| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
৫. দন্তভূমিসুত্তং
5. Dantabhūmisuttaṃ
২১৩. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে। তেন খো পন সমযেন অচিরৰতো সমণুদ্দেসো অরঞ্ঞকুটিকাযং ৰিহরতি। অথ খো জযসেনো রাজকুমারো জঙ্ঘাৰিহারং অনুচঙ্কমমানো অনুৰিচরমানো যেন অচিরৰতো সমণুদ্দেসো তেনুপসঙ্কমি; উপসঙ্কমিত্ৰা অচিরৰতেন সমণুদ্দেসেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো জযসেনো রাজকুমারো অচিরৰতং সমণুদ্দেসং এতদৰোচ –
213. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena aciravato samaṇuddeso araññakuṭikāyaṃ viharati. Atha kho jayaseno rājakumāro jaṅghāvihāraṃ anucaṅkamamāno anuvicaramāno yena aciravato samaṇuddeso tenupasaṅkami; upasaṅkamitvā aciravatena samaṇuddesena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho jayaseno rājakumāro aciravataṃ samaṇuddesaṃ etadavoca –
‘‘সুতং মেতং, ভো অগ্গিৰেস্সন – ‘ইধ ভিক্খু অপ্পমত্তো আতাপী পহিতত্তো ৰিহরন্তো ফুসেয্য চিত্তস্স একগ্গত’ন্তি। ‘এৰমেতং, রাজকুমার, এৰমেতং, রাজকুমার। ইধ ভিক্খু অপ্পমত্তো আতাপী পহিতত্তো ৰিহরন্তো ফুসেয্য চিত্তস্স একগ্গত’ন্তি। ‘সাধু মে ভৰং অগ্গিৰেস্সনো যথাসুতং যথাপরিযত্তং ধম্মং দেসেতূ’তি। ‘ন খো তে অহং, রাজকুমার, সক্কোমি যথাসুতং যথাপরিযত্তং ধম্মং দেসেতুং। অহঞ্চ হি তে, রাজকুমার, যথাসুতং যথাপরিযত্তং ধম্মং দেসেয্যং, ত্ৰঞ্চ মে ভাসিতস্স অত্থং ন আজানেয্যাসি; সো মমস্স কিলমথো, সা মমস্স ৰিহেসা’তি। ‘দেসেতু মে ভৰং অগ্গিৰেস্সনো যথাসুতং যথাপরিযত্তং ধম্মং। অপ্পেৰনামাহং ভোতো অগ্গিৰেস্সনস্স ভাসিতস্স অত্থং আজানেয্য’ন্তি। ‘দেসেয্যং খো তে অহং, রাজকুমার, যথাসুতং যথাপরিযত্তং ধম্মং। সচে মে ত্ৰং ভাসিতস্স অত্থং আজানেয্যাসি, ইচ্চেতং কুসলং; নো চে মে ত্ৰং ভাসিতস্স অত্থং আজানেয্যাসি, যথাসকে তিট্ঠেয্যাসি, ন মং তত্থ উত্তরিং পটিপুচ্ছেয্যাসী’তি। ‘দেসেতু মে ভৰং অগ্গিৰেস্সনো যথাসুতং যথাপরিযত্তং ধম্মং। সচে অহং ভোতো অগ্গিৰেস্সনস্স ভাসিতস্স অত্থং আজানিস্সামি 1, ইচ্চেতং কুসলং; নো চে অহং ভোতো অগ্গিৰেস্সনস্স ভাসিতস্স অত্থং আজানিস্সামি, যথাসকে তিট্ঠিস্সামি 2, নাহং তত্থ ভৰন্তং অগ্গিৰেস্সনং উত্তরিং পটিপুচ্ছিস্সামী’’’তি।
‘‘Sutaṃ metaṃ, bho aggivessana – ‘idha bhikkhu appamatto ātāpī pahitatto viharanto phuseyya cittassa ekaggata’nti. ‘Evametaṃ, rājakumāra, evametaṃ, rājakumāra. Idha bhikkhu appamatto ātāpī pahitatto viharanto phuseyya cittassa ekaggata’nti. ‘Sādhu me bhavaṃ aggivessano yathāsutaṃ yathāpariyattaṃ dhammaṃ desetū’ti. ‘Na kho te ahaṃ, rājakumāra, sakkomi yathāsutaṃ yathāpariyattaṃ dhammaṃ desetuṃ. Ahañca hi te, rājakumāra, yathāsutaṃ yathāpariyattaṃ dhammaṃ deseyyaṃ, tvañca me bhāsitassa atthaṃ na ājāneyyāsi; so mamassa kilamatho, sā mamassa vihesā’ti. ‘Desetu me bhavaṃ aggivessano yathāsutaṃ yathāpariyattaṃ dhammaṃ. Appevanāmāhaṃ bhoto aggivessanassa bhāsitassa atthaṃ ājāneyya’nti. ‘Deseyyaṃ kho te ahaṃ, rājakumāra, yathāsutaṃ yathāpariyattaṃ dhammaṃ. Sace me tvaṃ bhāsitassa atthaṃ ājāneyyāsi, iccetaṃ kusalaṃ; no ce me tvaṃ bhāsitassa atthaṃ ājāneyyāsi, yathāsake tiṭṭheyyāsi, na maṃ tattha uttariṃ paṭipuccheyyāsī’ti. ‘Desetu me bhavaṃ aggivessano yathāsutaṃ yathāpariyattaṃ dhammaṃ. Sace ahaṃ bhoto aggivessanassa bhāsitassa atthaṃ ājānissāmi 3, iccetaṃ kusalaṃ; no ce ahaṃ bhoto aggivessanassa bhāsitassa atthaṃ ājānissāmi, yathāsake tiṭṭhissāmi 4, nāhaṃ tattha bhavantaṃ aggivessanaṃ uttariṃ paṭipucchissāmī’’’ti.
