| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
১০. দন্তপোনসিক্খাপদং
10. Dantaponasikkhāpadaṃ
২৬৩. দসমে দন্তকট্ঠন্তি দন্তপোনং। তঞ্হি দন্তো কসীযতি ৰিলেখীযতি অনেনাতি ‘‘দন্তকট্ঠ’’ন্তি ৰুচ্চতি। ‘‘সব্ব’’ন্তি আদিনা সব্বমেৰ পংসুকূলং সব্বপংসুকূলং, তমস্সত্থীতি ‘‘সব্বপংসুকূলিকো’’তি অত্থং দস্সেতি। সোতি ভিক্খু পরিভুঞ্জতি কিরাতি সম্বন্ধো। সুসানেতি আল়হনে। তঞ্হি ছৰানং সযনট্ঠানত্তা ‘‘সুসান’’ন্তি ৰুচ্চতি নিরুত্তিনযেন। তত্থাতি সুসানে। পুন তত্থাতি এৰমেৰ। অয্যসরূপঞ্চ ৰোসাটিতকসরূপঞ্চ দস্সেতুং ৰুত্তং ‘‘অয্যৰোসাটিতকানীতি এত্থা’’তি। তত্থ ‘‘অয্যা…পে॰… পিতামহা’’তিইমিনা অয্যসরূপং দস্সেতি। ‘‘ৰো…পে॰… ভোজনীযানী’’তিইমিনা ৰোসাটিতকসরূপং। অয্যসঙ্খাতানং পিতিপিতামহানং অত্থায, তে ৰা উদ্দিস্স ছড্ডিতানি ৰোসাটিতকসঙ্খতানি খাদনীযভোজনীযানি অয্যৰোসাটিতকানীতি ৰিগ্গহো কাতব্বো। মনুস্সা ঠপেন্তি কিরাতি সম্বন্ধো। যন্তি খাদনীযভোজনীযং। তেসন্তি ঞাতকানং। পিণ্ডং পিণ্ডং কত্ৰাতি সঙ্ঘাটং সঙ্ঘাটং কত্ৰা। অঞ্ঞন্তি ৰুত্তখাদনীযভোজনীযতো অঞ্ঞং। উম্মারেপীতি সুসানস্স ইন্দখীলেপি। সো হি উদ্ধটো কিলেসমারো এত্থাতি ‘‘উম্মারো’’তি ৰুচ্চতি। বোধিসত্তো হি অভিনিক্খমনকালে পুত্তং চুম্বিস্সামীতি ওৰরকস্স ইন্দখীলে ঠত্ৰা পস্সন্তো মাতরং পুত্তস্স নলাটে হত্থং ঠপেত্ৰা সযন্তিং দিস্ৰা ‘‘সচে মে পুত্তং গণ্হেয্যং, মাতা তস্স পবুজ্ঝেয্য, পবুজ্ঝমানায অন্তরাযো ভৰেয্যা’’তি অভিনিক্খমনন্তরাযভযেন পুত্তদারে পরিচ্চজিত্ৰা ইন্দখীলতো নিৰত্তিত্ৰা মহাভিনিক্খমনং নিক্খমি। তস্মা বোধিসত্তস্স ঠত্ৰা পুত্তদারেসু অপেক্খাসঙ্খাতস্স মারস্স উদ্ধটট্ঠানত্তা সো ইন্দখীলো নিপ্পরিযাযেন ‘‘উম্মারো’’তি ৰুচ্চতি, অঞ্ঞে পন রূল়্হীৰসেন। থিরোতি থদ্ধো। ঘনবদ্ধোতি ঘনেন বদ্ধো। কথিনেন মংসেন আবদ্ধোতি অত্থো। ৰঠতি থূলো ভৰতীতি ৰঠো, মুদ্ধজদুতিযোযং, সো অস্সত্থীতি ৰঠরোতি দস্সেন্তো আহ ‘‘ৰঠরোতি থূলো’’তি। ‘‘সল্লক্খেমা’’তিইমিনা ‘‘মঞ্ঞে’’তি এত্থ মনধাতু সল্লক্খণত্থো, মকারস্সেকারোতি দস্সেতি। হীতি সচ্চং। তেসন্তি মনুস্সানং।
263. Dasame dantakaṭṭhanti dantaponaṃ. Tañhi danto kasīyati vilekhīyati anenāti ‘‘dantakaṭṭha’’nti vuccati. ‘‘Sabba’’nti ādinā sabbameva paṃsukūlaṃ sabbapaṃsukūlaṃ, tamassatthīti ‘‘sabbapaṃsukūliko’’ti atthaṃ dasseti. Soti bhikkhu paribhuñjati kirāti sambandho. Susāneti āḷahane. Tañhi chavānaṃ sayanaṭṭhānattā ‘‘susāna’’nti vuccati niruttinayena. Tatthāti susāne. Puna tatthāti evameva. Ayyasarūpañca vosāṭitakasarūpañca dassetuṃ vuttaṃ ‘‘ayyavosāṭitakānīti etthā’’ti. Tattha ‘‘ayyā…pe… pitāmahā’’tiiminā ayyasarūpaṃ dasseti. ‘‘Vo…pe… bhojanīyānī’’tiiminā vosāṭitakasarūpaṃ. Ayyasaṅkhātānaṃ pitipitāmahānaṃ atthāya, te vā uddissa chaḍḍitāni vosāṭitakasaṅkhatāni khādanīyabhojanīyāni ayyavosāṭitakānīti viggaho kātabbo. Manussā ṭhapenti kirāti sambandho. Yanti khādanīyabhojanīyaṃ. Tesanti ñātakānaṃ. Piṇḍaṃ piṇḍaṃ katvāti saṅghāṭaṃ saṅghāṭaṃ katvā. Aññanti vuttakhādanīyabhojanīyato aññaṃ. Ummārepīti susānassa indakhīlepi. So hi uddhaṭo kilesamāro etthāti ‘‘ummāro’’ti vuccati. Bodhisatto hi abhinikkhamanakāle puttaṃ cumbissāmīti ovarakassa indakhīle ṭhatvā passanto mātaraṃ puttassa nalāṭe hatthaṃ ṭhapetvā sayantiṃ disvā ‘‘sace me puttaṃ gaṇheyyaṃ, mātā tassa pabujjheyya, pabujjhamānāya antarāyo bhaveyyā’’ti abhinikkhamanantarāyabhayena puttadāre pariccajitvā indakhīlato nivattitvā mahābhinikkhamanaṃ nikkhami. Tasmā bodhisattassa ṭhatvā puttadāresu apekkhāsaṅkhātassa mārassa uddhaṭaṭṭhānattā so indakhīlo nippariyāyena ‘‘ummāro’’ti vuccati, aññe pana rūḷhīvasena. Thiroti thaddho. Ghanabaddhoti ghanena baddho. Kathinena maṃsena ābaddhoti attho. Vaṭhati thūlo bhavatīti vaṭho, muddhajadutiyoyaṃ, so assatthīti vaṭharoti dassento āha ‘‘vaṭharoti thūlo’’ti. ‘‘Sallakkhemā’’tiiminā ‘‘maññe’’ti ettha manadhātu sallakkhaṇattho, makārassekāroti dasseti. Hīti saccaṃ. Tesanti manussānaṃ.
