| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၅. ဒာရုကမ္မိကသုတ္တဝဏ္ဏနာ
5. Dārukammikasuttavaṇṇanā
၅၉. ပဉ္စမေ ပုတ္တသမ္ဗာဓသယနန္တိ ပုတ္တေဟိ သမ္ဗာဓသယနံ။ ဧတ္ထ ပုတ္တသီသေန ဒာရပရိဂ္ဂဟံ ပုတ္တဒာရေသု ဥပ္ပိလော ဝိယ။ တေန တေသံ ရောဂာဒိဟေတု သောကာဘိဘဝေန စ စိတ္တသ္သ သံကိလိဋ္ဌတံ ဒသ္သေတိ။ ကာမဘောဂိနာတိ ဣမိနာ ပန ရာဂာဘိဘဝန္တိ။ ဥဘယေနပိ ဝိက္ခိတ္တစိတ္တတံ ဒသ္သေတိ။ ကာသိကစန္ဒနန္တိ ဥဇ္ဇလစန္ဒနံ။ တံ ကိရ ဝဏ္ဏဝိသေသသမုဇ္ဇလံ ဟောတိ ပဘသ္သရံ, တဒတ္ထမေဝ နံ သဏ္ဟတရံ ကရောန္တိ။ တေနေဝာဟ ‘‘သဏ္ဟစန္ဒန’’န္တိ , ကာသိကဝတ္ထဉ္စ စန္ဒနဉ္စာတိ အတ္ထော။ မာလာဂန္ဓဝိလေပနန္တိ ဝဏ္ဏသောဘတ္ထဉ္စေဝ သုဂန္ဓဘာဝတ္ထဉ္စ မာလံ, သုဂန္ဓဘာဝတ္ထာယ ဂန္ဓံ, ဆဝိရာဂကရဏတ္ထဉ္စေဝ သုဘတ္ထဉ္စ ဝိလေပနံ ဓာရေန္တေန။ ဇာတရူပရဇတန္တိ သုဝဏ္ဏဉ္စေဝ အဝသိဋ္ဌဓနဉ္စ သာဒိယန္တေန။ သဗ္ဗေနပိ ကာမေသု အဘိဂိဒ္ဓဘာဝမေဝ ပကာသေတိ။
59. Pañcame puttasambādhasayananti puttehi sambādhasayanaṃ. Ettha puttasīsena dārapariggahaṃ puttadāresu uppilo viya. Tena tesaṃ rogādihetu sokābhibhavena ca cittassa saṃkiliṭṭhataṃ dasseti. Kāmabhogināti iminā pana rāgābhibhavanti. Ubhayenapi vikkhittacittataṃ dasseti. Kāsikacandananti ujjalacandanaṃ. Taṃ kira vaṇṇavisesasamujjalaṃ hoti pabhassaraṃ, tadatthameva naṃ saṇhataraṃ karonti. Tenevāha ‘‘saṇhacandana’’nti , kāsikavatthañca candanañcāti attho. Mālāgandhavilepananti vaṇṇasobhatthañceva sugandhabhāvatthañca mālaṃ, sugandhabhāvatthāya gandhaṃ, chavirāgakaraṇatthañceva subhatthañca vilepanaṃ dhārentena. Jātarūparajatanti suvaṇṇañceva avasiṭṭhadhanañca sādiyantena. Sabbenapi kāmesu abhigiddhabhāvameva pakāseti.
ဒာရုကမ္မိကသုတ္တဝဏ္ဏနာ နိဋ္ဌိတာ။
Dārukammikasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၅. ဒာရုကမ္မိကသုတ္တံ • 5. Dārukammikasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၅. ဒာရုကမ္မိကသုတ္တဝဏ္ဏနာ • 5. Dārukammikasuttavaṇṇanā
