāhakasāmaṇerassāpi dinnā dakkhiṇā chaḷaṅgasamannāgatāva hoti. Sopi hi sotāpattimaggatthameva pabbajito.
ಯಞ್ಞಸ್ಸ ಸಮ್ಪದಾತಿ ದಾನಸ್ಸ ಪರಿಪುಣ್ಣತಾ। ಸಞ್ಞತಾತಿ ಸೀಲಸಞ್ಞಮೇನ ಸಞ್ಞತಾ। ಸಯಂ ಆಚಮಯಿತ್ವಾನಾತಿ ಅತ್ತನಾವ ಹತ್ಥಪಾದೇ ಧೋವಿತ್ವಾ ಮುಖಂ ವಿಕ್ಖಾಲೇತ್ವಾ। ಸಕೇಹಿ ಪಾಣಿಭೀತಿ ಅತ್ತನೋ ಹತ್ಥೇಹಿ। ಸಯೇಹೀತಿಪಿ ಪಾಠೋ। ಸದ್ಧೋತಿ ರತನತ್ತಯಗುಣೇ ಸದ್ದಹನ್ತೋ। ಮುತ್ತೇನ ಚೇತಸಾತಿ ಲಾಭಮಚ್ಛರಿಯಾದೀಹಿ ವಿಮುತ್ತೇನ ಚಿತ್ತೇನ। ಅಬ್ಯಾಪಜ್ಝಂ ಸುಖಂ ಲೋಕನ್ತಿ ನಿದ್ದುಕ್ಖಂ ಉಳಾರಸುಖಸೋಮನಸ್ಸಂ ದೇವಲೋಕಂ।
Yaññassa sampadāti dānassa paripuṇṇatā. Saññatāti sīlasaññamena saññatā. Sayaṃ ācamayitvānāti attanāva hatthapāde dhovitvā mukhaṃ vikkhāletvā. Sakehi pāṇibhīti attano hatthehi. Sayehītipi pāṭho. Saddhoti ratanattayaguṇe saddahanto. Muttena cetasāti lābhamacchariyādīhi vimuttena cittena. Abyāpajjhaṃsukhaṃ lokanti niddukkhaṃ uḷārasukhasomanassaṃ devalokaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೭. ಛಳಙ್ಗದಾನಸುತ್ತಂ • 7. Chaḷaṅgadānasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೭. ಛಳಙ್ಗದಾನಸುತ್ತವಣ್ಣನಾ • 7. Chaḷaṅgadānasuttavaṇṇanā
