| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
11. දාරුක්‌ඛන්‌ධසුත්‌තං
11. Dārukkhandhasuttaṃ
41. එවං මෙ සුතං – එකං සමයං ආයස්‌මා සාරිපුත්‌තො රාජගහෙ විහරති ගිජ්‌ඣකූටෙ පබ්‌බතෙ. අථ ඛො ආයස්‌මා සාරිපුත්‌තො පුබ්‌බණ්‌හසමයං නිවාසෙත්‌වා පත්‌තචීවරමාදාය සම්‌බහුලෙහි භික්‌ඛූහි සද්‌ධිං ගිජ්‌ඣකූටා පබ්‌බතා ඔරොහන්‌තො අද්‌දස අඤ්‌ඤතරස්‌මිං පදෙසෙ මහන්‌තං දාරුක්‌ඛන්‌ධං. දිස්‌වා භික්‌ඛූ ආමන්‌තෙසි – ‘‘පස්‌සථ නො, ආවුසො, තුම්‌හෙ අමුං මහන්‌තං දාරුක්‌ඛන්‌ධ’’න්‌ති? ‘‘එවමාවුසො’’ති.
41. Evaṃ me sutaṃ – ekaṃ samayaṃ āyasmā sāriputto rājagahe viharati gijjhakūṭe pabbate. Atha kho āyasmā sāriputto pubbaṇhasamayaṃ nivāsetvā pattacīvaramādāya sambahulehi bhikkhūhi saddhiṃ gijjhakūṭā pabbatā orohanto addasa aññatarasmiṃ padese mahantaṃ dārukkhandhaṃ. Disvā bhikkhū āmantesi – ‘‘passatha no, āvuso, tumhe amuṃ mahantaṃ dārukkhandha’’nti? ‘‘Evamāvuso’’ti.
‘‘ආකඞ්‌ඛමානො, ආවුසො, භික්‌ඛු ඉද්‌ධිමා චෙතොවසිප්‌පත්‌තො අමුං දාරුක්‌ඛන්‌ධං පථවීත්‌වෙව අධිමුච්‌චෙය්‍ය. තං කිස්‌ස හෙතු? අත්‌ථි, ආවුසො , අමුම්‌හි දාරුක්‌ඛන්‌ධෙ පථවීධාතු, යං නිස්‌සාය භික්‌ඛු ඉද්‌ධිමා චෙතොවසිප්‌පත්‌තො අමුං දාරුක්‌ඛන්‌ධං පථවීත්‌වෙව අධිමුච්‌චෙය්‍ය. ආකඞ්‌ඛමානො, ආවුසො, භික්‌ඛු ඉද්‌ධිමා චෙතොවසිප්‌පත්‌තො අමුං දාරුක්‌ඛන්‌ධං ආපොත්‌වෙව අධිමුච්‌චෙය්‍ය …පෙ.… තෙජොත්‌වෙව අධිමුච්‌චෙය්‍ය… වායොත්‌වෙව අධිමුච්‌චෙය්‍ය… සුභන්‌ත්‌වෙව අධිමුච්‌චෙය්‍ය… අසුභන්‌ත්‌වෙව අධිමුච්‌චෙය්‍ය. තං කිස්‌ස හෙතු? අත්‌ථි, ආවුසො, අමුම්‌හි දාරුක්‌ඛන්‌ධෙ අසුභධාතු, යං නිස්‌සාය භික්‌ඛු ඉද්‌ධිමා චෙතොවසිප්‌පත්‌තො අමුං දාරුක්‌ඛන්‌ධං අසුභන්‌ත්‌වෙව අධිමුච්‌චෙය්‍යා’’ති. එකාදසමං.
‘‘Ākaṅkhamāno, āvuso, bhikkhu iddhimā cetovasippatto amuṃ dārukkhandhaṃ pathavītveva adhimucceyya. Taṃ kissa hetu? Atthi, āvuso , amumhi dārukkhandhe pathavīdhātu, yaṃ nissāya bhikkhu iddhimā cetovasippatto amuṃ dārukkhandhaṃ pathavītveva adhimucceyya. Ākaṅkhamāno, āvuso, bhikkhu iddhimā cetovasippatto amuṃ dārukkhandhaṃ āpotveva adhimucceyya …pe… tejotveva adhimucceyya… vāyotveva adhimucceyya… subhantveva adhimucceyya… asubhantveva adhimucceyya. Taṃ kissa hetu? Atthi, āvuso, amumhi dārukkhandhe asubhadhātu, yaṃ nissāya bhikkhu iddhimā cetovasippatto amuṃ dārukkhandhaṃ asubhantveva adhimucceyyā’’ti. Ekādasamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 11. දාරුක්‌ඛන්‌ධසුත්‌තවණ්‌ණනා • 11. Dārukkhandhasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 8-11. අත්‌තකාරීසුත්‌තාදිවණ්‌ණනා • 8-11. Attakārīsuttādivaṇṇanā
