| Library / Tipiṭaka / д̇ибидага • Tipiṭaka / ган̇каавид̇аран̣ий-абхинава-дийгаа • Kaṅkhāvitaraṇī-abhinava-ṭīkā |
10. д̣̇анд̇абонасигкаабад̣̇аван̣н̣анаа
10. Dantaponasikkhāpadavaṇṇanā
гааязнаад̇и хад̇т̇аад̣̇ийсу язна гзнажи сарийрааваяавзна, анд̇амасо баад̣̇ан̇г̇улияааби г̇ан̣ханд̇о гааязна г̇ан̣хаад̇и наамаад̇и взд̣̇ид̇аб̣б̣о. д̣̇аанзби зсзва наяо. гааяаббадиб̣ад̣̇д̇хзнаад̇и бад̇д̇аад̣̇ийсу язна гзнажи сарийрасамб̣ад̣̇д̇хзна убагаран̣зна. д̣̇аанзби зсзва наяо. гадажчуаад̣̇ийсу язна гзнажи убагаран̣зна д̣̇иннам̣ гааяаббадиб̣ад̣̇д̇хзна д̣̇иннам̣язва ход̇и. ан̃н̃ад̇арзнаад̇и гааязна ваа гааяаббадиб̣ад̣̇д̇хзна ваа ниссаг̇г̇иязна ваад̇и ад̇т̇о. д̇ад̇т̇а ниссаг̇г̇иязнаад̇и (баажи. адта. 265) гааяад̇о жа гааяаббадиб̣ад̣̇д̇хад̇о жа можзд̇ваа хад̇т̇абаасз тид̇асса гааяз ваа гааяаббадиб̣ад̣̇д̇хз ваа баад̇ияамаанан̃хи ниссаг̇г̇иязна баяог̇зна д̣̇иннам̣ наама ход̇и. д̇ассаад̇и бадиг̇г̇ахид̇агасса. вуд̇д̇авибаллаасавасзнаад̇и вуд̇д̇асса бадибагкавасзна. ид̣̇ам̣ вуд̇д̇ам̣ ход̇и – яам̣ гааяагааяаббадиб̣ад̣̇д̇ханиссаг̇г̇ияаанам̣ ан̃н̃ад̇арзна д̣̇ияяамаанз гааязна ваа гааяаббадиб̣ад̣̇д̇хзна ваа г̇ан̣хаад̇и, зд̇ам̣ бадиг̇г̇ахид̇ам̣ наамаад̇и.
Kāyenāti hatthādīsu yena kenaci sarīrāvayavena, antamaso pādaṅguliyāpi gaṇhanto kāyena gaṇhāti nāmāti veditabbo. Dānepi eseva nayo. Kāyappaṭibaddhenāti pattādīsu yena kenaci sarīrasambaddhena upakaraṇena. Dānepi eseva nayo. Kaṭacchuādīsu yena kenaci upakaraṇena dinnaṃ kāyappaṭibaddhena dinnaṃyeva hoti. Aññatarenāti kāyena vā kāyappaṭibaddhena vā nissaggiyena vāti attho. Tattha nissaggiyenāti (pāci. aṭṭha. 265) kāyato ca kāyappaṭibaddhato ca mocetvā hatthapāse ṭhitassa kāye vā kāyappaṭibaddhe vā pātiyamānañhi nissaggiyena payogena dinnaṃ nāma hoti. Tassāti paṭiggahitakassa. Vuttavipallāsavasenāti vuttassa paṭipakkhavasena. Idaṃ vuttaṃ hoti – yaṃ kāyakāyappaṭibaddhanissaggiyānaṃ aññatarena diyyamāne kāyena vā kāyappaṭibaddhena vā gaṇhāti, etaṃ paṭiggahitaṃ nāmāti.
