| Library / Tipiṭaka / д̇ибидага • Tipiṭaka / уд̣̇аана-адтагат̇аа • Udāna-aṭṭhakathā |
3. д̣̇ан̣д̣асуд̇д̇аван̣н̣анаа
3. Daṇḍasuttavaṇṇanā
13. д̇ад̇ияз гумаарагаад̇и д̣̇аарагаа. анд̇араа жа саавад̇т̇им̣ анд̇араа жа ж̇зд̇авананд̇и анд̇араасад̣̇д̣̇о ‘‘д̇ад̣̇анд̇арам̣ го ж̇аанзяяа, ан̃н̃ад̇ра д̇ат̇ааг̇ад̇аа’’д̇и (а. ни. 6.44; 10.75), ‘‘ж̇анаа сан̇г̇амма манд̇знд̇и, ман̃жа д̇ван̃жа гиманд̇ара’’нд̇иаад̣̇ийсу (сам̣. ни. 1.228) гааран̣з ааг̇ад̇о. ‘‘ад̣̇д̣̇асаа мам̣, бханд̇з, ан̃н̃ад̇араа ид̇т̇ий виж̇ж̇анд̇аригааяа бхааж̇анам̣ д̇хованд̇ий’’д̇иаад̣̇ийсу (ма. ни. 2.149) кан̣з. ‘‘яассанд̇арад̇о на санд̇и гобаа’’д̇иаад̣̇ийсу (уд̣̇аа. 20) жид̇д̇з. ‘‘анд̇араа восаанамаабаад̣̇ий’’д̇иаад̣̇ийсу взмаж̇жхз. ‘‘абижааяам̣, бхигкавз, д̇абод̣̇аа д̣̇виннам̣ махаанираяаанам̣ анд̇аригааяа ааг̇ажчад̇ий’’д̇иаад̣̇ийсу (баараа. 231) виварз . свааяамид̇хааби виварз взд̣̇ид̇аб̣б̣о. д̇асмаа саавад̇т̇ияаа жа ж̇зд̇аванасса жа виварзд̇и, звамзд̇т̇а ад̇т̇о взд̣̇ид̇аб̣б̣о. анд̇араасад̣̇д̣̇аяог̇ад̇о жзд̇т̇а убаяог̇аважанам̣ ‘‘анд̇араа жа саавад̇т̇им̣ анд̇араа жа ж̇зд̇авана’’нд̇и. ийд̣̇исзсу таанзсу агкаражинд̇агаа ‘‘анд̇араа г̇ааман̃жа над̣̇ин̃жа г̇ажчад̇ий’’д̇и згамзва анд̇араасад̣̇д̣̇ам̣ баяуж̇ж̇анд̇и, со д̣̇уд̇ияабад̣̇знаби яож̇зд̇аб̣б̣о ход̇и. ид̇ха бана яож̇зд̇ваа вуд̇д̇о.
13. Tatiye kumārakāti dārakā. Antarā ca sāvatthiṃ antarā ca jetavananti antarāsaddo ‘‘tadantaraṃ ko jāneyya, aññatra tathāgatā’’ti (a. ni. 6.44; 10.75), ‘‘janā saṅgamma mantenti, mañca tvañca kimantara’’ntiādīsu (saṃ. ni. 1.228) kāraṇe āgato. ‘‘Addasā maṃ, bhante, aññatarā itthī vijjantarikāya bhājanaṃ dhovantī’’tiādīsu (ma. ni. 2.149) khaṇe. ‘‘Yassantarato na santi kopā’’tiādīsu (udā. 20) citte. ‘‘Antarā vosānamāpādī’’tiādīsu vemajjhe. ‘‘Apicāyaṃ, bhikkhave, tapodā dvinnaṃ mahānirayānaṃ antarikāya āgacchatī’’tiādīsu (pārā. 231) vivare . Svāyamidhāpi vivare veditabbo. Tasmā sāvatthiyā ca jetavanassa ca vivareti, evamettha attho veditabbo. Antarāsaddayogato cettha upayogavacanaṃ ‘‘antarā ca sāvatthiṃ antarā ca jetavana’’nti. Īdisesu ṭhānesu akkharacintakā ‘‘antarā gāmañca nadiñca gacchatī’’ti ekameva antarāsaddaṃ payujjanti, so dutiyapadenapi yojetabbo hoti. Idha pana yojetvā vutto.
