| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
10. த³ந்தபோனஸிக்கா²பத³ங்
10. Dantaponasikkhāpadaṃ
263. த³ஸமே த³ந்தகட்ட²ந்தி த³ந்தபோனங். தஞ்ஹி த³ந்தோ கஸீயதி விலேகீ²யதி அனேனாதி ‘‘த³ந்தகட்ட²’’ந்தி வுச்சதி. ‘‘ஸப்³ப³’’ந்தி ஆதி³னா ஸப்³ப³மேவ பங்ஸுகூலங் ஸப்³ப³பங்ஸுகூலங், தமஸ்ஸத்தீ²தி ‘‘ஸப்³ப³பங்ஸுகூலிகோ’’தி அத்த²ங் த³ஸ்ஸேதி. ஸோதி பி⁴க்கு² பரிபு⁴ஞ்ஜதி கிராதி ஸம்ப³ந்தோ⁴. ஸுஸானேதி ஆளஹனே. தஞ்ஹி ச²வானங் ஸயனட்டா²னத்தா ‘‘ஸுஸான’’ந்தி வுச்சதி நிருத்தினயேன. தத்தா²தி ஸுஸானே. புன தத்தா²தி ஏவமேவ. அய்யஸரூபஞ்ச வோஸாடிதகஸரூபஞ்ச த³ஸ்ஸேதுங் வுத்தங் ‘‘அய்யவோஸாடிதகானீதி எத்தா²’’தி. தத்த² ‘‘அய்யா…பே॰… பிதாமஹா’’திஇமினா அய்யஸரூபங் த³ஸ்ஸேதி. ‘‘வோ…பே॰… போ⁴ஜனீயானீ’’திஇமினா வோஸாடிதகஸரூபங். அய்யஸங்கா²தானங் பிதிபிதாமஹானங் அத்தா²ய, தே வா உத்³தி³ஸ்ஸ ச²ட்³டி³தானி வோஸாடிதகஸங்க²தானி கா²த³னீயபோ⁴ஜனீயானி அய்யவோஸாடிதகானீதி விக்³க³ஹோ காதப்³போ³. மனுஸ்ஸா ட²பெந்தி கிராதி ஸம்ப³ந்தோ⁴. யந்தி கா²த³னீயபோ⁴ஜனீயங். தேஸந்தி ஞாதகானங். பிண்ட³ங் பிண்ட³ங் கத்வாதி ஸங்கா⁴டங் ஸங்கா⁴டங் கத்வா. அஞ்ஞந்தி வுத்தகா²த³னீயபோ⁴ஜனீயதோ அஞ்ஞங். உம்மாரேபீதி ஸுஸானஸ்ஸ இந்த³கீ²லேபி. ஸோ ஹி உத்³த⁴டோ கிலேஸமாரோ எத்தா²தி ‘‘உம்மாரோ’’தி வுச்சதி. போ³தி⁴ஸத்தோ ஹி அபி⁴னிக்க²மனகாலே புத்தங் சும்பி³ஸ்ஸாமீதி ஓவரகஸ்ஸ இந்த³கீ²லே ட²த்வா பஸ்ஸந்தோ மாதரங் புத்தஸ்ஸ நலாடே ஹத்த²ங் ட²பெத்வா ஸயந்திங் தி³ஸ்வா ‘‘ஸசே மே புத்தங் க³ண்ஹெய்யங், மாதா தஸ்ஸ பபு³ஜ்ஜெ²ய்ய, பபு³ஜ்ஜ²மானாய அந்தராயோ ப⁴வெய்யா’’தி அபி⁴னிக்க²மனந்தராயப⁴யேன புத்ததா³ரே பரிச்சஜித்வா இந்த³கீ²லதோ நிவத்தித்வா மஹாபி⁴னிக்க²மனங் நிக்க²மி. தஸ்மா போ³தி⁴ஸத்தஸ்ஸ ட²த்வா புத்ததா³ரேஸு அபெக்கா²ஸங்கா²தஸ்ஸ மாரஸ்ஸ உத்³த⁴டட்டா²னத்தா ஸோ இந்த³கீ²லோ நிப்பரியாயேன ‘‘உம்மாரோ’’தி வுச்சதி, அஞ்ஞே பன ரூள்ஹீவஸேன. தி²ரோதி த²த்³தோ⁴. க⁴னப³த்³தோ⁴தி க⁴னேன ப³த்³தோ⁴. கதி²னேன மங்ஸேன ஆப³த்³தோ⁴தி அத்தோ². வட²தி தூ²லோ ப⁴வதீதி வடோ², முத்³த⁴ஜது³தியோயங், ஸோ அஸ்ஸத்தீ²தி வட²ரோதி த³ஸ்ஸெந்தோ ஆஹ ‘‘வட²ரோதி தூ²லோ’’தி. ‘‘ஸல்லக்கே²மா’’திஇமினா ‘‘மஞ்ஞே’’தி எத்த² மனதா⁴து ஸல்லக்க²ணத்தோ², மகாரஸ்ஸேகாரோதி த³ஸ்ஸேதி. ஹீதி ஸச்சங். தேஸந்தி மனுஸ்ஸானங்.
263. Dasame dantakaṭṭhanti dantaponaṃ. Tañhi danto kasīyati vilekhīyati anenāti ‘‘dantakaṭṭha’’nti vuccati. ‘‘Sabba’’nti ādinā sabbameva paṃsukūlaṃ sabbapaṃsukūlaṃ, tamassatthīti ‘‘sabbapaṃsukūliko’’ti atthaṃ dasseti. Soti bhikkhu paribhuñjati kirāti sambandho. Susāneti āḷahane. Tañhi chavānaṃ sayanaṭṭhānattā ‘‘susāna’’nti vuccati niruttinayena. Tatthāti susāne. Puna tatthāti evameva. Ayyasarūpañca vosāṭitakasarūpañca dassetuṃ vuttaṃ ‘‘ayyavosāṭitakānīti etthā’’ti. Tattha ‘‘ayyā…pe… pitāmahā’’tiiminā ayyasarūpaṃ dasseti. ‘‘Vo…pe… bhojanīyānī’’tiiminā vosāṭitakasarūpaṃ. Ayyasaṅkhātānaṃ pitipitāmahānaṃ atthāya, te vā uddissa chaḍḍitāni vosāṭitakasaṅkhatāni khādanīyabhojanīyāni ayyavosāṭitakānīti viggaho kātabbo. Manussā ṭhapenti kirāti sambandho. Yanti khādanīyabhojanīyaṃ. Tesanti ñātakānaṃ. Piṇḍaṃ piṇḍaṃ katvāti saṅghāṭaṃ saṅghāṭaṃ katvā. Aññanti vuttakhādanīyabhojanīyato aññaṃ. Ummārepīti susānassa indakhīlepi. So hi uddhaṭo kilesamāro etthāti ‘‘ummāro’’ti vuccati. Bodhisatto hi abhinikkhamanakāle puttaṃ cumbissāmīti ovarakassa indakhīle ṭhatvā passanto mātaraṃ puttassa nalāṭe hatthaṃ ṭhapetvā sayantiṃ disvā ‘‘sace me puttaṃ gaṇheyyaṃ, mātā tassa pabujjheyya, pabujjhamānāya antarāyo bhaveyyā’’ti abhinikkhamanantarāyabhayena puttadāre pariccajitvā indakhīlato nivattitvā mahābhinikkhamanaṃ nikkhami. Tasmā bodhisattassa ṭhatvā puttadāresu apekkhāsaṅkhātassa mārassa uddhaṭaṭṭhānattā so indakhīlo nippariyāyena ‘‘ummāro’’ti vuccati, aññe pana rūḷhīvasena. Thiroti thaddho. Ghanabaddhoti ghanena baddho. Kathinena maṃsena ābaddhoti attho. Vaṭhati thūlo bhavatīti vaṭho, muddhajadutiyoyaṃ, so assatthīti vaṭharoti dassento āha ‘‘vaṭharoti thūlo’’ti. ‘‘Sallakkhemā’’tiiminā ‘‘maññe’’ti ettha manadhātu sallakkhaṇattho, makārassekāroti dasseti. Hīti saccaṃ. Tesanti manussānaṃ.
