| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
43. දණ්‌ඩකම්‌මවත්‌ථු
43. Daṇḍakammavatthu
107. තෙන ඛො පන සමයෙන සාමණෙරා භික්‌ඛූසු අගාරවා අප්‌පතිස්‌සා අසභාගවුත්‌තිකා විහරන්‌ති. භික්‌ඛූ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම සාමණෙරා භික්‌ඛූසු අගාරවා අප්‌පතිස්‌සා අසභාගවුත්‌තිකා විහරිස්‌සන්‌තී’’ති. භගවතො එතමත්‌ථං ආරොචෙසුං…පෙ.… අනුජානාමි, භික්‌ඛවෙ, පඤ්‌චහඞ්‌ගෙහි සමන්‌නාගතස්‌ස සාමණෙරස්‌ස දණ්‌ඩකම්‌මං කාතුං. භික්‌ඛූනං අලාභාය පරිසක්‌කති, භික්‌ඛූනං අනත්‌ථාය පරිසක්‌කති, භික්‌ඛූනං අවාසාය පරිසක්‌කති, භික්‌ඛූ අක්‌කොසති පරිභාසති, භික්‌ඛූ භික්‌ඛූහි භෙදෙති – අනුජානාමි, භික්‌ඛවෙ, ඉමෙහි පඤ්‌චහඞ්‌ගෙහි සමන්‌නාගතස්‌ස සාමණෙරස්‌ස දණ්‌ඩකම්‌මං කාතුන්‌ති.
107. Tena kho pana samayena sāmaṇerā bhikkhūsu agāravā appatissā asabhāgavuttikā viharanti. Bhikkhū ujjhāyanti khiyyanti vipācenti – ‘‘kathañhi nāma sāmaṇerā bhikkhūsu agāravā appatissā asabhāgavuttikā viharissantī’’ti. Bhagavato etamatthaṃ ārocesuṃ…pe… anujānāmi, bhikkhave, pañcahaṅgehi samannāgatassa sāmaṇerassa daṇḍakammaṃ kātuṃ. Bhikkhūnaṃ alābhāya parisakkati, bhikkhūnaṃ anatthāya parisakkati, bhikkhūnaṃ avāsāya parisakkati, bhikkhū akkosati paribhāsati, bhikkhū bhikkhūhi bhedeti – anujānāmi, bhikkhave, imehi pañcahaṅgehi samannāgatassa sāmaṇerassa daṇḍakammaṃ kātunti.
අථ ඛො භික්‌ඛූනං එතදහොසි – ‘‘කිං නු ඛො දණ්‌ඩකම්‌මං කාතබ්‌බ’’න්‌ති? භගවතො එතමත්‌ථං ආරොචෙසුං. අනුජානාමි, භික්‌ඛවෙ, ආවරණං කාතුන්‌ති.
Atha kho bhikkhūnaṃ etadahosi – ‘‘kiṃ nu kho daṇḍakammaṃ kātabba’’nti? Bhagavato etamatthaṃ ārocesuṃ. Anujānāmi, bhikkhave, āvaraṇaṃ kātunti.
තෙන ඛො පන සමයෙන භික්‌ඛූ සාමණෙරානං සබ්‌බං සඞ්‌ඝාරාමං ආවරණං කරොන්‌ති. සාමණෙරා ආරාමං පවිසිතුං අලභමානා පක්‌කමන්‌තිපි , විබ්‌භමන්‌තිපි, තිත්‌ථියෙසුපි සඞ්‌කමන්‌ති. භගවතො එතමත්‌ථං ආරොචෙසුං. න, භික්‌ඛවෙ, සබ්‌බො සඞ්‌ඝාරාමො ආවරණං කාතබ්‌බො. යො කරෙය්‍ය, ආපත්‌ති දුක්‌කටස්‌ස. අනුජානාමි, භික්‌ඛවෙ, යත්‌ථ වා වසති, යත්‌ථ වා පටික්‌කමති, තත්‌ථ ආවරණං කාතුන්‌ති.
