| Library / Tipiṭaka / ཏིཔིཊཀ • Tipiṭaka / ཝིམཏིཝིནོདནཱི-ཊཱིཀཱ • Vimativinodanī-ṭīkā |
༡༠. དནྟཔོནསིཀྑཱཔདཝཎྞནཱ
10. Dantaponasikkhāpadavaṇṇanā
༢༦༣. དསམེ གྷནབདྡྷོཏི གྷནམཾསེན སམྦདྡྷོ, ཀཐིནསཾཧཏསརཱིརོཏི ཨཏྠོ།
263. Dasame ghanabaddhoti ghanamaṃsena sambaddho, kathinasaṃhatasarīroti attho.
༢༦༤. མུཁདྭཱརནྟི མུཁཏོ ཧེཊྛཱ དྭཱརཾ མུཁདྭཱརཾ, གལནཱལི༹ཀནྟི ཨཏྠོ། ཨེཝཉྩ ནཱསིཀཱཡ པཝིཊྛམྤི མུཁདྭཱརཾ པཝིཊྛམེཝ ཧོཏི, མུཁེ པཀྑིཏྟམཏྟཉྩ ཨཔྤཝིཊྛཾ། ཨཱཧཱརནྟི ཨཛ྄ཛྷོཧརིཏབྦཾ ཀཱལིཀཾ ཨདྷིཔྤེཏཾ, ན ཨུདཀཾ། ཏཉྷི བྷེསཛྫསངྒཧིཏམྤི ཨཀཱལིཀམེཝ པཊིགྒཧིཏསྶེཝ ཀཱལིཀཏྟཱ། ཨུདཀེ ཧི པཊིགྒཧཎཾ ན རུཧཏི། ཏེནེཝ བྷིཀྑུནཱ ཏཱཔིཏེན ཨུདཀེན ཙིརཔཊིགྒཧིཏེན ཙ ཨཀཔྤིཡཀུཊིཡཾ ཝུཏྠེན ཙ སཧ ཨཱམིསཾ བྷུཉྫནྟསྶཱཔི སཱམཔཱཀཱདིདོསོ ན ཧོཏི། ཝཀྑཏི ཧི ‘‘བྷིཀྑུ ཡཱགུཨཏྠཱཡ…པེ॰… ཨུདཀཾ ཏཱཔེཏི, ཝཊྚཏཱི’’ཏིཨཱདི (པཱཙི॰ ཨཊྛ॰ ༢༦༥)། བྷིཀྑཱུ པན ཨེཏཾ ཨདྷིཔྤཱཡཾ ཏདཱ ན ཛཱནིཾསུ། ཏེནཱཧ ‘‘སམྨཱ ཨཏྠཾ ཨསལླཀྑེཏྭཱ’’ཏིཨཱདི།
264.Mukhadvāranti mukhato heṭṭhā dvāraṃ mukhadvāraṃ, galanāḷikanti attho. Evañca nāsikāya paviṭṭhampi mukhadvāraṃ paviṭṭhameva hoti, mukhe pakkhittamattañca appaviṭṭhaṃ. Āhāranti ajjhoharitabbaṃ kālikaṃ adhippetaṃ, na udakaṃ. Tañhi bhesajjasaṅgahitampi akālikameva paṭiggahitasseva kālikattā. Udake hi paṭiggahaṇaṃ na ruhati. Teneva bhikkhunā tāpitena udakena cirapaṭiggahitena ca akappiyakuṭiyaṃ vutthena ca saha āmisaṃ bhuñjantassāpi sāmapākādidoso na hoti. Vakkhati hi ‘‘bhikkhu yāguatthāya…pe… udakaṃ tāpeti, vaṭṭatī’’tiādi (pāci. aṭṭha. 265). Bhikkhū pana etaṃ adhippāyaṃ tadā na jāniṃsu. Tenāha ‘‘sammā atthaṃ asallakkhetvā’’tiādi.
༢༦༥. རཐརེཎུམྤཱིཏི རཐེ གཙྪནྟེ ཨུཊྛཧནརེཎུསདིསརེཎུཾ། ཏེན ཏཏོ སུཁུམཾ ཨཱཀཱསེ པརིབྦྷམནཀཾ དིསྶམཱནམྤི ཨབྦོཧཱརིཀནྟི དསྶེཏི། ཨཀལླཀོཏི གིལཱནོ།
265.Rathareṇumpīti rathe gacchante uṭṭhahanareṇusadisareṇuṃ. Tena tato sukhumaṃ ākāse paribbhamanakaṃ dissamānampi abbohārikanti dasseti. Akallakoti gilāno.