264. ஸம்மாதி அவிபரீதங். அஸல்லக்கெ²த்வாதி ஆஹாரஸத்³த³ஸ்ஸ கா²த³னீயபோ⁴ஜனீயாதீ³ஸு நிரூள்ஹபா⁴வங் அமஞ்ஞித்வா. ப⁴க³வா பன ட²பேஸீதி ஸம்ப³ந்தோ⁴. யதா²உப்பன்னஸ்ஸாதி யேனாகாரேன உப்பன்னஸ்ஸ . பிதா புத்தஸங்கா²தே தா³ரகே ஸஞ்ஞாபெந்தோ விய ப⁴க³வா தே பி⁴க்கூ² ஸஞ்ஞாபெந்தோதி யோஜனா.
264.Sammāti aviparītaṃ. Asallakkhetvāti āhārasaddassa khādanīyabhojanīyādīsu nirūḷhabhāvaṃ amaññitvā. Bhagavā pana ṭhapesīti sambandho. Yathāuppannassāti yenākārena uppannassa . Pitā puttasaṅkhāte dārake saññāpento viya bhagavā te bhikkhū saññāpentoti yojanā.
265. ஏததே³வாதி திண்ணமாகாரானமஞ்ஞதரவஸேன அதி³ன்னமேவ ஸந்தா⁴யாதி ஸம்ப³ந்தோ⁴. ஹீதி ஸச்சங். மாதிகாயங் ‘‘தி³ன்ன’’ந்தி வுத்தட்டா²னங் நத்தி², அத² கஸ்மா பத³பா⁴ஜனேயேவ வுத்தந்தி ஆஹ ‘‘தி³ன்னந்தி இத³’’ந்திஆதி³. ‘‘தி³ன்ன’’ந்தி இத³ங் உத்³த⁴டந்தி ஸம்ப³ந்தோ⁴. அஸ்ஸாதி ‘‘தி³ன்ன’’ந்தி பத³ஸ்ஸ. நித்³தே³ஸே ச ‘‘காயேன…பே॰… தெ³ந்தே’’தி உத்³த⁴டந்தி யோஜனா. ஏவந்தி இமேஹி தீஹாகாரேஹி த³த³மானேதி ஸம்ப³ந்தோ⁴. ஏவந்தி இமேஹி த்³வீஹாகாரேஹி . ஆதீ³யமானந்தி ஸம்ப³ந்தோ⁴. ரத²ரேணும்பீதி ரதி²கவீதி²யங் உட்டி²தபங்ஸும்பி. புப்³பே³தி பட²மபவாரணஸிக்கா²பதே³. ஏவங் படிக்³க³ஹிதங் ஏதங் ஆஹாரங் தி³ன்னங் நாம வுச்சதீதி யோஜனா. ‘‘ஏதமேவா’’தி ஏவஸ்ஸ ஸம்ப⁴வதோ தஸ்ஸ ப²லங் த³ஸ்ஸேதுங் வுத்தங் ‘‘ந இத³’’ந்திஆதி³. நிஸ்ஸட்ட²ங் ந வுச்சதீதி யோஜனா.
265.Etadevāti tiṇṇamākārānamaññataravasena adinnameva sandhāyāti sambandho. Hīti saccaṃ. Mātikāyaṃ ‘‘dinna’’nti vuttaṭṭhānaṃ natthi, atha kasmā padabhājaneyeva vuttanti āha ‘‘dinnanti ida’’ntiādi. ‘‘Dinna’’nti idaṃ uddhaṭanti sambandho. Assāti ‘‘dinna’’nti padassa. Niddese ca ‘‘kāyena…pe… dente’’ti uddhaṭanti yojanā. Evanti imehi tīhākārehi dadamāneti sambandho. Evanti imehi dvīhākārehi . Ādīyamānanti sambandho. Rathareṇumpīti rathikavīthiyaṃ uṭṭhitapaṃsumpi. Pubbeti paṭhamapavāraṇasikkhāpade. Evaṃ paṭiggahitaṃ etaṃ āhāraṃ dinnaṃ nāma vuccatīti yojanā. ‘‘Etamevā’’ti evassa sambhavato tassa phalaṃ dassetuṃ vuttaṃ ‘‘na ida’’ntiādi. Nissaṭṭhaṃ na vuccatīti yojanā.
தத்தா²தி ‘‘காயேனா’’திஆதி³வசனே. ஹீதி ஸச்சங். நத்து² கரீயதி இமாயாதி நத்து²கரணீ, தாய. நாஸாபுடேன படிக்³க³ண்ஹாதீதி ஸம்ப³ந்தோ⁴. அகல்லகோதி கி³லானோ. ஹீதி ஸச்சங். காயேன படிப³த்³தோ⁴ காயபடிப³த்³தோ⁴ கடச்சு²ஆதீ³தி ஆஹ ‘‘கடச்சு²ஆதீ³ஸூ’’திஆதி³. ஹீதி ஸச்சங். பாதியமானந்தி பாதாபியமானங்.
Tatthāti ‘‘kāyenā’’tiādivacane. Hīti saccaṃ. Natthu karīyati imāyāti natthukaraṇī, tāya. Nāsāpuṭena paṭiggaṇhātīti sambandho. Akallakoti gilāno. Hīti saccaṃ. Kāyena paṭibaddho kāyapaṭibaddho kaṭacchuādīti āha ‘‘kaṭacchuādīsū’’tiādi. Hīti saccaṃ. Pātiyamānanti pātāpiyamānaṃ.
எத்தா²தி இமஸ்மிங் ஸிக்கா²பதே³. ‘‘பஞ்சஹங்கே³ஹீ’’தி பத³ஸ்ஸ வித்தா²ரங் த³ஸ்ஸெந்தோ ஆஹ ‘‘தா²மமஜ்ஜி²மஸ்ஸா’’திஆதி³. தந்தி தா³தப்³ப³வத்து²ங்.
Etthāti imasmiṃ sikkhāpade. ‘‘Pañcahaṅgehī’’ti padassa vitthāraṃ dassento āha ‘‘thāmamajjhimassā’’tiādi. Tanti dātabbavatthuṃ.
தத்தா²தி ‘‘ஹத்த²பாஸோ பஞ்ஞாயதீ’’திவசனே. க³ச்ச²ந்தோபி டி²தேனேவ ஸங்க³ஹிதோ. பூ⁴மட்ட²ஸ்ஸாதி பூ⁴மியங் டி²தஸ்ஸ. ஆகாஸட்ட²ஸ்ஸாதி ஆகாஸே டி²தஸ்ஸ. ‘‘ஹத்த²ங் அங்க³’’ந்தி பதே³ஹி அவயவிஸம்ப³ந்தோ⁴ காதப்³போ³. வுத்தனயேனேவாதி ‘‘பூ⁴மட்ட²ஸ்ஸ ச ஸீஸேனா’’திஆதி³னா வுத்தனயேனேவ. பக்கீ²தி ஸகுணோ. ஸோ ஹி பக்க²யுத்தத்தா பக்கீ²தி வுச்சதி. ஹத்தீ²தி குஞ்ஜரோ. ஸோ ஹி ஸொண்ட³ஸங்கா²தஹத்த²யுத்தத்தா ஹத்தீ²தி வுச்சதி. அத்³தே⁴ன அட்ட²மங் ரதனமஸ்ஸாதி அத்³த⁴ட்ட²மரதனோ, ஹத்தீ², தஸ்ஸ. தேனாதி ஹத்தி²னா.
Tatthāti ‘‘hatthapāso paññāyatī’’tivacane. Gacchantopi ṭhiteneva saṅgahito. Bhūmaṭṭhassāti bhūmiyaṃ ṭhitassa. Ākāsaṭṭhassāti ākāse ṭhitassa. ‘‘Hatthaṃ aṅga’’nti padehi avayavisambandho kātabbo. Vuttanayenevāti ‘‘bhūmaṭṭhassa ca sīsenā’’tiādinā vuttanayeneva. Pakkhīti sakuṇo. So hi pakkhayuttattā pakkhīti vuccati. Hatthīti kuñjaro. So hi soṇḍasaṅkhātahatthayuttattā hatthīti vuccati. Addhena aṭṭhamaṃ ratanamassāti addhaṭṭhamaratano, hatthī, tassa. Tenāti hatthinā.