২৬৪. সম্মাতি অৰিপরীতং। অসল্লক্খেত্ৰাতি আহারসদ্দস্স খাদনীযভোজনীযাদীসু নিরূল়্হভাৰং অমঞ্ঞিত্ৰা। ভগৰা পন ঠপেসীতি সম্বন্ধো। যথাউপ্পন্নস্সাতি যেনাকারেন উপ্পন্নস্স । পিতা পুত্তসঙ্খাতে দারকে সঞ্ঞাপেন্তো ৰিয ভগৰা তে ভিক্খূ সঞ্ঞাপেন্তোতি যোজনা।
264.Sammāti aviparītaṃ. Asallakkhetvāti āhārasaddassa khādanīyabhojanīyādīsu nirūḷhabhāvaṃ amaññitvā. Bhagavā pana ṭhapesīti sambandho. Yathāuppannassāti yenākārena uppannassa . Pitā puttasaṅkhāte dārake saññāpento viya bhagavā te bhikkhū saññāpentoti yojanā.
২৬৫. এতদেৰাতি তিণ্ণমাকারানমঞ্ঞতরৰসেন অদিন্নমেৰ সন্ধাযাতি সম্বন্ধো। হীতি সচ্চং। মাতিকাযং ‘‘দিন্ন’’ন্তি ৰুত্তট্ঠানং নত্থি, অথ কস্মা পদভাজনেযেৰ ৰুত্তন্তি আহ ‘‘দিন্নন্তি ইদ’’ন্তিআদি। ‘‘দিন্ন’’ন্তি ইদং উদ্ধটন্তি সম্বন্ধো। অস্সাতি ‘‘দিন্ন’’ন্তি পদস্স। নিদ্দেসে চ ‘‘কাযেন…পে॰… দেন্তে’’তি উদ্ধটন্তি যোজনা। এৰন্তি ইমেহি তীহাকারেহি দদমানেতি সম্বন্ধো। এৰন্তি ইমেহি দ্ৰীহাকারেহি । আদীযমানন্তি সম্বন্ধো। রথরেণুম্পীতি রথিকৰীথিযং উট্ঠিতপংসুম্পি। পুব্বেতি পঠমপৰারণসিক্খাপদে। এৰং পটিগ্গহিতং এতং আহারং দিন্নং নাম ৰুচ্চতীতি যোজনা। ‘‘এতমেৰা’’তি এৰস্স সম্ভৰতো তস্স ফলং দস্সেতুং ৰুত্তং ‘‘ন ইদ’’ন্তিআদি। নিস্সট্ঠং ন ৰুচ্চতীতি যোজনা।
265.Etadevāti tiṇṇamākārānamaññataravasena adinnameva sandhāyāti sambandho. Hīti saccaṃ. Mātikāyaṃ ‘‘dinna’’nti vuttaṭṭhānaṃ natthi, atha kasmā padabhājaneyeva vuttanti āha ‘‘dinnanti ida’’ntiādi. ‘‘Dinna’’nti idaṃ uddhaṭanti sambandho. Assāti ‘‘dinna’’nti padassa. Niddese ca ‘‘kāyena…pe… dente’’ti uddhaṭanti yojanā. Evanti imehi tīhākārehi dadamāneti sambandho. Evanti imehi dvīhākārehi . Ādīyamānanti sambandho. Rathareṇumpīti rathikavīthiyaṃ uṭṭhitapaṃsumpi. Pubbeti paṭhamapavāraṇasikkhāpade. Evaṃ paṭiggahitaṃ etaṃ āhāraṃ dinnaṃ nāma vuccatīti yojanā. ‘‘Etamevā’’ti evassa sambhavato tassa phalaṃ dassetuṃ vuttaṃ ‘‘na ida’’ntiādi. Nissaṭṭhaṃ na vuccatīti yojanā.
তত্থাতি ‘‘কাযেনা’’তিআদিৰচনে। হীতি সচ্চং। নত্থু করীযতি ইমাযাতি নত্থুকরণী, তায। নাসাপুটেন পটিগ্গণ্হাতীতি সম্বন্ধো। অকল্লকোতি গিলানো। হীতি সচ্চং। কাযেন পটিবদ্ধো কাযপটিবদ্ধো কটচ্ছুআদীতি আহ ‘‘কটচ্ছুআদীসূ’’তিআদি। হীতি সচ্চং। পাতিযমানন্তি পাতাপিযমানং।
Tatthāti ‘‘kāyenā’’tiādivacane. Hīti saccaṃ. Natthu karīyati imāyāti natthukaraṇī, tāya. Nāsāpuṭena paṭiggaṇhātīti sambandho. Akallakoti gilāno. Hīti saccaṃ. Kāyena paṭibaddho kāyapaṭibaddho kaṭacchuādīti āha ‘‘kaṭacchuādīsū’’tiādi. Hīti saccaṃ. Pātiyamānanti pātāpiyamānaṃ.
এত্থাতি ইমস্মিং সিক্খাপদে। ‘‘পঞ্চহঙ্গেহী’’তি পদস্স ৰিত্থারং দস্সেন্তো আহ ‘‘থামমজ্ঝিমস্সা’’তিআদি। তন্তি দাতব্বৰত্থুং।
Etthāti imasmiṃ sikkhāpade. ‘‘Pañcahaṅgehī’’ti padassa vitthāraṃ dassento āha ‘‘thāmamajjhimassā’’tiādi. Tanti dātabbavatthuṃ.
তত্থাতি ‘‘হত্থপাসো পঞ্ঞাযতী’’তিৰচনে। গচ্ছন্তোপি ঠিতেনেৰ সঙ্গহিতো। ভূমট্ঠস্সাতি ভূমিযং ঠিতস্স। আকাসট্ঠস্সাতি আকাসে ঠিতস্স। ‘‘হত্থং অঙ্গ’’ন্তি পদেহি অৰযৰিসম্বন্ধো কাতব্বো। ৰুত্তনযেনেৰাতি ‘‘ভূমট্ঠস্স চ সীসেনা’’তিআদিনা ৰুত্তনযেনেৰ। পক্খীতি সকুণো। সো হি পক্খযুত্তত্তা পক্খীতি ৰুচ্চতি। হত্থীতি কুঞ্জরো। সো হি সোণ্ডসঙ্খাতহত্থযুত্তত্তা হত্থীতি ৰুচ্চতি। অদ্ধেন অট্ঠমং রতনমস্সাতি অদ্ধট্ঠমরতনো, হত্থী, তস্স। তেনাতি হত্থিনা।
Tatthāti ‘‘hatthapāso paññāyatī’’tivacane. Gacchantopi ṭhiteneva saṅgahito. Bhūmaṭṭhassāti bhūmiyaṃ ṭhitassa. Ākāsaṭṭhassāti ākāse ṭhitassa. ‘‘Hatthaṃ aṅga’’nti padehi avayavisambandho kātabbo. Vuttanayenevāti ‘‘bhūmaṭṭhassa ca sīsenā’’tiādinā vuttanayeneva. Pakkhīti sakuṇo. So hi pakkhayuttattā pakkhīti vuccati. Hatthīti kuñjaro. So hi soṇḍasaṅkhātahatthayuttattā hatthīti vuccati. Addhena aṭṭhamaṃ ratanamassāti addhaṭṭhamaratano, hatthī, tassa. Tenāti hatthinā.
