Library / Tipiṭaka / তিপিটক • Tipiṭaka / সম্মোহৰিনোদনী-অট্ঠকথা • Sammohavinodanī-aṭṭhakathā

    (১০.) দসকনিদ্দেসৰণ্ণনা

    (10.) Dasakaniddesavaṇṇanā

    পঠমবলনিদ্দেসো

    Paṭhamabalaniddeso

    ৮০৯. দসৰিধেন ঞাণৰত্থুনিদ্দেসে অট্ঠানন্তি হেতুপটিক্খেপো। অনৰকাসোতি পচ্চযপটিক্খেপো। উভযেনাপি কারণমেৰ পটিক্খিপতি। কারণঞ্হি তদাযত্তৰুত্তিতায অত্তনো ফলস্স ঠানন্তি চ অৰকাসোতি চ ৰুচ্চতি। যন্তি যেন কারণেন। দিট্ঠিসম্পন্নোতি মগ্গদিট্ঠিযা সম্পন্নো সোতাপন্নো অরিযসাৰকো। কঞ্চি সঙ্খারন্তি চতুভূমকেসু সঙ্খতসঙ্খারেসু কঞ্চি একং সঙ্খারম্পি। নিচ্চতো উপগচ্ছেয্যাতি নিচ্চোতি গণ্হেয্য। নেতং ঠানং ৰিজ্জতীতি এতং কারণং নত্থি, ন উপলব্ভতি। যং পুথুজ্জনোতি যেন কারণেন পুথুজ্জনো। ঠানমেতং ৰিজ্জতীতি এতং কারণং অত্থি; সস্সতদিট্ঠিযা হি সো তেভূমকেসু সঙ্খারেসু কঞ্চি সঙ্খারং নিচ্চতো গণ্হেয্যাতি অত্থো। চতুত্থভূমকসঙ্খারো পন তেজুস্সদত্তা দিৰসং সন্তত্তো অযোগুল়ো ৰিয মক্খিকানং দিট্ঠিযা ৰা অঞ্ঞেসং ৰা অকুসলানং আরম্মণং ন হোতি। ইমিনা নযেন কঞ্চি সঙ্খারং সুখতোতিআদীসুপি অত্থো ৰেদিতব্বো। সুখতো উপগচ্ছেয্যাতি ‘‘একন্তসুখী অত্তা হোতি অরোগো পরম্মরণা’’তি (ম॰ নি॰ ৩.২১) এৰং অত্তদিট্ঠিৰসেন সুখতো গাহং সন্ধাযেতং ৰুত্তং। দিট্ঠিৰিপ্পযুত্তচিত্তেন পন অরিযসাৰকো পরিল়াহাভিভূতো পরিল়াহৰূপসমত্থং, মত্তহত্থীপরিতাসিতো ৰিয, সুচিকামো পোক্খব্রাহ্মণো গূথং কঞ্চি সঙ্খারং সুখতো উপগচ্ছতি। অত্তৰাদে কসিণাদিপণ্ণত্তিসঙ্গহত্থং সঙ্খারন্তি অৰত্ৰা কঞ্চি ধম্মন্তি ৰুত্তং। ইধাপি অরিযসাৰকস্স চতুভূমকৰসেন পরিচ্ছেদো ৰেদিতব্বো, পুথুজ্জনস্স তেভূমকৰসেন; সব্বৰারেসু ৰা অরিযসাৰকস্সাপি তেভূমকৰসেনেৰ পরিচ্ছেদো ৰট্টতি। যং যঞ্হি পুথুজ্জনো গণ্হাতি, ততো ততো অরিযসাৰকো গাহং ৰিনিৰেঠেতি। পুথুজ্জনো হি যং যং নিচ্চং সুখং অত্তাতি গণ্হাতি, তং তং অরিযসাৰকো অনিচ্চং দুক্খং অনত্তাতি গণ্হন্তো গাহং ৰিনিৰেঠেতি।

    809. Dasavidhena ñāṇavatthuniddese aṭṭhānanti hetupaṭikkhepo. Anavakāsoti paccayapaṭikkhepo. Ubhayenāpi kāraṇameva paṭikkhipati. Kāraṇañhi tadāyattavuttitāya attano phalassa ṭhānanti ca avakāsoti ca vuccati. Yanti yena kāraṇena. Diṭṭhisampannoti maggadiṭṭhiyā sampanno sotāpanno ariyasāvako. Kañcisaṅkhāranti catubhūmakesu saṅkhatasaṅkhāresu kañci ekaṃ saṅkhārampi. Niccato upagaccheyyāti niccoti gaṇheyya. Netaṃ ṭhānaṃ vijjatīti etaṃ kāraṇaṃ natthi, na upalabbhati. Yaṃ puthujjanoti yena kāraṇena puthujjano. Ṭhānametaṃ vijjatīti etaṃ kāraṇaṃ atthi; sassatadiṭṭhiyā hi so tebhūmakesu saṅkhāresu kañci saṅkhāraṃ niccato gaṇheyyāti attho. Catutthabhūmakasaṅkhāro pana tejussadattā divasaṃ santatto ayoguḷo viya makkhikānaṃ diṭṭhiyā vā aññesaṃ vā akusalānaṃ ārammaṇaṃ na hoti. Iminā nayena kañci saṅkhāraṃ sukhatotiādīsupi attho veditabbo. Sukhato upagaccheyyāti ‘‘ekantasukhī attā hoti arogo parammaraṇā’’ti (ma. ni. 3.21) evaṃ attadiṭṭhivasena sukhato gāhaṃ sandhāyetaṃ vuttaṃ. Diṭṭhivippayuttacittena pana ariyasāvako pariḷāhābhibhūto pariḷāhavūpasamatthaṃ, mattahatthīparitāsito viya, sucikāmo pokkhabrāhmaṇo gūthaṃ kañci saṅkhāraṃ sukhato upagacchati. Attavāde kasiṇādipaṇṇattisaṅgahatthaṃ saṅkhāranti avatvā kañci dhammanti vuttaṃ. Idhāpi ariyasāvakassa catubhūmakavasena paricchedo veditabbo, puthujjanassa tebhūmakavasena; sabbavāresu vā ariyasāvakassāpi tebhūmakavaseneva paricchedo vaṭṭati. Yaṃ yañhi puthujjano gaṇhāti, tato tato ariyasāvako gāhaṃ viniveṭheti. Puthujjano hi yaṃ yaṃ niccaṃ sukhaṃ attāti gaṇhāti, taṃ taṃ ariyasāvako aniccaṃ dukkhaṃ anattāti gaṇhanto gāhaṃ viniveṭheti.

    মাতরন্তিআদীসু জনিকাৰ মাতা। মনুস্সভূতোৰ খীণাসৰো অরহাতি অধিপ্পেতো। কিং পন অরিযসাৰকো অঞ্ঞং জীৰিতা ৰোরোপেয্যাতি? এতম্পি অট্ঠানং। সচেপি ভৰন্তরগতং অরিযসাৰকং অত্তনো অরিযসাৰকভাৰং অজানন্তম্পি কোচি এৰং ৰদেয্য – ‘ইমং কুন্থকিপিল্লিকং জীৰিতা ৰোরোপেত্ৰা সকলচক্কৰাল়গব্ভে চক্কৰত্তিরজ্জং পটিপজ্জাহী’তি, নেৰ সো তং জীৰিতা ৰোরোপেয্য। অথ ৰাপি নং এৰং ৰদেয্যুং – ‘সচে ইমং ন ঘাতেস্সসি, সীসং তে ছিন্দিস্সামা’তি, সীসমেৰস্স ছিন্দেয্যুং, নেৰ সো তং ঘাতেয্য। পুথুজ্জনভাৰস্স পন মহাসাৰজ্জভাৰদস্সনত্থং অরিযসাৰকস্স চ বলদীপনত্থমেতং ৰুত্তং। অযঞ্হেত্থ অধিপ্পাযো – সাৰজ্জো পুথুজ্জনভাৰো, যত্র হি নাম পুথুজ্জনো মাতুঘাতাদীনিপি আনন্তরিযানি করিস্সতি। মহাবলো অরিযসাৰকো; সো এতানি কম্মানি ন করোতীতি।

    Mātarantiādīsu janikāva mātā. Manussabhūtova khīṇāsavo arahāti adhippeto. Kiṃ pana ariyasāvako aññaṃ jīvitā voropeyyāti? Etampi aṭṭhānaṃ. Sacepi bhavantaragataṃ ariyasāvakaṃ attano ariyasāvakabhāvaṃ ajānantampi koci evaṃ vadeyya – ‘imaṃ kunthakipillikaṃ jīvitā voropetvā sakalacakkavāḷagabbhe cakkavattirajjaṃ paṭipajjāhī’ti, neva so taṃ jīvitā voropeyya. Atha vāpi naṃ evaṃ vadeyyuṃ – ‘sace imaṃ na ghātessasi, sīsaṃ te chindissāmā’ti, sīsamevassa chindeyyuṃ, neva so taṃ ghāteyya. Puthujjanabhāvassa pana mahāsāvajjabhāvadassanatthaṃ ariyasāvakassa ca baladīpanatthametaṃ vuttaṃ. Ayañhettha adhippāyo – sāvajjo puthujjanabhāvo, yatra hi nāma puthujjano mātughātādīnipi ānantariyāni karissati. Mahābalo ariyasāvako; so etāni kammāni na karotīti.

    পদুট্ঠেন চিত্তেনাতি দোসসম্পযুত্তেন ৰধকচিত্তেন। লোহিতং উপ্পাদেয্যাতি জীৰমানকসরীরে খুদ্দকমক্খিকায পিৰনমত্তম্পি লোহিতং উপ্পাদেয্য। সঙ্ঘং ভিন্দেয্যাতি সমানসংৰাসকং সমানসীমাযং ঠিতং পঞ্চহি কারণেহি সঙ্ঘং ভিন্দেয্য, ৰুত্তঞ্হেতং – ‘‘পঞ্চহুপালি, আকারেহি সঙ্ঘো ভিজ্জতি – কম্মেন, উদ্দেসেন, ৰোহরন্তো, অনুস্সাৰনেন, সলাকগ্গাহেনা’’তি (পরি॰ ৪৫৮)।

    Paduṭṭhena cittenāti dosasampayuttena vadhakacittena. Lohitaṃ uppādeyyāti jīvamānakasarīre khuddakamakkhikāya pivanamattampi lohitaṃ uppādeyya. Saṅghaṃ bhindeyyāti samānasaṃvāsakaṃ samānasīmāyaṃ ṭhitaṃ pañcahi kāraṇehi saṅghaṃ bhindeyya, vuttañhetaṃ – ‘‘pañcahupāli, ākārehi saṅgho bhijjati – kammena, uddesena, voharanto, anussāvanena, salākaggāhenā’’ti (pari. 458).

    তত্থ ‘কম্মেনা’তি অপলোকনাদীসু চতূসু কম্মেসু অঞ্ঞতরেন কম্মেন। ‘উদ্দেসেনা’তি পঞ্চসু পাতিমোক্খুদ্দেসেসু অঞ্ঞতরেন উদ্দেসেন। ‘ৰোহরন্তো’তি কথযন্তো, তাহি তাহি উপ্পত্তীহি ‘অধম্মং ধম্মো’তিআদীনি অট্ঠারস ভেদকরৰত্থূনি দীপেন্তো। ‘অনুস্সাৰনেনা’তি ‘ননু তুম্হে জানাথ ময্হং উচ্চাকুলা পব্বজিতভাৰং বহুস্সুতভাৰঞ্চ! মাদিসো নাম উদ্ধম্মং উব্বিনযং সত্থুসাসনং গাহেয্যাতি চিত্তম্পি উপ্পাদেতুং তুম্হাকং ন যুত্তং। কিং ময্হং অৰীচি নীলুপ্পলৰনং ৰিয সীতলো? কিমহং অপাযতো ন ভাযামী’তিআদিনা নযেন কণ্ণমূলে ৰচীভেদং কত্ৰা অনুস্সাৰনেন । ‘সলাকগ্গাহেনা’তি এৰং অনুস্সাৰেত্ৰা তেসং চিত্তং উপত্থম্ভেত্ৰা অনিৰত্তনধম্মে কত্ৰা ‘‘গণ্হথ ইমং সলাক’’ন্তি সলাকগ্গাহেন। এত্থ চ কম্মমেৰ উদ্দেসো ৰা পমাণং ৰোহারানুস্সাৰনসলাকগ্গাহা পন পুব্বভাগা। অট্ঠারসৰত্থুদীপনৰসেন হি ৰোহরন্তেন তত্থ রুচিজননত্থং অনুস্সাৰেত্ৰা সলাকায গাহিতাযপি অভিন্নোৰ হোতি সঙ্ঘো। যদা পন এৰং চত্তারো ৰা অতিরেকা ৰা সলাকং গাহেত্ৰা আৰেণিকং কম্মং ৰা উদ্দেসং ৰা করোন্তি, তদা সঙ্ঘো ভিন্নো নাম হোতি।

    Tattha ‘kammenā’ti apalokanādīsu catūsu kammesu aññatarena kammena. ‘Uddesenā’ti pañcasu pātimokkhuddesesu aññatarena uddesena. ‘Voharanto’ti kathayanto, tāhi tāhi uppattīhi ‘adhammaṃ dhammo’tiādīni aṭṭhārasa bhedakaravatthūni dīpento. ‘Anussāvanenā’ti ‘nanu tumhe jānātha mayhaṃ uccākulā pabbajitabhāvaṃ bahussutabhāvañca! Mādiso nāma uddhammaṃ ubbinayaṃ satthusāsanaṃ gāheyyāti cittampi uppādetuṃ tumhākaṃ na yuttaṃ. Kiṃ mayhaṃ avīci nīluppalavanaṃ viya sītalo? Kimahaṃ apāyato na bhāyāmī’tiādinā nayena kaṇṇamūle vacībhedaṃ katvā anussāvanena . ‘Salākaggāhenā’ti evaṃ anussāvetvā tesaṃ cittaṃ upatthambhetvā anivattanadhamme katvā ‘‘gaṇhatha imaṃ salāka’’nti salākaggāhena. Ettha ca kammameva uddeso vā pamāṇaṃ vohārānussāvanasalākaggāhā pana pubbabhāgā. Aṭṭhārasavatthudīpanavasena hi voharantena tattha rucijananatthaṃ anussāvetvā salākāya gāhitāyapi abhinnova hoti saṅgho. Yadā pana evaṃ cattāro vā atirekā vā salākaṃ gāhetvā āveṇikaṃ kammaṃ vā uddesaṃ vā karonti, tadā saṅgho bhinno nāma hoti.

    এৰং দিট্ঠিসম্পন্নো পুগ্গলো সঙ্ঘং ভিন্দেয্যাতি নেতং ঠানং ৰিজ্জতি। এত্তাৰতা মাতুঘাতাদীনি পঞ্চ আনন্তরিযকম্মানি দস্সিতানি হোন্তি, যানি পুথুজ্জনো করোতি, ন অরিযসাৰকো। তেসং আৰিভাৰত্থং –

    Evaṃ diṭṭhisampanno puggalo saṅghaṃ bhindeyyāti netaṃ ṭhānaṃ vijjati. Ettāvatā mātughātādīni pañca ānantariyakammāni dassitāni honti, yāni puthujjano karoti, na ariyasāvako. Tesaṃ āvibhāvatthaṃ –

    কম্মতো দ্ৰারতো চেৰ, কপ্পট্ঠিতিযতো তথা।

    Kammato dvārato ceva, kappaṭṭhitiyato tathā;

    পাকসাধারণাদীহি, ৰিঞ্ঞাতব্বো ৰিনিচ্ছযো॥

    Pākasādhāraṇādīhi, viññātabbo vinicchayo.

    তত্থ ‘কম্মতো’ তাৰ – এত্থ হি মনুস্সভূতস্সেৰ মনুস্সভূতং মাতরং ৰা পিতরং ৰা অপি পরিৰত্তলিঙ্গং জীৰিতা ৰোরোপেন্তস্স কম্মং আনন্তরিযং হোতি। তস্স ৰিপাকং পটিবাহিস্সামী’তি সকলচক্কৰাল়ং মহাচেতিযপ্পমাণেহি কঞ্চনথূপেহি পূরেত্ৰাপি, সকলচক্কৰাল়ং পূরেত্ৰা নিসিন্নভিক্খুসঙ্ঘস্স মহাদানং দত্ৰাপি, বুদ্ধস্স ভগৰতো সঙ্ঘাটিকণ্ণং অমুঞ্চিত্ৰাৰ ৰিচরিত্ৰাপি, কাযস্স ভেদা নিরযমেৰ উপপজ্জতি। যো পন সযং মনুস্সভূতো তিরচ্ছানভূতং মাতরং ৰা পিতরং ৰা, সযং ৰা তিরচ্ছানভূতো মনুস্সভূতং, তিরচ্ছানভূতোযেৰ ৰা তিরচ্ছানভূতং জীৰিতা ৰোরোপেতি, তস্স কম্মং আনন্তরিযং ন হোতি, কম্মং পন ভারিযং হোতি, আনন্তরিযং আহচ্চেৰ তিট্ঠতি। মনুস্সজাতিকানং পন ৰসেন অযং পঞ্হো কথিতো।

    Tattha ‘kammato’ tāva – ettha hi manussabhūtasseva manussabhūtaṃ mātaraṃ vā pitaraṃ vā api parivattaliṅgaṃ jīvitā voropentassa kammaṃ ānantariyaṃ hoti. Tassa vipākaṃ paṭibāhissāmī’ti sakalacakkavāḷaṃ mahācetiyappamāṇehi kañcanathūpehi pūretvāpi, sakalacakkavāḷaṃ pūretvā nisinnabhikkhusaṅghassa mahādānaṃ datvāpi, buddhassa bhagavato saṅghāṭikaṇṇaṃ amuñcitvāva vicaritvāpi, kāyassa bhedā nirayameva upapajjati. Yo pana sayaṃ manussabhūto tiracchānabhūtaṃ mātaraṃ vā pitaraṃ vā, sayaṃ vā tiracchānabhūto manussabhūtaṃ, tiracchānabhūtoyeva vā tiracchānabhūtaṃ jīvitā voropeti, tassa kammaṃ ānantariyaṃ na hoti, kammaṃ pana bhāriyaṃ hoti, ānantariyaṃ āhacceva tiṭṭhati. Manussajātikānaṃ pana vasena ayaṃ pañho kathito.

    এত্থ এল়কচতুক্কং, সঙ্গামচতুক্কং, চোরচতুক্কঞ্চ কথেতব্বং। ‘এল়কং মারেমী’তি অভিসন্ধিনাপি হি এল়কট্ঠানে ঠিতং মনুস্সো মনুস্সভূতং মাতরং ৰা পিতরং ৰা মারেন্তো আনন্তরিযং ফুসতি। এল়কাভিসন্ধিনা পন মাতাপিতিঅভিসন্ধিনা ৰা এল়কং মারেন্তো আনন্তরিযং ন ফুসতি। মাতাপিতিঅভিসন্ধিনা মাতাপিতরো মারেন্তো ফুসতেৰ। এস নযো ইতরস্মিম্পি চতুক্কদ্ৰযে। যথা চ মাতাপিতূসু, এৰং অরহন্তেপি এতানি চতুক্কানি ৰেদিতব্বানি। মনুস্সঅরহন্তমেৰ চ মারেত্ৰা আনন্তরিযং ফুসতি, ন যক্খভূতং; কম্মং পন ভারিযং আনন্তরিযসদিসমেৰ। মনুস্সঅরহন্তস্স চ পুথুজ্জনকালেযেৰ সত্থপ্পহারে ৰা ৰিসে ৰা দিন্নেপি যদি সো অরহত্তং পত্ৰা তেনেৰ মরতি, অরহন্তঘাতো হোতিযেৰ। যং পন পুথুজ্জনকালে দিন্নং দানং অরহত্তং পত্ৰা পরিভুঞ্জতি, পুথুজ্জনস্সেৰ তং দিন্নং হোতি। সেসঅরিযপুগ্গলে মারেন্তস্স আনন্তরিযং নত্থি, কম্মং পন ভারিযং আনন্তরিযসদিসমেৰ।

    Ettha eḷakacatukkaṃ, saṅgāmacatukkaṃ, coracatukkañca kathetabbaṃ. ‘Eḷakaṃ māremī’ti abhisandhināpi hi eḷakaṭṭhāne ṭhitaṃ manusso manussabhūtaṃ mātaraṃ vā pitaraṃ vā mārento ānantariyaṃ phusati. Eḷakābhisandhinā pana mātāpitiabhisandhinā vā eḷakaṃ mārento ānantariyaṃ na phusati. Mātāpitiabhisandhinā mātāpitaro mārento phusateva. Esa nayo itarasmimpi catukkadvaye. Yathā ca mātāpitūsu, evaṃ arahantepi etāni catukkāni veditabbāni. Manussaarahantameva ca māretvā ānantariyaṃ phusati, na yakkhabhūtaṃ; kammaṃ pana bhāriyaṃ ānantariyasadisameva. Manussaarahantassa ca puthujjanakāleyeva satthappahāre vā vise vā dinnepi yadi so arahattaṃ patvā teneva marati, arahantaghāto hotiyeva. Yaṃ pana puthujjanakāle dinnaṃ dānaṃ arahattaṃ patvā paribhuñjati, puthujjanasseva taṃ dinnaṃ hoti. Sesaariyapuggale mārentassa ānantariyaṃ natthi, kammaṃ pana bhāriyaṃ ānantariyasadisameva.

    লোহিতুপ্পাদে তথাগতস্স অভেজ্জকাযতায পরূপক্কমেন চম্মচ্ছেদং কত্ৰা লোহিতপগ্ঘরণং নাম নত্থি। সরীরস্স পন অন্তোযেৰ একস্মিং ঠানে লোহিতং সমোসরতি। দেৰদত্তেন পটিৰিদ্ধসিলাতো ভিজ্জিত্ৰা গতা সকলিকাপি তথাগতস্স পাদন্তং পহরি। ফরসুনা পহটো ৰিয পাদো অন্তোলোহিতোযেৰ অহোসি। তথা করোন্তস্স আনন্তরিযং হোতি। জীৰকো পন তথাগতস্স রুচিযা সত্থকেন চম্মং ছিন্দিত্ৰা তম্হা ঠানা দুট্ঠলোহিতং নীহরিত্ৰা ফাসুকমকাসি। তথা করোন্তস্স পুঞ্ঞকম্মমেৰ হোতি।

    Lohituppāde tathāgatassa abhejjakāyatāya parūpakkamena cammacchedaṃ katvā lohitapaggharaṇaṃ nāma natthi. Sarīrassa pana antoyeva ekasmiṃ ṭhāne lohitaṃ samosarati. Devadattena paṭividdhasilāto bhijjitvā gatā sakalikāpi tathāgatassa pādantaṃ pahari. Pharasunā pahaṭo viya pādo antolohitoyeva ahosi. Tathā karontassa ānantariyaṃ hoti. Jīvako pana tathāgatassa ruciyā satthakena cammaṃ chinditvā tamhā ṭhānā duṭṭhalohitaṃ nīharitvā phāsukamakāsi. Tathā karontassa puññakammameva hoti.

    অথ যে চ পরিনিব্বুতে তথাগতে চেতিযং ভিন্দন্তি, বোধিং ছিন্দন্তি, ধাতুম্হি উপক্কমন্তি, তেসং কিং হোতীতি? ভারিযং কম্মং হোতি আনন্তরিযসদিসং। সধাতুকং পন থূপং ৰা পটিমং ৰা বাধযমানং বোধিসাখঞ্চ ছিন্দিতুং ৰট্টতি। সচেপি তত্থ নিলীনা সকুণা চেতিযে ৰচ্চং পাতেন্তি, ছিন্দিতুং ৰট্টতিযেৰ। পরিভোগচেতিযতো হি সরীরচেতিযং মহন্ততরং। চেতিযৰত্থুং ভিন্দিত্ৰা গচ্ছন্তং বোধিমূলম্পি ছিন্দিত্ৰা হরিতুং ৰট্টতি। যা পন বোধিসাখা বোধিঘরং বাধতি, তং গেহরক্খণত্থং ছিন্দিতুং ন লব্ভতি। বোধিঅত্থঞ্হি গেহং, ন গেহত্থায বোধি। আসনঘরেপি এসেৰ নযো। যস্মিং পন আসনঘরে ধাতু নিহিতা হোতি, তস্স রক্খণত্থায বোধিসাখং ছিন্দিতুং ৰট্টতি। বোধিজগ্গনত্থং ওজোহরণসাখং ৰা পূতিট্ঠানং ৰা ছিন্দিতুং ৰট্টতিযেৰ; সরীরপটিজগ্গনে ৰিয পুঞ্ঞম্পি হোতি।

    Atha ye ca parinibbute tathāgate cetiyaṃ bhindanti, bodhiṃ chindanti, dhātumhi upakkamanti, tesaṃ kiṃ hotīti? Bhāriyaṃ kammaṃ hoti ānantariyasadisaṃ. Sadhātukaṃ pana thūpaṃ vā paṭimaṃ vā bādhayamānaṃ bodhisākhañca chindituṃ vaṭṭati. Sacepi tattha nilīnā sakuṇā cetiye vaccaṃ pātenti, chindituṃ vaṭṭatiyeva. Paribhogacetiyato hi sarīracetiyaṃ mahantataraṃ. Cetiyavatthuṃ bhinditvā gacchantaṃ bodhimūlampi chinditvā harituṃ vaṭṭati. Yā pana bodhisākhā bodhigharaṃ bādhati, taṃ geharakkhaṇatthaṃ chindituṃ na labbhati. Bodhiatthañhi gehaṃ, na gehatthāya bodhi. Āsanagharepi eseva nayo. Yasmiṃ pana āsanaghare dhātu nihitā hoti, tassa rakkhaṇatthāya bodhisākhaṃ chindituṃ vaṭṭati. Bodhijagganatthaṃ ojoharaṇasākhaṃ vā pūtiṭṭhānaṃ vā chindituṃ vaṭṭatiyeva; sarīrapaṭijaggane viya puññampi hoti.

    সঙ্ঘভেদে সীমট্ঠকসঙ্ঘে অসন্নিপতিতে ৰিসুং পরিসং গহেত্ৰা কতৰোহারানুস্সাৰনসলাকগ্গাহস্স কম্মং ৰা করোন্তস্স উদ্দেসং ৰা উদ্দিসন্তস্স ভেদো চ হোতি আনন্তরিযকম্মঞ্চ। সমগ্গসঞ্ঞায পন ৰট্টতি। সমগ্গসঞ্ঞায হি করোন্তস্স নেৰ ভেদো হোতি ন আনন্তরিযকম্মং। তথা নৰতো ঊনপরিসাযং। সব্বন্তিমেন পন পরিচ্ছেদেন নৰন্নং জনানং যো সঙ্ঘং ভিন্দতি, তস্স আনন্তরিযকম্মং হোতি। অনুৰত্তকানং অধম্মৰাদীনং মহাসাৰজ্জং কম্মং; ধম্মৰাদিনো অনৰজ্জা। তত্থ নৰন্নমেৰ সঙ্ঘভেদে ইদং সুত্তং – ‘‘একতো, উপালি, চত্তারো হোন্তি, একতো চত্তারো, নৰমো অনুস্সাৰেতি সলাকং গাহেতি – ‘অযং ধম্মো, অযং ৰিনযো, ইদং সত্থুসাসনং, ইদং গণ্হথ, ইদং রোচেথা’তি। এৰং খো, উপালি, সঙ্ঘরাজি চেৰ হোতি সঙ্ঘভেদো চ। নৰন্নং ৰা, উপালি, অতিরেকনৰন্নং ৰা সঙ্ঘরাজি চেৰ হোতি সঙ্ঘভেদো চা’’তি (চূল়ৰ॰ ৩৫১)।

    Saṅghabhede sīmaṭṭhakasaṅghe asannipatite visuṃ parisaṃ gahetvā katavohārānussāvanasalākaggāhassa kammaṃ vā karontassa uddesaṃ vā uddisantassa bhedo ca hoti ānantariyakammañca. Samaggasaññāya pana vaṭṭati. Samaggasaññāya hi karontassa neva bhedo hoti na ānantariyakammaṃ. Tathā navato ūnaparisāyaṃ. Sabbantimena pana paricchedena navannaṃ janānaṃ yo saṅghaṃ bhindati, tassa ānantariyakammaṃ hoti. Anuvattakānaṃ adhammavādīnaṃ mahāsāvajjaṃ kammaṃ; dhammavādino anavajjā. Tattha navannameva saṅghabhede idaṃ suttaṃ – ‘‘ekato, upāli, cattāro honti, ekato cattāro, navamo anussāveti salākaṃ gāheti – ‘ayaṃ dhammo, ayaṃ vinayo, idaṃ satthusāsanaṃ, idaṃ gaṇhatha, idaṃ rocethā’ti. Evaṃ kho, upāli, saṅgharāji ceva hoti saṅghabhedo ca. Navannaṃ vā, upāli, atirekanavannaṃ vā saṅgharāji ceva hoti saṅghabhedo cā’’ti (cūḷava. 351).

    এতেসু চ পন পঞ্চসু সঙ্ঘভেদো ৰচীকম্মং, সেসানি কাযকম্মানীতি। এৰং কম্মতোপি ৰিঞ্ঞাতব্বো ৰিনিচ্ছযো।

    Etesu ca pana pañcasu saṅghabhedo vacīkammaṃ, sesāni kāyakammānīti. Evaṃ kammatopi viññātabbo vinicchayo.

    ‘দ্ৰারতো’তি সব্বানেৰ চেতানি কাযদ্ৰারতোপি ৰচীদ্ৰারতোপি সমুট্ঠহন্তি। পুরিমানি পনেত্থ চত্তারি আণত্তিকৰিজ্জামযপযোগৰসেন ৰচীদ্ৰারতো সমুট্ঠহিত্ৰাপি কাযদ্ৰারমেৰ পূরেন্তি। সঙ্ঘভেদো হত্থমুদ্দায ভেদং করোন্তস্স কাযদ্ৰারতো সমুট্ঠহিত্ৰাপি ৰচীদ্ৰারমেৰ পূরেতীতি। এৰমেত্থ দ্ৰারতোপি ৰিঞ্ঞাতব্বো ৰিনিচ্ছযো।

    ‘Dvārato’ti sabbāneva cetāni kāyadvāratopi vacīdvāratopi samuṭṭhahanti. Purimāni panettha cattāri āṇattikavijjāmayapayogavasena vacīdvārato samuṭṭhahitvāpi kāyadvārameva pūrenti. Saṅghabhedo hatthamuddāya bhedaṃ karontassa kāyadvārato samuṭṭhahitvāpi vacīdvārameva pūretīti. Evamettha dvāratopi viññātabbo vinicchayo.

    ‘কপ্পট্ঠিতিযতো’তি সঙ্ঘভেদোযেৰ চেত্থ কপ্পট্ঠিতিযো। সণ্ঠহন্তে হি কপ্পে কপ্পৰেমজ্ঝে ৰা সঙ্ঘভেদং কত্ৰা কপ্পৰিনাসেযেৰ মুচ্চতি। সচেপি হি ‘স্ৰে কপ্পো ৰিনস্সিস্সতী’তি অজ্জ সঙ্ঘভেদং করোতি, স্ৰেযেৰ মুচ্চতি, একদিৰসমেৰ নিরযে পচ্চতি। এৰং করণং পন নত্থি। সেসানি চত্তারি কম্মানি আনন্তরিযানেৰ হোন্তি, ন কপ্পট্ঠিতিযানীতি। এৰমেত্থ কপ্পট্ঠিতিযতোপি ৰিঞ্ঞাতব্বো ৰিনিচ্ছযো।

    ‘Kappaṭṭhitiyato’ti saṅghabhedoyeva cettha kappaṭṭhitiyo. Saṇṭhahante hi kappe kappavemajjhe vā saṅghabhedaṃ katvā kappavināseyeva muccati. Sacepi hi ‘sve kappo vinassissatī’ti ajja saṅghabhedaṃ karoti, sveyeva muccati, ekadivasameva niraye paccati. Evaṃ karaṇaṃ pana natthi. Sesāni cattāri kammāni ānantariyāneva honti, na kappaṭṭhitiyānīti. Evamettha kappaṭṭhitiyatopi viññātabbo vinicchayo.

    ‘পাকতো’তি যেন চ পঞ্চপেতানি কম্মানি কতানি হোন্তি, তস্স সঙ্ঘভেদোযেৰ পটিসন্ধিৰসেন ৰিপচ্চতি। সেসানি ‘‘অহোসি কম্মং নাহোসি কম্মৰিপাকো’’তি এৰমাদীসু সঙ্খং গচ্ছন্তি। সঙ্ঘভেদাভাৰে লোহিতুপ্পাদো, তদভাৰে অরহন্তঘাতো, তদভাৰে সচে পিতা সীলৰা হোতি, মাতা দুস্সীলা নো ৰা তথা সীলৰতী, পিতুঘাতো পটিসন্ধিৰসেন ৰিপচ্চতি। সচে মাতা মাতুঘাতো। দ্ৰীসুপি সীলেন ৰা দুস্সীলেন ৰা সমানেসু মাতুঘাতোৰ পটিসন্ধিৰসেন ৰিপচ্চতি; মাতা হি দুক্করকারিণী বহূপকারা চ পুত্তানন্তি। এৰমেত্থ পাকতোপি ৰিঞ্ঞাতব্বো ৰিনিচ্ছযো।

    ‘Pākato’ti yena ca pañcapetāni kammāni katāni honti, tassa saṅghabhedoyeva paṭisandhivasena vipaccati. Sesāni ‘‘ahosi kammaṃ nāhosi kammavipāko’’ti evamādīsu saṅkhaṃ gacchanti. Saṅghabhedābhāve lohituppādo, tadabhāve arahantaghāto, tadabhāve sace pitā sīlavā hoti, mātā dussīlā no vā tathā sīlavatī, pitughāto paṭisandhivasena vipaccati. Sace mātā mātughāto. Dvīsupi sīlena vā dussīlena vā samānesu mātughātova paṭisandhivasena vipaccati; mātā hi dukkarakāriṇī bahūpakārā ca puttānanti. Evamettha pākatopi viññātabbo vinicchayo.