ஏகோ தா³யகோ வத³தீதி ஸம்ப³ந்தோ⁴. ஓணமதீதி ஹெட்டா² நமதி. எத்தாவதாதி ஏகதே³ஸஸம்படிச்ச²னமத்தேன. ததோதி ஸம்படிச்ச²னதோ. உக்³கா⁴டெத்வாதி விவரித்வா. காஜேனாதி ப்³யாப⁴ங்கி³யா. ஸா ஹி கசதி ப³ந்த⁴தி விவித⁴ங் பா⁴ரங் அஸ்மிந்தி காசோதி வுச்சதி, சகாரஸ்ஸ ஜகாரே கதே காஜோபி யுத்தோயேவ. திங்ஸ ஹத்தா² ரதனானி இமஸ்ஸாதி திங்ஸஹத்தோ², வேணு. கு³ளகும்போ⁴தி பா²ணிதேன பூரிதோ க⁴டோ. படிக்³க³ஹிதமேவாதி கும்பே⁴ஸு ஹத்த²பாஸதோ ப³ஹி டி²தேஸுபி அபி⁴ஹாரகஸ்ஸ ஹத்த²பாஸே டி²தத்தா படிக்³க³ஹிதமேவாதி வுத்தங் ஹோதி. உச்சு²யந்ததோ³ணிதோதி உச்சு²ங் பீளனயந்தஸ்ஸ அம்ப³ணதோ.
Eko dāyako vadatīti sambandho. Oṇamatīti heṭṭhā namati. Ettāvatāti ekadesasampaṭicchanamattena. Tatoti sampaṭicchanato. Ugghāṭetvāti vivaritvā. Kājenāti byābhaṅgiyā. Sā hi kacati bandhati vividhaṃ bhāraṃ asminti kācoti vuccati, cakārassa jakāre kate kājopi yuttoyeva. Tiṃsa hatthā ratanāni imassāti tiṃsahattho, veṇu. Guḷakumbhoti phāṇitena pūrito ghaṭo. Paṭiggahitamevāti kumbhesu hatthapāsato bahi ṭhitesupi abhihārakassa hatthapāse ṭhitattā paṭiggahitamevāti vuttaṃ hoti. Ucchuyantadoṇitoti ucchuṃ pīḷanayantassa ambaṇato.
ப³ஹூ பத்தா ட²பிதா ஹொந்தீதி ஸம்ப³ந்தோ⁴. யத்தா²தி யஸ்மிங் டா²னே. டி²தஸ்ஸ பி⁴க்கு²னோ ஹத்த²பாஸேதி யோஜனா. ட²த்வா பு²ஸித்வா ‘‘நிஸின்னஸ்ஸ பி⁴க்கு²னோ’’தி பாட²ஸேஸேன யோஜேதப்³ப³ங். டி²தேன வா நிஸின்னேன வா நிபன்னேன வா தா³யகேன தி³ய்யதீதி ஸம்ப³ந்தோ⁴.
Bahū pattā ṭhapitā hontīti sambandho. Yatthāti yasmiṃ ṭhāne. Ṭhitassa bhikkhuno hatthapāseti yojanā. Ṭhatvā phusitvā ‘‘nisinnassa bhikkhuno’’ti pāṭhasesena yojetabbaṃ. Ṭhitena vā nisinnena vā nipannena vā dāyakena diyyatīti sambandho.
பத²வியங் டி²தா ஹொந்தீதி ஸம்ப³ந்தோ⁴. யங் யந்தி யங் யங் பத்தங். யத்த² கத்த²சீதி யேஸு கேஸுசீதி ஸம்ப³ந்தோ⁴. தந்தி தங் வசனங்.
Pathaviyaṃ ṭhitā hontīti sambandho. Yaṃ yanti yaṃ yaṃ pattaṃ. Yattha katthacīti yesu kesucīti sambandho. Tanti taṃ vacanaṃ.
தத்த² தஸ்மிங் டா²னே ஜாதோ தத்த²ஜாதோ, அலுத்தஸமாஸோயங், ஸோயேவ தத்த²ஜாதகோ, தஸ்மிங். ஹீதி ஸச்சங், யஸ்மா வா. தத்த²ஜாதகே ந ருஹதி யதா², ஏவங் ந ருஹதியேவாதி யோஜனா. தா²மமஜ்ஜி²மேன புரிஸேன ஸுட்டு² ஹரிதப்³ப³ந்தி ஸங்ஹாரியங், தங்யேவ ஸங்ஹாரிமங் யகாரஸ்ஸ மகாரங் கத்வா, ந ஸங்ஹாரிமங் அஸங்ஹாரிமங், தஸ்மிங். தேபீதி தே அஸங்ஹாரிமாபி. ஹீதி ஸச்சங், யஸ்மா வா. தத்த²ஜாதகஸங்கே²பூபகா³தி தத்த²ஜாதகே ஸமோதா⁴னெத்வா கே²பங் பக்கே²பங் உபக³தா. ஹீதி ஸச்சங், யஸ்மா வா. இத³ஞ்ஹி வாக்யந்தரத்தா புனப்புனங் வுத்தந்தி த³ட்ட²ப்³ப³ங். தானீதி திந்திணிகாதி³பண்ணானி. ஸந்தா⁴ரேதுந்தி ஸம்மா தா⁴ரேதுங். டி²தோ தா³யகோதி ஸம்ப³ந்தோ⁴.
Tattha tasmiṃ ṭhāne jāto tatthajāto, aluttasamāsoyaṃ, soyeva tatthajātako, tasmiṃ. Hīti saccaṃ, yasmā vā. Tatthajātake na ruhati yathā, evaṃ na ruhatiyevāti yojanā. Thāmamajjhimena purisena suṭṭhu haritabbanti saṃhāriyaṃ, taṃyeva saṃhārimaṃ yakārassa makāraṃ katvā, na saṃhārimaṃ asaṃhārimaṃ, tasmiṃ. Tepīti te asaṃhārimāpi. Hīti saccaṃ, yasmā vā. Tatthajātakasaṅkhepūpagāti tatthajātake samodhānetvā khepaṃ pakkhepaṃ upagatā. Hīti saccaṃ, yasmā vā. Idañhi vākyantarattā punappunaṃ vuttanti daṭṭhabbaṃ. Tānīti tintiṇikādipaṇṇāni. Sandhāretunti sammā dhāretuṃ. Ṭhito dāyakoti sambandho.
லத்³த⁴ஸ்ஸ லத்³த⁴ஸ்ஸ வத்து²ஸ்ஸ ஸன்னிதி⁴ட்டா²னத்தா, பக்கி²த்தட்டா²னத்தா வா த²வீயதி பஸங்ஸீயதீதி த²விகா, ததோ. புஞ்சி²த்வா படிக்³க³ஹெத்வாதி ‘‘புஞ்சி²த்வா வா படிக்³க³ஹெத்வா வா’’தி அனியமவிகப்பத்தோ² வாஸத்³தோ³ அஜ்ஜா²ஹரிதப்³போ³. தேஸு தேஸு வத்தூ²ஸு ரஞ்ஜதி லக்³க³தீதி ரஜோ, தங். வினயே பஞ்ஞத்தங் து³க்கடங் வினயது³க்கடங். தங் பனாதி பி⁴க்க²ங் பன. படிக்³க³ஹெத்வா தே³தா²தி மங் படிக்³க³ஹாபெத்வா மம தே³தா²தி அதி⁴ப்பாயோ.
Laddhassa laddhassa vatthussa sannidhiṭṭhānattā, pakkhittaṭṭhānattā vā thavīyati pasaṃsīyatīti thavikā, tato. Puñchitvā paṭiggahetvāti ‘‘puñchitvā vā paṭiggahetvā vā’’ti aniyamavikappattho vāsaddo ajjhāharitabbo. Tesu tesu vatthūsu rañjati laggatīti rajo, taṃ. Vinaye paññattaṃ dukkaṭaṃ vinayadukkaṭaṃ. Taṃ panāti bhikkhaṃ pana. Paṭiggahetvā dethāti maṃ paṭiggahāpetvā mama dethāti adhippāyo.
ததோ ததோதி தஸ்மா தஸ்மா டா²னா உட்டா²பெத்வாதி ஸம்ப³ந்தோ⁴. தந்தி பி⁴க்க²ங். தஸ்ஸாதி அனுபஸம்பன்னஸ்ஸ.
Tato tatoti tasmā tasmā ṭhānā uṭṭhāpetvāti sambandho. Tanti bhikkhaṃ. Tassāti anupasampannassa.