একো দাযকো ৰদতীতি সম্বন্ধো। ওণমতীতি হেট্ঠা নমতি। এত্তাৰতাতি একদেসসম্পটিচ্ছনমত্তেন। ততোতি সম্পটিচ্ছনতো। উগ্ঘাটেত্ৰাতি ৰিৰরিত্ৰা। কাজেনাতি ব্যাভঙ্গিযা। সা হি কচতি বন্ধতি ৰিৰিধং ভারং অস্মিন্তি কাচোতি ৰুচ্চতি, চকারস্স জকারে কতে কাজোপি যুত্তোযেৰ। তিংস হত্থা রতনানি ইমস্সাতি তিংসহত্থো, ৰেণু। গুল়কুম্ভোতি ফাণিতেন পূরিতো ঘটো। পটিগ্গহিতমেৰাতি কুম্ভেসু হত্থপাসতো বহি ঠিতেসুপি অভিহারকস্স হত্থপাসে ঠিতত্তা পটিগ্গহিতমেৰাতি ৰুত্তং হোতি। উচ্ছুযন্তদোণিতোতি উচ্ছুং পীল়নযন্তস্স অম্বণতো।
Eko dāyako vadatīti sambandho. Oṇamatīti heṭṭhā namati. Ettāvatāti ekadesasampaṭicchanamattena. Tatoti sampaṭicchanato. Ugghāṭetvāti vivaritvā. Kājenāti byābhaṅgiyā. Sā hi kacati bandhati vividhaṃ bhāraṃ asminti kācoti vuccati, cakārassa jakāre kate kājopi yuttoyeva. Tiṃsa hatthā ratanāni imassāti tiṃsahattho, veṇu. Guḷakumbhoti phāṇitena pūrito ghaṭo. Paṭiggahitamevāti kumbhesu hatthapāsato bahi ṭhitesupi abhihārakassa hatthapāse ṭhitattā paṭiggahitamevāti vuttaṃ hoti. Ucchuyantadoṇitoti ucchuṃ pīḷanayantassa ambaṇato.
বহূ পত্তা ঠপিতা হোন্তীতি সম্বন্ধো। যত্থাতি যস্মিং ঠানে। ঠিতস্স ভিক্খুনো হত্থপাসেতি যোজনা। ঠত্ৰা ফুসিত্ৰা ‘‘নিসিন্নস্স ভিক্খুনো’’তি পাঠসেসেন যোজেতব্বং। ঠিতেন ৰা নিসিন্নেন ৰা নিপন্নেন ৰা দাযকেন দিয্যতীতি সম্বন্ধো।
Bahū pattā ṭhapitā hontīti sambandho. Yatthāti yasmiṃ ṭhāne. Ṭhitassa bhikkhuno hatthapāseti yojanā. Ṭhatvā phusitvā ‘‘nisinnassa bhikkhuno’’ti pāṭhasesena yojetabbaṃ. Ṭhitena vā nisinnena vā nipannena vā dāyakena diyyatīti sambandho.
পথৰিযং ঠিতা হোন্তীতি সম্বন্ধো। যং যন্তি যং যং পত্তং। যত্থ কত্থচীতি যেসু কেসুচীতি সম্বন্ধো। তন্তি তং ৰচনং।
Pathaviyaṃ ṭhitā hontīti sambandho. Yaṃ yanti yaṃ yaṃ pattaṃ. Yattha katthacīti yesu kesucīti sambandho. Tanti taṃ vacanaṃ.
তত্থ তস্মিং ঠানে জাতো তত্থজাতো, অলুত্তসমাসোযং, সোযেৰ তত্থজাতকো, তস্মিং। হীতি সচ্চং, যস্মা ৰা। তত্থজাতকে ন রুহতি যথা, এৰং ন রুহতিযেৰাতি যোজনা। থামমজ্ঝিমেন পুরিসেন সুট্ঠু হরিতব্বন্তি সংহারিযং, তংযেৰ সংহারিমং যকারস্স মকারং কত্ৰা, ন সংহারিমং অসংহারিমং, তস্মিং। তেপীতি তে অসংহারিমাপি। হীতি সচ্চং, যস্মা ৰা। তত্থজাতকসঙ্খেপূপগাতি তত্থজাতকে সমোধানেত্ৰা খেপং পক্খেপং উপগতা। হীতি সচ্চং, যস্মা ৰা। ইদঞ্হি ৰাক্যন্তরত্তা পুনপ্পুনং ৰুত্তন্তি দট্ঠব্বং। তানীতি তিন্তিণিকাদিপণ্ণানি। সন্ধারেতুন্তি সম্মা ধারেতুং। ঠিতো দাযকোতি সম্বন্ধো।
Tattha tasmiṃ ṭhāne jāto tatthajāto, aluttasamāsoyaṃ, soyeva tatthajātako, tasmiṃ. Hīti saccaṃ, yasmā vā. Tatthajātake na ruhati yathā, evaṃ na ruhatiyevāti yojanā. Thāmamajjhimena purisena suṭṭhu haritabbanti saṃhāriyaṃ, taṃyeva saṃhārimaṃ yakārassa makāraṃ katvā, na saṃhārimaṃ asaṃhārimaṃ, tasmiṃ. Tepīti te asaṃhārimāpi. Hīti saccaṃ, yasmā vā. Tatthajātakasaṅkhepūpagāti tatthajātake samodhānetvā khepaṃ pakkhepaṃ upagatā. Hīti saccaṃ, yasmā vā. Idañhi vākyantarattā punappunaṃ vuttanti daṭṭhabbaṃ. Tānīti tintiṇikādipaṇṇāni. Sandhāretunti sammā dhāretuṃ. Ṭhito dāyakoti sambandho.
লদ্ধস্স লদ্ধস্স ৰত্থুস্স সন্নিধিট্ঠানত্তা, পক্খিত্তট্ঠানত্তা ৰা থৰীযতি পসংসীযতীতি থৰিকা, ততো। পুঞ্ছিত্ৰা পটিগ্গহেত্ৰাতি ‘‘পুঞ্ছিত্ৰা ৰা পটিগ্গহেত্ৰা ৰা’’তি অনিযমৰিকপ্পত্থো ৰাসদ্দো অজ্ঝাহরিতব্বো। তেসু তেসু ৰত্থূসু রঞ্জতি লগ্গতীতি রজো, তং। ৰিনযে পঞ্ঞত্তং দুক্কটং ৰিনযদুক্কটং। তং পনাতি ভিক্খং পন। পটিগ্গহেত্ৰা দেথাতি মং পটিগ্গহাপেত্ৰা মম দেথাতি অধিপ্পাযো।
Laddhassa laddhassa vatthussa sannidhiṭṭhānattā, pakkhittaṭṭhānattā vā thavīyati pasaṃsīyatīti thavikā, tato. Puñchitvā paṭiggahetvāti ‘‘puñchitvā vā paṭiggahetvā vā’’ti aniyamavikappattho vāsaddo ajjhāharitabbo. Tesu tesu vatthūsu rañjati laggatīti rajo, taṃ. Vinaye paññattaṃ dukkaṭaṃ vinayadukkaṭaṃ. Taṃ panāti bhikkhaṃ pana. Paṭiggahetvā dethāti maṃ paṭiggahāpetvā mama dethāti adhippāyo.
ততো ততোতি তস্মা তস্মা ঠানা উট্ঠাপেত্ৰাতি সম্বন্ধো। তন্তি ভিক্খং। তস্সাতি অনুপসম্পন্নস্স।
Tato tatoti tasmā tasmā ṭhānā uṭṭhāpetvāti sambandho. Tanti bhikkhaṃ. Tassāti anupasampannassa.