    ‘সাধারণাদীহী’তি পুরিমানি চত্তারি সব্বেসম্পি গহট্ঠপব্বজিতানং সাধারণানি। সঙ্ঘভেদো পন ‘‘ন খো, উপালি, ভিক্খুনী সঙ্ঘং ভিন্দতি, ন সিক্খমানা, ন সামণেরো, ন সামণেরী, ন উপাসকো, ন উপাসিকা সঙ্ঘং ভিন্দতি। ভিক্খু খো, উপালি, পকতত্তো সমানসংৰাসকো সমানসীমাযং ঠিতো সঙ্ঘং ভিন্দতী’’তি (চূল়ৰ॰ ৩৫১) ৰচনতো ৰুত্তপ্পকারস্স ভিক্খুনোৰ হোতি, ন অঞ্ঞস্স; তস্মা অসাধারণো। আদিসদ্দেন সব্বেপেতে দুক্খৰেদনাসহগতা দোসমোহসম্পযুত্তা চাতি এৰমেত্থ সাধারণাদীহিপি ৰিঞ্ঞাতব্বো ৰিনিচ্ছযো।

    ‘Sādhāraṇādīhī’ti purimāni cattāri sabbesampi gahaṭṭhapabbajitānaṃ sādhāraṇāni. Saṅghabhedo pana ‘‘na kho, upāli, bhikkhunī saṅghaṃ bhindati, na sikkhamānā, na sāmaṇero, na sāmaṇerī, na upāsako, na upāsikā saṅghaṃ bhindati. Bhikkhu kho, upāli, pakatatto samānasaṃvāsako samānasīmāyaṃ ṭhito saṅghaṃ bhindatī’’ti (cūḷava. 351) vacanato vuttappakārassa bhikkhunova hoti, na aññassa; tasmā asādhāraṇo. Ādisaddena sabbepete dukkhavedanāsahagatā dosamohasampayuttā cāti evamettha sādhāraṇādīhipi viññātabbo vinicchayo.

    অঞ্ঞং সত্থারন্তি ‘অযং মে সত্থা সত্থুকিচ্চং কাতুং সমত্থো’তি ভৰন্তরেপি অঞ্ঞং তিত্থকরং ‘অযং মে সত্থা’তি এৰং গণ্হেয্য – নেতং ঠানং ৰিজ্জতীতি অত্থো। অট্ঠমং ভৰং নিব্বত্তেয্যাতি সব্বমন্দপঞ্ঞোপি সত্তমং ভৰং অতিক্কমিত্ৰা অট্ঠমং নিব্বত্তেয্য – নেতং ঠানং ৰিজ্জতি । উত্তমকোটিযা হি সত্তমং ভৰং সন্ধাযেৰেস ‘‘নিযতো সম্বোধিপরাযণো’’তি ৰুত্তো। কিং পন তং নিযামেতি? কিং পুব্বহেতু নিযামেতি উদাহু পটিলদ্ধমগ্গো উদাহু উপরি তযো মগ্গাতি? সম্মাসম্বুদ্ধেন গহিতং নামমত্তমেতং। পুগ্গলো পন নিযতো নাম নত্থি। ‘‘পুব্বহেতু নিযামেতী’’তি ৰুত্তে হি উপরি তিণ্ণং মগ্গানং উপনিস্সযো ৰুত্তো হোতি, পঠমমগ্গস্স উপনিস্সযাভাৰো আপজ্জতি। ইচ্চস্স অহেতু অপ্পচ্চযা নিব্বত্তিং পাপুণাতি। ‘‘পটিলদ্ধমগ্গো নিযামেতী’’তি ৰুত্তে উপরি তযো মগ্গা অকিচ্চকা হোন্তি, পঠমমগ্গোৰ সকিচ্চকো, পঠমমগ্গেনেৰ কিলেসে খেপেত্ৰা পরিনিব্বাযিতব্বং হোতি। ‘‘উপরি তযো মগ্গা নিযামেন্তী’’তি ৰুত্তে পঠমমগ্গো অকিচ্চকো হোতি, উপরি তযো মগ্গাৰ সকিচ্চকা, পঠমমগ্গং অনিব্বত্তেত্ৰা উপরি তযো মগ্গা নিব্বত্তেতব্বা হোন্তি, পঠমমগ্গেন চ অনুপ্পজ্জিত্ৰাৰ কিলেসা খেপেতব্বা হোন্তি। তস্মা ন অঞ্ঞো কোচি নিযামেতি, উপরি তিণ্ণং মগ্গানং ৰিপস্সনাৰ নিযামেতি। সচে হি তেসং ৰিপস্সনা তিক্খা সূরা হুত্ৰা ৰহতি, একংযেৰ ভৰং নিব্বত্তেত্ৰা অরহত্তং পত্ৰা পরিনিব্বাতি। ততো মন্দতরপঞ্ঞো দুতিযে ৰা ততিযে ৰা চতুত্থে ৰা পঞ্চমে ৰা ছট্ঠে ৰা ভৰে অরহত্তং পত্ৰা পরিনিব্বাতি। সব্বমন্দপঞ্ঞো সত্তমং ভৰং নিব্বত্তেত্ৰা অরহত্তং পাপুণাতি, অট্ঠমে ভৰে পটিসন্ধি ন হোতি। ইতি সম্মাসম্বুদ্ধেন গহিতং নামমত্তমেতং। সত্থা হি বুদ্ধতুলায তুলেত্ৰা সব্বঞ্ঞুতঞাণেন পরিচ্ছিন্দিত্ৰা ‘অযং পুগ্গলো সব্বমহাপঞ্ঞো তিক্খৰিপস্সকো একমেৰ ভৰং নিব্বত্তেত্ৰা অরহত্তং গণ্হিস্সতী’তি ‘একবীজী’তি নামং অকাসি; ‘অযং পুগ্গলো দুতিযং, ততিযং, চতুত্থং, পঞ্চমং, ছট্ঠং ভৰং নিব্বত্তেত্ৰা অরহত্তং গণ্হিস্সতী’তি ‘কোলংকোলো’তি নামং অকাসি; ‘অযং পুগ্গলো সত্তমং ভৰং নিব্বত্তেত্ৰা অরহত্তং গণ্হিস্সতী’তি ‘সত্তক্খত্তুপরমো’তি নামং অকাসি।

    Aññaṃ satthāranti ‘ayaṃ me satthā satthukiccaṃ kātuṃ samattho’ti bhavantarepi aññaṃ titthakaraṃ ‘ayaṃ me satthā’ti evaṃ gaṇheyya – netaṃ ṭhānaṃ vijjatīti attho. Aṭṭhamaṃ bhavaṃ nibbatteyyāti sabbamandapaññopi sattamaṃ bhavaṃ atikkamitvā aṭṭhamaṃ nibbatteyya – netaṃ ṭhānaṃ vijjati . Uttamakoṭiyā hi sattamaṃ bhavaṃ sandhāyevesa ‘‘niyato sambodhiparāyaṇo’’ti vutto. Kiṃ pana taṃ niyāmeti? Kiṃ pubbahetu niyāmeti udāhu paṭiladdhamaggo udāhu upari tayo maggāti? Sammāsambuddhena gahitaṃ nāmamattametaṃ. Puggalo pana niyato nāma natthi. ‘‘Pubbahetu niyāmetī’’ti vutte hi upari tiṇṇaṃ maggānaṃ upanissayo vutto hoti, paṭhamamaggassa upanissayābhāvo āpajjati. Iccassa ahetu appaccayā nibbattiṃ pāpuṇāti. ‘‘Paṭiladdhamaggo niyāmetī’’ti vutte upari tayo maggā akiccakā honti, paṭhamamaggova sakiccako, paṭhamamaggeneva kilese khepetvā parinibbāyitabbaṃ hoti. ‘‘Upari tayo maggā niyāmentī’’ti vutte paṭhamamaggo akiccako hoti, upari tayo maggāva sakiccakā, paṭhamamaggaṃ anibbattetvā upari tayo maggā nibbattetabbā honti, paṭhamamaggena ca anuppajjitvāva kilesā khepetabbā honti. Tasmā na añño koci niyāmeti, upari tiṇṇaṃ maggānaṃ vipassanāva niyāmeti. Sace hi tesaṃ vipassanā tikkhā sūrā hutvā vahati, ekaṃyeva bhavaṃ nibbattetvā arahattaṃ patvā parinibbāti. Tato mandatarapañño dutiye vā tatiye vā catutthe vā pañcame vā chaṭṭhe vā bhave arahattaṃ patvā parinibbāti. Sabbamandapañño sattamaṃ bhavaṃ nibbattetvā arahattaṃ pāpuṇāti, aṭṭhame bhave paṭisandhi na hoti. Iti sammāsambuddhena gahitaṃ nāmamattametaṃ. Satthā hi buddhatulāya tuletvā sabbaññutañāṇena paricchinditvā ‘ayaṃ puggalo sabbamahāpañño tikkhavipassako ekameva bhavaṃ nibbattetvā arahattaṃ gaṇhissatī’ti ‘ekabījī’ti nāmaṃ akāsi; ‘ayaṃ puggalo dutiyaṃ, tatiyaṃ, catutthaṃ, pañcamaṃ, chaṭṭhaṃ bhavaṃ nibbattetvā arahattaṃ gaṇhissatī’ti ‘kolaṃkolo’ti nāmaṃ akāsi; ‘ayaṃ puggalo sattamaṃ bhavaṃ nibbattetvā arahattaṃ gaṇhissatī’ti ‘sattakkhattuparamo’ti nāmaṃ akāsi.

    কোচি পন পুগ্গলো সত্তন্নং ভৰানং নিযতো নাম নত্থি। অরিযসাৰকো পন যেন কেনচিপি আকারেন মন্দপঞ্ঞো সমানো অট্ঠমং ভৰং অপ্পত্ৰা অন্তরাৰ পরিনিব্বাতি। সক্কসদিসোপি ৰট্টাভিরতো সত্তমংযেৰ ভৰং গচ্ছতি। সত্তমে ভৰে সব্বকারেন পমাদৰিহারিনোপি ৰিপস্সনাঞাণং পরিপাকং গচ্ছতি। অপ্পমত্তকেপি আরম্মণে নিব্বিন্দিত্ৰা নিব্বুতিং পাপুণাতি। সচেপি হিস্স সত্তমে ভৰে নিদ্দং ৰা ওক্কমন্তস্স, পরম্মুখং ৰা গচ্ছন্তস্স, পচ্ছতো ঠত্ৰা তিখিণেন অসিনা কোচিদেৰ সীসং পাতেয্য, উদকে ৰা ওসাদেত্ৰা মারেয্য, অসনি ৰা পনস্স সীসে পতেয্য, এৰরূপেপি কালে সপ্পটিসন্ধিকা কালংকিরিযা নাম ন হোতি, অরহত্তং পত্ৰাৰ পরিনিব্বাতি। তেন ৰুত্তং – ‘‘অট্ঠমং ভৰং নিব্বত্তেয্য – নেতং ঠানং ৰিজ্জতী’’তি।

    Koci pana puggalo sattannaṃ bhavānaṃ niyato nāma natthi. Ariyasāvako pana yena kenacipi ākārena mandapañño samāno aṭṭhamaṃ bhavaṃ appatvā antarāva parinibbāti. Sakkasadisopi vaṭṭābhirato sattamaṃyeva bhavaṃ gacchati. Sattame bhave sabbakārena pamādavihārinopi vipassanāñāṇaṃ paripākaṃ gacchati. Appamattakepi ārammaṇe nibbinditvā nibbutiṃ pāpuṇāti. Sacepi hissa sattame bhave niddaṃ vā okkamantassa, parammukhaṃ vā gacchantassa, pacchato ṭhatvā tikhiṇena asinā kocideva sīsaṃ pāteyya, udake vā osādetvā māreyya, asani vā panassa sīse pateyya, evarūpepi kāle sappaṭisandhikā kālaṃkiriyā nāma na hoti, arahattaṃ patvāva parinibbāti. Tena vuttaṃ – ‘‘aṭṭhamaṃ bhavaṃ nibbatteyya – netaṃ ṭhānaṃ vijjatī’’ti.

    একিস্সা লোকধাতুযাতি দসসহস্সিলোকধাতুযা। তীণি হি খেত্তানি – জাতিখেত্তং, আণাখেত্তং, ৰিসযক্খেত্তন্তি। তত্থ ‘জাতিক্খেত্তং’ নাম দসসহস্সিলোকধাতু। সা হি তথাগতস্স মাতুকুচ্ছিওক্কমনকালে, নিক্খমনকালে, সম্বোধিকালে, ধম্মচক্কপৰত্তনে, আযুসঙ্খারৰোস্সজ্জনে, পরিনিব্বানে চ কম্পতি। কোটিসতসহস্সচক্কৰাল়ং পন ‘আণাখেত্তং’ নাম। আটানাটিযমোরপরিত্তধজগ্গপরিত্তরতনপরিত্তাদীনঞ্হি এত্থ আণা ৰত্ততি। ‘ৰিসযখেত্তস্স’ পন পরিমাণং নত্থি। বুদ্ধানঞ্হি ‘‘যাৰতকং ঞাণং তাৰতকং ঞেয্যং, যাৰতকং ঞেয্যং তাৰতকং ঞাণং , ঞাণপরিযন্তিকং ঞেয্যং, ঞেয্যপরিযন্তিকং ঞাণ’’ন্তি (পটি॰ ম॰ ৩.৫) ৰচনতো অৰিসযো নাম নত্থি।

    Ekissā lokadhātuyāti dasasahassilokadhātuyā. Tīṇi hi khettāni – jātikhettaṃ, āṇākhettaṃ, visayakkhettanti. Tattha ‘jātikkhettaṃ’ nāma dasasahassilokadhātu. Sā hi tathāgatassa mātukucchiokkamanakāle, nikkhamanakāle, sambodhikāle, dhammacakkapavattane, āyusaṅkhāravossajjane, parinibbāne ca kampati. Koṭisatasahassacakkavāḷaṃ pana ‘āṇākhettaṃ’ nāma. Āṭānāṭiyamoraparittadhajaggaparittaratanaparittādīnañhi ettha āṇā vattati. ‘Visayakhettassa’ pana parimāṇaṃ natthi. Buddhānañhi ‘‘yāvatakaṃ ñāṇaṃ tāvatakaṃ ñeyyaṃ, yāvatakaṃ ñeyyaṃ tāvatakaṃ ñāṇaṃ , ñāṇapariyantikaṃ ñeyyaṃ, ñeyyapariyantikaṃ ñāṇa’’nti (paṭi. ma. 3.5) vacanato avisayo nāma natthi.

    ইমেসু পন তীসু খেত্তেসু, ঠপেত্ৰা ইমং চক্কৰাল়ং, অঞ্ঞস্মিং চক্কৰাল়ে বুদ্ধা উপ্পজ্জন্তীতি সুত্তং নত্থি, ন উপ্পজ্জন্তীতি পন অত্থি। তীণি পিটকানি – ৰিনযপিটকং, সুত্তন্তপিটকং, অভিধম্মপিটকন্তি। তিস্সো সঙ্গীতিযো – মহাকস্সপত্থেরস্স সঙ্গীতি, যসত্থেরস্স সঙ্গীতি, মোগ্গলিপুত্ততিস্সত্থেরস্স সঙ্গীতীতি। ইমা তিস্সো সঙ্গীতিযো আরুল়্হে তেপিটকে বুদ্ধৰচনে ইমং চক্কৰাল়ং মুঞ্চিত্ৰা অঞ্ঞত্থ বুদ্ধা উপ্পজ্জন্তীতি সুত্তং নত্থি, নুপ্পজ্জন্তীতি পন অত্থি।

    Imesu pana tīsu khettesu, ṭhapetvā imaṃ cakkavāḷaṃ, aññasmiṃ cakkavāḷe buddhā uppajjantīti suttaṃ natthi, na uppajjantīti pana atthi. Tīṇi piṭakāni – vinayapiṭakaṃ, suttantapiṭakaṃ, abhidhammapiṭakanti. Tisso saṅgītiyo – mahākassapattherassa saṅgīti, yasattherassa saṅgīti, moggaliputtatissattherassa saṅgītīti. Imā tisso saṅgītiyo āruḷhe tepiṭake buddhavacane imaṃ cakkavāḷaṃ muñcitvā aññattha buddhā uppajjantīti suttaṃ natthi, nuppajjantīti pana atthi.

    অপুব্বং অচরিমন্তি অপুরে অপচ্ছা; একতো নুপ্পজ্জন্তি, পুরে ৰা পচ্ছা ৰা উপ্পজ্জন্তীতি ৰুত্তং হোতি। তত্থ বোধিপল্লঙ্কে ‘‘বোধিং অপ্পত্ৰা ন উট্ঠহিস্সামী’’তি নিসিন্নকালতো পট্ঠায যাৰ মাতুকুচ্ছিস্মিং পটিসন্ধিগ্গহণং তাৰ পুব্বেন্তি ন ৰেদিতব্বং। বোধিসত্তস্স হি পটিসন্ধিগ্গহণে দসসহস্সচক্কৰাল়কম্পনেনেৰ জাতিক্খেত্তপরিগ্গহো কতো, অঞ্ঞস্স বুদ্ধস্স উপ্পত্তি নিৰারিতা হোতি। পরিনিব্বানতো পট্ঠায চ যাৰ সাসপমত্তাপি ধাতুযো তিট্ঠন্তি তাৰ পচ্ছাতি ন ৰেদিতব্বং। ধাতূসু হি ঠিতাসু বুদ্ধা ঠিতাৰ হোন্তি। তস্মা এত্থন্তরে অঞ্ঞস্স বুদ্ধস্স উপ্পত্তি নিৰারিতাৰ হোতি, ধাতুপরিনিব্বানে পন জাতে অঞ্ঞস্স বুদ্ধস্স উপ্পত্তি ন নিৰারিতা।

    Apubbaṃ acarimanti apure apacchā; ekato nuppajjanti, pure vā pacchā vā uppajjantīti vuttaṃ hoti. Tattha bodhipallaṅke ‘‘bodhiṃ appatvā na uṭṭhahissāmī’’ti nisinnakālato paṭṭhāya yāva mātukucchismiṃ paṭisandhiggahaṇaṃ tāva pubbenti na veditabbaṃ. Bodhisattassa hi paṭisandhiggahaṇe dasasahassacakkavāḷakampaneneva jātikkhettapariggaho kato, aññassa buddhassa uppatti nivāritā hoti. Parinibbānato paṭṭhāya ca yāva sāsapamattāpi dhātuyo tiṭṭhanti tāva pacchāti na veditabbaṃ. Dhātūsu hi ṭhitāsu buddhā ṭhitāva honti. Tasmā etthantare aññassa buddhassa uppatti nivāritāva hoti, dhātuparinibbāne pana jāte aññassa buddhassa uppatti na nivāritā.

    তীণি হি অন্তরধানানি নাম – পরিযত্তিঅন্তরধানং, পটিৰেধঅন্তরধানং, পটিপত্তিঅন্তরধানন্তি। তত্থ ‘পরিযত্তী’তি তীণি পিটকানি; ‘পটিৰেধো’তি সচ্চপটিৰেধো; ‘পটিপত্তী’তি পটিপদা। তত্থ পটিৰেধো চ পটিপত্তি চ হোতিপি ন হোতিপি। একস্মিঞ্হি কালে পটিৰেধকরা ভিক্খূ বহূ হোন্তি; ‘এস ভিক্খু পুথুজ্জনো’তি অঙ্গুলিং পসারেত্ৰা দস্সেতব্বো হোতি। ইমস্মিংযেৰ দীপে একৰারং কির পুথুজ্জনভিক্খু নাম নাহোসি। পটিপত্তিপূরকাপি কদাচি বহূ হোন্তি, কদাচি অপ্পা। ইতি পটিৰেধো চ পটিপত্তি চ হোতিপি ন হোতিপি।

    Tīṇihi antaradhānāni nāma – pariyattiantaradhānaṃ, paṭivedhaantaradhānaṃ, paṭipattiantaradhānanti. Tattha ‘pariyattī’ti tīṇi piṭakāni; ‘paṭivedho’ti saccapaṭivedho; ‘paṭipattī’ti paṭipadā. Tattha paṭivedho ca paṭipatti ca hotipi na hotipi. Ekasmiñhi kāle paṭivedhakarā bhikkhū bahū honti; ‘esa bhikkhu puthujjano’ti aṅguliṃ pasāretvā dassetabbo hoti. Imasmiṃyeva dīpe ekavāraṃ kira puthujjanabhikkhu nāma nāhosi. Paṭipattipūrakāpi kadāci bahū honti, kadāci appā. Iti paṭivedho ca paṭipatti ca hotipi na hotipi.

    সাসনট্ঠিতিযা পন পরিযত্তিযেৰ পমাণং। পণ্ডিতো হি তেপিটকং সুত্ৰা দ্ৰেপি পূরেতি। যথা অম্হাকং বোধিসত্তো আল়ারস্স সন্তিকে পঞ্চাভিঞ্ঞা সত্ত চ সমাপত্তিযো নিব্বত্তেত্ৰা নেৰসঞ্ঞানাসঞ্ঞাযতনসমাপত্তিযা পরিকম্মং পুচ্ছি, সো ‘ন জানামী’তি আহ; ততো উদকস্স সন্তিকং গন্ত্ৰা অধিগতৰিসেসং সংসন্দেত্ৰা নেৰসঞ্ঞানাসঞ্ঞাযতনস্স পরিকম্মং পুচ্ছি; সো আচিক্খি; তস্স ৰচনসমনন্তরমেৰ মহাসত্তো তং সম্পাদেসি; এৰমেৰ পঞ্ঞৰা ভিক্খু পরিযত্তিং সুত্ৰা দ্ৰেপি পূরেতি। তস্মা পরিযত্তিযা ঠিতায সাসনং ঠিতং হোতি। যদা পন সা অন্তরধাযতি তদা পঠমং অভিধম্মপিটকং নস্সতি। তত্থ পট্ঠানং সব্বপঠমং অন্তরধাযতি। অনুক্কমেন পচ্ছা ধম্মসঙ্গহো। তস্মিং অন্তরহিতে ইতরেসু দ্ৰীসু পিটকেসু ঠিতেসু সাসনং ঠিতমেৰ হোতি।

    Sāsanaṭṭhitiyā pana pariyattiyeva pamāṇaṃ. Paṇḍito hi tepiṭakaṃ sutvā dvepi pūreti. Yathā amhākaṃ bodhisatto āḷārassa santike pañcābhiññā satta ca samāpattiyo nibbattetvā nevasaññānāsaññāyatanasamāpattiyā parikammaṃ pucchi, so ‘na jānāmī’ti āha; tato udakassa santikaṃ gantvā adhigatavisesaṃ saṃsandetvā nevasaññānāsaññāyatanassa parikammaṃ pucchi; so ācikkhi; tassa vacanasamanantarameva mahāsatto taṃ sampādesi; evameva paññavā bhikkhu pariyattiṃ sutvā dvepi pūreti. Tasmā pariyattiyā ṭhitāya sāsanaṃ ṭhitaṃ hoti. Yadā pana sā antaradhāyati tadā paṭhamaṃ abhidhammapiṭakaṃ nassati. Tattha paṭṭhānaṃ sabbapaṭhamaṃ antaradhāyati. Anukkamena pacchā dhammasaṅgaho. Tasmiṃ antarahite itaresu dvīsu piṭakesu ṭhitesu sāsanaṃ ṭhitameva hoti.

    তত্থ সুত্তন্তপিটকে অন্তরধাযমানে পঠমং অঙ্গুত্তরনিকাযো একাদসকতো পট্ঠায যাৰ এককা অন্তরধাযতি। তদনন্তরং সংযুত্তনিকাযো চক্কপেয্যালতো পট্ঠায যাৰ ওঘতরণা অন্তরধাযতি। তদনন্তরং মজ্ঝিমনিকাযো ইন্দ্রিযভাৰনতো পট্ঠায যাৰ মূলপরিযাযা অন্তরধাযতি। তদনন্তরং দীঘনিকাযো দসুত্তরতো পট্ঠায যাৰ ব্রহ্মজালা অন্তরধাযতি। একিস্সাপি দ্ৰিন্নম্পি গাথানং পুচ্ছা অদ্ধানং গচ্ছতি; সাসনং ধারেতুং ন সক্কোতি সভিযপুচ্ছা (সু॰ নি॰ ৫১৫ আদযো) ৰিয আল়ৰকপুচ্ছা (সু॰ নি॰ ১৮৩ আদযো; সং॰ নি॰ ১.২৪৬) ৰিয চ। এতা কির কস্সপবুদ্ধকালিকা অন্তরা সাসনং ধারেতুং নাসক্খিংসু।

    Tattha suttantapiṭake antaradhāyamāne paṭhamaṃ aṅguttaranikāyo ekādasakato paṭṭhāya yāva ekakā antaradhāyati. Tadanantaraṃ saṃyuttanikāyo cakkapeyyālato paṭṭhāya yāva oghataraṇā antaradhāyati. Tadanantaraṃ majjhimanikāyo indriyabhāvanato paṭṭhāya yāva mūlapariyāyā antaradhāyati. Tadanantaraṃ dīghanikāyo dasuttarato paṭṭhāya yāva brahmajālā antaradhāyati. Ekissāpi dvinnampi gāthānaṃ pucchā addhānaṃ gacchati; sāsanaṃ dhāretuṃ na sakkoti sabhiyapucchā (su. ni. 515 ādayo) viya āḷavakapucchā (su. ni. 183 ādayo; saṃ. ni. 1.246) viya ca. Etā kira kassapabuddhakālikā antarā sāsanaṃ dhāretuṃ nāsakkhiṃsu.

    দ্ৰীসু পন পিটকেসু অন্তরহিতেসুপি ৰিনযপিটকে ঠিতে সাসনং তিট্ঠতি। পরিৰারখন্ধকেসু অন্তরহিতেসু উভতোৰিভঙ্গে ঠিতে ঠিতমেৰ হোতি। উভতোৰিভঙ্গে অন্তরহিতে মাতিকায ঠিতাযপি ঠিতমেৰ হোতি। মাতিকায অন্তরহিতায পাতিমোক্খপব্বজ্জাউপসম্পদাসু ঠিতাসু সাসনং তিট্ঠতি। লিঙ্গং অদ্ধানং গচ্ছতি। সেতৰত্থসমণৰংসো পন কস্সপবুদ্ধকালতো পট্ঠায সাসনং ধারেতুং নাসক্খি। পচ্ছিমকস্স পন সচ্চপটিৰেধতো পচ্ছিমকস্স সীলভেদতো চ পট্ঠায সাসনং ওসক্কিতং নাম হোতি। ততো পট্ঠায অঞ্ঞস্স বুদ্ধস্স উপ্পত্তি ন ৰারিতা।

    Dvīsu pana piṭakesu antarahitesupi vinayapiṭake ṭhite sāsanaṃ tiṭṭhati. Parivārakhandhakesu antarahitesu ubhatovibhaṅge ṭhite ṭhitameva hoti. Ubhatovibhaṅge antarahite mātikāya ṭhitāyapi ṭhitameva hoti. Mātikāya antarahitāya pātimokkhapabbajjāupasampadāsu ṭhitāsu sāsanaṃ tiṭṭhati. Liṅgaṃ addhānaṃ gacchati. Setavatthasamaṇavaṃso pana kassapabuddhakālato paṭṭhāya sāsanaṃ dhāretuṃ nāsakkhi. Pacchimakassa pana saccapaṭivedhato pacchimakassa sīlabhedato ca paṭṭhāya sāsanaṃ osakkitaṃ nāma hoti. Tato paṭṭhāya aññassa buddhassa uppatti na vāritā.

    তীণি পরিনিব্বানানি নাম – কিলেসপরিনিব্বানং, খন্ধপরিনিব্বানং, ধাতুপরিনিব্বানন্তি। তত্থ ‘কিলেসপরিনিব্বানং’ বোধিপল্লঙ্কে অহোসি, ‘খন্ধপরিনিব্বানং’ কুসিনারাযং, ‘ধাতুপরিনিব্বানং’ অনাগতে ভৰিস্সতি। সাসনস্স কির ওসক্কনকালে ইমস্মিং তম্বপণ্ণিদীপে ধাতুযো সন্নিপতিত্ৰা মহাচেতিযং গমিস্সন্তি, মহাচেতিযতো নাগদীপে রাজাযতনচেতিযং, ততো মহাবোধিপল্লঙ্কং গমিস্সন্তি। নাগভৰনতোপি দেৰলোকতোপি ব্রহ্মলোকতোপি ধাতুযো মহাবোধিপল্লঙ্কমেৰ গমিস্সন্তি। সাসপমত্তাপি ধাতু ন অন্তরা নস্সিস্সতি। সব্বা ধাতুযো মহাবোধিপল্লঙ্কে রাসিভূতা সুৰণ্ণক্খন্ধো ৰিয একঘনা হুত্ৰা ছব্বণ্ণরংসিযো ৰিস্সজ্জেস্সন্তি। তা দসসহস্সিলোকধাতুং ফরিস্সন্তি। ততো দসসহস্সচক্কৰাল়দেৰতা সন্নিপতিত্ৰা ‘‘অজ্জ সত্থা পরিনিব্বাতি, অজ্জ সাসনং ওসক্কতি, পচ্ছিমদস্সনং দানি ইদং অম্হাক’’ন্তি দসবলস্স পরিনিব্বুতদিৰসতো মহন্ততরং কারুঞ্ঞং করিস্সন্তি। ঠপেত্ৰা অনাগামিখীণাসৰে অৰসেসা সকভাৰেন সন্ধারেতুং ন সক্খিস্সন্তি। ধাতূসু তেজোধাতু উট্ঠহিত্ৰা যাৰ ব্রহ্মলোকা উগ্গচ্ছিস্সতি। সাসপমত্তাযপি ধাতুযা সতি একজালাৰ ভৰিস্সতি; ধাতূসু পরিযাদানং গতাসু পচ্ছিজ্জিস্সতি। এৰং মহন্তং আনুভাৰং দস্সেত্ৰা ধাতূসু অন্তরহিতাসু সাসনং অন্তরহিতং নাম হোতি। যাৰ এৰং ন অন্তরধাযতি তাৰ অচরিমং নাম হোতি। এৰং অপুব্বং অচরিমং উপ্পজ্জেয্যুং – নেতং ঠানং ৰিজ্জতি।

    Tīṇiparinibbānāni nāma – kilesaparinibbānaṃ, khandhaparinibbānaṃ, dhātuparinibbānanti. Tattha ‘kilesaparinibbānaṃ’ bodhipallaṅke ahosi, ‘khandhaparinibbānaṃ’ kusinārāyaṃ, ‘dhātuparinibbānaṃ’ anāgate bhavissati. Sāsanassa kira osakkanakāle imasmiṃ tambapaṇṇidīpe dhātuyo sannipatitvā mahācetiyaṃ gamissanti, mahācetiyato nāgadīpe rājāyatanacetiyaṃ, tato mahābodhipallaṅkaṃ gamissanti. Nāgabhavanatopi devalokatopi brahmalokatopi dhātuyo mahābodhipallaṅkameva gamissanti. Sāsapamattāpi dhātu na antarā nassissati. Sabbā dhātuyo mahābodhipallaṅke rāsibhūtā suvaṇṇakkhandho viya ekaghanā hutvā chabbaṇṇaraṃsiyo vissajjessanti. Tā dasasahassilokadhātuṃ pharissanti. Tato dasasahassacakkavāḷadevatā sannipatitvā ‘‘ajja satthā parinibbāti, ajja sāsanaṃ osakkati, pacchimadassanaṃ dāni idaṃ amhāka’’nti dasabalassa parinibbutadivasato mahantataraṃ kāruññaṃ karissanti. Ṭhapetvā anāgāmikhīṇāsave avasesā sakabhāvena sandhāretuṃ na sakkhissanti. Dhātūsu tejodhātu uṭṭhahitvā yāva brahmalokā uggacchissati. Sāsapamattāyapi dhātuyā sati ekajālāva bhavissati; dhātūsu pariyādānaṃ gatāsu pacchijjissati. Evaṃ mahantaṃ ānubhāvaṃ dassetvā dhātūsu antarahitāsu sāsanaṃ antarahitaṃ nāma hoti. Yāva evaṃ na antaradhāyati tāva acarimaṃ nāma hoti. Evaṃ apubbaṃ acarimaṃ uppajjeyyuṃ – netaṃ ṭhānaṃ vijjati.

    কস্মা পন অপুব্বং অচরিমং ন উপ্পজ্জন্তীতি? অনচ্ছরিযত্তা। বুদ্ধা হি অচ্ছরিযমনুস্সা, যথাহ – ‘‘একপুগ্গলো, ভিক্খৰে, লোকে উপজ্জমানো উপ্পজ্জতি অচ্ছরিযমনুস্সো। কতমো একপুগ্গলো? তথাগতো, ভিক্খৰে, অরহং সম্মাসম্বুদ্ধো’’তি (অ॰ নি॰ ১.১৭২)। যদি চ দ্ৰে ৰা চত্তারো ৰা অট্ঠ ৰা সোল়স ৰা একতো উপ্পজ্জেয্যুং, ন অচ্ছরিযা ভৰেয্যুং। একস্মিঞ্হি ৰিহারে দ্ৰিন্নং চেতিযানম্পি লাভসক্কারো উল়ারো ন হোতি, ভিক্খূপি বহুতায ন অচ্ছরিযা জাতা, এৰং বুদ্ধাপি ভৰেয্যুং; তস্মা নুপ্পজ্জন্তি। দেসনায চ ৰিসেসাভাৰতো। যঞ্হি সতিপট্ঠানাদিভেদং ধম্মং একো দেসেতি, অঞ্ঞেন উপ্পজ্জিত্ৰাপি সোৰ দেসেতব্বো সিযা। ততো অনচ্ছরিযো সিযা। একস্মিং পন ধম্মং দেসেন্তে দেসনাপি অচ্ছরিযা হোতি। ৰিৰাদভাৰতো চ। বহূসু চ বুদ্ধেসু উপ্পন্নেসু বহূনং আচরিযানং অন্তেৰাসিকা ৰিয ‘অম্হাকং বুদ্ধো পাসাদিকো, অম্হাকং বুদ্ধো মধুরস্সরো লাভী পুঞ্ঞৰা’তি ৰিৰদেয্যুং; তস্মাপি এৰং নুপ্পজ্জন্তি।

    Kasmā pana apubbaṃ acarimaṃ na uppajjantīti? Anacchariyattā. Buddhā hi acchariyamanussā, yathāha – ‘‘ekapuggalo, bhikkhave, loke upajjamāno uppajjati acchariyamanusso. Katamo ekapuggalo? Tathāgato, bhikkhave, arahaṃ sammāsambuddho’’ti (a. ni. 1.172). Yadi ca dve vā cattāro vā aṭṭha vā soḷasa vā ekato uppajjeyyuṃ, na acchariyā bhaveyyuṃ. Ekasmiñhi vihāre dvinnaṃ cetiyānampi lābhasakkāro uḷāro na hoti, bhikkhūpi bahutāya na acchariyā jātā, evaṃ buddhāpi bhaveyyuṃ; tasmā nuppajjanti. Desanāya ca visesābhāvato. Yañhi satipaṭṭhānādibhedaṃ dhammaṃ eko deseti, aññena uppajjitvāpi sova desetabbo siyā. Tato anacchariyo siyā. Ekasmiṃ pana dhammaṃ desente desanāpi acchariyā hoti. Vivādabhāvato ca. Bahūsu ca buddhesu uppannesu bahūnaṃ ācariyānaṃ antevāsikā viya ‘amhākaṃ buddho pāsādiko, amhākaṃ buddho madhurassaro lābhī puññavā’ti vivadeyyuṃ; tasmāpi evaṃ nuppajjanti.