২১৪. অথ খো অচিরৰতো সমণুদ্দেসো জযসেনস্স রাজকুমারস্স যথাসুতং যথাপরিযত্তং ধম্মং দেসেসি। এৰং ৰুত্তে, জযসেনো রাজকুমারো অচিরৰতং সমণুদ্দেসং এতদৰোচ – ‘‘অট্ঠানমেতং, ভো অগ্গিৰেস্সন, অনৰকাসো যং ভিক্খু অপ্পমত্তো আতাপী পহিতত্তো ৰিহরন্তো ফুসেয্য চিত্তস্স একগ্গত’’ন্তি। অথ খো জযসেনো রাজকুমারো অচিরৰতস্স সমণুদ্দেসস্স অট্ঠানতঞ্চ অনৰকাসতঞ্চ পৰেদেত্ৰা উট্ঠাযাসনা পক্কামি।
214. Atha kho aciravato samaṇuddeso jayasenassa rājakumārassa yathāsutaṃ yathāpariyattaṃ dhammaṃ desesi. Evaṃ vutte, jayaseno rājakumāro aciravataṃ samaṇuddesaṃ etadavoca – ‘‘aṭṭhānametaṃ, bho aggivessana, anavakāso yaṃ bhikkhu appamatto ātāpī pahitatto viharanto phuseyya cittassa ekaggata’’nti. Atha kho jayaseno rājakumāro aciravatassa samaṇuddesassa aṭṭhānatañca anavakāsatañca pavedetvā uṭṭhāyāsanā pakkāmi.
অথ খো অচিরৰতো সমণুদ্দেসো অচিরপক্কন্তে জযসেনে রাজকুমারে যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো অচিরৰতো সমণুদ্দেসো যাৰতকো অহোসি জযসেনেন রাজকুমারেন সদ্ধিং কথাসল্লাপো তং সব্বং ভগৰতো আরোচেসি।
Atha kho aciravato samaṇuddeso acirapakkante jayasene rājakumāre yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho aciravato samaṇuddeso yāvatako ahosi jayasenena rājakumārena saddhiṃ kathāsallāpo taṃ sabbaṃ bhagavato ārocesi.
এৰং ৰুত্তে, ভগৰা অচিরৰতং সমণুদ্দেসং এতদৰোচ – ‘‘তং কুতেত্থ, অগ্গিৰেস্সন, লব্ভা। যং তং নেক্খম্মেন ঞাতব্বং নেক্খম্মেন দট্ঠব্বং নেক্খম্মেন পত্তব্বং নেক্খম্মেন সচ্ছিকাতব্বং তং ৰত জযসেনো রাজকুমারো কামমজ্ঝে ৰসন্তো কামে পরিভুঞ্জন্তো কামৰিতক্কেহি খজ্জমানো কামপরিল়াহেন পরিডয্হমানো কামপরিযেসনায উস্সুকো 5 ঞস্সতি ৰা দক্খতি ৰা সচ্ছি ৰা করিস্সতী’’তি – নেতং ঠানং ৰিজ্জতি।
Evaṃ vutte, bhagavā aciravataṃ samaṇuddesaṃ etadavoca – ‘‘taṃ kutettha, aggivessana, labbhā. Yaṃ taṃ nekkhammena ñātabbaṃ nekkhammena daṭṭhabbaṃ nekkhammena pattabbaṃ nekkhammena sacchikātabbaṃ taṃ vata jayaseno rājakumāro kāmamajjhe vasanto kāme paribhuñjanto kāmavitakkehi khajjamāno kāmapariḷāhena pariḍayhamāno kāmapariyesanāya ussuko 6 ñassati vā dakkhati vā sacchi vā karissatī’’ti – netaṃ ṭhānaṃ vijjati.
২১৫. ‘‘সেয্যথাপিস্সু, অগ্গিৰেস্সন, দ্ৰে হত্থিদম্মা ৰা অস্সদম্মা ৰা গোদম্মা ৰা সুদন্তা সুৰিনীতা, দ্ৰে হত্থিদম্মা ৰা অস্সদম্মা ৰা গোদম্মা ৰা অদন্তা অৰিনীতা। তং কিং মঞ্ঞসি, অগ্গিৰেস্সন, যে তে দ্ৰে হত্থিদম্মা ৰা অস্সদম্মা ৰা গোদম্মা ৰা সুদন্তা সুৰিনীতা, অপি নু তে দন্তাৰ দন্তকারণং গচ্ছেয্যুং, দন্তাৰ দন্তভূমিং সম্পাপুণেয্যু’’ন্তি? ‘‘এৰং, ভন্তে’’। ‘‘যে পন তে দ্ৰে হত্থিদম্মা ৰা অস্সদম্মা ৰা গোদম্মা ৰা অদন্তা অৰিনীতা, অপি নু তে অদন্তাৰ দন্তকারণং গচ্ছেয্যুং, অদন্তাৰ দন্তভূমিং সম্পাপুণেয্যুং, সেয্যথাপি তে দ্ৰে হত্থিদম্মা ৰা অস্সদম্মা ৰা গোদম্মা ৰা সুদন্তা সুৰিনীতা’’তি? ‘‘নো হেতং, ভন্তে’’। ‘‘এৰমেৰ খো, অগ্গিৰেস্সন, যং তং নেক্খম্মেন ঞাতব্বং নেক্খম্মেন দট্ঠব্বং নেক্খম্মেন পত্তব্বং নেক্খম্মেন সচ্ছিকাতব্বং তং ৰত জযসেনো রাজকুমারো কামমজ্ঝে ৰসন্তো কামে পরিভুঞ্জন্তো কামৰিতক্কেহি খজ্জমানো কামপরিল়াহেন পরিডয্হমানো কামপরিযেসনায উস্সুকো ঞস্সতি ৰা দক্খতি ৰা সচ্ছি ৰা করিস্সতী’’তি – নেতং ঠানং ৰিজ্জতি।
215. ‘‘Seyyathāpissu, aggivessana, dve hatthidammā vā assadammā vā godammā vā sudantā suvinītā, dve hatthidammā vā assadammā vā godammā vā adantā avinītā. Taṃ kiṃ maññasi, aggivessana, ye te dve hatthidammā vā assadammā vā godammā vā sudantā suvinītā, api nu te dantāva dantakāraṇaṃ gaccheyyuṃ, dantāva dantabhūmiṃ sampāpuṇeyyu’’nti? ‘‘Evaṃ, bhante’’. ‘‘Ye pana te dve hatthidammā vā assadammā vā godammā vā adantā avinītā, api nu te adantāva dantakāraṇaṃ gaccheyyuṃ, adantāva dantabhūmiṃ sampāpuṇeyyuṃ, seyyathāpi te dve hatthidammā vā assadammā vā godammā vā sudantā suvinītā’’ti? ‘‘No hetaṃ, bhante’’. ‘‘Evameva kho, aggivessana, yaṃ taṃ nekkhammena ñātabbaṃ nekkhammena daṭṭhabbaṃ nekkhammena pattabbaṃ nekkhammena sacchikātabbaṃ taṃ vata jayaseno rājakumāro kāmamajjhe vasanto kāme paribhuñjanto kāmavitakkehi khajjamāno kāmapariḷāhena pariḍayhamāno kāmapariyesanāya ussuko ñassati vā dakkhati vā sacchi vā karissatī’’ti – netaṃ ṭhānaṃ vijjati.