সো ৰত্তব্বোতি সো দিয্যমানো ভিক্খু দাযকেন ভিক্খুনা ৰত্তব্বোতি যোজনা। ইমন্তি সরজপত্তং। তেনাতি দিয্যমানভিক্খুনা। তথা কাতব্বন্তি যথা দাযকেন ভিক্খুনা ৰুত্তং, তথা কাতব্বন্তি অত্থো। উপ্লৰতীতি উপরি গচ্ছতি, প্লু গতিযন্তি হি ধাতুপাঠেসু (সদ্দনীতিধাতুমালাযং ১৬ ল়কারন্তধাতু) ৰুত্তং। এত্থ উইতি উপসগ্গস্স অত্থদস্সনত্থং ‘‘উপরী’’তি ৰুত্তং, পকারলকারসংযোগো দট্ঠব্বো। পোত্থকেসু পন ‘‘উপ্পিলৰতী’’তি লিখন্তি, সো অপাঠো। কঞ্জিকন্তি বিলঙ্গং। তঞ্হি কেন জলেন অঞ্জিযং অভিব্যত্তং অস্সাতি ‘‘কঞ্জিয’’ন্তি ৰুচ্চতি, তমেৰ কঞ্জিকং যকারস্স ককারং কত্ৰা। তং পৰাহেত্ৰা, অপনেত্ৰাতি অত্থো। যত্থাতি যস্মিং ঠানে। সুক্খমেৰ ভত্তং ভজিতব্বট্ঠেন সেৰিতব্বট্ঠেনাতি সুক্খভত্তং, তস্মিং। পুরতোতি ভিক্খুস্স পুরতো, পুব্বে ৰা। ফুসিতানীতি বিন্দূনি। তানি হি সম্বাধট্ঠানেসুপি ফুসন্তীতি ফুসিতানীতি ৰুচ্চন্তি।
So vattabboti so diyyamāno bhikkhu dāyakena bhikkhunā vattabboti yojanā. Imanti sarajapattaṃ. Tenāti diyyamānabhikkhunā. Tathākātabbanti yathā dāyakena bhikkhunā vuttaṃ, tathā kātabbanti attho. Uplavatīti upari gacchati, plu gatiyanti hi dhātupāṭhesu (saddanītidhātumālāyaṃ 16 ḷakārantadhātu) vuttaṃ. Ettha uiti upasaggassa atthadassanatthaṃ ‘‘uparī’’ti vuttaṃ, pakāralakārasaṃyogo daṭṭhabbo. Potthakesu pana ‘‘uppilavatī’’ti likhanti, so apāṭho. Kañjikanti bilaṅgaṃ. Tañhi kena jalena añjiyaṃ abhibyattaṃ assāti ‘‘kañjiya’’nti vuccati, tameva kañjikaṃ yakārassa kakāraṃ katvā. Taṃ pavāhetvā, apanetvāti attho. Yatthāti yasmiṃ ṭhāne. Sukkhameva bhattaṃ bhajitabbaṭṭhena sevitabbaṭṭhenāti sukkhabhattaṃ, tasmiṃ. Puratoti bhikkhussa purato, pubbe vā. Phusitānīti bindūni. Tāni hi sambādhaṭṭhānesupi phusantīti phusitānīti vuccanti.
উল়ুঙ্কোতি কোসিযসকুণনামো দীঘদণ্ডকো একো ভাজনৰিসেসো, তেন। থেৰাতি ফুসিতানি। তানি হি সম্বাধট্ঠানেসুপি ফুসিতত্তা থৰীযন্তি পসংসীযন্তীতি ‘‘থেৰা’’তি ৰুচ্চন্তি। চরুকেনাতি চরীযতি ভক্খীযতীতি চরু, হব্যপাকো, তং করোতি অনেনাতি চরুকং, থাল্যাদিকং খুদ্দকভাজনং, তেন আকিরিযমানেতি সম্বন্ধো। কাল়ৰণ্ণকামেহি মানীযতীতি মসি। খাদতীতি ছারো খকারস্স ছকারং, দকারস্স চ রকারং কত্ৰা, খাররসো, সো ইমিস্সত্থীতি ছারিকা। উপ্পতিত্ৰাতি উদ্ধং গন্ত্ৰা। হীতি সচ্চং, যস্মা ৰা।
Uḷuṅkoti kosiyasakuṇanāmo dīghadaṇḍako eko bhājanaviseso, tena. Thevāti phusitāni. Tāni hi sambādhaṭṭhānesupi phusitattā thavīyanti pasaṃsīyantīti ‘‘thevā’’ti vuccanti. Carukenāti carīyati bhakkhīyatīti caru, habyapāko, taṃ karoti anenāti carukaṃ, thālyādikaṃ khuddakabhājanaṃ, tena ākiriyamāneti sambandho. Kāḷavaṇṇakāmehi mānīyatīti masi. Khādatīti chāro khakārassa chakāraṃ, dakārassa ca rakāraṃ katvā, khāraraso, so imissatthīti chārikā. Uppatitvāti uddhaṃ gantvā. Hīti saccaṃ, yasmā vā.
ফালেত্ৰাতি ছিন্দিত্ৰা। দেন্তানং অনুপসম্পন্নানন্তি সম্বন্ধো। পাযাসস্সাতি পাযাসেন। তথাপীতি তেন মুখৰট্টিযা গহণাকারেনপি।
Phāletvāti chinditvā. Dentānaṃ anupasampannānanti sambandho. Pāyāsassāti pāyāsena. Tathāpīti tena mukhavaṭṭiyā gahaṇākārenapi.
আভোগং কত্ৰাতি ‘‘পটিগ্গহেস্সামী’’তি মনসিকারং কত্ৰা। সোতি নিদ্দং ওক্কন্তো ভিক্খু। ৰট্টতিযেৰাতি আভোগস্স কতত্তা ৰট্টতিযেৰ। অনাদরন্তি অনাদরেন, করণত্থে চেতং উপযোগৰচনং, অনাদরং হুত্ৰাতি ৰা যোজেতব্বং। কেচীতি অভযগিরিৰাসিনো। কাযেন পটিবদ্ধো কাযপটিবদ্ধো, তেন পটিবদ্ধো কাযপটিবদ্ধপটিবদ্ধো , তেন। ৰচনমত্তমেৰাতি ‘‘পটিবদ্ধপটিবদ্ধ’’ন্তি একং অতিরেকং পটিবদ্ধৰচনমত্তমেৰ নানং, অত্থতো পন কাযপটিবদ্ধমেৰাতি অধিপ্পাযো। যম্পীতি যম্পি ৰত্থু। তত্রাতি তস্মিং ৰট্টনে। তন্তি অনুজাননং।
Ābhogaṃ katvāti ‘‘paṭiggahessāmī’’ti manasikāraṃ katvā. Soti niddaṃ okkanto bhikkhu. Vaṭṭatiyevāti ābhogassa katattā vaṭṭatiyeva. Anādaranti anādarena, karaṇatthe cetaṃ upayogavacanaṃ, anādaraṃ hutvāti vā yojetabbaṃ. Kecīti abhayagirivāsino. Kāyena paṭibaddho kāyapaṭibaddho, tena paṭibaddho kāyapaṭibaddhapaṭibaddho, tena. Vacanamattamevāti ‘‘paṭibaddhapaṭibaddha’’nti ekaṃ atirekaṃ paṭibaddhavacanamattameva nānaṃ, atthato pana kāyapaṭibaddhamevāti adhippāyo. Yampīti yampi vatthu. Tatrāti tasmiṃ vaṭṭane. Tanti anujānanaṃ.