    অপিচেতং কারণং মিলিন্দরঞ্ঞা পুট্ঠেন নাগসেনত্থেরেন ৰিত্থারিতমেৰ। ৰুত্তঞ্হি তত্থ (মি॰ প॰ ৫.১.১) –

    Apicetaṃ kāraṇaṃ milindaraññā puṭṭhena nāgasenattherena vitthāritameva. Vuttañhi tattha (mi. pa. 5.1.1) –

    ‘‘ভন্তে নাগসেন, ভাসিতম্পেতং ভগৰতা – ‘‘অট্ঠানমেতং, ভিক্খৰে, অনৰকাসো যং একিস্সা লোকধাতুযা দ্ৰে অরহন্তো সম্মাসম্বুদ্ধা অপুব্বং অচরিমং উপ্পজ্জেয্যুং – নেতং ঠানং ৰিজ্জতী’’তি (অ॰ নি॰ ১.২৭৭; ম॰ নি॰ ৩.১২৯)। দেসেন্তা চ, ভন্তে নাগসেন, সব্বেপি তথাগতা সত্ততিংস বোধিপক্খিযধম্মে দেসেন্তি, কথযমানা চ চত্তারি অরিযসচ্চানি কথেন্তি, সিক্খাপেন্তা চ তীসু সিক্খাসু সিক্খাপেন্তি, অনুসাসমানা চ অপ্পমাদপটিপত্তিযং অনুসাসন্তি। যদি, ভন্তে নাগসেন, সব্বেসম্পি তথাগতানং একা দেসনা একা কথা একা সিক্খা একানুসিট্ঠি, কেন কারণেন দ্ৰে তথাগতা একক্খণে নুপ্পজ্জন্তি? একেনপি তাৰ বুদ্ধুপ্পাদেন অযং লোকো ওভাসজাতো। যদি দুতিযো বুদ্ধো ভৰেয্য, দ্ৰিন্নং পভায অযং লোকো ভিয্যোসো মত্তায ওভাসজাতো ভৰেয্য। ওৰদন্তা চ দ্ৰে তথাগতা সুখং ওৰদেয্যুং, অনুসাসমানা চ সুখং অনুসাসেয্যুং। তত্থ মে কারণং দস্সেহি যথাহং নিস্সংসযো ভৰেয্য’’ন্তি।

    ‘‘Bhante nāgasena, bhāsitampetaṃ bhagavatā – ‘‘aṭṭhānametaṃ, bhikkhave, anavakāso yaṃ ekissā lokadhātuyā dve arahanto sammāsambuddhā apubbaṃ acarimaṃ uppajjeyyuṃ – netaṃ ṭhānaṃ vijjatī’’ti (a. ni. 1.277; ma. ni. 3.129). Desentā ca, bhante nāgasena, sabbepi tathāgatā sattatiṃsa bodhipakkhiyadhamme desenti, kathayamānā ca cattāri ariyasaccāni kathenti, sikkhāpentā ca tīsu sikkhāsu sikkhāpenti, anusāsamānā ca appamādapaṭipattiyaṃ anusāsanti. Yadi, bhante nāgasena, sabbesampi tathāgatānaṃ ekā desanā ekā kathā ekā sikkhā ekānusiṭṭhi, kena kāraṇena dve tathāgatā ekakkhaṇe nuppajjanti? Ekenapi tāva buddhuppādena ayaṃ loko obhāsajāto. Yadi dutiyo buddho bhaveyya, dvinnaṃ pabhāya ayaṃ loko bhiyyoso mattāya obhāsajāto bhaveyya. Ovadantā ca dve tathāgatā sukhaṃ ovadeyyuṃ, anusāsamānā ca sukhaṃ anusāseyyuṃ. Tattha me kāraṇaṃ dassehi yathāhaṃ nissaṃsayo bhaveyya’’nti.

    ‘‘অযং, মহারাজ, দসসহস্সী লোকধাতু একবুদ্ধধারণী, একস্সেৰ তথাগতস্স গুণং ধারেতি। যদি দুতিযো বুদ্ধো উপ্পজ্জেয্য, নাযং দসসহস্সী লোকধাতু ধারেয্য, চলেয্য কম্পেয্য নমেয্য ওনমেয্য ৰিনমেয্য ৰিকিরেয্য ৰিধমেয্য ৰিদ্ধংসেয্য, ন ঠানমুপগচ্ছেয্য।

    ‘‘Ayaṃ, mahārāja, dasasahassī lokadhātu ekabuddhadhāraṇī, ekasseva tathāgatassa guṇaṃ dhāreti. Yadi dutiyo buddho uppajjeyya, nāyaṃ dasasahassī lokadhātu dhāreyya, caleyya kampeyya nameyya onameyya vinameyya vikireyya vidhameyya viddhaṃseyya, na ṭhānamupagaccheyya.

    ‘‘যথা, মহারাজ, নাৰা একপুরিসসন্ধারণী ভৰেয্য, একস্মিং পুরিসে অভিরূল়্হে সা নাৰা সমুপাদিকা ভৰেয্য। অথ দুতিযো পুরিসো আগচ্ছেয্য তাদিসো আযুনা ৰণ্ণেন ৰযেন পমাণেন কিসথূলেন সব্বঙ্গপচ্চঙ্গেন। সো তং নাৰং অভিরূহেয্য। অপিনু সা, মহারাজ, নাৰা দ্ৰিন্নম্পি ধারেয্যা’’তি? ‘‘ন হি, ভন্তে, চলেয্য কম্পেয্য নমেয্য ওনমেয্য ৰিনমেয্য ৰিকিরেয্য ৰিধমেয্য ৰিদ্ধংসেয্য, ন ঠানমুপগচ্ছেয্য, ওসীদেয্য উদকে’’তি । ‘‘এৰমেৰ খো, মহারাজ, অযং দসসহস্সী লোকধাতু একবুদ্ধধারণী একস্সেৰ তথাগতস্স গুণং ধারেতি। যদি দুতিযো বুদ্ধো উপ্পজ্জেয্য, নাযং দসসহস্সী লোকধাতু ধারেয্য, চলেয্য…পে॰… ন ঠানমুপগচ্ছেয্য।

    ‘‘Yathā, mahārāja, nāvā ekapurisasandhāraṇī bhaveyya, ekasmiṃ purise abhirūḷhe sā nāvā samupādikā bhaveyya. Atha dutiyo puriso āgaccheyya tādiso āyunā vaṇṇena vayena pamāṇena kisathūlena sabbaṅgapaccaṅgena. So taṃ nāvaṃ abhirūheyya. Apinu sā, mahārāja, nāvā dvinnampi dhāreyyā’’ti? ‘‘Na hi, bhante, caleyya kampeyya nameyya onameyya vinameyya vikireyya vidhameyya viddhaṃseyya, na ṭhānamupagaccheyya, osīdeyya udake’’ti . ‘‘Evameva kho, mahārāja, ayaṃ dasasahassī lokadhātu ekabuddhadhāraṇī ekasseva tathāgatassa guṇaṃ dhāreti. Yadi dutiyo buddho uppajjeyya, nāyaṃ dasasahassī lokadhātu dhāreyya, caleyya…pe… na ṭhānamupagaccheyya.

    ‘‘যথা ৰা পন, মহারাজ, পুরিসো যাৰদত্থং ভোজনং ভুঞ্জেয্য ছাদেন্তং যাৰকণ্ঠমভিপূরযিত্ৰা। সো ততো পীণিতো পরিপুণ্ণো নিরন্তরো তন্দীগতো অনোনমিতদণ্ডজাতো পুনদেৰ তত্তকং ভোজনং ভুঞ্জেয্য। অপিনু খো সো, মহারাজ, পুরিসো সুখিতো ভৰেয্যা’’তি? ‘‘ন হি, ভন্তে, সকিং ভুত্তোৰ মরেয্যা’’তি। এৰমেৰ খো, মহারাজ, অযং দসসহস্সী লোকধাতু একবুদ্ধধারণী…পে॰… ন ঠানমুপগচ্ছেয্যা’’তি।

    ‘‘Yathā vā pana, mahārāja, puriso yāvadatthaṃ bhojanaṃ bhuñjeyya chādentaṃ yāvakaṇṭhamabhipūrayitvā. So tato pīṇito paripuṇṇo nirantaro tandīgato anonamitadaṇḍajāto punadeva tattakaṃ bhojanaṃ bhuñjeyya. Apinu kho so, mahārāja, puriso sukhito bhaveyyā’’ti? ‘‘Na hi, bhante, sakiṃ bhuttova mareyyā’’ti. Evameva kho, mahārāja, ayaṃ dasasahassī lokadhātu ekabuddhadhāraṇī…pe… na ṭhānamupagaccheyyā’’ti.

    ‘‘কিং নু খো, ভন্তে নাগসেন, অতিধম্মভারেন পথৰী চলতী’’তি? ‘‘ইধ, মহারাজ, দ্ৰে সকটা রতনপরিপূরিতা ভৰেয্যুং যাৰস্মা মুখসমা। এক সকটতো রতনং গহেত্ৰা একম্হি সকটে আকিরেয্যুং। অপিনু তং, মহারাজ, সকটং দ্ৰিন্নম্পি সকটানং রতনং ধারেয্যা’’তি? ‘‘ন হি, ভন্তে, নাভিপি তস্স চলেয্য, অরাপি তস্স ভিজ্জেয্যুং, নেমিপি তস্স ওপতেয্য, অক্খোপি তস্স ভিজ্জেয্যা’’তি। ‘‘কিন্নু খো, মহারাজ, অতিরতনভারেন সকটং ভিজ্জতী’’তি? ‘‘আম, ভন্তে’’তি। ‘‘এৰমেৰ খো, মহারাজ, অতিধম্মভারেন পথৰী চলতীতি।

    ‘‘Kiṃ nu kho, bhante nāgasena, atidhammabhārena pathavī calatī’’ti? ‘‘Idha, mahārāja, dve sakaṭā ratanaparipūritā bhaveyyuṃ yāvasmā mukhasamā. Eka sakaṭato ratanaṃ gahetvā ekamhi sakaṭe ākireyyuṃ. Apinu taṃ, mahārāja, sakaṭaṃ dvinnampi sakaṭānaṃ ratanaṃ dhāreyyā’’ti? ‘‘Na hi, bhante, nābhipi tassa caleyya, arāpi tassa bhijjeyyuṃ, nemipi tassa opateyya, akkhopi tassa bhijjeyyā’’ti. ‘‘Kinnu kho, mahārāja, atiratanabhārena sakaṭaṃ bhijjatī’’ti? ‘‘Āma, bhante’’ti. ‘‘Evameva kho, mahārāja, atidhammabhārena pathavī calatīti.

    ‘‘অপিচ, মহারাজ, ইমং কারণং বুদ্ধবলপরিদীপনায ওসারিতং। অঞ্ঞম্পি তত্থ পতিরূপং কারণং সুণোহি যেন কারণেন দ্ৰে সম্মাসম্বুদ্ধা একক্খণে নুপ্পজ্জন্তি। যদি, মহারাজ, দ্ৰে সম্মাসম্বুদ্ধা একক্খণে উপ্পজ্জেয্যুং, পরিসায ৰিৰাদো উপ্পজ্জেয্য – ‘তুম্হাকং বুদ্ধো, অম্হাকং বুদ্ধো’তি উভতোপক্খজাতা ভৰেয্যুং। যথা, মহারাজ, দ্ৰিন্নং বলৰামচ্চানং পরিসায ৰিৰাদো উপ্পজ্জেয্য – ‘তুম্হাকং অমচ্চো, অম্হাকং অমচ্চো’তি উভতোপক্খজাতা হোন্তি; এৰমেৰ খো, মহারাজ, যদি দ্ৰে সম্মাসম্বুদ্ধা একক্খণে উপ্পজ্জেয্যুং, তেসং পরিসায ৰিৰাদো উপ্পজ্জেয্য – ‘তুম্হাকং বুদ্ধো, অম্হাকং বুদ্ধো’তি উভতোপক্খজাতা ভৰেয্যুং। ইদং তাৰ মহারাজ একং কারণং যেন কারণেন দ্ৰে সম্মাসম্বুদ্ধা একক্খণে নুপ্পজ্জন্তি।

    ‘‘Apica, mahārāja, imaṃ kāraṇaṃ buddhabalaparidīpanāya osāritaṃ. Aññampi tattha patirūpaṃ kāraṇaṃ suṇohi yena kāraṇena dve sammāsambuddhā ekakkhaṇe nuppajjanti. Yadi, mahārāja, dve sammāsambuddhā ekakkhaṇe uppajjeyyuṃ, parisāya vivādo uppajjeyya – ‘tumhākaṃ buddho, amhākaṃ buddho’ti ubhatopakkhajātā bhaveyyuṃ. Yathā, mahārāja, dvinnaṃ balavāmaccānaṃ parisāya vivādo uppajjeyya – ‘tumhākaṃ amacco, amhākaṃ amacco’ti ubhatopakkhajātā honti; evameva kho, mahārāja, yadi dve sammāsambuddhā ekakkhaṇe uppajjeyyuṃ, tesaṃ parisāya vivādo uppajjeyya – ‘tumhākaṃ buddho, amhākaṃ buddho’ti ubhatopakkhajātā bhaveyyuṃ. Idaṃ tāva mahārāja ekaṃ kāraṇaṃ yena kāraṇena dve sammāsambuddhā ekakkhaṇe nuppajjanti.

    ‘‘অপরম্পি উত্তরিং কারণং সুণোহি যেন কারণেন দ্ৰে সম্মাসম্বুদ্ধা একক্খণে নুপ্পজ্জন্তি। যদি, মহারাজ, দ্ৰে সম্মাসম্বুদ্ধা একক্খণে উপ্পজ্জেয্যুং ‘অগ্গো বুদ্ধো’তি যং ৰচনং তং মিচ্ছা ভৰেয্য, ‘জেট্ঠো বুদ্ধো’তি ‘সেট্ঠো বুদ্ধো’তি ‘ৰিসিট্ঠো বুদ্ধো’তি ‘উত্তমো বুদ্ধো’তি ‘পৰরো বুদ্ধো’তি ‘অসমো বুদ্ধো’তি ‘অসমসমো বুদ্ধো’তি ‘অপ্পটিসমো বুদ্ধো’তি ‘অপ্পটিভাগী বুদ্ধো’তি ‘অপ্পটিপুগ্গলো বুদ্ধো’তি যং ৰচনং তং মিচ্ছা ভৰেয্য। ইদম্পি খো ত্ৰং, মহারাজ, কারণং তথতো সম্পটিচ্ছ যেন কারণেন দ্ৰে সম্মাসম্বুদ্ধা একক্খণে নুপ্পজ্জন্তি।

    ‘‘Aparampi uttariṃ kāraṇaṃ suṇohi yena kāraṇena dve sammāsambuddhā ekakkhaṇe nuppajjanti. Yadi, mahārāja, dve sammāsambuddhā ekakkhaṇe uppajjeyyuṃ ‘aggo buddho’ti yaṃ vacanaṃ taṃ micchā bhaveyya, ‘jeṭṭho buddho’ti ‘seṭṭho buddho’ti ‘visiṭṭho buddho’ti ‘uttamo buddho’ti ‘pavaro buddho’ti ‘asamo buddho’ti ‘asamasamo buddho’ti ‘appaṭisamo buddho’ti ‘appaṭibhāgī buddho’ti ‘appaṭipuggalo buddho’ti yaṃ vacanaṃ taṃ micchā bhaveyya. Idampi kho tvaṃ, mahārāja, kāraṇaṃ tathato sampaṭiccha yena kāraṇena dve sammāsambuddhā ekakkhaṇe nuppajjanti.

    ‘‘অপিচ, মহারাজ, বুদ্ধানং ভগৰন্তানং সভাৰপকতি এসা যং একোযেৰ বুদ্ধো লোকে উপ্পজ্জতি। কস্মা কারণা? মহন্তত্তা সব্বঞ্ঞুবুদ্ধগুণানং। অঞ্ঞম্পি, মহারাজ, যং লোকে মহন্তং তং একংযেৰ হোতি। পথৰী, মহারাজ, মহন্তা, সা একাযেৰ; সাগরো মহন্তো, সো একোযেৰ; সিনেরু গিরিরাজা মহন্তো, সো একোযেৰ; আকাসো মহন্তো, সো একোযেৰ; সক্কো মহন্তো, সো একোযেৰ; মহাব্রহ্মা মহন্তো, সো একোযেৰ; তথাগতো অরহং সম্মাসম্বুদ্ধো মহন্তো, সো একোযেৰ লোকস্মিং। যত্থ তে উপ্পজ্জন্তি তত্থ অঞ্ঞেসং ওকাসো ন হোতি। তস্মা, মহারাজ, তথাগতো অরহং সম্মাসম্বুদ্ধো একোযেৰ লোকে উপ্পজ্জতী’’তি।

    ‘‘Apica, mahārāja, buddhānaṃ bhagavantānaṃ sabhāvapakati esā yaṃ ekoyeva buddho loke uppajjati. Kasmā kāraṇā? Mahantattā sabbaññubuddhaguṇānaṃ. Aññampi, mahārāja, yaṃ loke mahantaṃ taṃ ekaṃyeva hoti. Pathavī, mahārāja, mahantā, sā ekāyeva; sāgaro mahanto, so ekoyeva; sineru girirājā mahanto, so ekoyeva; ākāso mahanto, so ekoyeva; sakko mahanto, so ekoyeva; mahābrahmā mahanto, so ekoyeva; tathāgato arahaṃ sammāsambuddho mahanto, so ekoyeva lokasmiṃ. Yattha te uppajjanti tattha aññesaṃ okāso na hoti. Tasmā, mahārāja, tathāgato arahaṃ sammāsambuddho ekoyeva loke uppajjatī’’ti.

    ‘‘সুকথিতো, ভন্তে নাগসেন, পঞ্হো ওপম্মেহি কারণেহী’’তি (মি॰ প॰ ৫.১.১)।

    ‘‘Sukathito, bhante nāgasena, pañho opammehi kāraṇehī’’ti (mi. pa. 5.1.1).

    একিস্সা লোকধাতুযাতি একস্মিং চক্কৰাল়ে। হেট্ঠা ইমিনাৰ পদেন দস চক্কৰাল়সহস্সানি গহিতানি। তানিপি একচক্কৰাল়েনেৰ পরিচ্ছিন্দিতুং ৰট্টন্তি। বুদ্ধা হি উপ্পজ্জমানা ইমস্মিংযেৰ চক্কৰাল়ে উপ্পজ্জন্তি; উপ্পজ্জনট্ঠানে পন ৰারিতে ইতো অঞ্ঞেসু চক্কৰাল়েসু ন উপ্পজ্জন্তীতি ৰারিতমেৰ হোতি। অপুব্বং অচরিমন্তি এত্থ চক্করতনপাতুভাৰতো পুব্বে পুব্বং, তস্সেৰ অন্তরধানতো পচ্ছা চরিমং। তত্থ দ্ৰিধা চক্করতনস্স অন্তরধানং হোতি – চক্কৰত্তিনো কালকিরিযায ৰা পব্বজ্জায ৰা। অন্তরধাযমানঞ্চ পন তং কালকিরিযতো ৰা পব্বজ্জতো ৰা সত্তমে দিৰসে অন্তরধাযতি। ততো পরং চক্কৰত্তিনো পাতুভাৰো অৰারিতো। কস্মা পন একচক্কৰাল়ে দ্ৰে চক্কৰত্তিনো নুপ্পজ্জন্তীতি? ৰিৰাদুপচ্ছেদতো অনচ্ছরিযভাৰতো চক্করতনস্স মহানুভাৰতো চ। দ্ৰীসু হি উপ্পজ্জন্তেসু ‘অম্হাকং রাজা মহন্তো, অম্হাকং রাজা মহন্তো’তি ৰিৰাদো উপ্পজ্জেয্য। ‘একস্মিং দীপে চক্কৰত্তী, একস্মিং দীপে চক্কৰত্তী’তি চ অনচ্ছরিযো ভৰেয্য। যো চাযং চক্করতনস্স দ্ৰিসহস্সদীপপরিৰারেসু চতূসু মহাদীপেসু ইস্সরিযানুপ্পদানসমত্থো মহানুভাৰো, সো পরিহাযেয্য। ইতি ৰিৰাদুপচ্ছেদতো অনচ্ছরিযভাৰতো চক্করতনস্স মহানুভাৰতো চ ন একচক্কৰাল়ে দ্ৰে উপ্পজ্জন্তি।

    Ekissālokadhātuyāti ekasmiṃ cakkavāḷe. Heṭṭhā imināva padena dasa cakkavāḷasahassāni gahitāni. Tānipi ekacakkavāḷeneva paricchindituṃ vaṭṭanti. Buddhā hi uppajjamānā imasmiṃyeva cakkavāḷe uppajjanti; uppajjanaṭṭhāne pana vārite ito aññesu cakkavāḷesu na uppajjantīti vāritameva hoti. Apubbaṃ acarimanti ettha cakkaratanapātubhāvato pubbe pubbaṃ, tasseva antaradhānato pacchā carimaṃ. Tattha dvidhā cakkaratanassa antaradhānaṃ hoti – cakkavattino kālakiriyāya vā pabbajjāya vā. Antaradhāyamānañca pana taṃ kālakiriyato vā pabbajjato vā sattame divase antaradhāyati. Tato paraṃ cakkavattino pātubhāvo avārito. Kasmā pana ekacakkavāḷe dve cakkavattino nuppajjantīti? Vivādupacchedato anacchariyabhāvato cakkaratanassa mahānubhāvato ca. Dvīsu hi uppajjantesu ‘amhākaṃ rājā mahanto, amhākaṃ rājā mahanto’ti vivādo uppajjeyya. ‘Ekasmiṃ dīpe cakkavattī, ekasmiṃ dīpe cakkavattī’ti ca anacchariyo bhaveyya. Yo cāyaṃ cakkaratanassa dvisahassadīpaparivāresu catūsu mahādīpesu issariyānuppadānasamattho mahānubhāvo, so parihāyeyya. Iti vivādupacchedato anacchariyabhāvato cakkaratanassa mahānubhāvato ca na ekacakkavāḷe dve uppajjanti.

    যং ইত্থো অরহং অস্স সম্মাসম্বুদ্ধোতি এত্থ তিট্ঠতু তাৰ সব্বঞ্ঞুগুণে নিব্বত্তেত্ৰা লোকত্তারণসমত্থো বুদ্ধভাৰো, পণিধানমত্তম্পি ইত্থিযা ন সম্পজ্জতি।

    Yaṃ ittho arahaṃ assa sammāsambuddhoti ettha tiṭṭhatu tāva sabbaññuguṇe nibbattetvā lokattāraṇasamattho buddhabhāvo, paṇidhānamattampi itthiyā na sampajjati.

    ‘‘মনুস্সত্তং লিঙ্গসম্পত্তি, হেতু সত্থারদস্সনং।

    ‘‘Manussattaṃ liṅgasampatti, hetu satthāradassanaṃ;

    পব্বজ্জা গুণসম্পত্তি, অধিকারো চ ছন্দতা।

    Pabbajjā guṇasampatti, adhikāro ca chandatā;

    অট্ঠধম্মসমোধানা, অভিনীহারো সমিজ্ঝতী’’তি॥ (বু॰ ৰং॰ ২.৫৯)।

    Aṭṭhadhammasamodhānā, abhinīhāro samijjhatī’’ti. (bu. vaṃ. 2.59);

    ইমানি হি পণিধানসম্পত্তিকারণানি। ইতি পণিধানম্পি সম্পাদেতুং অসমত্থায ইত্থিযা কুতো বুদ্ধভাৰোতি ‘‘অট্ঠানমেতং, অনৰকাসো যং ইত্থী অরহং অস্স সম্মাসম্বুদ্ধো’’তি ৰুত্তং। সব্বাকারপরিপূরো ৰা পুঞ্ঞুস্সযো সব্বাকারপরিপূরমেৰ অত্তভাৰং নিব্বত্তেতীতি পুরিসোৰ অরহং হোতি সম্মাসম্বুদ্ধো।

    Imāni hi paṇidhānasampattikāraṇāni. Iti paṇidhānampi sampādetuṃ asamatthāya itthiyā kuto buddhabhāvoti ‘‘aṭṭhānametaṃ, anavakāso yaṃ itthī arahaṃ assa sammāsambuddho’’ti vuttaṃ. Sabbākāraparipūro vā puññussayo sabbākāraparipūrameva attabhāvaṃ nibbattetīti purisova arahaṃ hoti sammāsambuddho.

    যং ইত্থী রাজা অস্স চক্কৰত্তীতিআদীসুপি যস্মা ইত্থিযা কোসোহিতৰত্থগুয্হাদীনং অভাৰেন লক্খণানি ন পরিপূরেন্তি, ইত্থিরতনভাৰেন সত্তরতনসমঙ্গিতা ন সম্পজ্জতি, সব্বমনুস্সেহি চ অধিকো অত্তভাৰো ন হোতি, তস্মা ‘‘অট্ঠানমেতং অনৰকাসো যং ইত্থী রাজা অস্স চক্কৰত্তী’’তি ৰুত্তং। যস্মা চ সক্কত্তাদীনিপি তীণি ঠানানি উত্তমানি, ইত্থিলিঙ্গঞ্চ হীনং , তস্মা তস্সা সক্কত্তাদীনিপি পটিসিদ্ধানি। ননু চ যথা ইত্থিলিঙ্গং এৰং পুরিসলিঙ্গম্পি ব্রহ্মলোকে নত্থি, তস্মা ‘‘যং পুরিসো ব্রহ্মত্তং কারেয্য – ঠানমেতং ৰিজ্জতী’’তিপি ন ৰত্তব্বং সিযাতি? নো ন ৰত্তব্বং। কস্মা? ইধ পুরিসস্স তত্থ নিব্বত্তনতো। ব্রহ্মত্তন্তি হি মহাব্রহ্মত্তং অধিপ্পেতং। ইত্থী চ ইধ ঝানং ভাৰেত্ৰা কালং কত্ৰা ব্রহ্মপারিসজ্জানং সহব্যতং উপপজ্জতি, ন মহাব্রহ্মানং। পুরিসো পন তত্থ ন উপ্পজ্জতীতি ন ৰত্তব্বো। সমানেপি চেত্থ উভযলিঙ্গাভাৰে পুরিসসণ্ঠানাৰ ব্রহ্মানো, ন ইত্থিসণ্ঠানা। তস্মা সুৰুত্তমেৰেতং।

    Yaṃitthī rājā assa cakkavattītiādīsupi yasmā itthiyā kosohitavatthaguyhādīnaṃ abhāvena lakkhaṇāni na paripūrenti, itthiratanabhāvena sattaratanasamaṅgitā na sampajjati, sabbamanussehi ca adhiko attabhāvo na hoti, tasmā ‘‘aṭṭhānametaṃ anavakāso yaṃ itthī rājā assa cakkavattī’’ti vuttaṃ. Yasmā ca sakkattādīnipi tīṇi ṭhānāni uttamāni, itthiliṅgañca hīnaṃ , tasmā tassā sakkattādīnipi paṭisiddhāni. Nanu ca yathā itthiliṅgaṃ evaṃ purisaliṅgampi brahmaloke natthi, tasmā ‘‘yaṃ puriso brahmattaṃ kāreyya – ṭhānametaṃ vijjatī’’tipi na vattabbaṃ siyāti? No na vattabbaṃ. Kasmā? Idha purisassa tattha nibbattanato. Brahmattanti hi mahābrahmattaṃ adhippetaṃ. Itthī ca idha jhānaṃ bhāvetvā kālaṃ katvā brahmapārisajjānaṃ sahabyataṃ upapajjati, na mahābrahmānaṃ. Puriso pana tattha na uppajjatīti na vattabbo. Samānepi cettha ubhayaliṅgābhāve purisasaṇṭhānāva brahmāno, na itthisaṇṭhānā. Tasmā suvuttamevetaṃ.

    কাযদুচ্চরিতস্সাতিআদীসু যথা নিম্ববীজকোসাতকীবীজাদীনি মধুরং ফলং ন নিব্বত্তেন্তি, অসাতং অমধুরমেৰ নিব্বত্তেন্তি, এৰং কাযদুচ্চরিতাদীনি মধুরং ৰিপাকং ন নিব্বত্তেন্তি, অমধুরমেৰ নিব্বত্তেন্তি। যথা চ উচ্ছুবীজসালিবীজাদীনি মধুরং সাধুরসমেৰ ফলং নিব্বত্তেন্তি, ন অসাতং কটুকং, এৰং কাযসুচরিতাদীনি মধুরমেৰ ৰিপাকং নিব্বত্তেন্তি, ন অমধুরং। ৰুত্তম্পি চেতং –

    Kāyaduccaritassātiādīsu yathā nimbabījakosātakībījādīni madhuraṃ phalaṃ na nibbattenti, asātaṃ amadhurameva nibbattenti, evaṃ kāyaduccaritādīni madhuraṃ vipākaṃ na nibbattenti, amadhurameva nibbattenti. Yathā ca ucchubījasālibījādīni madhuraṃ sādhurasameva phalaṃ nibbattenti, na asātaṃ kaṭukaṃ, evaṃ kāyasucaritādīni madhurameva vipākaṃ nibbattenti, na amadhuraṃ. Vuttampi cetaṃ –

    ‘‘যাদিসং ৰপতে বীজং, তাদিসং হরতে ফলং।

    ‘‘Yādisaṃ vapate bījaṃ, tādisaṃ harate phalaṃ;

    কল্যাণকারী কল্যাণং, পাপকারী চ পাপকন্তি॥ (সং॰ নি॰ ১.২৫৬)।

    Kalyāṇakārī kalyāṇaṃ, pāpakārī ca pāpakanti. (saṃ. ni. 1.256);

    তস্মা ‘‘অট্ঠানমেতং অনৰকাসো, যং কাযদুচ্চরিতস্সা’’তিআদি ৰুত্তং।

    Tasmā ‘‘aṭṭhānametaṃ anavakāso, yaṃ kāyaduccaritassā’’tiādi vuttaṃ.

    কাযদুচ্চরিতসমঙ্গীতিআদীসু সমঙ্গীতি পঞ্চৰিধা সমঙ্গিতা – আযূহনসমঙ্গিতা, চেতনাসমঙ্গিতা, কম্মসমঙ্গিতা, ৰিপাকসমঙ্গিতা, উপট্ঠানসমঙ্গিতাতি। তত্থ কুসলাকুসলকম্মাযূহনক্খণে ‘আযূহনসমঙ্গিতা’ ৰুচ্চতি। তথা ‘চেতনাসমঙ্গিতা’। যাৰ পন অরহত্তং ন পাপুণন্তি তাৰ সব্বেপি সত্তা পুব্বে উপচিতং ৰিপাকারহং কম্মং সন্ধায কম্মসমঙ্গিনোতি ৰুচ্চন্তি – এসা ‘কম্মসমঙ্গিতা’। ‘ৰিপাকসমঙ্গিতা’ পন ৰিপাকক্খণেযেৰ ৰেদিতব্বা। যাৰ পন সত্তা অরহত্তং ন পাপুণন্তি তাৰ তেসং ততো ততো চৰিত্ৰা নিরযে তাৰ উপ্পজ্জমানানং অগ্গিজাললোহকুম্ভীআদীহি উপট্ঠানাকারেহি নিরযো, গব্ভসেয্যকত্তং আপজ্জমানানং মাতুকুচ্ছি, দেৰেসু উপ্পজ্জমানানং কপ্পরুক্খৰিমানাদীহি উপট্ঠানাকারেহি দেৰলোকোতি এৰং উপপত্তিনিমিত্তং উপট্ঠাতি। ইতি নেসং ইমিনা উপ্পত্তিনিমিত্তূপট্ঠানেন অপরিমুত্তত্তা ‘উপট্ঠানসমঙ্গিতা’ নাম। সাৰ চলতি, সেসা নিচ্চলা। নিরযে হি উপট্ঠিতেপি দেৰলোকো উপট্ঠাতি; দেৰলোকে উপট্ঠিতেপি নিরযো উপট্ঠাতি; মনুস্সলোকে উপট্ঠিতেপি তিরচ্ছানযোনি উপট্ঠাতি; তিরচ্ছানযোনিযা চ উপট্ঠিতাযপি মনুস্সলোকো উপট্ঠাতিযেৰ।

    Kāyaduccaritasamaṅgītiādīsu samaṅgīti pañcavidhā samaṅgitā – āyūhanasamaṅgitā, cetanāsamaṅgitā, kammasamaṅgitā, vipākasamaṅgitā, upaṭṭhānasamaṅgitāti. Tattha kusalākusalakammāyūhanakkhaṇe ‘āyūhanasamaṅgitā’ vuccati. Tathā ‘cetanāsamaṅgitā’. Yāva pana arahattaṃ na pāpuṇanti tāva sabbepi sattā pubbe upacitaṃ vipākārahaṃ kammaṃ sandhāya kammasamaṅginoti vuccanti – esā ‘kammasamaṅgitā’. ‘Vipākasamaṅgitā’ pana vipākakkhaṇeyeva veditabbā. Yāva pana sattā arahattaṃ na pāpuṇanti tāva tesaṃ tato tato cavitvā niraye tāva uppajjamānānaṃ aggijālalohakumbhīādīhi upaṭṭhānākārehi nirayo, gabbhaseyyakattaṃ āpajjamānānaṃ mātukucchi, devesu uppajjamānānaṃ kapparukkhavimānādīhi upaṭṭhānākārehi devalokoti evaṃ upapattinimittaṃ upaṭṭhāti. Iti nesaṃ iminā uppattinimittūpaṭṭhānena aparimuttattā ‘upaṭṭhānasamaṅgitā’ nāma. Sāva calati, sesā niccalā. Niraye hi upaṭṭhitepi devaloko upaṭṭhāti; devaloke upaṭṭhitepi nirayo upaṭṭhāti; manussaloke upaṭṭhitepi tiracchānayoni upaṭṭhāti; tiracchānayoniyā ca upaṭṭhitāyapi manussaloko upaṭṭhātiyeva.