‘‘གཧེཏུཾ ཝཱ…པེ॰… ཏསྶ ཨོརིམནྟེནཱ’’ཏི ཨིམིནཱ ཨཱཀཱསེ ཨུཛུཾ ཋཏྭཱ པརེན ཨུཀྑིཏྟཾ གཎྷནྟསྶཱཔི ཨཱསནྣངྒབྷཱུཏཔཱདཏལཏོ པཊྛཱཡ ཧཏྠཔཱསོ པརིཙྪིནྡིཏབྦོ, ན པན སཱིསནྟཏོ པཊྛཱཡཱཏི དསྶེཏི། ཏཏྠ ‘‘ཨོརིམནྟེནཱ’’ཏི ཨིམསྶ ཧེཊྛིམནྟེནཱཏི ཨཏྠོ གཧེཏབྦོ།
‘‘Gahetuṃ vā…pe… tassa orimantenā’’ti iminā ākāse ujuṃ ṭhatvā parena ukkhittaṃ gaṇhantassāpi āsannaṅgabhūtapādatalato paṭṭhāya hatthapāso paricchinditabbo, na pana sīsantato paṭṭhāyāti dasseti. Tattha ‘‘orimantenā’’ti imassa heṭṭhimantenāti attho gahetabbo.
ཨེཏྠ ཙ པཝཱརཎཱསིཀྑཱཔདཊྛཀཐཱཡཾ ‘‘སཙེ བྷིཀྑུ ནིསིནྣོ ཧོཏི, ཨཱསནསྶ པཙྪིམནྟཏོ པཊྛཱཡཱ’’ཏིཨཱདིནཱ (པཱཙི॰ ཨཊྛ॰ ༢༣༨-༢༣༩) པཊིགྒཱཧཀཱནཾ ཨཱསནྣངྒསྶ པཱརིམནྟཏོ པཊྛཱཡ པརིཙྪེདསྶ དསྶིཏཏྟཱ ཨིདྷཱཔི ཨཱཀཱསེ ཋིཏསྶ པཊིགྒཱཧཀསྶ ཨཱསནྣངྒབྷཱུཏཔཱདངྒུལསྶ པཱརིམནྟབྷཱུཏཏོ པཎྷིཔརིཡནྟསྶ ཧེཊྛིམཏལཏོ པཊྛཱཡ, དཱཡཀསྶ པན ཨོརིམནྟབྷཱུཏཏོ པཱདངྒུལསྶ ཧེཊྛིམཏལཏོ པཊྛཱཡ ཧཏྠཔཱསོ པརིཙྪིནྡིཏབྦོཏི དཊྛབྦཾ། ཨིམིནཱཝ ནཡེན བྷཱུམིཡཾ ནིཔཛྫིཏྭཱ ཨུསྶཱིསེ ནིསིནྣསྶ ཧཏྠཏོ པཊིགྒཎྷནྟསྶཔི ཨཱསནྣསཱིསངྒསྶ པཱརིམནྟབྷཱུཏཏོ གཱིཝནྟཏོ པཊྛཱཡེཝ ཧཏྠཔཱསོ མིནིཏབྦོ, ན པཱདཏལཏོ པཊྛཱཡ། ཨེཝཾ ནིཔཛྫིཏྭཱ དཱནེཔི ཡཐཱནུརཱུཔཾ ཝེདིཏབྦཾ། ‘‘ཡཾ ཨཱསནྣཏརཾ ཨངྒ’’ནྟི ཧི ཝུཏྟཾ།
Ettha ca pavāraṇāsikkhāpadaṭṭhakathāyaṃ ‘‘sace bhikkhu nisinno hoti, āsanassa pacchimantato paṭṭhāyā’’tiādinā (pāci. aṭṭha. 238-239) paṭiggāhakānaṃ āsannaṅgassa pārimantato paṭṭhāya paricchedassa dassitattā idhāpi ākāse ṭhitassa paṭiggāhakassa āsannaṅgabhūtapādaṅgulassa pārimantabhūtato paṇhipariyantassa heṭṭhimatalato paṭṭhāya, dāyakassa pana orimantabhūtato pādaṅgulassa heṭṭhimatalato paṭṭhāya hatthapāso paricchinditabboti daṭṭhabbaṃ. Imināva nayena bhūmiyaṃ nipajjitvā ussīse nisinnassa hatthato paṭiggaṇhantassapi āsannasīsaṅgassa pārimantabhūtato gīvantato paṭṭhāyeva hatthapāso minitabbo, na pādatalato paṭṭhāya. Evaṃ nipajjitvā dānepi yathānurūpaṃ veditabbaṃ. ‘‘Yaṃ āsannataraṃ aṅga’’nti hi vuttaṃ.