২১৬. ‘‘সেয্যথাপি , অগ্গিৰেস্সন, গামস্স ৰা নিগমস্স ৰা অৰিদূরে মহাপব্বতো। তমেনং দ্ৰে সহাযকা তম্হা গামা ৰা নিগমা ৰা নিক্খমিত্ৰা হত্থৰিলঙ্ঘকেন যেন সো পব্বতো তেনুপসঙ্কমেয্যুং; উপসঙ্কমিত্ৰা একো সহাযকো হেট্ঠা পব্বতপাদে তিট্ঠেয্য, একো সহাযকো উপরিপব্বতং আরোহেয্য। তমেনং হেট্ঠা পব্বতপাদে ঠিতো সহাযকো উপরিপব্বতে ঠিতং সহাযকং এৰং ৰেদয্য – ‘যং, সম্ম, কিং ত্ৰং পস্সসি উপরিপব্বতে ঠিতো’তি? সো এৰং ৰদেয্য – ‘পস্সামি খো অহং, সম্ম, উপরিপব্বতে ঠিতো আরামরামণেয্যকং ৰনরামণেয্যকং ভূমিরামণেয্যকং পোক্খরণীরামণেয্যক’’’ন্তি।
216. ‘‘Seyyathāpi , aggivessana, gāmassa vā nigamassa vā avidūre mahāpabbato. Tamenaṃ dve sahāyakā tamhā gāmā vā nigamā vā nikkhamitvā hatthavilaṅghakena yena so pabbato tenupasaṅkameyyuṃ; upasaṅkamitvā eko sahāyako heṭṭhā pabbatapāde tiṭṭheyya, eko sahāyako uparipabbataṃ āroheyya. Tamenaṃ heṭṭhā pabbatapāde ṭhito sahāyako uparipabbate ṭhitaṃ sahāyakaṃ evaṃ vedayya – ‘yaṃ, samma, kiṃ tvaṃ passasi uparipabbate ṭhito’ti? So evaṃ vadeyya – ‘passāmi kho ahaṃ, samma, uparipabbate ṭhito ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇīrāmaṇeyyaka’’’nti.
‘‘সো এৰং ৰদেয্য – ‘অট্ঠানং খো এতং, সম্ম , অনৰকাসো যং ত্ৰং উপরিপব্বতে ঠিতো পস্সেয্যাসি আরামরামণেয্যকং ৰনরামণেয্যকং ভূমিরামণেয্যকং পোক্খরণীরামণেয্যক’ন্তি। তমেনং উপরিপব্বতে ঠিতো সহাযকো হেট্ঠিমপব্বতপাদং ওরোহিত্ৰা তং সহাযকং বাহাযং গহেত্ৰা উপরিপব্বতং আরোপেত্ৰা মুহুত্তং অস্সাসেত্ৰা এৰং ৰদেয্য – ‘যং, সম্ম, কিং ত্ৰং পস্সসি উপরিপব্বতে ঠিতো’তি? সো এৰং ৰদেয্য – ‘পস্সামি খো অহং, সম্ম, উপরিপব্বতে ঠিতো আরামরামণেয্যকং ৰনরামণেয্যকং ভূমিরামণেয্যকং পোক্খরণীরামণেয্যক’’’ন্তি ।
‘‘So evaṃ vadeyya – ‘aṭṭhānaṃ kho etaṃ, samma , anavakāso yaṃ tvaṃ uparipabbate ṭhito passeyyāsi ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇīrāmaṇeyyaka’nti. Tamenaṃ uparipabbate ṭhito sahāyako heṭṭhimapabbatapādaṃ orohitvā taṃ sahāyakaṃ bāhāyaṃ gahetvā uparipabbataṃ āropetvā muhuttaṃ assāsetvā evaṃ vadeyya – ‘yaṃ, samma, kiṃ tvaṃ passasi uparipabbate ṭhito’ti? So evaṃ vadeyya – ‘passāmi kho ahaṃ, samma, uparipabbate ṭhito ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇīrāmaṇeyyaka’’’nti .
‘‘সো এৰং ৰদেয্য – ‘ইদানেৰ খো তে, সম্ম, ভাসিতং – মযং এৰং আজানাম – অট্ঠানং খো এতং সম্ম, অনৰকাসো যং ত্ৰং উপরিপব্বতে ঠিতো পস্সেয্যাসি আরামরামণেয্যকং ৰনরামণেয্যকং ভূমিরামণেয্যকং পোক্খরণীরামণেয্যক’ন্তি। ইদানেৰ চ পন তে ভাসিতং মযং এৰং আজানাম – ‘পস্সামি খো অহং, সম্ম, উপরিপব্বতে ঠিতো আরামরামণেয্যকং ৰনরামণেয্যকং ভূমিরামণেয্যকং পোক্খরণীরামণেয্যক’ন্তি। সো এৰং ৰদেয্য – ‘তথা হি পনাহং, সম্ম, ইমিনা মহতা পব্বতেন আৰুতো 7 দট্ঠেয্যং নাদ্দস’’’ন্তি।
‘‘So evaṃ vadeyya – ‘idāneva kho te, samma, bhāsitaṃ – mayaṃ evaṃ ājānāma – aṭṭhānaṃ kho etaṃ samma, anavakāso yaṃ tvaṃ uparipabbate ṭhito passeyyāsi ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇīrāmaṇeyyaka’nti. Idāneva ca pana te bhāsitaṃ mayaṃ evaṃ ājānāma – ‘passāmi kho ahaṃ, samma, uparipabbate ṭhito ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇīrāmaṇeyyaka’nti. So evaṃ vadeyya – ‘tathā hi panāhaṃ, samma, iminā mahatā pabbatena āvuto 8 daṭṭheyyaṃ nāddasa’’’nti.
