| Library / Tipiṭaka / তিপিটক • Tipiṭaka / সম্মোহৰিনোদনী-অট্ঠকথা • Sammohavinodanī-aṭṭhakathā |
(১০.) দসকনিদ্দেসৰণ্ণনা
(10.) Dasakaniddesavaṇṇanā
৯৬৬. দসকনিদ্দেসে কিলেসা এৰ কিলেসৰত্থূনি। আঘাতৰত্থূনি পনেত্থ ‘‘অনত্থং মে অচরী’’তিআদীনং ৰসেন অৰিকোপেতব্বে খাণুকণ্টকাদিম্হিপি অট্ঠানে উপ্পন্নাঘাতেন সদ্ধিং ৰুত্তানি।
966. Dasakaniddese kilesā eva kilesavatthūni. Āghātavatthūni panettha ‘‘anatthaṃ me acarī’’tiādīnaṃ vasena avikopetabbe khāṇukaṇṭakādimhipi aṭṭhāne uppannāghātena saddhiṃ vuttāni.
৯৭০. মিচ্ছত্তেসু মিচ্ছাঞাণন্তি পাপকিরিযাসু উপাযচিন্তাৰসেন পাপং কত্ৰা ‘সুকতং মযা’তি পচ্চৰেক্খণাকারেন উপ্পন্নো মোহো। মিচ্ছাৰিমুত্তীতি অৰিমুত্তস্সেৰ সতো ৰিমুত্তসঞ্ঞিতা। সেসং সব্বত্থ উত্তানত্থমেৰাতি।
970. Micchattesu micchāñāṇanti pāpakiriyāsu upāyacintāvasena pāpaṃ katvā ‘sukataṃ mayā’ti paccavekkhaṇākārena uppanno moho. Micchāvimuttīti avimuttasseva sato vimuttasaññitā. Sesaṃ sabbattha uttānatthamevāti.
দসকনিদ্দেসৰণ্ণনা।
Dasakaniddesavaṇṇanā.
তণ্হাৰিচরিতনিদ্দেসৰণ্ণনা
Taṇhāvicaritaniddesavaṇṇanā
৯৭৩. তণ্হাৰিচরিতনিদ্দেসে তণ্হাৰিচরিতানীতি তণ্হাসমুদাচারা তণ্হাপৰত্তিযো। অজ্ঝত্তিকস্স উপাদাযাতি অজ্ঝত্তিকং খন্ধপঞ্চকং উপাদায। ইদঞ্হি উপযোগত্থে সামিৰচনং। অস্মীতি হোতীতি যদেতং অজ্ঝত্তং খন্ধপঞ্চকং উপাদায তণ্হামানদিট্ঠিৰসেন সমূহগাহতো ‘অস্মী’তি হোতি, তস্মিং সতীতি অত্থো। ইত্থস্মীতি হোতীতিআদীসু পন এৰং সমূহতো ‘অহ’ন্তি গহণে সতি ততো অনুপনিধায চ উপনিধায চাতি দ্ৰিধা গহণং হোতি। তত্থ অনুপনিধাযাতি অঞ্ঞং আকারং অনুপগম্ম সকভাৰমেৰ আরম্মণং কত্ৰা ‘ইত্থস্মী’তি হোতি; খত্তিযাদীসু ‘ইদংপকারো অহ’ন্তি এৰং তণ্হামানদিট্ঠিৰসেন হোতীতি অত্থো। ইদং তাৰ অনুপনিধায গহণং। উপনিধায গহণং পন দুৰিধং হোতি – সমতো চ অসমতো চ। তং দস্সেতুং এৰস্মীতি চ অঞ্ঞথাস্মীতি চ ৰুত্তং। তত্থ এৰস্মীতি ইদং সমতো উপনিধায গহণং; যথা অযং খত্তিযো, যথা অযং ব্রাহ্মণো, এৰং অহম্পীতি অত্থো। অঞ্ঞথাস্মীতি ইদং পন অসমতো গহণং; যথাযং খত্তিযো, যথাযং ব্রাহ্মণো, ততো অঞ্ঞথা অহং হীনো ৰা অধিকো ৰাতি অত্থো। ইমানি তাৰ পচ্চুপ্পন্নৰসেন চত্তারি তণ্হাৰিচরিতানি। ভৰিস্সন্তিআদীনি পন চত্তারি অনাগতৰসেন ৰুত্তানি। সেসং পুরিমচতুক্কে ৰুত্তনযেনেৰ অত্থো ৰেদিতব্বো। অস্মীতি সস্সতো অস্মি। সাতস্মীতি অসস্সতো অস্মি। অসস্মীতি সতস্মীতি ৰা পাঠো। তত্থ অত্থীতি অসং; নিচ্চস্সেতং অধিৰচনং। সীদতীতি সতং; অনিচ্চস্সেতং