པཊིགྒཧཎསཉྙཱཡཱཏི ‘‘མཉྩཱདིནཱ པཊིགྒཧེསྶཱམཱི’’ཏི ཨུཔྤཱདིཏསཉྙཱཡ། ཨིམིནཱ ‘‘པཊིགྒཎྷཱམཱི’’ཏི ཝཱཙཱཡ ཝཏྟབྦཀིཙྩཾ ནཏྠཱིཏི དསྶེཏི། ཀཏྠཙི ཨཊྛཀཐཱསུ, པདེསེསུ ཝཱ། ཨསཾཧཱརིམེ ཕལཀེཏི ཐཱམམཛ྄ཛྷིམེན པུརིསེན ཨསཾཧཱརིཡེ། པུཉྪིཏྭཱ པཊིགྒཧེཏྭཱཏི པུཉྪིཏེཔི རཛནཙུཎྞསངྐཱཡ སཏི པཊིགྒཧཎཏྠཱཡ ཝུཏྟཾ, ནཱསཏི། ཏཾ པནཱཏི པཏིཏརཛཾ ཨཔྤཊིགྒཧེཏྭཱ ཨུཔརི གཧིཏཔིཎྜཔཱཏཾ། ཨནཱཔཏྟཱིཏི དུརུཔཙིཎྞཱདིདོསོ ནཏྠི། ‘‘ཨནུཔསམྤནྣསྶ དསྶཱམཱི’’ཏིཨཱདིཔི ཝིནཡདུཀྐཊཔརིཧཱརཱཡ ཝུཏྟཾ། ཏཐཱ ཨཀཏྭཱ གཧིཏེཔི པཊིགྒཧེཏྭཱ པརིབྷུཉྫཏོ ཨནཱཔཏྟི ཨེཝ། ‘‘ཨནུཔསམྤནྣསྶ དཏྭཱ’’ཏི ཨིདམྤི པུརིམཱབྷོགཱནུགུཎཏཱཡ ཝུཏྟཾ།
Paṭiggahaṇasaññāyāti ‘‘mañcādinā paṭiggahessāmī’’ti uppāditasaññāya. Iminā ‘‘paṭiggaṇhāmī’’ti vācāya vattabbakiccaṃ natthīti dasseti. Katthaci aṭṭhakathāsu, padesesu vā. Asaṃhārime phalaketi thāmamajjhimena purisena asaṃhāriye. Puñchitvā paṭiggahetvāti puñchitepi rajanacuṇṇasaṅkāya sati paṭiggahaṇatthāya vuttaṃ, nāsati. Taṃ panāti patitarajaṃ appaṭiggahetvā upari gahitapiṇḍapātaṃ. Anāpattīti durupaciṇṇādidoso natthi. ‘‘Anupasampannassa dassāmī’’tiādipi vinayadukkaṭaparihārāya vuttaṃ. Tathā akatvā gahitepi paṭiggahetvā paribhuñjato anāpatti eva. ‘‘Anupasampannassa datvā’’ti idampi purimābhogānuguṇatāya vuttaṃ.
