| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
10. த³ந்தபோனஸிக்கா²பத³வண்ணனா
10. Dantaponasikkhāpadavaṇṇanā
263. த³ஸமே க⁴னப³த்³தோ⁴தி க⁴னமங்ஸேன ஸம்ப³த்³தோ⁴, கதி²னஸங்ஹதஸரீரோதி அத்தோ².
263. Dasame ghanabaddhoti ghanamaṃsena sambaddho, kathinasaṃhatasarīroti attho.
264. முக²த்³வாரந்தி முக²தோ ஹெட்டா² த்³வாரங் முக²த்³வாரங், க³லனாளிகந்தி அத்தோ². ஏவஞ்ச நாஸிகாய பவிட்ட²ம்பி முக²த்³வாரங் பவிட்ட²மேவ ஹோதி, முகே² பக்கி²த்தமத்தஞ்ச அப்பவிட்ட²ங். ஆஹாரந்தி அஜ்ஜோ²ஹரிதப்³ப³ங் காலிகங் அதி⁴ப்பேதங், ந உத³கங். தஞ்ஹி பே⁴ஸஜ்ஜஸங்க³ஹிதம்பி அகாலிகமேவ படிக்³க³ஹிதஸ்ஸேவ காலிகத்தா. உத³கே ஹி படிக்³க³ஹணங் ந ருஹதி. தேனேவ பி⁴க்கு²னா தாபிதேன உத³கேன சிரபடிக்³க³ஹிதேன ச அகப்பியகுடியங் வுத்தே²ன ச ஸஹ ஆமிஸங் பு⁴ஞ்ஜந்தஸ்ஸாபி ஸாமபாகாதி³தோ³ஸோ ந ஹோதி. வக்க²தி ஹி ‘‘பி⁴க்கு² யாகு³அத்தா²ய…பே॰… உத³கங் தாபேதி, வட்டதீ’’திஆதி³ (பாசி॰ அட்ட²॰ 265). பி⁴க்கூ² பன ஏதங் அதி⁴ப்பாயங் ததா³ ந ஜானிங்ஸு. தேனாஹ ‘‘ஸம்மா அத்த²ங் அஸல்லக்கெ²த்வா’’திஆதி³.
264.Mukhadvāranti mukhato heṭṭhā dvāraṃ mukhadvāraṃ, galanāḷikanti attho. Evañca nāsikāya paviṭṭhampi mukhadvāraṃ paviṭṭhameva hoti, mukhe pakkhittamattañca appaviṭṭhaṃ. Āhāranti ajjhoharitabbaṃ kālikaṃ adhippetaṃ, na udakaṃ. Tañhi bhesajjasaṅgahitampi akālikameva paṭiggahitasseva kālikattā. Udake hi paṭiggahaṇaṃ na ruhati. Teneva bhikkhunā tāpitena udakena cirapaṭiggahitena ca akappiyakuṭiyaṃ vutthena ca saha āmisaṃ bhuñjantassāpi sāmapākādidoso na hoti. Vakkhati hi ‘‘bhikkhu yāguatthāya…pe… udakaṃ tāpeti, vaṭṭatī’’tiādi (pāci. aṭṭha. 265). Bhikkhū pana etaṃ adhippāyaṃ tadā na jāniṃsu. Tenāha ‘‘sammā atthaṃ asallakkhetvā’’tiādi.
265. ரத²ரேணும்பீதி ரதே² க³ச்ச²ந்தே உட்ட²ஹனரேணுஸதி³ஸரேணுங். தேன ததோ ஸுகு²மங் ஆகாஸே பரிப்³ப⁴மனகங் தி³ஸ்ஸமானம்பி அப்³போ³ஹாரிகந்தி த³ஸ்ஸேதி. அகல்லகோதி கி³லானோ.