অধিৰচনং। ইতি ইমানি দ্ৰে সস্সতুচ্ছেদৰসেন ৰুত্তানীতি ৰেদিতব্বানি। ইতো পরানি সিযন্তিআদীনি চত্তারি সংসযপরিৰিতক্কৰসেন ৰুত্তানি। তানি পুরিমচতুক্কে ৰুত্তনযেনেৰ অত্থতো ৰেদিতব্বানি। অপাহং সিযন্তিআদীনি পন চত্তারি ‘‘অপি নামাহং ভৰেয্য’’ন্তি এৰং পত্থনাকপ্পনৰসেন ৰুত্তানি। তানি পুরিমচতুক্কে ৰুত্তনযেনেৰ ৰেদিতব্বানি। এৰমেতেসু –
973. Taṇhāvicaritaniddese taṇhāvicaritānīti taṇhāsamudācārā taṇhāpavattiyo. Ajjhattikassa upādāyāti ajjhattikaṃ khandhapañcakaṃ upādāya. Idañhi upayogatthe sāmivacanaṃ. Asmīti hotīti yadetaṃ ajjhattaṃ khandhapañcakaṃ upādāya taṇhāmānadiṭṭhivasena samūhagāhato ‘asmī’ti hoti, tasmiṃ satīti attho. Itthasmīti hotītiādīsu pana evaṃ samūhato ‘aha’nti gahaṇe sati tato anupanidhāya ca upanidhāya cāti dvidhā gahaṇaṃ hoti. Tattha anupanidhāyāti aññaṃ ākāraṃ anupagamma sakabhāvameva ārammaṇaṃ katvā ‘itthasmī’ti hoti; khattiyādīsu ‘idaṃpakāro aha’nti evaṃ taṇhāmānadiṭṭhivasena hotīti attho. Idaṃ tāva anupanidhāya gahaṇaṃ. Upanidhāya gahaṇaṃ pana duvidhaṃ hoti – samato ca asamato ca. Taṃ dassetuṃ evasmīti ca aññathāsmīti ca vuttaṃ. Tattha evasmīti idaṃ samato upanidhāya gahaṇaṃ; yathā ayaṃ khattiyo, yathā ayaṃ brāhmaṇo, evaṃ ahampīti attho. Aññathāsmīti idaṃ pana asamato gahaṇaṃ; yathāyaṃ khattiyo, yathāyaṃ brāhmaṇo, tato aññathā ahaṃ hīno vā adhiko vāti attho. Imāni tāva paccuppannavasena cattāri taṇhāvicaritāni. Bhavissantiādīni pana cattāri anāgatavasena vuttāni. Sesaṃ purimacatukke vuttanayeneva attho veditabbo. Asmīti sassato asmi. Sātasmīti asassato asmi. Asasmīti satasmīti vā pāṭho. Tattha atthīti asaṃ; niccassetaṃ adhivacanaṃ. Sīdatīti sataṃ; aniccassetaṃ adhivacanaṃ. Iti imāni dve sassatucchedavasena vuttānīti veditabbāni. Ito parāni siyantiādīni cattāri saṃsayaparivitakkavasena vuttāni. Tāni purimacatukke vuttanayeneva atthato veditabbāni. Apāhaṃ siyantiādīni pana cattāri ‘‘api nāmāhaṃ bhaveyya’’nti evaṃ patthanākappanavasena vuttāni. Tāni purimacatukke vuttanayeneva veditabbāni. Evametesu –
দ্ৰে দিট্ঠিসীসা চত্তারো, সুদ্ধসীসা সীসমূলকা।
Dve diṭṭhisīsā cattāro, suddhasīsā sīsamūlakā;
তযো তযোতি এতানি, অট্ঠারস ৰিভাৰযে॥
Tayo tayoti etāni, aṭṭhārasa vibhāvaye.