ཙརུཀེནཱཏི ཁུདྡཀབྷཱཛནེན། ཨབྷིཧཊཏྟཱཏི དིཡྻམཱནཀྑཎཾ སནྡྷཱཡ ཝུཏྟཾ། དཏྭཱ ཨཔནཡནཀཱལེ པན ཚཱརིཀཱ ཝཱ བིནྡཱུནི ཝཱ པཏནྟི, པུན པཊིགྒཧེཏབྦཾ ཨབྷིཧཱརསྶ ཝིགཏཏྟཱཏི ཝདནྟི། ཏཾ ཡཐཱ ན པཏཏི, ཏཐཱ ཨཔནེསྶཱམཱིཏི པརིཧརནྟེ ཡུཛྫཏི། པཀཏིསཉྙཱཡ ཨཔནེནྟེ ཨབྷིཧཱརོ ན ཚིཛྫཏི, ཏཾ པཊིགྒཧིཏམེཝ ཧོཏི། མུཁཝཊྚིཡཱཔི གཧེཏུཾ ཝཊྚཏཱིཏི ཨབྷིཧརིཡམཱནསྶ པཏྟསྶ མུཁཝཊྚིཡཱ ཨུཔརིབྷཱགེ ཧཏྠཾ པསཱརེཏྭཱ ཕུསིཏུཾ ཝཊྚཏི།
Carukenāti khuddakabhājanena. Abhihaṭattāti diyyamānakkhaṇaṃ sandhāya vuttaṃ. Datvā apanayanakāle pana chārikā vā bindūni vā patanti, puna paṭiggahetabbaṃ abhihārassa vigatattāti vadanti. Taṃ yathā na patati, tathā apanessāmīti pariharante yujjati. Pakatisaññāya apanente abhihāro na chijjati, taṃ paṭiggahitameva hoti. Mukhavaṭṭiyāpi gahetuṃ vaṭṭatīti abhihariyamānassa pattassa mukhavaṭṭiyā uparibhāge hatthaṃ pasāretvā phusituṃ vaṭṭati.
པཱདེན པེལླེཏྭཱཏི ‘‘པཱདེན པཊིགྒཧེསྶཱམཱི’’ཏིསཉྙཱཡ ཨཀྐམིཏྭཱ། ཀེཙཱིཏི ཨབྷཡགིརིཝཱསིནོ། ཝཙནམཏྟམེཝཱཏི པཊིབདྡྷཔྤཊིབདྡྷནྟི སདྡམཏྟམེཝ ནཱནཾ, ཀཱཡཔཊིབདྡྷམེཝ ཧོཏི། ཏསྨཱ ཏེསཾ ཝཙནཾ ན གཧེཏབྦནྟི ཨདྷིཔྤཱཡོ།
Pādena pelletvāti ‘‘pādena paṭiggahessāmī’’tisaññāya akkamitvā. Kecīti abhayagirivāsino. Vacanamattamevāti paṭibaddhappaṭibaddhanti saddamattameva nānaṃ, kāyapaṭibaddhameva hoti. Tasmā tesaṃ vacanaṃ na gahetabbanti adhippāyo.
ཏེན ཨཱཧརཱཔེཏུནྟི ཡསྶ བྷིཀྑུནོ སནྟིཀཾ གཏཾ, ཏཾ ཨིདྷ ཨཱནེཧཱིཏི ཨཱཎཱཔེཏྭཱ ཏེན ཨཱཧརཱཔེཏུཾ ཨིཏརསྶ ཝཊྚཏཱིཏི ཨཏྠོ། ན ཏཏོ པརནྟི ཏདཧེཝ སཱམཾ ཨཔྤཊིགྒཧིཏཾ སནྡྷཱཡ ཝུཏྟཾ། ཏདཧེཝ པཊིགྒཧིཏཾ པན པུནདིཝསཱདཱིསུ ཨཔྤཊིགྒཧེཏྭཱཔི པརིབྷུཉྫིཏུཾ ཝཊྚཏཱིཏི ཝདནྟི།
Tena āharāpetunti yassa bhikkhuno santikaṃ gataṃ, taṃ idha ānehīti āṇāpetvā tena āharāpetuṃ itarassa vaṭṭatīti attho. Na tato paranti tadaheva sāmaṃ appaṭiggahitaṃ sandhāya vuttaṃ. Tadaheva paṭiggahitaṃ pana punadivasādīsu appaṭiggahetvāpi paribhuñjituṃ vaṭṭatīti vadanti.