‘‘অতো মহন্ততরেন, অগ্গিৰেস্সন, অৰিজ্জাখন্ধেন জযসেনো রাজকুমারো আৰুতো নিৰুতো 9 ওফুটো 10 পরিযোনদ্ধো। সো ৰত যং তং নেক্খম্মেন ঞাতব্বং নেক্খম্মেন দট্ঠব্বং নেক্খম্মেন পত্তব্বং নেক্খম্মেন সচ্ছিকাতব্বং তং ৰত জযসেনো রাজকুমারো কামমজ্ঝে ৰসন্তো কামে পরিভুঞ্জন্তো কামৰিতক্কেহি খজ্জমানো কামপরিল়াহেন পরিডয্হমানো কামপরিযেসনায উস্সুকো ঞস্সতি ৰা দক্খতি ৰা সচ্ছি ৰা করিস্সতীতি – নেতং ঠানং ৰিজ্জতি । সচে খো তং, অগ্গিৰেস্সন, জযসেনস্স রাজকুমারস্স ইমা দ্ৰে উপমা পটিভাযেয্যুং 11, অনচ্ছরিযং তে জযসেনো রাজকুমারো পসীদেয্য, পসন্নো চ তে পসন্নাকারং করেয্যা’’তি। ‘‘কুতো পন মং, ভন্তে, জযসেনস্স রাজকুমারস্স ইমা দ্ৰে উপমা পটিভাযিস্সন্তি 12 অনচ্ছরিযা পুব্বে অস্সুতপুব্বা, সেয্যথাপি ভগৰন্ত’’ন্তি?
‘‘Ato mahantatarena, aggivessana, avijjākhandhena jayaseno rājakumāro āvuto nivuto 13 ophuṭo 14 pariyonaddho. So vata yaṃ taṃ nekkhammena ñātabbaṃ nekkhammena daṭṭhabbaṃ nekkhammena pattabbaṃ nekkhammena sacchikātabbaṃ taṃ vata jayaseno rājakumāro kāmamajjhe vasanto kāme paribhuñjanto kāmavitakkehi khajjamāno kāmapariḷāhena pariḍayhamāno kāmapariyesanāya ussuko ñassati vā dakkhati vā sacchi vā karissatīti – netaṃ ṭhānaṃ vijjati . Sace kho taṃ, aggivessana, jayasenassa rājakumārassa imā dve upamā paṭibhāyeyyuṃ 15, anacchariyaṃ te jayaseno rājakumāro pasīdeyya, pasanno ca te pasannākāraṃ kareyyā’’ti. ‘‘Kuto pana maṃ, bhante, jayasenassa rājakumārassa imā dve upamā paṭibhāyissanti 16 anacchariyā pubbe assutapubbā, seyyathāpi bhagavanta’’nti?
২১৭. ‘‘সেয্যথাপি , অগ্গিৰেস্সন, রাজা খত্তিযো মুদ্ধাৰসিত্তো নাগৰনিকং আমন্তেতি – ‘এহি ত্ৰং, সম্ম নাগৰনিক, রঞ্ঞো নাগং অভিরুহিত্ৰা নাগৰনং পৰিসিত্ৰা আরঞ্ঞকং নাগং অতিপস্সিত্ৰা রঞ্ঞো নাগস্স গীৰাযং উপনিবন্ধাহী’তি। ‘এৰং, দেৰা’তি খো, অগ্গিৰেস্সন, নাগৰনিকো রঞ্ঞো খত্তিযস্স মুদ্ধাৰসিত্তস্স পটিস্সুত্ৰা রঞ্ঞো নাগং অভিরুহিত্ৰা নাগৰনং পৰিসিত্ৰা আরঞ্ঞকং নাগং অতিপস্সিত্ৰা রঞ্ঞো নাগস্স গীৰাযং উপনিবন্ধতি। তমেনং রঞ্ঞো নাগো অব্ভোকাসং নীহরতি। এত্তাৰতা খো, অগ্গিৰেস্সন, আরঞ্ঞকো নাগো অব্ভোকাসং গতো হোতি। এত্থগেধা 17 হি, অগ্গিৰেস্সন, আরঞ্ঞকা নাগা যদিদং – নাগৰনং। তমেনং নাগৰনিকো রঞ্ঞো খত্তিযস্স মুদ্ধাৰসিত্তস্স আরোচেসি – ‘অব্ভোকাসগতো খো 18, দেৰ, আরঞ্ঞকো নাগো’তি। অথ খো অগ্গিৰেস্সন, তমেনং রাজা খত্তিযো মুদ্ধাৰসিত্তো হত্থিদমকং আমন্তেসি – ‘এহি ত্ৰং, সম্ম হত্থিদমক, আরঞ্ঞকং নাগং দমযাহি আরঞ্ঞকানঞ্চেৰ সীলানং অভিনিম্মদনায আরঞ্ঞকানঞ্চেৰ সরসঙ্কপ্পানং অভিনিম্মদনায আরঞ্ঞকানঞ্চেৰ দরথকিলমথপরিল়াহানং অভিনিম্মদনায গামন্তে অভিরমাপনায মনুস্সকন্তেসু সীলেসু সমাদপনাযা’’’তি 19।
217. ‘‘Seyyathāpi , aggivessana, rājā khattiyo muddhāvasitto nāgavanikaṃ āmanteti – ‘ehi tvaṃ, samma nāgavanika, rañño nāgaṃ abhiruhitvā nāgavanaṃ pavisitvā āraññakaṃ nāgaṃ atipassitvā rañño nāgassa gīvāyaṃ upanibandhāhī’ti. ‘Evaṃ, devā’ti kho, aggivessana, nāgavaniko rañño khattiyassa muddhāvasittassa paṭissutvā rañño nāgaṃ abhiruhitvā nāgavanaṃ pavisitvā āraññakaṃ nāgaṃ atipassitvā rañño nāgassa gīvāyaṃ upanibandhati. Tamenaṃ rañño nāgo abbhokāsaṃ nīharati. Ettāvatā kho, aggivessana, āraññako nāgo abbhokāsaṃ gato hoti. Etthagedhā 20 hi, aggivessana, āraññakā nāgā yadidaṃ – nāgavanaṃ. Tamenaṃ nāgavaniko rañño khattiyassa muddhāvasittassa ārocesi – ‘abbhokāsagato kho 21, deva, āraññako nāgo’ti. Atha kho aggivessana, tamenaṃ rājā khattiyo muddhāvasitto hatthidamakaṃ āmantesi – ‘ehi tvaṃ, samma hatthidamaka, āraññakaṃ nāgaṃ damayāhi āraññakānañceva sīlānaṃ abhinimmadanāya āraññakānañceva sarasaṅkappānaṃ abhinimmadanāya āraññakānañceva darathakilamathapariḷāhānaṃ abhinimmadanāya gāmante abhiramāpanāya manussakantesu sīlesu samādapanāyā’’’ti 22.