сам̣хааримзнаад̇и т̇аамамаж̇жхимзна бурисзна сам̣хааримзна, иминаа асам̣хааримз палагз ваа баасаан̣з ваа бадиг̇г̇ахан̣ам̣ на рухад̇ийд̇и д̣̇ассзд̇и. д̇хаарзд̇ум̣ самад̇т̇знаад̇и санд̇хаарзд̇ум̣ яог̇г̇зна, иминаа сукумзсу д̇инд̇ин̣игаад̣̇ибан̣н̣зсу бадиг̇г̇ахан̣ам̣ на рухад̇ийд̇и д̣̇ассзд̇и. ад̇ад̇т̇аж̇аад̇агаругкабан̣н̣знаад̇и ж̇аад̇адтаанад̇о жуд̇зна бад̣̇уминибан̣н̣аад̣̇инаа, иминаа бана маханд̇зби д̇ад̇т̇аж̇аад̇агз бад̣̇уминибан̣н̣з ваа гим̣сугабан̣н̣аад̣̇имхи ваа бадиг̇г̇ахзд̇ум̣ на ваддад̇и. на хи д̇ам̣ гааяаббадиб̣ад̣̇д̇хасан̇кам̣ г̇ажчад̇ийд̇и д̣̇ассзд̇и. яат̇аа жа д̇ад̇т̇аж̇аад̇агз, звам̣ каан̣угз б̣анд̇хид̇ваа табид̇аман̃жаад̣̇имхиби. нану бадиб̣ад̣̇д̇хаббадиб̣ад̣̇д̇хзнааби бад̇д̇аад̇хаараад̣̇инаа бадиг̇г̇ан̣ханд̇асса бадиг̇г̇ахан̣ам̣ рухад̇и, ат̇а гасмаа гааяагааяаббадиб̣ад̣̇д̇хзхиязва бадиг̇г̇ахан̣ам̣ ид̇ха вуд̇д̇ам̣, на бадиб̣ад̣̇д̇хаббадиб̣ад̣̇д̇хзнаабийд̇и ааха ‘‘бадиб̣ад̣̇д̇хаббадиб̣ад̣̇д̇хам̣ наама ид̇ха над̇т̇ий’’д̇и. гзжи бана ‘‘аад̇хаарагзна бадиг̇г̇ахан̣ам̣ гааяаббадиб̣ад̣̇д̇хаббадиб̣ад̣̇д̇хзна бадиг̇г̇ахан̣ам̣ наама ход̇и, д̇асмаа на ваддад̇ий’’д̇и вад̣̇анд̇и, д̇ам̣ важанамад̇д̇амзва. ад̇т̇ад̇о бана саб̣б̣амби д̇ам̣ гааяаббадиб̣ад̣̇д̇хамзва ход̇ийд̇и д̣̇ассзд̇и.
Saṃhārimenāti thāmamajjhimena purisena saṃhārimena, iminā asaṃhārime phalake vā pāsāṇe vā paṭiggahaṇaṃ na ruhatīti dasseti. Dhāretuṃ samatthenāti sandhāretuṃ yoggena, iminā sukhumesu tintiṇikādipaṇṇesu paṭiggahaṇaṃ na ruhatīti dasseti. Atatthajātakarukkhapaṇṇenāti jātaṭṭhānato cutena paduminipaṇṇādinā, iminā pana mahantepi tatthajātake paduminipaṇṇe vā kiṃsukapaṇṇādimhi vā paṭiggahetuṃ na vaṭṭati. Na hi taṃ kāyappaṭibaddhasaṅkhaṃ gacchatīti dasseti. Yathā ca tatthajātake, evaṃ khāṇuke bandhitvā ṭhapitamañcādimhipi. Nanu paṭibaddhappaṭibaddhenāpi pattādhārādinā paṭiggaṇhantassa paṭiggahaṇaṃ ruhati, atha kasmā kāyakāyappaṭibaddhehiyeva paṭiggahaṇaṃ idha vuttaṃ, na paṭibaddhappaṭibaddhenāpīti āha ‘‘paṭibaddhappaṭibaddhaṃ nāma idha natthī’’ti. Keci pana ‘‘ādhārakena paṭiggahaṇaṃ kāyappaṭibaddhappaṭibaddhena paṭiggahaṇaṃ nāma hoti, tasmā na vaṭṭatī’’ti vadanti, taṃ vacanamattameva. Atthato pana sabbampi taṃ kāyappaṭibaddhameva hotīti dasseti.