এতেসু হি সস্সতুচ্ছেদৰসেন ৰুত্তা দ্ৰে দিট্ঠিসীসা নাম। অস্মীতি, ভৰিস্সন্তি, সিযন্তি, অপাহং সিযন্তি এতে চত্তারো সুদ্ধসীসাএৰ। ইত্থস্মীতি আদযো তযো তযোতি দ্ৰাদস সীসমূলকা নামাতি। এৰমেতে দ্ৰে দিট্ঠিসীসা, চত্তারো সুদ্ধসীসা, দ্ৰাদস সীসমূলকাতি অট্ঠারস তণ্হাৰিচরিতধম্মা ৰেদিতব্বা।
Etesu hi sassatucchedavasena vuttā dve diṭṭhisīsā nāma. Asmīti, bhavissanti, siyanti, apāhaṃ siyanti ete cattāro suddhasīsāeva. Itthasmīti ādayo tayo tayoti dvādasa sīsamūlakā nāmāti. Evamete dve diṭṭhisīsā, cattāro suddhasīsā, dvādasa sīsamūlakāti aṭṭhārasa taṇhāvicaritadhammā veditabbā.
৯৭৪. ইদানি পটিপাটিযাৰ তে ধম্মে ভাজেত্ৰা দস্সেতুং কথঞ্চ অস্মীতি হোতীতিআদি আরদ্ধং। তত্থ কঞ্চি ধম্মং অনৰকারিং করিত্ৰাতি রূপৰেদনাদীসু কঞ্চি একধম্মম্পি অৰিনিব্ভোগং কত্ৰা, একেকতো অগ্গহেত্ৰা, সমূহতোৰ গহেত্ৰাতি অত্থো। অস্মীতি ছন্দং পটিলভতীতি পঞ্চক্খন্ধে নিরৰসেসতো গহেত্ৰা ‘অহ’ন্তি তণ্হং পটিলভতি। মানদিট্ঠীসুপি এসেৰ নযো। তত্থ কিঞ্চাপি অযং তণ্হাৰিচরিতনিদ্দেসো, মানদিট্ঠিযো পন ন ৰিনা তণ্হায, তস্মা তদেকট্ঠৰসেন ইধ ৰুত্তা। তণ্হাসীসেন ৰা পপঞ্চত্তযম্পি উদ্দিট্ঠং। তং উদ্দেসানুরূপেনেৰ নিদ্দিসিতুম্পি মানদিট্ঠিযো গহিতা। তণ্হাপপঞ্চং ৰা দস্সেন্তো তেনেৰ সদ্ধিং সেসপপঞ্চেপি দস্সেতুং এৰমাহ।
974. Idāni paṭipāṭiyāva te dhamme bhājetvā dassetuṃ kathañca asmīti hotītiādi āraddhaṃ. Tattha kañci dhammaṃ anavakāriṃ karitvāti rūpavedanādīsu kañci ekadhammampi avinibbhogaṃ katvā, ekekato aggahetvā, samūhatova gahetvāti attho. Asmīti chandaṃ paṭilabhatīti pañcakkhandhe niravasesato gahetvā ‘aha’nti taṇhaṃ paṭilabhati. Mānadiṭṭhīsupi eseva nayo. Tattha kiñcāpi ayaṃ taṇhāvicaritaniddeso, mānadiṭṭhiyo pana na vinā taṇhāya, tasmā tadekaṭṭhavasena idha vuttā. Taṇhāsīsena vā papañcattayampi uddiṭṭhaṃ. Taṃ uddesānurūpeneva niddisitumpi mānadiṭṭhiyo gahitā. Taṇhāpapañcaṃ vā dassento teneva saddhiṃ sesapapañcepi dassetuṃ evamāha.