‘‘‘এৰং , দেৰা’তি খো, অগ্গিৰেস্সন, হত্থিদমকো রঞ্ঞো খত্তিযস্স মুদ্ধাৰসিত্তস্স পটিস্সুত্ৰা মহন্তং থম্ভং পথৰিযং নিখণিত্ৰা আরঞ্ঞকস্স নাগস্স গীৰাযং উপনিবন্ধতি আরঞ্ঞকানঞ্চেৰ সীলানং অভিনিম্মদনায আরঞ্ঞকানঞ্চেৰ সরসঙ্কপ্পানং অভিনিম্মদনায আরঞ্ঞকানঞ্চেৰ দরথকিলমথপরিল়াহানং অভিনিম্মদনায গামন্তে অভিরমাপনায মনুস্সকন্তেসু সীলেসু সমাদপনায। তমেনং হত্থিদমকো যা সা ৰাচা নেলা কণ্ণসুখা পেমনীযা হদযঙ্গমা পোরী বহুজনকন্তা বহুজনমনাপা তথারূপাহি ৰাচাহি সমুদাচরতি। যতো খো, অগ্গিৰেস্সন, আরঞ্ঞকো নাগো হত্থিদমকস্স যা সা ৰাচা নেলা কণ্ণসুখা পেমনীযা হদযঙ্গমা পোরী বহুজনকন্তা বহুজনমনাপা তথারূপাহি ৰাচাহি সমুদাচরিযমানো সুস্সূসতি, সোতং ওদহতি, অঞ্ঞা চিত্তং উপট্ঠাপেতি; তমেনং হত্থিদমকো উত্তরি তিণঘাসোদকং অনুপ্পৰেচ্ছতি।
‘‘‘Evaṃ , devā’ti kho, aggivessana, hatthidamako rañño khattiyassa muddhāvasittassa paṭissutvā mahantaṃ thambhaṃ pathaviyaṃ nikhaṇitvā āraññakassa nāgassa gīvāyaṃ upanibandhati āraññakānañceva sīlānaṃ abhinimmadanāya āraññakānañceva sarasaṅkappānaṃ abhinimmadanāya āraññakānañceva darathakilamathapariḷāhānaṃ abhinimmadanāya gāmante abhiramāpanāya manussakantesu sīlesu samādapanāya. Tamenaṃ hatthidamako yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā tathārūpāhi vācāhi samudācarati. Yato kho, aggivessana, āraññako nāgo hatthidamakassa yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā tathārūpāhi vācāhi samudācariyamāno sussūsati, sotaṃ odahati, aññā cittaṃ upaṭṭhāpeti; tamenaṃ hatthidamako uttari tiṇaghāsodakaṃ anuppavecchati.
‘‘যতো খো, অগ্গিৰেস্সন, আরঞ্ঞকো নাগো হত্থিদমকস্স তিণঘাসোদকং পটিগ্গণ্হাতি, তত্র হত্থিদমকস্স এৰং হোতি – ‘জীৰিস্সতি খো 23 দানি আরঞ্ঞকো 24 নাগো’তি। তমেনং হত্থিদমকো উত্তরি কারণং কারেতি – ‘আদিয, ভো, নিক্খিপ, ভো’তি। যতো খো, অগ্গিৰেস্সন, আরঞ্ঞকো নাগো হত্থিদমকস্স আদাননিক্খেপে ৰচনকরো হোতি ওৰাদপ্পটিকরো, তমেনং হত্থিদমকো উত্তরি কারণং কারেতি – ‘অভিক্কম, ভো, পটিক্কম, ভো’তি। যতো খো, অগ্গিৰেস্সন, আরঞ্ঞকো নাগো হত্থিদমকস্স অভিক্কমপটিক্কমৰচনকরো হোতি ওৰাদপ্পটিকরো, তমেনং হত্থিদমকো উত্তরি কারণং কারেতি – ‘উট্ঠহ, ভো, নিসীদ, ভো’তি। যতো খো, অগ্গিৰেস্সন, আরঞ্ঞকো নাগো হত্থিদমকস্স উট্ঠাননিসজ্জায ৰচনকরো হোতি ওৰাদপ্পটিকরো, তমেনং হত্থিদমকো উত্তরি আনেঞ্জং নাম কারণং কারেতি, মহন্তস্স ফলকং সোণ্ডায উপনিবন্ধতি, তোমরহত্থো চ পুরিসো উপরিগীৰায নিসিন্নো হোতি, সমন্ততো চ তোমরহত্থা পুরিসা পরিৰারেত্ৰা ঠিতা হোন্তি, হত্থিদমকো চ দীঘতোমরযট্ঠিং গহেত্ৰা পুরতো ঠিতো হোতি। সো আনেঞ্জং কারণং কারিযমানো নেৰ পুরিমে পাদে চোপেতি ন পচ্ছিমে পাদে চোপেতি, ন পুরিমকাযং চোপেতি ন পচ্ছিমকাযং চোপেতি, ন সীসং চোপেতি, ন কণ্ণে চোপেতি, ন দন্তে চোপেতি , ন নঙ্গুট্ঠং চোপেতি, ন সোণ্ডং চোপেতি। সো হোতি আরঞ্ঞকো নাগো খমো সত্তিপ্পহারানং অসিপ্পহারানং উসুপ্পহারানং সরপত্তপ্পহারানং 25 ভেরিপণৰৰংসসঙ্খডিণ্ডিমনিন্নাদসদ্দানং 26 সব্বৰঙ্কদোসনিহিতনিন্নীতকসাৰো রাজারহো রাজভোগ্গো রঞ্ঞো অঙ্গন্তেৰ সঙ্খং গচ্ছতি।
‘‘Yato kho, aggivessana, āraññako nāgo hatthidamakassa tiṇaghāsodakaṃ paṭiggaṇhāti, tatra hatthidamakassa evaṃ hoti – ‘jīvissati kho 27 dāni āraññako 28 nāgo’ti. Tamenaṃ hatthidamako uttari kāraṇaṃ kāreti – ‘ādiya, bho, nikkhipa, bho’ti. Yato kho, aggivessana, āraññako nāgo hatthidamakassa ādānanikkhepe vacanakaro hoti ovādappaṭikaro, tamenaṃ hatthidamako uttari kāraṇaṃ kāreti – ‘abhikkama, bho, paṭikkama, bho’ti. Yato kho, aggivessana, āraññako nāgo hatthidamakassa abhikkamapaṭikkamavacanakaro hoti ovādappaṭikaro, tamenaṃ hatthidamako uttari kāraṇaṃ kāreti – ‘uṭṭhaha, bho, nisīda, bho’ti. Yato kho, aggivessana, āraññako nāgo hatthidamakassa uṭṭhānanisajjāya vacanakaro hoti ovādappaṭikaro, tamenaṃ hatthidamako uttari āneñjaṃ nāma kāraṇaṃ kāreti, mahantassa phalakaṃ soṇḍāya upanibandhati, tomarahattho ca puriso uparigīvāya nisinno hoti, samantato ca tomarahatthā purisā parivāretvā ṭhitā honti, hatthidamako ca dīghatomarayaṭṭhiṃ gahetvā purato ṭhito hoti. So āneñjaṃ kāraṇaṃ kāriyamāno neva purime pāde copeti na pacchime pāde copeti, na purimakāyaṃ copeti na pacchimakāyaṃ copeti, na sīsaṃ copeti, na kaṇṇe copeti, na dante copeti , na naṅguṭṭhaṃ copeti, na soṇḍaṃ copeti. So hoti āraññako nāgo khamo sattippahārānaṃ asippahārānaṃ usuppahārānaṃ sarapattappahārānaṃ 29 bheripaṇavavaṃsasaṅkhaḍiṇḍimaninnādasaddānaṃ 30 sabbavaṅkadosanihitaninnītakasāvo rājāraho rājabhoggo rañño aṅganteva saṅkhaṃ gacchati.