265.Rathareṇumpīti rathe gacchante uṭṭhahanareṇusadisareṇuṃ. Tena tato sukhumaṃ ākāse paribbhamanakaṃ dissamānampi abbohārikanti dasseti. Akallakoti gilāno.
‘‘க³ஹேதுங் வா…பே॰… தஸ்ஸ ஓரிமந்தேனா’’தி இமினா ஆகாஸே உஜுங் ட²த்வா பரேன உக்கி²த்தங் க³ண்ஹந்தஸ்ஸாபி ஆஸன்னங்க³பூ⁴தபாத³தலதோ பட்டா²ய ஹத்த²பாஸோ பரிச்சி²ந்தி³தப்³போ³, ந பன ஸீஸந்ததோ பட்டா²யாதி த³ஸ்ஸேதி. தத்த² ‘‘ஓரிமந்தேனா’’தி இமஸ்ஸ ஹெட்டி²மந்தேனாதி அத்தோ² க³ஹேதப்³போ³.
‘‘Gahetuṃ vā…pe… tassa orimantenā’’ti iminā ākāse ujuṃ ṭhatvā parena ukkhittaṃ gaṇhantassāpi āsannaṅgabhūtapādatalato paṭṭhāya hatthapāso paricchinditabbo, na pana sīsantato paṭṭhāyāti dasseti. Tattha ‘‘orimantenā’’ti imassa heṭṭhimantenāti attho gahetabbo.
எத்த² ச பவாரணாஸிக்கா²பத³ட்ட²கதா²யங் ‘‘ஸசே பி⁴க்கு² நிஸின்னோ ஹோதி, ஆஸனஸ்ஸ பச்சி²மந்ததோ பட்டா²யா’’திஆதி³னா (பாசி॰ அட்ட²॰ 238-239) படிக்³கா³ஹகானங் ஆஸன்னங்க³ஸ்ஸ பாரிமந்ததோ பட்டா²ய பரிச்சே²த³ஸ்ஸ த³ஸ்ஸிதத்தா இதா⁴பி ஆகாஸே டி²தஸ்ஸ படிக்³கா³ஹகஸ்ஸ ஆஸன்னங்க³பூ⁴தபாத³ங்கு³லஸ்ஸ பாரிமந்தபூ⁴ததோ பண்ஹிபரியந்தஸ்ஸ ஹெட்டி²மதலதோ பட்டா²ய, தா³யகஸ்ஸ பன ஓரிமந்தபூ⁴ததோ பாத³ங்கு³லஸ்ஸ ஹெட்டி²மதலதோ பட்டா²ய ஹத்த²பாஸோ பரிச்சி²ந்தி³தப்³போ³தி த³ட்ட²ப்³ப³ங். இமினாவ நயேன பூ⁴மியங் நிபஜ்ஜித்வா உஸ்ஸீஸே நிஸின்னஸ்ஸ ஹத்த²தோ படிக்³க³ண்ஹந்தஸ்ஸபி ஆஸன்னஸீஸங்க³ஸ்ஸ பாரிமந்தபூ⁴ததோ கீ³வந்ததோ பட்டா²யேவ ஹத்த²பாஸோ மினிதப்³போ³, ந பாத³தலதோ பட்டா²ய. ஏவங் நிபஜ்ஜித்வா தா³னேபி யதா²னுரூபங் வேதி³தப்³ப³ங். ‘‘யங் ஆஸன்னதரங் அங்க³’’ந்தி ஹி வுத்தங்.