    তত্রিদং ৰত্থু – সোণগিরিপাদে কির অচেলৰিহারে সোণত্থেরো নাম একো ধম্মকথিকো। তস্স পিতা সুনখৰাজিকো নাম লুদ্দকো অহোসি। থেরো তং পটিবাহন্তোপি সংৰরে ঠপেতুং অসক্কোন্তো ‘মা নস্সি ৰরাকো’তি মহল্লককালে অকামকং পব্বাজেসি। তস্স গিলানসেয্যায নিপন্নস্স নিরযো উপট্ঠাসি। সোণগিরিপাদতো মহন্তা মহন্তা সুনখা আগন্ত্ৰা খাদিতুকামা ৰিয সম্পরিৰারেসুং। সো মহাভযভীতো ‘‘ৰারেহি, তাত সোণ! ৰারেহি, তাত সোণা’’তি আহ। ‘‘কিং মহাথেরা’’তি? ‘‘ন পস্সসি, তাতা’’তি তং পৰত্তিং আচিক্খি। সোণত্থেরো ‘কথঞ্হি নাম মাদিসস্স পিতা নিরযে নিব্বত্তিস্সতি, পতিট্ঠাহমস্স ভৰিস্সামী’তি সামণেরেহি নানাপুপ্ফানি আহরাপেত্ৰা চেতিযঙ্গণবোধিযঙ্গণেসু মালাসন্থারপূজঞ্চ আসনপূজঞ্চ কারেত্ৰা পিতরং মঞ্চেন চেতিযঙ্গণং হরিত্ৰা মঞ্চে নিপজ্জাপেত্ৰা ‘‘অযং মে, মহাথের, পূজা তুম্হাকং অত্থায কতা; ‘অযং মে, ভগৰা, দুগ্গতপণ্ণাকারো’তি ৰত্ৰা ভগৰন্তং ৰন্দিত্ৰা চিত্তং পসাদেহী’’তি আহ। সো মহাথেরো পূজং দিস্ৰা তথাকরোন্তো চিত্তং পসাদেসি। তাৰদেৰস্স দেৰলোকো উপট্ঠাসি, নন্দৰনচিত্তলতাৰনমিস্সকৰনফারুসকৰনৰিমানানি চেৰ দেৰনাটকানি চ পরিৰারেত্ৰা ঠিতানি ৰিয অহেসুং। সো ‘‘অপেথ, সোণ! অপেথ, সোণা’’তি আহ। ‘‘কিমিদং, মহাথেরা’’তি? ‘‘এতা তে, তাত, মাতরো আগচ্ছন্তী’’তি। ‘থেরো সগ্গো উপট্ঠিতো মহাথেরস্সা’তি চিন্তেসি । এৰং উপট্ঠানসমঙ্গিতা চলতীতি ৰেদিতব্বা। এতাসু সমঙ্গিতাসু ইধ আযূহনচেতনাকম্মসমঙ্গিতাৰসেন ‘‘কাযদুচ্চরিতসমঙ্গী’’তিআদি ৰুত্তং। সেসং সব্বত্থ উত্তানত্থমেৰাতি।

    Tatridaṃ vatthu – soṇagiripāde kira acelavihāre soṇatthero nāma eko dhammakathiko. Tassa pitā sunakhavājiko nāma luddako ahosi. Thero taṃ paṭibāhantopi saṃvare ṭhapetuṃ asakkonto ‘mā nassi varāko’ti mahallakakāle akāmakaṃ pabbājesi. Tassa gilānaseyyāya nipannassa nirayo upaṭṭhāsi. Soṇagiripādato mahantā mahantā sunakhā āgantvā khāditukāmā viya samparivāresuṃ. So mahābhayabhīto ‘‘vārehi, tāta soṇa! Vārehi, tāta soṇā’’ti āha. ‘‘Kiṃ mahātherā’’ti? ‘‘Na passasi, tātā’’ti taṃ pavattiṃ ācikkhi. Soṇatthero ‘kathañhi nāma mādisassa pitā niraye nibbattissati, patiṭṭhāhamassa bhavissāmī’ti sāmaṇerehi nānāpupphāni āharāpetvā cetiyaṅgaṇabodhiyaṅgaṇesu mālāsanthārapūjañca āsanapūjañca kāretvā pitaraṃ mañcena cetiyaṅgaṇaṃ haritvā mañce nipajjāpetvā ‘‘ayaṃ me, mahāthera, pūjā tumhākaṃ atthāya katā; ‘ayaṃ me, bhagavā, duggatapaṇṇākāro’ti vatvā bhagavantaṃ vanditvā cittaṃ pasādehī’’ti āha. So mahāthero pūjaṃ disvā tathākaronto cittaṃ pasādesi. Tāvadevassa devaloko upaṭṭhāsi, nandavanacittalatāvanamissakavanaphārusakavanavimānāni ceva devanāṭakāni ca parivāretvā ṭhitāni viya ahesuṃ. So ‘‘apetha, soṇa! Apetha, soṇā’’ti āha. ‘‘Kimidaṃ, mahātherā’’ti? ‘‘Etā te, tāta, mātaro āgacchantī’’ti. ‘Thero saggo upaṭṭhito mahātherassā’ti cintesi . Evaṃ upaṭṭhānasamaṅgitā calatīti veditabbā. Etāsu samaṅgitāsu idha āyūhanacetanākammasamaṅgitāvasena ‘‘kāyaduccaritasamaṅgī’’tiādi vuttaṃ. Sesaṃ sabbattha uttānatthamevāti.

    পঠমবলনিদ্দেসৰণ্ণনা।

    Paṭhamabalaniddesavaṇṇanā.

    দুতিযবলনিদ্দেসো

    Dutiyabalaniddeso

    ৮১০. দুতিযবলনিদ্দেসে গতিসম্পত্তিপটিবাল়্হানীতি গতিসম্পত্তিযা পটিবাহিতানি নিৰারিতানি পটিসেধিতানি। সেসপদেসুপি এসেৰ নযো। এত্থ চ গতিসম্পত্তীতি সম্পন্না গতি দেৰলোকো চ মনুস্সলোকো চ। গতিৰিপত্তীতি ৰিপন্না গতি চত্তারো অপাযা। উপধিসম্পত্তীতি অত্তভাৰসমিদ্ধি। উপধিৰিপত্তীতি হীনঅত্তভাৰতা। কালসম্পত্তীতি সুরাজসুমনুস্সকালসঙ্খাতো সম্পন্নকালো। কালৰিপত্তীতি দুরাজদুমনুস্সকালসঙ্খাতো ৰিপন্নকালো। পযোগসম্পত্তীতি সম্মাপযোগো। পযোগৰিপত্তীতি মিচ্ছাপযোগো।

    810. Dutiyabalaniddese gatisampattipaṭibāḷhānīti gatisampattiyā paṭibāhitāni nivāritāni paṭisedhitāni. Sesapadesupi eseva nayo. Ettha ca gatisampattīti sampannā gati devaloko ca manussaloko ca. Gativipattīti vipannā gati cattāro apāyā. Upadhisampattīti attabhāvasamiddhi. Upadhivipattīti hīnaattabhāvatā. Kālasampattīti surājasumanussakālasaṅkhāto sampannakālo. Kālavipattīti durājadumanussakālasaṅkhāto vipannakālo. Payogasampattīti sammāpayogo. Payogavipattīti micchāpayogo.

    তত্থ একচ্চস্স বহূনি পাপকম্মানি হোন্তি। তানি গতিৰিপত্তিযং ঠিতস্স ৰিপচ্চেয্যুং। সো পন একেন কল্যাণকম্মেন গতিসম্পত্তিযং দেৰেসু ৰা মনুস্সেসু ৰা নিব্বত্তো। তাদিসে চ ঠানে অকুসলস্স ৰারো নত্থি, একন্তং কুসলস্সেৰ ৰারোতি। এৰমস্স তানি কম্মানি গতিসম্পত্তিপটিবাল়্হানি ন ৰিপচ্চন্তীতি পজানাতি।

    Tattha ekaccassa bahūni pāpakammāni honti. Tāni gativipattiyaṃ ṭhitassa vipacceyyuṃ. So pana ekena kalyāṇakammena gatisampattiyaṃ devesu vā manussesu vā nibbatto. Tādise ca ṭhāne akusalassa vāro natthi, ekantaṃ kusalasseva vāroti. Evamassa tāni kammāni gatisampattipaṭibāḷhāni na vipaccantīti pajānāti.

    অপরস্সাপি বহূনি পাপকম্মানি হোন্তি। তানি উপধিৰিপত্তিযং ঠিতস্স ৰিপচ্চেয্যুং। সো পন একেন কল্যাণকম্মেন উপধিসম্পত্তিযং ঠিতো সুসণ্ঠিতঙ্গপচ্চঙ্গো অভিরূপো দস্সনীযো ব্রহ্মৰচ্ছসদিসো। সচেপি দাসিযা কুচ্ছিস্মিং দাসজাতো হোতি ‘এৰরূপো অত্তভাৰো কিলিট্ঠকম্মস্স নানুচ্ছৰিকো’তি হত্থিমেণ্ডঅস্সবন্ধকগোপালককম্মাদীনি তং ন কারেন্তি; সুখুমৰত্থানি নিৰাসাপেত্ৰা ভণ্ডাগারিকট্ঠানাদীসু ঠপেন্তি। সচে ইত্থী হোতি, হত্থিভত্তপচনাদীনি ন কারেন্তি; ৰত্থালঙ্কারং দত্ৰা সযনপালিকং ৰা নং করোন্তি, সোমদেৰি ৰিয ৰল্লভট্ঠানে ৰা ঠপেন্তি। ভাতিকরাজকালে কির গোমংসখাদকে বহুজনে গহেত্ৰা রঞ্ঞো দস্সেসুং। তে ‘দণ্ডং দাতুং সক্কোথা’তি পুট্ঠা ‘ন সক্কোমা’তি ৰদিংসু। অথ নে রাজঙ্গণে সোধকে অকংসু। তেসং একা ধীতা অভিরূপা দস্সনীযা পাসাদিকা। তং দিস্ৰা রাজা অন্তেপুরং অভিনেত্ৰা ৰল্লভট্ঠানে ঠপেসি। সেসঞাতকাপি তস্সা আনুভাৰেন সুখং জীৰিংসু। তাদিসস্মিঞ্হি অত্তভাৰে পাপকম্মানিপি ৰিপাকং দাতুং ন সক্কোন্তি। এৰং উপধিসম্পত্তিপটিবাল়্হানি ন ৰিপচ্চন্তীতি পজানাতি।

    Aparassāpi bahūni pāpakammāni honti. Tāni upadhivipattiyaṃ ṭhitassa vipacceyyuṃ. So pana ekena kalyāṇakammena upadhisampattiyaṃ ṭhito susaṇṭhitaṅgapaccaṅgo abhirūpo dassanīyo brahmavacchasadiso. Sacepi dāsiyā kucchismiṃ dāsajāto hoti ‘evarūpo attabhāvo kiliṭṭhakammassa nānucchaviko’ti hatthimeṇḍaassabandhakagopālakakammādīni taṃ na kārenti; sukhumavatthāni nivāsāpetvā bhaṇḍāgārikaṭṭhānādīsu ṭhapenti. Sace itthī hoti, hatthibhattapacanādīni na kārenti; vatthālaṅkāraṃ datvā sayanapālikaṃ vā naṃ karonti, somadevi viya vallabhaṭṭhāne vā ṭhapenti. Bhātikarājakāle kira gomaṃsakhādake bahujane gahetvā rañño dassesuṃ. Te ‘daṇḍaṃ dātuṃ sakkothā’ti puṭṭhā ‘na sakkomā’ti vadiṃsu. Atha ne rājaṅgaṇe sodhake akaṃsu. Tesaṃ ekā dhītā abhirūpā dassanīyā pāsādikā. Taṃ disvā rājā antepuraṃ abhinetvā vallabhaṭṭhāne ṭhapesi. Sesañātakāpi tassā ānubhāvena sukhaṃ jīviṃsu. Tādisasmiñhi attabhāve pāpakammānipi vipākaṃ dātuṃ na sakkonti. Evaṃ upadhisampattipaṭibāḷhāni na vipaccantīti pajānāti.

    একস্স বহূনি পাপকম্মানি হোন্তি। তানি কালৰিপত্তিযং ঠিতস্স ৰিপচ্চেয্যুং। সো পন একেন কল্যাণকম্মেন পঠমকপ্পিকানং ৰা চক্কৰত্তিরঞ্ঞো ৰা বুদ্ধানং ৰা উপ্পত্তিসমযে সুরাজসুমনুস্সকালে নিব্বত্তো। তাদিসে চ কালে নিব্বত্তস্স অকুসলস্স ৰিপাকং দাতুং ওকাসো নত্থি, একন্তং কুসলস্সেৰ ওকাসোতি। এৰং কালসম্পত্তিপটিবাল়্হানি ন ৰিপচ্চন্তীতি পজানাতি।

    Ekassa bahūni pāpakammāni honti. Tāni kālavipattiyaṃ ṭhitassa vipacceyyuṃ. So pana ekena kalyāṇakammena paṭhamakappikānaṃ vā cakkavattirañño vā buddhānaṃ vā uppattisamaye surājasumanussakāle nibbatto. Tādise ca kāle nibbattassa akusalassa vipākaṃ dātuṃ okāso natthi, ekantaṃ kusalasseva okāsoti. Evaṃ kālasampattipaṭibāḷhāni na vipaccantīti pajānāti.

    অপরস্সাপি বহূনি পাপকম্মানি হোন্তি। তানি পযোগৰিপত্তিযং ঠিতস্স ৰিপচ্চেয্যুং। সো পন একেন কল্যাণকম্মেন পযোগসম্পত্তিযং ঠিতো পাণাতিপাতাদীহি ৰিরতো কাযৰচীমনোসুচরিতানি পূরেতি। তাদিসে ঠানে অকুসলস্স ৰিপচ্চনোকাসো নত্থি, একন্তং কুসলস্সেৰ ওকাসোতি। এৰং পযোগসম্পত্তিপটিবাল়্হানি ন ৰিপচ্চন্তীতি পজানাতি।

    Aparassāpi bahūni pāpakammāni honti. Tāni payogavipattiyaṃ ṭhitassa vipacceyyuṃ. So pana ekena kalyāṇakammena payogasampattiyaṃ ṭhito pāṇātipātādīhi virato kāyavacīmanosucaritāni pūreti. Tādise ṭhāne akusalassa vipaccanokāso natthi, ekantaṃ kusalasseva okāsoti. Evaṃ payogasampattipaṭibāḷhāni na vipaccantīti pajānāti.

    অপরস্সাপি বহূনি পাপকম্মানি হোন্তি। তানি গতিসম্পত্তিযং ঠিতস্স ন ৰিপচ্চেয্যুং। সো পনেকেন পাপকম্মেন গতিৰিপত্তিযংযেৰ নিব্বত্তো। তত্থস্স তানি কম্মানি উপগন্ত্ৰা ৰারেন ৰারেন ৰিপাকং দেন্তি – কালেন নিরযে নিব্বত্তাপেন্তি, কালেন তিরচ্ছানযোনিযং, কালেন পেত্তিৰিসযে, কালেন অসুরকাযে, দীঘেনাপি অদ্ধুনা অপাযতো সীসং উক্খিপিতুং ন দেন্তি। এৰং গতিসম্পত্তিপটিবাহিতত্তা ৰিপাকং দাতুং অসক্কোন্তানি গতিৰিপত্তিং আগম্ম ৰিপচ্চন্তীতি পজানাতি।

    Aparassāpi bahūni pāpakammāni honti. Tāni gatisampattiyaṃ ṭhitassa na vipacceyyuṃ. So panekena pāpakammena gativipattiyaṃyeva nibbatto. Tatthassa tāni kammāni upagantvā vārena vārena vipākaṃ denti – kālena niraye nibbattāpenti, kālena tiracchānayoniyaṃ, kālena pettivisaye, kālena asurakāye, dīghenāpi addhunā apāyato sīsaṃ ukkhipituṃ na denti. Evaṃ gatisampattipaṭibāhitattā vipākaṃ dātuṃ asakkontāni gativipattiṃ āgamma vipaccantīti pajānāti.

    অপরস্সাপি বহূনি পাপকম্মানি হোন্তি। তানি উপধিসম্পত্তিযং ঠিতস্স ন ৰিপচ্চেয্যুং । সো পন একেন পাপকম্মেন উপধিৰিপত্তিযংযেৰ পতিট্ঠিতো দুব্বণ্ণো দুরূপো দুস্সণ্ঠিতো বীভচ্ছো পিসাচসদিসো। সো সচে দাসিযা কুচ্ছিযং দাসজাতো ‘ইমানি এতস্স অনুচ্ছৰিকানী’তি সব্বানি নং কিলিট্ঠকম্মানি কারেন্তি অন্তমসো পুপ্ফছড্ডককম্মং উপাদায। সচে ইত্থী হোতি ‘ইমানি এতিস্সা অনুচ্ছৰিকানী’তি সব্বানি নং হত্থিভত্তপচনাদীনি কিলিট্ঠকম্মানি কারেন্তি। কুলগেহে জাতম্পি বলিং সাধযমানা রাজপুরিসা ‘গেহদাসী’তি সঞ্ঞং কত্ৰা বন্ধিত্ৰা গচ্ছন্তি, কোতলৰাপীগামে মহাকুটুম্বিকস্স ঘরণী ৰিয। এৰং উপধিসম্পত্তিপটিবাহিতত্তা ৰিপাকং দাতুং অসক্কোন্তানি উপধিৰিপত্তিং আগম্ম ৰিপচ্চন্তীতি পজানাতি।

    Aparassāpi bahūni pāpakammāni honti. Tāni upadhisampattiyaṃ ṭhitassa na vipacceyyuṃ . So pana ekena pāpakammena upadhivipattiyaṃyeva patiṭṭhito dubbaṇṇo durūpo dussaṇṭhito bībhaccho pisācasadiso. So sace dāsiyā kucchiyaṃ dāsajāto ‘imāni etassa anucchavikānī’ti sabbāni naṃ kiliṭṭhakammāni kārenti antamaso pupphachaḍḍakakammaṃ upādāya. Sace itthī hoti ‘imāni etissā anucchavikānī’ti sabbāni naṃ hatthibhattapacanādīni kiliṭṭhakammāni kārenti. Kulagehe jātampi baliṃ sādhayamānā rājapurisā ‘gehadāsī’ti saññaṃ katvā bandhitvā gacchanti, kotalavāpīgāme mahākuṭumbikassa gharaṇī viya. Evaṃ upadhisampattipaṭibāhitattā vipākaṃ dātuṃ asakkontāni upadhivipattiṃ āgamma vipaccantīti pajānāti.

    অপরস্সাপি বহূনি পাপকম্মানি হোন্তি। তানি কালসম্পত্তিযং নিব্বাতস্স ন ৰিপচ্চেয্যুং। সো পন একেন পাপকম্মেন কালৰিপত্তিযং দুরাজদুমনুস্সকালে কসটে নিরোজে দসৰস্সাযুককালে নিব্বত্তো, যদা পঞ্চ গোরসা পচ্ছিজ্জন্তি, কুদ্রূসকং অগ্গভোজনং হোতি। কিঞ্চাপি মনুস্সলোকে নিব্বত্তো, মিগপসুসরিক্খজীৰিকো পন হোতি। এৰরূপে কালে কুসলস্স ৰিপচ্চনোকাসো নত্থি, একন্তং অকুসলস্সেৰ হোতি। এৰং কালসম্পত্তিপটিবাহিতত্তা ৰিপাকং দাতুং অসক্কোন্তানি কালৰিপত্তিং আগম্ম ৰিপচ্চন্তীতি পজানাতি।

    Aparassāpi bahūni pāpakammāni honti. Tāni kālasampattiyaṃ nibbātassa na vipacceyyuṃ. So pana ekena pāpakammena kālavipattiyaṃ durājadumanussakāle kasaṭe niroje dasavassāyukakāle nibbatto, yadā pañca gorasā pacchijjanti, kudrūsakaṃ aggabhojanaṃ hoti. Kiñcāpi manussaloke nibbatto, migapasusarikkhajīviko pana hoti. Evarūpe kāle kusalassa vipaccanokāso natthi, ekantaṃ akusalasseva hoti. Evaṃ kālasampattipaṭibāhitattā vipākaṃ dātuṃ asakkontāni kālavipattiṃ āgamma vipaccantīti pajānāti.

    অপরস্সাপি বহূনি পাপকম্মানি হোন্তি। তানি পযোগসম্পত্তিযং ঠিতস্স ন ৰিপচ্চেয্যুং। সো পন পযোগৰিপত্তিযং ঠিতো পাণাতিপাতাদীনি দস অকুসলকম্মানি করোতি। তমেনং সহোড্ঢং গহেত্ৰা রঞ্ঞো দস্সেন্তি। রাজা বহূকম্মকারণানি কারেত্ৰা ঘাতাপেতি। এৰং পযোগসম্পত্তিপটিবাহিতত্তা ৰিপাকং দাতুং অসক্কোন্তানি পযোগৰিপত্তিং আগম্ম ৰিপচ্চন্তীতি পজানাতি। এৰং চতূহি সম্পত্তীহি পটিবাহিতং পাপকম্মং ৰিপাকং অদত্ৰা চতস্সো ৰিপত্তিযো আগম্ম দেতি।

    Aparassāpi bahūni pāpakammāni honti. Tāni payogasampattiyaṃ ṭhitassa na vipacceyyuṃ. So pana payogavipattiyaṃ ṭhito pāṇātipātādīni dasa akusalakammāni karoti. Tamenaṃ sahoḍḍhaṃ gahetvā rañño dassenti. Rājā bahūkammakāraṇāni kāretvā ghātāpeti. Evaṃ payogasampattipaṭibāhitattā vipākaṃ dātuṃ asakkontāni payogavipattiṃ āgamma vipaccantīti pajānāti. Evaṃ catūhi sampattīhi paṭibāhitaṃ pāpakammaṃ vipākaṃ adatvā catasso vipattiyo āgamma deti.

    যথা হি কোচিদেৰ পুরিসো কেনচিদেৰ কম্মেন রাজানং আরাধেয্য। অথস্স রাজা ঠানন্তরং দত্ৰা জনপদং দদেয্য। সো তং সম্মা পরিভুঞ্জিতুং অসক্কোন্তো মক্কটেন গহিতভত্তপুটং ৰিয ভিন্দেয্য; যস্স যং যানং ৰা ৰাহনং ৰা দাসং ৰা দাসিং ৰা আরামং ৰা ৰত্থুং ৰা সম্পন্নরূপং পস্সতি, সব্বং বলক্কারেন গণ্হেয্য। মনুস্সা ‘রাজৰল্লভো’তি কিঞ্চি ৰত্তুং ন সক্কুণেয্যুং। সো অঞ্ঞস্স ৰল্লভতরস্স রাজমহামত্তস্স ৰিরুজ্ঝেয্য। সো তং গহেত্ৰা সুপোথিতং পোথাপেত্ৰা ভূমিং পিট্ঠিযা ঘংসাপেন্তো নিক্কড্ঢাপেত্ৰা রাজানং উপসঙ্কমিত্ৰা ‘অসুকো নাম তে , দেৰ, জনপদং ভিন্দতী’তি গণ্হাপেয্য। রাজা বন্ধনাগারে বন্ধাপেত্ৰা ‘অসুকেন নাম কস্স কিং অৰহট’ন্তি নগরে ভেরিং চরাপেয্য। মনুস্সা আগন্ত্ৰা ‘ময্হং ইদং গহিতং, ময্হং ইদং গহিত’ন্তি ৰিরৰসহস্সং উট্ঠাপেয্যুং। রাজা ভিয্যোসো মত্তায কুদ্ধো নানপ্পকারেন তং বন্ধনাগারে কিলমেত্ৰা ঘাতাপেত্ৰা ‘গচ্ছথ নং সুসানে ছড্ডেত্ৰা সঙ্খলিকা আহরথা’তি ৰদেয্য। এৰংসম্পদমিদং দট্ঠব্বং।

    Yathā hi kocideva puriso kenacideva kammena rājānaṃ ārādheyya. Athassa rājā ṭhānantaraṃ datvā janapadaṃ dadeyya. So taṃ sammā paribhuñjituṃ asakkonto makkaṭena gahitabhattapuṭaṃ viya bhindeyya; yassa yaṃ yānaṃ vā vāhanaṃ vā dāsaṃ vā dāsiṃ vā ārāmaṃ vā vatthuṃ vā sampannarūpaṃ passati, sabbaṃ balakkārena gaṇheyya. Manussā ‘rājavallabho’ti kiñci vattuṃ na sakkuṇeyyuṃ. So aññassa vallabhatarassa rājamahāmattassa virujjheyya. So taṃ gahetvā supothitaṃ pothāpetvā bhūmiṃ piṭṭhiyā ghaṃsāpento nikkaḍḍhāpetvā rājānaṃ upasaṅkamitvā ‘asuko nāma te , deva, janapadaṃ bhindatī’ti gaṇhāpeyya. Rājā bandhanāgāre bandhāpetvā ‘asukena nāma kassa kiṃ avahaṭa’nti nagare bheriṃ carāpeyya. Manussā āgantvā ‘mayhaṃ idaṃ gahitaṃ, mayhaṃ idaṃ gahita’nti viravasahassaṃ uṭṭhāpeyyuṃ. Rājā bhiyyoso mattāya kuddho nānappakārena taṃ bandhanāgāre kilametvā ghātāpetvā ‘gacchatha naṃ susāne chaḍḍetvā saṅkhalikā āharathā’ti vadeyya. Evaṃsampadamidaṃ daṭṭhabbaṃ.

    তস্স হি পুরিসস্স হি কেনচিদেৰ কম্মেন রাজানং আরাধেত্ৰা ঠানন্তরং লদ্ধকালো ৰিয পুথুজ্জনস্সাপি কেনচিদেৰ পুঞ্ঞকম্মেন সগ্গে নিব্বত্তকালো। তস্মিং জনপদং ভিন্দিত্ৰা মনুস্সানং সন্তকং গণ্হন্তে কস্সচি কিঞ্চি ৰত্তুং অৰিসহনকালো ৰিয ইমস্মিম্পি সগ্গে নিব্বত্তে অকুসলস্স ৰিপচ্চনোকাসং অলভনকালো। তস্স একদিৰসং একস্মিং রাজৰল্লভতরে ৰিরজ্ঝিত্ৰা তেন কুদ্ধেন নং পোথাপেত্ৰা রঞ্ঞো আরোচেত্ৰা বন্ধনাগারে বন্ধাপিতকালো ৰিয ইমস্স সগ্গতো চৰিত্ৰা নিরযে নিব্বত্তকালো। মনুস্সানং ‘ময্হং ইদং গহিতং, ময্হং ইদং গহিত’ন্তি ৰিরৰকালো ৰিয তস্মিং নিরযে নিব্বত্তে সব্বাকুসলকম্মানং সন্নিপতিত্ৰা গহণকালো। সুসানে ছড্ডেত্ৰা সঙ্খলিকানং আহরণকালো ৰিয একেকস্মিং কম্মে খীণে ইতরস্স ইতরস্স ৰিপাকেন নিরযতো সীসং অনুক্খিপিত্ৰা সকলকপ্পং নিরযম্হি পচ্চনকালো। কপ্পট্ঠিতিককম্মঞ্হি কত্ৰা এককপ্পং নিরযম্হি পচ্চনকসত্তা নেৰ একো, ন দ্ৰে, ন সতং, ন সহস্সং। এৰং পচ্চনকসত্তা কির গণনপথং ৰীতিৰত্তা।

    Tassa hi purisassa hi kenacideva kammena rājānaṃ ārādhetvā ṭhānantaraṃ laddhakālo viya puthujjanassāpi kenacideva puññakammena sagge nibbattakālo. Tasmiṃ janapadaṃ bhinditvā manussānaṃ santakaṃ gaṇhante kassaci kiñci vattuṃ avisahanakālo viya imasmimpi sagge nibbatte akusalassa vipaccanokāsaṃ alabhanakālo. Tassa ekadivasaṃ ekasmiṃ rājavallabhatare virajjhitvā tena kuddhena naṃ pothāpetvā rañño ārocetvā bandhanāgāre bandhāpitakālo viya imassa saggato cavitvā niraye nibbattakālo. Manussānaṃ ‘mayhaṃ idaṃ gahitaṃ, mayhaṃ idaṃ gahita’nti viravakālo viya tasmiṃ niraye nibbatte sabbākusalakammānaṃ sannipatitvā gahaṇakālo. Susāne chaḍḍetvā saṅkhalikānaṃ āharaṇakālo viya ekekasmiṃ kamme khīṇe itarassa itarassa vipākena nirayato sīsaṃ anukkhipitvā sakalakappaṃ nirayamhi paccanakālo. Kappaṭṭhitikakammañhi katvā ekakappaṃ nirayamhi paccanakasattā neva eko, na dve, na sataṃ, na sahassaṃ. Evaṃ paccanakasattā kira gaṇanapathaṃ vītivattā.

    অত্থেকচ্চানি কল্যাণানি কম্মসমাদানানি গতিৰিপত্তিপটিবাল়্হানি ন ৰিপচ্চন্তীতিআদীসুপি এৰং যোজনা ৰেদিতব্বা। ইধেকচ্চস্স বহূনি কল্যাণকম্মানি হোন্তি। তানি গতিসম্পত্তিযং ঠিতস্স ৰিপচ্চেযুং। সো পন একেন পাপকম্মেন গতিৰিপত্তিযং নিরযে ৰা অসুরকাযে ৰা নিব্বত্তো। তাদিসে চ ঠানে কুসলং ৰিপাকং দাতুং ন সক্কোতি, একন্তং অকুসলমেৰ সক্কোতীতি। এৰমস্স তানি কম্মানি গতিৰিপত্তিপটিবাল়্হানি ন ৰিপচ্চন্তীতি পজানাতি।

    Atthekaccāni kalyāṇāni kammasamādānāni gativipattipaṭibāḷhāni na vipaccantītiādīsupi evaṃ yojanā veditabbā. Idhekaccassa bahūni kalyāṇakammāni honti. Tāni gatisampattiyaṃ ṭhitassa vipacceyuṃ. So pana ekena pāpakammena gativipattiyaṃ niraye vā asurakāye vā nibbatto. Tādise ca ṭhāne kusalaṃ vipākaṃ dātuṃ na sakkoti, ekantaṃ akusalameva sakkotīti. Evamassa tāni kammāni gativipattipaṭibāḷhāni na vipaccantīti pajānāti.

    অপরস্সাপি বহূনি কল্যাণকম্মানি হোন্তি। তানি উপধিসম্পত্তিযং ঠিতস্স ৰিপচ্চেয্যুং। সো পন একেন পাপকম্মেন উপধিৰিপত্তিযং পতিট্ঠিতো দুব্বণ্ণো হোতি পিসাচসদিসো। সো সচেপি রাজকুলে নিব্বত্তো পিতুঅচ্চযেন ‘কিং ইমস্স নিস্সিরীকস্স রজ্জেনা’তি রজ্জং ন লভতি। সেনাপতিগেহাদীসু নিব্বত্তোপি সেনাপতিট্ঠানাদীনি ন লভতি।

    Aparassāpi bahūni kalyāṇakammāni honti. Tāni upadhisampattiyaṃ ṭhitassa vipacceyyuṃ. So pana ekena pāpakammena upadhivipattiyaṃ patiṭṭhito dubbaṇṇo hoti pisācasadiso. So sacepi rājakule nibbatto pituaccayena ‘kiṃ imassa nissirīkassa rajjenā’ti rajjaṃ na labhati. Senāpatigehādīsu nibbattopi senāpatiṭṭhānādīni na labhati.

    ইমস্স পনত্থস্সাৰিভাৰত্থং দীপরাজৰত্থু কথেতব্বং – রাজা কির পুত্তে জাতে দেৰিযা পসীদিত্ৰা ৰরং অদাসি। সা ৰরং গহেত্ৰা ঠপেসি। কুমারো সত্তট্ঠৰস্সকালেৰ রাজঙ্গণে কুক্কুটে যুজ্ঝাপেসি। একো কুক্কুটো উপ্পতিত্ৰা কুমারস্স অক্খীনি ভিন্দি। কুমারমাতা দেৰী পুত্তস্স পন্নরসসোল়সৰস্সকালে ‘রজ্জং ৰারেস্সামী’তি রাজানং উপসঙ্কমিত্ৰা আহ – ‘‘দেৰ, তুম্হেহি কুমারস্স জাতকালে ৰরো দিন্নো। মযা সো গহেত্ৰা ঠপিতো; ইদানি নং গণ্হামী’’তি। ‘‘সাধু, দেৰি, গণ্হাহী’’তি। ‘‘মযা, দেৰ, তুম্হাকং সন্তিকা কিঞ্চি অলদ্ধং নাম নত্থি । ইদানি পন মম পুত্তস্স রজ্জং ৰারেমী’’তি। ‘‘দেৰি, তৰ পুত্তো অঙ্গৰিকলো। ন সক্কা তস্স রজ্জং দাতু’’ন্তি । ‘‘তুম্হে ময্হং রুচ্চনকৰরং অদাতুং অসক্কোন্তা কস্মা ৰরং অদত্থা’’তি? রাজা অতিৰিয নিপ্পীল়িযমানো ‘‘ন সক্কা তুয্হং পুত্তস্স সকললঙ্কাদীপে রজ্জং দাতুং; নাগদীপে পন ছত্তং অস্সাপেত্ৰা ৰসতূ’’তি নাগদীপং পেসেসি। সো দীপরাজা নাম অহোসি। সচে চক্খুৰিকলো নাভৰিস্সা তিযোজনসতিকে সকলতম্বপণ্ণিদীপে সব্বসম্পত্তিপরিৰারং রজ্জং অলভিস্সা। এৰং উপধিৰিপত্তিপটিবাল়্হানি ন ৰিপচ্চন্তীতি পজানাতি।

    Imassa panatthassāvibhāvatthaṃ dīparājavatthu kathetabbaṃ – rājā kira putte jāte deviyā pasīditvā varaṃ adāsi. Sā varaṃ gahetvā ṭhapesi. Kumāro sattaṭṭhavassakāleva rājaṅgaṇe kukkuṭe yujjhāpesi. Eko kukkuṭo uppatitvā kumārassa akkhīni bhindi. Kumāramātā devī puttassa pannarasasoḷasavassakāle ‘rajjaṃ vāressāmī’ti rājānaṃ upasaṅkamitvā āha – ‘‘deva, tumhehi kumārassa jātakāle varo dinno. Mayā so gahetvā ṭhapito; idāni naṃ gaṇhāmī’’ti. ‘‘Sādhu, devi, gaṇhāhī’’ti. ‘‘Mayā, deva, tumhākaṃ santikā kiñci aladdhaṃ nāma natthi . Idāni pana mama puttassa rajjaṃ vāremī’’ti. ‘‘Devi, tava putto aṅgavikalo. Na sakkā tassa rajjaṃ dātu’’nti . ‘‘Tumhe mayhaṃ ruccanakavaraṃ adātuṃ asakkontā kasmā varaṃ adatthā’’ti? Rājā ativiya nippīḷiyamāno ‘‘na sakkā tuyhaṃ puttassa sakalalaṅkādīpe rajjaṃ dātuṃ; nāgadīpe pana chattaṃ assāpetvā vasatū’’ti nāgadīpaṃ pesesi. So dīparājā nāma ahosi. Sace cakkhuvikalo nābhavissā tiyojanasatike sakalatambapaṇṇidīpe sabbasampattiparivāraṃ rajjaṃ alabhissā. Evaṃ upadhivipattipaṭibāḷhāni na vipaccantīti pajānāti.

    অপরস্সাপি বহূনি কল্যাণকম্মানি হোন্তি। তানি কালসম্পত্তিযং ঠিতস্স ৰিপচ্চেয্যুং। সো পন একেন পাপকম্মেন কালৰিপত্তিযং দুরাজদুমনুস্সকালে কসটে নিরোজে অপ্পাযুকে গতিকোটিকে নিব্বত্তো। তাদিসে চ কালে কল্যাণকম্মং ৰিপাকং দাতুং ন সক্কোতীতি। এৰং কালৰিপত্তিপটিবাল়্হানি ন ৰিপচ্চন্তীতি পজানাতি।

    Aparassāpi bahūni kalyāṇakammāni honti. Tāni kālasampattiyaṃ ṭhitassa vipacceyyuṃ. So pana ekena pāpakammena kālavipattiyaṃ durājadumanussakāle kasaṭe niroje appāyuke gatikoṭike nibbatto. Tādise ca kāle kalyāṇakammaṃ vipākaṃ dātuṃ na sakkotīti. Evaṃ kālavipattipaṭibāḷhāni na vipaccantīti pajānāti.

