| Library / Tipiṭaka / д̇ибидага • Tipiṭaka / саммохавинод̣̇аний-адтагат̇аа • Sammohavinodanī-aṭṭhakathā |
10. д̣̇асагамаад̇игааван̣н̣анаа
10. Dasakamātikāvaṇṇanā
760. д̣̇асагамаад̇игаа ‘‘д̣̇аса д̇ат̇ааг̇ад̇асса д̇ат̇ааг̇ад̇аб̣алааний’’д̇иаад̣̇инаа згзнзва д̣̇асагзна нигкид̇д̇аа. д̇ад̇т̇а д̣̇асаад̇и г̇ан̣анабарижчзд̣̇о. д̇ат̇ааг̇ад̇ассаад̇и яат̇аа вибассийаад̣̇аяо буб̣б̣агаа исаяо ааг̇ад̇аа д̇ат̇аа ааг̇ад̇асса; яат̇аа жа д̇з г̇ад̇аа д̇ат̇аа г̇ад̇асса. д̇ат̇ааг̇ад̇аб̣алаанийд̇и ан̃н̃зхи асаад̇хааран̣аани д̇ат̇ааг̇ад̇ассзва б̣алаани; яат̇аа ваа буб̣б̣аб̣уд̣̇д̇хаанам̣ б̣алаани бун̃н̃уссаяасамбад̇д̇ияаа ааг̇ад̇аани д̇ат̇аа ааг̇ад̇аб̣алаанийд̇иби ад̇т̇о. д̇ад̇т̇а д̣̇увид̇хам̣ д̇ат̇ааг̇ад̇асса б̣алам̣ – гааяаб̣алан̃жа н̃аан̣аб̣алан̃жа. д̇зсу гааяаб̣алам̣ хад̇т̇игулаанусаарзнзва взд̣̇ид̇аб̣б̣ам̣. вуд̇д̇ан̃хзд̇ам̣ бораан̣зхи –
760. Dasakamātikā ‘‘dasa tathāgatassa tathāgatabalānī’’tiādinā ekeneva dasakena nikkhittā. Tattha dasāti gaṇanaparicchedo. Tathāgatassāti yathā vipassīādayo pubbakā isayo āgatā tathā āgatassa; yathā ca te gatā tathā gatassa. Tathāgatabalānīti aññehi asādhāraṇāni tathāgatasseva balāni; yathā vā pubbabuddhānaṃ balāni puññussayasampattiyā āgatāni tathā āgatabalānītipi attho. Tattha duvidhaṃ tathāgatassa balaṃ – kāyabalañca ñāṇabalañca. Tesu kāyabalaṃ hatthikulānusāreneva veditabbaṃ. Vuttañhetaṃ porāṇehi –
гаал̣ааваган̃жа г̇ан̇г̇зяяам̣, бан̣д̣арам̣ д̇амб̣абин̇г̇алам̣;
Kāḷāvakañca gaṅgeyyaṃ, paṇḍaraṃ tambapiṅgalaṃ;
г̇анд̇хаман̇г̇алахзман̃жа, убосат̇ачад̣̇д̣̇анд̇имз д̣̇асаад̇и. –
Gandhamaṅgalahemañca, uposathachaddantime dasāti. –
имаани хи д̣̇аса хад̇т̇игулаани.
Imāni hi dasa hatthikulāni.
д̇ад̇т̇а ‘гаал̣аавага’нд̇и багад̇ихад̇т̇игулам̣ д̣̇адтаб̣б̣ам̣. яам̣ д̣̇асаннам̣ бурисаанам̣ гааяаб̣алам̣ д̇ам̣ згасса гаал̣аавагахад̇т̇ино. яам̣ д̣̇асаннам̣ гаал̣аавагаанам̣ б̣алам̣ д̇ам̣ згасса г̇ан̇г̇зяасса. яам̣ д̣̇асаннам̣ г̇ан̇г̇зяяаанам̣ д̇ам̣ згасса бан̣д̣арасса. яам̣ д̣̇асаннам̣ бан̣д̣араанам̣ д̇ам̣ згасса д̇амб̣асса. яам̣ д̣̇асаннам̣ д̇амб̣аанам̣ д̇ам̣ згасса бин̇г̇аласса. яам̣ д̣̇асаннам̣ бин̇г̇алаанам̣ д̇ам̣ згасса г̇анд̇хахад̇т̇ино. яам̣ д̣̇асаннам̣ г̇анд̇хахад̇т̇ийнам̣ д̇ам̣ згасса ман̇г̇аласса. яам̣ д̣̇асаннам̣ ман̇г̇алаанам̣ д̇ам̣ згасса хзмавад̇асса. яам̣ д̣̇асаннам̣ хзмавад̇аанам̣ д̇ам̣ згасса убосат̇асса. яам̣ д̣̇асаннам̣ убосат̇аанам̣ д̇ам̣ згасса чад̣̇д̣̇анд̇асса. яам̣ д̣̇асаннам̣ чад̣̇д̣̇анд̇аанам̣ д̇ам̣ згасса д̇ат̇ааг̇ад̇асса. наарааяанасан̇каад̇аб̣аланд̇иби ид̣̇амзва вужжад̇и. д̇ад̣̇зд̇ам̣ багад̇ихад̇т̇ийнам̣ г̇ан̣анааяа хад̇т̇игодисахассаанам̣, бурисаг̇ан̣анааяа д̣̇асаннам̣ бурисагодисахассаанам̣ б̣алам̣ ход̇и. ид̣̇ам̣ д̇аава д̇ат̇ааг̇ад̇асса гааяаб̣алам̣.