Ettha ca pavāraṇāsikkhāpadaṭṭhakathāyaṃ ‘‘sace bhikkhu nisinno hoti, āsanassa pacchimantato paṭṭhāyā’’tiādinā (pāci. aṭṭha. 238-239) paṭiggāhakānaṃ āsannaṅgassa pārimantato paṭṭhāya paricchedassa dassitattā idhāpi ākāse ṭhitassa paṭiggāhakassa āsannaṅgabhūtapādaṅgulassa pārimantabhūtato paṇhipariyantassa heṭṭhimatalato paṭṭhāya, dāyakassa pana orimantabhūtato pādaṅgulassa heṭṭhimatalato paṭṭhāya hatthapāso paricchinditabboti daṭṭhabbaṃ. Imināva nayena bhūmiyaṃ nipajjitvā ussīse nisinnassa hatthato paṭiggaṇhantassapi āsannasīsaṅgassa pārimantabhūtato gīvantato paṭṭhāyeva hatthapāso minitabbo, na pādatalato paṭṭhāya. Evaṃ nipajjitvā dānepi yathānurūpaṃ veditabbaṃ. ‘‘Yaṃ āsannataraṃ aṅga’’nti hi vuttaṃ.
படிக்³க³ஹணஸஞ்ஞாயாதி ‘‘மஞ்சாதி³னா படிக்³க³ஹெஸ்ஸாமீ’’தி உப்பாதி³தஸஞ்ஞாய. இமினா ‘‘படிக்³க³ண்ஹாமீ’’தி வாசாய வத்தப்³ப³கிச்சங் நத்தீ²தி த³ஸ்ஸேதி. கத்த²சி அட்ட²கதா²ஸு, பதே³ஸேஸு வா. அஸங்ஹாரிமே ப²லகேதி தா²மமஜ்ஜி²மேன புரிஸேன அஸங்ஹாரியே. புஞ்சி²த்வா படிக்³க³ஹெத்வாதி புஞ்சி²தேபி ரஜனசுண்ணஸங்காய ஸதி படிக்³க³ஹணத்தா²ய வுத்தங், நாஸதி. தங் பனாதி பதிதரஜங் அப்படிக்³க³ஹெத்வா உபரி க³ஹிதபிண்ட³பாதங். அனாபத்தீதி து³ருபசிண்ணாதி³தோ³ஸோ நத்தி². ‘‘அனுபஸம்பன்னஸ்ஸ த³ஸ்ஸாமீ’’திஆதி³பி வினயது³க்கடபரிஹாராய வுத்தங். ததா² அகத்வா க³ஹிதேபி படிக்³க³ஹெத்வா பரிபு⁴ஞ்ஜதோ அனாபத்தி ஏவ. ‘‘அனுபஸம்பன்னஸ்ஸ த³த்வா’’தி இத³ம்பி புரிமாபோ⁴கா³னுகு³ணதாய வுத்தங்.
Paṭiggahaṇasaññāyāti ‘‘mañcādinā paṭiggahessāmī’’ti uppāditasaññāya. Iminā ‘‘paṭiggaṇhāmī’’ti vācāya vattabbakiccaṃ natthīti dasseti. Katthaci aṭṭhakathāsu, padesesu vā. Asaṃhārime phalaketi thāmamajjhimena purisena asaṃhāriye. Puñchitvā paṭiggahetvāti puñchitepi rajanacuṇṇasaṅkāya sati paṭiggahaṇatthāya vuttaṃ, nāsati. Taṃ panāti patitarajaṃ appaṭiggahetvā upari gahitapiṇḍapātaṃ. Anāpattīti durupaciṇṇādidoso natthi. ‘‘Anupasampannassa dassāmī’’tiādipi vinayadukkaṭaparihārāya vuttaṃ. Tathā akatvā gahitepi paṭiggahetvā paribhuñjato anāpatti eva. ‘‘Anupasampannassa datvā’’ti idampi purimābhogānuguṇatāya vuttaṃ.