২১৮. ‘‘এৰমেৰ খো, অগ্গিৰেস্সন, ইধ তথাগতো লোকে উপ্পজ্জতি অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা। সো ইমং লোকং সদেৰকং সমারকং সব্রহ্মকং সস্সমণব্রাহ্মণিং পজং সদেৰমনুস্সং সযং অভিঞ্ঞা সচ্ছিকত্ৰা পৰেদেতি। সো ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ব্রহ্মচরিযং পকাসেতি। তং ধম্মং সুণাতি গহপতি ৰা গহপতিপুত্তো ৰা অঞ্ঞতরস্মিং ৰা কুলে পচ্চাজাতো। সো তং ধম্মং সুত্ৰা তথাগতে সদ্ধং পটিলভতি। সো তেন সদ্ধাপটিলাভেন সমন্নাগতো ইতি পটিসঞ্চিক্খতি – ‘সম্বাধো ঘরাৰাসো রজাপথো, অব্ভোকাসো পব্বজ্জা। নযিদং সুকরং অগারং অজ্ঝাৰসতা একন্তপরিপুণ্ণং একন্তপরিসুদ্ধং সঙ্খলিখিতং ব্রহ্মচরিযং চরিতুং। যংনূনাহং কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজেয্য’ন্তি।
218. ‘‘Evameva kho, aggivessana, idha tathāgato loke uppajjati arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā. So imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedeti. So dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ, kevalaparipuṇṇaṃ parisuddhaṃ brahmacariyaṃ pakāseti. Taṃ dhammaṃ suṇāti gahapati vā gahapatiputto vā aññatarasmiṃ vā kule paccājāto. So taṃ dhammaṃ sutvā tathāgate saddhaṃ paṭilabhati. So tena saddhāpaṭilābhena samannāgato iti paṭisañcikkhati – ‘sambādho gharāvāso rajāpatho, abbhokāso pabbajjā. Nayidaṃ sukaraṃ agāraṃ ajjhāvasatā ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ carituṃ. Yaṃnūnāhaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyya’nti.
‘‘সো অপরেন সমযেন অপ্পং ৰা ভোগক্খন্ধং পহায মহন্তং ৰা ভোগক্খন্ধং পহায অপ্পং ৰা ঞাতিপরিৰট্টং পহায মহন্তং ৰা ঞাতিপরিৰট্টং পহায কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজতি। এত্তাৰতা খো, অগ্গিৰেস্সন, অরিযসাৰকো অব্ভোকাসগতো হোতি। এত্থগেধা হি, অগ্গিৰেস্সন, দেৰমনুস্সা যদিদং – পঞ্চ কামগুণা। তমেনং তথাগতো উত্তরিং ৰিনেতি – ‘এহি ত্ৰং, ভিক্খু, সীলৰা হোহি, পাতিমোক্খসংৰরসংৰুতো ৰিহরাহি আচারগোচরসম্পন্নো, অণুমত্তেসু ৰজ্জেসু ভযদস্সাৰী, সমাদায সিক্খস্সু সিক্খাপদেসূ’’’তি।
‘‘So aparena samayena appaṃ vā bhogakkhandhaṃ pahāya mahantaṃ vā bhogakkhandhaṃ pahāya appaṃ vā ñātiparivaṭṭaṃ pahāya mahantaṃ vā ñātiparivaṭṭaṃ pahāya kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajati. Ettāvatā kho, aggivessana, ariyasāvako abbhokāsagato hoti. Etthagedhā hi, aggivessana, devamanussā yadidaṃ – pañca kāmaguṇā. Tamenaṃ tathāgato uttariṃ vineti – ‘ehi tvaṃ, bhikkhu, sīlavā hohi, pātimokkhasaṃvarasaṃvuto viharāhi ācāragocarasampanno, aṇumattesu vajjesu bhayadassāvī, samādāya sikkhassu sikkhāpadesū’’’ti.
‘‘যতো খো, অগ্গিৰেস্সন, অরিযসাৰকো সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু, তমেনং তথাগতো উত্তরিং ৰিনেতি – ‘এহি ত্ৰং, ভিক্খু, ইন্দ্রিযেসু গুত্তদ্ৰারো হোহি, চক্খুনা রূপং দিস্ৰা মা নিমিত্তগ্গাহী…পে॰… (যথা গণকমোগ্গল্লানসুত্তন্তে, এৰং ৰিত্থারেতব্বানি।)
‘‘Yato kho, aggivessana, ariyasāvako sīlavā hoti, pātimokkhasaṃvarasaṃvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu, tamenaṃ tathāgato uttariṃ vineti – ‘ehi tvaṃ, bhikkhu, indriyesu guttadvāro hohi, cakkhunā rūpaṃ disvā mā nimittaggāhī…pe… (yathā gaṇakamoggallānasuttante, evaṃ vitthāretabbāni.)
