| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৫. দন্তভূমিসুত্তৰণ্ণনা
5. Dantabhūmisuttavaṇṇanā
২১৩. ফুসেয্যাতি ঞাণফুসনা নাম অধিপ্পেতা, তস্মা লভেয্যাতি অধিগচ্ছেয্য। এৰং পটিপন্নোতি, ‘‘অপ্পমত্তো আতাপী পহিতত্তো’’তি ৰুত্তপ্পকারেন পটিপন্নো। অজাননকোট্ঠাসেযেৰাতি অৰধারণেন অত্তনি কতং দোসারোপনং নিৰত্তেতি।
213.Phuseyyāti ñāṇaphusanā nāma adhippetā, tasmā labheyyāti adhigaccheyya. Evaṃ paṭipannoti, ‘‘appamatto ātāpī pahitatto’’ti vuttappakārena paṭipanno. Ajānanakoṭṭhāseyevāti avadhāraṇena attani kataṃ dosāropanaṃ nivatteti.
২১৪. অপ্পনাউপচারন্তি অপ্পনঞ্চেৰ উপচারঞ্চ পাপেত্ৰা কথেসীতি অত্থং ৰদন্তি, অপ্পনাসহিতো পন উপচারো অপ্পনাউপচারো, তং পাপেত্ৰা কথেসীতি অত্থো।
214.Appanāupacāranti appanañceva upacārañca pāpetvā kathesīti atthaṃ vadanti, appanāsahito pana upacāro appanāupacāro, taṃ pāpetvā kathesīti attho.
নিক্খমতীতি নিক্খমো, অৰগ্গাহকামতো নিক্খমনং নিক্খমো এৰ নেক্খম্মো, পঠমজ্ঝানাদি। সতি কিলেসকামে অত্তনো উপহারং উপচারেত্ৰা অস্সাদেত্ৰা পরিভুঞ্জতি নামাতি আহ – ‘‘দুৰিধেপি কামে পরিভুঞ্জমানো’’তি। দুৰিধেপীতি হীনপণীতাদিৰসেন দুৰিধে।
Nikkhamatīti nikkhamo, avaggāhakāmato nikkhamanaṃ nikkhamo eva nekkhammo, paṭhamajjhānādi. Sati kilesakāme attano upahāraṃ upacāretvā assādetvā paribhuñjati nāmāti āha – ‘‘duvidhepi kāme paribhuñjamāno’’ti. Duvidhepīti hīnapaṇītādivasena duvidhe.
২১৫. কূটাকারন্তি গাল়্হসাঠেয্যং অপ্পতিরূপে ঠানে খন্ধগতপাতনাদি। দন্তগমনন্তি দন্তেহি নিব্বিসেৰনেহি গন্ধব্বগতিং। পত্তব্বং ভূমিন্তি সম্মাকিরিযায লদ্ধব্বসম্পত্তিং।
215.Kūṭākāranti gāḷhasāṭheyyaṃ appatirūpe ṭhāne khandhagatapātanādi. Dantagamananti dantehi nibbisevanehi gandhabbagatiṃ. Pattabbaṃ bhūminti sammākiriyāya laddhabbasampattiṃ.
২১৬. ব্যতিহরণৰসেন লঙ্ঘকং ৰিলঙ্ঘকং, অঞ্ঞমঞ্ঞহত্থগ্গহণং। তেনাহ – ‘‘হত্থেন হত্থং গহেত্ৰা’’তি।
216. Byatiharaṇavasena laṅghakaṃ vilaṅghakaṃ, aññamaññahatthaggahaṇaṃ. Tenāha – ‘‘hatthena hatthaṃ gahetvā’’ti.
২১৭. গহেতুং সমত্থোতি গণিকারহত্থিনীহি উপলাপেত্ৰা অরঞ্ঞহত্থিং ৰচনৰসেন গহেতুং সমত্থো। অতিপস্সিত্ৰা অতিট্ঠানৰসেন পস্সিত্ৰা। এত্থগেধাতি এতস্মিং অরঞ্ঞে নাগৰনে পৰত্তগেধা। সুখাযতীতি সুখং অযতি পৰত্তেতি, ‘‘সুখং হরতী’’তি ৰা পাঠো। ডিণ্ডিমো আনকো। নিহিতসব্বৰঙ্কদোসোতি অপগতসব্বসাঠেয্যদোসো। অপনীতকসাৰোতি অপেতসারম্ভকসাৰো।
217.Gahetuṃ samatthoti gaṇikārahatthinīhi upalāpetvā araññahatthiṃ vacanavasena gahetuṃ samattho. Atipassitvā atiṭṭhānavasena passitvā. Etthagedhāti etasmiṃ araññe nāgavane pavattagedhā. Sukhāyatīti sukhaṃ ayati pavatteti, ‘‘sukhaṃ haratī’’ti vā pāṭho. Ḍiṇḍimo ānako. Nihitasabbavaṅkadosoti apagatasabbasāṭheyyadoso. Apanītakasāvoti apetasārambhakasāvo.
২১৯. পঞ্চকামগুণনিস্সিতসীলানন্তি অকুসলানং। গেহস্সিতসীলানন্তি ৰা ৰট্টসন্নিস্সিতসীলানং।
219.Pañcakāmaguṇanissitasīlānanti akusalānaṃ. Gehassitasīlānanti vā vaṭṭasannissitasīlānaṃ.
২২২. এস নযো সব্বত্থাতি, ‘‘মজ্ঝিমো, দহরো’’তি আগতেসু উপমাৰারেসু, ‘‘থেরো’’তিআদিনা আগতেসু উপমেয্যৰারেসূতি পঞ্চসু সংকিলেসপক্খিযেসু ৰারেসু এস যথাৰুত্তোৰ নযোতি ৰেদিতব্বো। সেসং সুৰিঞ্ঞেয্যমেৰ।
222.Esanayo sabbatthāti, ‘‘majjhimo, daharo’’ti āgatesu upamāvāresu, ‘‘thero’’tiādinā āgatesu upameyyavāresūti pañcasu saṃkilesapakkhiyesu vāresu esa yathāvuttova nayoti veditabbo. Sesaṃ suviññeyyameva.
দন্তভূমিসুত্তৰণ্ণনায লীনত্থপ্পকাসনা সমত্তা।
Dantabhūmisuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৫. দন্তভূমিসুত্তং • 5. Dantabhūmisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৫. দন্তভূমিসুত্তৰণ্ণনা • 5. Dantabhūmisuttavaṇṇanā
