| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৫. দন্তভূমিসুত্তৰণ্ণনা
5. Dantabhūmisuttavaṇṇanā
২১৩. এৰং মে সুতন্তি দন্তভূমিসুত্তং। তত্থ অরঞ্ঞকুটিকাযন্তি তস্সেৰ ৰেল়ুৰনস্স একস্মিং ৰিৰিত্তট্ঠানে পধানকম্মিকানং ভিক্খূনং অত্থায কতসেনাসনে। রাজকুমারোতি বিম্বিসারস্স পুত্তো ওরসকো।
213.Evaṃme sutanti dantabhūmisuttaṃ. Tattha araññakuṭikāyanti tasseva veḷuvanassa ekasmiṃ vivittaṭṭhāne padhānakammikānaṃ bhikkhūnaṃ atthāya katasenāsane. Rājakumāroti bimbisārassa putto orasako.
ফুসেয্যাতি লভেয্য। একগ্গতন্তি এৰং পটিপন্নো সমাপত্তিং নাম লভতি, ঝানং নাম লভতীতি ইদং মযা সুতন্তি ৰদতি। কিলমথোতি কাযকিলমথো। ৰিহেসাতি স্ৰেৰ কিলমথো ৰুত্তো। যথাসকে তিট্ঠেয্যাসীতি অত্তনো অজাননকোট্ঠাসেযেৰ তিট্ঠেয্যাসীতি।
Phuseyyāti labheyya. Ekaggatanti evaṃ paṭipanno samāpattiṃ nāma labhati, jhānaṃ nāma labhatīti idaṃ mayā sutanti vadati. Kilamathoti kāyakilamatho. Vihesāti sveva kilamatho vutto. Yathāsake tiṭṭheyyāsīti attano ajānanakoṭṭhāseyeva tiṭṭheyyāsīti.
২১৪. দেসেসীতি চিত্তেকগ্গতং নাম এৰং লভতি, সমাপত্তিং এৰং নিব্বত্তেতীতি অপ্পনাউপচারং পাপেত্ৰা এককসিণপরিকম্মং কথেসি। পৰেদেত্ৰাতি পকাসেত্ৰা।
214.Desesīti cittekaggataṃ nāma evaṃ labhati, samāpattiṃ evaṃ nibbattetīti appanāupacāraṃ pāpetvā ekakasiṇaparikammaṃ kathesi. Pavedetvāti pakāsetvā.
নেক্খম্মেন ঞাতব্বন্তি কামতো নিস্সটগুণেন ঞাতব্বং। কামতো নিস্সটগুণে ঠিতেন পুগ্গলেন একগ্গং নাম জানিতব্বন্তি অধিপ্পাযেনেতং ৰুত্তং । সেসানি তস্সেৰ ৰেৰচনানি। কামে পরিভুঞ্জন্তোতি দুৰিধেপি কামে ভুঞ্জমানো।
Nekkhammena ñātabbanti kāmato nissaṭaguṇena ñātabbaṃ. Kāmato nissaṭaguṇe ṭhitena puggalena ekaggaṃ nāma jānitabbanti adhippāyenetaṃ vuttaṃ . Sesāni tasseva vevacanāni. Kāmeparibhuñjantoti duvidhepi kāme bhuñjamāno.
২১৫. হত্থিদম্মা ৰা অস্সদম্মা ৰা গোদম্মা ৰাতি এত্থ অদন্তহত্থিদম্মাদযো ৰিয চিত্তেকগ্গরহিতা পুগ্গলা দট্ঠব্বা। দন্তহত্থিআদযো ৰিয চিত্তেকগ্গসম্পন্না। যথা অদন্তহত্থিদম্মাদযো কূটাকারং অকত্ৰা ধুরং অছড্ডেত্ৰা দন্তগমনং ৰা গন্তুং, দন্তেহি ৰা পত্তব্বং ভূমিং পাপুণিতুং ন সক্কোন্তি, এৰমেৰ চিত্তেকগ্গরহিতা সম্পন্নচিত্তেকগ্গেহি নিব্বত্তিতগুণং ৰা নিব্বত্তেতুং পত্তভূমিং ৰা পাপুণিতুং ন সক্কোন্তি।
215.Hatthidammā vā assadammā vā godammā vāti ettha adantahatthidammādayo viya cittekaggarahitā puggalā daṭṭhabbā. Dantahatthiādayo viya cittekaggasampannā. Yathā adantahatthidammādayo kūṭākāraṃ akatvā dhuraṃ achaḍḍetvā dantagamanaṃ vā gantuṃ, dantehi vā pattabbaṃ bhūmiṃ pāpuṇituṃ na sakkonti, evameva cittekaggarahitā sampannacittekaggehi nibbattitaguṇaṃ vā nibbattetuṃ pattabhūmiṃ vā pāpuṇituṃ na sakkonti.
২১৬. হত্থৰিলঙ্ঘকেনাতি হত্থেন হত্থং গহেত্ৰা।
216.Hatthavilaṅghakenāti hatthena hatthaṃ gahetvā.