சருகேனாதி கு²த்³த³கபா⁴ஜனேன. அபி⁴ஹடத்தாதி தி³ய்யமானக்க²ணங் ஸந்தா⁴ய வுத்தங். த³த்வா அபனயனகாலே பன சா²ரிகா வா பி³ந்தூ³னி வா பதந்தி, புன படிக்³க³ஹேதப்³ப³ங் அபி⁴ஹாரஸ்ஸ விக³தத்தாதி வத³ந்தி. தங் யதா² ந பததி, ததா² அபனெஸ்ஸாமீதி பரிஹரந்தே யுஜ்ஜதி. பகதிஸஞ்ஞாய அபனெந்தே அபி⁴ஹாரோ ந சி²ஜ்ஜதி, தங் படிக்³க³ஹிதமேவ ஹோதி. முக²வட்டியாபி க³ஹேதுங் வட்டதீதி அபி⁴ஹரியமானஸ்ஸ பத்தஸ்ஸ முக²வட்டியா உபரிபா⁴கே³ ஹத்த²ங் பஸாரெத்வா பு²ஸிதுங் வட்டதி.
Carukenāti khuddakabhājanena. Abhihaṭattāti diyyamānakkhaṇaṃ sandhāya vuttaṃ. Datvā apanayanakāle pana chārikā vā bindūni vā patanti, puna paṭiggahetabbaṃ abhihārassa vigatattāti vadanti. Taṃ yathā na patati, tathā apanessāmīti pariharante yujjati. Pakatisaññāya apanente abhihāro na chijjati, taṃ paṭiggahitameva hoti. Mukhavaṭṭiyāpi gahetuṃ vaṭṭatīti abhihariyamānassa pattassa mukhavaṭṭiyā uparibhāge hatthaṃ pasāretvā phusituṃ vaṭṭati.
பாதே³ன பேல்லெத்வாதி ‘‘பாதே³ன படிக்³க³ஹெஸ்ஸாமீ’’திஸஞ்ஞாய அக்கமித்வா. கேசீதி அப⁴யகி³ரிவாஸினோ. வசனமத்தமேவாதி படிப³த்³த⁴ப்படிப³த்³த⁴ந்தி ஸத்³த³மத்தமேவ நானங், காயபடிப³த்³த⁴மேவ ஹோதி. தஸ்மா தேஸங் வசனங் ந க³ஹேதப்³ப³ந்தி அதி⁴ப்பாயோ.
Pādena pelletvāti ‘‘pādena paṭiggahessāmī’’tisaññāya akkamitvā. Kecīti abhayagirivāsino. Vacanamattamevāti paṭibaddhappaṭibaddhanti saddamattameva nānaṃ, kāyapaṭibaddhameva hoti. Tasmā tesaṃ vacanaṃ na gahetabbanti adhippāyo.
தேன ஆஹராபேதுந்தி யஸ்ஸ பி⁴க்கு²னோ ஸந்திகங் க³தங், தங் இத⁴ ஆனேஹீதி ஆணாபெத்வா தேன ஆஹராபேதுங் இதரஸ்ஸ வட்டதீதி அத்தோ². ந ததோ பரந்தி தத³ஹேவ ஸாமங் அப்படிக்³க³ஹிதங் ஸந்தா⁴ய வுத்தங். தத³ஹேவ படிக்³க³ஹிதங் பன புனதி³வஸாதீ³ஸு அப்படிக்³க³ஹெத்வாபி பரிபு⁴ஞ்ஜிதுங் வட்டதீதி வத³ந்தி.
Tena āharāpetunti yassa bhikkhuno santikaṃ gataṃ, taṃ idha ānehīti āṇāpetvā tena āharāpetuṃ itarassa vaṭṭatīti attho. Na tato paranti tadaheva sāmaṃ appaṭiggahitaṃ sandhāya vuttaṃ. Tadaheva paṭiggahitaṃ pana punadivasādīsu appaṭiggahetvāpi paribhuñjituṃ vaṭṭatīti vadanti.