তস্মিং সতি ইমানি পপঞ্চিতানীতি তস্মিং ‘‘অস্মীতি ছন্দং পটিলভতী’’তিআদিনা নযেন ৰুত্তে পপঞ্চত্তযে সতি পুন ইমানি ‘‘ইত্থস্মীতি ৰা’’তিআদীনি পপঞ্চিতানি হোন্তীতি অত্থো।
Tasmiṃ sati imāni papañcitānīti tasmiṃ ‘‘asmīti chandaṃ paṭilabhatī’’tiādinā nayena vutte papañcattaye sati puna imāni ‘‘itthasmīti vā’’tiādīni papañcitāni hontīti attho.
খত্তিযোস্মীতিআদীসু অভিসেকসেনামচ্চাদিনা ‘খত্তিযো অহং’, মন্তজ্ঝেন পোরোহিচ্চাদিনা ‘ব্রাহ্মণো অহং’, কসিগোরক্খাদিনা ‘ৰেস্সো অহং’, অসিতব্যাভঙ্গিতায ‘সুদ্দো অহং’ , গিহিব্যঞ্জনেন ‘গহট্ঠো অহ’ন্তি ইমিনা নযেন অত্থো ৰেদিতব্বো। এৰং ইত্থস্মীতি হোতীতি এৰং খত্তিযাদীসু খত্তিযাদিপ্পকারং অত্তনি উপ্পাদযিত্ৰা ‘ইত্থংপকারো অহ’ন্তি হোতি।
Khattiyosmītiādīsu abhisekasenāmaccādinā ‘khattiyo ahaṃ’, mantajjhena porohiccādinā ‘brāhmaṇo ahaṃ’, kasigorakkhādinā ‘vesso ahaṃ’, asitabyābhaṅgitāya ‘suddo ahaṃ’ , gihibyañjanena ‘gahaṭṭho aha’nti iminā nayena attho veditabbo. Evaṃ itthasmīti hotīti evaṃ khattiyādīsu khattiyādippakāraṃ attani uppādayitvā ‘itthaṃpakāro aha’nti hoti.
যথা সো খত্তিযোতিআদীসু ‘যথা সো অভিসেকসেনামচ্চাদিনা খত্তিযো, তথা ‘অহম্পি খত্তিযো’তি ইমিনা নযেন অত্থো ৰেদিতব্বো। দুতিযনযে ‘যথা সো অভিসেকসেনামচ্চাদিনা খত্তিযো, নাহং তথা খত্তিযো; অহং পন ততো হীনো ৰা সেট্ঠো ৰা’তি ইমিনা নযেন অত্থো ৰেদিতব্বো। ভৰিস্সন্তিআদিনিদ্দেসাদীসুপি এসেৰ নযো।
Yathā so khattiyotiādīsu ‘yathā so abhisekasenāmaccādinā khattiyo, tathā ‘ahampi khattiyo’ti iminā nayena attho veditabbo. Dutiyanaye ‘yathā so abhisekasenāmaccādinā khattiyo, nāhaṃ tathā khattiyo; ahaṃ pana tato hīno vā seṭṭho vā’ti iminā nayena attho veditabbo. Bhavissantiādiniddesādīsupi eseva nayo.
৯৭৫. এৰং অজ্ঝত্তিকস্স উপাদায তণ্হাৰিচরিতানি ভাজেত্ৰা ইদানি বাহিরস্স উপাদায তণ্হাৰিচরিতানি ভাজেতুং তত্থ কতমানীতিআদিমাহ। তত্থ বাহিরস্স উপাদাযাতি বাহিরং খন্ধপঞ্চকং উপাদায। ইদম্পি হি উপযোগত্থে সামিৰচনং। ইমিনাতি ইমিনা রূপেন ৰা…পে॰… ৰিঞ্ঞাণেন ৰা। অৰসেসং পন উদ্দেসৰারে তাৰ ৰুত্তনযেনেৰ ৰেদিতব্বং।
975. Evaṃ ajjhattikassa upādāya taṇhāvicaritāni bhājetvā idāni bāhirassa upādāya taṇhāvicaritāni bhājetuṃ tattha katamānītiādimāha. Tattha bāhirassa upādāyāti bāhiraṃ khandhapañcakaṃ upādāya. Idampi hi upayogatthe sāmivacanaṃ. Imināti iminā rūpena vā…pe… viññāṇena vā. Avasesaṃ pana uddesavāre tāva vuttanayeneva veditabbaṃ.