দট্ঠেয্যন্তি পস্সিতব্বযুত্তকং। আৰুতোতি আৰরিতো। নিৰুতোতি নিৰারিতো। ওফুটোতি ওনদ্ধো।
Daṭṭheyyanti passitabbayuttakaṃ. Āvutoti āvarito. Nivutoti nivārito. Ophuṭoti onaddho.
২১৭. নাগৰনিকন্তি হত্থিপদোপমে (ম॰ নি॰ ১.২৮৮ আদযো) নাগৰনচরকো পুরিসো ‘‘নাগৰনিকো’’তি ৰুত্তো, ইধ হত্থিসিক্খায কুসলো হত্থিং গহেতুং সমত্থো। অতিপস্সিত্ৰাতি দিস্ৰা। এত্থগেধাতি এতস্মিং পৰত্তগেধা। সরসঙ্কপ্পানন্তি ধাৰনসঙ্কপ্পানং। মনুস্সকন্তেসু সীলেসু সমাদপনাযাতি এত্থ যদা নাগো ইত্থিপুরিসেহি কুমারকুমারিকাহি সোণ্ডাদীসু গহেত্ৰা উপকেল়যমানো ৰিকারং ন করোতি সুখাযতি, তদানেন মনুস্সকন্তানি সীলানি সমাদিন্নানি নাম হোন্তি।
217.Nāgavanikanti hatthipadopame (ma. ni. 1.288 ādayo) nāgavanacarako puriso ‘‘nāgavaniko’’ti vutto, idha hatthisikkhāya kusalo hatthiṃ gahetuṃ samattho. Atipassitvāti disvā. Etthagedhāti etasmiṃ pavattagedhā. Sarasaṅkappānanti dhāvanasaṅkappānaṃ. Manussakantesu sīlesu samādapanāyāti ettha yadā nāgo itthipurisehi kumārakumārikāhi soṇḍādīsu gahetvā upakeḷayamāno vikāraṃ na karoti sukhāyati, tadānena manussakantāni sīlāni samādinnāni nāma honti.
পেমনীযাতি তাত রাজা তে পসন্নো মঙ্গলহত্থিট্ঠানেৰ ঠপেস্সতি, রাজারহানি ভোজনাদীনি লভিস্সসীতি এৰরূপী নাগেহি পিযাপিতব্বা কথা। সুস্সূসতীতি তং পেমনীযকথং সোতুকামো হোতি। তিণঘাসোদকন্তি তিণঘাসঞ্চেৰ উদকঞ্চ, তিণঘাসন্তি ঘাসিতব্বং তিণং, খাদিতব্বন্তি অত্থো।
Pemanīyāti tāta rājā te pasanno maṅgalahatthiṭṭhāneva ṭhapessati, rājārahāni bhojanādīni labhissasīti evarūpī nāgehi piyāpitabbā kathā. Sussūsatīti taṃ pemanīyakathaṃ sotukāmo hoti. Tiṇaghāsodakanti tiṇaghāsañceva udakañca, tiṇaghāsanti ghāsitabbaṃ tiṇaṃ, khāditabbanti attho.
পণৰোতি ডিণ্ডিমো। সব্বৰঙ্কদোসনিহিতনিন্নীতকসাৰোতি নিহিতসব্বৰঙ্কদোসো চেৰ অপনীতকসাৰো চ। অঙ্গন্তেৰ সঙ্খং গচ্ছতীতি অঙ্গসমো হোতি।
Paṇavoti ḍiṇḍimo. Sabbavaṅkadosanihitaninnītakasāvoti nihitasabbavaṅkadoso ceva apanītakasāvo ca. Aṅganteva saṅkhaṃ gacchatīti aṅgasamo hoti.
২১৯. গেহসিতসীলানন্তি পঞ্চকামগুণনিস্সিতসীলানং। ঞাযস্সাতি অট্ঠঙ্গিকমগ্গস্স।
219.Gehasitasīlānanti pañcakāmaguṇanissitasīlānaṃ. Ñāyassāti aṭṭhaṅgikamaggassa.
২২২. অদন্তমরণং মহল্লকো রঞ্ঞো নাগো কালঙ্কতোতি রঞ্ঞো মহল্লকো নাগো অদন্তমরণং মতো কালং কতো হোতি, অদন্তমরণং কালংকিরিযং নাম করিযতীতি অযমেত্থ অত্থো। এস নযো সব্বত্থ। সেসং উত্তানমেৰাতি।
222.Adantamaraṇaṃ mahallako rañño nāgo kālaṅkatoti rañño mahallako nāgo adantamaraṇaṃ mato kālaṃ kato hoti, adantamaraṇaṃ kālaṃkiriyaṃ nāma kariyatīti ayamettha attho. Esa nayo sabbattha. Sesaṃ uttānamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
দন্তভূমিসুত্তৰণ্ণনা নিট্ঠিতা।
Dantabhūmisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৫. দন্তভূমিসুত্তং • 5. Dantabhūmisuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৫. দন্তভূমিসুত্তৰণ্ণনা • 5. Dantabhūmisuttavaṇṇanā