    অপরস্সাপি বহূনি কল্যাণকম্মানি হোন্তি। তানি পযোগসম্পত্তিযং ঠিতস্স ৰিপচ্চেয্যুং। অযং পন পযোগৰিপত্তিযং ঠিতো পাণং হন্তি…পে॰… সব্বং দুস্সীল্যং পূরেতি। তথা তেন সদ্ধিং সমজাতিকানিপি কুলানি আৰাহৰিৰাহং ন করোন্তি; ‘ইত্থিধুত্তো সুরাধুত্তো অক্খধুত্তো অযং পাপপুরিসো’তি আরকা পরিৰজ্জেন্তি। কল্যাণকম্মানি ৰিপচ্চিতুং ন সক্কোন্তি। এৰং পযোগৰিপত্তিপটিবাল়্হানি ন ৰিপচ্চন্তীতি পজানাতি। এৰং চতস্সো সম্পত্তিযো আগম্ম ৰিপাকদাযকং কল্যাণকম্মং চতূহি ৰিপত্তীহি পটিবাহিতত্তা ন ৰিপচ্চতি।

    Aparassāpi bahūni kalyāṇakammāni honti. Tāni payogasampattiyaṃ ṭhitassa vipacceyyuṃ. Ayaṃ pana payogavipattiyaṃ ṭhito pāṇaṃ hanti…pe… sabbaṃ dussīlyaṃ pūreti. Tathā tena saddhiṃ samajātikānipi kulāni āvāhavivāhaṃ na karonti; ‘itthidhutto surādhutto akkhadhutto ayaṃ pāpapuriso’ti ārakā parivajjenti. Kalyāṇakammāni vipaccituṃ na sakkonti. Evaṃ payogavipattipaṭibāḷhāni na vipaccantīti pajānāti. Evaṃ catasso sampattiyo āgamma vipākadāyakaṃ kalyāṇakammaṃ catūhi vipattīhi paṭibāhitattā na vipaccati.

    অপরস্সাপি বহূনি কল্যাণকম্মানি হোন্তি। তানি গতিৰিপত্তিযং ঠিতস্স ন ৰিপচ্চেয্যুং। সো পন একেন কল্যাণকম্মেন গতিসম্পত্তিযংযেৰ নিব্বত্তো। তত্থস্স তানি কম্মানি উপগন্ত্ৰা ৰারেন ৰারেন ৰিপাকং দেন্তি – কালেন মনুস্সলোকে নিব্বত্তাপেন্তি, কালেন দেৰলোকে। এৰং গতিৰিপত্তিপটিবাহিতত্তা ৰিপাকং দাতুং অসক্কোন্তানি গতিমম্পত্তিং আগম্ম ৰিপচ্চন্তীতি পজানাতি।

    Aparassāpi bahūni kalyāṇakammāni honti. Tāni gativipattiyaṃ ṭhitassa na vipacceyyuṃ. So pana ekena kalyāṇakammena gatisampattiyaṃyeva nibbatto. Tatthassa tāni kammāni upagantvā vārena vārena vipākaṃ denti – kālena manussaloke nibbattāpenti, kālena devaloke. Evaṃ gativipattipaṭibāhitattā vipākaṃ dātuṃ asakkontāni gatimampattiṃ āgamma vipaccantīti pajānāti.

    অপরস্সাপি বহূনি কল্যাণকম্মানি হোন্তি। তানি উপধিৰিপত্তিযং ঠিতস্স ন ৰিপচ্চেয্যুং। সো পন একেন কল্যাণকম্মেন উপধিসম্পত্তিযংযেৰ পতিট্ঠিতো অভিরূপো দস্সনীযো পাসাদিকো ব্রহ্মৰচ্ছসদিসো। তস্স উপধিসম্পত্তিযং ঠিতত্তা কল্যাণকম্মানি ৰিপাকং দেন্তি। সচে রাজকুলে নিব্বত্ততি অঞ্ঞেসু জেট্ঠকভাতিকেসু সন্তেসুপি ‘এতস্স অত্তভাৰো সমিদ্ধো, এতস্স ছত্তে উস্সাপিতে লোকস্স ফাসু ভৰিস্সতী’তি তমেৰ রজ্জে অভিসিঞ্চন্তি। উপরাজগেহাদীসু নিব্বত্তো পিতুঅচ্চযেন ওপরজ্জং, সেনাপতিট্ঠানং, ভণ্ডাগারিকট্ঠানং, সেট্ঠিট্ঠানং লভতি। এৰং উপধিৰিপত্তিপটিবাহিতত্তা ৰিপাকং দাতুং অসক্কোন্তানি উপধিসম্পত্তিং আগম্ম ৰিপচ্চন্তীতি পজানাতি।

    Aparassāpi bahūni kalyāṇakammāni honti. Tāni upadhivipattiyaṃ ṭhitassa na vipacceyyuṃ. So pana ekena kalyāṇakammena upadhisampattiyaṃyeva patiṭṭhito abhirūpo dassanīyo pāsādiko brahmavacchasadiso. Tassa upadhisampattiyaṃ ṭhitattā kalyāṇakammāni vipākaṃ denti. Sace rājakule nibbattati aññesu jeṭṭhakabhātikesu santesupi ‘etassa attabhāvo samiddho, etassa chatte ussāpite lokassa phāsu bhavissatī’ti tameva rajje abhisiñcanti. Uparājagehādīsu nibbatto pituaccayena oparajjaṃ, senāpatiṭṭhānaṃ, bhaṇḍāgārikaṭṭhānaṃ, seṭṭhiṭṭhānaṃ labhati. Evaṃ upadhivipattipaṭibāhitattā vipākaṃ dātuṃ asakkontāni upadhisampattiṃ āgamma vipaccantīti pajānāti.

    অপরস্সাপি বহূনি কল্যাণকম্মানি হোন্তি। তানি কালৰিপত্তিযং ঠিতস্স ন ৰিপচ্চেয্যুং। সো পন একেন কল্যাণকম্মেন কালসম্পত্তিযং নিব্বত্তো সুরাজসুমনুস্সকালে। তাদিসায কালসমিদ্ধিযা নিব্বত্তস্স কল্যাণকম্মং ৰিপাকং দেতি।

    Aparassāpi bahūni kalyāṇakammāni honti. Tāni kālavipattiyaṃ ṭhitassa na vipacceyyuṃ. So pana ekena kalyāṇakammena kālasampattiyaṃ nibbatto surājasumanussakāle. Tādisāya kālasamiddhiyā nibbattassa kalyāṇakammaṃ vipākaṃ deti.

    তত্রিদং মহাসোণত্থেরস্স ৰত্থু কথেতব্বং – ব্রাহ্মণতিস্সভযে কির চিত্তলপব্বতে দ্ৰাদস ভিক্খুসহস্সানিং পটিৰসন্তি। তথা তিস্সমহাৰিহারে। দ্ৰীসুপি মহাৰিহারেসু তিণ্ণং ৰস্সানং ৰট্টং একরত্তমেৰ মহামূসিকাযো খাদিত্ৰা থুসমত্তমেৰ ঠপেসুং। চিত্তলপব্বতে ভিক্খুসঙ্ঘো ‘তিস্সমহাৰিহারে ৰট্টং ৰত্তিস্সতি, তত্থ গন্ত্ৰা ৰসিস্সামা’তি ৰিহারতো নিক্খমি। তিস্সমহাৰিহারেপি ভিক্খুসঙ্ঘো ‘চিত্তলপব্বতে ৰট্টং ৰত্তিস্সতি, তত্থ গন্ত্ৰা ৰসিস্সামা’তি ৰিহারতো নিক্খমি। উভতোপি একিস্সা গম্ভীরকন্দরায তীরে সমাগতা পুচ্ছিত্ৰা ৰট্টস্স খীণভাৰং ঞত্ৰা ‘তত্থ গন্ত্ৰা কিং করিস্সামা’তি চতুৰীসতি ভিক্খুসহস্সানি গম্ভীরকন্দরৰনং পৰিসিত্ৰা নিসীদিত্ৰা নিসিন্ননীহারেনেৰ অনুপাদিসেসায নিব্বানধাতুযা পরিনিব্বাযিংসু। পচ্ছা ভযে ৰূপসন্তে ভিক্খুসঙ্ঘো সক্কং দেৰরাজানং গহেত্ৰা ধাতুযো সংহরিত্ৰা চেতিযং অকাসি।

    Tatridaṃ mahāsoṇattherassa vatthu kathetabbaṃ – brāhmaṇatissabhaye kira cittalapabbate dvādasa bhikkhusahassāniṃ paṭivasanti. Tathā tissamahāvihāre. Dvīsupi mahāvihāresu tiṇṇaṃ vassānaṃ vaṭṭaṃ ekarattameva mahāmūsikāyo khāditvā thusamattameva ṭhapesuṃ. Cittalapabbate bhikkhusaṅgho ‘tissamahāvihāre vaṭṭaṃ vattissati, tattha gantvā vasissāmā’ti vihārato nikkhami. Tissamahāvihārepi bhikkhusaṅgho ‘cittalapabbate vaṭṭaṃ vattissati, tattha gantvā vasissāmā’ti vihārato nikkhami. Ubhatopi ekissā gambhīrakandarāya tīre samāgatā pucchitvā vaṭṭassa khīṇabhāvaṃ ñatvā ‘tattha gantvā kiṃ karissāmā’ti catuvīsati bhikkhusahassāni gambhīrakandaravanaṃ pavisitvā nisīditvā nisinnanīhāreneva anupādisesāya nibbānadhātuyā parinibbāyiṃsu. Pacchā bhaye vūpasante bhikkhusaṅgho sakkaṃ devarājānaṃ gahetvā dhātuyo saṃharitvā cetiyaṃ akāsi.

    ব্রাহ্মণতিস্সচোরোপি জনপদং ৰিদ্ধংসেসি। সঙ্ঘো সন্নিপতিত্ৰা মন্তেত্ৰা ‘‘চোরং পটিবাহতূ’’তি সক্কসন্তিকং অট্ঠ থেরে পেসেসি। সক্কো দেৰরাজা ‘‘মযা, ভন্তে, উপ্পন্নো চোরো ন সক্কা পটিবাহিতুং। সঙ্ঘো পরসমুদ্দং গচ্ছতু। অহং সমুদ্দারক্খং করিস্সামী’’তি। সঙ্ঘো সব্বদিসাহি নাগদীপং গন্ত্ৰা জম্বুকোলপট্টনে তিভূমিকং মহাউল়ুম্পং বন্ধাপেসি। একা ভূমিকা উদকে ওসীদি। একিস্সা ভিক্খুসঙ্ঘো নিসিন্নো। একিস্সা পত্তচীৰরানি ঠপযিংসু। সংযুত্তভাণকচূল়সীৰত্থেরো, ইসিদত্তত্থেরো, মহাসোণত্থেরোতি তযো থেরা তাসং পরিসানং পামোক্খা। তেসু দ্ৰে থেরা মহাসোণত্থেরং আহংসু – ‘‘আৰুসো মহাসোণ, অভিরুহ মহাউল়ুম্প’’ন্তি। ‘‘তুম্হে পন, ভন্তে’’তি? ‘‘আৰুসো, উদকে মরণম্পি থলে মরণম্পি একমেৰ । ন মযং গমিস্সাম। তং নিস্সায পন অনাগতে সাসনস্স পৰেণী ঠস্সতি। গচ্ছ ত্ৰং, আৰুসো’’তি। ‘‘নাহং, ভন্তে, তুম্হেসু অগচ্ছন্তেসু গমিস্সামী’’তি যাৰততিযং কথেত্ৰাপি থেরং আরোপেতুং অসক্কোন্তা নিৰত্তিংসু।

    Brāhmaṇatissacoropi janapadaṃ viddhaṃsesi. Saṅgho sannipatitvā mantetvā ‘‘coraṃ paṭibāhatū’’ti sakkasantikaṃ aṭṭha there pesesi. Sakko devarājā ‘‘mayā, bhante, uppanno coro na sakkā paṭibāhituṃ. Saṅgho parasamuddaṃ gacchatu. Ahaṃ samuddārakkhaṃ karissāmī’’ti. Saṅgho sabbadisāhi nāgadīpaṃ gantvā jambukolapaṭṭane tibhūmikaṃ mahāuḷumpaṃ bandhāpesi. Ekā bhūmikā udake osīdi. Ekissā bhikkhusaṅgho nisinno. Ekissā pattacīvarāni ṭhapayiṃsu. Saṃyuttabhāṇakacūḷasīvatthero, isidattatthero, mahāsoṇattheroti tayo therā tāsaṃ parisānaṃ pāmokkhā. Tesu dve therā mahāsoṇattheraṃ āhaṃsu – ‘‘āvuso mahāsoṇa, abhiruha mahāuḷumpa’’nti. ‘‘Tumhe pana, bhante’’ti? ‘‘Āvuso, udake maraṇampi thale maraṇampi ekameva . Na mayaṃ gamissāma. Taṃ nissāya pana anāgate sāsanassa paveṇī ṭhassati. Gaccha tvaṃ, āvuso’’ti. ‘‘Nāhaṃ, bhante, tumhesu agacchantesu gamissāmī’’ti yāvatatiyaṃ kathetvāpi theraṃ āropetuṃ asakkontā nivattiṃsu.

    অথ চূল়সীৰত্থেরো ইসিদত্তত্থেরং আহ – ‘‘আৰুসো ইসিদত্ত, অনাগতে মহাসোণত্থেরং নিস্সায সাসনপৰেণী ঠস্সতি; মা খো তং হত্থতো ৰিস্সজ্জেহী’’তি। ‘‘তুম্হে পন, ভন্তে’’তি? ‘‘অহং মহাচেতিযং ৰন্দিস্সামী’’তি দ্ৰে থেরে অনুসাসিত্ৰা অনুপুব্বেন চারিকং চরন্তো মহাৰিহারং সম্পাপুণি। তস্মিং সমযে মহাৰিহারো সুঞ্ঞো। চেতিযঙ্গণে এরণ্ডা জাতা। চেতিযং গচ্ছেহি পরিৰারিতং, সেৰালেন পরিযোনদ্ধং। থেরো ধরমানকবুদ্ধস্স নিপচ্চাকারং দস্সেন্তো ৰিয মহাচেতিযং ৰন্দিত্ৰা পচ্ছিমদিসায সালং পৰিসিত্ৰা ওলোকেন্তো ‘এৰরূপস্স নাম লাভগ্গযসগ্গপ্পত্তস্স সরীরধাতুচেতিযট্ঠানং অনাথং জাত’ন্তি চিন্তযমানো নিসীদি।

    Atha cūḷasīvatthero isidattattheraṃ āha – ‘‘āvuso isidatta, anāgate mahāsoṇattheraṃ nissāya sāsanapaveṇī ṭhassati; mā kho taṃ hatthato vissajjehī’’ti. ‘‘Tumhe pana, bhante’’ti? ‘‘Ahaṃ mahācetiyaṃ vandissāmī’’ti dve there anusāsitvā anupubbena cārikaṃ caranto mahāvihāraṃ sampāpuṇi. Tasmiṃ samaye mahāvihāro suñño. Cetiyaṅgaṇe eraṇḍā jātā. Cetiyaṃ gacchehi parivāritaṃ, sevālena pariyonaddhaṃ. Thero dharamānakabuddhassa nipaccākāraṃ dassento viya mahācetiyaṃ vanditvā pacchimadisāya sālaṃ pavisitvā olokento ‘evarūpassa nāma lābhaggayasaggappattassa sarīradhātucetiyaṭṭhānaṃ anāthaṃ jāta’nti cintayamāno nisīdi.

    অথ অৰিদূরে রুক্খে অধিৰত্থা দেৰতা অদ্ধিকমনুস্সরূপেন তণ্ডুলনাল়িঞ্চ গুল়পিণ্ডঞ্চ আদায থেরস্স সন্তিকং গন্ত্ৰা ‘‘কত্থ গচ্ছথ, ভন্তে’’তি? ‘‘অহং দক্খিণদিসং, উপাসকা’’তি। ‘‘অহম্পি তত্থেৰ গন্তুকামো, সহ গচ্ছাম, ভন্তে’’তি। ‘‘অহং দুব্বলো; তৰ গতিযা গন্তুং ন সক্খিস্সামি; ত্ৰং পুরতো গচ্ছ, উপাসকা’’তি। ‘‘অহম্পি তুম্হাকং গতিযা গমিস্সামী’’তি থেরস্স পত্তচীৰরং অগ্গহেসি। তিস্সৰাপিপাল়িং আরুল়্হকালে চ পত্তং আহরাপেত্ৰা পানকং কত্ৰা অদাসি। থেরস্স পীতমত্তেযেৰ বলমত্তা সণ্ঠাতি। দেৰতা পথৰিং সঙ্খিপিত্ৰা ৰেণুনদীসন্তিকে একং ছড্ডিতৰিহারং পত্ৰা থেরস্স ৰসনট্ঠানং পটিজগ্গিত্ৰা অদাসি।

    Atha avidūre rukkhe adhivatthā devatā addhikamanussarūpena taṇḍulanāḷiñca guḷapiṇḍañca ādāya therassa santikaṃ gantvā ‘‘kattha gacchatha, bhante’’ti? ‘‘Ahaṃ dakkhiṇadisaṃ, upāsakā’’ti. ‘‘Ahampi tattheva gantukāmo, saha gacchāma, bhante’’ti. ‘‘Ahaṃ dubbalo; tava gatiyā gantuṃ na sakkhissāmi; tvaṃ purato gaccha, upāsakā’’ti. ‘‘Ahampi tumhākaṃ gatiyā gamissāmī’’ti therassa pattacīvaraṃ aggahesi. Tissavāpipāḷiṃ āruḷhakāle ca pattaṃ āharāpetvā pānakaṃ katvā adāsi. Therassa pītamatteyeva balamattā saṇṭhāti. Devatā pathaviṃ saṅkhipitvā veṇunadīsantike ekaṃ chaḍḍitavihāraṃ patvā therassa vasanaṭṭhānaṃ paṭijaggitvā adāsi.

    পুনদিৰসে থেরেন মুখে ধোৰিতমত্তে যাগুং পচিত্ৰা অদাসি; যাগুং পীতস্স ভত্তং পচিত্ৰা উপনামেসি। থেরো ‘‘তুয্হং ঠপেহি, উপাসকা’’তি পত্তং হত্থেন পিদহি। ‘‘অহং ন দূরং গমিস্সামী’’তি দেৰতা থেরস্সেৰ পত্তে ভত্তং পক্খিপিত্ৰা কতভত্তকিচ্চস্স থেরস্স পত্তচীৰরমাদায মগ্গং পটিপন্না পথৰিং সঙ্খিপিত্ৰা জজ্জরনদীসন্তিকং নেত্ৰা ‘‘ভন্তে, এতং পণ্ণখাদকমনুস্সানং ৰসনট্ঠানং, ধূমো পঞ্ঞাযতি। অহং পুরতো গমিস্সামী’’তি থেরং ৰন্দিত্ৰা অত্তনো ভৰনং অগমাসি। থেরো সব্বম্পি ভযকালং পণ্ণখাদকমনুস্সে নিস্সায ৰসি।

    Punadivase therena mukhe dhovitamatte yāguṃ pacitvā adāsi; yāguṃ pītassa bhattaṃ pacitvā upanāmesi. Thero ‘‘tuyhaṃ ṭhapehi, upāsakā’’ti pattaṃ hatthena pidahi. ‘‘Ahaṃ na dūraṃ gamissāmī’’ti devatā therasseva patte bhattaṃ pakkhipitvā katabhattakiccassa therassa pattacīvaramādāya maggaṃ paṭipannā pathaviṃ saṅkhipitvā jajjaranadīsantikaṃ netvā ‘‘bhante, etaṃ paṇṇakhādakamanussānaṃ vasanaṭṭhānaṃ, dhūmo paññāyati. Ahaṃ purato gamissāmī’’ti theraṃ vanditvā attano bhavanaṃ agamāsi. Thero sabbampi bhayakālaṃ paṇṇakhādakamanusse nissāya vasi.

    ইসিদত্তত্থেরোপি অনুপুব্বেন চারিকং চরন্তো অল়জনপদং সম্পাপুণি। তত্থ মনুস্সা নাতিপক্কানি মধুকফলানি ভিন্দিত্ৰা অট্ঠিং আদায তচং ছড্ডেত্ৰা অগমংসু। থেরো ‘‘আৰুসো মহাসোণ, ভিক্খাহারো পঞ্ঞাযতী’’তি ৰত্ৰা পত্তচীৰরং আহরাপেত্ৰা চীৰরং পারুপিত্ৰা পত্তং নীহরিত্ৰা অট্ঠাসি। তরুণদারকা থেরং ঠিতং দিস্ৰা ‘ইমিনা কোচি অত্থো ভৰিস্সতী’তি ৰালুকং পুঞ্ছিত্ৰা মধুকফলত্তচং পত্তে পক্খিপিত্ৰা অদংসু; থেরা পরিভুঞ্জিংসু। সত্তাহমত্তং সোযেৰ আহারো অহোসি।

    Isidattattheropi anupubbena cārikaṃ caranto aḷajanapadaṃ sampāpuṇi. Tattha manussā nātipakkāni madhukaphalāni bhinditvā aṭṭhiṃ ādāya tacaṃ chaḍḍetvā agamaṃsu. Thero ‘‘āvuso mahāsoṇa, bhikkhāhāro paññāyatī’’ti vatvā pattacīvaraṃ āharāpetvā cīvaraṃ pārupitvā pattaṃ nīharitvā aṭṭhāsi. Taruṇadārakā theraṃ ṭhitaṃ disvā ‘iminā koci attho bhavissatī’ti vālukaṃ puñchitvā madhukaphalattacaṃ patte pakkhipitvā adaṃsu; therā paribhuñjiṃsu. Sattāhamattaṃ soyeva āhāro ahosi.

    অনুপুব্বেন চোরিযস্সরং সম্পাপুণিংসু। মনুস্সা কুমুদানি গহেত্ৰা কুমুদনালে ছড্ডেত্ৰা অগমংসু। থেরো ‘‘আৰুসো মহাসোণ, ভিক্খাহারো পঞ্ঞাযতী’’তি ৰত্ৰা পত্তচীৰরং আহরাপেত্ৰা চীৰরং পারুপিত্ৰা পত্তং নীহরিত্ৰা অট্ঠাসি। গামদারকা কুমুদনালে সোধেত্ৰা পত্তে পক্খিপিত্ৰা অদংসু; থেরা পরিভুঞ্জিংসু। সত্তাহমত্তং সোৰ আহারো অহোসি।

    Anupubbena coriyassaraṃ sampāpuṇiṃsu. Manussā kumudāni gahetvā kumudanāle chaḍḍetvā agamaṃsu. Thero ‘‘āvuso mahāsoṇa, bhikkhāhāro paññāyatī’’ti vatvā pattacīvaraṃ āharāpetvā cīvaraṃ pārupitvā pattaṃ nīharitvā aṭṭhāsi. Gāmadārakā kumudanāle sodhetvā patte pakkhipitvā adaṃsu; therā paribhuñjiṃsu. Sattāhamattaṃ sova āhāro ahosi.

    অনুপুব্বেন চরন্তা পণ্ণখাদকমনুস্সানং ৰসনট্ঠানে একং গামদ্ৰারং সম্পাপুণিংসু। তত্থ একিস্সা দারিকায মাতাপিতরো অরঞ্ঞং গচ্ছন্তা ‘‘সচে কোচি অয্যো আগচ্ছতি, কত্থচি গন্তুং মা অদাসি; অয্যস্স ৰসনট্ঠানং আচিক্খেয্যাসি, অম্মা’’তি আহংসু। সা থেরে দিস্ৰা পত্তং গহেত্ৰা নিসীদাপেসি। গেহে ধঞ্ঞজাতি নাম নত্থি। ৰাসিং পন গহেত্ৰা গুঞ্জচোচরুক্খত্তচং গুঞ্জলতাপত্তেহি সদ্ধিং একতো কোট্টেত্ৰা তযো পিণ্ডে কত্ৰা একং ইসিদত্তত্থেরস্স একং মহাসোণত্থেরস্স পত্তে ঠপেত্ৰা ‘অতিরেকপিণ্ডং ইসিদত্তত্থেরস্স পত্তে ঠপেস্সামী’তি হত্থং পসারেসি। হত্থো পরিৰত্তিত্ৰা মহাসোণত্থেরস্স পত্তে পতিট্ঠাপেসি। ইসিদত্তত্থেরো ‘ব্রাহ্মণতিস্সভযে গুঞ্জচোচপিণ্ডে ৰিপাকদাযককম্মং দেসকালসম্পদায কীৰপমাণং ৰিপাকং দস্সতী’তি আহ। তে তং পরিভুঞ্জিত্ৰা ৰসনট্ঠানং অগমংসু। সাপি অরঞ্ঞতো আগতানং মাতাপিতূনং আচিক্খি ‘‘দ্ৰে থেরা আগতা। তেসং মে ৰসনট্ঠানং আচিক্খিত’’ন্তি। তে উভোপি থেরানং সন্তিকং গন্ত্ৰা ৰন্দিত্ৰা ‘‘ভন্তে, যং মযং লভাম, তেন তুম্হে পটিজগ্গিস্সাম; ইধেৰ ৰসথা’’তি পটিঞ্ঞং গণ্হিংসু। থেরাপি সব্বভযকালং তে উপনিস্সায ৰসিংসু।

    Anupubbena carantā paṇṇakhādakamanussānaṃ vasanaṭṭhāne ekaṃ gāmadvāraṃ sampāpuṇiṃsu. Tattha ekissā dārikāya mātāpitaro araññaṃ gacchantā ‘‘sace koci ayyo āgacchati, katthaci gantuṃ mā adāsi; ayyassa vasanaṭṭhānaṃ ācikkheyyāsi, ammā’’ti āhaṃsu. Sā there disvā pattaṃ gahetvā nisīdāpesi. Gehe dhaññajāti nāma natthi. Vāsiṃ pana gahetvā guñjacocarukkhattacaṃ guñjalatāpattehi saddhiṃ ekato koṭṭetvā tayo piṇḍe katvā ekaṃ isidattattherassa ekaṃ mahāsoṇattherassa patte ṭhapetvā ‘atirekapiṇḍaṃ isidattattherassa patte ṭhapessāmī’ti hatthaṃ pasāresi. Hattho parivattitvā mahāsoṇattherassa patte patiṭṭhāpesi. Isidattatthero ‘brāhmaṇatissabhaye guñjacocapiṇḍe vipākadāyakakammaṃ desakālasampadāya kīvapamāṇaṃ vipākaṃ dassatī’ti āha. Te taṃ paribhuñjitvā vasanaṭṭhānaṃ agamaṃsu. Sāpi araññato āgatānaṃ mātāpitūnaṃ ācikkhi ‘‘dve therā āgatā. Tesaṃ me vasanaṭṭhānaṃ ācikkhita’’nti. Te ubhopi therānaṃ santikaṃ gantvā vanditvā ‘‘bhante, yaṃ mayaṃ labhāma, tena tumhe paṭijaggissāma; idheva vasathā’’ti paṭiññaṃ gaṇhiṃsu. Therāpi sabbabhayakālaṃ te upanissāya vasiṃsu.

    ব্রাহ্মণতিস্সচোরে মতে পিতুমহারাজা ছত্তং উস্সাপেসি। ‘ভযং ৰূপসন্তং, জনপদো সম্পুণ্ণো’তি সুত্ৰা পরসমুদ্দতো ভিক্খুসঙ্ঘো নাৰায মহাতিত্থপট্টনে ওরুয্হ ‘মহাসোণত্থেরো কহং ৰসতী’তি পুচ্ছিত্ৰা থেরস্স সন্তিকং অগমাসি। থেরো পঞ্চসতভিক্খুপরিৰারো কালকগামে মণ্ডলারামৰিহারং সম্পাপুণি। তস্মিং সমযে কালকগামে সত্তমত্তানি কুলসতানি পটিৰসন্তি। রত্তিভাগে দেৰতা আহিণ্ডিত্ৰা ‘‘মহাসোণত্থেরো পঞ্চভিক্খুসতপরিৰারো মণ্ডলারামৰিহারং পত্তো। একেকো নৰহত্থসাটকেন সদ্ধিং একেককহাপণগ্ঘনকং পিণ্ডপাতং দেতূ’’তি মনুস্সে অৰোচুং। পুনদিৰসে চ থেরা কালকগামং পিণ্ডায পৰিসিংসু। মনুস্সা নিসীদাপেত্ৰা যাগুং অদংসু। মণ্ডলারামৰাসী তিস্সভূতিত্থেরো সঙ্ঘত্থেরো হুত্ৰা নিসীদি। একো মহাউপাসকো তং ৰন্দিত্ৰা ‘‘ভন্তে, মহাসোণত্থেরো নাম কতরো’’তি পুচ্ছি। তেন সমযেন থেরো নৰকো হোতি পরিযন্তে নিসিন্নো। থেরো হত্থং পসারেত্ৰা ‘‘মহাসোণো নাম এস, উপাসকা’’তি আহ। উপাসকো তং ৰন্দিত্ৰা পত্তং গণ্হাতি। থেরো ন দেতি। তিস্সভূতিত্থেরো ‘‘আৰুসো সোণ, যথা ত্ৰং ন জানাসি, মযম্পি এৰমেৰ ন জানাম; পুঞ্ঞৰন্তানং দেৰতা পরিপাচেন্তি; পত্তং দেহি, সব্রহ্মচারীনং সঙ্গহং করোহী’’তি আহ। থেরো পত্তং অদাসি। মহাউপাসকো পত্তং আদায গন্ত্ৰা কহাপণগ্ঘনকস্স পিণ্ডপাতস্স পূরেত্ৰা নৰহত্থসাটকং আধারকং কত্ৰা আহরিত্ৰা থেরস্স হত্থে ঠপেসি; অপরোপি উপাসকো থেরস্সাতি সত্ত সাটকসতানি সত্ত চ পিণ্ডপাতসতানি থেরস্সেৰ অদংসু।

    Brāhmaṇatissacore mate pitumahārājā chattaṃ ussāpesi. ‘Bhayaṃ vūpasantaṃ, janapado sampuṇṇo’ti sutvā parasamuddato bhikkhusaṅgho nāvāya mahātitthapaṭṭane oruyha ‘mahāsoṇatthero kahaṃ vasatī’ti pucchitvā therassa santikaṃ agamāsi. Thero pañcasatabhikkhuparivāro kālakagāme maṇḍalārāmavihāraṃ sampāpuṇi. Tasmiṃ samaye kālakagāme sattamattāni kulasatāni paṭivasanti. Rattibhāge devatā āhiṇḍitvā ‘‘mahāsoṇatthero pañcabhikkhusataparivāro maṇḍalārāmavihāraṃ patto. Ekeko navahatthasāṭakena saddhiṃ ekekakahāpaṇagghanakaṃ piṇḍapātaṃ detū’’ti manusse avocuṃ. Punadivase ca therā kālakagāmaṃ piṇḍāya pavisiṃsu. Manussā nisīdāpetvā yāguṃ adaṃsu. Maṇḍalārāmavāsī tissabhūtitthero saṅghatthero hutvā nisīdi. Eko mahāupāsako taṃ vanditvā ‘‘bhante, mahāsoṇatthero nāma kataro’’ti pucchi. Tena samayena thero navako hoti pariyante nisinno. Thero hatthaṃ pasāretvā ‘‘mahāsoṇo nāma esa, upāsakā’’ti āha. Upāsako taṃ vanditvā pattaṃ gaṇhāti. Thero na deti. Tissabhūtitthero ‘‘āvuso soṇa, yathā tvaṃ na jānāsi, mayampi evameva na jānāma; puññavantānaṃ devatā paripācenti; pattaṃ dehi, sabrahmacārīnaṃ saṅgahaṃ karohī’’ti āha. Thero pattaṃ adāsi. Mahāupāsako pattaṃ ādāya gantvā kahāpaṇagghanakassa piṇḍapātassa pūretvā navahatthasāṭakaṃ ādhārakaṃ katvā āharitvā therassa hatthe ṭhapesi; aparopi upāsako therassāti satta sāṭakasatāni satta ca piṇḍapātasatāni therasseva adaṃsu.

    থেরো ভিক্খুসঙ্ঘস্স সংৰিভাগং কত্ৰা অনুপুব্বেন মহাৰিহারং পাপুণিত্ৰা মুখং ধোৰিত্ৰা মহাবোধিং ৰন্দিত্ৰা মহাচেতিযং ৰন্দিত্ৰা থূপারামে ঠিতো চীৰরং পারুপিত্ৰা ভিক্খুসঙ্ঘপরিৰারো দক্খিণদ্ৰারেন নগরং পৰিসিত্ৰা দ্ৰারতো যাৰ ৰল়ঞ্জনকসালা এতস্মিং অন্তরে সট্ঠিকহাপণগ্ঘনকং পিণ্ডপাতং লভি। ততো পট্ঠায পন সক্কারস্স পমাণং নত্থি। এৰং কালৰিপত্তিযং মধুকফলত্তচোপি কুমুদনাল়িপি দুল্লভা জাতা। কালসম্পত্তিযং এৰরূপো মহালাভো উদপাদি।

    Thero bhikkhusaṅghassa saṃvibhāgaṃ katvā anupubbena mahāvihāraṃ pāpuṇitvā mukhaṃ dhovitvā mahābodhiṃ vanditvā mahācetiyaṃ vanditvā thūpārāme ṭhito cīvaraṃ pārupitvā bhikkhusaṅghaparivāro dakkhiṇadvārena nagaraṃ pavisitvā dvārato yāva vaḷañjanakasālā etasmiṃ antare saṭṭhikahāpaṇagghanakaṃ piṇḍapātaṃ labhi. Tato paṭṭhāya pana sakkārassa pamāṇaṃ natthi. Evaṃ kālavipattiyaṃ madhukaphalattacopi kumudanāḷipi dullabhā jātā. Kālasampattiyaṃ evarūpo mahālābho udapādi.

    ৰত্তব্বকনিগ্রোধত্থেরস্সাপি সামণেরকালে ব্রাহ্মণতিস্সভযং উদপাদি। সামণেরো চ উপজ্ঝাযো চস্স পরসমুদ্দং নাগমিংসু; ‘পণ্ণখাদকমনুস্সে উপনিস্সায ৰসিস্সামা’তি পচ্চন্তাভিমুখা অহেসুং। সামণেরো সত্তাহমত্তং অনাহারো হুত্ৰা একস্মিং গামট্ঠানে তালরুক্খে তালপক্কং দিস্ৰা উপজ্ঝাযং আহ – ‘‘ভন্তে, থোকং আগমেথ; তালপক্কং পাতেস্সামী’’তি। ‘‘দুব্বলোসি ত্ৰং, সামণের, মা অভিরুহী’’তি। ‘‘অভিরুহিস্সামি, ভন্তে’’তি খুদ্দকৰাসিং গহেত্ৰা তালং আরুয্হ তালপিণ্ডং ছিন্দিতুং আরভি। ৰাসিফলং নিক্খমিত্ৰা ভূমিযং পতি।

    Vattabbakanigrodhattherassāpi sāmaṇerakāle brāhmaṇatissabhayaṃ udapādi. Sāmaṇero ca upajjhāyo cassa parasamuddaṃ nāgamiṃsu; ‘paṇṇakhādakamanusse upanissāya vasissāmā’ti paccantābhimukhā ahesuṃ. Sāmaṇero sattāhamattaṃ anāhāro hutvā ekasmiṃ gāmaṭṭhāne tālarukkhe tālapakkaṃ disvā upajjhāyaṃ āha – ‘‘bhante, thokaṃ āgametha; tālapakkaṃ pātessāmī’’ti. ‘‘Dubbalosi tvaṃ, sāmaṇera, mā abhiruhī’’ti. ‘‘Abhiruhissāmi, bhante’’ti khuddakavāsiṃ gahetvā tālaṃ āruyha tālapiṇḍaṃ chindituṃ ārabhi. Vāsiphalaṃ nikkhamitvā bhūmiyaṃ pati.