Tattha ‘kāḷāvaka’nti pakatihatthikulaṃ daṭṭhabbaṃ. Yaṃ dasannaṃ purisānaṃ kāyabalaṃ taṃ ekassa kāḷāvakahatthino. Yaṃ dasannaṃ kāḷāvakānaṃ balaṃ taṃ ekassa gaṅgeyassa. Yaṃ dasannaṃ gaṅgeyyānaṃ taṃ ekassa paṇḍarassa. Yaṃ dasannaṃ paṇḍarānaṃ taṃ ekassa tambassa. Yaṃ dasannaṃ tambānaṃ taṃ ekassa piṅgalassa. Yaṃ dasannaṃ piṅgalānaṃ taṃ ekassa gandhahatthino. Yaṃ dasannaṃ gandhahatthīnaṃ taṃ ekassa maṅgalassa. Yaṃ dasannaṃ maṅgalānaṃ taṃ ekassa hemavatassa. Yaṃ dasannaṃ hemavatānaṃ taṃ ekassa uposathassa. Yaṃ dasannaṃ uposathānaṃ taṃ ekassa chaddantassa. Yaṃ dasannaṃ chaddantānaṃ taṃ ekassa tathāgatassa. Nārāyanasaṅkhātabalantipi idameva vuccati. Tadetaṃ pakatihatthīnaṃ gaṇanāya hatthikoṭisahassānaṃ, purisagaṇanāya dasannaṃ purisakoṭisahassānaṃ balaṃ hoti. Idaṃ tāva tathāgatassa kāyabalaṃ.
н̃аан̣аб̣алам̣ бана ид̇ха д̇аава баал̣ияам̣ ааг̇ад̇амзва д̣̇асаб̣алан̃аан̣ам̣. махаасийханаад̣̇з (ма. ни. 1.146 аад̣̇аяо) д̣̇асаб̣алан̃аан̣ам̣, жад̇увзсаараж̇ж̇ан̃аан̣ам̣, адтасу барисаасу агамбанан̃аан̣ам̣, жад̇уяонибарижчзд̣̇аган̃аан̣ам̣, бан̃жаг̇ад̇ибарижчзд̣̇аган̃аан̣ам̣, сам̣яуд̇д̇агз (сам̣. ни. 2.33-34) ааг̇ад̇аани д̇зсад̇д̇ад̇и н̃аан̣аани, сад̇д̇асад̇д̇ад̇и н̃аан̣аанийд̇и звам̣ ан̃н̃ааниби анзгаани н̃аан̣асахассаани – зд̇ам̣ н̃аан̣аб̣алам̣ наама. ид̇хааби н̃аан̣аб̣аламзва ад̇хиббзд̇ам̣ н̃аан̣ан̃хи агамбияадтзна убад̇т̇амбхагадтзна жа б̣аланд̇и вуд̇д̇ам̣.
Ñāṇabalaṃ pana idha tāva pāḷiyaṃ āgatameva dasabalañāṇaṃ. Mahāsīhanāde (ma. ni. 1.146 ādayo) dasabalañāṇaṃ, catuvesārajjañāṇaṃ, aṭṭhasu parisāsu akampanañāṇaṃ, catuyoniparicchedakañāṇaṃ, pañcagatiparicchedakañāṇaṃ, saṃyuttake (saṃ. ni. 2.33-34) āgatāni tesattati ñāṇāni, sattasattati ñāṇānīti evaṃ aññānipi anekāni ñāṇasahassāni – etaṃ ñāṇabalaṃ nāma. Idhāpi ñāṇabalameva adhippetaṃ ñāṇañhi akampiyaṭṭhena upatthambhakaṭṭhena ca balanti vuttaṃ.