агаллагод̇и г̇илаано. мукзна бадиг̇г̇ан̣хаад̇ийд̇и сахад̇т̇зна г̇ахзд̇ваа барибхун̃ж̇ид̇ум̣ асаггонд̇о мукзна бадиг̇г̇ан̣хаад̇и. абхихадабхааж̇анад̇о бад̇ид̇араж̇амби ваддад̇и абхихадад̇д̇аад̇и ад̇хиббаахо.
Akallakoti gilāno. Mukhena paṭiggaṇhātīti sahatthena gahetvā paribhuñjituṃ asakkonto mukhena paṭiggaṇhāti. Abhihaṭabhājanato patitarajampi vaṭṭati abhihaṭattāti adhippāho.
д̇асмим̣ тад̇ваад̇и д̇аад̣̇исз хад̇т̇абаасз тад̇ваа. яанд̇и яам̣ бхаарам̣. маж̇жхимо бурисод̇и т̇аамамаж̇жхимабурисо. винаяз бан̃н̃ад̇д̇ам̣ д̣̇уггадам̣ винаяад̣̇уггадам̣. д̇ам̣ анубасамбаннасса д̣̇ад̇ваад̇и бин̣д̣ааяа жарид̇ваа вихаарам̣ ваа аасанасаалам̣ ваа г̇анд̇ваа д̇ам̣ бхигкам̣ анубасамбаннасса д̣̇ад̇ваа, ид̣̇ан̃жа буб̣б̣аабхог̇асса ануруубавасзна вуд̇д̇ам̣. яасмаа бана д̇ам̣ ‘‘анубасамбаннасса д̣̇ассаамий’’д̇и жид̇д̇уббаад̣̇амад̇д̇зна д̇ам̣санд̇агам̣ наама на ход̇и, д̇асмаа винааби д̇асса д̣̇аанаад̣̇им̣ бадиг̇г̇ахзд̇ваа барибхун̃ж̇ид̇ум̣ ваддад̇и.
Tasmiṃ ṭhatvāti tādise hatthapāse ṭhatvā. Yanti yaṃ bhāraṃ. Majjhimo purisoti thāmamajjhimapuriso. Vinaye paññattaṃ dukkaṭaṃ vinayadukkaṭaṃ. Taṃ anupasampannassa datvāti piṇḍāya caritvā vihāraṃ vā āsanasālaṃ vā gantvā taṃ bhikkhaṃ anupasampannassa datvā, idañca pubbābhogassa anurūpavasena vuttaṃ. Yasmā pana taṃ ‘‘anupasampannassa dassāmī’’ti cittuppādamattena taṃsantakaṃ nāma na hoti, tasmā vināpi tassa dānādiṃ paṭiggahetvā paribhuñjituṃ vaṭṭati.
ассукзл̣асин̇гхаан̣игаад̣̇ийсууд̇и зд̇т̇а ассу наама агкиж̇алам̣. кзл̣о наама лаалаа. син̇гхаан̣игаад̇и анд̇осийсад̇о бууд̇исзмхабхаавам̣ аабаннам̣ мад̇т̇алун̇г̇ам̣ г̇алид̇ваа д̇аалумад̇т̇агавиварзна од̇арид̇ваа наасаабудз буурзд̇ваа тид̇ам̣ вужжад̇и, аад̣̇исад̣̇д̣̇зна муд̇д̇агарийсасзмхад̣̇анд̇амалаагкиг̇уут̇аган̣н̣аг̇уут̇агаанам̣, сарийрз удтид̇алон̣асса жа г̇ахан̣ам̣. таанад̇од̇и агкигуубаад̣̇ид̇о. анд̇араа жз г̇ан̣хаад̇и, гим̣ ход̇ийд̇и ааха ‘‘уг̇г̇ахид̇агам̣ наама ход̇ий’’д̇и, д̣̇удту г̇ахид̇агам̣ наама ход̇ийд̇и ад̇т̇о. палининд̇и палаванд̇ам̣. д̇ад̇т̇аж̇аад̇агапалинисаакааяа ваад̇и д̇асмим̣ ругкз ж̇аад̇ааяа палинисаакааяа ваа. д̣̇урубажин̣н̣ад̣̇уггаданд̇и ‘‘на гад̇д̇аб̣б̣а’’нд̇и ваарид̇асса гад̇ад̇д̇аа д̣̇удту аажин̣н̣ам̣ жарид̇анд̇и д̣̇урубажин̣н̣ам̣, д̇асмим̣ д̣̇уггадам̣ д̣̇урубажин̣н̣ад̣̇уггадан̃жа аабаж̇ж̇ад̇ийд̇и ад̇т̇о.