ஸோ வத்தப்³போ³தி ஸோ தி³ய்யமானோ பி⁴க்கு² தா³யகேன பி⁴க்கு²னா வத்தப்³போ³தி யோஜனா. இமந்தி ஸரஜபத்தங். தேனாதி தி³ய்யமானபி⁴க்கு²னா. ததா² காதப்³ப³ந்தி யதா² தா³யகேன பி⁴க்கு²னா வுத்தங், ததா² காதப்³ப³ந்தி அத்தோ². உப்லவதீதி உபரி க³ச்ச²தி, ப்லு க³தியந்தி ஹி தா⁴துபாடே²ஸு (ஸத்³த³னீதிதா⁴துமாலாயங் 16 ளகாரந்ததா⁴து) வுத்தங். எத்த² உஇதி உபஸக்³க³ஸ்ஸ அத்த²த³ஸ்ஸனத்த²ங் ‘‘உபரீ’’தி வுத்தங், பகாரலகாரஸங்யோகோ³ த³ட்ட²ப்³போ³. பொத்த²கேஸு பன ‘‘உப்பிலவதீ’’தி லிக²ந்தி, ஸோ அபாடோ². கஞ்ஜிகந்தி பி³லங்க³ங். தஞ்ஹி கேன ஜலேன அஞ்ஜியங் அபி⁴ப்³யத்தங் அஸ்ஸாதி ‘‘கஞ்ஜிய’’ந்தி வுச்சதி, தமேவ கஞ்ஜிகங் யகாரஸ்ஸ ககாரங் கத்வா. தங் பவாஹெத்வா, அபனெத்வாதி அத்தோ². யத்தா²தி யஸ்மிங் டா²னே. ஸுக்க²மேவ ப⁴த்தங் ப⁴ஜிதப்³ப³ட்டே²ன ஸேவிதப்³ப³ட்டே²னாதி ஸுக்க²ப⁴த்தங், தஸ்மிங். புரதோதி பி⁴க்கு²ஸ்ஸ புரதோ, புப்³பே³ வா. பு²ஸிதானீதி பி³ந்தூ³னி. தானி ஹி ஸம்பா³த⁴ட்டா²னேஸுபி பு²ஸந்தீதி பு²ஸிதானீதி வுச்சந்தி.
So vattabboti so diyyamāno bhikkhu dāyakena bhikkhunā vattabboti yojanā. Imanti sarajapattaṃ. Tenāti diyyamānabhikkhunā. Tathākātabbanti yathā dāyakena bhikkhunā vuttaṃ, tathā kātabbanti attho. Uplavatīti upari gacchati, plu gatiyanti hi dhātupāṭhesu (saddanītidhātumālāyaṃ 16 ḷakārantadhātu) vuttaṃ. Ettha uiti upasaggassa atthadassanatthaṃ ‘‘uparī’’ti vuttaṃ, pakāralakārasaṃyogo daṭṭhabbo. Potthakesu pana ‘‘uppilavatī’’ti likhanti, so apāṭho. Kañjikanti bilaṅgaṃ. Tañhi kena jalena añjiyaṃ abhibyattaṃ assāti ‘‘kañjiya’’nti vuccati, tameva kañjikaṃ yakārassa kakāraṃ katvā. Taṃ pavāhetvā, apanetvāti attho. Yatthāti yasmiṃ ṭhāne. Sukkhameva bhattaṃ bhajitabbaṭṭhena sevitabbaṭṭhenāti sukkhabhattaṃ, tasmiṃ. Puratoti bhikkhussa purato, pubbe vā. Phusitānīti bindūni. Tāni hi sambādhaṭṭhānesupi phusantīti phusitānīti vuccanti.
உளுங்கோதி கோஸியஸகுணனாமோ தீ³க⁴த³ண்ட³கோ ஏகோ பா⁴ஜனவிஸேஸோ, தேன. தே²வாதி பு²ஸிதானி. தானி ஹி ஸம்பா³த⁴ட்டா²னேஸுபி பு²ஸிதத்தா த²வீயந்தி பஸங்ஸீயந்தீதி ‘‘தே²வா’’தி வுச்சந்தி. சருகேனாதி சரீயதி ப⁴க்கீ²யதீதி சரு, ஹப்³யபாகோ, தங் கரோதி அனேனாதி சருகங், தா²ல்யாதி³கங் கு²த்³த³கபா⁴ஜனங், தேன ஆகிரியமானேதி ஸம்ப³ந்தோ⁴. காளவண்ணகாமேஹி மானீயதீதி மஸி. கா²த³தீதி சா²ரோ க²காரஸ்ஸ ச²காரங், த³காரஸ்ஸ ச ரகாரங் கத்வா, கா²ரரஸோ, ஸோ இமிஸ்ஸத்தீ²தி சா²ரிகா. உப்பதித்வாதி உத்³த⁴ங் க³ந்த்வா. ஹீதி ஸச்சங், யஸ்மா வா.
Uḷuṅkoti kosiyasakuṇanāmo dīghadaṇḍako eko bhājanaviseso, tena. Thevāti phusitāni. Tāni hi sambādhaṭṭhānesupi phusitattā thavīyanti pasaṃsīyantīti ‘‘thevā’’ti vuccanti. Carukenāti carīyati bhakkhīyatīti caru, habyapāko, taṃ karoti anenāti carukaṃ, thālyādikaṃ khuddakabhājanaṃ, tena ākiriyamāneti sambandho. Kāḷavaṇṇakāmehi mānīyatīti masi. Khādatīti chāro khakārassa chakāraṃ, dakārassa ca rakāraṃ katvā, khāraraso, so imissatthīti chārikā. Uppatitvāti uddhaṃ gantvā. Hīti saccaṃ, yasmā vā.
பா²லெத்வாதி சி²ந்தி³த்வா. தெ³ந்தானங் அனுபஸம்பன்னானந்தி ஸம்ப³ந்தோ⁴. பாயாஸஸ்ஸாதி பாயாஸேன. ததா²பீதி தேன முக²வட்டியா க³ஹணாகாரேனபி.
Phāletvāti chinditvā. Dentānaṃ anupasampannānanti sambandho. Pāyāsassāti pāyāsena. Tathāpīti tena mukhavaṭṭiyā gahaṇākārenapi.
ஆபோ⁴க³ங் கத்வாதி ‘‘படிக்³க³ஹெஸ்ஸாமீ’’தி மனஸிகாரங் கத்வா. ஸோதி நித்³த³ங் ஓக்கந்தோ பி⁴க்கு². வட்டதியேவாதி ஆபோ⁴க³ஸ்ஸ கதத்தா வட்டதியேவ. அனாத³ரந்தி அனாத³ரேன, கரணத்தே² சேதங் உபயோக³வசனங், அனாத³ரங் ஹுத்வாதி வா யோஜேதப்³ப³ங். கேசீதி அப⁴யகி³ரிவாஸினோ. காயேன படிப³த்³தோ⁴ காயபடிப³த்³தோ⁴, தேன படிப³த்³தோ⁴ காயபடிப³த்³த⁴படிப³த்³தோ⁴ , தேன. வசனமத்தமேவாதி ‘‘படிப³த்³த⁴படிப³த்³த⁴’’ந்தி ஏகங் அதிரேகங் படிப³த்³த⁴வசனமத்தமேவ நானங், அத்த²தோ பன காயபடிப³த்³த⁴மேவாதி அதி⁴ப்பாயோ. யம்பீதி யம்பி வத்து². தத்ராதி தஸ்மிங் வட்டனே. தந்தி அனுஜானநங்.
Ābhogaṃ katvāti ‘‘paṭiggahessāmī’’ti manasikāraṃ katvā. Soti niddaṃ okkanto bhikkhu. Vaṭṭatiyevāti ābhogassa katattā vaṭṭatiyeva. Anādaranti anādarena, karaṇatthe cetaṃ upayogavacanaṃ, anādaraṃ hutvāti vā yojetabbaṃ. Kecīti abhayagirivāsino. Kāyena paṭibaddho kāyapaṭibaddho, tena paṭibaddho kāyapaṭibaddhapaṭibaddho, tena. Vacanamattamevāti ‘‘paṭibaddhapaṭibaddha’’nti ekaṃ atirekaṃ paṭibaddhavacanamattameva nānaṃ, atthato pana kāyapaṭibaddhamevāti adhippāyo. Yampīti yampi vatthu. Tatrāti tasmiṃ vaṭṭane. Tanti anujānanaṃ.