язхи б̣алзхи саманнааг̇ад̇од̇и язхи д̣̇асахи н̃аан̣аб̣алзхи убзд̇о самубзд̇о. аасабхам̣ таананд̇и сздтадтаанам̣ уд̇д̇амадтаанам̣; аасабхаа ваа буб̣б̣аб̣уд̣̇д̇хаа, д̇зсам̣ таананд̇и ад̇т̇о. аби жа г̇авасад̇аж̇здтаго усабхо, г̇авасахассаж̇здтаго васабхо; важ̇асад̇аж̇здтаго ваа усабхо, важ̇асахассаж̇здтаго васабхо; саб̣б̣аг̇авасздто саб̣б̣абариссаяасахо сзд̇о баасаад̣̇иго махаабхааравахо асанисад̇асад̣̇д̣̇зхиби агамбанийяо нисабхо. со ид̇ха усабход̇и ад̇хиббзд̇о. ид̣̇амби хи д̇асса барияааяаважанам̣. усабхасса ид̣̇анд̇и аасабхам̣. таананд̇и жад̇уухи баад̣̇зхи бат̇авим̣ уббийл̣зд̇ваа ажаладтаанам̣. ид̣̇ам̣ бана аасабхам̣ вияаад̇и аасабхам̣. яат̇зва хи нисабхасан̇каад̇о усабхо усабхаб̣алзна саманнааг̇ад̇о жад̇уухи баад̣̇зхи бат̇авим̣ уббийл̣зд̇ваа ажаладтаанзна д̇идтад̇и, звам̣ д̇ат̇ааг̇ад̇оби д̣̇асахи д̇ат̇ааг̇ад̇аб̣алзхи саманнааг̇ад̇о жад̇уухи взсаараж̇ж̇абаад̣̇зхи адтабарисабат̇авим̣ уббийл̣зд̇ваа сад̣̇звагз логз гзнажи бажжад̇т̇игзна бажжаамид̇д̇зна агамбияо ажаладтаанзна д̇идтад̇и. звам̣ д̇идтамаано жа д̇ам̣ аасабхам̣ таанам̣ бадиж̇аанаад̇и, убаг̇ажчад̇и, на бажжагкаад̇и, ад̇д̇ани ааробзд̇и. д̇зна вуд̇д̇ам̣ ‘‘аасабхам̣ таанам̣ бадиж̇аанаад̇ий’’д̇и.
Yehi balehi samannāgatoti yehi dasahi ñāṇabalehi upeto samupeto. Āsabhaṃ ṭhānanti seṭṭhaṭṭhānaṃ uttamaṭṭhānaṃ; āsabhā vā pubbabuddhā, tesaṃ ṭhānanti attho. Api ca gavasatajeṭṭhako usabho, gavasahassajeṭṭhako vasabho; vajasatajeṭṭhako vā usabho, vajasahassajeṭṭhako vasabho; sabbagavaseṭṭho sabbaparissayasaho seto pāsādiko mahābhāravaho asanisatasaddehipi akampanīyo nisabho. So idha usabhoti adhippeto. Idampi hi tassa pariyāyavacanaṃ. Usabhassa idanti āsabhaṃ. Ṭhānanti catūhi pādehi pathaviṃ uppīḷetvā acalaṭṭhānaṃ. Idaṃ pana āsabhaṃ viyāti āsabhaṃ. Yatheva hi nisabhasaṅkhāto usabho usabhabalena samannāgato catūhi pādehi pathaviṃ uppīḷetvā acalaṭṭhānena tiṭṭhati, evaṃ tathāgatopi dasahi tathāgatabalehi samannāgato catūhi vesārajjapādehi aṭṭhaparisapathaviṃ uppīḷetvā sadevake loke kenaci paccatthikena paccāmittena akampiyo acalaṭṭhānena tiṭṭhati. Evaṃ tiṭṭhamāno ca taṃ āsabhaṃ ṭhānaṃ paṭijānāti, upagacchati, na paccakkhāti, attani āropeti. Tena vuttaṃ ‘‘āsabhaṃ ṭhānaṃ paṭijānātī’’ti.
барисаасууд̇и адтасу барисаасу. сийханаад̣̇ам̣ над̣̇ад̇ийд̇и сздтанаад̣̇ам̣ абхийд̇анаад̣̇ам̣ над̣̇ад̇и, сийханаад̣̇асад̣̇исам̣ ваа наад̣̇ам̣ над̣̇ад̇и. аяамад̇т̇о сийханаад̣̇асуд̇д̇зна д̣̇ийбзд̇аб̣б̣о. яат̇аа ваа сийхо саханад̇о жа хананад̇о жа сийход̇и вужжад̇и, звам̣ д̇ат̇ааг̇ад̇о логад̇хаммаанам̣ саханад̇о бараббаваад̣̇аанан̃жа хананад̇о сийход̇и вужжад̇и. звам̣ вуд̇д̇асса сийхасса наад̣̇ам̣ сийханаад̣̇ам̣. д̇ад̇т̇а яат̇аа сийхо сийхаб̣алзна саманнааг̇ад̇о саб̣б̣ад̇т̇а висаарад̣̇о виг̇ад̇аломахам̣со сийханаад̣̇ам̣ над̣̇ад̇и, звам̣ д̇ат̇ааг̇ад̇асийхоби д̇ат̇ааг̇ад̇аб̣алзхи саманнааг̇ад̇о адтасу барисаасу висаарад̣̇о виг̇ад̇аломахам̣со ‘‘ид̇и рууба’’нд̇иаад̣̇инаа наязна наанаавид̇хад̣̇зсанаавилаасасамбаннам̣ сийханаад̣̇ам̣ над̣̇ад̇и. д̇зна вуд̇д̇ам̣ ‘‘барисаасу сийханаад̣̇ам̣ над̣̇ад̇ий’’д̇и.