Assukheḷasiṅghāṇikādīsūti ettha assu nāma akkhijalaṃ. Kheḷo nāma lālā. Siṅghāṇikāti antosīsato pūtisemhabhāvaṃ āpannaṃ matthaluṅgaṃ galitvā tālumatthakavivarena otaritvā nāsāpuṭe pūretvā ṭhitaṃ vuccati, ādisaddena muttakarīsasemhadantamalaakkhigūthakaṇṇagūthakānaṃ, sarīre uṭṭhitaloṇassa ca gahaṇaṃ. Ṭhānatoti akkhikūpādito. Antarā ce gaṇhāti, kiṃ hotīti āha ‘‘uggahitakaṃ nāma hotī’’ti, duṭṭhu gahitakaṃ nāma hotīti attho. Phalininti phalavantaṃ. Tatthajātakaphalinisākhāya vāti tasmiṃ rukkhe jātāya phalinisākhāya vā. Durupaciṇṇadukkaṭanti ‘‘na kattabba’’nti vāritassa katattā duṭṭhu āciṇṇaṃ caritanti durupaciṇṇaṃ, tasmiṃ dukkaṭaṃ durupaciṇṇadukkaṭañca āpajjatīti attho.
аахарийяад̇ийд̇и аахааро, аж̇жхохарид̇аб̣б̣ам̣ яам̣ гин̃жи, ид̇ха бана жад̇д̇аари гаалигаани ад̇хиббзд̇аанийд̇и ааха ‘‘яам̣ гин̃жий’’д̇иаад̣̇и. д̇ад̇т̇а арун̣уг̇г̇аманад̇о яаава тид̇амаж̇жханхигаа бхун̃ж̇ид̇аб̣б̣ад̇о яаава гаало ассаад̇и яаавагаалигам̣. арун̣уг̇г̇аманад̇о яаава яаамаавасаанаа бибаасааяа сад̇и бибаасажчзд̣̇анад̇т̇ам̣ баад̇аб̣б̣ад̇о яаамо гаало ассаад̇и яаамагаалигам̣. яаава сад̇д̇аахам̣ нид̣̇ахид̇ваа барибхун̃ж̇ид̇аб̣б̣ад̇о сад̇д̇аахам̣ гаало ассаад̇и сад̇д̇аахагаалигам̣. яааваж̇ийвамби барихарид̇ваа барибхун̃ж̇ид̇аб̣б̣ад̇о яаава ж̇ийвам̣ зд̇ассаад̇и яааваж̇ийвигам̣. д̇знааха ‘‘д̇ад̇т̇аа’’д̇иаад̣̇и.
Āharīyatīti āhāro, ajjhoharitabbaṃ yaṃ kiñci, idha pana cattāri kālikāni adhippetānīti āha ‘‘yaṃ kiñcī’’tiādi. Tattha aruṇuggamanato yāva ṭhitamajjhanhikā bhuñjitabbato yāva kālo assāti yāvakālikaṃ. Aruṇuggamanato yāva yāmāvasānā pipāsāya sati pipāsacchedanatthaṃ pātabbato yāmo kālo assāti yāmakālikaṃ. Yāva sattāhaṃ nidahitvā paribhuñjitabbato sattāhaṃ kālo assāti sattāhakālikaṃ. Yāvajīvampi pariharitvā paribhuñjitabbato yāva jīvaṃ etassāti yāvajīvikaṃ. Tenāha ‘‘tatthā’’tiādi.