৯৭৬. নিদ্দেসৰারে পন অৰকারিং করিত্ৰাতি ৰিনিব্ভোগং কত্ৰা। ইমিনা অস্মীতি ছন্দং পটিলভতীতিআদীসু ইমিনা রূপেন ৰা…পে॰… ৰিঞ্ঞাণেন ৰাতি এৰং পঞ্চক্খন্ধে একদেসতো গহেত্ৰা ইমিনা ‘অহ’ন্তি ছন্দাদীনি পটিলভতীতি এৰমত্থো ৰেদিতব্বো।
976. Niddesavāre pana avakāriṃ karitvāti vinibbhogaṃ katvā. Iminā asmīti chandaṃ paṭilabhatītiādīsu iminā rūpena vā…pe… viññāṇena vāti evaṃ pañcakkhandhe ekadesato gahetvā iminā ‘aha’nti chandādīni paṭilabhatīti evamattho veditabbo.
ইমিনা খত্তিযোস্মীতিআদীসু ‘ইমিনা ছত্তেন ৰা খগ্গেন ৰা অভিসেকসেনামচ্চাদিনা ৰা খত্তিযো অহ’ন্তি এৰং পুরিমনযেনেৰ অত্থো ৰেদিতব্বো। ইমিনাতি পদমত্তমেৰ হেত্থ ৰিসেসো।
Iminā khattiyosmītiādīsu ‘iminā chattena vā khaggena vā abhisekasenāmaccādinā vā khattiyo aha’nti evaṃ purimanayeneva attho veditabbo. Imināti padamattameva hettha viseso.
যথা সো খত্তিযোতিআদীসুপি ইমিনাতি ৰুত্তপদমেৰ ৰিসেসো। তস্মা তস্স ৰসেন যথা খত্তিযো, এৰং অহম্পি ইমিনা খগ্গেন ৰা ছত্তেন ৰা অভিসেকসেনামচ্চাদিনা ৰা খত্তিযোতি এৰং যোজেত্ৰা সব্বপদেসু অত্থো ৰেদিতব্বো। ইমিনা নিচ্চোস্মীতি পঞ্চক্খন্ধে অনৰকারিং কত্ৰা রূপাদীসু একমেৰ ধম্মং ‘অহ’ন্তি গহেত্ৰা ‘ইমিনা খগ্গেন ৰা ছত্তেন ৰা অহং নিচ্চো ধুৰো’তি মঞ্ঞতি। উচ্ছেদদিট্ঠিযম্পি এসেৰ নযো। সেসং সব্বত্থ ৰুত্তনযেনেৰ ৰেদিতব্বং।
Yathā so khattiyotiādīsupi imināti vuttapadameva viseso. Tasmā tassa vasena yathā khattiyo, evaṃ ahampi iminā khaggena vā chattena vā abhisekasenāmaccādinā vā khattiyoti evaṃ yojetvā sabbapadesu attho veditabbo. Iminā niccosmīti pañcakkhandhe anavakāriṃ katvā rūpādīsu ekameva dhammaṃ ‘aha’nti gahetvā ‘iminā khaggena vā chattena vā ahaṃ nicco dhuvo’ti maññati. Ucchedadiṭṭhiyampi eseva nayo. Sesaṃ sabbattha vuttanayeneva veditabbaṃ.