கி²ய்யந்தீதி க²யங் க³ச்ச²ந்தி, தேஸங் சுண்ணேஹி து²ல்லச்சயஅப்படிக்³க³ஹணாபத்தியோ ந ஹொந்தீதி அதி⁴ப்பாயோ. ‘‘நவஸமுட்டி²த’’ந்தி ஏதேனேவ உச்சு²ஆதீ³ஸு அபி⁴னவலக்³க³த்தா அப்³போ³ஹாரிகங் ந ஹோதீதி த³ஸ்ஸேதி. ஏஸேவ நயோதி ஸன்னிதி⁴தோ³ஸாதி³ங் ஸந்தா⁴ய வத³தி. தேனாஹ ‘‘ந ஹீ’’திஆதி³. தேன ச படிக்³க³ஹணங்கே³ஸு பஞ்சஸுபி ஸமித்³தே⁴ஸு அஜ்ஜோ²ஹரிதுகாமதாய க³ஹிதமேவ படிக்³க³ஹிதங் நாம ஹோதி அஜ்ஜோ²ஹரிதப்³பே³ஸு ஏவ படிக்³க³ஹணஸ்ஸ அனுஞ்ஞாதத்தாதி த³ஸ்ஸேதி. ததா² பா³ஹிரபரிபோ⁴க³த்தா²ய க³ஹெத்வா ட²பிததேலாதி³ங் அஜ்ஜோ²ஹரிதுகாமதாய ஸதி படிக்³க³ஹெத்வா பரிபு⁴ஞ்ஜிதுங் வட்டதி.
Khiyyantīti khayaṃ gacchanti, tesaṃ cuṇṇehi thullaccayaappaṭiggahaṇāpattiyo na hontīti adhippāyo. ‘‘Navasamuṭṭhita’’nti eteneva ucchuādīsu abhinavalaggattā abbohārikaṃ na hotīti dasseti. Eseva nayoti sannidhidosādiṃ sandhāya vadati. Tenāha ‘‘na hī’’tiādi. Tena ca paṭiggahaṇaṅgesu pañcasupi samiddhesu ajjhoharitukāmatāya gahitameva paṭiggahitaṃ nāma hoti ajjhoharitabbesu eva paṭiggahaṇassa anuññātattāti dasseti. Tathā bāhiraparibhogatthāya gahetvā ṭhapitatelādiṃ ajjhoharitukāmatāya sati paṭiggahetvā paribhuñjituṃ vaṭṭati.
கேஸஞ்சீதிஆதீ³ஸு அனுபஸம்பன்னானங் அத்தா²ய கத்த²சி ட²பியமானம்பி ஹத்த²தோ முத்தமத்தே ஏவ படிக்³க³ஹணங் ந விஜஹதி, அத² கோ² பா⁴ஜனே பதிதமேவ படிக்³க³ஹணங் விஜஹதி. பா⁴ஜனஞ்ச பி⁴க்கு²னா புனதி³வஸத்தா²ய அபெக்கி²தமேவாதி தக்³க³தம்பி ஆமிஸங் து³த்³தோ⁴தபத்தக³தங் விய படிக்³க³ஹணங் ந விஜஹதீதி ஆஸங்காய ‘‘ஸாமணேரஸ்ஸ ஹத்தே² பக்கி²பிதப்³ப³’’ந்தி வுத்தந்தி வேதி³தப்³ப³ங். ஈதி³ஸேஸு ஹி யுத்தி ந க³வேஸிதப்³பா³, வுத்தனயேனேவ படிபஜ்ஜிதப்³ப³ங். ‘‘பத்தக³தா யாகூ³’’தி இமினா பத்தமுக²வட்டியா பு²ட்டே²பி கூடே யாகு³ படிக்³க³ஹிதா, உக்³க³ஹிதா வா ந ஹோதி பி⁴க்கு²னோ அனிச்சா²ய பு²ட்ட²த்தாதி த³ஸ்ஸேதி. ஆரோபேதீதி ஹத்த²ங் பு²ஸாபேதி. படிக்³க³ஹணூபக³ங் பா⁴ரங் நாம மஜ்ஜி²மஸ்ஸ புரிஸஸ்ஸ உக்கே²பாரஹங். ந பித³ஹிதப்³ப³ந்தி ஹத்த²தோ முத்தங் ஸந்தா⁴ய வுத்தங், ஹத்த²க³தங் பன இதரேன ஹத்தே²ன பித³ஹதோ, ஹத்த²தோ முத்தம்பி வா அபு²ஸித்வா உபரிபிதா⁴னங் பாதெந்தஸ்ஸ ந தோ³ஸோ.