Parisāsūti aṭṭhasu parisāsu. Sīhanādaṃ nadatīti seṭṭhanādaṃ abhītanādaṃ nadati, sīhanādasadisaṃ vā nādaṃ nadati. Ayamattho sīhanādasuttena dīpetabbo. Yathā vā sīho sahanato ca hananato ca sīhoti vuccati, evaṃ tathāgato lokadhammānaṃ sahanato parappavādānañca hananato sīhoti vuccati. Evaṃ vuttassa sīhassa nādaṃ sīhanādaṃ. Tattha yathā sīho sīhabalena samannāgato sabbattha visārado vigatalomahaṃso sīhanādaṃ nadati, evaṃ tathāgatasīhopi tathāgatabalehi samannāgato aṭṭhasu parisāsu visārado vigatalomahaṃso ‘‘iti rūpa’’ntiādinā nayena nānāvidhadesanāvilāsasampannaṃ sīhanādaṃ nadati. Tena vuttaṃ ‘‘parisāsu sīhanādaṃ nadatī’’ti.
б̣рахмажаггам̣ бавад̇д̇зд̇ийд̇и зд̇т̇а б̣рахманд̇и сздтам̣ уд̇д̇амам̣ висуд̣̇д̇хам̣. жаггасад̣̇д̣̇о жа банааяам̣ –
Brahmacakkaṃ pavattetīti ettha brahmanti seṭṭhaṃ uttamaṃ visuddhaṃ. Cakkasaddo ca panāyaṃ –
самбад̇д̇ияам̣ лагкан̣з жа, рат̇ан̇г̇з ирияаабат̇з;
Sampattiyaṃ lakkhaṇe ca, rathaṅge iriyāpathe;
д̣̇аанз рад̇анад̇хаммуура, жаггаад̣̇ийсу жа д̣̇иссад̇и;
Dāne ratanadhammūra, cakkādīsu ca dissati;
д̇хаммажаггз ид̇ха мад̇о, д̇ан̃жа д̣̇взд̇хаа вибхааваяз.
Dhammacakke idha mato, tañca dvedhā vibhāvaye.
‘‘жад̇д̇ааримаани, бхигкавз, жаггаани язхи саманнааг̇ад̇аанам̣ д̣̇звамануссаана’’нд̇иаад̣̇ийсу (а. ни. 4.31) хи аяам̣ самбад̇д̇ияам̣ д̣̇иссад̇и. ‘‘хздтаа баад̣̇ад̇алзсу жаггаани ж̇аад̇ааний’’д̇и (д̣̇ий. ни. 2.35) зд̇т̇а лагкан̣з. ‘‘жаггам̣ва вахад̇о бад̣̇а’’нд̇и (д̇ха. ба. 1) зд̇т̇а рат̇ан̇г̇з. ‘‘жад̇ужаггам̣ навад̣̇ваара’’нд̇и (сам̣. ни. 1.29) зд̇т̇а ирияаабат̇з. ‘‘д̣̇ад̣̇ам̣ бхун̃ж̇а маа жа бамаад̣̇о, жаггам̣ бавад̇д̇аяа саб̣б̣абаан̣ина’’нд̇и (ж̇аа. 1.7.149) зд̇т̇а д̣̇аанз. ‘‘д̣̇иб̣б̣ам̣ жаггарад̇анам̣ баад̇урахосий’’д̇и зд̇т̇а рад̇анажаггз. ‘‘маяаа бавад̇д̇ид̇ам̣ жагга’’нд̇и (су. ни. 562) зд̇т̇а д̇хаммажаггз. ‘‘ижчаахад̇асса босасса жаггам̣ бхамад̇и мад̇т̇агз’’д̇и (ж̇аа. 1.1.104; 1.5.103) зд̇т̇а уражаггз. ‘‘курабарияанд̇зна жзби жаггзнаа’’д̇и (д̣̇ий. ни. 1.166) зд̇т̇а бахаран̣ажаггз. ‘‘асанивижагга’’нд̇и (д̣̇ий. ни. 3.61; сам̣. ни. 2.162) зд̇т̇а асаниман̣д̣алз. ид̇ха банааяам̣ д̇хаммажаггз мад̇о.
‘‘Cattārimāni, bhikkhave, cakkāni yehi samannāgatānaṃ devamanussāna’’ntiādīsu (a. ni. 4.31) hi ayaṃ sampattiyaṃ dissati. ‘‘Heṭṭhā pādatalesu cakkāni jātānī’’ti (dī. ni. 2.35) ettha lakkhaṇe. ‘‘Cakkaṃva vahato pada’’nti (dha. pa. 1) ettha rathaṅge. ‘‘Catucakkaṃ navadvāra’’nti (saṃ. ni. 1.29) ettha iriyāpathe. ‘‘Dadaṃ bhuñja mā ca pamādo, cakkaṃ pavattaya sabbapāṇina’’nti (jā. 1.7.149) ettha dāne. ‘‘Dibbaṃ cakkaratanaṃ pāturahosī’’ti ettha ratanacakke. ‘‘Mayā pavattitaṃ cakka’’nti (su. ni. 562) ettha dhammacakke. ‘‘Icchāhatassa posassa cakkaṃ bhamati matthake’’ti (jā. 1.1.104; 1.5.103) ettha uracakke. ‘‘Khurapariyantena cepi cakkenā’’ti (dī. ni. 1.166) ettha paharaṇacakke. ‘‘Asanivicakka’’nti (dī. ni. 3.61; saṃ. ni. 2.162) ettha asanimaṇḍale. Idha panāyaṃ dhammacakke mato.