ཁིཡྻནྟཱིཏི ཁཡཾ གཙྪནྟི, ཏེསཾ ཙུཎྞེཧི ཐུལླཙྩཡཨཔྤཊིགྒཧཎཱཔཏྟིཡོ ན ཧོནྟཱིཏི ཨདྷིཔྤཱཡོ། ‘‘ནཝསམུཊྛིཏ’’ནྟི ཨེཏེནེཝ ཨུཙྪུཨཱདཱིསུ ཨབྷིནཝལགྒཏྟཱ ཨབྦོཧཱརིཀཾ ན ཧོཏཱིཏི དསྶེཏི། ཨེསེཝ ནཡོཏི སནྣིདྷིདོསཱདིཾ སནྡྷཱཡ ཝདཏི། ཏེནཱཧ ‘‘ན ཧཱི’’ཏིཨཱདི། ཏེན ཙ པཊིགྒཧཎངྒེསུ པཉྩསུཔི སམིདྡྷེསུ ཨཛ྄ཛྷོཧརིཏུཀཱམཏཱཡ གཧིཏམེཝ པཊིགྒཧིཏཾ ནཱམ ཧོཏི ཨཛ྄ཛྷོཧརིཏབྦེསུ ཨེཝ པཊིགྒཧཎསྶ ཨནུཉྙཱཏཏྟཱཏི དསྶེཏི། ཏཐཱ བཱཧིརཔརིབྷོགཏྠཱཡ གཧེཏྭཱ ཋཔིཏཏེལཱདིཾ ཨཛ྄ཛྷོཧརིཏུཀཱམཏཱཡ སཏི པཊིགྒཧེཏྭཱ པརིབྷུཉྫིཏུཾ ཝཊྚཏི།
Khiyyantīti khayaṃ gacchanti, tesaṃ cuṇṇehi thullaccayaappaṭiggahaṇāpattiyo na hontīti adhippāyo. ‘‘Navasamuṭṭhita’’nti eteneva ucchuādīsu abhinavalaggattā abbohārikaṃ na hotīti dasseti. Eseva nayoti sannidhidosādiṃ sandhāya vadati. Tenāha ‘‘na hī’’tiādi. Tena ca paṭiggahaṇaṅgesu pañcasupi samiddhesu ajjhoharitukāmatāya gahitameva paṭiggahitaṃ nāma hoti ajjhoharitabbesu eva paṭiggahaṇassa anuññātattāti dasseti. Tathā bāhiraparibhogatthāya gahetvā ṭhapitatelādiṃ ajjhoharitukāmatāya sati paṭiggahetvā paribhuñjituṃ vaṭṭati.
ཀེསཉྩཱིཏིཨཱདཱིསུ ཨནུཔསམྤནྣཱནཾ ཨཏྠཱཡ ཀཏྠཙི ཋཔིཡམཱནམྤི ཧཏྠཏོ མུཏྟམཏྟེ ཨེཝ པཊིགྒཧཎཾ ན ཝིཛཧཏི, ཨཐ ཁོ བྷཱཛནེ པཏིཏམེཝ པཊིགྒཧཎཾ ཝིཛཧཏི། བྷཱཛནཉྩ བྷིཀྑུནཱ པུནདིཝསཏྠཱཡ ཨཔེཀྑིཏམེཝཱཏི ཏགྒཏམྤི ཨཱམིསཾ དུདྡྷོཏཔཏྟགཏཾ ཝིཡ པཊིགྒཧཎཾ ན ཝིཛཧཏཱིཏི ཨཱསངྐཱཡ ‘‘སཱམཎེརསྶ ཧཏྠེ པཀྑིཔིཏབྦ’’ནྟི ཝུཏྟནྟི ཝེདིཏབྦཾ། ཨཱིདིསེསུ ཧི ཡུཏྟི ན གཝེསིཏབྦཱ, ཝུཏྟནཡེནེཝ པཊིཔཛྫིཏབྦཾ། ‘‘པཏྟགཏཱ ཡཱགཱུ’’ཏི ཨིམིནཱ པཏྟམུཁཝཊྚིཡཱ ཕུཊྛེཔི ཀཱུཊེ ཡཱགུ པཊིགྒཧིཏཱ, ཨུགྒཧིཏཱ ཝཱ ན ཧོཏི བྷིཀྑུནོ ཨནིཙྪཱཡ ཕུཊྛཏྟཱཏི དསྶེཏི། ཨཱརོཔེཏཱིཏི ཧཏྠཾ ཕུསཱཔེཏི། པཊིགྒཧཎཱུཔགཾ བྷཱརཾ ནཱམ མཛ྄ཛྷིམསྶ པུརིསསྶ ཨུཀྑེཔཱརཧཾ། ན པིདཧིཏབྦནྟི ཧཏྠཏོ མུཏྟཾ སནྡྷཱཡ ཝུཏྟཾ, ཧཏྠགཏཾ པན ཨིཏརེན ཧཏྠེན པིདཧཏོ, ཧཏྠཏོ མུཏྟམྤི ཝཱ ཨཕུསིཏྭཱ ཨུཔརིཔིདྷཱནཾ པཱཏེནྟསྶ ན དོསོ།