ахим̣ д̣̇ан̣д̣зна хананд̇ийд̇и б̣илад̇о нигкамид̇ваа г̇ожарааяа г̇ажчанд̇ам̣ ган̣хасаббам̣ чаад̇аж̇жхад̇д̇ам̣ ануб̣анд̇хид̇ваа яадтийхи бот̇знд̇и. д̇зна жа самаязна бхаг̇аваа саавад̇т̇им̣ бин̣д̣ааяа г̇ажчанд̇о анд̇араамаг̇г̇з д̇з д̣̇аарагз ахим̣ д̣̇ан̣д̣зна хананд̇з д̣̇исваа ‘‘гасмаа гумаарагаа имам̣ ахим̣ д̣̇ан̣д̣зна ханат̇аа’’д̇и бужчид̇ваа ‘‘д̣ам̣санабхаязна, бханд̇з’’д̇и жа вуд̇д̇з ‘‘имз ад̇д̇ано сукам̣ гариссаамаад̇и имам̣ бахаранд̇аа ниб̣б̣ад̇д̇адтаанз д̣̇угкам̣ анубхависсанд̇и, ахо авиж̇ж̇ааяа нигад̇игосалла’’нд̇и д̇хаммасам̣взг̇ам̣ уббаад̣̇зси. д̇знзва жа д̇хаммасам̣взг̇зна уд̣̇аанам̣ уд̣̇аанзси. д̇зна вуд̇д̇ам̣ ‘‘ат̇а ко бхаг̇аваа’’д̇иаад̣̇и.
Ahiṃ daṇḍena hanantīti bilato nikkhamitvā gocarāya gacchantaṃ kaṇhasappaṃ chātajjhattaṃ anubandhitvā yaṭṭhīhi pothenti. Tena ca samayena bhagavā sāvatthiṃ piṇḍāya gacchanto antarāmagge te dārake ahiṃ daṇḍena hanante disvā ‘‘kasmā kumārakā imaṃ ahiṃ daṇḍena hanathā’’ti pucchitvā ‘‘ḍaṃsanabhayena, bhante’’ti ca vutte ‘‘ime attano sukhaṃ karissāmāti imaṃ paharantā nibbattaṭṭhāne dukkhaṃ anubhavissanti, aho avijjāya nikatikosalla’’nti dhammasaṃvegaṃ uppādesi. Teneva ca dhammasaṃvegena udānaṃ udānesi. Tena vuttaṃ ‘‘atha kho bhagavā’’tiādi.
д̇ад̇т̇а зд̇амад̇т̇ам̣ вид̣̇ид̇ваад̇и ‘‘имз д̣̇аарагаа ад̇д̇асукааяа барад̣̇угкам̣ гаронд̇аа саяам̣ барад̇т̇а сукам̣ на лабхиссанд̇ий’’д̇и зд̇амад̇т̇ам̣ ж̇аанид̇ваад̇и звамзгз ван̣н̣знд̇и. ан̃н̃зсам̣ д̣̇уббадибаннаанам̣ сукабариязсанам̣ ааяад̇им̣ д̣̇угкааяа сам̣вад̇д̇ад̇и, суббадибаннаанам̣ зганд̇зна сукааяа сам̣вад̇д̇ад̇и. д̇асмаа ‘‘баравихзсаавинимуд̇д̇аа ажжанд̇амзва сукабхааг̇ино вад̇а маяхам̣ оваад̣̇аббадигараа’’д̇и соманассавасзнзвзд̇амби сад̇т̇аа уд̣̇аанам̣ уд̣̇аанзсийд̇и вад̣̇анд̇и. абарз бана бхан̣анд̇и ‘‘звам̣ д̇зхи гумаарагзхи бавад̇д̇ид̇ам̣ баравихзтанам̣ саб̣б̣аагаарзна аад̣̇ийнавад̇о вид̣̇ид̇ваа баравихзсааяа бараанугамбааяа жа яат̇ааггамам̣ аад̣̇ийнаваанисам̣савибхааванам̣ имам̣ уд̣̇аанам̣ уд̣̇аанзсий’’д̇и.
Tattha etamatthaṃ viditvāti ‘‘ime dārakā attasukhāya paradukkhaṃ karontā sayaṃ parattha sukhaṃ na labhissantī’’ti etamatthaṃ jānitvāti evameke vaṇṇenti. Aññesaṃ duppaṭipannānaṃ sukhapariyesanaṃ āyatiṃ dukkhāya saṃvattati, suppaṭipannānaṃ ekantena sukhāya saṃvattati. Tasmā ‘‘paravihesāvinimuttā accantameva sukhabhāgino vata mayhaṃ ovādappaṭikarā’’ti somanassavasenevetampi satthā udānaṃ udānesīti vadanti. Apare pana bhaṇanti ‘‘evaṃ tehi kumārakehi pavattitaṃ paraviheṭhanaṃ sabbākārena ādīnavato viditvā paravihesāya parānukampāya ca yathākkamaṃ ādīnavānisaṃsavibhāvanaṃ imaṃ udānaṃ udānesī’’ti.