Kesañcītiādīsu anupasampannānaṃ atthāya katthaci ṭhapiyamānampi hatthato muttamatte eva paṭiggahaṇaṃ na vijahati, atha kho bhājane patitameva paṭiggahaṇaṃ vijahati. Bhājanañca bhikkhunā punadivasatthāya apekkhitamevāti taggatampi āmisaṃ duddhotapattagataṃ viya paṭiggahaṇaṃ na vijahatīti āsaṅkāya ‘‘sāmaṇerassa hatthe pakkhipitabba’’nti vuttanti veditabbaṃ. Īdisesu hi yutti na gavesitabbā, vuttanayeneva paṭipajjitabbaṃ. ‘‘Pattagatā yāgū’’ti iminā pattamukhavaṭṭiyā phuṭṭhepi kūṭe yāgu paṭiggahitā, uggahitā vā na hoti bhikkhuno anicchāya phuṭṭhattāti dasseti. Āropetīti hatthaṃ phusāpeti. Paṭiggahaṇūpagaṃ bhāraṃ nāma majjhimassa purisassa ukkhepārahaṃ. Na pidahitabbanti hatthato muttaṃ sandhāya vuttaṃ, hatthagataṃ pana itarena hatthena pidahato, hatthato muttampi vā aphusitvā uparipidhānaṃ pātentassa na doso.
படிக்³க³ண்ஹாதீதி சா²யத்தா²ய உபரி தா⁴ரயமானா மஹாஸாகா² யேன கேனசி சி²ஜ்ஜெய்ய, தத்த² லக்³க³ரஜங் முகே² பாதெய்ய சாதி கப்பியங் காராபெத்வா படிக்³க³ண்ஹாதி. குண்ட³கேதி மஹாக⁴டே. தஸ்மிம்பீதி சாடிக⁴டேபி. கா³ஹாபெத்வாதி அப்படிக்³க³ஹிதங் காலிகங் கா³ஹாபெத்வா.
Paṭiggaṇhātīti chāyatthāya upari dhārayamānā mahāsākhā yena kenaci chijjeyya, tattha laggarajaṃ mukhe pāteyya cāti kappiyaṃ kārāpetvā paṭiggaṇhāti. Kuṇḍaketi mahāghaṭe. Tasmimpīti cāṭighaṭepi. Gāhāpetvāti appaṭiggahitaṃ kālikaṃ gāhāpetvā.
து³தியத்தே²ரஸ்ஸாதி ‘‘தே²ரஸ்ஸ பத்தங் மய்ஹங் தே³தா²’’தி தேன அத்தனோ பரிச்சஜாபெத்வா து³தியத்தே²ரஸ்ஸ தே³தி. எத்த² பனாதி பத்தபரிவத்தனே. காரணந்தி எத்த² யதா² ‘‘ஸாமணேரா இதோ அம்ஹாகம்பி தெ³ந்தீ’’தி விதக்கோ உப்பஜ்ஜதி, ந ததா²தி காரணங் வத³ந்தி, தஞ்ச யுத்தங். யஸ்ஸ பன தாதி³ஸோ விதக்கோ நத்தி², தேன அபரிவத்தெத்வாபி பு⁴ஞ்ஜிதுங் வட்டதி.