நெய்யோ அதி⁴ப்பாயங் நெத்வா ஞாதோ அத்தோ² இமஸ்ஸாதி நெய்யத்த²ங். எத்தா²தி ஸுத்தே, ஸுத்தஸ்ஸ வா. யந்தி வத்து² பததீதி ஸம்ப³ந்தோ⁴. பரிக³ளித்வாதி ப⁴ஸ்ஸித்வா. ஸுத்³தா⁴யாதி நிரஜாய. ஸாமந்தி ஸயங். புஞ்சி²த்வா வாதிஆதீ³ஸு தயோ வாஸத்³தா³ அனியமவிகப்பத்தா². புஞ்சி²தாதீ³ஸு ஹி ஏகஸ்மிங் கிச்சே கதே இதரகிச்சங் காதப்³ப³ங் நத்தீ²தி அதி⁴ப்பாயோ. தேனாதி தேன பி⁴க்கு²னா, ‘‘ஆஹராபேதும்பீ’’திபதே³ காரிதகம்மங். ‘‘கஸ்மா ந வட்டதீ’’தி புச்சா². ஹீதி வித்தா²ரோ. வத³ந்தேன ப⁴க³வதாதி ஸம்ப³ந்தோ⁴. எத்தா²தி ஸுத்தவசனேஸு. ‘‘பரிச்சத்தங் தங் பி⁴க்க²வே தா³யகேஹீ’’தி வசனேனாதி யோஜனா. அதி⁴ப்பாயோதி நீதத்தோ² அதி⁴ப்பாயோ, நிப்பரியாயேன இதத்தோ² ஞாதத்தோ² அதி⁴ப்பாயோதி வுத்தங் ஹோதி.
Neyyo adhippāyaṃ netvā ñāto attho imassāti neyyatthaṃ. Etthāti sutte, suttassa vā. Yanti vatthu patatīti sambandho. Parigaḷitvāti bhassitvā. Suddhāyāti nirajāya. Sāmanti sayaṃ. Puñchitvā vātiādīsu tayo vāsaddā aniyamavikappatthā. Puñchitādīsu hi ekasmiṃ kicce kate itarakiccaṃ kātabbaṃ natthīti adhippāyo. Tenāti tena bhikkhunā, ‘‘āharāpetumpī’’tipade kāritakammaṃ. ‘‘Kasmā na vaṭṭatī’’ti pucchā. Hīti vitthāro. Vadantena bhagavatāti sambandho. Etthāti suttavacanesu. ‘‘Pariccattaṃ taṃ bhikkhave dāyakehī’’ti vacanenāti yojanā. Adhippāyoti nītattho adhippāyo, nippariyāyena itattho ñātattho adhippāyoti vuttaṃ hoti.
ஏவங் நீதத்த²மதி⁴ப்பாயங் த³ஸ்ஸெத்வா நெய்யத்த², மதி⁴ப்பாயங் த³ஸ்ஸெந்தோ ஆஹ ‘‘யஸ்மா சா’’தி ஆதி³. தந்தி பரிபு⁴ஞ்ஜனங் அனுஞ்ஞாதந்தி ஸம்ப³ந்தோ⁴. து³தியதி³வஸேபீதி பிஸத்³தோ³ ஸம்பிண்ட³னத்தோ², அபரதி³வஸேபீதி அத்தோ². அதி⁴ப்பாயோதி நெய்யத்தோ² அதி⁴ப்பாயோ நெத்வா இய்யத்தோ² ஞாதத்தோ² அதி⁴ப்பாயோதி வுத்தங் ஹோதி.
Evaṃ nītatthamadhippāyaṃ dassetvā neyyattha, madhippāyaṃ dassento āha ‘‘yasmā cā’’ti ādi. Tanti paribhuñjanaṃ anuññātanti sambandho. Dutiyadivasepīti pisaddo sampiṇḍanattho, aparadivasepīti attho. Adhippāyoti neyyattho adhippāyo netvā iyyattho ñātattho adhippāyoti vuttaṃ hoti.
பு⁴ஞ்ஜந்தானங் பி⁴க்கூ²னந்தி ஸம்ப³ந்தோ⁴. ஹீதி வித்தா²ரோ. த³ந்தாதி த³ஸனா. தே ஹி த³ங்ஸீயந்தி ப⁴க்கீ²யந்தி ஏதேஹீதி ‘‘த³ந்தா’’தி வுச்சந்தி. ஸத்த²ங்யேவ ஸத்த²கங் கு²த்³த³கட்டே²ன, தேன படிக்³க³ஹிதேன ஸத்த²கேன. ஏதந்தி மலங். தந்தி லோஹக³ந்த⁴மத்தங். பரிஹரந்தீதி படிக்³க³ஹெத்வா ஹரந்தி. ஹீதி ஸச்சங், யஸ்மா வா. தங் ஸத்த²கங் பரிபோ⁴க³த்தா²ய யஸ்மா ந பரிஹரந்தி, தஸ்மா ஏஸேவ நயோதி அத்தோ². உக்³க³ஹிதபச்சயா, ஸன்னிதி⁴பச்சயா வா தோ³ஸோ நத்தீ²தி வுத்தங் ஹோதி. தத்தா²தி தேஸு தக்ககீ²ரேஸு. நீலிகாதி நீலவண்ணா ஸ்னேஹா. ஆமகதக்காதீ³ஸூதி அபக்கேஸு தக்ககீ²ரேஸு.
Bhuñjantānaṃ bhikkhūnanti sambandho. Hīti vitthāro. Dantāti dasanā. Te hi daṃsīyanti bhakkhīyanti etehīti ‘‘dantā’’ti vuccanti. Satthaṃyeva satthakaṃ khuddakaṭṭhena, tena paṭiggahitena satthakena. Etanti malaṃ. Tanti lohagandhamattaṃ. Pariharantīti paṭiggahetvā haranti. Hīti saccaṃ, yasmā vā. Taṃ satthakaṃ paribhogatthāya yasmā na pariharanti, tasmā eseva nayoti attho. Uggahitapaccayā, sannidhipaccayā vā doso natthīti vuttaṃ hoti. Tatthāti tesu takkakhīresu. Nīlikāti nīlavaṇṇā snehā. Āmakatakkādīsūti apakkesu takkakhīresu.
கிலிட்ட²உத³கந்தி ஸமலங் உத³கங். தஸ்ஸாதி ஸாமணேரஸ்ஸ. பத்தக³தங் ஓத³னந்தி ஸம்ப³ந்தோ⁴. அஸ்ஸாதி ஸாமணேரஸ்ஸ. உக்³க³ஹிதகோதி அவக³ஹிதகோ. ‘‘உஞ்ஞாதோ’’திஆதீ³ஸு (ஸங்॰ நி॰ 1.112) விய உகாரோ ஓகாரவிபரீதோ ஹோதி, அபடிக்³க³ஹெத்வா க³ஹிதத்தா து³க்³க³ஹிதகோதி வுத்தங் ஹோதி.
Kiliṭṭhaudakanti samalaṃ udakaṃ. Tassāti sāmaṇerassa. Pattagataṃ odananti sambandho. Assāti sāmaṇerassa. Uggahitakoti avagahitako. ‘‘Uññāto’’tiādīsu (saṃ. ni. 1.112) viya ukāro okāraviparīto hoti, apaṭiggahetvā gahitattā duggahitakoti vuttaṃ hoti.
ஏதேனாதி ஓத³னேன. படிக்³க³ஹிதமேவ ஹோதி ஹத்த²தோ அமுத்தத்தாதி அதி⁴ப்பாயோ.
Etenāti odanena. Paṭiggahitameva hoti hatthato amuttattāti adhippāyo.
புன படிக்³க³ஹேதப்³ப³ங் ஸாபெக்கே² ஸதீதி அதி⁴ப்பாயோ. எத்தோதி இதோ பத்ததோ. ஸாமணேரோ பக்கி²பதீதி ஸம்ப³ந்தோ⁴. ததோதி பத்ததோ. கேசீதி அப⁴யகி³ரிவாஸினோ. தந்தி ‘‘புன படிக்³க³ஹேதப்³ப³’’ந்தி வத³ந்தானங் கேஸஞ்சி ஆசரியானங் வசனங் வேதி³தப்³ப³ந்தி ஸம்ப³ந்தோ⁴. யந்தி பூவப⁴த்தாதி³.
