| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၅. ဒာနူပပတ္တိသုတ္တဝဏ္ဏနာ
5. Dānūpapattisuttavaṇṇanā
၃၅. ပဉ္စမေ ဒာနူပပတ္တိယောတိ ဒာနပစ္စယာ ဥပပတ္တိယော။ ဒဟတီတိ ဌပေတိ။ အဓိဋ္ဌာတီတိ တသ္သေဝ ဝေဝစနံ။ ဘာဝေတီတိ ဝဍ္ဎေတိ။ ဟီနေ ဝိမုတ္တန္တိ ဟီနေသု ပဉ္စသု ကာမဂုဏေသု ဝိမုတ္တံ။ ဥတ္တရိ အဘာဝိတန္တိ တတော ဥတ္တရိမဂ္ဂဖလတ္ထာယ အဘာဝိတံ။ တတ္ရူပပတ္တိယာ သံဝတ္တတီတိ ယံ ဌာနံ ပတ္ထေတ္ဝာ ကုသလံ ကတံ, တတ္ထ နိဗ္ဗတ္တနတ္ထာယ သံဝတ္တတိ။ ဝီတရာဂသ္သာတိ မဂ္ဂေန ဝာ သမုစ္ဆိန္နရာဂသ္သ သမာပတ္တိယာ ဝာ ဝိက္ခမ္ဘိတရာဂသ္သ။ ဒာနမတ္တေနေဝ ဟိ ဗ္ရဟ္မလောကေ နိဗ္ဗတ္တိတုံ န သက္ကာ, ဒာနံ ပန သမာဓိဝိပသ္သနာစိတ္တသ္သ အလင္ကာရပရိဝာရံ ဟောတိ။ တတော ဒာနေန မုဒုစိတ္တော ဗ္ရဟ္မဝိဟာရေ ဘာဝေတ္ဝာ ဗ္ရဟ္မလောကေ နိဗ္ဗတ္တတိ။ တေန ဝုတ္တံ – ‘‘ဝီတရာဂသ္သ နော သရာဂသ္သာ’’တိ။
35. Pañcame dānūpapattiyoti dānapaccayā upapattiyo. Dahatīti ṭhapeti. Adhiṭṭhātīti tasseva vevacanaṃ. Bhāvetīti vaḍḍheti. Hīne vimuttanti hīnesu pañcasu kāmaguṇesu vimuttaṃ. Uttari abhāvitanti tato uttarimaggaphalatthāya abhāvitaṃ. Tatrūpapattiyā saṃvattatīti yaṃ ṭhānaṃ patthetvā kusalaṃ kataṃ, tattha nibbattanatthāya saṃvattati. Vītarāgassāti maggena vā samucchinnarāgassa samāpattiyā vā vikkhambhitarāgassa. Dānamatteneva hi brahmaloke nibbattituṃ na sakkā, dānaṃ pana samādhivipassanācittassa alaṅkāraparivāraṃ hoti. Tato dānena muducitto brahmavihāre bhāvetvā brahmaloke nibbattati. Tena vuttaṃ – ‘‘vītarāgassa no sarāgassā’’ti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၅. ဒာနူပပတ္တိသုတ္တံ • 5. Dānūpapattisuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၅. ဒာနူပပတ္တိသုတ္တဝဏ္ဏနာ • 5. Dānūpapattisuttavaṇṇanā