ইতি এৰরূপানি অতীতানি ছত্তিংসাতি একেকস্স পুগ্গলস্স অতীতে ছত্তিংস। অনাগতানি ছত্তিংসাতি একেকস্সেৰ অনাগতে ছত্তিংস। পচ্চুপ্পন্নানি ছত্তিংসাতি একেকস্স ৰা পুগ্গলস্স যথালাভৰসেন বহুনং ৰা পচ্চুপ্পন্নে ছত্তিংস। সব্বসত্তানং পন একংসেনেৰ অতীতে ছত্তিংস, অনাগতে ছত্তিংস, পচ্চুপ্পন্নে ছত্তিংসাতি ৰেদিতব্বানি। অনন্তা হি অসদিসতণ্হামানদিট্ঠিভেদা সত্তা। অট্ঠতণ্হাৰিচরিতসতং হোতীতি এত্থ পন অট্ঠসতসঙ্খাতং তণ্হাৰিচরিতং হোতীতি এৰমত্থো দট্ঠব্বো। সেসং সব্বত্থ উত্তানত্থমেৰাতি।
Iti evarūpāni atītāni chattiṃsāti ekekassa puggalassa atīte chattiṃsa. Anāgatāni chattiṃsāti ekekasseva anāgate chattiṃsa. Paccuppannāni chattiṃsāti ekekassa vā puggalassa yathālābhavasena bahunaṃ vā paccuppanne chattiṃsa. Sabbasattānaṃ pana ekaṃseneva atīte chattiṃsa, anāgate chattiṃsa, paccuppanne chattiṃsāti veditabbāni. Anantā hi asadisataṇhāmānadiṭṭhibhedā sattā. Aṭṭhataṇhāvicaritasataṃ hotīti ettha pana aṭṭhasatasaṅkhātaṃ taṇhāvicaritaṃ hotīti evamattho daṭṭhabbo. Sesaṃ sabbattha uttānatthamevāti.
তণ্হাৰিচরিতনিদ্দেসৰণ্ণনা।
Taṇhāvicaritaniddesavaṇṇanā.
দিট্ঠিগতনিদ্দেসৰণ্ণনা
Diṭṭhigataniddesavaṇṇanā
৯৭৭. দিট্ঠিগতনিদ্দেসে ব্রহ্মজালে ৰেয্যাকরণেতি ব্রহ্মজালনামকে ৰেয্যাকরণে, দীঘনিকাযস্স পঠমসুত্তন্তে। ৰুত্তানি ভগৰতাতি সত্থারা সযং আহচ্চ ভাসিতানি। চত্তারো সস্সতৰাদাতিআদীসু ‘‘তে চ ভোন্তো সমণব্রাহ্মণা কিমাগম্ম কিমারব্ভ সস্সতৰাদা সস্সতং অত্তানঞ্চ লোকঞ্চ পঞ্ঞাপেন্তি চতূহি ৰত্থূহী’’তিআদিনা (দী॰ নি॰ ১.২৯-৩০) ব্রহ্মজালে ৰুত্তনযেনেৰ পভেদো চ অত্থো চ ৰেদিতব্বোতি।
977. Diṭṭhigataniddese brahmajāle veyyākaraṇeti brahmajālanāmake veyyākaraṇe, dīghanikāyassa paṭhamasuttante. Vuttāni bhagavatāti satthārā sayaṃ āhacca bhāsitāni. Cattāro sassatavādātiādīsu ‘‘te ca bhonto samaṇabrāhmaṇā kimāgamma kimārabbha sassatavādā sassataṃ attānañca lokañca paññāpenti catūhi vatthūhī’’tiādinā (dī. ni. 1.29-30) brahmajāle vuttanayeneva pabhedo ca attho ca veditabboti.
সম্মোহৰিনোদনিযা ৰিভঙ্গট্ঠকথায
Sammohavinodaniyā vibhaṅgaṭṭhakathāya
খুদ্দকৰত্থুৰিভঙ্গৰণ্ণনা নিট্ঠিতা।
Khuddakavatthuvibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১৭. খুদ্দকৰত্থুৰিভঙ্গো • 17. Khuddakavatthuvibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ১৭. খুদ্দকৰত্থুৰিভঙ্গো • 17. Khuddakavatthuvibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ১৭. খুদ্দকৰত্থুৰিভঙ্গো • 17. Khuddakavatthuvibhaṅgo