ванамуулабад̇д̇абубпапалаад̣̇ийд̇и зд̇т̇а д̇аава муулам̣ наама муулагакаарагажажжуд̇амб̣агаад̣̇ийнам̣ д̇зсу д̇зсу ж̇анабад̣̇зсу багад̇иаахааравасзна мануссаанам̣ каад̣̇анийяад̇т̇ан̃жзва бхож̇анийяад̇т̇ан̃жа паран̣агам̣ суубзяяабан̣н̣амуулам̣. бад̇д̇ам̣ наама муулагакаарагажажжуд̇амб̣агаад̣̇ийнам̣ д̇аад̣̇исам̣язва бад̇д̇ам̣. бубпам̣ наама муулагакаарагаад̣̇ийнам̣ д̇аад̣̇исам̣язва бубпам̣. палам̣ наама банасалаб̣уж̇аад̣̇ийнам̣ д̇зсу д̇зсу ж̇анабад̣̇зсу багад̇иаахааравасзна мануссаанам̣ каад̣̇анийяад̇т̇ан̃жзва бхож̇анийяад̇т̇ан̃жа паран̣агам̣ палам̣. аад̣̇исад̣̇д̣̇зна ганд̣̇амуулаад̣̇ийнам̣ г̇ахан̣ам̣.
Vanamūlapattapupphaphalādīti ettha tāva mūlaṃ nāma mūlakakhārakacaccutambakādīnaṃ tesu tesu janapadesu pakatiāhāravasena manussānaṃ khādanīyatthañceva bhojanīyatthañca pharaṇakaṃ sūpeyyapaṇṇamūlaṃ. Pattaṃ nāma mūlakakhārakacaccutambakādīnaṃ tādisaṃyeva pattaṃ. Pupphaṃ nāma mūlakakhārakādīnaṃ tādisaṃyeva pupphaṃ. Phalaṃ nāma panasalabujādīnaṃ tesu tesu janapadesu pakatiāhāravasena manussānaṃ khādanīyatthañceva bhojanīyatthañca pharaṇakaṃ phalaṃ. Ādisaddena kandamūlādīnaṃ gahaṇaṃ.
амб̣абаананд̇и (махаава. адта. 300) аамзхи ваа баггзхи ваа амб̣зхи гад̇абаанам̣. д̇ад̇т̇а аамзхи гаронд̇зна амб̣ад̇арун̣аад̣̇ийни бхинд̣̇ид̇ваа уд̣̇агз багкибид̇ваа аад̇абз аад̣̇ижжабаагзна бажид̇ваа бариссаавзд̇ваа д̇ад̣̇ахубадиг̇г̇ахид̇зхи мад̇хусаггарагаббуураад̣̇ийхи яож̇зд̇ваа гаад̇аб̣б̣ам̣. звам̣ гад̇ам̣ бурзбхад̇д̇амзва габбад̇и. анубасамбаннзна гад̇ам̣ лабхид̇ваа бана бурзбхад̇д̇ам̣ бадиг̇г̇ахид̇ам̣ бурзбхад̇д̇ам̣ саамисабарибхог̇знааби ваддад̇и, бажчаабхад̇д̇ам̣ нираамисабарибхог̇зна яаава арун̣уг̇г̇аманаа ваддад̇и. зса наяо саб̣б̣абаанзсу.
Ambapānanti (mahāva. aṭṭha. 300) āmehi vā pakkehi vā ambehi katapānaṃ. Tattha āmehi karontena ambataruṇādīni bhinditvā udake pakkhipitvā ātape ādiccapākena pacitvā parissāvetvā tadahupaṭiggahitehi madhusakkarakappūrādīhi yojetvā kātabbaṃ. Evaṃ kataṃ purebhattameva kappati. Anupasampannena kataṃ labhitvā pana purebhattaṃ paṭiggahitaṃ purebhattaṃ sāmisaparibhogenāpi vaṭṭati, pacchābhattaṃ nirāmisaparibhogena yāva aruṇuggamanā vaṭṭati. Esa nayo sabbapānesu.