নেয্যো অধিপ্পাযং নেত্ৰা ঞাতো অত্থো ইমস্সাতি নেয্যত্থং। এত্থাতি সুত্তে, সুত্তস্স ৰা। যন্তি ৰত্থু পততীতি সম্বন্ধো। পরিগল়িত্ৰাতি ভস্সিত্ৰা। সুদ্ধাযাতি নিরজায। সামন্তি সযং। পুঞ্ছিত্ৰা ৰাতিআদীসু তযো ৰাসদ্দা অনিযমৰিকপ্পত্থা। পুঞ্ছিতাদীসু হি একস্মিং কিচ্চে কতে ইতরকিচ্চং কাতব্বং নত্থীতি অধিপ্পাযো। তেনাতি তেন ভিক্খুনা, ‘‘আহরাপেতুম্পী’’তিপদে কারিতকম্মং। ‘‘কস্মা ন ৰট্টতী’’তি পুচ্ছা। হীতি ৰিত্থারো। ৰদন্তেন ভগৰতাতি সম্বন্ধো। এত্থাতি সুত্তৰচনেসু। ‘‘পরিচ্চত্তং তং ভিক্খৰে দাযকেহী’’তি ৰচনেনাতি যোজনা। অধিপ্পাযোতি নীতত্থো অধিপ্পাযো, নিপ্পরিযাযেন ইতত্থো ঞাতত্থো অধিপ্পাযোতি ৰুত্তং হোতি।
Neyyo adhippāyaṃ netvā ñāto attho imassāti neyyatthaṃ. Etthāti sutte, suttassa vā. Yanti vatthu patatīti sambandho. Parigaḷitvāti bhassitvā. Suddhāyāti nirajāya. Sāmanti sayaṃ. Puñchitvā vātiādīsu tayo vāsaddā aniyamavikappatthā. Puñchitādīsu hi ekasmiṃ kicce kate itarakiccaṃ kātabbaṃ natthīti adhippāyo. Tenāti tena bhikkhunā, ‘‘āharāpetumpī’’tipade kāritakammaṃ. ‘‘Kasmā na vaṭṭatī’’ti pucchā. Hīti vitthāro. Vadantena bhagavatāti sambandho. Etthāti suttavacanesu. ‘‘Pariccattaṃ taṃ bhikkhave dāyakehī’’ti vacanenāti yojanā. Adhippāyoti nītattho adhippāyo, nippariyāyena itattho ñātattho adhippāyoti vuttaṃ hoti.
এৰং নীতত্থমধিপ্পাযং দস্সেত্ৰা নেয্যত্থ, মধিপ্পাযং দস্সেন্তো আহ ‘‘যস্মা চা’’তি আদি। তন্তি পরিভুঞ্জনং অনুঞ্ঞাতন্তি সম্বন্ধো। দুতিযদিৰসেপীতি পিসদ্দো সম্পিণ্ডনত্থো, অপরদিৰসেপীতি অত্থো। অধিপ্পাযোতি নেয্যত্থো অধিপ্পাযো নেত্ৰা ইয্যত্থো ঞাতত্থো অধিপ্পাযোতি ৰুত্তং হোতি।
Evaṃ nītatthamadhippāyaṃ dassetvā neyyattha, madhippāyaṃ dassento āha ‘‘yasmā cā’’ti ādi. Tanti paribhuñjanaṃ anuññātanti sambandho. Dutiyadivasepīti pisaddo sampiṇḍanattho, aparadivasepīti attho. Adhippāyoti neyyattho adhippāyo netvā iyyattho ñātattho adhippāyoti vuttaṃ hoti.
ভুঞ্জন্তানং ভিক্খূনন্তি সম্বন্ধো। হীতি ৰিত্থারো। দন্তাতি দসনা। তে হি দংসীযন্তি ভক্খীযন্তি এতেহীতি ‘‘দন্তা’’তি ৰুচ্চন্তি। সত্থংযেৰ সত্থকং খুদ্দকট্ঠেন, তেন পটিগ্গহিতেন সত্থকেন। এতন্তি মলং। তন্তি লোহগন্ধমত্তং। পরিহরন্তীতি পটিগ্গহেত্ৰা হরন্তি। হীতি সচ্চং, যস্মা ৰা। তং সত্থকং পরিভোগত্থায যস্মা ন পরিহরন্তি, তস্মা এসেৰ নযোতি অত্থো। উগ্গহিতপচ্চযা, সন্নিধিপচ্চযা ৰা দোসো নত্থীতি ৰুত্তং হোতি। তত্থাতি তেসু তক্কখীরেসু। নীলিকাতি নীলৰণ্ণা স্নেহা। আমকতক্কাদীসূতি অপক্কেসু তক্কখীরেসু।
Bhuñjantānaṃ bhikkhūnanti sambandho. Hīti vitthāro. Dantāti dasanā. Te hi daṃsīyanti bhakkhīyanti etehīti ‘‘dantā’’ti vuccanti. Satthaṃyeva satthakaṃ khuddakaṭṭhena, tena paṭiggahitena satthakena. Etanti malaṃ. Tanti lohagandhamattaṃ. Pariharantīti paṭiggahetvā haranti. Hīti saccaṃ, yasmā vā. Taṃ satthakaṃ paribhogatthāya yasmā na pariharanti, tasmā eseva nayoti attho. Uggahitapaccayā, sannidhipaccayā vā doso natthīti vuttaṃ hoti. Tatthāti tesu takkakhīresu. Nīlikāti nīlavaṇṇā snehā. Āmakatakkādīsūti apakkesu takkakhīresu.
কিলিট্ঠউদকন্তি সমলং উদকং। তস্সাতি সামণেরস্স। পত্তগতং ওদনন্তি সম্বন্ধো। অস্সাতি সামণেরস্স। উগ্গহিতকোতি অৰগহিতকো। ‘‘উঞ্ঞাতো’’তিআদীসু (সং॰ নি॰ ১.১১২) ৰিয উকারো ওকারৰিপরীতো হোতি, অপটিগ্গহেত্ৰা গহিতত্তা দুগ্গহিতকোতি ৰুত্তং হোতি।
Kiliṭṭhaudakanti samalaṃ udakaṃ. Tassāti sāmaṇerassa. Pattagataṃ odananti sambandho. Assāti sāmaṇerassa. Uggahitakoti avagahitako. ‘‘Uññāto’’tiādīsu (saṃ. ni. 1.112) viya ukāro okāraviparīto hoti, apaṭiggahetvā gahitattā duggahitakoti vuttaṃ hoti.
এতেনাতি ওদনেন। পটিগ্গহিতমেৰ হোতি হত্থতো অমুত্তত্তাতি অধিপ্পাযো।
Etenāti odanena. Paṭiggahitameva hoti hatthato amuttattāti adhippāyo.
পুন পটিগ্গহেতব্বং সাপেক্খে সতীতি অধিপ্পাযো। এত্তোতি ইতো পত্ততো। সামণেরো পক্খিপতীতি সম্বন্ধো। ততোতি পত্ততো। কেচীতি অভযগিরিৰাসিনো। তন্তি ‘‘পুন পটিগ্গহেতব্ব’’ন্তি ৰদন্তানং কেসঞ্চি আচরিযানং ৰচনং ৰেদিতব্বন্তি সম্বন্ধো। যন্তি পূৰভত্তাদি।
Puna paṭiggahetabbaṃ sāpekkhe satīti adhippāyo. Ettoti ito pattato. Sāmaṇero pakkhipatīti sambandho. Tatoti pattato. Kecīti abhayagirivāsino. Tanti ‘‘puna paṭiggahetabba’’nti vadantānaṃ kesañci ācariyānaṃ vacanaṃ veditabbanti sambandho. Yanti pūvabhattādi.