д̇ад̇т̇а сукагаамаанийд̇и зганд̇знзва ад̇д̇ано сукасса ижчанад̇о сукаануг̇ид̣̇д̇хаани. бхууд̇аанийд̇и баан̣ино. яо д̣̇ан̣д̣зна вихим̣сад̇ийд̇и зд̇т̇а д̣̇ан̣д̣знаад̇и д̣̇зсанаамад̇д̇ам̣, д̣̇ан̣д̣зна ваа лзд̣д̣усад̇т̇абаан̣иббахаараад̣̇ийхи ваад̇и ад̇т̇о. ат̇а ваа д̣̇ан̣д̣знаад̇и д̣̇ан̣д̣анзна. ид̣̇ам̣ вуд̇д̇ам̣ ход̇и – яо сукагаамаани саб̣б̣абхууд̇аани ж̇аад̇иаад̣̇инаа гхадданавасзна важийд̣̇ан̣д̣зна ваа баан̣имуг̇г̇арасад̇т̇аад̣̇ийхи бот̇анад̇аал̣анажчзд̣̇анаад̣̇ивасзна сарийрад̣̇ан̣д̣зна ваа сад̇ам̣ ваа сахассам̣ ваа таабанавасзна д̇ханад̣̇ан̣д̣зна ваад̇и имзсу д̣̇ан̣д̣зсу язна гзнажи д̣̇ан̣д̣зна вихим̣сад̇и вихзтзд̇и д̣̇угкам̣ баабзд̇и, ад̇д̇ано сукамзсаано, бзжжа со на лабхад̇з суканд̇и со буг̇г̇ало ад̇д̇ано сукам̣ зсанд̇о г̇авзсанд̇о бад̇т̇знд̇о бзжжа баралогз мануссасукам̣ д̣̇иб̣б̣асукам̣ ниб̣б̣аанасуканд̇и д̇ивид̇хамби сукам̣ на лабхад̇и, ан̃н̃ад̣̇ад̇т̇у д̇зна д̣̇ан̣д̣зна д̣̇угкамзва лабхад̇ийд̇и ад̇т̇о.
Tattha sukhakāmānīti ekanteneva attano sukhassa icchanato sukhānugiddhāni. Bhūtānīti pāṇino. Yo daṇḍena vihiṃsatīti ettha daṇḍenāti desanāmattaṃ, daṇḍena vā leḍḍusatthapāṇippahārādīhi vāti attho. Atha vā daṇḍenāti daṇḍanena. Idaṃ vuttaṃ hoti – yo sukhakāmāni sabbabhūtāni jātiādinā ghaṭṭanavasena vacīdaṇḍena vā pāṇimuggarasatthādīhi pothanatāḷanacchedanādivasena sarīradaṇḍena vā sataṃ vā sahassaṃ vā ṭhāpanavasena dhanadaṇḍena vāti imesu daṇḍesu yena kenaci daṇḍena vihiṃsati viheṭheti dukkhaṃ pāpeti, attano sukhamesāno, pecca so na labhate sukhanti so puggalo attano sukhaṃ esanto gavesanto patthento pecca paraloke manussasukhaṃ dibbasukhaṃ nibbānasukhanti tividhampi sukhaṃ na labhati, aññadatthu tena daṇḍena dukkhameva labhatīti attho.
бзжжа со лабхад̇з суканд̇и яо канд̇имзд̇д̇аануд̣̇д̣̇аяасамбанно ‘‘яат̇аахам̣ сукагаамо д̣̇угкаббадигууло, звам̣ саб̣б̣збий’’д̇и жинд̇зд̇ваа самбад̇д̇авирад̇иаад̣̇ийсу тид̇о вуд̇д̇анаязна гзнажи д̣̇ан̣д̣зна саб̣б̣ааниби бхууд̇аани на хим̣сад̇и на б̣аад̇хад̇и, со буг̇г̇ало баралогз мануссабхууд̇о мануссасукам̣, д̣̇звабхууд̇о д̣̇иб̣б̣асукам̣, убхаяам̣ ад̇иггаманд̇о ниб̣б̣аанасукам̣ лабхад̇ийд̇и. зд̇т̇а жа д̇аад̣̇исасса буг̇г̇аласса авассам̣бхаавид̇ааяа д̇ам̣ сукам̣ бажжуббаннам̣ вияа ход̇ийд̇и д̣̇ассанад̇т̇ам̣ ‘‘лабхад̇з’’д̇и вуд̇д̇ам̣. буримаг̇аат̇ааяаби зсзва наяо.
Pecca so labhate sukhanti yo khantimettānuddayasampanno ‘‘yathāhaṃ sukhakāmo dukkhappaṭikūlo, evaṃ sabbepī’’ti cintetvā sampattaviratiādīsu ṭhito vuttanayena kenaci daṇḍena sabbānipi bhūtāni na hiṃsati na bādhati, so puggalo paraloke manussabhūto manussasukhaṃ, devabhūto dibbasukhaṃ, ubhayaṃ atikkamanto nibbānasukhaṃ labhatīti. Ettha ca tādisassa puggalassa avassaṃbhāvitāya taṃ sukhaṃ paccuppannaṃ viya hotīti dassanatthaṃ ‘‘labhate’’ti vuttaṃ. Purimagāthāyapi eseva nayo.
д̇ад̇ияасуд̇д̇аван̣н̣анаа нидтид̇аа.
Tatiyasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / уд̣̇аанабаал̣и • Udānapāḷi / 3. д̣̇ан̣д̣асуд̇д̇ам̣ • 3. Daṇḍasuttaṃ