Kesañcītiādīsu anupasampannānaṃ atthāya katthaci ṭhapiyamānampi hatthato muttamatte eva paṭiggahaṇaṃ na vijahati, atha kho bhājane patitameva paṭiggahaṇaṃ vijahati. Bhājanañca bhikkhunā punadivasatthāya apekkhitamevāti taggatampi āmisaṃ duddhotapattagataṃ viya paṭiggahaṇaṃ na vijahatīti āsaṅkāya ‘‘sāmaṇerassa hatthe pakkhipitabba’’nti vuttanti veditabbaṃ. Īdisesu hi yutti na gavesitabbā, vuttanayeneva paṭipajjitabbaṃ. ‘‘Pattagatā yāgū’’ti iminā pattamukhavaṭṭiyā phuṭṭhepi kūṭe yāgu paṭiggahitā, uggahitā vā na hoti bhikkhuno anicchāya phuṭṭhattāti dasseti. Āropetīti hatthaṃ phusāpeti. Paṭiggahaṇūpagaṃ bhāraṃ nāma majjhimassa purisassa ukkhepārahaṃ. Na pidahitabbanti hatthato muttaṃ sandhāya vuttaṃ, hatthagataṃ pana itarena hatthena pidahato, hatthato muttampi vā aphusitvā uparipidhānaṃ pātentassa na doso.
པཊིགྒཎྷཱཏཱིཏི ཚཱཡཏྠཱཡ ཨུཔརི དྷཱརཡམཱནཱ མཧཱསཱཁཱ ཡེན ཀེནཙི ཚིཛྫེཡྻ, ཏཏྠ ལགྒརཛཾ མུཁེ པཱཏེཡྻ ཙཱཏི ཀཔྤིཡཾ ཀཱརཱཔེཏྭཱ པཊིགྒཎྷཱཏི། ཀུཎྜཀེཏི མཧཱགྷཊེ། ཏསྨིམྤཱིཏི ཙཱཊིགྷཊེཔི། གཱཧཱཔེཏྭཱཏི ཨཔྤཊིགྒཧིཏཾ ཀཱལིཀཾ གཱཧཱཔེཏྭཱ།
Paṭiggaṇhātīti chāyatthāya upari dhārayamānā mahāsākhā yena kenaci chijjeyya, tattha laggarajaṃ mukhe pāteyya cāti kappiyaṃ kārāpetvā paṭiggaṇhāti. Kuṇḍaketi mahāghaṭe. Tasmimpīti cāṭighaṭepi. Gāhāpetvāti appaṭiggahitaṃ kālikaṃ gāhāpetvā.
དུཏིཡཏྠེརསྶཱཏི ‘‘ཐེརསྶ པཏྟཾ མཡ྄ཧཾ དེཐཱ’’ཏི ཏེན ཨཏྟནོ པརིཙྩཛཱཔེཏྭཱ དུཏིཡཏྠེརསྶ དེཏི། ཨེཏྠ པནཱཏི པཏྟཔརིཝཏྟནེ། ཀཱརཎནྟི ཨེཏྠ ཡཐཱ ‘‘སཱམཎེརཱ ཨིཏོ ཨམྷཱཀམྤི དེནྟཱི’’ཏི ཝིཏཀྐོ ཨུཔྤཛྫཏི, ན ཏཐཱཏི ཀཱརཎཾ ཝདནྟི, ཏཉྩ ཡུཏྟཾ། ཡསྶ པན ཏཱདིསོ ཝིཏཀྐོ ནཏྠི, ཏེན ཨཔརིཝཏྟེཏྭཱཔི བྷུཉྫིཏུཾ ཝཊྚཏི།
Dutiyattherassāti ‘‘therassa pattaṃ mayhaṃ dethā’’ti tena attano pariccajāpetvā dutiyattherassa deti. Ettha panāti pattaparivattane. Kāraṇanti ettha yathā ‘‘sāmaṇerā ito amhākampi dentī’’ti vitakko uppajjati, na tathāti kāraṇaṃ vadanti, tañca yuttaṃ. Yassa pana tādiso vitakko natthi, tena aparivattetvāpi bhuñjituṃ vaṭṭati.