২১৯. ‘‘সো ইমে পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে কাযে কাযানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং। ৰেদনাসু…পে॰… চিত্তে…পে॰… ধম্মেসু ধম্মানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং। সেয্যথাপি, অগ্গিৰেস্সন, হত্থিদমকো মহন্তং থম্ভং পথৰিযং নিখণিত্ৰা আরঞ্ঞকস্স নাগস্স গীৰাযং উপনিবন্ধতি আরঞ্ঞকানঞ্চেৰ সীলানং অভিনিম্মদনায আরঞ্ঞকানঞ্চেৰ সরসঙ্কপ্পানং অভিনিম্মদনায আরঞ্ঞকানঞ্চেৰ দরথকিলমথপরিল়াহানং অভিনিম্মদনায গামন্তে অভিরমাপনায মনুস্সকন্তেসু সীলেসু সমাদপনায; এৰমেৰ খো, অগ্গিৰেস্সন, অরিযসাৰকস্স ইমে চত্তারো সতিপট্ঠানা চেতসো উপনিবন্ধনা হোন্তি গেহসিতানঞ্চেৰ সীলানং অভিনিম্মদনায গেহসিতানঞ্চেৰ সরসঙ্কপ্পানং অভিনিম্মদনায গেহসিতানঞ্চেৰ দরথকিলমথপরিল়াহানং অভিনিম্মদনায ঞাযস্স অধিগমায নিব্বানস্স সচ্ছিকিরিযায।
219. ‘‘So ime pañca nīvaraṇe pahāya cetaso upakkilese paññāya dubbalīkaraṇe kāye kāyānupassī viharati ātāpī sampajāno satimā vineyya loke abhijjhādomanassaṃ. Vedanāsu…pe… citte…pe… dhammesu dhammānupassī viharati ātāpī sampajāno satimā vineyya loke abhijjhādomanassaṃ. Seyyathāpi, aggivessana, hatthidamako mahantaṃ thambhaṃ pathaviyaṃ nikhaṇitvā āraññakassa nāgassa gīvāyaṃ upanibandhati āraññakānañceva sīlānaṃ abhinimmadanāya āraññakānañceva sarasaṅkappānaṃ abhinimmadanāya āraññakānañceva darathakilamathapariḷāhānaṃ abhinimmadanāya gāmante abhiramāpanāya manussakantesu sīlesu samādapanāya; evameva kho, aggivessana, ariyasāvakassa ime cattāro satipaṭṭhānā cetaso upanibandhanā honti gehasitānañceva sīlānaṃ abhinimmadanāya gehasitānañceva sarasaṅkappānaṃ abhinimmadanāya gehasitānañceva darathakilamathapariḷāhānaṃ abhinimmadanāya ñāyassa adhigamāya nibbānassa sacchikiriyāya.
২২০. ‘‘তমেনং তথাগতো উত্তরিং ৰিনেতি – ‘এহি ত্ৰং, ভিক্খু, কাযে কাযানুপস্সী ৰিহরাহি , মা চ কামূপসংহিতং ৰিতক্কং ৰিতক্কেসি। ৰেদনাসু… চিত্তে… ধম্মেসু ধম্মানুপস্সী ৰিহরাহি, মা চ কামূপসংহিতং ৰিতক্কং ৰিতক্কেসী’’’তি।
220. ‘‘Tamenaṃ tathāgato uttariṃ vineti – ‘ehi tvaṃ, bhikkhu, kāye kāyānupassī viharāhi , mā ca kāmūpasaṃhitaṃ vitakkaṃ vitakkesi. Vedanāsu… citte… dhammesu dhammānupassī viharāhi, mā ca kāmūpasaṃhitaṃ vitakkaṃ vitakkesī’’’ti.
‘‘সো ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং…পে॰… ততিযং ঝানং… চতুত্থং ঝানং উপসম্পজ্জ ৰিহরতি। সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে পুব্বেনিৰাসানুস্সতিঞাণায চিত্তং অভিনিন্নামেতি। সো অনেকৰিহিতং পুব্বেনিৰাসং অনুস্সরতি, সেয্যথিদং – একম্পি জাতিং দ্ৰেপি জাতিযো…পে॰… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি।
‘‘So vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ…pe… tatiyaṃ jhānaṃ… catutthaṃ jhānaṃ upasampajja viharati. So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte pubbenivāsānussatiñāṇāya cittaṃ abhininnāmeti. So anekavihitaṃ pubbenivāsaṃ anussarati, seyyathidaṃ – ekampi jātiṃ dvepi jātiyo…pe… iti sākāraṃ sauddesaṃ anekavihitaṃ pubbenivāsaṃ anussarati.
২২১. ‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে সত্তানং চুতূপপাতঞাণায চিত্তং অভিনিন্নামেতি। সো দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে, সুগতে দুগ্গতে…পে॰… যথাকম্মূপগে সত্তে পজানাতি।
221. ‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte sattānaṃ cutūpapātañāṇāya cittaṃ abhininnāmeti. So dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate…pe… yathākammūpage satte pajānāti.
‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে আসৰানং খযঞাণায চিত্তং অভিনিন্নামেতি। সো ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি যথাভূতং পজানাতি, ‘অযং দুক্খনিরোধো’তি যথাভূতং পজানাতি, ‘অযং দুক্খনিরোধগামিনী পটিপদা’তি যথাভূতং পজানাতি; ‘ইমে আসৰা’তি যথাভূতং পজানাতি, ‘অযং আসৰসমুদযো’তি যথাভূতং পজানাতি, ‘অযং আসৰনিরোধো’তি যথাভূতং পজানাতি, ‘অযং আসৰনিরোধগামিনী পটিপদা’তি যথাভূতং পজানাতি। তস্স এৰং জানতো এৰং পস্সতো কামাসৰাপি চিত্তং ৰিমুচ্চতি, ভৰাসৰাপি চিত্তং ৰিমুচ্চতি, অৰিজ্জাসৰাপি চিত্তং ৰিমুচ্চতি। ৰিমুত্তস্মিং ৰিমুত্তমিতি ঞাণং হোতি। ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি।
‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṃ khayañāṇāya cittaṃ abhininnāmeti. So ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti; ‘ime āsavā’ti yathābhūtaṃ pajānāti, ‘ayaṃ āsavasamudayo’ti yathābhūtaṃ pajānāti, ‘ayaṃ āsavanirodho’ti yathābhūtaṃ pajānāti, ‘ayaṃ āsavanirodhagāminī paṭipadā’ti yathābhūtaṃ pajānāti. Tassa evaṃ jānato evaṃ passato kāmāsavāpi cittaṃ vimuccati, bhavāsavāpi cittaṃ vimuccati, avijjāsavāpi cittaṃ vimuccati. Vimuttasmiṃ vimuttamiti ñāṇaṃ hoti. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāti.
