| Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya |
๑๑. ทารุกฺขนฺธสุตฺตํ
11. Dārukkhandhasuttaṃ
๔๑. เอวํ เม สุตํ – เอกํ สมยํ อายสฺมา สาริปุโตฺต ราชคเห วิหรติ คิชฺฌกูเฎ ปพฺพเตฯ อถ โข อายสฺมา สาริปุโตฺต ปุพฺพณฺหสมยํ นิวาเสตฺวา ปตฺตจีวรมาทาย สมฺพหุเลหิ ภิกฺขูหิ สทฺธิํ คิชฺฌกูฎา ปพฺพตา โอโรหโนฺต อทฺทส อญฺญตรสฺมิํ ปเทเส มหนฺตํ ทารุกฺขนฺธํฯ ทิสฺวา ภิกฺขู อามเนฺตสิ – ‘‘ปสฺสถ โน, อาวุโส, ตุเมฺห อมุํ มหนฺตํ ทารุกฺขนฺธ’’นฺติ? ‘‘เอวมาวุโส’’ติฯ
41. Evaṃ me sutaṃ – ekaṃ samayaṃ āyasmā sāriputto rājagahe viharati gijjhakūṭe pabbate. Atha kho āyasmā sāriputto pubbaṇhasamayaṃ nivāsetvā pattacīvaramādāya sambahulehi bhikkhūhi saddhiṃ gijjhakūṭā pabbatā orohanto addasa aññatarasmiṃ padese mahantaṃ dārukkhandhaṃ. Disvā bhikkhū āmantesi – ‘‘passatha no, āvuso, tumhe amuṃ mahantaṃ dārukkhandha’’nti? ‘‘Evamāvuso’’ti.
‘‘อากงฺขมาโน, อาวุโส, ภิกฺขุ อิทฺธิมา เจโตวสิปฺปโตฺต อมุํ ทารุกฺขนฺธํ ปถวีเตฺวว อธิมุเจฺจยฺยฯ ตํ กิสฺส เหตุ? อตฺถิ, อาวุโส , อมุมฺหิ ทารุกฺขเนฺธ ปถวีธาตุ, ยํ นิสฺสาย ภิกฺขุ อิทฺธิมา เจโตวสิปฺปโตฺต อมุํ ทารุกฺขนฺธํ ปถวีเตฺวว อธิมุเจฺจยฺยฯ อากงฺขมาโน, อาวุโส, ภิกฺขุ อิทฺธิมา เจโตวสิปฺปโตฺต อมุํ ทารุกฺขนฺธํ อาโปเตฺวว อธิมุเจฺจยฺย …เป.… เตโชเตฺวว อธิมุเจฺจยฺย… วาโยเตฺวว อธิมุเจฺจยฺย… สุภเนฺตฺวว อธิมุเจฺจยฺย… อสุภเนฺตฺวว อธิมุเจฺจยฺยฯ ตํ กิสฺส เหตุ? อตฺถิ, อาวุโส, อมุมฺหิ ทารุกฺขเนฺธ อสุภธาตุ, ยํ นิสฺสาย ภิกฺขุ อิทฺธิมา เจโตวสิปฺปโตฺต อมุํ ทารุกฺขนฺธํ อสุภเนฺตฺวว อธิมุเจฺจยฺยา’’ติฯ เอกาทสมํฯ
‘‘Ākaṅkhamāno, āvuso, bhikkhu iddhimā cetovasippatto amuṃ dārukkhandhaṃ pathavītveva adhimucceyya. Taṃ kissa hetu? Atthi, āvuso , amumhi dārukkhandhe pathavīdhātu, yaṃ nissāya bhikkhu iddhimā cetovasippatto amuṃ dārukkhandhaṃ pathavītveva adhimucceyya. Ākaṅkhamāno, āvuso, bhikkhu iddhimā cetovasippatto amuṃ dārukkhandhaṃ āpotveva adhimucceyya …pe… tejotveva adhimucceyya… vāyotveva adhimucceyya… subhantveva adhimucceyya… asubhantveva adhimucceyya. Taṃ kissa hetu? Atthi, āvuso, amumhi dārukkhandhe asubhadhātu, yaṃ nissāya bhikkhu iddhimā cetovasippatto amuṃ dārukkhandhaṃ asubhantveva adhimucceyyā’’ti. Ekādasamaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๑๑. ทารุกฺขนฺธสุตฺตวณฺณนา • 11. Dārukkhandhasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๘-๑๑. อตฺตการีสุตฺตาทิวณฺณนา • 8-11. Attakārīsuttādivaṇṇanā