ནིཙྩཱལེཏུནྟི ཙཱལེཏྭཱ པཱསཱཎསཀྑརཱདིཨཔནཡཾ ཀཱཏུཾ། ཨུདྡྷནཾ ཨཱརོཔེཏབྦནྟི ཨནགྒིཀཾ ཨུདྡྷནཾ སནྡྷཱཡ ཝུཏྟཾ། ཨུདྡྷནེ པཙྩམཱནསྶ ཨཱལུལ༹ནེ ཨུཔརི ཨཔཀྐཏཎྜུལཱ ཧེཊྛཱ པཝིསིཏྭཱ པཙྩཏཱིཏི ཨཱཧ ‘‘སཱམཾཔཱཀཉྩེཝ ཧོཏཱི’’ཏི།
Niccāletunti cāletvā pāsāṇasakkharādiapanayaṃ kātuṃ. Uddhanaṃ āropetabbanti anaggikaṃ uddhanaṃ sandhāya vuttaṃ. Uddhane paccamānassa āluḷane upari apakkataṇḍulā heṭṭhā pavisitvā paccatīti āha ‘‘sāmaṃpākañceva hotī’’ti.
ཨཱདྷཱརཀེ པཏྟོ ཋཔིཏོཏི ཨཔྤཊིགྒཧིཏཱམིསོ པཏྟོ པུན པཊིགྒཧཎཏྠཱཡ ཋཔིཏོ། ཨེཀགྒཧཎེནེཝཱཏི སཱམཎེརཱནཾ གཧིཏསྶ པུན ཨཙྪཌྜནཝསེན གཧཎེན། བྷུཉྫིཏུཾ ཝཊྚཏཱིཏི དྷཱུམཝཊྚིཡཱ ཏདཧུཔཊིགྒཧིཏཏྟཱ ཝུཏྟཾ། བྷཏྟུགྒཱརོཏིཨཱདི ཨབྦོཧཱརིཀཔྤསངྒེན ཝིཀཱལབྷོཛནཝིནིཙྪཡདསྶནཾ། སམུདྡོདཀེནཱཏི ཨཔྤཊིགྒཧིཏེན། ཧིམཀརཀཱ ནཱམ ཀདཱཙི ཝསྶོདཀེན སཧ པཏནཀཱ པཱསཱཎལེཁཱ ཝིཡ གྷནཱིབྷཱུཏཨུདཀཝིསེསཱ, ཏེསུ པཊིགྒཧཎཀིཙྩཾ ནཏྠི། ཏེནཱཧ ‘‘ཨུདཀགཏིཀཱ ཨེཝཱ’’ཏི། པུརེབྷཏྟམེཝ ཝཊྚཏཱིཏི ཨཔྤཊིགྒཧིཏཱཔཏྟཱིཧི ཨབྦོཧཱརིཀམྤི ཝིཀཱལབྷོཛནཱཔཏྟཱིཧི སབྦོཧཱརིཀནྟི དསྶེཏི།
Ādhārake patto ṭhapitoti appaṭiggahitāmiso patto puna paṭiggahaṇatthāya ṭhapito. Ekaggahaṇenevāti sāmaṇerānaṃ gahitassa puna acchaḍḍanavasena gahaṇena. Bhuñjituṃ vaṭṭatīti dhūmavaṭṭiyā tadahupaṭiggahitattā vuttaṃ. Bhattuggārotiādi abbohārikappasaṅgena vikālabhojanavinicchayadassanaṃ. Samuddodakenāti appaṭiggahitena. Himakarakā nāma kadāci vassodakena saha patanakā pāsāṇalekhā viya ghanībhūtaudakavisesā, tesu paṭiggahaṇakiccaṃ natthi. Tenāha ‘‘udakagatikā evā’’ti. Purebhattameva vaṭṭatīti appaṭiggahitāpattīhi abbohārikampi vikālabhojanāpattīhi sabbohārikanti dasseti.