д̇зсу бана ж̇амб̣убаананд̇и ж̇амб̣упалзхи гад̇абаанам̣. жожабаананд̇и адтигзхи гад̣̇алипалзхи гад̇абаанам̣. можабаананд̇и анадтигзхи гад̣̇алипалзхи гад̇абаанам̣. мад̇хугабаананд̇и мад̇хугаанам̣ ж̇аад̇ирасзна гад̇абаанам̣. д̇ам̣ бана уд̣̇агасамбхиннам̣ ваддад̇и, суд̣̇д̇хам̣ на ваддад̇и. муд̣̇д̣̇игаабаананд̇и муд̣̇д̣̇игаа уд̣̇агз мад̣̇д̣̇ид̇ваа амб̣абаанам̣ вияа гад̇абаанам̣ . саалуугабаананд̇и рад̇д̇уббаланийлуббалаад̣̇ийнам̣ саалуугз мад̣̇д̣̇ид̇ваа гад̇абаанам̣. паарусагабаананд̇и паарусагзхи амб̣абаанам̣ вияа гад̇абаанам̣. иминаава наязна взд̇д̇абаанаад̣̇ийни взд̣̇ид̇аб̣б̣аани. зд̇аани жа бана саб̣б̣аани баанаани аг̇г̇ибаагаани на вадданд̇и. д̇знааха ‘‘сийд̇од̣̇агзнаа’’д̇иаад̣̇и. авасзсзсуби анун̃н̃аад̇апалабад̇д̇абубпарасзсууд̇и д̇хан̃н̃апалабаггасаагамад̇хугабубпарасад̇о авасзсзсу ‘‘ануж̇аанаами, бхигкавз, саб̣б̣ам̣ паларасам̣ табзд̇ваа д̇хан̃н̃апалараса’’нд̇иаад̣̇инаа (махаава. 300) анун̃н̃аад̇агзсу палабад̇д̇абубпарасзсуби.
Tesu pana jambupānanti jambuphalehi katapānaṃ. Cocapānanti aṭṭhikehi kadaliphalehi katapānaṃ. Mocapānanti anaṭṭhikehi kadaliphalehi katapānaṃ. Madhukapānanti madhukānaṃ jātirasena katapānaṃ. Taṃ pana udakasambhinnaṃ vaṭṭati, suddhaṃ na vaṭṭati. Muddikāpānanti muddikā udake madditvā ambapānaṃ viya katapānaṃ . Sālūkapānanti rattuppalanīluppalādīnaṃ sālūke madditvā katapānaṃ. Phārusakapānanti phārusakehi ambapānaṃ viya katapānaṃ. Imināva nayena vettapānādīni veditabbāni. Etāni ca pana sabbāni pānāni aggipākāni na vaṭṭanti. Tenāha ‘‘sītodakenā’’tiādi. Avasesesupianuññātaphalapattapuppharasesūti dhaññaphalapakkasākamadhukapuppharasato avasesesu ‘‘anujānāmi, bhikkhave, sabbaṃ phalarasaṃ ṭhapetvā dhaññaphalarasa’’ntiādinā (mahāva. 300) anuññātakesu phalapattapuppharasesupi.