অত্তনো ৰাতি সামণেরস্স ৰা। সামণেরাতি আমন্তনং। তস্সাতি সামণেরস্স। ভাজনেতি যাগুপচনকভাজনে। যাগুকুটন্তি যাগুযা পূরিতং কুটং। তন্তি যাগুকুটং। ‘‘ভিক্খুনা পটিগ্গণ্হাপেতু’’ন্তি কারিতকম্মং উপনেতব্বং। গীৰং ঠপেত্ৰা আৰজ্জেতীতি সম্বন্ধো। আৰজ্জেতীতি পরিণামেতি।
Attanovāti sāmaṇerassa vā. Sāmaṇerāti āmantanaṃ. Tassāti sāmaṇerassa. Bhājaneti yāgupacanakabhājane. Yāgukuṭanti yāguyā pūritaṃ kuṭaṃ. Tanti yāgukuṭaṃ. ‘‘Bhikkhunā paṭiggaṇhāpetu’’nti kāritakammaṃ upanetabbaṃ. Gīvaṃ ṭhapetvā āvajjetīti sambandho. Āvajjetīti pariṇāmeti.
পটিগ্গহণূপগং ভারন্তি থামমজ্ঝিমেন পুরিসেন সংহারিমং ভারং। বলৰতা সামণেরেনাতি সম্বন্ধো। তেলঘটং ৰাতি তেলেন পক্খিত্তং ঘটং ৰা। লগ্গেন্তীতি লম্বেন্তি। অযমেৰ ৰা পাঠো।
Paṭiggahaṇūpagaṃ bhāranti thāmamajjhimena purisena saṃhārimaṃ bhāraṃ. Balavatā sāmaṇerenāti sambandho. Telaghaṭaṃ vāti telena pakkhittaṃ ghaṭaṃ vā. Laggentīti lambenti. Ayameva vā pāṭho.
নাগস্স দন্তো ৰিযাতি নাগদন্তকো, সদিসত্থে কো। অঙ্কীযতে লক্খীযতে অনেনাতি অঙ্কুসো, গজমত্থকম্হি ৰিজ্ঝনকণ্ডকো। অঙ্কুসো ৰিযাতি অঙ্কুসকো, তস্মিং অঙ্কুসকে ৰা লগ্গিতা হোন্তীতি সম্বন্ধো। গণ্হতোতি গণ্হন্তস্স। মঞ্চস্স হেট্ঠা হেট্ঠামঞ্চো, তস্মিং। তন্তি তেলথালকং।
Nāgassa danto viyāti nāgadantako, sadisatthe ko. Aṅkīyate lakkhīyate anenāti aṅkuso, gajamatthakamhi vijjhanakaṇḍako. Aṅkuso viyāti aṅkusako, tasmiṃ aṅkusake vā laggitā hontīti sambandho. Gaṇhatoti gaṇhantassa. Mañcassa heṭṭhā heṭṭhāmañco, tasmiṃ. Tanti telathālakaṃ.
আরোহন্তেহি চ ওরোহন্তেহি চ নিচ্চং সেৰীযতীতি নিস্সেণী, তস্সা মজ্ঝং নিস্সেণিমজ্ঝং, তস্মিং। কণ্ণে উট্ঠিতং কণ্ণিকং, কণ্ণমলং, কণ্ণিকং ৰিয কণ্ণিকং, যথা হি কণ্ণমলং কণ্ণতো উট্ঠহিত্ৰা সযং পৰত্ততি, এৰং তেলাদিতো উট্ঠহিত্ৰা সযং পৰত্ততীতি ৰুত্তং হোতি। ঘনচুণ্ণন্তি কথিনচুণ্ণং। তংসমুট্ঠানমেৰ নামাতি ততো তেলাদিতো সমুট্ঠানমেৰ নাম হোতীতি অত্থো। এতন্তি কণ্ণিকাদি। ইদং পদং পুব্বাপরাপেক্খং।
Ārohantehi ca orohantehi ca niccaṃ sevīyatīti nisseṇī, tassā majjhaṃ nisseṇimajjhaṃ, tasmiṃ. Kaṇṇe uṭṭhitaṃ kaṇṇikaṃ, kaṇṇamalaṃ, kaṇṇikaṃ viya kaṇṇikaṃ, yathā hi kaṇṇamalaṃ kaṇṇato uṭṭhahitvā sayaṃ pavattati, evaṃ telādito uṭṭhahitvā sayaṃ pavattatīti vuttaṃ hoti. Ghanacuṇṇanti kathinacuṇṇaṃ. Taṃsamuṭṭhānameva nāmāti tato telādito samuṭṭhānameva nāma hotīti attho. Etanti kaṇṇikādi. Idaṃ padaṃ pubbāparāpekkhaṃ.
যোত্তেনাতি রজ্জুনা। অঞ্ঞো দেতীতি সম্বন্ধো।
Yottenāti rajjunā. Añño detīti sambandho.
পৰিসন্তে চ নিক্খমন্তে চ ৰরতি আৰরতি ইমাযাতি ৰতি, তং। উচ্ছূতি রসালো। সো হি উসতি ৰিসং দাহেতীতি উচ্ছূতি ৰুচ্চতি, তং। তিম্বরুসকন্তি তিন্দুকং। তঞ্হি তেমেতি ভুঞ্জন্তং পুগ্গলং অদ্দেতি রসেনাতি তিম্বো, রুসতি খুদ্দিতং নাসেতীতি রুসকো, তিম্বো চ সো রুসকো চাতি ‘‘তিম্বরুসকো’’তি ৰুচ্চতি, তং। ৰতিদণ্ডকেসূতি ৰতিযা অত্থায নিক্খণিতেসু দণ্ডকেসু। মযং পনাতি সঙ্গহকারাচরিযভূতা বুদ্ধঘোসনামকা মযং পন, অত্তানং সন্ধায বহুৰচনৰসেন ৰুত্তং। ন পুথুলো পাকারোতি অড্ঢতেয্যহত্থপাসানতিক্কমং সন্ধায ৰুত্তং। হত্থসতম্পীতি রতনসতম্পি।
Pavisante ca nikkhamante ca varati āvarati imāyāti vati, taṃ. Ucchūti rasālo. So hi usati visaṃ dāhetīti ucchūti vuccati, taṃ. Timbarusakanti tindukaṃ. Tañhi temeti bhuñjantaṃ puggalaṃ addeti rasenāti timbo, rusati khudditaṃ nāsetīti rusako, timbo ca so rusako cāti ‘‘timbarusako’’ti vuccati, taṃ. Vatidaṇḍakesūti vatiyā atthāya nikkhaṇitesu daṇḍakesu. Mayaṃ panāti saṅgahakārācariyabhūtā buddhaghosanāmakā mayaṃ pana, attānaṃ sandhāya bahuvacanavasena vuttaṃ. Na puthulo pākāroti aḍḍhateyyahatthapāsānatikkamaṃ sandhāya vuttaṃ. Hatthasatampīti ratanasatampi.
সোতি সামণেরো। ভিক্খুস্স দেতীতি যোজনা। অপরোতি সামণেরো।
Soti sāmaṇero. Bhikkhussa detīti yojanā. Aparoti sāmaṇero.