д̇ам̣ бана д̇хаммажаггам̣ д̣̇увид̇хам̣ ход̇и – бадивзд̇хан̃аан̣ан̃жа д̣̇зсанаан̃аан̣ан̃жа. д̇ад̇т̇а бан̃н̃аабабхаавид̇ам̣ ад̇д̇ано арияапалаавахам̣ бадивзд̇хан̃аан̣ам̣; гарун̣аабабхаавид̇ам̣ саавагаанам̣ арияапалаавахам̣ д̣̇зсанаан̃аан̣ам̣. д̇ад̇т̇а бадивзд̇хан̃аан̣ам̣ уббаж̇ж̇амаанам̣ уббаннанд̇и д̣̇увид̇хам̣. д̇ан̃хи абхинигкаманад̇о яаава арахад̇д̇амаг̇г̇аа уббаж̇ж̇амаанам̣ , палагкан̣з уббаннам̣ наама; д̇усид̇абхаванад̇о ваа яаава махааб̣од̇хибаллан̇гз арахад̇д̇амаг̇г̇аа уббаж̇ж̇амаанам̣, палагкан̣з уббаннам̣ наама; д̣̇ийбан̇гараб̣яаагаран̣ад̇о бадтааяа ваа яаава арахад̇д̇амаг̇г̇аа уббаж̇ж̇амаанам̣ , палагкан̣з уббаннам̣ наама. д̣̇зсанаан̃аан̣амби бавад̇д̇амаанам̣ бавад̇д̇анд̇и д̣̇увид̇хам̣. д̇ан̃хи яаава ан̃н̃аагон̣д̣ан̃н̃асса сод̇аабад̇д̇имаг̇г̇аа бавад̇д̇амаанам̣, палагкан̣з бавад̇д̇ам̣ наама. д̇зсу бадивзд̇хан̃аан̣ам̣ логуд̇д̇арам̣, д̣̇зсанаан̃аан̣ам̣ логияам̣. убхаяамби банзд̇ам̣ ан̃н̃зхи асаад̇хааран̣ам̣ б̣уд̣̇д̇хаанам̣язва орасан̃аан̣ам̣.
Taṃ pana dhammacakkaṃ duvidhaṃ hoti – paṭivedhañāṇañca desanāñāṇañca. Tattha paññāpabhāvitaṃ attano ariyaphalāvahaṃ paṭivedhañāṇaṃ; karuṇāpabhāvitaṃ sāvakānaṃ ariyaphalāvahaṃ desanāñāṇaṃ. Tattha paṭivedhañāṇaṃ uppajjamānaṃ uppannanti duvidhaṃ. Tañhi abhinikkhamanato yāva arahattamaggā uppajjamānaṃ , phalakkhaṇe uppannaṃ nāma; tusitabhavanato vā yāva mahābodhipallaṅke arahattamaggā uppajjamānaṃ, phalakkhaṇe uppannaṃ nāma; dīpaṅkarabyākaraṇato paṭṭhāya vā yāva arahattamaggā uppajjamānaṃ , phalakkhaṇe uppannaṃ nāma. Desanāñāṇampi pavattamānaṃ pavattanti duvidhaṃ. Tañhi yāva aññākoṇḍaññassa sotāpattimaggā pavattamānaṃ, phalakkhaṇe pavattaṃ nāma. Tesu paṭivedhañāṇaṃ lokuttaraṃ, desanāñāṇaṃ lokiyaṃ. Ubhayampi panetaṃ aññehi asādhāraṇaṃ buddhānaṃyeva orasañāṇaṃ.
ид̣̇аани язхи д̣̇асахи б̣алзхи саманнааг̇ад̇о д̇ат̇ааг̇ад̇о аасабхам̣ таанам̣ бадиж̇аанаад̇и, яаани аад̣̇ид̇ова ‘‘д̣̇аса д̇ат̇ааг̇ад̇асса д̇ат̇ааг̇ад̇аб̣алааний’’д̇и нигкид̇д̇аани, д̇аани вид̇т̇аарад̇о д̣̇ассзд̇ум̣ гад̇амаани д̣̇аса? ид̇ха д̇ат̇ааг̇ад̇о таанан̃жа таанад̇од̇иаад̣̇имааха. д̇ад̇т̇а таанан̃жа таанад̇од̇и гааран̣ан̃жа гааран̣ад̇о. гааран̣ан̃хи яасмаа д̇ад̇т̇а палам̣ д̇идтад̇и д̇ад̣̇ааяад̇д̇авуд̇д̇ид̇ааяа уббаж̇ж̇ад̇и жзва бавад̇д̇ад̇и жа, д̇асмаа таананд̇и вужжад̇и. д̇ам̣ бхаг̇аваа ‘‘яз яз д̇хаммаа язсам̣ язсам̣ д̇хаммаанам̣ хзд̇уу бажжаяаа уббаад̣̇ааяа д̇ам̣ д̇ам̣ таана’’нд̇и жа ‘яз яз д̇хаммаа язсам̣ язсам̣ д̇хаммаанам̣ на хзд̇уу на бажжаяаа уббаад̣̇ааяа д̇ам̣ д̇ам̣ адтаана’нд̇и жа баж̇аананд̇о таанан̃жа таанад̇о адтаанан̃жа адтаанад̇о яат̇аабхууд̇ам̣ баж̇аанаад̇и. яамбийд̇и язна н̃аан̣зна. ид̣̇амби д̇ат̇ааг̇ад̇ассаад̇и ид̣̇амби таанаадтаанан̃аан̣ам̣ д̇ат̇ааг̇ад̇асса д̇ат̇ааг̇ад̇аб̣алам̣ наама ход̇ийд̇и ад̇т̇о. звам̣ саб̣б̣абад̣̇зсу яож̇анаа взд̣̇ид̇аб̣б̣аа.
Idāni yehi dasahi balehi samannāgato tathāgato āsabhaṃ ṭhānaṃ paṭijānāti, yāni āditova ‘‘dasa tathāgatassa tathāgatabalānī’’ti nikkhittāni, tāni vitthārato dassetuṃ katamāni dasa? Idha tathāgato ṭhānañca ṭhānatotiādimāha. Tattha ṭhānañca ṭhānatoti kāraṇañca kāraṇato. Kāraṇañhi yasmā tattha phalaṃ tiṭṭhati tadāyattavuttitāya uppajjati ceva pavattati ca, tasmā ṭhānanti vuccati. Taṃ bhagavā ‘‘ye ye dhammā yesaṃ yesaṃ dhammānaṃ hetū paccayā uppādāya taṃ taṃ ṭhāna’’nti ca ‘ye ye dhammā yesaṃ yesaṃ dhammānaṃ na hetū na paccayā uppādāya taṃ taṃ aṭṭhāna’nti ca pajānanto ṭhānañca ṭhānato aṭṭhānañca aṭṭhānato yathābhūtaṃ pajānāti. Yampīti yena ñāṇena. Idampi tathāgatassāti idampi ṭhānāṭṭhānañāṇaṃ tathāgatassa tathāgatabalaṃ nāma hotīti attho. Evaṃ sabbapadesu yojanā veditabbā.
гаммасамаад̣̇аанаананд̇и самаад̣̇ияид̇ваа гад̇аанам̣ гусалаагусалагаммаанам̣; гаммамзва ваа гаммасамаад̣̇аанам̣. таанасо хзд̇усод̇и бажжаяад̇о жзва хзд̇уд̇о жа. д̇ад̇т̇а г̇ад̇иубад̇хигаалабаяог̇аа вибаагасса таанам̣, гаммам̣ хзд̇у.
Kammasamādānānanti samādiyitvā katānaṃ kusalākusalakammānaṃ; kammameva vā kammasamādānaṃ. Ṭhānaso hetusoti paccayato ceva hetuto ca. Tattha gatiupadhikālapayogā vipākassa ṭhānaṃ, kammaṃ hetu.
саб̣б̣ад̇т̇а г̇аамининд̇и саб̣б̣аг̇ад̇иг̇ааминин̃жа аг̇ад̇иг̇ааминин̃жа. бадибад̣̇анд̇и маг̇г̇ам̣. яат̇аабхууд̇ам̣ баж̇аанаад̇ийд̇и б̣ахуусуби мануссзсу згамзва баан̣ам̣ гхаад̇знд̇зсу ‘имасса жзд̇анаа нираяаг̇ааминий бхависсад̇и, имасса д̇иражчаанаяониг̇ааминий’д̇и иминаа наязна згавад̇т̇усмимби гусалаагусалажзд̇анаасан̇каад̇аанам̣ бадибад̇д̇ийнам̣ авибарийд̇ад̇о сабхаавам̣ баж̇аанаад̇и.
Sabbattha gāmininti sabbagatigāminiñca agatigāminiñca. Paṭipadanti maggaṃ. Yathābhūtaṃ pajānātīti bahūsupi manussesu ekameva pāṇaṃ ghātentesu ‘imassa cetanā nirayagāminī bhavissati, imassa tiracchānayonigāminī’ti iminā nayena ekavatthusmimpi kusalākusalacetanāsaṅkhātānaṃ paṭipattīnaṃ aviparītato sabhāvaṃ pajānāti.
анзгад̇хаад̇унд̇и жагкуд̇хаад̇уаад̣̇ийхи гаамад̇хаад̇уаад̣̇ийхи ваа д̇хаад̇уухи б̣ахуд̇хаад̇ум̣. наанаад̇хаад̇унд̇и д̇аасам̣язва д̇хаад̇уунам̣ вилагкан̣ад̇ааяа наанаббагаарад̇хаад̇ум̣. логанд̇и канд̇хааяад̇анад̇хаад̇улогам̣. яат̇аабхууд̇ам̣ баж̇аанаад̇ийд̇и д̇аасам̣ д̇аасам̣ д̇хаад̇уунам̣ авибарийд̇ад̇о сабхаавам̣ бадивиж̇жхад̇и.
Anekadhātunti cakkhudhātuādīhi kāmadhātuādīhi vā dhātūhi bahudhātuṃ. Nānādhātunti tāsaṃyeva dhātūnaṃ vilakkhaṇatāya nānappakāradhātuṃ. Lokanti khandhāyatanadhātulokaṃ. Yathābhūtaṃ pajānātīti tāsaṃ tāsaṃ dhātūnaṃ aviparītato sabhāvaṃ paṭivijjhati.
наанаад̇химуд̇д̇игад̇анд̇и хийнаад̣̇ийхи ад̇химуд̇д̇ийхи наанаад̇химуд̇д̇игабхаавам̣.
Nānādhimuttikatanti hīnādīhi adhimuttīhi nānādhimuttikabhāvaṃ.
барасад̇д̇аананд̇и бад̇хаанасад̇д̇аанам̣. барабуг̇г̇алаананд̇и д̇ад̇о барзсам̣ хийнасад̇д̇аанам̣; згад̇т̇амзва ваа зд̇ам̣ бад̣̇ад̣̇ваяам̣ взнзяяавасзна бана д̣̇взд̇хаа вуд̇д̇ам̣. инд̣̇рияабаробарияад̇д̇анд̇и сад̣̇д̇хаад̣̇ийнам̣ инд̣̇рияаанам̣ барабхааван̃жа абарабхааван̃жа вуд̣дхин̃жа хаанин̃жаад̇и ад̇т̇о.
Parasattānanti padhānasattānaṃ. Parapuggalānanti tato paresaṃ hīnasattānaṃ; ekatthameva vā etaṃ padadvayaṃ veneyyavasena pana dvedhā vuttaṃ. Indriyaparopariyattanti saddhādīnaṃ indriyānaṃ parabhāvañca aparabhāvañca vuḍḍhiñca hāniñcāti attho.
жхаанавимогкасамаад̇хисамаабад̇д̇ийнанд̇и батамаад̣̇ийнам̣ жад̇уннам̣ жхаанаанам̣, ‘‘руубий руубаани бассад̇ий’’д̇иаад̣̇ийнам̣ адтаннам̣ вимогкаанам̣, савид̇аггасавижаараад̣̇ийнам̣ д̇ин̣н̣ам̣ самаад̇хийнам̣, батамаж̇жхаанасамаабад̇д̇иаад̣̇ийнан̃жа наваннам̣ анубуб̣б̣асамаабад̇д̇ийнам̣. сам̣гилзсанд̇и хаанабхааг̇ияад̇хаммам̣. вод̣̇аананд̇и висзсабхааг̇ияад̇хаммам̣. вудтаананд̇и язна гааран̣зна жхаанаад̣̇ийхи вудтаханд̇и, д̇ам̣ гааран̣ам̣.
Jhānavimokkhasamādhisamāpattīnanti paṭhamādīnaṃ catunnaṃ jhānānaṃ, ‘‘rūpī rūpāni passatī’’tiādīnaṃ aṭṭhannaṃ vimokkhānaṃ, savitakkasavicārādīnaṃ tiṇṇaṃ samādhīnaṃ, paṭhamajjhānasamāpattiādīnañca navannaṃ anupubbasamāpattīnaṃ. Saṃkilesanti hānabhāgiyadhammaṃ. Vodānanti visesabhāgiyadhammaṃ. Vuṭṭhānanti yena kāraṇena jhānādīhi vuṭṭhahanti, taṃ kāraṇaṃ.
буб̣б̣зниваасаануссад̇инд̇и буб̣б̣з нивуд̇т̇агканд̇хаануссаран̣ам̣.
Pubbenivāsānussatinti pubbe nivutthakkhandhānussaraṇaṃ.
жуд̇уубабаад̇анд̇и жуд̇ин̃жа убабаад̇ан̃жа.
Cutūpapātanti cutiñca upapātañca.
аасаваанам̣ каяанд̇и гаамаасаваад̣̇ийнам̣ каяасан̇каад̇ам̣ аасаванирод̇хам̣ ниб̣б̣аанам̣.
Āsavānaṃ khayanti kāmāsavādīnaṃ khayasaṅkhātaṃ āsavanirodhaṃ nibbānaṃ.
имаанийд̇и яаани хздтаа ‘‘д̣̇аса д̇ат̇ааг̇ад̇асса д̇ат̇ааг̇ад̇аб̣алааний’’д̇и авожа, имаани д̇аанийд̇и аббанам̣ гарод̇ийд̇и. звамзд̇т̇а анубуб̣б̣абад̣̇аван̣н̣анам̣ н̃ад̇ваа ид̣̇аани яасмаа д̇ат̇ааг̇ад̇о батамам̣язва таанаадтаанан̃аан̣зна взнзяяасад̇д̇аанам̣ аасавагкаяаад̇хиг̇амасса жзва анад̇хиг̇амасса жа таанаадтаанабхууд̇ам̣ гилзсааваран̣аабхаавам̣ бассад̇и, логияасаммаад̣̇идтитаанад̣̇ассанад̇о нияад̇амижчаад̣̇идтитаанаабхаавад̣̇ассанад̇о жа. ат̇а нзсам̣ гаммавибааган̃аан̣зна вибаагааваран̣аабхаавам̣ бассад̇и , д̇ихзд̇угабадисанд̇хид̣̇ассанад̇о. саб̣б̣ад̇т̇аг̇ааминийбадибад̣̇аан̃аан̣зна гаммааваран̣аабхаавам̣ бассад̇и, аананд̇арияагаммаабхаавад̣̇ассанад̇о. звам̣ анааваран̣аанам̣ анзгад̇хаад̇унаанаад̇хаад̇ун̃аан̣зна анугуулад̇хаммад̣̇зсанад̇т̇ам̣ жарияаависзсам̣ бассад̇и, д̇хаад̇увзмад̇д̇ад̣̇ассанад̇о. ат̇а нзсам̣ наанаад̇химуд̇д̇игад̇аан̃аан̣зна ад̇химуд̇д̇им̣ бассад̇и, баяог̇ам̣ анаад̣̇ияид̇вааби ад̇химуд̇д̇ивасзна д̇хаммад̣̇зсанад̇т̇ам̣. ат̇звам̣ д̣̇идтаад̇химуд̇д̇ийнам̣ яат̇аасад̇д̇и яат̇ааб̣алам̣ д̇хаммам̣ д̣̇зсзд̇ум̣ инд̣̇рияабаробарияад̇д̇ан̃аан̣зна инд̣̇рияабаробарияад̇д̇ам̣ бассад̇и, сад̣̇д̇хаад̣̇ийнам̣ д̇игкамуд̣̇убхаавад̣̇ассанад̇о. звам̣ барин̃н̃аад̇инд̣̇рияабаробарияад̇д̇ааби банзд̇з сажз д̣̇уурз хонд̇и, ат̇а жхаанаад̣̇ибарин̃н̃аан̣зна жхаанаад̣̇ийсу васийбхууд̇ад̇д̇аа ид̣̇д̇хивисзсзна киббам̣ убаг̇ажчад̇и. убаг̇анд̇ваа жа нзсам̣ буб̣б̣зниваасаануссад̇ин̃аан̣зна буб̣б̣аж̇аад̇ибхааванам̣, д̣̇иб̣б̣ажагкаанубхаавад̇о бад̇д̇аб̣б̣зна жзд̇обарияан̃аан̣зна самбад̇д̇ижид̇д̇ависзсам̣ бассанд̇о аасавагкаяан̃аан̣аанубхаавзна аасавагкаяаг̇ааминияаа бадибад̣̇ааяа виг̇ад̇асаммохад̇д̇аа аасавагкаяааяа д̇хаммам̣ д̣̇зсзд̇и. д̇асмаа иминаа ануггамзна имаани д̣̇асаб̣алаани вуд̇д̇аанийд̇и взд̣̇ид̇аб̣б̣аани. аяам̣ д̇аава маад̇игааяа ад̇т̇аван̣н̣анаа.
Imānīti yāni heṭṭhā ‘‘dasa tathāgatassa tathāgatabalānī’’ti avoca, imāni tānīti appanaṃ karotīti. Evamettha anupubbapadavaṇṇanaṃ ñatvā idāni yasmā tathāgato paṭhamaṃyeva ṭhānāṭṭhānañāṇena veneyyasattānaṃ āsavakkhayādhigamassa ceva anadhigamassa ca ṭhānāṭṭhānabhūtaṃ kilesāvaraṇābhāvaṃ passati, lokiyasammādiṭṭhiṭhānadassanato niyatamicchādiṭṭhiṭhānābhāvadassanato ca. Atha nesaṃ kammavipākañāṇena vipākāvaraṇābhāvaṃ passati , tihetukapaṭisandhidassanato. Sabbatthagāminīpaṭipadāñāṇena kammāvaraṇābhāvaṃ passati, ānantariyakammābhāvadassanato. Evaṃ anāvaraṇānaṃ anekadhātunānādhātuñāṇena anukūladhammadesanatthaṃ cariyāvisesaṃ passati, dhātuvemattadassanato. Atha nesaṃ nānādhimuttikatāñāṇena adhimuttiṃ passati, payogaṃ anādiyitvāpi adhimuttivasena dhammadesanatthaṃ. Athevaṃ diṭṭhādhimuttīnaṃ yathāsatti yathābalaṃ dhammaṃ desetuṃ indriyaparopariyattañāṇena indriyaparopariyattaṃ passati, saddhādīnaṃ tikkhamudubhāvadassanato. Evaṃ pariññātindriyaparopariyattāpi panete sace dūre honti, atha jhānādipariññāṇena jhānādīsu vasībhūtattā iddhivisesena khippaṃ upagacchati. Upagantvā ca nesaṃ pubbenivāsānussatiñāṇena pubbajātibhāvanaṃ, dibbacakkhānubhāvato pattabbena cetopariyañāṇena sampatticittavisesaṃ passanto āsavakkhayañāṇānubhāvena āsavakkhayagāminiyā paṭipadāya vigatasammohattā āsavakkhayāya dhammaṃ deseti. Tasmā iminā anukkamena imāni dasabalāni vuttānīti veditabbāni. Ayaṃ tāva mātikāya atthavaṇṇanā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / вибхан̇г̇абаал̣и • Vibhaṅgapāḷi / 16. н̃аан̣авибхан̇г̇о • 16. Ñāṇavibhaṅgo
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-мууладийгаа • Vibhaṅga-mūlaṭīkā / 16. н̃аан̣авибхан̇г̇о • 16. Ñāṇavibhaṅgo
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-анудийгаа • Vibhaṅga-anuṭīkā / 16. н̃аан̣авибхан̇г̇о • 16. Ñāṇavibhaṅgo