Puna paṭiggahetabbaṃ sāpekkhe satīti adhippāyo. Ettoti ito pattato. Sāmaṇero pakkhipatīti sambandho. Tatoti pattato. Kecīti abhayagirivāsino. Tanti ‘‘puna paṭiggahetabba’’nti vadantānaṃ kesañci ācariyānaṃ vacanaṃ veditabbanti sambandho. Yanti pūvabhattādi.
அத்தனோ வாதி ஸாமணேரஸ்ஸ வா. ஸாமணேராதி ஆமந்தனங். தஸ்ஸாதி ஸாமணேரஸ்ஸ. பா⁴ஜனேதி யாகு³பசனகபா⁴ஜனே. யாகு³குடந்தி யாகு³யா பூரிதங் குடங். தந்தி யாகு³குடங். ‘‘பி⁴க்கு²னா படிக்³க³ண்ஹாபேது’’ந்தி காரிதகம்மங் உபனேதப்³ப³ங். கீ³வங் ட²பெத்வா ஆவஜ்ஜேதீதி ஸம்ப³ந்தோ⁴. ஆவஜ்ஜேதீதி பரிணாமேதி.
Attanovāti sāmaṇerassa vā. Sāmaṇerāti āmantanaṃ. Tassāti sāmaṇerassa. Bhājaneti yāgupacanakabhājane. Yāgukuṭanti yāguyā pūritaṃ kuṭaṃ. Tanti yāgukuṭaṃ. ‘‘Bhikkhunā paṭiggaṇhāpetu’’nti kāritakammaṃ upanetabbaṃ. Gīvaṃ ṭhapetvā āvajjetīti sambandho. Āvajjetīti pariṇāmeti.
படிக்³க³ஹணூபக³ங் பா⁴ரந்தி தா²மமஜ்ஜி²மேன புரிஸேன ஸங்ஹாரிமங் பா⁴ரங். ப³லவதா ஸாமணேரேனாதி ஸம்ப³ந்தோ⁴. தேலக⁴டங் வாதி தேலேன பக்கி²த்தங் க⁴டங் வா. லக்³கெ³ந்தீதி லம்பெ³ந்தி. அயமேவ வா பாடோ².
Paṭiggahaṇūpagaṃ bhāranti thāmamajjhimena purisena saṃhārimaṃ bhāraṃ. Balavatā sāmaṇerenāti sambandho. Telaghaṭaṃ vāti telena pakkhittaṃ ghaṭaṃ vā. Laggentīti lambenti. Ayameva vā pāṭho.
நாக³ஸ்ஸ த³ந்தோ வியாதி நாக³த³ந்தகோ, ஸதி³ஸத்தே² கோ. அங்கீயதே லக்கீ²யதே அனேனாதி அங்குஸோ, க³ஜமத்த²கம்ஹி விஜ்ஜ²னகண்ட³கோ. அங்குஸோ வியாதி அங்குஸகோ, தஸ்மிங் அங்குஸகே வா லக்³கி³தா ஹொந்தீதி ஸம்ப³ந்தோ⁴. க³ண்ஹதோதி க³ண்ஹந்தஸ்ஸ. மஞ்சஸ்ஸ ஹெட்டா² ஹெட்டா²மஞ்சோ, தஸ்மிங். தந்தி தேலதா²லகங்.
Nāgassa danto viyāti nāgadantako, sadisatthe ko. Aṅkīyate lakkhīyate anenāti aṅkuso, gajamatthakamhi vijjhanakaṇḍako. Aṅkuso viyāti aṅkusako, tasmiṃ aṅkusake vā laggitā hontīti sambandho. Gaṇhatoti gaṇhantassa. Mañcassa heṭṭhā heṭṭhāmañco, tasmiṃ. Tanti telathālakaṃ.
ஆரோஹந்தேஹி ச ஓரோஹந்தேஹி ச நிச்சங் ஸேவீயதீதி நிஸ்ஸேணீ, தஸ்ஸா மஜ்ஜ²ங் நிஸ்ஸேணிமஜ்ஜ²ங், தஸ்மிங். கண்ணே உட்டி²தங் கண்ணிகங், கண்ணமலங், கண்ணிகங் விய கண்ணிகங், யதா² ஹி கண்ணமலங் கண்ணதோ உட்ட²ஹித்வா ஸயங் பவத்ததி, ஏவங் தேலாதி³தோ உட்ட²ஹித்வா ஸயங் பவத்ததீதி வுத்தங் ஹோதி. க⁴னசுண்ணந்தி கதி²னசுண்ணங். தங்ஸமுட்டா²னமேவ நாமாதி ததோ தேலாதி³தோ ஸமுட்டா²னமேவ நாம ஹோதீதி அத்தோ². ஏதந்தி கண்ணிகாதி³. இத³ங் பத³ங் புப்³பா³பராபெக்க²ங்.
Ārohantehi ca orohantehi ca niccaṃ sevīyatīti nisseṇī, tassā majjhaṃ nisseṇimajjhaṃ, tasmiṃ. Kaṇṇe uṭṭhitaṃ kaṇṇikaṃ, kaṇṇamalaṃ, kaṇṇikaṃ viya kaṇṇikaṃ, yathā hi kaṇṇamalaṃ kaṇṇato uṭṭhahitvā sayaṃ pavattati, evaṃ telādito uṭṭhahitvā sayaṃ pavattatīti vuttaṃ hoti. Ghanacuṇṇanti kathinacuṇṇaṃ. Taṃsamuṭṭhānameva nāmāti tato telādito samuṭṭhānameva nāma hotīti attho. Etanti kaṇṇikādi. Idaṃ padaṃ pubbāparāpekkhaṃ.
யொத்தேனாதி ரஜ்ஜுனா. அஞ்ஞோ தே³தீதி ஸம்ப³ந்தோ⁴.
Yottenāti rajjunā. Añño detīti sambandho.
பவிஸந்தே ச நிக்க²மந்தே ச வரதி ஆவரதி இமாயாதி வதி, தங். உச்சூ²தி ரஸாலோ. ஸோ ஹி உஸதி விஸங் தா³ஹேதீதி உச்சூ²தி வுச்சதி, தங். திம்ப³ருஸகந்தி திந்து³கங். தஞ்ஹி தேமேதி பு⁴ஞ்ஜந்தங் புக்³க³லங் அத்³தே³தி ரஸேனாதி திம்போ³, ருஸதி கு²த்³தி³தங் நாஸேதீதி ருஸகோ, திம்போ³ ச ஸோ ருஸகோ சாதி ‘‘திம்ப³ருஸகோ’’தி வுச்சதி, தங். வதித³ண்ட³கேஸூதி வதியா அத்தா²ய நிக்க²ணிதேஸு த³ண்ட³கேஸு. மயங் பனாதி ஸங்க³ஹகாராசரியபூ⁴தா பு³த்³த⁴கோ⁴ஸனாமகா மயங் பன, அத்தானங் ஸந்தா⁴ய ப³ஹுவசனவஸேன வுத்தங். ந புது²லோ பாகாரோதி அட்³ட⁴தெய்யஹத்த²பாஸானதிக்கமங் ஸந்தா⁴ய வுத்தங். ஹத்த²ஸதம்பீதி ரதனஸதம்பி.
Pavisante ca nikkhamante ca varati āvarati imāyāti vati, taṃ. Ucchūti rasālo. So hi usati visaṃ dāhetīti ucchūti vuccati, taṃ. Timbarusakanti tindukaṃ. Tañhi temeti bhuñjantaṃ puggalaṃ addeti rasenāti timbo, rusati khudditaṃ nāsetīti rusako, timbo ca so rusako cāti ‘‘timbarusako’’ti vuccati, taṃ. Vatidaṇḍakesūti vatiyā atthāya nikkhaṇitesu daṇḍakesu. Mayaṃ panāti saṅgahakārācariyabhūtā buddhaghosanāmakā mayaṃ pana, attānaṃ sandhāya bahuvacanavasena vuttaṃ. Na puthulo pākāroti aḍḍhateyyahatthapāsānatikkamaṃ sandhāya vuttaṃ. Hatthasatampīti ratanasatampi.
ஸோதி ஸாமணேரோ. பி⁴க்கு²ஸ்ஸ தே³தீதி யோஜனா. அபரோதி ஸாமணேரோ.
Soti sāmaṇero. Bhikkhussa detīti yojanā. Aparoti sāmaṇero.