Dutiyattherassāti ‘‘therassa pattaṃ mayhaṃ dethā’’ti tena attano pariccajāpetvā dutiyattherassa deti. Ettha panāti pattaparivattane. Kāraṇanti ettha yathā ‘‘sāmaṇerā ito amhākampi dentī’’ti vitakko uppajjati, na tathāti kāraṇaṃ vadanti, tañca yuttaṃ. Yassa pana tādiso vitakko natthi, tena aparivattetvāpi bhuñjituṃ vaṭṭati.
நிச்சாலேதுந்தி சாலெத்வா பாஸாணஸக்க²ராதி³அபனயங் காதுங். உத்³த⁴னங் ஆரோபேதப்³ப³ந்தி அனக்³கி³கங் உத்³த⁴னங் ஸந்தா⁴ய வுத்தங். உத்³த⁴னே பச்சமானஸ்ஸ ஆலுளனே உபரி அபக்கதண்டு³லா ஹெட்டா² பவிஸித்வா பச்சதீதி ஆஹ ‘‘ஸாமங்பாகஞ்சேவ ஹோதீ’’தி.
Niccāletunti cāletvā pāsāṇasakkharādiapanayaṃ kātuṃ. Uddhanaṃ āropetabbanti anaggikaṃ uddhanaṃ sandhāya vuttaṃ. Uddhane paccamānassa āluḷane upari apakkataṇḍulā heṭṭhā pavisitvā paccatīti āha ‘‘sāmaṃpākañceva hotī’’ti.
ஆதா⁴ரகே பத்தோ ட²பிதோதி அப்படிக்³க³ஹிதாமிஸோ பத்தோ புன படிக்³க³ஹணத்தா²ய ட²பிதோ. ஏகக்³க³ஹணேனேவாதி ஸாமணேரானங் க³ஹிதஸ்ஸ புன அச்ச²ட்³ட³னவஸேன க³ஹணேன. பு⁴ஞ்ஜிதுங் வட்டதீதி தூ⁴மவட்டியா தத³ஹுபடிக்³க³ஹிதத்தா வுத்தங். ப⁴த்துக்³கா³ரோதிஆதி³ அப்³போ³ஹாரிகப்பஸங்கே³ன விகாலபோ⁴ஜனவினிச்ச²யத³ஸ்ஸனங். ஸமுத்³தோ³த³கேனாதி அப்படிக்³க³ஹிதேன. ஹிமகரகா நாம கதா³சி வஸ்ஸோத³கேன ஸஹ பதனகா பாஸாணலேகா² விய க⁴னீபூ⁴தஉத³கவிஸேஸா, தேஸு படிக்³க³ஹணகிச்சங் நத்தி². தேனாஹ ‘‘உத³கக³திகா ஏவா’’தி. புரேப⁴த்தமேவ வட்டதீதி அப்படிக்³க³ஹிதாபத்தீஹி அப்³போ³ஹாரிகம்பி விகாலபோ⁴ஜனாபத்தீஹி ஸப்³போ³ஹாரிகந்தி த³ஸ்ஸேதி.
Ādhārake patto ṭhapitoti appaṭiggahitāmiso patto puna paṭiggahaṇatthāya ṭhapito. Ekaggahaṇenevāti sāmaṇerānaṃ gahitassa puna acchaḍḍanavasena gahaṇena. Bhuñjituṃ vaṭṭatīti dhūmavaṭṭiyā tadahupaṭiggahitattā vuttaṃ. Bhattuggārotiādi abbohārikappasaṅgena vikālabhojanavinicchayadassanaṃ. Samuddodakenāti appaṭiggahitena. Himakarakā nāma kadāci vassodakena saha patanakā pāsāṇalekhā viya ghanībhūtaudakavisesā, tesu paṭiggahaṇakiccaṃ natthi. Tenāha ‘‘udakagatikā evā’’ti. Purebhattameva vaṭṭatīti appaṭiggahitāpattīhi abbohārikampi vikālabhojanāpattīhi sabbohārikanti dasseti.