    থেরো চিন্তেসি ‘‘অযং কিলন্তোৰ রুক্খং আরুল়্হো; কিং নু খো ইদানি করিস্সতী’’তি সামণেরো তালপণ্ণং ফালেত্ৰা ফালেত্ৰা ৰাসিদণ্ডকে বন্ধিত্ৰা ঘট্টেন্তো ঘট্টেন্তো ভূমিযং পাতেত্ৰা ‘‘ভন্তে, সাধু ৰতস্স সচে ৰাসিফলং এত্থ পৰেসেয্যাথা’’তি আহ। থেরো ‘উপাযসম্পন্নো সামণেরো’তি ৰাসিফলং পৰেসেত্ৰা অদাসি। সো ৰাসিং উক্খিপিত্ৰা তালফলানি পাতেসি। থেরো ৰাসিং পাতাপেত্ৰা পৰট্টিত্ৰা গতং তালফলং ভিন্দিত্ৰা সামণেরং ওতিণ্ণকালে আহ ‘‘সামণের, ত্ৰং দুব্বলো, ইদং তাৰ খাদাহী’’তি। ‘‘নাহং, ভন্তে, তুম্হেহি অখাদিতে খাদিস্সামী’’তি ৰাসিং গহেত্ৰা তালফলানি ভিন্দিত্ৰা পত্তং নীহরিত্ৰা তালমিঞ্জং পক্খিপিত্ৰা থেরস্স দত্ৰা সযং খাদি। যাৰ তালফলানি অহেসুং, তাৰ তত্থেৰ ৰসিত্ৰা ফলেসু খীণেসু অনুপুব্বেন পণ্ণখাদকমনুস্সানং ৰসনট্ঠানে একং ছড্ডিতৰিহারং পৰিসিংসু। সামণেরো থেরস্স ৰসনট্ঠানং পটিজগ্গি। থেরো সামণেরস্স ওৰাদং দত্ৰা ৰিহারং পাৰিসি। সামণেরো ‘অনাযতনে নট্ঠানং অত্তভাৰানং পমাণং নত্থি, বুদ্ধানং উপট্ঠানং করিস্সামী’তি চেতিযঙ্গণং গন্ত্ৰা অপ্পহরিতং করোতি; সত্তাহমত্তং নিরাহারতায পৰেধমানো পতিত্ৰা নিপন্নকোৰ তিণানি উদ্ধরতি। একচ্চে চ মনুস্সা অরঞ্ঞে চরন্তা মধুং লভিত্ৰা দারূনি চেৰ সাকপণ্ণঞ্চ গহেত্ৰা তিণচলনসঞ্ঞায ‘মিগো নু খো এসো’তি সামণেরস্স সন্তিকং গন্ত্ৰা ‘‘কিং করোসি, সামণেরা’’তি আহংসু। ‘‘তিণগণ্ঠিং গণ্হামি, উপাসকা’’তি। ‘‘অঞ্ঞোপি কোচি অত্থি, ভন্তে’’তি? ‘‘আম, উপাসকা, উপজ্ঝাযো মে অন্তোগব্ভে’’তি। ‘‘মহাথেরস্স দত্ৰা খাদেয্যাসি, ভন্তে’’তি সামণেরস্স মধুং দত্ৰা অত্তনো ৰসনট্ঠানং আচিক্খিত্ৰা ‘‘মযং সাখাভঙ্গং করোন্তা গমিস্সাম। এতায সঞ্ঞায থেরং গহেত্ৰা আগচ্ছেয্যাসি, অয্যা’’তি ৰত্ৰা অগমংসু।

    Thero cintesi ‘‘ayaṃ kilantova rukkhaṃ āruḷho; kiṃ nu kho idāni karissatī’’ti sāmaṇero tālapaṇṇaṃ phāletvā phāletvā vāsidaṇḍake bandhitvā ghaṭṭento ghaṭṭento bhūmiyaṃ pātetvā ‘‘bhante, sādhu vatassa sace vāsiphalaṃ ettha paveseyyāthā’’ti āha. Thero ‘upāyasampanno sāmaṇero’ti vāsiphalaṃ pavesetvā adāsi. So vāsiṃ ukkhipitvā tālaphalāni pātesi. Thero vāsiṃ pātāpetvā pavaṭṭitvā gataṃ tālaphalaṃ bhinditvā sāmaṇeraṃ otiṇṇakāle āha ‘‘sāmaṇera, tvaṃ dubbalo, idaṃ tāva khādāhī’’ti. ‘‘Nāhaṃ, bhante, tumhehi akhādite khādissāmī’’ti vāsiṃ gahetvā tālaphalāni bhinditvā pattaṃ nīharitvā tālamiñjaṃ pakkhipitvā therassa datvā sayaṃ khādi. Yāva tālaphalāni ahesuṃ, tāva tattheva vasitvā phalesu khīṇesu anupubbena paṇṇakhādakamanussānaṃ vasanaṭṭhāne ekaṃ chaḍḍitavihāraṃ pavisiṃsu. Sāmaṇero therassa vasanaṭṭhānaṃ paṭijaggi. Thero sāmaṇerassa ovādaṃ datvā vihāraṃ pāvisi. Sāmaṇero ‘anāyatane naṭṭhānaṃ attabhāvānaṃ pamāṇaṃ natthi, buddhānaṃ upaṭṭhānaṃ karissāmī’ti cetiyaṅgaṇaṃ gantvā appaharitaṃ karoti; sattāhamattaṃ nirāhāratāya pavedhamāno patitvā nipannakova tiṇāni uddharati. Ekacce ca manussā araññe carantā madhuṃ labhitvā dārūni ceva sākapaṇṇañca gahetvā tiṇacalanasaññāya ‘migo nu kho eso’ti sāmaṇerassa santikaṃ gantvā ‘‘kiṃ karosi, sāmaṇerā’’ti āhaṃsu. ‘‘Tiṇagaṇṭhiṃ gaṇhāmi, upāsakā’’ti. ‘‘Aññopi koci atthi, bhante’’ti? ‘‘Āma, upāsakā, upajjhāyo me antogabbhe’’ti. ‘‘Mahātherassa datvā khādeyyāsi, bhante’’ti sāmaṇerassa madhuṃ datvā attano vasanaṭṭhānaṃ ācikkhitvā ‘‘mayaṃ sākhābhaṅgaṃ karontā gamissāma. Etāya saññāya theraṃ gahetvā āgaccheyyāsi, ayyā’’ti vatvā agamaṃsu.

    সামণেরো মধুং গহেত্ৰা থেরস্স সন্তিকং গন্ত্ৰা বহি ঠত্ৰা ‘‘ৰন্দামি, ভন্তে’’তি আহ। থেরো ‘সামণেরো জিঘচ্ছায অনুডয্হমানো আগতো ভৰিস্সতী’তি তুণ্হী অহোসি। সো পুনপি ‘‘ৰন্দামি, ভন্তে’’তি আহ। ‘‘কস্মা, সামণের, দুব্বলভিক্খূনং সুখেন নিপজ্জিতুং ন দেসী’’তি? ‘‘দ্ৰারং ৰিৰরিতুং সারুপ্পং, ভন্তে’’তি? থেরো উট্ঠহিত্ৰা দ্ৰারং ৰিৰরিত্ৰা ‘‘কিং তে, সামণের, লদ্ধং’’তি আহ। মনুস্সেহি মধু দিন্নং, খাদিতুং সারুপ্পং, ভন্তে’’তি? ‘‘সামণের, এৰমেৰ খাদিতুং কিলমিস্সাম, পানকং কত্ৰা পিৰিস্সামা’’তি। সামণেরো পানকং কত্ৰা অদাসি। অথ নং থেরো ‘‘মনুস্সানং ৰসনট্ঠানং পুচ্ছসি, সামণেরা’’তি আহ। সযমেৰ আচিক্খিংসু, ভন্তে’’তি। ‘‘সামণের, পাতোৰ গচ্ছন্তা কিলমিস্সাম; অজ্জেৰ গমিস্সামা’’তি পত্তচীৰরং গণ্হাপেত্ৰা নিক্খমি। তে গন্ত্ৰা মনুস্সানং ৰসনট্ঠানস্স অৰিদূরে নিপজ্জিংসু।

    Sāmaṇero madhuṃ gahetvā therassa santikaṃ gantvā bahi ṭhatvā ‘‘vandāmi, bhante’’ti āha. Thero ‘sāmaṇero jighacchāya anuḍayhamāno āgato bhavissatī’ti tuṇhī ahosi. So punapi ‘‘vandāmi, bhante’’ti āha. ‘‘Kasmā, sāmaṇera, dubbalabhikkhūnaṃ sukhena nipajjituṃ na desī’’ti? ‘‘Dvāraṃ vivarituṃ sāruppaṃ, bhante’’ti? Thero uṭṭhahitvā dvāraṃ vivaritvā ‘‘kiṃ te, sāmaṇera, laddhaṃ’’ti āha. Manussehi madhu dinnaṃ, khādituṃ sāruppaṃ, bhante’’ti? ‘‘Sāmaṇera, evameva khādituṃ kilamissāma, pānakaṃ katvā pivissāmā’’ti. Sāmaṇero pānakaṃ katvā adāsi. Atha naṃ thero ‘‘manussānaṃ vasanaṭṭhānaṃ pucchasi, sāmaṇerā’’ti āha. Sayameva ācikkhiṃsu, bhante’’ti. ‘‘Sāmaṇera, pātova gacchantā kilamissāma; ajjeva gamissāmā’’ti pattacīvaraṃ gaṇhāpetvā nikkhami. Te gantvā manussānaṃ vasanaṭṭhānassa avidūre nipajjiṃsu.

    সামণেরো রত্তিভাগে চিন্তেসি – ‘মযা পব্বজিতকালতো পট্ঠায গামন্তে অরুণং নাম ন উট্ঠাপিতপুব্ব’ন্তি। সো পত্তং গহেত্ৰা অরুণং উট্ঠাপেতুং অরঞ্ঞং অগমাসি। মহাথেরো সামণেরং নিপন্নট্ঠানে অপস্সন্তো ‘মনুস্সখাদকেহি গহিতো ভৰিস্সতী’তি চিন্তেসি। সামণেরো অরঞ্ঞে অরুণং উট্ঠাপেত্ৰা পত্তেন উদকঞ্চ দন্তকট্ঠঞ্চ গহেত্ৰা আগমি। ‘‘সামণের, কুহিং গতোসি? মহল্লকভিক্খূনং তে ৰিতক্কো উপ্পাদিতো; দণ্ডকম্মং আহরা’’তি। ‘‘আহরিস্সামি, ভন্তে’’তি। থেরো মুখং ধোৰিত্ৰা চীৰরং পারুপি। উভোপি মনুস্সানং ৰসনট্ঠানং অগমংসু। মনুস্সাপি অত্তনো পরিভোগং কন্দমূলফলপণ্ণং অদংসু। থেরোপি পরিভুঞ্জিত্ৰা ৰিহারং অগমাসি। সামণেরো উদকং আহরিত্ৰা ‘‘পাদে ধোৰামি, ভন্তে’’তি আহ। ‘‘সামণের, ত্ৰং রত্তিং কুহিং গতো? অম্হাকং ৰিতক্কং উপ্পাদেসী’’তি। ‘‘ভন্তে, গামন্তে মে অরুণং ন উট্ঠাপিতপুব্বং; অরুণুট্ঠাপনত্থায অরঞ্ঞং অগমাসি’’ন্তি। ‘‘সামণের, ন তুয্হং দণ্ডকম্মং অনুচ্ছৰিকং অম্হাকমেৰ অনুচ্ছৰিক’’ন্তি ৰত্ৰা থেরো তস্মিংযেৰ ঠানে ৰসি; সামণেরস্স চ সঞ্ঞং অদাসি ‘‘মযং তাৰ মহল্লকা; ‘ইদং নাম ভৰিস্সতী’তি ন সক্কা জানিতুং। তুৰং অত্তানং রক্খেয্যাসী’’তি। থেরো কির অনাগামী। তং অপরভাগে মনুস্সখাদকা খাদিংসু। সামণেরো অত্তানং রক্খিত্ৰা ভযে ৰূপসন্তে তথারূপে ঠানে উপজ্ঝং গাহাপেত্ৰা উপসম্পন্নো বুদ্ধৰচনং উগ্গহেত্ৰা তিপিটকধরো হুত্ৰা ৰত্তব্বকনিগ্রোধত্থেরো নাম জাতো।

    Sāmaṇero rattibhāge cintesi – ‘mayā pabbajitakālato paṭṭhāya gāmante aruṇaṃ nāma na uṭṭhāpitapubba’nti. So pattaṃ gahetvā aruṇaṃ uṭṭhāpetuṃ araññaṃ agamāsi. Mahāthero sāmaṇeraṃ nipannaṭṭhāne apassanto ‘manussakhādakehi gahito bhavissatī’ti cintesi. Sāmaṇero araññe aruṇaṃ uṭṭhāpetvā pattena udakañca dantakaṭṭhañca gahetvā āgami. ‘‘Sāmaṇera, kuhiṃ gatosi? Mahallakabhikkhūnaṃ te vitakko uppādito; daṇḍakammaṃ āharā’’ti. ‘‘Āharissāmi, bhante’’ti. Thero mukhaṃ dhovitvā cīvaraṃ pārupi. Ubhopi manussānaṃ vasanaṭṭhānaṃ agamaṃsu. Manussāpi attano paribhogaṃ kandamūlaphalapaṇṇaṃ adaṃsu. Theropi paribhuñjitvā vihāraṃ agamāsi. Sāmaṇero udakaṃ āharitvā ‘‘pāde dhovāmi, bhante’’ti āha. ‘‘Sāmaṇera, tvaṃ rattiṃ kuhiṃ gato? Amhākaṃ vitakkaṃ uppādesī’’ti. ‘‘Bhante, gāmante me aruṇaṃ na uṭṭhāpitapubbaṃ; aruṇuṭṭhāpanatthāya araññaṃ agamāsi’’nti. ‘‘Sāmaṇera, na tuyhaṃ daṇḍakammaṃ anucchavikaṃ amhākameva anucchavika’’nti vatvā thero tasmiṃyeva ṭhāne vasi; sāmaṇerassa ca saññaṃ adāsi ‘‘mayaṃ tāva mahallakā; ‘idaṃ nāma bhavissatī’ti na sakkā jānituṃ. Tuvaṃ attānaṃ rakkheyyāsī’’ti. Thero kira anāgāmī. Taṃ aparabhāge manussakhādakā khādiṃsu. Sāmaṇero attānaṃ rakkhitvā bhaye vūpasante tathārūpe ṭhāne upajjhaṃ gāhāpetvā upasampanno buddhavacanaṃ uggahetvā tipiṭakadharo hutvā vattabbakanigrodhatthero nāma jāto.

    পিতুমহারাজা রজ্জং পটিপজ্জি। পরসমুদ্দা আগতাগতা ভিক্খূ ‘‘কহং ৰত্তব্বকনিগ্রোধত্থেরো, কহং ৰত্তব্বকনিগ্রোধত্থেরো’’তি পুচ্ছিত্ৰা তস্স সন্তিকং অগমংসু। মহাভিক্খুসঙ্ঘো থেরং পরিৰারেসি। সো মহাভিক্খুসঙ্ঘপরিৰুতো অনুপুব্বেন মহাৰিহারং পত্ৰা মহাবোধিং মহাচেতিযং থূপারামঞ্চ ৰন্দিত্ৰা নগরং পাযাসি। যাৰ দক্খিণদ্ৰারা গচ্ছন্তস্সেৰ নৰসু ঠানেসু তিচীৰরং উপপজ্জি; অন্তোনগরং পৰিট্ঠকালতো পট্ঠায মহাসক্কারো উপ্পজ্জি। ইতি কালৰিপত্তিযং তালফলকন্দমূলপণ্ণম্পি দুল্লভং জাতং। কালসম্পত্তিযং এৰরূপো মহালাভো উপ্পন্নোতি। এৰং কালৰিপত্তিপটিবাহিতত্তা ৰিপাকং দাতুং অসক্কোন্তানি কালসম্পত্তিং আগম্ম ৰিপচ্চন্তীতি পজানাতি।

    Pitumahārājā rajjaṃ paṭipajji. Parasamuddā āgatāgatā bhikkhū ‘‘kahaṃ vattabbakanigrodhatthero, kahaṃ vattabbakanigrodhatthero’’ti pucchitvā tassa santikaṃ agamaṃsu. Mahābhikkhusaṅgho theraṃ parivāresi. So mahābhikkhusaṅghaparivuto anupubbena mahāvihāraṃ patvā mahābodhiṃ mahācetiyaṃ thūpārāmañca vanditvā nagaraṃ pāyāsi. Yāva dakkhiṇadvārā gacchantasseva navasu ṭhānesu ticīvaraṃ upapajji; antonagaraṃ paviṭṭhakālato paṭṭhāya mahāsakkāro uppajji. Iti kālavipattiyaṃ tālaphalakandamūlapaṇṇampi dullabhaṃ jātaṃ. Kālasampattiyaṃ evarūpo mahālābho uppannoti. Evaṃ kālavipattipaṭibāhitattā vipākaṃ dātuṃ asakkontāni kālasampattiṃ āgamma vipaccantīti pajānāti.

    অপরস্সাপি বহূনি কল্যাণকম্মানি হোন্তি। তানি পযোগৰিপত্তিযং ঠিতস্স ন ৰিপচ্চেয্যুং। সো পন একেন কল্যাণকম্মেন সম্মাপযোগে পতিট্ঠিতো তীণি সুচরিতানি পূরেতি, পঞ্চসীলং দসসীলং রক্খতি। কালসম্পত্তিযং নিব্বত্তস্স রাজানো সব্বালঙ্কারপতিমণ্ডিতা রাজকঞ্ঞাযো ‘এতস্স অনুচ্ছৰিকা’তি পেসেন্তি, যানৰাহনমণিসুৰণ্ণরজতাদিভেদং তং তং পণ্ণাকারং ‘এতস্স অনুচ্ছৰিক’ন্তি পেসেন্তি ।

    Aparassāpi bahūni kalyāṇakammāni honti. Tāni payogavipattiyaṃ ṭhitassa na vipacceyyuṃ. So pana ekena kalyāṇakammena sammāpayoge patiṭṭhito tīṇi sucaritāni pūreti, pañcasīlaṃ dasasīlaṃ rakkhati. Kālasampattiyaṃ nibbattassa rājāno sabbālaṅkārapatimaṇḍitā rājakaññāyo ‘etassa anucchavikā’ti pesenti, yānavāhanamaṇisuvaṇṇarajatādibhedaṃ taṃ taṃ paṇṇākāraṃ ‘etassa anucchavika’nti pesenti .

    পব্বজ্জূপগতোপি মহাযসো হোতি মহানুভাৰো। তত্রিদং ৰত্থু – কূটকণ্ণরাজা কির গিরিগামকণ্ণৰাসিকং চূল়সুধম্মত্থেরং মমাযতি। সো উপ্পলৰাপিযং ৰসমানো থেরং পক্কোসাপেসি। থেরো আগন্ত্ৰা মালারামৰিহারে ৰসতি। রাজা থেরস্স মাতরং পুচ্ছি – ‘‘কিং থেরো পিযাযতী’’তি? ‘‘কন্দং মহারাজা’’তি। রাজা কন্দং গাহাপেত্ৰা ৰিহারং গন্ত্ৰা থেরস্স দদমানো মুখং উল্লোকেতুং নাসক্খি। সো নিক্খমিত্ৰা চ বহিপরিৰেণে দেৰিং পুচ্ছি – ‘‘কীদিসো থেরো’’তি? ‘‘ত্ৰং পুরিসো হুত্ৰা উল্লোকেতুং ন সক্কোসি; অহং কথং সক্খিস্সামি? নাহং জানামি কীদিসো’’তি। রাজা ‘মম রট্ঠে বলিকারগহপতিপুত্তং উল্লোকেতুং ন ৰিসহামি। মহন্তং ৰত ভো বুদ্ধসাসনং নামা’তি অপ্ফোটেসি। তিপিটকচূল়নাগত্থেরম্পি মমাযতি। তস্স অঙ্গুলিযং একা পিল়কা উট্ঠহি। রাজা ‘থেরং পস্সিস্সামী’তি ৰিহারং গন্ত্ৰা বলৰপেমেন অঙ্গুলিং মুখেন গণ্হি। অন্তোমুখেযেৰ পিল়কা ভিন্না, পুব্বলোহিতং অনুট্ঠুভিত্ৰা থেরে সিনেহেন অমতং ৰিয অজ্ঝোহরি। সোযেৰ থেরো অপরভাগে মরণমঞ্চে নিপজ্জি। রাজা গন্ত্ৰা অসুচিকপল্লকং সীসে ঠপেত্ৰা ‘ধম্মসকটস্স অক্খো ভিজ্জতি অক্খো ভিজ্জতী’তি পরিদেৰমানো ৰিচরি। পথৰিস্সরস্স অসুচিকপল্লকং সীসেন উক্খিপিত্ৰা ৰিচরণং নাম কস্স গতমগ্গো? সম্মাপযোগস্স গতমগ্গোতি। এৰং পযোগৰিপত্তিপটিবাহিতত্তা ৰিপাকং দাতুং অসক্কোন্তানি পযোগসম্পত্তিং আগম্ম ৰিপচ্চন্তীতি পজানাতি। এৰং চতূহি ৰিপত্তীহি পটিবাহিতং কল্যাণকম্মং ৰিপাকং অদত্ৰা চতস্সো সম্পত্তিযো আগম্ম দেতি।

    Pabbajjūpagatopi mahāyaso hoti mahānubhāvo. Tatridaṃ vatthu – kūṭakaṇṇarājā kira girigāmakaṇṇavāsikaṃ cūḷasudhammattheraṃ mamāyati. So uppalavāpiyaṃ vasamāno theraṃ pakkosāpesi. Thero āgantvā mālārāmavihāre vasati. Rājā therassa mātaraṃ pucchi – ‘‘kiṃ thero piyāyatī’’ti? ‘‘Kandaṃ mahārājā’’ti. Rājā kandaṃ gāhāpetvā vihāraṃ gantvā therassa dadamāno mukhaṃ ulloketuṃ nāsakkhi. So nikkhamitvā ca bahipariveṇe deviṃ pucchi – ‘‘kīdiso thero’’ti? ‘‘Tvaṃ puriso hutvā ulloketuṃ na sakkosi; ahaṃ kathaṃ sakkhissāmi? Nāhaṃ jānāmi kīdiso’’ti. Rājā ‘mama raṭṭhe balikāragahapatiputtaṃ ulloketuṃ na visahāmi. Mahantaṃ vata bho buddhasāsanaṃ nāmā’ti apphoṭesi. Tipiṭakacūḷanāgattherampi mamāyati. Tassa aṅguliyaṃ ekā piḷakā uṭṭhahi. Rājā ‘theraṃ passissāmī’ti vihāraṃ gantvā balavapemena aṅguliṃ mukhena gaṇhi. Antomukheyeva piḷakā bhinnā, pubbalohitaṃ anuṭṭhubhitvā there sinehena amataṃ viya ajjhohari. Soyeva thero aparabhāge maraṇamañce nipajji. Rājā gantvā asucikapallakaṃ sīse ṭhapetvā ‘dhammasakaṭassa akkho bhijjati akkho bhijjatī’ti paridevamāno vicari. Pathavissarassa asucikapallakaṃ sīsena ukkhipitvā vicaraṇaṃ nāma kassa gatamaggo? Sammāpayogassa gatamaggoti. Evaṃ payogavipattipaṭibāhitattā vipākaṃ dātuṃ asakkontāni payogasampattiṃ āgamma vipaccantīti pajānāti. Evaṃ catūhi vipattīhi paṭibāhitaṃ kalyāṇakammaṃ vipākaṃ adatvā catasso sampattiyo āgamma deti.

    তত্রিদং ভূতমত্থং কত্ৰা ওপম্মং – একো কির মহারাজা একস্স অমচ্চস্স অপ্পমত্তেন কুজ্ঝিত্ৰা তং বন্ধনাগারে বন্ধাপেসি। তস্স ঞাতকা রঞ্ঞো কুদ্ধভাৰং ঞত্ৰা কিঞ্চি অৰত্ৰা চণ্ডকোপে ৰিগতে রাজানং তস্স নিরপরাধভাৰং জানাপেসুং। রাজা মুঞ্চিত্ৰা তস্স ঠানন্তরং পটিপাকতিকং অকাসি। অথস্স ততো ততো আগচ্ছন্তানং পণ্ণাকারানং পমাণং নাহোসি। মনুস্সা সম্পটিচ্ছিতুং নাসক্খিংসু। তত্থ রঞ্ঞো অপ্পমত্তকেন কুজ্ঝিত্ৰা তস্স বন্ধনাগারে বন্ধাপিতকালো ৰিয পুথুজ্জনস্স নিরযে নিব্বত্তকালো। অথস্স ঞাতকেহি রাজানং সঞ্ঞাপেত্ৰা ঠানন্তরস্স পটিপাকতিককরণকালো ৰিয তস্স সগ্গে নিব্বত্তকালো। পণ্ণাকারং সম্পটিচ্ছিতুং অসমত্থকালো ৰিয চতস্সো সম্পত্তিযো আগম্ম কল্যাণকম্মানং দেৰলোকতো মনুস্সলোকং, মনুস্সলোকতো দেৰলোকন্তি এৰং সুখট্ঠানতো সুখট্ঠানমেৰ নেত্ৰা কপ্পসতসহস্সম্পি সুখৰিপাকং দত্ৰা নিব্বানসম্পাপনং ৰেদিতব্বং।

    Tatridaṃ bhūtamatthaṃ katvā opammaṃ – eko kira mahārājā ekassa amaccassa appamattena kujjhitvā taṃ bandhanāgāre bandhāpesi. Tassa ñātakā rañño kuddhabhāvaṃ ñatvā kiñci avatvā caṇḍakope vigate rājānaṃ tassa niraparādhabhāvaṃ jānāpesuṃ. Rājā muñcitvā tassa ṭhānantaraṃ paṭipākatikaṃ akāsi. Athassa tato tato āgacchantānaṃ paṇṇākārānaṃ pamāṇaṃ nāhosi. Manussā sampaṭicchituṃ nāsakkhiṃsu. Tattha rañño appamattakena kujjhitvā tassa bandhanāgāre bandhāpitakālo viya puthujjanassa niraye nibbattakālo. Athassa ñātakehi rājānaṃ saññāpetvā ṭhānantarassa paṭipākatikakaraṇakālo viya tassa sagge nibbattakālo. Paṇṇākāraṃ sampaṭicchituṃ asamatthakālo viya catasso sampattiyo āgamma kalyāṇakammānaṃ devalokato manussalokaṃ, manussalokato devalokanti evaṃ sukhaṭṭhānato sukhaṭṭhānameva netvā kappasatasahassampi sukhavipākaṃ datvā nibbānasampāpanaṃ veditabbaṃ.

    এৰং তাৰ পাল়িৰসেনেৰ দুতিযং বলং দীপেত্ৰা পুন ‘‘অহোসি কম্মং অহোসি কম্মৰিপাকো’’তি (পটি॰ ম॰ ১.২৩৪) ইমিনা পটিসম্ভিদানযেনাপি দীপেতব্বং। তত্থ ‘অহোসি কম্ম’ন্তি অতীতে আযূহিতং কম্মং অতীতেযেৰ অহোসি। যেন পন অতীতে ৰিপাকো দিন্নো, তং সন্ধায ‘অহোসি কম্মৰিপাকো’তি ৰুত্তং। দিট্ঠধম্মৰেদনীযাদীসু পন বহূসুপি আযূহিতেসু একং দিট্ঠধম্মৰেদনীযং ৰিপাকং দেতি, সেসানি অৰিপাকানি। একং উপপজ্জৰেদনীযং পটিসন্ধিং আকড্ঢতি, সেসানি অৰিপাকানি। একেনানন্তরিযেন নিরযে উপপজ্জতি, সেসানি অৰিপাকানি। অট্ঠসু সমাপত্তীসু একায ব্রহ্মলোকে নিব্বত্ততি, সেসা অৰিপাকা। ইদং সন্ধায ‘নাহোসি কম্মৰিপাকো’তি ৰুত্তং। যো পন বহুম্পি কুসলাকুসলং কম্মং কত্ৰা কল্যাণমিত্তং নিস্সায অরহত্তং পাপুণাতি, এতস্স কম্মৰিপাকো ‘নাহোসি’ নাম। যং অতীতে আযূহিতং এতরহি ৰিপাকং দেতি তং ‘অহোসি কম্মং অত্থি কম্মৰিপাকো’ নাম। যং পুরিমনযেনেৰ অৰিপাকতং আপজ্জতি তং ‘অহোসি কম্মং নত্থি কম্মৰিপাকো’ নাম। যং অতীতে আযূহিতং অনাগতে ৰিপাকং দস্সতি তং ‘অহোসি কম্মং ভৰিস্সতি কম্মৰিপাকো’ নাম। যং পুরিমনযেন অৰিপাকতং আপজ্জিস্সতি তং ‘অহোসি কম্মং ন ভৰিস্সতি কম্মৰিপাকো’ নাম।

    Evaṃ tāva pāḷivaseneva dutiyaṃ balaṃ dīpetvā puna ‘‘ahosi kammaṃ ahosi kammavipāko’’ti (paṭi. ma. 1.234) iminā paṭisambhidānayenāpi dīpetabbaṃ. Tattha ‘ahosi kamma’nti atīte āyūhitaṃ kammaṃ atīteyeva ahosi. Yena pana atīte vipāko dinno, taṃ sandhāya ‘ahosi kammavipāko’ti vuttaṃ. Diṭṭhadhammavedanīyādīsu pana bahūsupi āyūhitesu ekaṃ diṭṭhadhammavedanīyaṃ vipākaṃ deti, sesāni avipākāni. Ekaṃ upapajjavedanīyaṃ paṭisandhiṃ ākaḍḍhati, sesāni avipākāni. Ekenānantariyena niraye upapajjati, sesāni avipākāni. Aṭṭhasu samāpattīsu ekāya brahmaloke nibbattati, sesā avipākā. Idaṃ sandhāya ‘nāhosi kammavipāko’ti vuttaṃ. Yo pana bahumpi kusalākusalaṃ kammaṃ katvā kalyāṇamittaṃ nissāya arahattaṃ pāpuṇāti, etassa kammavipāko ‘nāhosi’ nāma. Yaṃ atīte āyūhitaṃ etarahi vipākaṃ deti taṃ ‘ahosi kammaṃ atthi kammavipāko’ nāma. Yaṃ purimanayeneva avipākataṃ āpajjati taṃ ‘ahosi kammaṃ natthi kammavipāko’ nāma. Yaṃ atīte āyūhitaṃ anāgate vipākaṃ dassati taṃ ‘ahosi kammaṃ bhavissati kammavipāko’ nāma. Yaṃ purimanayena avipākataṃ āpajjissati taṃ ‘ahosi kammaṃ na bhavissati kammavipāko’ nāma.

    যং এতরহি আযূহিতং এতরহিযেৰ ৰিপাকং দেতি তং ‘অত্থি কম্মং অত্থি কম্মৰিপাকো’ নাম। যং পুরিমনযেনেৰ অৰিপাকতং আপজ্জতি তং ‘অত্থি কম্মং নত্থি কম্মৰিপাকো’ নাম। যং এতরহি আযূহিতং অনাগতে ৰিপাকং দস্সতি তং ‘অত্থি কম্মং ভৰিস্সতি কম্মৰিপাকো’ নাম। যং পুরিমনযেনেৰ অৰিপাকতং আপজ্জিস্সতি তং ‘অত্থি কম্মং ন ভৰিস্সতি কম্মৰিপাকো’ নাম।

    Yaṃ etarahi āyūhitaṃ etarahiyeva vipākaṃ deti taṃ ‘atthi kammaṃ atthi kammavipāko’ nāma. Yaṃ purimanayeneva avipākataṃ āpajjati taṃ ‘atthi kammaṃ natthi kammavipāko’ nāma. Yaṃ etarahi āyūhitaṃ anāgate vipākaṃ dassati taṃ ‘atthi kammaṃ bhavissati kammavipāko’ nāma. Yaṃ purimanayeneva avipākataṃ āpajjissati taṃ ‘atthi kammaṃ na bhavissati kammavipāko’ nāma.

    যং সযম্পি অনাগতং, ৰিপাকোপিস্স অনাগতো তং ‘ভৰিস্সতি কম্মং ভৰিস্সতি কম্মৰিপাকো’ নাম। যং সযং ভৰিস্সতি, পুরিমনযেনেৰ অৰিপাকতং আপজ্জিস্সতি তং ‘ভৰিস্সতি কম্মং ন ভৰিস্সতি কম্মৰিপাকো’ নাম।

    Yaṃ sayampi anāgataṃ, vipākopissa anāgato taṃ ‘bhavissati kammaṃ bhavissati kammavipāko’ nāma. Yaṃ sayaṃ bhavissati, purimanayeneva avipākataṃ āpajjissati taṃ ‘bhavissati kammaṃ na bhavissati kammavipāko’ nāma.

    ইদং তথাগতস্সাতি ইদং সব্বেহিপি এতেহি আকারেহি তথাগতস্স কম্মন্তরৰিপাকন্তরজাননঞাণং অকম্পিযট্ঠেন দুতিযবলং ৰেদিতব্বন্তি।

    Idaṃ tathāgatassāti idaṃ sabbehipi etehi ākārehi tathāgatassa kammantaravipākantarajānanañāṇaṃ akampiyaṭṭhena dutiyabalaṃ veditabbanti.

    দুতিযবলনিদ্দেসৰণ্ণনা।

    Dutiyabalaniddesavaṇṇanā.