ফলং ইমিস্সত্থীতি ফলিনী, ইনপচ্চযো ইত্থিলিঙ্গজোতকো ঈ, তং সাখন্তি যোজনা। ফলিনিসাখন্তি সমাসতোপি পাঠো অত্থি। মচ্ছিকৰারণত্থন্তি মধুফাণিতাদীহি মক্খনট্ঠানে নিলীযন্তীতি মক্খিকা, তাযেৰ মচ্ছিকা খকারস্স ছকারং কত্ৰা, তাসং নিৰারণায। মূলপটিগ্গহমেৰাতি মূলে পটিগ্গহণমেৰ, পঠমপটিগ্গহমেৰাতি ৰুত্তং হোতি।
Phalaṃ imissatthīti phalinī, inapaccayo itthiliṅgajotako ī, taṃ sākhanti yojanā. Phalinisākhanti samāsatopi pāṭho atthi. Macchikavāraṇatthanti madhuphāṇitādīhi makkhanaṭṭhāne nilīyantīti makkhikā, tāyeva macchikā khakārassa chakāraṃ katvā, tāsaṃ nivāraṇāya. Mūlapaṭiggahamevāti mūle paṭiggahaṇameva, paṭhamapaṭiggahamevāti vuttaṃ hoti.
ভিক্খু গচ্ছতীতি সম্বন্ধো। অরিত্তেনাতি কেনিপাতেন। তঞ্হি অরতি নাৰা গচ্ছতি অনেনাতি অরিত্তং, তেন। তন্তি পটিগ্গহণারহং ভণ্ডং । অনুপসম্পন্নেনাতি কারিতকম্মং। তস্মিম্পীতি চাটিকুণ্ডকেপি। তন্তি অনুপসম্পন্নং।
Bhikkhu gacchatīti sambandho. Arittenāti kenipātena. Tañhi arati nāvā gacchati anenāti arittaṃ, tena. Tanti paṭiggahaṇārahaṃ bhaṇḍaṃ . Anupasampannenāti kāritakammaṃ. Tasmimpīti cāṭikuṇḍakepi. Tanti anupasampannaṃ.
পাথেয্যতণ্ডুলেতি পথস্স হিতে তণ্ডুলে। তেসন্তি সামণেরানং। ইতরেহীতি ভিক্খূহি গহিততণ্ডুলেহি। সব্বেহি ভিক্খূহি ভুত্তন্তি সম্বন্ধো। এত্থাতি ভিক্খূহি গহিতেহি সামণেরস্স তণ্ডুলেহি যাগুপচনে ন দিস্সতীতি সম্বন্ধো। কারণন্তি পরিৰত্তেত্ৰা ভুত্তস্স চ অপরিৰত্তেত্ৰা ভুত্তস্স চ কারণং।
Pātheyyataṇḍuleti pathassa hite taṇḍule. Tesanti sāmaṇerānaṃ. Itarehīti bhikkhūhi gahitataṇḍulehi. Sabbehi bhikkhūhi bhuttanti sambandho. Etthāti bhikkhūhi gahitehi sāmaṇerassa taṇḍulehi yāgupacane na dissatīti sambandho. Kāraṇanti parivattetvā bhuttassa ca aparivattetvā bhuttassa ca kāraṇaṃ.
ভত্তং পচিতুকামো সামণেরোতি যোজনা। ভিক্খুনা আরোপেতব্বং, অগ্গি ন কাতব্বোতি সম্বন্ধো। পুন পটিগ্গহণকিচ্চং নত্থি মূলে পটিগ্গহিতত্তাতি অধিপ্পাযো।
Bhattaṃ pacitukāmo sāmaṇeroti yojanā. Bhikkhunā āropetabbaṃ, aggi na kātabboti sambandho. Puna paṭiggahaṇakiccaṃ natthi mūle paṭiggahitattāti adhippāyo.
অস্সাতি সামণেরস্স। ততোতি অগ্গিজালনতো।
Assāti sāmaṇerassa. Tatoti aggijālanato.
তত্তে উদকেতি উদকে তাপে। ততোতি তণ্ডুলপক্খিপনতো।
Tatte udaketi udake tāpe. Tatoti taṇḍulapakkhipanato.
পিধানন্তি উক্খলিপিধানং। তস্সেৰাতি হত্থকুক্কুচ্চকস্স ভিক্খুনো এৰ। দব্বিং ৰাতি কটচ্ছুং ৰা। সো হি দরীযতি ৰিলোল়ীযতি ইমাযাতি দব্বীতি ৰুচ্চতি।
Pidhānanti ukkhalipidhānaṃ. Tassevāti hatthakukkuccakassa bhikkhuno eva. Dabbiṃ vāti kaṭacchuṃ vā. So hi darīyati viloḷīyati imāyāti dabbīti vuccati.
তত্রাতি তস্মিং ঠপনে। তস্সেৰাতি লোলভিক্খুস্সেৰ। ততোতি পত্ততো। পুন ততোতি সাখাদিতো। তত্থাতি ফলরুক্খে।
Tatrāti tasmiṃ ṭhapane. Tassevāti lolabhikkhusseva. Tatoti pattato. Puna tatoti sākhādito. Tatthāti phalarukkhe.
ৰিতক্কং সোধেতুন্তি ‘‘ময্হম্পি দস্সতী’’তি ৰিতক্কং সোধেতুং। ততোতি অম্বফলাদিতো।
Vitakkaṃ sodhetunti ‘‘mayhampi dassatī’’ti vitakkaṃ sodhetuṃ. Tatoti ambaphalādito.
পুন ততোতি মাতাপিতূনমত্থায গহিততেলাদিতো। তেতি মাতাপিতরো। ততোযেৰাতি তেহিযেৰ তণ্ডুলেহি সম্পাদেত্ৰাতি সম্বন্ধো।
Puna tatoti mātāpitūnamatthāya gahitatelādito. Teti mātāpitaro. Tatoyevāti tehiyeva taṇḍulehi sampādetvāti sambandho.
এত্থাতি তাপিতউদকে। অমুঞ্চন্তেনেৰ হত্থেনাতি যোজনা। অঙ্গন্তি ৰিনাসং গচ্ছন্তীতি অঙ্গারা। দরীযন্তি ফলীযন্তীতি দারূনি।
Etthāti tāpitaudake. Amuñcanteneva hatthenāti yojanā. Aṅganti vināsaṃ gacchantīti aṅgārā. Darīyanti phalīyantīti dārūni.
ৰুত্তো সামণেরোতি যোজনা।
Vutto sāmaṇeroti yojanā.
গৰতি পরিভুঞ্জন্তানং ৰিস্সট্ঠং সদ্দং করোতীতি গুল়ো, গুল়তি ৰিসতো জীৰিতং রক্খতীতি ৰা গুল়ো, তং ভাজেন্তো ভিক্খূতি সম্বন্ধো। তস্সাতি লোলসামণেরস্স।
Gavati paribhuñjantānaṃ vissaṭṭhaṃ saddaṃ karotīti guḷo, guḷati visato jīvitaṃ rakkhatīti vā guḷo, taṃ bhājento bhikkhūti sambandho. Tassāti lolasāmaṇerassa.
ধূমস্সত্থায ৰট্টীযতি ৰট্টিত্ৰা করীযতীতি ধূমৰট্টি, তং। মুখীযতি ৰিপরীযতীতি মুখং। কং ৰুচ্চতি সীসং, তং তিট্ঠতি এত্থাতি কণ্ঠো।
Dhūmassatthāya vaṭṭīyati vaṭṭitvā karīyatīti dhūmavaṭṭi, taṃ. Mukhīyati viparīyatīti mukhaṃ. Kaṃ vuccati sīsaṃ, taṃ tiṭṭhati etthāti kaṇṭho.