லக்³க³தீதி முகே² ச ஹத்தே² ச மத்திகாவண்ணங் த³ஸ்ஸேதி. ப³ஹலந்தி ஹத்த²முகே²ஸு அலக்³க³னகம்பி படிக்³க³ஹேதப்³ப³ங். வாஸமத்தந்தி ரேணுகீ²ராபா⁴வங் த³ஸ்ஸேதி. ஆகிரதி படிக்³க³ஹேதப்³ப³ந்தி புப்ப²ரஸஸ்ஸ பஞ்ஞாயனதோ வுத்தங்.
Laggatīti mukhe ca hatthe ca mattikāvaṇṇaṃ dasseti. Bahalanti hatthamukhesu alagganakampi paṭiggahetabbaṃ. Vāsamattanti reṇukhīrābhāvaṃ dasseti. Ākirati paṭiggahetabbanti puppharasassa paññāyanato vuttaṃ.
மஹாபூ⁴தேஸூதி பாணஸரீரஸன்னிஸ்ஸிதேஸு பத²வீஆதி³மஹாபூ⁴தேஸு. ஸப்³ப³ங் வட்டதீதி அத்தனோ, பரேஸஞ்ச ஸரீரனிஸ்ஸிதங் ஸப்³ப³ங் வட்டதி. அகப்பியமங்ஸானுலோமதாய து²ல்லச்சயாதி³ங் ந ஜனேதீதி அதி⁴ப்பாயோ. பததீதி அத்தனோ ஸரீரதோ விச்சி²ந்தி³த்வா பததி. ‘‘ருக்க²தோ சி²ந்தி³த்வா’’தி வுத்தத்தா மத்திகத்தா²ய பத²விங் க²ணிதுங், அஞ்ஞம்பி யங்கிஞ்சி மூலபண்ணாதி³விஸபே⁴ஸஜ்ஜங் சி²ந்தி³த்வா சா²ரிகங் அகத்வாபி அப்படிக்³க³ஹிதம்பி பரிபு⁴ஞ்ஜிதுங் வட்டதீதி த³ட்ட²ப்³ப³ங். அப்படிக்³க³ஹிததா, அனநுஞ்ஞாததா, தூ⁴மாதி³அப்³போ³ஹாரிகதாபா⁴வோ, அஜ்ஜோ²ஹரணந்தி இமானெத்த² சத்தாரி அங்கா³னி.
Mahābhūtesūti pāṇasarīrasannissitesu pathavīādimahābhūtesu. Sabbaṃ vaṭṭatīti attano, paresañca sarīranissitaṃ sabbaṃ vaṭṭati. Akappiyamaṃsānulomatāya thullaccayādiṃ na janetīti adhippāyo. Patatīti attano sarīrato vicchinditvā patati. ‘‘Rukkhato chinditvā’’ti vuttattā mattikatthāya pathaviṃ khaṇituṃ, aññampi yaṃkiñci mūlapaṇṇādivisabhesajjaṃ chinditvā chārikaṃ akatvāpi appaṭiggahitampi paribhuñjituṃ vaṭṭatīti daṭṭhabbaṃ. Appaṭiggahitatā, ananuññātatā, dhūmādiabbohārikatābhāvo, ajjhoharaṇanti imānettha cattāri aṅgāni.
த³ந்தபோனஸிக்கா²பத³வண்ணனா நிட்டி²தா.
Dantaponasikkhāpadavaṇṇanā niṭṭhitā.
நிட்டி²தோ போ⁴ஜனவக்³கோ³ சதுத்தோ².
Niṭṭhito bhojanavaggo catuttho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 10. த³ந்தபோனஸிக்கா²பத³வண்ணனா • 10. Dantaponasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 10. த³ந்தபோனஸிக்கா²பத³வண்ணனா • 10. Dantaponasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. த³ந்தபோனஸிக்கா²பத³வண்ணனா • 10. Dantaponasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 10. த³ந்தபோனஸிக்கா²பத³ங் • 10. Dantaponasikkhāpadaṃ