    ততিযবলনিদ্দেসো

    Tatiyabalaniddeso

    ৮১১. ততিযবলনিদ্দেসে মগ্গোতি ৰা পটিপদাতি ৰা কম্মস্সেৰেতং নামং। নিরযগামিনীতিআদীসু নিরস্সাদট্ঠেন নিরতিঅত্থেন চ নিরযো। উদ্ধং অনুগন্ত্ৰা তিরিযং অঞ্চিতাতি তিরচ্ছানা; তিরচ্ছানাযেৰ তিরচ্ছানযোনি। পেততায পেত্তি; ইতো পেচ্চ গতভাৰেনাতি অত্থো। পেত্তিযেৰ পেত্তিৰিসযো। মনস্স উস্সন্নতায মনুস্সা; মনুস্সাৰ মনুস্সলোকো। দিব্বন্তি পঞ্চহি কামগুণেহি অধিমত্তায ৰা ঠানসম্পত্তিযাতি দেৰা; দেৰাৰ দেৰলোকো। ৰানং ৰুচ্চতি তণ্হা; তং তত্থ নত্থীতি নিব্বানং। নিরযং গচ্ছতীতি নিরযগামী। ইদং মগ্গং সন্ধায ৰুত্তং। পটিপদা পন নিরযগামিনী নাম হোতি। সেসপদেসুপি এসেৰ নযো। ইদং সব্বম্পি পটিপদং তথাগতো পজানাতি।

    811. Tatiyabalaniddese maggoti vā paṭipadāti vā kammassevetaṃ nāmaṃ. Nirayagāminītiādīsu nirassādaṭṭhena niratiatthena ca nirayo. Uddhaṃ anugantvā tiriyaṃ añcitāti tiracchānā; tiracchānāyeva tiracchānayoni. Petatāya petti; ito pecca gatabhāvenāti attho. Pettiyeva pettivisayo. Manassa ussannatāya manussā; manussāva manussaloko. Dibbanti pañcahi kāmaguṇehi adhimattāya vā ṭhānasampattiyāti devā; devāva devaloko. Vānaṃ vuccati taṇhā; taṃ tattha natthīti nibbānaṃ. Nirayaṃ gacchatīti nirayagāmī. Idaṃ maggaṃ sandhāya vuttaṃ. Paṭipadā pana nirayagāminī nāma hoti. Sesapadesupi eseva nayo. Idaṃ sabbampi paṭipadaṃ tathāgato pajānāti.

    কথং ? সকলগামৰাসিকেসুপি হি একতো একং সূকরং ৰা মিগং ৰা জীৰিতা ৰোরোপেন্তেসু সব্বেসম্পি চেতনা পরস্স জীৰিতিন্দ্রিযারম্মণাৰ হোতি। তং পন কম্মং তেসং আযূহনক্খণেযেৰ নানা হোতি। তেসু হি একো আদরেন ছন্দজাতো করোতি। একো ‘এহি ত্ৰম্পি করোহী’তি পরেহি নিপ্পীল়িতত্তা করোতি। একো সমানচ্ছন্দো ৰিয হুত্ৰা অপ্পটিবাহিযমানো ৰিচরতি। তেসু একো তেনেৰ কম্মেন নিরযে নিব্বত্ততি, একো তিরচ্ছানযোনিযং, একো পেত্তিৰিসযে। তং তথাগতো আযূহনক্খণেযেৰ ‘ইমিনা নীহারেন আযূহিতত্তা এস নিরযে নিব্বত্তিস্সতি , এস তিরচ্ছানযোনিযং, এস পেত্তিৰিসযে’তি পজানাতি । নিরযে নিব্বত্তমানম্পি ‘এস অট্ঠসু মহানিরযেসু নিব্বত্তিস্সতি, এস সোল়সসু উস্সদনিরযেসু নিব্বত্তিস্সতী’তি পজানাতি। তিরচ্ছানযোনিযং নিব্বত্তমানম্পি ‘এস অপাদকো ভৰিস্সতি, এস দ্ৰিপাদকো, এস চতুপ্পাদকো, এস বহুপ্পাদকো’তি পজানাতি। পেত্তিৰিসযে নিব্বত্তমানম্পি ‘এস নিজ্ঝামতণ্হিকো ভৰিস্সতি, এস খুপ্পিপাসিকো, এস পরদত্তূপজীৰী’তি পজানাতি। তেসু চ কম্মেসু ‘ইদং কম্মং পটিসন্ধিং আকড্ঢিতুং ন সক্খিস্সতি, দুব্বলং দিন্নায পটিসন্ধিযা উপধিৰেপক্কং ভৰিস্সতীতি পজানাতি।

    Kathaṃ ? Sakalagāmavāsikesupi hi ekato ekaṃ sūkaraṃ vā migaṃ vā jīvitā voropentesu sabbesampi cetanā parassa jīvitindriyārammaṇāva hoti. Taṃ pana kammaṃ tesaṃ āyūhanakkhaṇeyeva nānā hoti. Tesu hi eko ādarena chandajāto karoti. Eko ‘ehi tvampi karohī’ti parehi nippīḷitattā karoti. Eko samānacchando viya hutvā appaṭibāhiyamāno vicarati. Tesu eko teneva kammena niraye nibbattati, eko tiracchānayoniyaṃ, eko pettivisaye. Taṃ tathāgato āyūhanakkhaṇeyeva ‘iminā nīhārena āyūhitattā esa niraye nibbattissati , esa tiracchānayoniyaṃ, esa pettivisaye’ti pajānāti . Niraye nibbattamānampi ‘esa aṭṭhasu mahānirayesu nibbattissati, esa soḷasasu ussadanirayesu nibbattissatī’ti pajānāti. Tiracchānayoniyaṃ nibbattamānampi ‘esa apādako bhavissati, esa dvipādako, esa catuppādako, esa bahuppādako’ti pajānāti. Pettivisaye nibbattamānampi ‘esa nijjhāmataṇhiko bhavissati, esa khuppipāsiko, esa paradattūpajīvī’ti pajānāti. Tesu ca kammesu ‘idaṃ kammaṃ paṭisandhiṃ ākaḍḍhituṃ na sakkhissati, dubbalaṃ dinnāya paṭisandhiyā upadhivepakkaṃ bhavissatīti pajānāti.

    তথা সকলগামৰাসিকেসু একতো পিণ্ডপাতং দদমানেসু সব্বেসম্পি চেতনা পিণ্ডপাতারম্মণাৰ হোতি। তং পন কম্মং তেসং আযূহনক্খণেযেৰ পুরিমনযেন নানা হোতি। তেসু কেচি দেৰলোকে নিব্বত্তিস্সন্তি, কেচি মনুস্সলোকে। তং তথাগতো আযূহনক্খণেযেৰ ‘ইমিনা নীহারেন আযূহিতত্তা এস মনুস্সলোকে নিব্বত্তিস্সতি, এস দেৰলোকে’তি পজানাতি। দেৰলোকে নিব্বত্তমানানম্পি ‘এস পরনিম্মিতৰসৰত্তীসু নিব্বত্তিস্সতি, এস নিম্মানরতীসু, এস তুসিতেসু, এস যামেসু, এস তাৰতিংসেসু, এস চাতুমহারাজিকেসু, এস ভুম্মদেৰেসু; এস পন জেট্ঠকদেৰরাজা হুত্ৰা নিব্বত্তিস্সতি, এস এতস্স দুতিযং ৰা ততিযং ৰা ঠানন্তরং করোন্তো পরিচারকো হুত্ৰা নিব্বত্তিস্সতী’তি পজানাতি। মনুস্সেসু নিব্বত্তমানানম্পি ‘এস খত্তিযকুলে নিব্বত্তিস্সতি, এস ব্রাহ্মণকুলে, এস ৰেস্সকুলে, এস সুদ্দকুলে; এস পন মনুস্সেসু রাজা হুত্ৰা নিব্বত্তিস্সতি, এস এতস্স দুতিযং ৰা ততিযং ৰা ঠানন্তরং করোন্তো পরিচারকো হুত্ৰা নিব্বত্তিস্সতী’তি পজানাতি । তেসু চ কম্মেসু ‘ইদং কম্মং পটিসন্ধিং আকড্ঢিতুং ন সক্খিস্সতি, দুব্বলং দিন্নায পটিসন্ধিযা উপধিৰেপক্কং ভৰিস্সতী’তি পজানাতি।

    Tathā sakalagāmavāsikesu ekato piṇḍapātaṃ dadamānesu sabbesampi cetanā piṇḍapātārammaṇāva hoti. Taṃ pana kammaṃ tesaṃ āyūhanakkhaṇeyeva purimanayena nānā hoti. Tesu keci devaloke nibbattissanti, keci manussaloke. Taṃ tathāgato āyūhanakkhaṇeyeva ‘iminā nīhārena āyūhitattā esa manussaloke nibbattissati, esa devaloke’ti pajānāti. Devaloke nibbattamānānampi ‘esa paranimmitavasavattīsu nibbattissati, esa nimmānaratīsu, esa tusitesu, esa yāmesu, esa tāvatiṃsesu, esa cātumahārājikesu, esa bhummadevesu; esa pana jeṭṭhakadevarājā hutvā nibbattissati, esa etassa dutiyaṃ vā tatiyaṃ vā ṭhānantaraṃ karonto paricārako hutvā nibbattissatī’ti pajānāti. Manussesu nibbattamānānampi ‘esa khattiyakule nibbattissati, esa brāhmaṇakule, esa vessakule, esa suddakule; esa pana manussesu rājā hutvā nibbattissati, esa etassa dutiyaṃ vā tatiyaṃ vā ṭhānantaraṃ karonto paricārako hutvā nibbattissatī’ti pajānāti . Tesu ca kammesu ‘idaṃ kammaṃ paṭisandhiṃ ākaḍḍhituṃ na sakkhissati, dubbalaṃ dinnāya paṭisandhiyā upadhivepakkaṃ bhavissatī’ti pajānāti.

    তথা ৰিপস্সনং পট্ঠপেন্তেসুযেৰ যেন নীহারেন ৰিপস্সনা আরদ্ধা, ‘এস অরহত্তং পাপুণিস্সতি, এস অরহত্তং পত্তুং ন সক্খিস্সতি, এস অনাগামীযেৰ ভৰিস্সতি, এস সকদাগামীযেৰ, এস সোতাপন্নোযেৰ; এস পন মগ্গং ৰা ফলং ৰা সচ্ছিকাতুং ন সক্খিস্সতি, লক্খণারম্মণায ৰিপস্সনাযমেৰ ঠস্সতি; এস পচ্চযপরিগ্গহেযেৰ, এস নামরূপপরিগ্গহেযেৰ, এস অরূপপরিগ্গহেযেৰ, এস রূপপরিগ্গহেযেৰ ঠস্সতি, এস মহাভূতমত্তমেৰ ৰৰত্থাপেস্সতি, এস কিঞ্চি সল্লক্খেতুং ন সক্খিস্সতী’তি পজানাতি।

    Tathā vipassanaṃ paṭṭhapentesuyeva yena nīhārena vipassanā āraddhā, ‘esa arahattaṃ pāpuṇissati, esa arahattaṃ pattuṃ na sakkhissati, esa anāgāmīyeva bhavissati, esa sakadāgāmīyeva, esa sotāpannoyeva; esa pana maggaṃ vā phalaṃ vā sacchikātuṃ na sakkhissati, lakkhaṇārammaṇāya vipassanāyameva ṭhassati; esa paccayapariggaheyeva, esa nāmarūpapariggaheyeva, esa arūpapariggaheyeva, esa rūpapariggaheyeva ṭhassati, esa mahābhūtamattameva vavatthāpessati, esa kiñci sallakkhetuṃ na sakkhissatī’ti pajānāti.

    কসিণপরিকম্মং করোন্তেসুপি ‘এতস্স পরিকম্মমত্তমেৰ ভৰিস্সতি, নিমিত্তং উপ্পাদেতুং ন সক্খিস্সতি; এস পন নিমিত্তং উপ্পাদেতুং সক্খিস্সতি, অপ্পনং পাপেতুং ন সক্খিস্সতি; এস অপ্পনং পাপেত্ৰা ঝানং পাদকং কত্ৰা ৰিপস্সনং পট্ঠপেত্ৰা অরহত্তং গণ্হিস্সতী’তি পজানাতীতি।

    Kasiṇaparikammaṃ karontesupi ‘etassa parikammamattameva bhavissati, nimittaṃ uppādetuṃ na sakkhissati; esa pana nimittaṃ uppādetuṃ sakkhissati, appanaṃ pāpetuṃ na sakkhissati; esa appanaṃ pāpetvā jhānaṃ pādakaṃ katvā vipassanaṃ paṭṭhapetvā arahattaṃ gaṇhissatī’ti pajānātīti.

    ততিযবলনিদ্দেসৰণ্ণনা।

    Tatiyabalaniddesavaṇṇanā.

    চতুত্থবলনিদ্দেসো

    Catutthabalaniddeso

    ৮১২. চতুত্থবলনিদ্দেসে খন্ধনানত্তন্তি ‘অযং রূপক্খন্ধো নাম…পে॰… অযং ৰিঞ্ঞাণক্খন্ধো নামা’তি এৰং পঞ্চন্নং খন্ধানং নানাকরণং পজানাতি। তেসুপি ‘একৰিধেন রূপক্খন্ধো…পে॰… একাদসৰিধেন রূপক্খন্ধো। একৰিধেন ৰেদনাক্খন্ধো…পে॰… বহুৰিধেন ৰেদনাক্খন্ধো…পে॰… একৰিধেন সঞ্ঞাক্খন্ধো…পে॰… একৰিধেন সঙ্খারক্খন্ধো…পে॰… একৰিধেন ৰিঞ্ঞাণক্খন্ধো…পে॰… বহুৰিধেন ৰিঞ্ঞাণক্খন্ধো’তি এৰং একেকস্স খন্ধস্স নানত্তং পজানাতি। আযতননানত্তন্তি ‘ইদং চক্খাযতনং নাম…পে॰… ইদং ধম্মাযতনং নাম। তত্থ দসাযতনা কামাৰচরা, দ্ৰে চতুভূমকা’তি এৰং আযতননানত্তং পজানাতি। ধাতুনানত্তন্তি ‘অযং চক্খুধাতু নাম…পে॰… অযং মনোৰিঞ্ঞাণধাতু নাম। তত্থ সোল়স ধাতুযো কামাৰচরা, দ্ৰে চতুভূমকা’তি এৰং ধাতুনানত্তং পজানাতি।

    812. Catutthabalaniddese khandhanānattanti ‘ayaṃ rūpakkhandho nāma…pe… ayaṃ viññāṇakkhandho nāmā’ti evaṃ pañcannaṃ khandhānaṃ nānākaraṇaṃ pajānāti. Tesupi ‘ekavidhena rūpakkhandho…pe… ekādasavidhena rūpakkhandho. Ekavidhena vedanākkhandho…pe… bahuvidhena vedanākkhandho…pe… ekavidhena saññākkhandho…pe… ekavidhena saṅkhārakkhandho…pe… ekavidhena viññāṇakkhandho…pe… bahuvidhena viññāṇakkhandho’ti evaṃ ekekassa khandhassa nānattaṃ pajānāti. Āyatananānattanti ‘idaṃ cakkhāyatanaṃ nāma…pe… idaṃ dhammāyatanaṃ nāma. Tattha dasāyatanā kāmāvacarā, dve catubhūmakā’ti evaṃ āyatananānattaṃ pajānāti. Dhātunānattanti ‘ayaṃ cakkhudhātu nāma…pe… ayaṃ manoviññāṇadhātu nāma. Tattha soḷasa dhātuyo kāmāvacarā, dve catubhūmakā’ti evaṃ dhātunānattaṃ pajānāti.

    পুন অনেকধাতুনানাধাতুলোকনানত্তন্তি ইদং ন কেৰলং উপাদিন্নকসঙ্খারলোকস্সেৰ নানত্তং তথাগতো পজানাতি, অনুপাদিন্নকসঙ্খারলোকস্সাপি নানত্তং তথাগতো পজানাতিযেৰাতি দস্সেতুং গহিতং। পচ্চেকবুদ্ধা হি দ্ৰে চ অগ্গসাৰকা উপাদিন্নকসঙ্খারলোকস্সাপি নানত্তং একদেসতোৰ জানন্তি নো নিপ্পদেসতো, অনুপাদিন্নকলোকস্স পন নানত্তং ন জানন্তি। সব্বঞ্ঞুবুদ্ধো পন ‘ইমায নাম ধাতুযা উস্সন্নায ইমস্স নাম রুক্খস্স খন্ধো সেতো হোতি, ইমস্স কাল়কো, ইমস্স মট্টো; ইমস্স বহলত্তচো, ইমস্স তনুত্তচো; ইমায নাম ধাতুযা উস্সন্নায ইমস্স রুক্খস্স পত্তং ৰণ্ণসণ্ঠানাদিৰসেন এৰরূপং নাম হোতি; ইমায পন ধাতুযা উস্সন্নায ইমস্স রুক্খস্স পুপ্ফং নীলকং হোতি, পীতকং, লোহিতকং, ওদাতং, সুগন্ধং , দুগ্গন্ধং হোতি; ইমায নাম ধাতুযা উস্সন্নায ফলং খুদ্দকং হোতি, মহন্তং, দীঘং, রস্সং, ৰট্টং, সুসণ্ঠানং, দুস্সণ্ঠানং, মট্ঠং, ফরুসং, সুগন্ধং, দুগ্গন্ধং, মধুরং, তিত্তকং, অম্বিলং, কটুকং, কসাৰং হোতি; ইমায নাম ধাতুযা উস্সন্নায ইমস্স রুক্খস্স কণ্টকো তিখিণো হোতি, অতিখিণো, উজুকো, কুটিলো, তম্বো, কাল়কো, নীলো, ওদাতো হোতী’তি এৰং অনুপাদিন্নকসঙ্খারলোকস্স নানত্তং পজানাতি। সব্বঞ্ঞুবুদ্ধানংযেৰ হি এতং বলং, ন অঞ্ঞেসন্তি।

    Puna anekadhātunānādhātulokanānattanti idaṃ na kevalaṃ upādinnakasaṅkhāralokasseva nānattaṃ tathāgato pajānāti, anupādinnakasaṅkhāralokassāpi nānattaṃ tathāgato pajānātiyevāti dassetuṃ gahitaṃ. Paccekabuddhā hi dve ca aggasāvakā upādinnakasaṅkhāralokassāpi nānattaṃ ekadesatova jānanti no nippadesato, anupādinnakalokassa pana nānattaṃ na jānanti. Sabbaññubuddho pana ‘imāya nāma dhātuyā ussannāya imassa nāma rukkhassa khandho seto hoti, imassa kāḷako, imassa maṭṭo; imassa bahalattaco, imassa tanuttaco; imāya nāma dhātuyā ussannāya imassa rukkhassa pattaṃ vaṇṇasaṇṭhānādivasena evarūpaṃ nāma hoti; imāya pana dhātuyā ussannāya imassa rukkhassa pupphaṃ nīlakaṃ hoti, pītakaṃ, lohitakaṃ, odātaṃ, sugandhaṃ , duggandhaṃ hoti; imāya nāma dhātuyā ussannāya phalaṃ khuddakaṃ hoti, mahantaṃ, dīghaṃ, rassaṃ, vaṭṭaṃ, susaṇṭhānaṃ, dussaṇṭhānaṃ, maṭṭhaṃ, pharusaṃ, sugandhaṃ, duggandhaṃ, madhuraṃ, tittakaṃ, ambilaṃ, kaṭukaṃ, kasāvaṃ hoti; imāya nāma dhātuyā ussannāya imassa rukkhassa kaṇṭako tikhiṇo hoti, atikhiṇo, ujuko, kuṭilo, tambo, kāḷako, nīlo, odāto hotī’ti evaṃ anupādinnakasaṅkhāralokassa nānattaṃ pajānāti. Sabbaññubuddhānaṃyeva hi etaṃ balaṃ, na aññesanti.

    চতুত্থবলনিদ্দেসৰণ্ণনা।

    Catutthabalaniddesavaṇṇanā.

    পঞ্চমবলনিদ্দেসো

    Pañcamabalaniddeso

    ৮১৩. পঞ্চমবলনিদ্দেসে হীনাধিমুত্তিকাতি হীনজ্ঝাসযা। পণীতাধিমুত্তিকাতি কল্যাণজ্ঝাসযা। সেৰন্তীতি নিস্সযন্তি অল্লীযন্তি। ভজন্তীতি উপসঙ্কমন্তি। পযিরুপাসন্তীতি পুনপ্পুনং উপসঙ্কমন্তি। সচে হি আচরিযুপজ্ঝাযা ন সীলৰন্তো হোন্তি, সদ্ধিৰিহারিকা সীলৰন্তো হোন্তি, তে অত্তনো আচরিযুপজ্ঝাযেপি ন উপসঙ্কমন্তি, অত্তনা সদিসে সারুপ্পভিক্খূযেৰ উপসঙ্কমন্তি। সচে আচরিযুপজ্ঝাযা সারুপ্পভিক্খূ, ইতরে অসারুপ্পা, তেপি ন আচরিযুপজ্ঝাযে উপসঙ্কমন্তি, অত্তনা সদিসে হীনাধিমুত্তিকে এৰ উপসঙ্কমন্তি।

    813. Pañcamabalaniddese hīnādhimuttikāti hīnajjhāsayā. Paṇītādhimuttikāti kalyāṇajjhāsayā. Sevantīti nissayanti allīyanti. Bhajantīti upasaṅkamanti. Payirupāsantīti punappunaṃ upasaṅkamanti. Sace hi ācariyupajjhāyā na sīlavanto honti, saddhivihārikā sīlavanto honti, te attano ācariyupajjhāyepi na upasaṅkamanti, attanā sadise sāruppabhikkhūyeva upasaṅkamanti. Sace ācariyupajjhāyā sāruppabhikkhū, itare asāruppā, tepi na ācariyupajjhāye upasaṅkamanti, attanā sadise hīnādhimuttike eva upasaṅkamanti.

    এৰং উপসঙ্কমনং পন ন কেৰলং এতরহেৰ, অতীতানাগতেপীতি দস্সেতুং অতীতম্পি অদ্ধানন্তিআদিমাহ। তং উত্তানত্থমেৰ। ইদং পন দুস্সীলানং দুস্সীলসেৰনমেৰ, সীলৰন্তানং সীলৰন্তসেৰনমেৰ, দুপ্পঞ্ঞানং দুপ্পঞ্ঞসেৰনমেৰ, পঞ্ঞৰন্তানং পঞ্ঞৰন্তসেৰনমেৰ কো নিযামেতীতি? অজ্ঝাসযধাতু নিযামেতি। সম্বহুলা কির ভিক্খূ একং গামং গণভিক্খাচারং চরন্তি। মনুস্সা বহুভত্তং আহরিত্ৰা পত্তানি পূরেত্ৰা ‘‘তুম্হাকং যথাসভাগেন পরিভুঞ্ঞথা’’তি দত্ৰা উয্যোজেসুং। ভিক্খূপি আহংসু ‘‘আৰুসো, মনুস্সা ধাতুসংযুত্তকম্মে পযোজেন্তী’’তি। তিপিটকচূল়াভযত্থেরোপি নাগদীপে চেতিযং ৰন্দনায পঞ্চহি ভিক্খুসতেহি সদ্ধিং গচ্ছন্তো একস্মিং গামে মনুস্সেহি নিমন্তিতো। থেরেন চ সদ্ধিং একো অসারুপ্পভিক্খু অত্থি। ধুরৰিহারেপি একো অসারুপ্পভিক্খু অত্থি। দ্ৰীসু ভিক্খুসঙ্ঘেসু গামং ওসরন্তেসু তে উভোপি জনা, কিঞ্চাপি আগন্তুকেন নেৰাসিকো নেৰাসিকেন ৰা আগন্তুকো ন দিট্ঠপুব্বো, এৰং সন্তেপি, একতো হুত্ৰা হসিত্ৰা হসিত্ৰা কথযমানা একমন্তং অট্ঠংসু। থেরো দিস্ৰা ‘‘সম্মাসম্বুদ্ধেন জানিত্ৰা ধাতুসংযুত্তং কথিত’’ন্তি আহ।

    Evaṃ upasaṅkamanaṃ pana na kevalaṃ etaraheva, atītānāgatepīti dassetuṃ atītampi addhānantiādimāha. Taṃ uttānatthameva. Idaṃ pana dussīlānaṃ dussīlasevanameva, sīlavantānaṃ sīlavantasevanameva, duppaññānaṃ duppaññasevanameva, paññavantānaṃ paññavantasevanameva ko niyāmetīti? Ajjhāsayadhātu niyāmeti. Sambahulā kira bhikkhū ekaṃ gāmaṃ gaṇabhikkhācāraṃ caranti. Manussā bahubhattaṃ āharitvā pattāni pūretvā ‘‘tumhākaṃ yathāsabhāgena paribhuññathā’’ti datvā uyyojesuṃ. Bhikkhūpi āhaṃsu ‘‘āvuso, manussā dhātusaṃyuttakamme payojentī’’ti. Tipiṭakacūḷābhayattheropi nāgadīpe cetiyaṃ vandanāya pañcahi bhikkhusatehi saddhiṃ gacchanto ekasmiṃ gāme manussehi nimantito. Therena ca saddhiṃ eko asāruppabhikkhu atthi. Dhuravihārepi eko asāruppabhikkhu atthi. Dvīsu bhikkhusaṅghesu gāmaṃ osarantesu te ubhopi janā, kiñcāpi āgantukena nevāsiko nevāsikena vā āgantuko na diṭṭhapubbo, evaṃ santepi, ekato hutvā hasitvā hasitvā kathayamānā ekamantaṃ aṭṭhaṃsu. Thero disvā ‘‘sammāsambuddhena jānitvā dhātusaṃyuttaṃ kathita’’nti āha.

    এৰং ‘অজ্ঝাসযধাতু নিযামেতী’তি ৰত্ৰা ধাতুসংযুত্তেন অযমেৰত্থো দীপেতব্বো। গিজ্ঝকূটপব্বতস্মিঞ্হি গিলানসেয্যায নিপন্নো ভগৰা আরক্খণত্থায পরিৰারেত্ৰা ৰসন্তেসু সারিপুত্তমোগ্গল্লানাদীসু একমেকং অত্তনো অত্তনো পরিসায সদ্ধিং চঙ্কমন্তং ওলোকেত্ৰা ভিক্খূ আমন্তেসি ‘‘পস্সথ নো তুম্হে, ভিক্খৰে, সারিপুত্তং সম্বহুলেহি ভিক্খূহি সদ্ধিং চঙ্কমন্ত’’ন্তি? ‘‘এৰং, ভন্তে’’তি। ‘‘সব্বে খো এতে, ভিক্খৰে, ভিক্খূ মহাপঞ্ঞা’’তি (সং॰ নি॰ ২.৯৯) সব্বং ৰিত্থারেতব্বন্তি।

    Evaṃ ‘ajjhāsayadhātu niyāmetī’ti vatvā dhātusaṃyuttena ayamevattho dīpetabbo. Gijjhakūṭapabbatasmiñhi gilānaseyyāya nipanno bhagavā ārakkhaṇatthāya parivāretvā vasantesu sāriputtamoggallānādīsu ekamekaṃ attano attano parisāya saddhiṃ caṅkamantaṃ oloketvā bhikkhū āmantesi ‘‘passatha no tumhe, bhikkhave, sāriputtaṃ sambahulehi bhikkhūhi saddhiṃ caṅkamanta’’nti? ‘‘Evaṃ, bhante’’ti. ‘‘Sabbe kho ete, bhikkhave, bhikkhū mahāpaññā’’ti (saṃ. ni. 2.99) sabbaṃ vitthāretabbanti.

    পঞ্চমবলনিদ্দেসৰণ্ণনা।

    Pañcamabalaniddesavaṇṇanā.

    ছট্ঠবলনিদ্দেসো

    Chaṭṭhabalaniddeso

    ৮১৪. ছট্ঠবলনিদ্দেসে আসযন্তি যত্থ সত্তা আসযন্তি নিৰসন্তি, তং তেসং নিৰাসট্ঠানং দিট্ঠিগতং ৰা যথাভূতং ঞাণং ৰা। অনুসযন্তি অপ্পহীনানুসযিতং কিলেসং। চরিতন্তি কাযাদীহি অভিসঙ্খতং কুসলাকুসলং। অধিমুত্তন্তি অজ্ঝাসযং। অপ্পরজক্খেতিআদীসু পঞ্ঞামযে অক্খিম্হি অপ্পং পরিত্তং রাগদোসমোহরজং এতেসন্তি অপ্পরজক্খা। তস্সেৰ মহন্ততায মহারজক্খা। উভযেনাপি মন্দকিলেসে মহাকিলেসে চ সত্তে দস্সেতি। যেসং সদ্ধাদীনি ইন্দ্রিযানি তিক্খানি, তে তিক্খিন্দ্রিযা। যেসং তানি মুদূনি, তে মুদিন্দ্রিযা। যেসং আসযাদযো কোট্ঠাসা সুন্দরা, তে স্ৰাকারা। ৰিপরীতা দ্ৰাকারা। যে কথিতকারণং সল্লক্খেন্তি, সুখেন সক্কা হোন্তি ৰিঞ্ঞাপেতুং, তে সুৰিঞ্ঞাপযা। ৰিপরীতা দুৰিঞ্ঞাপযা। যে অরিযমগ্গপটিৰেধস্স অনুচ্ছৰিকা উপনিস্সযসম্পন্না, তে ভব্বা। ৰিপরীতা অভব্বা।

    814. Chaṭṭhabalaniddese āsayanti yattha sattā āsayanti nivasanti, taṃ tesaṃ nivāsaṭṭhānaṃ diṭṭhigataṃ vā yathābhūtaṃ ñāṇaṃ vā. Anusayanti appahīnānusayitaṃ kilesaṃ. Caritanti kāyādīhi abhisaṅkhataṃ kusalākusalaṃ. Adhimuttanti ajjhāsayaṃ. Apparajakkhetiādīsu paññāmaye akkhimhi appaṃ parittaṃ rāgadosamoharajaṃ etesanti apparajakkhā. Tasseva mahantatāya mahārajakkhā. Ubhayenāpi mandakilese mahākilese ca satte dasseti. Yesaṃ saddhādīni indriyāni tikkhāni, te tikkhindriyā. Yesaṃ tāni mudūni, te mudindriyā. Yesaṃ āsayādayo koṭṭhāsā sundarā, te svākārā. Viparītā dvākārā. Ye kathitakāraṇaṃ sallakkhenti, sukhena sakkā honti viññāpetuṃ, te suviññāpayā. Viparītā duviññāpayā. Ye ariyamaggapaṭivedhassa anucchavikā upanissayasampannā, te bhabbā. Viparītā abhabbā.

    ৮১৫. এৰং ছট্ঠবলস্স মাতিকং ঠপেত্ৰা ইদানি যথাপটিপাটিযা ভাজেন্তো কতমো চ সত্তানং আসযোতিআদিমাহ। তত্থ সস্সতো লোকোতিআদীনং অত্থো হেট্ঠা নিক্খেপকণ্ডৰণ্ণনাযং (ধ॰ স॰ অট্ঠ॰ ১১০৫) ৰুত্তোযেৰ। ইতি ভৰদিট্ঠিসন্নিস্সিতা ৰাতি এৰং সস্সতদিট্ঠিং ৰা সন্নিস্সিতা। সস্সতদিট্ঠি হি এত্থ ভৰদিট্ঠীতি ৰুত্তা; উচ্ছেদদিট্ঠি চ ৰিভৰদিট্ঠীতি। সব্বদিট্ঠীনঞ্হি সস্সতুচ্ছেদদিট্ঠী হি সঙ্গহিতত্তা সব্বেপি দিট্ঠিগতিকা সত্তা ইমাৰ দ্ৰে দিট্ঠিযো সন্নিস্সিতা হোন্তি। ৰুত্তম্পি চেতং – ‘‘দ্ৰযসন্নিস্সিতো খো পনাযং, কচ্চান, লোকো যেভুয্যেন – অত্থিতঞ্চেৰ নত্থিতঞ্চা’’তি (সং॰ নি॰ ২.১৫)। এত্থ হি অত্থিতাতি সস্সতং, নত্থিতাতি উচ্ছেদো। অযং তাৰ ৰট্টসন্নিস্সিতানং পুথুজ্জনসত্তানং আসযো।

    815. Evaṃ chaṭṭhabalassa mātikaṃ ṭhapetvā idāni yathāpaṭipāṭiyā bhājento katamo ca sattānaṃ āsayotiādimāha. Tattha sassato lokotiādīnaṃ attho heṭṭhā nikkhepakaṇḍavaṇṇanāyaṃ (dha. sa. aṭṭha. 1105) vuttoyeva. Iti bhavadiṭṭhisannissitā vāti evaṃ sassatadiṭṭhiṃ vā sannissitā. Sassatadiṭṭhi hi ettha bhavadiṭṭhīti vuttā; ucchedadiṭṭhi ca vibhavadiṭṭhīti. Sabbadiṭṭhīnañhi sassatucchedadiṭṭhī hi saṅgahitattā sabbepi diṭṭhigatikā sattā imāva dve diṭṭhiyo sannissitā honti. Vuttampi cetaṃ – ‘‘dvayasannissito kho panāyaṃ, kaccāna, loko yebhuyyena – atthitañceva natthitañcā’’ti (saṃ. ni. 2.15). Ettha hi atthitāti sassataṃ, natthitāti ucchedo. Ayaṃ tāva vaṭṭasannissitānaṃ puthujjanasattānaṃ āsayo.

    ইদানি ৰিৰট্টসন্নিস্সিতানং সুদ্ধসত্তানং আসযং দস্সেতুং এতে ৰা পন উভো অন্তে অনুপগম্মাতিআদি ৰুত্তং। তত্থ এতে ৰা পনাতি এতেযেৰ। উভো অন্তেতি সস্সতুচ্ছেদসঙ্খাতে দ্ৰে অন্তে। অনুপগম্মাতি অনল্লীযিত্ৰা। ইদপ্পচ্চযতা পটিচ্চসমুপ্পন্নেসু ধম্মেসূতি ইদপ্পচ্চযতায চেৰ পটিচ্চসমুপ্পন্নধম্মেসু চ। অনুলোমিকা খন্তীতি ৰিপস্সনাঞাণং। যথাভূতং ৰা ঞাণন্তি মগ্গঞাণং। ইদং ৰুত্তং হোতি – যা পটিচ্চসমুপ্পাদে চেৰ পটিচ্চসমুপ্পন্নধম্মেসু চ এতে উভো সস্সতুচ্ছেদঅন্তে অনুপগন্ত্ৰা ৰিপস্সনা পটিলদ্ধা, যঞ্চ ততো উত্তরিমগ্গঞাণং – অযং সত্তানং আসযো, অযং ৰট্টসন্নিস্সিতানঞ্চ ৰিৰট্টসন্নিস্সিতানঞ্চ সব্বেসম্পি সত্তানং আসযো, ইদং ৰসনট্ঠানন্তি। অযং আচরিযানং সমানত্থকথা।

    Idāni vivaṭṭasannissitānaṃ suddhasattānaṃ āsayaṃ dassetuṃ ete vā pana ubho ante anupagammātiādi vuttaṃ. Tattha ete vā panāti eteyeva. Ubho anteti sassatucchedasaṅkhāte dve ante. Anupagammāti anallīyitvā. Idappaccayatā paṭiccasamuppannesu dhammesūti idappaccayatāya ceva paṭiccasamuppannadhammesu ca. Anulomikā khantīti vipassanāñāṇaṃ. Yathābhūtaṃ vā ñāṇanti maggañāṇaṃ. Idaṃ vuttaṃ hoti – yā paṭiccasamuppāde ceva paṭiccasamuppannadhammesu ca ete ubho sassatucchedaante anupagantvā vipassanā paṭiladdhā, yañca tato uttarimaggañāṇaṃ – ayaṃ sattānaṃ āsayo, ayaṃ vaṭṭasannissitānañca vivaṭṭasannissitānañca sabbesampi sattānaṃ āsayo, idaṃ vasanaṭṭhānanti. Ayaṃ ācariyānaṃ samānatthakathā.