каад̣̇анийяад̇т̇анд̇и каад̣̇анийязна гад̇д̇аб̣б̣агижжам̣. нзва парад̇ийд̇и на нибпаад̣̇зд̇и. анаахаарзби уд̣̇агз аахаарасан̃н̃ааяаад̇и ‘‘аахаарам̣ аахарзяяаа’’д̇и бад̣̇асса бад̣̇абхааж̇анз (баажи. 265) вуд̇д̇амад̇т̇ам̣ саммаа асаллагкзд̇ваа ‘‘аахарийяад̇ийд̇и аахааро’’д̇и анаахаарзби уд̣̇агз аахаарасан̃н̃ааяа гуггужжааяанд̇аанам̣. д̣̇анд̇абонз жа ‘‘мукад̣̇ваарам̣ аахадам̣ ид̣̇а’’нд̇и сан̃н̃ааяаад̇и мукад̣̇ваарам̣ анаахадамби д̣̇анд̇абонам̣ ‘‘мукад̣̇ваарам̣ аахадам̣ ид̣̇ам̣ д̣̇анд̇абона’’нд̇и вибаллад̇т̇асан̃н̃ааяа гуггужжааяанд̇аанам̣. яат̇аасукам̣ баад̇унд̇и бадиг̇г̇ахзд̇ваа ваа аббадиг̇г̇ахзд̇ваа ваа яат̇аагаамам̣ баад̇ум̣. д̣̇анд̇абонабарибхог̇знаад̇и д̣̇анд̇агадтабарибхог̇зна, д̣̇анд̇ад̇хованаад̣̇инаад̇и ад̇т̇о, иминаа д̇асса бана расам̣ г̇илид̇ум̣ на ваддад̇ийд̇и д̣̇ассзд̇и.
Khādanīyatthanti khādanīyena kattabbakiccaṃ. Neva pharatīti na nipphādeti. Anāhārepi udake āhārasaññāyāti ‘‘āhāraṃ āhareyyā’’ti padassa padabhājane (pāci. 265) vuttamatthaṃ sammā asallakkhetvā ‘‘āharīyatīti āhāro’’ti anāhārepi udake āhārasaññāya kukkuccāyantānaṃ. Dantapone ca ‘‘mukhadvāraṃ āhaṭaṃ ida’’nti saññāyāti mukhadvāraṃ anāhaṭampi dantaponaṃ ‘‘mukhadvāraṃ āhaṭaṃ idaṃ dantapona’’nti vipallatthasaññāya kukkuccāyantānaṃ. Yathāsukhaṃ pātunti paṭiggahetvā vā appaṭiggahetvā vā yathākāmaṃ pātuṃ. Dantaponaparibhogenāti dantakaṭṭhaparibhogena, dantadhovanādināti attho, iminā tassa pana rasaṃ gilituṃ na vaṭṭatīti dasseti.
жад̇д̇аари махаавигадаанийд̇и г̇уут̇ам̣, муд̇д̇ам̣, чааригаа, мад̇д̇игаа (махаава. 268) жа ‘‘аасаяаад̣̇ивасзна вируубаани ж̇аад̇ааний’’д̇и гад̇ваа вигадаанийд̇и ваа абагад̇ибхож̇анад̇д̇аа вигадаани ‘‘вируубаани ж̇аад̇ааний’’д̇и ваа ад̇т̇о. сад̇и бажжаязд̇и гааран̣з сад̇и, саббад̣̇адтзд̇и ад̇т̇о. д̇хуумаад̣̇иаб̣б̣охааригаабхаавод̇и д̇хуумабубпаг̇анд̇хад̣̇анд̇акаяаад̣̇иаб̣б̣охааригаабхааво.
Cattāri mahāvikaṭānīti gūthaṃ, muttaṃ, chārikā, mattikā (mahāva. 268) ca ‘‘āsayādivasena virūpāni jātānī’’ti katvā vikaṭānīti vā apakatibhojanattā vikaṭāni ‘‘virūpāni jātānī’’ti vā attho. Sati paccayeti kāraṇe sati, sappadaṭṭheti attho. Dhūmādiabbohārikābhāvoti dhūmapupphagandhadantakhayādiabbohārikābhāvo.
д̣̇анд̇абонасигкаабад̣̇аван̣н̣анаа нидтид̇аа.
Dantaponasikkhāpadavaṇṇanā niṭṭhitā.
бхож̇анаваг̇г̇о жад̇уд̇т̇о.
Bhojanavaggo catuttho.