ལགྒཏཱིཏི མུཁེ ཙ ཧཏྠེ ཙ མཏྟིཀཱཝཎྞཾ དསྶེཏི། བཧལནྟི ཧཏྠམུཁེསུ ཨལགྒནཀམྤི པཊིགྒཧེཏབྦཾ། ཝཱསམཏྟནྟི རེཎུཁཱིརཱབྷཱཝཾ དསྶེཏི། ཨཱཀིརཏི པཊིགྒཧེཏབྦནྟི པུཔྥརསསྶ པཉྙཱཡནཏོ ཝུཏྟཾ།
Laggatīti mukhe ca hatthe ca mattikāvaṇṇaṃ dasseti. Bahalanti hatthamukhesu alagganakampi paṭiggahetabbaṃ. Vāsamattanti reṇukhīrābhāvaṃ dasseti. Ākirati paṭiggahetabbanti puppharasassa paññāyanato vuttaṃ.
མཧཱབྷཱུཏེསཱུཏི པཱཎསརཱིརསནྣིསྶིཏེསུ པཐཝཱིཨཱདིམཧཱབྷཱུཏེསུ། སབྦཾ ཝཊྚཏཱིཏི ཨཏྟནོ, པརེསཉྩ སརཱིརནིསྶིཏཾ སབྦཾ ཝཊྚཏི། ཨཀཔྤིཡམཾསཱནུལོམཏཱཡ ཐུལླཙྩཡཱདིཾ ན ཛནེཏཱིཏི ཨདྷིཔྤཱཡོ། པཏཏཱིཏི ཨཏྟནོ སརཱིརཏོ ཝིཙྪིནྡིཏྭཱ པཏཏི། ‘‘རུཀྑཏོ ཚིནྡིཏྭཱ’’ཏི ཝུཏྟཏྟཱ མཏྟིཀཏྠཱཡ པཐཝིཾ ཁཎིཏུཾ, ཨཉྙམྤི ཡཾཀིཉྩི མཱུལཔཎྞཱདིཝིསབྷེསཛྫཾ ཚིནྡིཏྭཱ ཚཱརིཀཾ ཨཀཏྭཱཔི ཨཔྤཊིགྒཧིཏམྤི པརིབྷུཉྫིཏུཾ ཝཊྚཏཱིཏི དཊྛབྦཾ། ཨཔྤཊིགྒཧིཏཏཱ, ཨནནུཉྙཱཏཏཱ, དྷཱུམཱདིཨབྦོཧཱརིཀཏཱབྷཱཝོ, ཨཛ྄ཛྷོཧརཎནྟི ཨིམཱནེཏྠ ཙཏྟཱརི ཨངྒཱནི།
Mahābhūtesūti pāṇasarīrasannissitesu pathavīādimahābhūtesu. Sabbaṃ vaṭṭatīti attano, paresañca sarīranissitaṃ sabbaṃ vaṭṭati. Akappiyamaṃsānulomatāya thullaccayādiṃ na janetīti adhippāyo. Patatīti attano sarīrato vicchinditvā patati. ‘‘Rukkhato chinditvā’’ti vuttattā mattikatthāya pathaviṃ khaṇituṃ, aññampi yaṃkiñci mūlapaṇṇādivisabhesajjaṃ chinditvā chārikaṃ akatvāpi appaṭiggahitampi paribhuñjituṃ vaṭṭatīti daṭṭhabbaṃ. Appaṭiggahitatā, ananuññātatā, dhūmādiabbohārikatābhāvo, ajjhoharaṇanti imānettha cattāri aṅgāni.
དནྟཔོནསིཀྑཱཔདཝཎྞནཱ ནིཊྛིཏཱ།
Dantaponasikkhāpadavaṇṇanā niṭṭhitā.
ནིཊྛིཏོ བྷོཛནཝགྒོ ཙཏུཏྠོ།
Niṭṭhito bhojanavaggo catuttho.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༤. བྷོཛནཝགྒོ • 4. Bhojanavaggo
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༡༠. དནྟཔོནསིཀྑཱཔདཝཎྞནཱ • 10. Dantaponasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༡༠. དནྟཔོནསིཀྑཱཔདཝཎྞནཱ • 10. Dantaponasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༡༠. དནྟཔོནསིཀྑཱཔདཝཎྞནཱ • 10. Dantaponasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༠. དནྟཔོནསིཀྑཱཔདཾ • 10. Dantaponasikkhāpadaṃ