    ৰিতণ্ডৰাদী পনাহ – ‘মগ্গো নাম ৰাসং ৰিদ্ধংসেন্তো গচ্ছতি, ননু ত্ৰং মগ্গো ৰাসোতি ৰদেসী’তি? সো ৰত্তব্বো ‘ত্ৰং অরিযৰাসভাণকো হোসি ন হোসী’তি? সচে পন ‘ন হোমী’তি ৰদতি, ‘অভাণকতায ন জানাসী’তি ৰত্তব্বো। সচে ‘ভাণকোস্মী’তি ৰদতি, ‘সুত্তং আহরা’তি ৰত্তব্বো। সচে আহরতি, ইচ্চেতং কুসলং; নো চে আহরতি সযং আহরিতব্বং – ‘‘দসযিমে, ভিক্খৰে, অরিযৰাসা, যে অরিযা আৰসিংসু ৰা আৰসন্তি ৰা আৰসিস্সন্তি ৰা’’তি (অ॰ নি॰ ১০.১৯)। এতঞ্হি সুত্তং মগ্গস্স ৰাসভাৰং দীপেতি। তস্মা সুকথিতমেৰেতন্তি। ইদং পন ভগৰা সত্তানং আসযং জানন্তো ইমেসঞ্চ দিট্ঠিগতানং ৰিপস্সনাঞাণমগ্গঞাণানং অপ্পৰত্তিক্খণেপি জানাতি এৰ। ৰুত্তম্পি চেতং –

    Vitaṇḍavādī panāha – ‘maggo nāma vāsaṃ viddhaṃsento gacchati, nanu tvaṃ maggo vāsoti vadesī’ti? So vattabbo ‘tvaṃ ariyavāsabhāṇako hosi na hosī’ti? Sace pana ‘na homī’ti vadati, ‘abhāṇakatāya na jānāsī’ti vattabbo. Sace ‘bhāṇakosmī’ti vadati, ‘suttaṃ āharā’ti vattabbo. Sace āharati, iccetaṃ kusalaṃ; no ce āharati sayaṃ āharitabbaṃ – ‘‘dasayime, bhikkhave, ariyavāsā, ye ariyā āvasiṃsu vā āvasanti vā āvasissanti vā’’ti (a. ni. 10.19). Etañhi suttaṃ maggassa vāsabhāvaṃ dīpeti. Tasmā sukathitamevetanti. Idaṃ pana bhagavā sattānaṃ āsayaṃ jānanto imesañca diṭṭhigatānaṃ vipassanāñāṇamaggañāṇānaṃ appavattikkhaṇepi jānāti eva. Vuttampi cetaṃ –

    ‘‘কামং সেৰন্তঞ্ঞেৰ জানাতি ‘অযং পুগ্গলো কামগরুকো কামাসযো কামাধিমুত্তো’তি। নেক্খম্মং সেৰন্তঞ্ঞেৰ জানাতি ‘অযং পুগ্গলো নেক্খম্মগরুকো নেক্খম্মাসযো নেক্খম্মাধিমুত্তো’তি। ব্যাপাদং…পে॰… অব্যাপাদং… থিনমিদ্ধং…পে॰… আলোকসঞ্ঞং নেক্খম্মং সেৰন্তঞ্ঞেৰ জানাতি সেৰন্তঞ্ঞেৰ জানাতি ‘অযং পুগ্গলো আলোকসঞ্ঞাগরুকো আলোকসঞ্ঞাসযো আলোকসঞ্ঞাধিমুত্তো’’তি (পটি॰ ম॰ ১.১১৩)।

    ‘‘Kāmaṃ sevantaññeva jānāti ‘ayaṃ puggalo kāmagaruko kāmāsayo kāmādhimutto’ti. Nekkhammaṃ sevantaññeva jānāti ‘ayaṃ puggalo nekkhammagaruko nekkhammāsayo nekkhammādhimutto’ti. Byāpādaṃ…pe… abyāpādaṃ… thinamiddhaṃ…pe… ālokasaññaṃ nekkhammaṃ sevantaññeva jānāti sevantaññeva jānāti ‘ayaṃ puggalo ālokasaññāgaruko ālokasaññāsayo ālokasaññādhimutto’’ti (paṭi. ma. 1.113).

    ৮১৬. অনুসযনিদ্দেসে কামরাগো চ সো অপ্পহীনট্ঠেন অনুসযো চাতি কামরাগানুসযো। সেসপদেসুপি এসেৰ নযো। যং লোকে পিযরূপন্তি যং ইমস্মিং লোকে পিযজাতিকং। সাতরূপন্তি সাতজাতিকং অস্সাদপদট্ঠানং ইট্ঠারম্মণং। এত্থ সত্তানং রাগানুসযো অনুসেতীতি এতস্মিং ইট্ঠারম্মণে সত্তানং অপ্পহীনট্ঠেন রাগানুসযো অনুসেতি। যথা নাম উদকে নিমুগ্গস্স হেট্ঠা চ উপরি চ সমন্তভাগে চ উদকমেৰ হোতি, এৰমেৰ ইট্ঠারম্মণে রাগুপ্পত্তি নাম সত্তানং আচিণ্ণসমাচিণ্ণা। তথা অনিট্ঠারম্মণে পটিঘুপ্পত্তি। ইতি ইমেসু দ্ৰীসু ধম্মেসূতি এৰং ইমেসু দ্ৰীসু কামরাগপটিঘৰন্তেসু ইট্ঠানিট্ঠারম্মণধম্মেসু। অৰিজ্জানুপতিতাতি কামরাগপটিঘসম্পযুত্তা হুত্ৰা আরম্মণকরণৰসেন অৰিজ্জা অনুপতিতা। তদেকট্ঠোতি তায অৰিজ্জায সম্পযুত্তেকট্ঠৰসেন একট্ঠো। মানো চ দিট্ঠি চ ৰিচিকিচ্ছা চাতি নৰৰিধো মানো, দ্ৰাসট্ঠিৰিধা দিট্ঠি, অট্ঠৰত্থুকা চ ৰিচিকিচ্ছা। ভৰরাগানুসযো পনেত্থ কামরাগানুসযেনেৰ সঙ্গহিতোতি ৰেদিতব্বো।

    816. Anusayaniddese kāmarāgo ca so appahīnaṭṭhena anusayo cāti kāmarāgānusayo. Sesapadesupi eseva nayo. Yaṃ loke piyarūpanti yaṃ imasmiṃ loke piyajātikaṃ. Sātarūpanti sātajātikaṃ assādapadaṭṭhānaṃ iṭṭhārammaṇaṃ. Ettha sattānaṃ rāgānusayo anusetīti etasmiṃ iṭṭhārammaṇe sattānaṃ appahīnaṭṭhena rāgānusayo anuseti. Yathā nāma udake nimuggassa heṭṭhā ca upari ca samantabhāge ca udakameva hoti, evameva iṭṭhārammaṇe rāguppatti nāma sattānaṃ āciṇṇasamāciṇṇā. Tathā aniṭṭhārammaṇe paṭighuppatti. Iti imesu dvīsu dhammesūti evaṃ imesu dvīsu kāmarāgapaṭighavantesu iṭṭhāniṭṭhārammaṇadhammesu. Avijjānupatitāti kāmarāgapaṭighasampayuttā hutvā ārammaṇakaraṇavasena avijjā anupatitā. Tadekaṭṭhoti tāya avijjāya sampayuttekaṭṭhavasena ekaṭṭho. Māno ca diṭṭhi ca vicikicchā cāti navavidho māno, dvāsaṭṭhividhā diṭṭhi, aṭṭhavatthukā ca vicikicchā. Bhavarāgānusayo panettha kāmarāgānusayeneva saṅgahitoti veditabbo.

    ৮১৭. চরিতনিদ্দেসে তেরস চেতনা পুঞ্ঞাভিসঙ্খারো, দ্ৰাদস অপুঞ্ঞাভিসঙ্খারো, চতস্সো আনেঞ্জাভিসঙ্খারো। তত্থ কামাৰচরো পরিত্তভূমকো, ইতরো মহাভূমকো। তীসুপি ৰা এতেসু যো কোচি অপ্পৰিপাকো পরিত্তভূমকো, বহুৰিপাকো মহাভূমকোতি ৰেদিতব্বো।

    817. Caritaniddese terasa cetanā puññābhisaṅkhāro, dvādasa apuññābhisaṅkhāro, catasso āneñjābhisaṅkhāro. Tattha kāmāvacaro parittabhūmako, itaro mahābhūmako. Tīsupi vā etesu yo koci appavipāko parittabhūmako, bahuvipāko mahābhūmakoti veditabbo.

    ৮১৮. অধিমুত্তিনিদ্দেসো হেট্ঠা পকাসিতোৰ। কস্মা পনাযং অধিমুত্তি হেট্ঠা ৰুত্তাপি পুন গহিতাতি? অযঞ্হি হেট্ঠা পাটিযেক্কং বলদস্সনৰসেন গহিতা, ইধ সত্তানং তিক্খিন্দ্রিযমুদিন্দ্রিযভাৰদস্সনত্থং।

    818. Adhimuttiniddeso heṭṭhā pakāsitova. Kasmā panāyaṃ adhimutti heṭṭhā vuttāpi puna gahitāti? Ayañhi heṭṭhā pāṭiyekkaṃ baladassanavasena gahitā, idha sattānaṃ tikkhindriyamudindriyabhāvadassanatthaṃ.

    ৮১৯. মহারজক্খনিদ্দেসে উস্সদগতানীতি ৰেপুল্লগতানি। পহানক্কমৰসেন চেস উপ্পটিপাটিযা নিদ্দেসো কতো।

    819. Mahārajakkhaniddese ussadagatānīti vepullagatāni. Pahānakkamavasena cesa uppaṭipāṭiyā niddeso kato.

    ৮২০. অনুস্সদগতানীতি অৰেপুল্লগতানিং। তিক্খিন্দ্রিযমুদিন্দ্রিযনিদ্দেসে উপনিস্সযইন্দ্রিযানি নাম কথিতানি। উপ্পটিপাটিযা নিদ্দেসে পনেত্থ পযোজনং হেট্ঠা ৰুত্তনযেনেৰ ৰেদিতব্বং।

    820. Anussadagatānīti avepullagatāniṃ. Tikkhindriyamudindriyaniddese upanissayaindriyāni nāma kathitāni. Uppaṭipāṭiyā niddese panettha payojanaṃ heṭṭhā vuttanayeneva veditabbaṃ.

    ৮২৩. তথা দ্ৰাকারনিদ্দেসাদীসু পাপাসযাতি অকুসলাসযা। পাপচরিতাতি অপুঞ্ঞাভিসঙ্খারপরিপূরকা। পাপাধিমুত্তিকাতি সক্কাযাভিরতা ৰট্টজ্ঝাসযা।

    823. Tathā dvākāraniddesādīsu pāpāsayāti akusalāsayā. Pāpacaritāti apuññābhisaṅkhāraparipūrakā. Pāpādhimuttikāti sakkāyābhiratā vaṭṭajjhāsayā.

    ৮২৪. স্ৰাকারনিদ্দেসে যস্মা কল্যাণকো নাম অনুসযো নত্থি, তস্মা কল্যাণানুসযাতি ন ৰুত্তং। সেসং ৰুত্তৰিপরিযাযেন ৰেদিতব্বং।

    824. Svākāraniddese yasmā kalyāṇako nāma anusayo natthi, tasmā kalyāṇānusayāti na vuttaṃ. Sesaṃ vuttavipariyāyena veditabbaṃ.

    ৮২৬. ভব্বাভব্বনিদ্দেসে কম্মাৰরণেনাতি পঞ্চৰিধেন আনন্তরিযকম্মেন। কিলেসাৰরণেনাতি নিযতমিচ্ছাদিট্ঠিযা। ৰিপাকাৰরণেনাতি অহেতুকপটিসন্ধিযা। যস্মা পন দুহেতুকানম্পি অরিযমগ্গপটিৰেধো নত্থি, তস্মা দুহেতুকপটিসন্ধিপি ৰিপাকাৰরণমেৰাতি ৰেদিতব্বা। অস্সদ্ধাতি বুদ্ধাদীসু সদ্ধারহিতা। অচ্ছন্দিকাতি কত্তুকম্যতাকুসলচ্ছন্দরহিতা। উত্তরকুরুকা মনুস্সা অচ্ছন্দিকট্ঠানং পৰিট্ঠা। দুপ্পঞ্ঞাতি ভৰঙ্গপঞ্ঞায পরিহীনা। ভৰঙ্গপঞ্ঞায পন পরিপুণ্ণাযপি যস্স ভৰঙ্গং লোকুত্তরস্স পাদকং ন হোতি, সো দুপ্পঞ্ঞোযেৰ নাম। অভব্বা নিযামং ওক্কমিতুং কুসলেসু ধম্মেসু সম্মত্তন্তি কুসলেসু ধম্মেসু সম্মত্তনিযামসঙ্খাতং মগ্গং ওক্কমিতুং অভব্বা।

    826. Bhabbābhabbaniddese kammāvaraṇenāti pañcavidhena ānantariyakammena. Kilesāvaraṇenāti niyatamicchādiṭṭhiyā. Vipākāvaraṇenāti ahetukapaṭisandhiyā. Yasmā pana duhetukānampi ariyamaggapaṭivedho natthi, tasmā duhetukapaṭisandhipi vipākāvaraṇamevāti veditabbā. Assaddhāti buddhādīsu saddhārahitā. Acchandikāti kattukamyatākusalacchandarahitā. Uttarakurukā manussā acchandikaṭṭhānaṃ paviṭṭhā. Duppaññāti bhavaṅgapaññāya parihīnā. Bhavaṅgapaññāya pana paripuṇṇāyapi yassa bhavaṅgaṃ lokuttarassa pādakaṃ na hoti, so duppaññoyeva nāma. Abhabbā niyāmaṃ okkamituṃ kusalesu dhammesu sammattanti kusalesu dhammesu sammattaniyāmasaṅkhātaṃ maggaṃ okkamituṃ abhabbā.

    ৮২৭. ন কম্মাৰরণেনাতিআদীনি ৰুত্তৰিপরিযাযেন ৰেদিতব্বানি। ইদং দ্ৰিন্নং ঞাণানং ভাজনীযং – ইন্দ্রিযপরোপরিযত্তিঞাণস্স চ আসযানুসযঞাণস্স চ। এত্থ হি আসযানুসযঞাণেন ইন্দ্রিযপরোপরিযত্তিঞাণম্পি ভাজিতং। ইতি ইমানি দ্ৰে ঞাণানি একতো হুত্ৰা একং বলঞাণং নাম জাতন্তি।

    827. Na kammāvaraṇenātiādīni vuttavipariyāyena veditabbāni. Idaṃ dvinnaṃ ñāṇānaṃ bhājanīyaṃ – indriyaparopariyattiñāṇassa ca āsayānusayañāṇassa ca. Ettha hi āsayānusayañāṇena indriyaparopariyattiñāṇampi bhājitaṃ. Iti imāni dve ñāṇāni ekato hutvā ekaṃ balañāṇaṃ nāma jātanti.

    ছট্ঠবলনিদ্দেসৰণ্ণনা।

    Chaṭṭhabalaniddesavaṇṇanā.

    সত্তমবলনিদ্দেসো

    Sattamabalaniddeso

    ৮২৮. সত্তমবলনিদ্দেসে ঝাযতীতি ঝাযী। চত্তারো ঝাযীতি ঝাযিনো চত্তারো জনা ৰুচ্চন্তি। তত্থ পঠমচতুক্কে তাৰ পঠমো সমাপত্তিলাভী সমানোযেৰ ‘ন লাভীম্হী’তি, কম্মট্ঠানং সমানংযেৰ ‘ন কম্মট্ঠান’ন্তি সঞ্ঞী হোতি। অযং অপ্পগুণজ্ঝানলাভীতি ৰেদিতব্বো। দুতিযো সমাপত্তিযা অলাভীযেৰ ‘লাভীম্হী’তি, অকম্মট্ঠানং সমানংযেৰ ‘কম্মট্ঠান’ন্তি সঞ্ঞী হোতি। অযং নিদ্দাঝাযী নাম। নিদ্দাযিত্ৰা পটিবুদ্ধো এৰং মঞ্ঞতি। ততিযো সমাপত্তিলাভী সমানো ‘সমাপত্তিলাভীম্হী’তি, কম্মট্ঠানমেৰ সমানং ‘কম্মট্ঠান’ন্তি সঞ্ঞী হোতি। অযং পগুণজ্ঝানলাভীতি ৰেদিতব্বো। চতুত্থো অলাভীযেৰ ‘অলাভীম্হী’তি, অকম্মট্ঠানংযেৰ ‘অকম্মট্ঠান’ন্তি সঞ্ঞী হোতি। এৰমেত্থ দ্ৰে জনা অজ্ঝাযিনোৰ ঝাযীনং অন্তো পৰিট্ঠত্তা ঝাযীতি ৰুত্তা।

    828. Sattamabalaniddese jhāyatīti jhāyī. Cattāro jhāyīti jhāyino cattāro janā vuccanti. Tattha paṭhamacatukke tāva paṭhamo samāpattilābhī samānoyeva ‘na lābhīmhī’ti, kammaṭṭhānaṃ samānaṃyeva ‘na kammaṭṭhāna’nti saññī hoti. Ayaṃ appaguṇajjhānalābhīti veditabbo. Dutiyo samāpattiyā alābhīyeva ‘lābhīmhī’ti, akammaṭṭhānaṃ samānaṃyeva ‘kammaṭṭhāna’nti saññī hoti. Ayaṃ niddājhāyī nāma. Niddāyitvā paṭibuddho evaṃ maññati. Tatiyo samāpattilābhī samāno ‘samāpattilābhīmhī’ti, kammaṭṭhānameva samānaṃ ‘kammaṭṭhāna’nti saññī hoti. Ayaṃ paguṇajjhānalābhīti veditabbo. Catuttho alābhīyeva ‘alābhīmhī’ti, akammaṭṭhānaṃyeva ‘akammaṭṭhāna’nti saññī hoti. Evamettha dve janā ajjhāyinova jhāyīnaṃ anto paviṭṭhattā jhāyīti vuttā.

    দুতিযচতুক্কে সসঙ্খারেন সপ্পযোগেন সমাধিপারিবন্ধিকধম্মে ৰিক্খম্ভেন্তো দন্ধং সমাপজ্জতি নাম। একং দ্ৰে চিত্তৰারে ঠত্ৰা সহসা ৰুট্ঠহন্তা খিপ্পং ৰুট্ঠহতি নাম। সুখেনেৰ পন সমাধিপারিবন্ধিকধম্মে সোধেন্তো খিপ্পং সমাপজ্জতি নাম। যথাপরিচ্ছেদেন অৰুট্ঠহিত্ৰা কালং অতিনামেত্ৰা ৰুট্ঠহন্তো দন্ধং ৰুট্ঠাতি নাম। ইতরে দ্ৰেপি ইমিনাৰ নযেন ৰেদিতব্বা। ইমে চত্তারোপি জনা সমাপত্তিলাভিনোৰ।

    Dutiyacatukke sasaṅkhārena sappayogena samādhipāribandhikadhamme vikkhambhento dandhaṃ samāpajjati nāma. Ekaṃ dve cittavāre ṭhatvā sahasā vuṭṭhahantā khippaṃ vuṭṭhahati nāma. Sukheneva pana samādhipāribandhikadhamme sodhento khippaṃ samāpajjati nāma. Yathāparicchedena avuṭṭhahitvā kālaṃ atināmetvā vuṭṭhahanto dandhaṃ vuṭṭhāti nāma. Itare dvepi imināva nayena veditabbā. Ime cattāropi janā samāpattilābhinova.

    ততিযচতুক্কে ‘ইদং ঝানং পঞ্চঙ্গিকং, ইদং চতুরঙ্গিক’ন্তি এৰং অঙ্গৰৰত্থানপরিচ্ছেদে ছেকো সমাধিস্মিং সমাধিকুসলো নাম। নীৰরণানি পন ৰিক্খম্ভেত্ৰা চিত্তমঞ্জূসায চিত্তং ঠপেতুং অছেকো নো সমাধিস্মিং সমাপত্তিকুসলো নাম। ইতরেপি তযো ইমিনাৰ নযেন ৰেদিতব্বা। ইমেপি চত্তারো সমাপত্তিলাভিনোযেৰ।

    Tatiyacatukke ‘idaṃ jhānaṃ pañcaṅgikaṃ, idaṃ caturaṅgika’nti evaṃ aṅgavavatthānaparicchede cheko samādhismiṃ samādhikusalo nāma. Nīvaraṇāni pana vikkhambhetvā cittamañjūsāya cittaṃ ṭhapetuṃ acheko no samādhismiṃ samāpattikusalo nāma. Itarepi tayo imināva nayena veditabbā. Imepi cattāro samāpattilābhinoyeva.

    ইদানি যানি ঝানানি নিস্সায ইমে পুগ্গলা ‘ঝাযী’ নাম জাতা, তানি দস্সেতুং চত্তারি ঝানানীতিআদিমাহ। তত্থ চত্তারি ঝানানি তযো চ ৰিমোক্খা অত্থতো হেট্ঠা ধম্মসঙ্গহট্ঠকথাযমেৰ (ধ॰ স॰ অট্ঠ॰ ১৬০, ২৪৮) পকাসিতা। সেসানম্পি ৰিমোক্খট্ঠো তত্থ ৰুত্তনযেনেৰ ৰেদিতব্বো। অপিচেত্থ পটিপাটিযা সত্ত অপ্পিতপ্পিতক্খণে পচ্চনীকধম্মেহি ৰিমুচ্চনতো চ আরম্মণে চ অধিমুচ্চনতো ৰিমোক্খো নাম। অট্ঠমো পন সব্বসো সঞ্ঞাৰেদযিতেহি ৰিমুত্তত্তা অপগতৰিমোক্খো নাম। সমাধীসু চতুক্কনযপঞ্চকনযেসু পঠমজ্ঝানসমাধি সৰিতক্কসৰিচারো নাম। পঞ্চকনযে দুতিযজ্ঝানসমাধি অৰিতক্কৰিচারমত্তসমাধি নাম। চতুক্কনযেপি পঞ্চকনযেপি উপরি তীসু ঝানেসু সমাধি অৰিতক্ক অৰিচারসমাধি নাম। সমাপত্তীসু হি পটিপাটিযা অট্ঠন্নং সমাপত্তীনং ‘সমাধী’তিপি নামং ‘সমাপত্তী’তিপি। কস্মা? চিত্তেকগ্গতাসব্ভাৰতো। নিরোধসমাপত্তিযা তদভাৰতো ন সমাধীতি নামং।

    Idāni yāni jhānāni nissāya ime puggalā ‘jhāyī’ nāma jātā, tāni dassetuṃ cattāri jhānānītiādimāha. Tattha cattāri jhānāni tayo ca vimokkhā atthato heṭṭhā dhammasaṅgahaṭṭhakathāyameva (dha. sa. aṭṭha. 160, 248) pakāsitā. Sesānampi vimokkhaṭṭho tattha vuttanayeneva veditabbo. Apicettha paṭipāṭiyā satta appitappitakkhaṇe paccanīkadhammehi vimuccanato ca ārammaṇe ca adhimuccanato vimokkho nāma. Aṭṭhamo pana sabbaso saññāvedayitehi vimuttattā apagatavimokkho nāma. Samādhīsu catukkanayapañcakanayesu paṭhamajjhānasamādhi savitakkasavicāro nāma. Pañcakanaye dutiyajjhānasamādhi avitakkavicāramattasamādhi nāma. Catukkanayepi pañcakanayepi upari tīsu jhānesu samādhi avitakka avicārasamādhi nāma. Samāpattīsu hi paṭipāṭiyā aṭṭhannaṃ samāpattīnaṃ ‘samādhī’tipi nāmaṃ ‘samāpattī’tipi. Kasmā? Cittekaggatāsabbhāvato. Nirodhasamāpattiyā tadabhāvato na samādhīti nāmaṃ.

    হানভাগিযো ধম্মোতি অপ্পগুণেহি পঠমজ্ঝানাদীহি ৰুট্ঠিতস্স সঞ্ঞামনসিকারানং কামাদিঅনুপক্খন্দনং। ৰিসেসভাগিযো ধম্মোতি পগুণেহি পঠমজ্ঝানাদীহি ৰুট্ঠিতস্স সঞ্ঞামনসিকারানং দুতিযজ্ঝানাদিঅনুপক্খন্দনং। ৰোদানম্পি ৰুট্ঠানন্তি ইমিনা পগুণৰোদানং ৰুট্ঠানং নাম কথিতং। হেট্ঠিমং হেট্ঠিমঞ্হি পগুণজ্ঝানং উপরিমস্স উপরিমস্স পদট্ঠানং হোতি। তস্মা ৰোদানম্পি ৰুট্ঠানন্তি ৰুত্তং। তম্হা তম্হা সমাধিম্হা ৰুট্ঠানম্পি ৰুট্ঠানন্তি ইমিনা ভৰঙ্গৰুট্ঠানং নাম কথিতং। ভৰঙ্গেন হি সব্বজ্ঝানেহি ৰুট্ঠানং হোতি। নিরোধতো পন ফলসমাপত্তিযাৰ ৰুট্ঠহন্তি। ইদং পাল়িমুত্তকৰুট্ঠানং নামাতি।

    Hānabhāgiyo dhammoti appaguṇehi paṭhamajjhānādīhi vuṭṭhitassa saññāmanasikārānaṃ kāmādianupakkhandanaṃ. Visesabhāgiyo dhammoti paguṇehi paṭhamajjhānādīhi vuṭṭhitassa saññāmanasikārānaṃ dutiyajjhānādianupakkhandanaṃ. Vodānampi vuṭṭhānanti iminā paguṇavodānaṃ vuṭṭhānaṃ nāma kathitaṃ. Heṭṭhimaṃ heṭṭhimañhi paguṇajjhānaṃ uparimassa uparimassa padaṭṭhānaṃ hoti. Tasmā vodānampi vuṭṭhānanti vuttaṃ. Tamhā tamhā samādhimhā vuṭṭhānampi vuṭṭhānanti iminā bhavaṅgavuṭṭhānaṃ nāma kathitaṃ. Bhavaṅgena hi sabbajjhānehi vuṭṭhānaṃ hoti. Nirodhato pana phalasamāpattiyāva vuṭṭhahanti. Idaṃ pāḷimuttakavuṭṭhānaṃ nāmāti.

    সত্তমবলনিদ্দেসৰণ্ণনা।

    Sattamabalaniddesavaṇṇanā.

    অট্ঠমবলাদিনিদ্দেসো

    Aṭṭhamabalādiniddeso

    ৮২৯. অট্ঠমবলনিদ্দেসে অনেকৰিহিতং পুব্বেনিৰাসন্তিআদি সব্বম্পি ৰিসুদ্ধিমগ্গে ৰিত্থারিতমেৰ। নৰমবলনিদ্দেসেপি দিব্বেন চক্খুনাতিআদি সব্বং তত্থেৰ ৰিত্থারিতং।

    829. Aṭṭhamabalaniddese anekavihitaṃ pubbenivāsantiādi sabbampi visuddhimagge vitthāritameva. Navamabalaniddesepi dibbena cakkhunātiādi sabbaṃ tattheva vitthāritaṃ.

    নৰমবলনিদ্দেসৰণ্ণনা।

    Navamabalaniddesavaṇṇanā.

    দসমবলনিদ্দেসো

    Dasamabalaniddeso

    ৮৩১. দসমবলনিদ্দেসে চেতোৰিমুত্তিন্তি ফলসমাধিং। পঞ্ঞাৰিমুত্তিন্তি ফলঞাণং। সেসং সব্বত্থ উত্তানত্থমেৰ। অযং তাৰেত্থ আচরিযানং সমানত্থকথা। পরৰাদী পনাহ – ‘‘দসবলঞাণং নাম পাটিযেক্কং নত্থি, সব্বঞ্ঞুতঞাণস্সেৰাযং পভেদো’’তি। তং ন তথা দট্ঠব্বং। অঞ্ঞমেৰ হি দসবলঞাণং, অঞ্ঞং সব্বঞ্ঞুতঞাণং। দসবলঞাণঞ্হি সকসককিচ্চমেৰ জানাতি। সব্বঞ্ঞুতঞাণং পন তম্পি ততো অৰসেসম্পি জানাতি। দসবলঞাণেসুপি হি পঠমং কারণাকারণমেৰ জানাতি, দুতিযং কম্মন্তরৰিপাকন্তরমেৰ, ততিযং কম্মপরিচ্ছেদমেৰ, চতুত্থং ধাতুনানত্তকরণমেৰ, পঞ্চমং সত্তানং অজ্ঝাসযাধিমুত্তিমেৰ, ছট্ঠং ইন্দ্রিযানং তিক্খমুদুভাৰমেৰ, সত্তমং ঝানাদীহি সদ্ধিং তেসং সংকিলেসাদিমেৰ, অট্ঠমং পুব্বেনিৰুত্থখন্ধসন্ততিমেৰ, নৰমং সত্তানং চুতিপটিসন্ধিমেৰ, দসমং সচ্চপরিচ্ছেদমেৰ। সব্বঞ্ঞুতঞাণং পন এতেহি জানিতব্বঞ্চ ততো উত্তরিতরঞ্চ পজানাতি। এতেসং পন কিচ্চং ন সব্বং করোতি। তঞ্হি ঝানং হুত্ৰা অপ্পেতুং ন সক্কোতি, ইদ্ধি হুত্ৰা ৰিকুব্বিতুং ন সক্কোতি, মগ্গো হুত্ৰা কিলেসে খেপেতুং ন সক্কোতি।

    831. Dasamabalaniddese cetovimuttinti phalasamādhiṃ. Paññāvimuttinti phalañāṇaṃ. Sesaṃ sabbattha uttānatthameva. Ayaṃ tāvettha ācariyānaṃ samānatthakathā. Paravādī panāha – ‘‘dasabalañāṇaṃ nāma pāṭiyekkaṃ natthi, sabbaññutañāṇassevāyaṃ pabhedo’’ti. Taṃ na tathā daṭṭhabbaṃ. Aññameva hi dasabalañāṇaṃ, aññaṃ sabbaññutañāṇaṃ. Dasabalañāṇañhi sakasakakiccameva jānāti. Sabbaññutañāṇaṃ pana tampi tato avasesampi jānāti. Dasabalañāṇesupi hi paṭhamaṃ kāraṇākāraṇameva jānāti, dutiyaṃ kammantaravipākantarameva, tatiyaṃ kammaparicchedameva, catutthaṃ dhātunānattakaraṇameva, pañcamaṃ sattānaṃ ajjhāsayādhimuttimeva, chaṭṭhaṃ indriyānaṃ tikkhamudubhāvameva, sattamaṃ jhānādīhi saddhiṃ tesaṃ saṃkilesādimeva, aṭṭhamaṃ pubbenivutthakhandhasantatimeva, navamaṃ sattānaṃ cutipaṭisandhimeva, dasamaṃ saccaparicchedameva. Sabbaññutañāṇaṃ pana etehi jānitabbañca tato uttaritarañca pajānāti. Etesaṃ pana kiccaṃ na sabbaṃ karoti. Tañhi jhānaṃ hutvā appetuṃ na sakkoti, iddhi hutvā vikubbituṃ na sakkoti, maggo hutvā kilese khepetuṃ na sakkoti.

    অপিচ পরৰাদী এৰং পুচ্ছিতব্বো – ‘‘দসবলঞাণং নাম এতং সৰিতক্কসৰিচারং, অৰিতক্কৰিচারমত্তং, অৰিতক্কাৰিচারং, কামাৰচরং, রূপাৰচরং, অরূপাৰচরং, লোকিযং, লোকুত্তর’’ন্তি? জানন্তো ‘‘পটিপাটিযা সত্ত ঞাণানি সৰিতক্কসৰিচারানী’’তি ৰক্খতি; ততো ‘‘পরানি দ্ৰে ঞাণানি অৰিতক্কাৰিচারানী’’তি ৰক্খতি; ‘‘আসৰক্খযঞাণং সিযা সৰিতক্কসৰিচারং, সিযা অৰিতক্কৰিচারমত্তং, সিযা অৰিতক্কৰিচার’’ন্তি ৰক্খতি। তথা ‘‘পটিপাটিযা সত্ত কামাৰচরানি, ততো দ্ৰে রূপাৰচরানি, অৰসানে একং লোকুত্তর’’ন্তি ৰক্খতি; ‘‘সব্বঞ্ঞুতঞাণং পন সৰিতক্কসৰিচারমেৰ, কামাৰচরমেৰ, লোকিযমেৰা’’তি ৰক্খতি। ইতি অঞ্ঞদেৰ দসবলঞাণং, অঞ্ঞং সব্বঞ্ঞুতঞাণন্তি।

    Apica paravādī evaṃ pucchitabbo – ‘‘dasabalañāṇaṃ nāma etaṃ savitakkasavicāraṃ, avitakkavicāramattaṃ, avitakkāvicāraṃ, kāmāvacaraṃ, rūpāvacaraṃ, arūpāvacaraṃ, lokiyaṃ, lokuttara’’nti? Jānanto ‘‘paṭipāṭiyā satta ñāṇāni savitakkasavicārānī’’ti vakkhati; tato ‘‘parāni dve ñāṇāni avitakkāvicārānī’’ti vakkhati; ‘‘āsavakkhayañāṇaṃ siyā savitakkasavicāraṃ, siyā avitakkavicāramattaṃ, siyā avitakkavicāra’’nti vakkhati. Tathā ‘‘paṭipāṭiyā satta kāmāvacarāni, tato dve rūpāvacarāni, avasāne ekaṃ lokuttara’’nti vakkhati; ‘‘sabbaññutañāṇaṃ pana savitakkasavicārameva, kāmāvacarameva, lokiyamevā’’ti vakkhati. Iti aññadeva dasabalañāṇaṃ, aññaṃ sabbaññutañāṇanti.

    সম্মোহৰিনোদনিযা ৰিভঙ্গট্ঠকথায

    Sammohavinodaniyā vibhaṅgaṭṭhakathāya

    ঞাণৰিভঙ্গৰণ্ণনা নিট্ঠিতা।

    Ñāṇavibhaṅgavaṇṇanā niṭṭhitā.




    Next: ১৭. খুদ্দকৰত্থুৰিভঙ্গো • 17. Khuddakavatthuvibhaṅgo




    Related texts:



    তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১৬. ঞাণৰিভঙ্গো • 16. Ñāṇavibhaṅgo

    টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ১৬. ঞাণৰিভঙ্গো • 16. Ñāṇavibhaṅgo

    টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ১৬. ঞাণৰিভঙ্গো • 16. Ñāṇavibhaṅgo


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact