| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
5. த³ந்தபூ⁴மிஸுத்தவண்ணனா
5. Dantabhūmisuttavaṇṇanā
213. பு²ஸெய்யாதி ஞாணபு²ஸனா நாம அதி⁴ப்பேதா, தஸ்மா லபெ⁴ய்யாதி அதி⁴க³ச்செ²ய்ய. ஏவங் படிபன்னோதி, ‘‘அப்பமத்தோ ஆதாபீ பஹிதத்தோ’’தி வுத்தப்பகாரேன படிபன்னோ. அஜானநகொட்டா²ஸேயேவாதி அவதா⁴ரணேன அத்தனி கதங் தோ³ஸாரோபனங் நிவத்தேதி.
213.Phuseyyāti ñāṇaphusanā nāma adhippetā, tasmā labheyyāti adhigaccheyya. Evaṃ paṭipannoti, ‘‘appamatto ātāpī pahitatto’’ti vuttappakārena paṭipanno. Ajānanakoṭṭhāseyevāti avadhāraṇena attani kataṃ dosāropanaṃ nivatteti.
214. அப்பனாஉபசாரந்தி அப்பனஞ்சேவ உபசாரஞ்ச பாபெத்வா கதே²ஸீதி அத்த²ங் வத³ந்தி, அப்பனாஸஹிதோ பன உபசாரோ அப்பனாஉபசாரோ, தங் பாபெத்வா கதே²ஸீதி அத்தோ².
214.Appanāupacāranti appanañceva upacārañca pāpetvā kathesīti atthaṃ vadanti, appanāsahito pana upacāro appanāupacāro, taṃ pāpetvā kathesīti attho.
நிக்க²மதீதி நிக்க²மோ, அவக்³கா³ஹகாமதோ நிக்க²மனங் நிக்க²மோ ஏவ நெக்க²ம்மோ, பட²மஜ்ஜா²னாதி³. ஸதி கிலேஸகாமே அத்தனோ உபஹாரங் உபசாரெத்வா அஸ்ஸாதெ³த்வா பரிபு⁴ஞ்ஜதி நாமாதி ஆஹ – ‘‘து³விதே⁴பி காமே பரிபு⁴ஞ்ஜமானோ’’தி. து³விதே⁴பீதி ஹீனபணீதாதி³வஸேன து³விதே⁴.
Nikkhamatīti nikkhamo, avaggāhakāmato nikkhamanaṃ nikkhamo eva nekkhammo, paṭhamajjhānādi. Sati kilesakāme attano upahāraṃ upacāretvā assādetvā paribhuñjati nāmāti āha – ‘‘duvidhepi kāme paribhuñjamāno’’ti. Duvidhepīti hīnapaṇītādivasena duvidhe.
215. கூடாகாரந்தி கா³ள்ஹஸாடெ²ய்யங் அப்பதிரூபே டா²னே க²ந்த⁴க³தபாதனாதி³. த³ந்தக³மனந்தி த³ந்தேஹி நிப்³பி³ஸேவனேஹி க³ந்த⁴ப்³ப³க³திங். பத்தப்³ப³ங் பூ⁴மிந்தி ஸம்மாகிரியாய லத்³த⁴ப்³ப³ஸம்பத்திங்.
215.Kūṭākāranti gāḷhasāṭheyyaṃ appatirūpe ṭhāne khandhagatapātanādi. Dantagamananti dantehi nibbisevanehi gandhabbagatiṃ. Pattabbaṃ bhūminti sammākiriyāya laddhabbasampattiṃ.
216. ப்³யதிஹரணவஸேன லங்க⁴கங் விலங்க⁴கங், அஞ்ஞமஞ்ஞஹத்த²க்³க³ஹணங். தேனாஹ – ‘‘ஹத்தே²ன ஹத்த²ங் க³ஹெத்வா’’தி.
216. Byatiharaṇavasena laṅghakaṃ vilaṅghakaṃ, aññamaññahatthaggahaṇaṃ. Tenāha – ‘‘hatthena hatthaṃ gahetvā’’ti.
217. க³ஹேதுங் ஸமத்தோ²தி க³ணிகாரஹத்தி²னீஹி உபலாபெத்வா அரஞ்ஞஹத்தி²ங் வசனவஸேன க³ஹேதுங் ஸமத்தோ². அதிபஸ்ஸித்வா அதிட்டா²னவஸேன பஸ்ஸித்வா. எத்த²கே³தா⁴தி ஏதஸ்மிங் அரஞ்ஞே நாக³வனே பவத்தகே³தா⁴. ஸுகா²யதீதி ஸுக²ங் அயதி பவத்தேதி, ‘‘ஸுக²ங் ஹரதீ’’தி வா பாடோ². டி³ண்டி³மோ ஆனகோ. நிஹிதஸப்³ப³வங்கதோ³ஸோதி அபக³தஸப்³ப³ஸாடெ²ய்யதோ³ஸோ. அபனீதகஸாவோதி அபேதஸாரம்ப⁴கஸாவோ.
217.Gahetuṃ samatthoti gaṇikārahatthinīhi upalāpetvā araññahatthiṃ vacanavasena gahetuṃ samattho. Atipassitvā atiṭṭhānavasena passitvā. Etthagedhāti etasmiṃ araññe nāgavane pavattagedhā. Sukhāyatīti sukhaṃ ayati pavatteti, ‘‘sukhaṃ haratī’’ti vā pāṭho. Ḍiṇḍimo ānako. Nihitasabbavaṅkadosoti apagatasabbasāṭheyyadoso. Apanītakasāvoti apetasārambhakasāvo.
219. பஞ்சகாமகு³ணனிஸ்ஸிதஸீலானந்தி அகுஸலானங். கே³ஹஸ்ஸிதஸீலானந்தி வா வட்டஸன்னிஸ்ஸிதஸீலானங்.
219.Pañcakāmaguṇanissitasīlānanti akusalānaṃ. Gehassitasīlānanti vā vaṭṭasannissitasīlānaṃ.
222. ஏஸ நயோ ஸப்³ப³த்தா²தி, ‘‘மஜ்ஜி²மோ, த³ஹரோ’’தி ஆக³தேஸு உபமாவாரேஸு, ‘‘தே²ரோ’’திஆதி³னா ஆக³தேஸு உபமெய்யவாரேஸூதி பஞ்சஸு ஸங்கிலேஸபக்கி²யேஸு வாரேஸு ஏஸ யதா²வுத்தோவ நயோதி வேதி³தப்³போ³. ஸேஸங் ஸுவிஞ்ஞெய்யமேவ.
222.Esanayo sabbatthāti, ‘‘majjhimo, daharo’’ti āgatesu upamāvāresu, ‘‘thero’’tiādinā āgatesu upameyyavāresūti pañcasu saṃkilesapakkhiyesu vāresu esa yathāvuttova nayoti veditabbo. Sesaṃ suviññeyyameva.
த³ந்தபூ⁴மிஸுத்தவண்ணனாய லீனத்த²ப்பகாஸனா ஸமத்தா.
Dantabhūmisuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. த³ந்தபூ⁴மிஸுத்தங் • 5. Dantabhūmisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 5. த³ந்தபூ⁴மிஸுத்தவண்ணனா • 5. Dantabhūmisuttavaṇṇanā