ভত্তুগ্গারোতি উদ্ধং গিরতি নিগ্গিরতীতি উগ্গারো, ভত্তমেৰ উগ্গারো ভত্তুগ্গারো, উগ্গারভত্তন্তি অত্থো। দন্তন্তরেতি দন্তৰিৰরে।
Bhattuggāroti uddhaṃ girati niggiratīti uggāro, bhattameva uggāro bhattuggāro, uggārabhattanti attho. Dantantareti dantavivare.
উপকট্ঠে কালেতি আসন্নে মজ্ঝন্হিকে কালে। কক্খারেত্ৰাতি সঞ্চিত্ৰা। তস্স অত্থং দস্সেতুং ৰুত্তং ‘‘দ্ৰে তযো খেল়পিণ্ডে পাতেত্ৰা’’তি। ফল়ুসঙ্খাতং সিঙ্গং ৰিসাণং অস্মিং অত্থীতি সিঙ্গী, সোযেৰ কটুকভযেহি ৰিরমিতব্বত্তা সিঙ্গীৰেরোতি ৰুচ্চতি। অঙ্কীযতি রুক্খো নৰং উগ্গতোতি লক্খীযতি এতেহীতি অঙ্কুরা, সমং লোণেন উদকং, সমং ৰা উদকেন লোণং অস্মিন্তি সমুদ্দো, তস্স উদকং অৰযৰীঅৰযৰভাৰেনাতি সমুদ্দোদকং, তেন অপটিগ্গহিতেনাতি সম্বন্ধো। ফাণতি গুল়তো থদ্ধভাৰং গচ্ছতীতি ফাণিতং। করেন হত্থেন গহিতব্বাতি করকা, ৰস্সোপলং, করেন গণ্হিতুমরহাতি অত্থো। কতকট্ঠিনাতি কতকনামকস্স একস্স রুক্খৰিসেসস্স অট্ঠিনা। তন্তি উদকং। কপিত্থোতি একস্স অম্বিলফলস্স রুক্খৰিসেসস্স নামং।
Upakaṭṭhe kāleti āsanne majjhanhike kāle. Kakkhāretvāti sañcitvā. Tassa atthaṃ dassetuṃ vuttaṃ ‘‘dve tayo kheḷapiṇḍe pātetvā’’ti. Phaḷusaṅkhātaṃ siṅgaṃ visāṇaṃ asmiṃ atthīti siṅgī, soyeva kaṭukabhayehi viramitabbattā siṅgīveroti vuccati. Aṅkīyati rukkho navaṃ uggatoti lakkhīyati etehīti aṅkurā, samaṃ loṇena udakaṃ, samaṃ vā udakena loṇaṃ asminti samuddo, tassa udakaṃ avayavīavayavabhāvenāti samuddodakaṃ, tena apaṭiggahitenāti sambandho. Phāṇati guḷato thaddhabhāvaṃ gacchatīti phāṇitaṃ. Karena hatthena gahitabbāti karakā, vassopalaṃ, karena gaṇhitumarahāti attho. Katakaṭṭhināti katakanāmakassa ekassa rukkhavisesassa aṭṭhinā. Tanti udakaṃ. Kapitthoti ekassa ambilaphalassa rukkhavisesassa nāmaṃ.
বহলন্তি আৰিলং। সন্দিত্ৰাতি ৰিসন্দিত্ৰা। ককুধসোব্ভাদযোতি ককুধরুক্খসমীপে ঠিতা সোব্ভাদযো। রুক্খতোতি ককুধরুক্খতো। পরিত্তন্তি অপ্পকং।
Bahalanti āvilaṃ. Sanditvāti visanditvā. Kakudhasobbhādayoti kakudharukkhasamīpe ṭhitā sobbhādayo. Rukkhatoti kakudharukkhato. Parittanti appakaṃ.
পানীযঘটে পক্খিত্তানি হোন্তীতি সম্বন্ধো। তন্তি ৰাসমত্তং উদকং। তত্থেৰাতি ঠপিতপুপ্ফৰাসিতপানীযেযেৰ । ঠপিতং দন্তকট্ঠন্তি সম্বন্ধো। অজানন্তস্স ভিক্খুস্সাতি যোজনা। অনাদরে চেতং সামিৰচনং। হীতি সচ্চং, যস্মা ৰা।
Pānīyaghaṭe pakkhittāni hontīti sambandho. Tanti vāsamattaṃ udakaṃ. Tatthevāti ṭhapitapupphavāsitapānīyeyeva . Ṭhapitaṃ dantakaṭṭhanti sambandho. Ajānantassa bhikkhussāti yojanā. Anādare cetaṃ sāmivacanaṃ. Hīti saccaṃ, yasmā vā.
কিং মহাভূতং ৰট্টতি, কিং ন ৰট্টতীতি যোজনা। যং পনাতি মহাভূতং পন। অঙ্গলগ্গন্তি অঙ্গেসু লগ্গং, মহাভূতন্তি সম্বন্ধো। এত্থাতি সেদে। সুঝাপিতন্তি অঙ্গারসদিসং কত্ৰা সুট্ঠু ঝাপিতং।
Kiṃ mahābhūtaṃ vaṭṭati, kiṃ na vaṭṭatīti yojanā. Yaṃ panāti mahābhūtaṃ pana. Aṅgalagganti aṅgesu laggaṃ, mahābhūtanti sambandho. Etthāti sede. Sujhāpitanti aṅgārasadisaṃ katvā suṭṭhu jhāpitaṃ.
চত্তারীতি পথৰী ছারিকা গূথং মুত্তন্তি চত্তারি। মহাৰিকটানীতি মহন্তানি সপ্পদট্ঠক্খণসঙ্খাতে ৰিকারকালে কত্তব্বানি ওসধানি। এত্থাতি ‘‘অসতি কপ্পিযকারকে’’তি ৰচনে। কালোদিস্সং নামাতি ব্যাধোদিস্স, পুগ্গলোদিস্স, কালোদিস্স, সমযোদিস্স, দেসোদিস্স, ৰসোদিস্স, ভেসজ্জোদিস্সসঙ্খাতেসু সত্তসু ওদিস্সেসু কালোদিস্সং নামাতি অত্থো। দসমং।
Cattārīti pathavī chārikā gūthaṃ muttanti cattāri. Mahāvikaṭānīti mahantāni sappadaṭṭhakkhaṇasaṅkhāte vikārakāle kattabbāni osadhāni. Etthāti ‘‘asati kappiyakārake’’ti vacane. Kālodissaṃ nāmāti byādhodissa, puggalodissa, kālodissa, samayodissa, desodissa, vasodissa, bhesajjodissasaṅkhātesu sattasu odissesu kālodissaṃ nāmāti attho. Dasamaṃ.
ভোজনৰগ্গো চতুত্থো।
Bhojanavaggo catuttho.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৪. ভোজনৰগ্গো • 4. Bhojanavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১০. দন্তপোনসিক্খাপদৰণ্ণনা • 10. Dantaponasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১০. দন্তপোনসিক্খাপদৰণ্ণনা • 10. Dantaponasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১০. দন্তপোনসিক্খাপদৰণ্ণনা • 10. Dantaponasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১০. দন্তপোনসিক্খাপদৰণ্ণনা • 10. Dantaponasikkhāpadavaṇṇanā
