| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
(10.) த³ஸகனித்³தே³ஸவண்ணனா
(10.) Dasakaniddesavaṇṇanā
966. த³ஸகனித்³தே³ஸே கிலேஸா ஏவ கிலேஸவத்தூ²னி. ஆகா⁴தவத்தூ²னி பனெத்த² ‘‘அனத்த²ங் மே அசரீ’’திஆதீ³னங் வஸேன அவிகோபேதப்³பே³ கா²ணுகண்டகாதி³ம்ஹிபி அட்டா²னே உப்பன்னாகா⁴தேன ஸத்³தி⁴ங் வுத்தானி.
966. Dasakaniddese kilesā eva kilesavatthūni. Āghātavatthūni panettha ‘‘anatthaṃ me acarī’’tiādīnaṃ vasena avikopetabbe khāṇukaṇṭakādimhipi aṭṭhāne uppannāghātena saddhiṃ vuttāni.
970. மிச்ச²த்தேஸு மிச்சா²ஞாணந்தி பாபகிரியாஸு உபாயசிந்தாவஸேன பாபங் கத்வா ‘ஸுகதங் மயா’தி பச்சவெக்க²ணாகாரேன உப்பன்னோ மோஹோ. மிச்சா²விமுத்தீதி அவிமுத்தஸ்ஸேவ ஸதோ விமுத்தஸஞ்ஞிதா. ஸேஸங் ஸப்³ப³த்த² உத்தானத்த²மேவாதி.
970. Micchattesu micchāñāṇanti pāpakiriyāsu upāyacintāvasena pāpaṃ katvā ‘sukataṃ mayā’ti paccavekkhaṇākārena uppanno moho. Micchāvimuttīti avimuttasseva sato vimuttasaññitā. Sesaṃ sabbattha uttānatthamevāti.
த³ஸகனித்³தே³ஸவண்ணனா.
Dasakaniddesavaṇṇanā.
தண்ஹாவிசரிதனித்³தே³ஸவண்ணனா
Taṇhāvicaritaniddesavaṇṇanā
973. தண்ஹாவிசரிதனித்³தே³ஸே தண்ஹாவிசரிதானீதி தண்ஹாஸமுதா³சாரா தண்ஹாபவத்தியோ. அஜ்ஜ²த்திகஸ்ஸ உபாதா³யாதி அஜ்ஜ²த்திகங் க²ந்த⁴பஞ்சகங் உபாதா³ய. இத³ஞ்ஹி உபயோக³த்தே² ஸாமிவசனங். அஸ்மீதி ஹோதீதி யதே³தங் அஜ்ஜ²த்தங் க²ந்த⁴பஞ்சகங் உபாதா³ய தண்ஹாமானதி³ட்டி²வஸேன ஸமூஹகா³ஹதோ ‘அஸ்மீ’தி ஹோதி, தஸ்மிங் ஸதீதி அத்தோ². இத்த²ஸ்மீதி ஹோதீதிஆதீ³ஸு பன ஏவங் ஸமூஹதோ ‘அஹ’ந்தி க³ஹணே ஸதி ததோ அனுபனிதா⁴ய ச உபனிதா⁴ய சாதி த்³விதா⁴ க³ஹணங் ஹோதி. தத்த² அனுபனிதா⁴யாதி அஞ்ஞங் ஆகாரங் அனுபக³ம்ம ஸகபா⁴வமேவ ஆரம்மணங் கத்வா ‘இத்த²ஸ்மீ’தி ஹோதி; க²த்தியாதீ³ஸு ‘இத³ங்பகாரோ அஹ’ந்தி ஏவங் தண்ஹாமானதி³ட்டி²வஸேன ஹோதீதி அத்தோ². இத³ங் தாவ அனுபனிதா⁴ய க³ஹணங். உபனிதா⁴ய க³ஹணங் பன து³வித⁴ங் ஹோதி – ஸமதோ ச அஸமதோ ச. தங் த³ஸ்ஸேதுங் ஏவஸ்மீதி ச அஞ்ஞதா²ஸ்மீதி ச வுத்தங். தத்த² ஏவஸ்மீதி இத³ங் ஸமதோ உபனிதா⁴ய க³ஹணங்; யதா² அயங் க²த்தியோ, யதா² அயங் ப்³ராஹ்மணோ, ஏவங் அஹம்பீதி அத்தோ². அஞ்ஞதா²ஸ்மீதி இத³ங் பன அஸமதோ க³ஹணங்; யதா²யங் க²த்தியோ, யதா²யங் ப்³ராஹ்மணோ, ததோ அஞ்ஞதா² அஹங் ஹீனோ வா அதி⁴கோ வாதி அத்தோ². இமானி தாவ பச்சுப்பன்னவஸேன சத்தாரி தண்ஹாவிசரிதானி. ப⁴விஸ்ஸந்திஆதீ³னி பன சத்தாரி அனாக³தவஸேன வுத்தானி. ஸேஸங் புரிமசதுக்கே வுத்தனயேனேவ அத்தோ² வேதி³தப்³போ³. அஸ்மீதி ஸஸ்ஸதோ அஸ்மி. ஸாதஸ்மீதி அஸஸ்ஸதோ அஸ்மி. அஸஸ்மீதி ஸதஸ்மீதி வா பாடோ². தத்த² அத்தீ²தி அஸங்; நிச்சஸ்ஸேதங் அதி⁴வசனங். ஸீத³தீதி ஸதங்; அனிச்சஸ்ஸேதங் அதி⁴வசனங். இதி இமானி த்³வே ஸஸ்ஸதுச்சே²த³வஸேன வுத்தானீதி வேதி³தப்³பா³னி. இதோ பரானி ஸியந்திஆதீ³னி சத்தாரி ஸங்ஸயபரிவிதக்கவஸேன வுத்தானி. தானி புரிமசதுக்கே வுத்தனயேனேவ அத்த²தோ வேதி³தப்³பா³னி. அபாஹங் ஸியந்திஆதீ³னி பன சத்தாரி ‘‘அபி நாமாஹங் ப⁴வெய்ய’’ந்தி ஏவங் பத்த²னாகப்பனவஸேன வுத்தானி. தானி புரிமசதுக்கே வுத்தனயேனேவ வேதி³தப்³பா³னி. ஏவமேதேஸு –
973. Taṇhāvicaritaniddese taṇhāvicaritānīti taṇhāsamudācārā taṇhāpavattiyo. Ajjhattikassa upādāyāti ajjhattikaṃ khandhapañcakaṃ upādāya. Idañhi upayogatthe sāmivacanaṃ. Asmīti hotīti yadetaṃ ajjhattaṃ khandhapañcakaṃ upādāya taṇhāmānadiṭṭhivasena samūhagāhato ‘asmī’ti hoti, tasmiṃ satīti attho. Itthasmīti hotītiādīsu pana evaṃ samūhato ‘aha’nti gahaṇe sati tato anupanidhāya ca upanidhāya cāti dvidhā gahaṇaṃ hoti. Tattha anupanidhāyāti aññaṃ ākāraṃ anupagamma sakabhāvameva ārammaṇaṃ katvā ‘itthasmī’ti hoti; khattiyādīsu ‘idaṃpakāro aha’nti evaṃ taṇhāmānadiṭṭhivasena hotīti attho. Idaṃ tāva anupanidhāya gahaṇaṃ. Upanidhāya gahaṇaṃ pana duvidhaṃ hoti – samato ca asamato ca. Taṃ dassetuṃ evasmīti ca aññathāsmīti ca vuttaṃ. Tattha evasmīti idaṃ samato upanidhāya gahaṇaṃ; yathā ayaṃ khattiyo, yathā ayaṃ brāhmaṇo, evaṃ ahampīti attho. Aññathāsmīti idaṃ pana asamato gahaṇaṃ; yathāyaṃ khattiyo, yathāyaṃ brāhmaṇo, tato aññathā ahaṃ hīno vā adhiko vāti attho. Imāni tāva paccuppannavasena cattāri taṇhāvicaritāni. Bhavissantiādīni pana cattāri anāgatavasena vuttāni. Sesaṃ purimacatukke vuttanayeneva attho veditabbo. Asmīti sassato asmi. Sātasmīti asassato asmi. Asasmīti satasmīti vā pāṭho. Tattha atthīti asaṃ; niccassetaṃ adhivacanaṃ. Sīdatīti sataṃ; aniccassetaṃ adhivacanaṃ. Iti imāni dve sassatucchedavasena vuttānīti veditabbāni. Ito parāni siyantiādīni cattāri saṃsayaparivitakkavasena vuttāni. Tāni purimacatukke vuttanayeneva atthato veditabbāni. Apāhaṃ siyantiādīni pana cattāri ‘‘api nāmāhaṃ bhaveyya’’nti evaṃ patthanākappanavasena vuttāni. Tāni purimacatukke vuttanayeneva veditabbāni. Evametesu –
த்³வே தி³ட்டி²ஸீஸா சத்தாரோ, ஸுத்³த⁴ஸீஸா ஸீஸமூலகா;
Dve diṭṭhisīsā cattāro, suddhasīsā sīsamūlakā;
தயோ தயோதி ஏதானி, அட்டா²ரஸ விபா⁴வயே.
Tayo tayoti etāni, aṭṭhārasa vibhāvaye.
ஏதேஸு ஹி ஸஸ்ஸதுச்சே²த³வஸேன வுத்தா த்³வே தி³ட்டி²ஸீஸா நாம. அஸ்மீதி, ப⁴விஸ்ஸந்தி, ஸியந்தி, அபாஹங் ஸியந்தி ஏதே சத்தாரோ ஸுத்³த⁴ஸீஸாஏவ. இத்த²ஸ்மீதி ஆத³யோ தயோ தயோதி த்³வாத³ஸ ஸீஸமூலகா நாமாதி. ஏவமேதே த்³வே தி³ட்டி²ஸீஸா, சத்தாரோ ஸுத்³த⁴ஸீஸா, த்³வாத³ஸ ஸீஸமூலகாதி அட்டா²ரஸ தண்ஹாவிசரிதத⁴ம்மா வேதி³தப்³பா³.
Etesu hi sassatucchedavasena vuttā dve diṭṭhisīsā nāma. Asmīti, bhavissanti, siyanti, apāhaṃ siyanti ete cattāro suddhasīsāeva. Itthasmīti ādayo tayo tayoti dvādasa sīsamūlakā nāmāti. Evamete dve diṭṭhisīsā, cattāro suddhasīsā, dvādasa sīsamūlakāti aṭṭhārasa taṇhāvicaritadhammā veditabbā.
974. இதா³னி படிபாடியாவ தே த⁴ம்மே பா⁴ஜெத்வா த³ஸ்ஸேதுங் கத²ஞ்ச அஸ்மீதி ஹோதீதிஆதி³ ஆரத்³த⁴ங். தத்த² கஞ்சி த⁴ம்மங் அனவகாரிங் கரித்வாதி ரூபவேத³னாதீ³ஸு கஞ்சி ஏகத⁴ம்மம்பி அவினிப்³போ⁴க³ங் கத்வா, ஏகேகதோ அக்³க³ஹெத்வா, ஸமூஹதோவ க³ஹெத்வாதி அத்தோ². அஸ்மீதி ச²ந்த³ங் படிலப⁴தீதி பஞ்சக்க²ந்தே⁴ நிரவஸேஸதோ க³ஹெத்வா ‘அஹ’ந்தி தண்ஹங் படிலப⁴தி. மானதி³ட்டீ²ஸுபி ஏஸேவ நயோ. தத்த² கிஞ்சாபி அயங் தண்ஹாவிசரிதனித்³தே³ஸோ, மானதி³ட்டி²யோ பன ந வினா தண்ஹாய, தஸ்மா ததே³கட்ட²வஸேன இத⁴ வுத்தா. தண்ஹாஸீஸேன வா பபஞ்சத்தயம்பி உத்³தி³ட்ட²ங். தங் உத்³தே³ஸானுரூபேனேவ நித்³தி³ஸிதும்பி மானதி³ட்டி²யோ க³ஹிதா. தண்ஹாபபஞ்சங் வா த³ஸ்ஸெந்தோ தேனேவ ஸத்³தி⁴ங் ஸேஸபபஞ்சேபி த³ஸ்ஸேதுங் ஏவமாஹ.
974. Idāni paṭipāṭiyāva te dhamme bhājetvā dassetuṃ kathañca asmīti hotītiādi āraddhaṃ. Tattha kañci dhammaṃ anavakāriṃ karitvāti rūpavedanādīsu kañci ekadhammampi avinibbhogaṃ katvā, ekekato aggahetvā, samūhatova gahetvāti attho. Asmīti chandaṃ paṭilabhatīti pañcakkhandhe niravasesato gahetvā ‘aha’nti taṇhaṃ paṭilabhati. Mānadiṭṭhīsupi eseva nayo. Tattha kiñcāpi ayaṃ taṇhāvicaritaniddeso, mānadiṭṭhiyo pana na vinā taṇhāya, tasmā tadekaṭṭhavasena idha vuttā. Taṇhāsīsena vā papañcattayampi uddiṭṭhaṃ. Taṃ uddesānurūpeneva niddisitumpi mānadiṭṭhiyo gahitā. Taṇhāpapañcaṃ vā dassento teneva saddhiṃ sesapapañcepi dassetuṃ evamāha.
தஸ்மிங் ஸதி இமானி பபஞ்சிதானீதி தஸ்மிங் ‘‘அஸ்மீதி ச²ந்த³ங் படிலப⁴தீ’’திஆதி³னா நயேன வுத்தே பபஞ்சத்தயே ஸதி புன இமானி ‘‘இத்த²ஸ்மீதி வா’’திஆதீ³னி பபஞ்சிதானி ஹொந்தீதி அத்தோ².
Tasmiṃ sati imāni papañcitānīti tasmiṃ ‘‘asmīti chandaṃ paṭilabhatī’’tiādinā nayena vutte papañcattaye sati puna imāni ‘‘itthasmīti vā’’tiādīni papañcitāni hontīti attho.
க²த்தியொஸ்மீதிஆதீ³ஸு அபி⁴ஸேகஸேனாமச்சாதி³னா ‘க²த்தியோ அஹங்’, மந்தஜ்ஜே²ன போரோஹிச்சாதி³னா ‘ப்³ராஹ்மணோ அஹங்’, கஸிகோ³ரக்கா²தி³னா ‘வெஸ்ஸோ அஹங்’, அஸிதப்³யாப⁴ங்கி³தாய ‘ஸுத்³தோ³ அஹங்’ , கி³ஹிப்³யஞ்ஜனேன ‘க³ஹட்டோ² அஹ’ந்தி இமினா நயேன அத்தோ² வேதி³தப்³போ³. ஏவங் இத்த²ஸ்மீதி ஹோதீதி ஏவங் க²த்தியாதீ³ஸு க²த்தியாதி³ப்பகாரங் அத்தனி உப்பாத³யித்வா ‘இத்த²ங்பகாரோ அஹ’ந்தி ஹோதி.
Khattiyosmītiādīsu abhisekasenāmaccādinā ‘khattiyo ahaṃ’, mantajjhena porohiccādinā ‘brāhmaṇo ahaṃ’, kasigorakkhādinā ‘vesso ahaṃ’, asitabyābhaṅgitāya ‘suddo ahaṃ’ , gihibyañjanena ‘gahaṭṭho aha’nti iminā nayena attho veditabbo. Evaṃ itthasmīti hotīti evaṃ khattiyādīsu khattiyādippakāraṃ attani uppādayitvā ‘itthaṃpakāro aha’nti hoti.
யதா² ஸோ க²த்தியோதிஆதீ³ஸு ‘யதா² ஸோ அபி⁴ஸேகஸேனாமச்சாதி³னா க²த்தியோ, ததா² ‘அஹம்பி க²த்தியோ’தி இமினா நயேன அத்தோ² வேதி³தப்³போ³. து³தியனயே ‘யதா² ஸோ அபி⁴ஸேகஸேனாமச்சாதி³னா க²த்தியோ, நாஹங் ததா² க²த்தியோ; அஹங் பன ததோ ஹீனோ வா ஸெட்டோ² வா’தி இமினா நயேன அத்தோ² வேதி³தப்³போ³. ப⁴விஸ்ஸந்திஆதி³னித்³தே³ஸாதீ³ஸுபி ஏஸேவ நயோ.
Yathā so khattiyotiādīsu ‘yathā so abhisekasenāmaccādinā khattiyo, tathā ‘ahampi khattiyo’ti iminā nayena attho veditabbo. Dutiyanaye ‘yathā so abhisekasenāmaccādinā khattiyo, nāhaṃ tathā khattiyo; ahaṃ pana tato hīno vā seṭṭho vā’ti iminā nayena attho veditabbo. Bhavissantiādiniddesādīsupi eseva nayo.
975. ஏவங் அஜ்ஜ²த்திகஸ்ஸ உபாதா³ய தண்ஹாவிசரிதானி பா⁴ஜெத்வா இதா³னி பா³ஹிரஸ்ஸ உபாதா³ய தண்ஹாவிசரிதானி பா⁴ஜேதுங் தத்த² கதமானீதிஆதி³மாஹ. தத்த² பா³ஹிரஸ்ஸ உபாதா³யாதி பா³ஹிரங் க²ந்த⁴பஞ்சகங் உபாதா³ய. இத³ம்பி ஹி உபயோக³த்தே² ஸாமிவசனங். இமினாதி இமினா ரூபேன வா…பே॰… விஞ்ஞாணேன வா. அவஸேஸங் பன உத்³தே³ஸவாரே தாவ வுத்தனயேனேவ வேதி³தப்³ப³ங்.
975. Evaṃ ajjhattikassa upādāya taṇhāvicaritāni bhājetvā idāni bāhirassa upādāya taṇhāvicaritāni bhājetuṃ tattha katamānītiādimāha. Tattha bāhirassa upādāyāti bāhiraṃ khandhapañcakaṃ upādāya. Idampi hi upayogatthe sāmivacanaṃ. Imināti iminā rūpena vā…pe… viññāṇena vā. Avasesaṃ pana uddesavāre tāva vuttanayeneva veditabbaṃ.
976. நித்³தே³ஸவாரே பன அவகாரிங் கரித்வாதி வினிப்³போ⁴க³ங் கத்வா. இமினா அஸ்மீதி ச²ந்த³ங் படிலப⁴தீதிஆதீ³ஸு இமினா ரூபேன வா…பே॰… விஞ்ஞாணேன வாதி ஏவங் பஞ்சக்க²ந்தே⁴ ஏகதே³ஸதோ க³ஹெத்வா இமினா ‘அஹ’ந்தி ச²ந்தா³தீ³னி படிலப⁴தீதி ஏவமத்தோ² வேதி³தப்³போ³.
976. Niddesavāre pana avakāriṃ karitvāti vinibbhogaṃ katvā. Iminā asmīti chandaṃ paṭilabhatītiādīsu iminā rūpena vā…pe… viññāṇena vāti evaṃ pañcakkhandhe ekadesato gahetvā iminā ‘aha’nti chandādīni paṭilabhatīti evamattho veditabbo.
இமினா க²த்தியொஸ்மீதிஆதீ³ஸு ‘இமினா ச²த்தேன வா க²க்³கே³ன வா அபி⁴ஸேகஸேனாமச்சாதி³னா வா க²த்தியோ அஹ’ந்தி ஏவங் புரிமனயேனேவ அத்தோ² வேதி³தப்³போ³. இமினாதி பத³மத்தமேவ ஹெத்த² விஸேஸோ.
Iminā khattiyosmītiādīsu ‘iminā chattena vā khaggena vā abhisekasenāmaccādinā vā khattiyo aha’nti evaṃ purimanayeneva attho veditabbo. Imināti padamattameva hettha viseso.
யதா² ஸோ க²த்தியோதிஆதீ³ஸுபி இமினாதி வுத்தபத³மேவ விஸேஸோ. தஸ்மா தஸ்ஸ வஸேன யதா² க²த்தியோ, ஏவங் அஹம்பி இமினா க²க்³கே³ன வா ச²த்தேன வா அபி⁴ஸேகஸேனாமச்சாதி³னா வா க²த்தியோதி ஏவங் யோஜெத்வா ஸப்³ப³பதே³ஸு அத்தோ² வேதி³தப்³போ³. இமினா நிச்சொஸ்மீதி பஞ்சக்க²ந்தே⁴ அனவகாரிங் கத்வா ரூபாதீ³ஸு ஏகமேவ த⁴ம்மங் ‘அஹ’ந்தி க³ஹெத்வா ‘இமினா க²க்³கே³ன வா ச²த்தேன வா அஹங் நிச்சோ து⁴வோ’தி மஞ்ஞதி. உச்சே²த³தி³ட்டி²யம்பி ஏஸேவ நயோ. ஸேஸங் ஸப்³ப³த்த² வுத்தனயேனேவ வேதி³தப்³ப³ங்.
Yathā so khattiyotiādīsupi imināti vuttapadameva viseso. Tasmā tassa vasena yathā khattiyo, evaṃ ahampi iminā khaggena vā chattena vā abhisekasenāmaccādinā vā khattiyoti evaṃ yojetvā sabbapadesu attho veditabbo. Iminā niccosmīti pañcakkhandhe anavakāriṃ katvā rūpādīsu ekameva dhammaṃ ‘aha’nti gahetvā ‘iminā khaggena vā chattena vā ahaṃ nicco dhuvo’ti maññati. Ucchedadiṭṭhiyampi eseva nayo. Sesaṃ sabbattha vuttanayeneva veditabbaṃ.
இதி ஏவரூபானி அதீதானி ச²த்திங்ஸாதி ஏகேகஸ்ஸ புக்³க³லஸ்ஸ அதீதே ச²த்திங்ஸ. அனாக³தானி ச²த்திங்ஸாதி ஏகேகஸ்ஸேவ அனாக³தே ச²த்திங்ஸ. பச்சுப்பன்னானி ச²த்திங்ஸாதி ஏகேகஸ்ஸ வா புக்³க³லஸ்ஸ யதா²லாப⁴வஸேன ப³ஹுனங் வா பச்சுப்பன்னே ச²த்திங்ஸ. ஸப்³ப³ஸத்தானங் பன ஏகங்ஸேனேவ அதீதே ச²த்திங்ஸ, அனாக³தே ச²த்திங்ஸ, பச்சுப்பன்னே ச²த்திங்ஸாதி வேதி³தப்³பா³னி. அனந்தா ஹி அஸதி³ஸதண்ஹாமானதி³ட்டி²பே⁴தா³ ஸத்தா. அட்ட²தண்ஹாவிசரிதஸதங் ஹோதீதி எத்த² பன அட்ட²ஸதஸங்கா²தங் தண்ஹாவிசரிதங் ஹோதீதி ஏவமத்தோ² த³ட்ட²ப்³போ³. ஸேஸங் ஸப்³ப³த்த² உத்தானத்த²மேவாதி.
Iti evarūpāni atītāni chattiṃsāti ekekassa puggalassa atīte chattiṃsa. Anāgatāni chattiṃsāti ekekasseva anāgate chattiṃsa. Paccuppannāni chattiṃsāti ekekassa vā puggalassa yathālābhavasena bahunaṃ vā paccuppanne chattiṃsa. Sabbasattānaṃ pana ekaṃseneva atīte chattiṃsa, anāgate chattiṃsa, paccuppanne chattiṃsāti veditabbāni. Anantā hi asadisataṇhāmānadiṭṭhibhedā sattā. Aṭṭhataṇhāvicaritasataṃ hotīti ettha pana aṭṭhasatasaṅkhātaṃ taṇhāvicaritaṃ hotīti evamattho daṭṭhabbo. Sesaṃ sabbattha uttānatthamevāti.
தண்ஹாவிசரிதனித்³தே³ஸவண்ணனா.
Taṇhāvicaritaniddesavaṇṇanā.
தி³ட்டி²க³தனித்³தே³ஸவண்ணனா
Diṭṭhigataniddesavaṇṇanā
977. தி³ட்டி²க³தனித்³தே³ஸே ப்³ரஹ்மஜாலே வெய்யாகரணேதி ப்³ரஹ்மஜாலனாமகே வெய்யாகரணே, தீ³க⁴னிகாயஸ்ஸ பட²மஸுத்தந்தே. வுத்தானி ப⁴க³வதாதி ஸத்தா²ரா ஸயங் ஆஹச்ச பா⁴ஸிதானி. சத்தாரோ ஸஸ்ஸதவாதா³திஆதீ³ஸு ‘‘தே ச பொ⁴ந்தோ ஸமணப்³ராஹ்மணா கிமாக³ம்ம கிமாரப்³ப⁴ ஸஸ்ஸதவாதா³ ஸஸ்ஸதங் அத்தானஞ்ச லோகஞ்ச பஞ்ஞாபெந்தி சதூஹி வத்தூ²ஹீ’’திஆதி³னா (தீ³॰ நி॰ 1.29-30) ப்³ரஹ்மஜாலே வுத்தனயேனேவ பபே⁴தோ³ ச அத்தோ² ச வேதி³தப்³போ³தி.
977. Diṭṭhigataniddese brahmajāle veyyākaraṇeti brahmajālanāmake veyyākaraṇe, dīghanikāyassa paṭhamasuttante. Vuttāni bhagavatāti satthārā sayaṃ āhacca bhāsitāni. Cattāro sassatavādātiādīsu ‘‘te ca bhonto samaṇabrāhmaṇā kimāgamma kimārabbha sassatavādā sassataṃ attānañca lokañca paññāpenti catūhi vatthūhī’’tiādinā (dī. ni. 1.29-30) brahmajāle vuttanayeneva pabhedo ca attho ca veditabboti.
ஸம்மோஹவினோத³னியா விப⁴ங்க³ட்ட²கதா²ய
Sammohavinodaniyā vibhaṅgaṭṭhakathāya
கு²த்³த³கவத்து²விப⁴ங்க³வண்ணனா நிட்டி²தா.
Khuddakavatthuvibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
