| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১১. দারুক্খন্ধসুত্তং
11. Dārukkhandhasuttaṃ
৪১. এৰং মে সুতং – একং সমযং আযস্মা সারিপুত্তো রাজগহে ৰিহরতি গিজ্ঝকূটে পব্বতে। অথ খো আযস্মা সারিপুত্তো পুব্বণ্হসমযং নিৰাসেত্ৰা পত্তচীৰরমাদায সম্বহুলেহি ভিক্খূহি সদ্ধিং গিজ্ঝকূটা পব্বতা ওরোহন্তো অদ্দস অঞ্ঞতরস্মিং পদেসে মহন্তং দারুক্খন্ধং। দিস্ৰা ভিক্খূ আমন্তেসি – ‘‘পস্সথ নো, আৰুসো, তুম্হে অমুং মহন্তং দারুক্খন্ধ’’ন্তি? ‘‘এৰমাৰুসো’’তি।
41. Evaṃ me sutaṃ – ekaṃ samayaṃ āyasmā sāriputto rājagahe viharati gijjhakūṭe pabbate. Atha kho āyasmā sāriputto pubbaṇhasamayaṃ nivāsetvā pattacīvaramādāya sambahulehi bhikkhūhi saddhiṃ gijjhakūṭā pabbatā orohanto addasa aññatarasmiṃ padese mahantaṃ dārukkhandhaṃ. Disvā bhikkhū āmantesi – ‘‘passatha no, āvuso, tumhe amuṃ mahantaṃ dārukkhandha’’nti? ‘‘Evamāvuso’’ti.
‘‘আকঙ্খমানো, আৰুসো, ভিক্খু ইদ্ধিমা চেতোৰসিপ্পত্তো অমুং দারুক্খন্ধং পথৰীত্ৰেৰ অধিমুচ্চেয্য। তং কিস্স হেতু? অত্থি, আৰুসো , অমুম্হি দারুক্খন্ধে পথৰীধাতু, যং নিস্সায ভিক্খু ইদ্ধিমা চেতোৰসিপ্পত্তো অমুং দারুক্খন্ধং পথৰীত্ৰেৰ অধিমুচ্চেয্য। আকঙ্খমানো, আৰুসো, ভিক্খু ইদ্ধিমা চেতোৰসিপ্পত্তো অমুং দারুক্খন্ধং আপোত্ৰেৰ অধিমুচ্চেয্য …পে॰… তেজোত্ৰেৰ অধিমুচ্চেয্য… ৰাযোত্ৰেৰ অধিমুচ্চেয্য… সুভন্ত্ৰেৰ অধিমুচ্চেয্য… অসুভন্ত্ৰেৰ অধিমুচ্চেয্য। তং কিস্স হেতু? অত্থি, আৰুসো, অমুম্হি দারুক্খন্ধে অসুভধাতু, যং নিস্সায ভিক্খু ইদ্ধিমা চেতোৰসিপ্পত্তো অমুং দারুক্খন্ধং অসুভন্ত্ৰেৰ অধিমুচ্চেয্যা’’তি। একাদসমং।
‘‘Ākaṅkhamāno, āvuso, bhikkhu iddhimā cetovasippatto amuṃ dārukkhandhaṃ pathavītveva adhimucceyya. Taṃ kissa hetu? Atthi, āvuso , amumhi dārukkhandhe pathavīdhātu, yaṃ nissāya bhikkhu iddhimā cetovasippatto amuṃ dārukkhandhaṃ pathavītveva adhimucceyya. Ākaṅkhamāno, āvuso, bhikkhu iddhimā cetovasippatto amuṃ dārukkhandhaṃ āpotveva adhimucceyya …pe… tejotveva adhimucceyya… vāyotveva adhimucceyya… subhantveva adhimucceyya… asubhantveva adhimucceyya. Taṃ kissa hetu? Atthi, āvuso, amumhi dārukkhandhe asubhadhātu, yaṃ nissāya bhikkhu iddhimā cetovasippatto amuṃ dārukkhandhaṃ asubhantveva adhimucceyyā’’ti. Ekādasamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১১. দারুক্খন্ধসুত্তৰণ্ণনা • 11. Dārukkhandhasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৮-১১. অত্তকারীসুত্তাদিৰণ্ণনা • 8-11. Attakārīsuttādivaṇṇanā