ப²லங் இமிஸ்ஸத்தீ²தி ப²லினீ, இனபச்சயோ இத்தி²லிங்க³ஜோதகோ ஈ, தங் ஸாக²ந்தி யோஜனா. ப²லினிஸாக²ந்தி ஸமாஸதோபி பாடோ² அத்தி². மச்சி²கவாரணத்த²ந்தி மது⁴பா²ணிதாதீ³ஹி மக்க²னட்டா²னே நிலீயந்தீதி மக்கி²கா, தாயேவ மச்சி²கா க²காரஸ்ஸ ச²காரங் கத்வா, தாஸங் நிவாரணாய. மூலபடிக்³க³ஹமேவாதி மூலே படிக்³க³ஹணமேவ, பட²மபடிக்³க³ஹமேவாதி வுத்தங் ஹோதி.
Phalaṃ imissatthīti phalinī, inapaccayo itthiliṅgajotako ī, taṃ sākhanti yojanā. Phalinisākhanti samāsatopi pāṭho atthi. Macchikavāraṇatthanti madhuphāṇitādīhi makkhanaṭṭhāne nilīyantīti makkhikā, tāyeva macchikā khakārassa chakāraṃ katvā, tāsaṃ nivāraṇāya. Mūlapaṭiggahamevāti mūle paṭiggahaṇameva, paṭhamapaṭiggahamevāti vuttaṃ hoti.
பி⁴க்கு² க³ச்ச²தீதி ஸம்ப³ந்தோ⁴. அரித்தேனாதி கேனிபாதேன. தஞ்ஹி அரதி நாவா க³ச்ச²தி அனேனாதி அரித்தங், தேன. தந்தி படிக்³க³ஹணாரஹங் ப⁴ண்ட³ங் . அனுபஸம்பன்னேனாதி காரிதகம்மங். தஸ்மிம்பீதி சாடிகுண்ட³கேபி. தந்தி அனுபஸம்பன்னங்.
Bhikkhu gacchatīti sambandho. Arittenāti kenipātena. Tañhi arati nāvā gacchati anenāti arittaṃ, tena. Tanti paṭiggahaṇārahaṃ bhaṇḍaṃ . Anupasampannenāti kāritakammaṃ. Tasmimpīti cāṭikuṇḍakepi. Tanti anupasampannaṃ.
பாதெ²ய்யதண்டு³லேதி பத²ஸ்ஸ ஹிதே தண்டு³லே. தேஸந்தி ஸாமணேரானங். இதரேஹீதி பி⁴க்கூ²ஹி க³ஹிததண்டு³லேஹி. ஸப்³பே³ஹி பி⁴க்கூ²ஹி பு⁴த்தந்தி ஸம்ப³ந்தோ⁴. எத்தா²தி பி⁴க்கூ²ஹி க³ஹிதேஹி ஸாமணேரஸ்ஸ தண்டு³லேஹி யாகு³பசனே ந தி³ஸ்ஸதீதி ஸம்ப³ந்தோ⁴. காரணந்தி பரிவத்தெத்வா பு⁴த்தஸ்ஸ ச அபரிவத்தெத்வா பு⁴த்தஸ்ஸ ச காரணங்.
Pātheyyataṇḍuleti pathassa hite taṇḍule. Tesanti sāmaṇerānaṃ. Itarehīti bhikkhūhi gahitataṇḍulehi. Sabbehi bhikkhūhi bhuttanti sambandho. Etthāti bhikkhūhi gahitehi sāmaṇerassa taṇḍulehi yāgupacane na dissatīti sambandho. Kāraṇanti parivattetvā bhuttassa ca aparivattetvā bhuttassa ca kāraṇaṃ.
ப⁴த்தங் பசிதுகாமோ ஸாமணேரோதி யோஜனா. பி⁴க்கு²னா ஆரோபேதப்³ப³ங், அக்³கி³ ந காதப்³போ³தி ஸம்ப³ந்தோ⁴. புன படிக்³க³ஹணகிச்சங் நத்தி² மூலே படிக்³க³ஹிதத்தாதி அதி⁴ப்பாயோ.
Bhattaṃ pacitukāmo sāmaṇeroti yojanā. Bhikkhunā āropetabbaṃ, aggi na kātabboti sambandho. Puna paṭiggahaṇakiccaṃ natthi mūle paṭiggahitattāti adhippāyo.
அஸ்ஸாதி ஸாமணேரஸ்ஸ. ததோதி அக்³கி³ஜாலனதோ.
Assāti sāmaṇerassa. Tatoti aggijālanato.
தத்தே உத³கேதி உத³கே தாபே. ததோதி தண்டு³லபக்கி²பனதோ.
Tatte udaketi udake tāpe. Tatoti taṇḍulapakkhipanato.
பிதா⁴னந்தி உக்க²லிபிதா⁴னங். தஸ்ஸேவாதி ஹத்த²குக்குச்சகஸ்ஸ பி⁴க்கு²னோ ஏவ. த³ப்³பி³ங் வாதி கடச்சு²ங் வா. ஸோ ஹி த³ரீயதி விலோளீயதி இமாயாதி த³ப்³பீ³தி வுச்சதி.
Pidhānanti ukkhalipidhānaṃ. Tassevāti hatthakukkuccakassa bhikkhuno eva. Dabbiṃ vāti kaṭacchuṃ vā. So hi darīyati viloḷīyati imāyāti dabbīti vuccati.
தத்ராதி தஸ்மிங் ட²பனே. தஸ்ஸேவாதி லோலபி⁴க்கு²ஸ்ஸேவ. ததோதி பத்ததோ. புன ததோதி ஸாகா²தி³தோ. தத்தா²தி ப²லருக்கே².
Tatrāti tasmiṃ ṭhapane. Tassevāti lolabhikkhusseva. Tatoti pattato. Puna tatoti sākhādito. Tatthāti phalarukkhe.
விதக்கங் ஸோதே⁴துந்தி ‘‘மய்ஹம்பி த³ஸ்ஸதீ’’தி விதக்கங் ஸோதே⁴துங். ததோதி அம்ப³ப²லாதி³தோ.
Vitakkaṃ sodhetunti ‘‘mayhampi dassatī’’ti vitakkaṃ sodhetuṃ. Tatoti ambaphalādito.
புன ததோதி மாதாபிதூனமத்தா²ய க³ஹிததேலாதி³தோ. தேதி மாதாபிதரோ. ததோயேவாதி தேஹியேவ தண்டு³லேஹி ஸம்பாதெ³த்வாதி ஸம்ப³ந்தோ⁴.
Puna tatoti mātāpitūnamatthāya gahitatelādito. Teti mātāpitaro. Tatoyevāti tehiyeva taṇḍulehi sampādetvāti sambandho.
எத்தா²தி தாபிதஉத³கே. அமுஞ்சந்தேனேவ ஹத்தே²னாதி யோஜனா. அங்க³ந்தி வினாஸங் க³ச்ச²ந்தீதி அங்கா³ரா. த³ரீயந்தி ப²லீயந்தீதி தா³ரூனி.
Etthāti tāpitaudake. Amuñcanteneva hatthenāti yojanā. Aṅganti vināsaṃ gacchantīti aṅgārā. Darīyanti phalīyantīti dārūni.
வுத்தோ ஸாமணேரோதி யோஜனா.
Vutto sāmaṇeroti yojanā.
க³வதி பரிபு⁴ஞ்ஜந்தானங் விஸ்ஸட்ட²ங் ஸத்³த³ங் கரோதீதி கு³ளோ, கு³ளதி விஸதோ ஜீவிதங் ரக்க²தீதி வா கு³ளோ, தங் பா⁴ஜெந்தோ பி⁴க்கூ²தி ஸம்ப³ந்தோ⁴. தஸ்ஸாதி லோலஸாமணேரஸ்ஸ.
Gavati paribhuñjantānaṃ vissaṭṭhaṃ saddaṃ karotīti guḷo, guḷati visato jīvitaṃ rakkhatīti vā guḷo, taṃ bhājento bhikkhūti sambandho. Tassāti lolasāmaṇerassa.
தூ⁴மஸ்ஸத்தா²ய வட்டீயதி வட்டித்வா கரீயதீதி தூ⁴மவட்டி, தங். முகீ²யதி விபரீயதீதி முக²ங். கங் வுச்சதி ஸீஸங், தங் திட்ட²தி எத்தா²தி கண்டோ².
Dhūmassatthāya vaṭṭīyati vaṭṭitvā karīyatīti dhūmavaṭṭi, taṃ. Mukhīyati viparīyatīti mukhaṃ. Kaṃ vuccati sīsaṃ, taṃ tiṭṭhati etthāti kaṇṭho.