‘‘সো হোতি ভিক্খু খমো সীতস্স উণ্হস্স জিঘচ্ছায পিপাসায ডংসমকসৰাতাতপসরীসপসম্ফস্সানং দুরুত্তানং দুরাগতানং ৰচনপথানং, উপ্পন্নানং সারীরিকানং ৰেদনানং দুক্খানং তিব্বানং খরানং কটুকানং অসাতানং অমনাপানং পাণহরানং অধিৰাসকজাতিকো হোতি সব্বরাগদোসমোহনিহিতনিন্নীতকসাৰো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্স।
‘‘So hoti bhikkhu khamo sītassa uṇhassa jighacchāya pipāsāya ḍaṃsamakasavātātapasarīsapasamphassānaṃ duruttānaṃ durāgatānaṃ vacanapathānaṃ, uppannānaṃ sārīrikānaṃ vedanānaṃ dukkhānaṃ tibbānaṃ kharānaṃ kaṭukānaṃ asātānaṃ amanāpānaṃ pāṇaharānaṃ adhivāsakajātiko hoti sabbarāgadosamohanihitaninnītakasāvo āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa.
২২২. ‘‘মহল্লকো চেপি, অগ্গিৰেস্সন, রঞ্ঞো নাগো অদন্তো অৰিনীতো কালঙ্করোতি, ‘অদন্তমরণং 31 মহল্লকো রঞ্ঞো নাগো কালঙ্কতো’ত্ৰেৰ সঙ্খং গচ্ছতি; মজ্ঝিমো চেপি, অগ্গিৰেস্সন, রঞ্ঞো নাগো। দহরো চেপি, অগ্গিৰেস্সন, রঞ্ঞো নাগো অদন্তো অৰিনীতো কালঙ্করোতি , ‘অদন্তমরণং দহরো রঞ্ঞো নাগো কালঙ্কতো’ত্ৰেৰ সঙ্খং গচ্ছতি; এৰমেৰ খো, অগ্গিৰেস্সন, থেরো চেপি ভিক্খু অখীণাসৰো কালঙ্করোতি, ‘অদন্তমরণং থেরো ভিক্খু কালঙ্কতো’ত্ৰেৰ সঙ্খং গচ্ছতি; মজ্ঝিমো চেপি, অগ্গিৰেস্সন, ভিক্খু। নৰো চেপি, অগ্গিৰেস্সন, ভিক্খু অখীণাসৰো কালঙ্করোতি, ‘অদন্তমরণং নৰো ভিক্খু কালঙ্কতো’ত্ৰেৰ সঙ্খং গচ্ছতি।
222. ‘‘Mahallako cepi, aggivessana, rañño nāgo adanto avinīto kālaṅkaroti, ‘adantamaraṇaṃ 32 mahallako rañño nāgo kālaṅkato’tveva saṅkhaṃ gacchati; majjhimo cepi, aggivessana, rañño nāgo. Daharo cepi, aggivessana, rañño nāgo adanto avinīto kālaṅkaroti , ‘adantamaraṇaṃ daharo rañño nāgo kālaṅkato’tveva saṅkhaṃ gacchati; evameva kho, aggivessana, thero cepi bhikkhu akhīṇāsavo kālaṅkaroti, ‘adantamaraṇaṃ thero bhikkhu kālaṅkato’tveva saṅkhaṃ gacchati; majjhimo cepi, aggivessana, bhikkhu. Navo cepi, aggivessana, bhikkhu akhīṇāsavo kālaṅkaroti, ‘adantamaraṇaṃ navo bhikkhu kālaṅkato’tveva saṅkhaṃ gacchati.
‘‘মহল্লকো চেপি, অগ্গিৰেস্সন, রঞ্ঞো নাগো সুদন্তো সুৰিনীতো কালঙ্করোতি, ‘দন্তমরণং মহল্লকো রঞ্ঞো নাগো কালঙ্কতো’ত্ৰেৰ সঙ্খং গচ্ছতি; মজ্ঝিমো চেপি, অগ্গিৰেস্সন, রঞ্ঞো নাগো… দহরো চেপি, অগ্গিৰেস্সন, রঞ্ঞো নাগো সুদন্তো সুৰিনীতো কালঙ্করোতি, ‘দন্তমরণং দহরো রঞ্ঞো নাগো কালঙ্কতো’ত্ৰেৰ সঙ্খং গচ্ছতি; এৰমেৰ খো, অগ্গিৰেস্সন, থেরো চেপি ভিক্খু খীণাসৰো কালঙ্করোতি, ‘দন্তমরণং থেরো ভিক্খু কালঙ্কতো’ত্ৰেৰ সঙ্খং গচ্ছতি; মজ্ঝিমো চেপি, অগ্গিৰেস্সন, ভিক্খু। নৰো চেপি, অগ্গিৰেস্সন, ভিক্খু খীণাসৰো কালঙ্করোতি, ‘দন্তমরণং নৰো ভিক্খু কালঙ্কতো’ত্ৰেৰ সঙ্খং গচ্ছতী’’তি।
‘‘Mahallako cepi, aggivessana, rañño nāgo sudanto suvinīto kālaṅkaroti, ‘dantamaraṇaṃ mahallako rañño nāgo kālaṅkato’tveva saṅkhaṃ gacchati; majjhimo cepi, aggivessana, rañño nāgo… daharo cepi, aggivessana, rañño nāgo sudanto suvinīto kālaṅkaroti, ‘dantamaraṇaṃ daharo rañño nāgo kālaṅkato’tveva saṅkhaṃ gacchati; evameva kho, aggivessana, thero cepi bhikkhu khīṇāsavo kālaṅkaroti, ‘dantamaraṇaṃ thero bhikkhu kālaṅkato’tveva saṅkhaṃ gacchati; majjhimo cepi, aggivessana, bhikkhu. Navo cepi, aggivessana, bhikkhu khīṇāsavo kālaṅkaroti, ‘dantamaraṇaṃ navo bhikkhu kālaṅkato’tveva saṅkhaṃ gacchatī’’ti.
ইদমৰোচ ভগৰা। অত্তমনো অচিরৰতো সমণুদ্দেসো ভগৰতো ভাসিতং অভিনন্দীতি।
Idamavoca bhagavā. Attamano aciravato samaṇuddeso bhagavato bhāsitaṃ abhinandīti.
দন্তভূমিসুত্তং নিট্ঠিতং পঞ্চমং।
Dantabhūmisuttaṃ niṭṭhitaṃ pañcamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৫. দন্তভূমিসুত্তৰণ্ণনা • 5. Dantabhūmisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৫. দন্তভূমিসুত্তৰণ্ণনা • 5. Dantabhūmisuttavaṇṇanā
