| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. தா³னூபபத்திஸுத்தவண்ணனா
5. Dānūpapattisuttavaṇṇanā
35. பஞ்சமே தா³னபச்சயாதி தா³னகாரணா, தா³னமயபுஞ்ஞஸ்ஸ கதத்தா உபசிதத்தாதி அத்தோ². உபபத்தியோதி மனுஸ்ஸேஸு தே³வேஸு ச நிப்³ப³த்தியோ. ட²பேதீதி ஏகவாரமேவ அனுப்பஜ்ஜித்வா யதா² உபரி தேனேவாகாரேன பவத்ததி, ஏவங் ட²பேதி. ததே³வ சஸ்ஸ அதி⁴ட்டா²னந்தி ஆஹ ‘‘தஸ்ஸேவ வேவசன’’ந்தி. வட்³டே⁴தீதி ப்³ரூஹேதி ந ஹாபேதி. விமுத்தந்தி அதி⁴முத்தங், நின்னங் போணங் பப்³பா⁴ரந்தி அத்தோ². விமுத்தந்தி வா விஸ்ஸட்ட²ங். நிப்பரியாயதோ உத்தரி நாம பணீதங் மஜ்ஜே²பி ஹீனமஜ்ஜி²மவிபா⁴க³ஸ்ஸ லப்³ப⁴னதோதி வுத்தங் ‘‘உத்தரி அபா⁴விதந்தி ததோ உபரிமக்³க³ப²லத்தா²ய அபா⁴வித’’ந்தி. ஸங்வத்ததி ததா²பணிஹிதங் தா³னமயங் சித்தங். யங் பன பாளியங் ‘‘தஞ்ச கோ²’’திஆதி³ வுத்தங், தங் தத்ருபபத்தியா விப³ந்த⁴கரது³ஸ்ஸீல்யாபா⁴வத³ஸ்ஸனபரங் த³ட்ட²ப்³ப³ங், ந தா³னமயஸ்ஸ புஞ்ஞஸ்ஸ கேவலஸ்ஸ தங்ஸங்வத்தனதாத³ஸ்ஸனபரந்தி த³ட்ட²ப்³ப³ங். ஸமுச்சி²ன்னராக³ஸ்ஸாதி ஸமுச்சி²ன்னகாமராக³ஸ்ஸ. தஸ்ஸ ஹி ஸியா ப்³ரஹ்மலோகே உபபத்தி, ந ஸமுச்சி²ன்னப⁴வராக³ஸ்ஸ. வீதராக³க்³க³ஹணேன செத்த² காமேஸு வீதராக³தா அதி⁴ப்பேதா, யாய ப்³ரஹ்மலோகூபபத்தி ஸியா. தேனாஹ ‘‘தா³னமத்தேனேவா’’திஆதி³. யதி³ ஏவங் தா³னங் தத்த² கிமத்தி²யந்தி ஆஹ ‘‘தா³னங் பனா’’திஆதி³. தா³னேன முது³சித்தோதி ப³த்³தா⁴கா⁴தே வேரிபுக்³க³லேபி அத்தனோ தா³னஸம்படிச்ச²னேன முது³பூ⁴தசித்தோ.
35. Pañcame dānapaccayāti dānakāraṇā, dānamayapuññassa katattā upacitattāti attho. Upapattiyoti manussesu devesu ca nibbattiyo. Ṭhapetīti ekavārameva anuppajjitvā yathā upari tenevākārena pavattati, evaṃ ṭhapeti. Tadeva cassa adhiṭṭhānanti āha ‘‘tasseva vevacana’’nti. Vaḍḍhetīti brūheti na hāpeti. Vimuttanti adhimuttaṃ, ninnaṃ poṇaṃ pabbhāranti attho. Vimuttanti vā vissaṭṭhaṃ. Nippariyāyato uttari nāma paṇītaṃ majjhepi hīnamajjhimavibhāgassa labbhanatoti vuttaṃ ‘‘uttari abhāvitanti tato uparimaggaphalatthāya abhāvita’’nti. Saṃvattati tathāpaṇihitaṃ dānamayaṃ cittaṃ. Yaṃ pana pāḷiyaṃ ‘‘tañca kho’’tiādi vuttaṃ, taṃ tatrupapattiyā vibandhakaradussīlyābhāvadassanaparaṃ daṭṭhabbaṃ, na dānamayassa puññassa kevalassa taṃsaṃvattanatādassanaparanti daṭṭhabbaṃ. Samucchinnarāgassāti samucchinnakāmarāgassa. Tassa hi siyā brahmaloke upapatti, na samucchinnabhavarāgassa. Vītarāgaggahaṇena cettha kāmesu vītarāgatā adhippetā, yāya brahmalokūpapatti siyā. Tenāha ‘‘dānamattenevā’’tiādi. Yadi evaṃ dānaṃ tattha kimatthiyanti āha ‘‘dānaṃ panā’’tiādi. Dānena muducittoti baddhāghāte veripuggalepi attano dānasampaṭicchanena mudubhūtacitto.
தா³னூபபத்திஸுத்தவண்ணனா நிட்டி²தா.
Dānūpapattisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. தா³னூபபத்திஸுத்தங் • 5. Dānūpapattisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. தா³னூபபத்திஸுத்தவண்ணனா • 5. Dānūpapattisuttavaṇṇanā