Tena kho pana samayena bhikkhū sāmaṇerānaṃ sabbaṃ saṅghārāmaṃ āvaraṇaṃ karonti. Sāmaṇerā ārāmaṃ pavisituṃ alabhamānā pakkamantipi , vibbhamantipi, titthiyesupi saṅkamanti. Bhagavato etamatthaṃ ārocesuṃ. Na, bhikkhave, sabbo saṅghārāmo āvaraṇaṃ kātabbo. Yo kareyya, āpatti dukkaṭassa. Anujānāmi, bhikkhave, yattha vā vasati, yattha vā paṭikkamati, tattha āvaraṇaṃ kātunti.
තෙන ඛො පන සමයෙන භික්‌ඛූ සාමණෙරානං මුඛද්‌වාරිකං ආහාරං ආවරණං කරොන්‌ති. මනුස්‌සා යාගුපානම්‌පි සඞ්‌ඝභත්‌තම්‌පි කරොන්‌තා සාමණෙරෙ එවං වදෙන්‌ති – ‘‘එථ, භන්‌තෙ, යාගුං පිවථ; එථ, භන්‌තෙ, භත්‌තං භුඤ්‌ජථා’’ති. සාමණෙරා එවං වදෙන්‌ති – ‘‘නාවුසො, ලබ්‌භා. භික්‌ඛූහි ආවරණං කත’’න්‌ති. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භදන්‌තා සාමණෙරානං මුඛද්‌වාරිකං ආහාරං ආවරණං කරිස්‌සන්‌තී’’ති. භගවතො එතමත්‌ථං ආරොචෙසුං. න, භික්‌ඛවෙ, මුඛද්‌වාරිකො ආහාරො ආවරණං කාතබ්‌බො. යො කරෙය්‍ය, ආපත්‌ති දුක්‌කටස්‌සාති.
Tena kho pana samayena bhikkhū sāmaṇerānaṃ mukhadvārikaṃ āhāraṃ āvaraṇaṃ karonti. Manussā yāgupānampi saṅghabhattampi karontā sāmaṇere evaṃ vadenti – ‘‘etha, bhante, yāguṃ pivatha; etha, bhante, bhattaṃ bhuñjathā’’ti. Sāmaṇerā evaṃ vadenti – ‘‘nāvuso, labbhā. Bhikkhūhi āvaraṇaṃ kata’’nti. Manussā ujjhāyanti khiyyanti vipācenti – ‘‘kathañhi nāma bhadantā sāmaṇerānaṃ mukhadvārikaṃ āhāraṃ āvaraṇaṃ karissantī’’ti. Bhagavato etamatthaṃ ārocesuṃ. Na, bhikkhave, mukhadvāriko āhāro āvaraṇaṃ kātabbo. Yo kareyya, āpatti dukkaṭassāti.
දණ්‌ඩකම්‌මවත්‌ථු නිට්‌ඨිතං.
Daṇḍakammavatthu niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / සික්‌ඛාපදදණ්‌ඩකම්‌මවත්‌ථුකථා • Sikkhāpadadaṇḍakammavatthukathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / සික්‌ඛාපදදණ්‌ඩකම්‌මවත්‌ථුකථාවණ්‌ණනා • Sikkhāpadadaṇḍakammavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / සික්‌ඛාපදදණ්‌ඩකම්‌මවත්‌ථුකථාවණ්‌ණනා • Sikkhāpadadaṇḍakammavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / සික්‌ඛාපදදණ්‌ඩකම්‌මවත්‌ථුකථාවණ්‌ණනා • Sikkhāpadadaṇḍakammavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 42. සික්‌ඛාපදදණ්‌ඩකම්‌මවත්‌ථුකථා • 42. Sikkhāpadadaṇḍakammavatthukathā