ப⁴த்துக்³கா³ரோதி உத்³த⁴ங் கி³ரதி நிக்³கி³ரதீதி உக்³கா³ரோ, ப⁴த்தமேவ உக்³கா³ரோ ப⁴த்துக்³கா³ரோ, உக்³கா³ரப⁴த்தந்தி அத்தோ². த³ந்தந்தரேதி த³ந்தவிவரே.
Bhattuggāroti uddhaṃ girati niggiratīti uggāro, bhattameva uggāro bhattuggāro, uggārabhattanti attho. Dantantareti dantavivare.
உபகட்டே² காலேதி ஆஸன்னே மஜ்ஜ²ன்ஹிகே காலே. கக்கா²ரெத்வாதி ஸஞ்சித்வா. தஸ்ஸ அத்த²ங் த³ஸ்ஸேதுங் வுத்தங் ‘‘த்³வே தயோ கே²ளபிண்டே³ பாதெத்வா’’தி. ப²ளுஸங்கா²தங் ஸிங்க³ங் விஸாணங் அஸ்மிங் அத்தீ²தி ஸிங்கீ³, ஸோயேவ கடுகப⁴யேஹி விரமிதப்³ப³த்தா ஸிங்கீ³வேரோதி வுச்சதி. அங்கீயதி ருக்கோ² நவங் உக்³க³தோதி லக்கீ²யதி ஏதேஹீதி அங்குரா, ஸமங் லோணேன உத³கங், ஸமங் வா உத³கேன லோணங் அஸ்மிந்தி ஸமுத்³தோ³, தஸ்ஸ உத³கங் அவயவீஅவயவபா⁴வேனாதி ஸமுத்³தோ³த³கங், தேன அபடிக்³க³ஹிதேனாதி ஸம்ப³ந்தோ⁴. பா²ணதி கு³ளதோ த²த்³த⁴பா⁴வங் க³ச்ச²தீதி பா²ணிதங். கரேன ஹத்தே²ன க³ஹிதப்³பா³தி கரகா, வஸ்ஸோபலங், கரேன க³ண்ஹிதுமரஹாதி அத்தோ². கதகட்டி²னாதி கதகனாமகஸ்ஸ ஏகஸ்ஸ ருக்க²விஸேஸஸ்ஸ அட்டி²னா. தந்தி உத³கங். கபித்தோ²தி ஏகஸ்ஸ அம்பி³லப²லஸ்ஸ ருக்க²விஸேஸஸ்ஸ நாமங்.
Upakaṭṭhe kāleti āsanne majjhanhike kāle. Kakkhāretvāti sañcitvā. Tassa atthaṃ dassetuṃ vuttaṃ ‘‘dve tayo kheḷapiṇḍe pātetvā’’ti. Phaḷusaṅkhātaṃ siṅgaṃ visāṇaṃ asmiṃ atthīti siṅgī, soyeva kaṭukabhayehi viramitabbattā siṅgīveroti vuccati. Aṅkīyati rukkho navaṃ uggatoti lakkhīyati etehīti aṅkurā, samaṃ loṇena udakaṃ, samaṃ vā udakena loṇaṃ asminti samuddo, tassa udakaṃ avayavīavayavabhāvenāti samuddodakaṃ, tena apaṭiggahitenāti sambandho. Phāṇati guḷato thaddhabhāvaṃ gacchatīti phāṇitaṃ. Karena hatthena gahitabbāti karakā, vassopalaṃ, karena gaṇhitumarahāti attho. Katakaṭṭhināti katakanāmakassa ekassa rukkhavisesassa aṭṭhinā. Tanti udakaṃ. Kapitthoti ekassa ambilaphalassa rukkhavisesassa nāmaṃ.
ப³ஹலந்தி ஆவிலங். ஸந்தி³த்வாதி விஸந்தி³த்வா. ககுத⁴ஸொப்³பா⁴த³யோதி ககுத⁴ருக்க²ஸமீபே டி²தா ஸொப்³பா⁴த³யோ. ருக்க²தோதி ககுத⁴ருக்க²தோ. பரித்தந்தி அப்பகங்.
Bahalanti āvilaṃ. Sanditvāti visanditvā. Kakudhasobbhādayoti kakudharukkhasamīpe ṭhitā sobbhādayo. Rukkhatoti kakudharukkhato. Parittanti appakaṃ.
பானீயக⁴டே பக்கி²த்தானி ஹொந்தீதி ஸம்ப³ந்தோ⁴. தந்தி வாஸமத்தங் உத³கங். தத்தே²வாதி ட²பிதபுப்ப²வாஸிதபானீயேயேவ . ட²பிதங் த³ந்தகட்ட²ந்தி ஸம்ப³ந்தோ⁴. அஜானந்தஸ்ஸ பி⁴க்கு²ஸ்ஸாதி யோஜனா. அனாத³ரே சேதங் ஸாமிவசனங். ஹீதி ஸச்சங், யஸ்மா வா.
Pānīyaghaṭe pakkhittāni hontīti sambandho. Tanti vāsamattaṃ udakaṃ. Tatthevāti ṭhapitapupphavāsitapānīyeyeva . Ṭhapitaṃ dantakaṭṭhanti sambandho. Ajānantassa bhikkhussāti yojanā. Anādare cetaṃ sāmivacanaṃ. Hīti saccaṃ, yasmā vā.
கிங் மஹாபூ⁴தங் வட்டதி, கிங் ந வட்டதீதி யோஜனா. யங் பனாதி மஹாபூ⁴தங் பன. அங்க³லக்³க³ந்தி அங்கே³ஸு லக்³க³ங், மஹாபூ⁴தந்தி ஸம்ப³ந்தோ⁴. எத்தா²தி ஸேதே³. ஸுஜா²பிதந்தி அங்கா³ரஸதி³ஸங் கத்வா ஸுட்டு² ஜா²பிதங்.
Kiṃ mahābhūtaṃ vaṭṭati, kiṃ na vaṭṭatīti yojanā. Yaṃ panāti mahābhūtaṃ pana. Aṅgalagganti aṅgesu laggaṃ, mahābhūtanti sambandho. Etthāti sede. Sujhāpitanti aṅgārasadisaṃ katvā suṭṭhu jhāpitaṃ.
சத்தாரீதி பத²வீ சா²ரிகா கூ³த²ங் முத்தந்தி சத்தாரி. மஹாவிகடானீதி மஹந்தானி ஸப்பத³ட்ட²க்க²ணஸங்கா²தே விகாரகாலே கத்தப்³பா³னி ஓஸதா⁴னி. எத்தா²தி ‘‘அஸதி கப்பியகாரகே’’தி வசனே. காலோதி³ஸ்ஸங் நாமாதி ப்³யாதோ⁴தி³ஸ்ஸ, புக்³க³லோதி³ஸ்ஸ, காலோதி³ஸ்ஸ, ஸமயோதி³ஸ்ஸ, தே³ஸோதி³ஸ்ஸ, வஸோதி³ஸ்ஸ, பே⁴ஸஜ்ஜோதி³ஸ்ஸஸங்கா²தேஸு ஸத்தஸு ஓதி³ஸ்ஸேஸு காலோதி³ஸ்ஸங் நாமாதி அத்தோ². த³ஸமங்.
Cattārīti pathavī chārikā gūthaṃ muttanti cattāri. Mahāvikaṭānīti mahantāni sappadaṭṭhakkhaṇasaṅkhāte vikārakāle kattabbāni osadhāni. Etthāti ‘‘asati kappiyakārake’’ti vacane. Kālodissaṃ nāmāti byādhodissa, puggalodissa, kālodissa, samayodissa, desodissa, vasodissa, bhesajjodissasaṅkhātesu sattasu odissesu kālodissaṃ nāmāti attho. Dasamaṃ.
போ⁴ஜனவக்³கோ³ சதுத்தோ².
Bhojanavaggo catuttho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 10. த³ந்தபோனஸிக்கா²பத³வண்ணனா • 10. Dantaponasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 10. த³ந்தபோனஸிக்கா²பத³வண்ணனா • 10. Dantaponasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. த³ந்தபோனஸிக்கா²பத³வண்ணனா • 10. Dantaponasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 10. த³ந்தபோனஸிக்கா²பத³வண்ணனா • 10. Dantaponasikkhāpadavaṇṇanā
