| Library / Tipiṭaka / ติปิฎก • Tipiṭaka / สโมฺมหวิโนทนี-อฎฺฐกถา • Sammohavinodanī-aṭṭhakathā |
(๑๐.) ทสกนิเทฺทสวณฺณนา
(10.) Dasakaniddesavaṇṇanā
๙๖๖. ทสกนิเทฺทเส กิเลสา เอว กิเลสวตฺถูนิฯ อาฆาตวตฺถูนิ ปเนตฺถ ‘‘อนตฺถํ เม อจรี’’ติอาทีนํ วเสน อวิโกเปตเพฺพ ขาณุกณฺฎกาทิมฺหิปิ อฎฺฐาเน อุปฺปนฺนาฆาเตน สทฺธิํ วุตฺตานิฯ
966. Dasakaniddese kilesā eva kilesavatthūni. Āghātavatthūni panettha ‘‘anatthaṃ me acarī’’tiādīnaṃ vasena avikopetabbe khāṇukaṇṭakādimhipi aṭṭhāne uppannāghātena saddhiṃ vuttāni.
๙๗๐. มิจฺฉเตฺตสุ มิจฺฉาญาณนฺติ ปาปกิริยาสุ อุปายจินฺตาวเสน ปาปํ กตฺวา ‘สุกตํ มยา’ติ ปจฺจเวกฺขณากาเรน อุปฺปโนฺน โมโหฯ มิจฺฉาวิมุตฺตีติ อวิมุตฺตเสฺสว สโต วิมุตฺตสญฺญิตาฯ เสสํ สพฺพตฺถ อุตฺตานตฺถเมวาติฯ
970. Micchattesu micchāñāṇanti pāpakiriyāsu upāyacintāvasena pāpaṃ katvā ‘sukataṃ mayā’ti paccavekkhaṇākārena uppanno moho. Micchāvimuttīti avimuttasseva sato vimuttasaññitā. Sesaṃ sabbattha uttānatthamevāti.
ทสกนิเทฺทสวณฺณนาฯ
Dasakaniddesavaṇṇanā.
ตณฺหาวิจริตนิเทฺทสวณฺณนา
Taṇhāvicaritaniddesavaṇṇanā
๙๗๓. ตณฺหาวิจริตนิเทฺทเส ตณฺหาวิจริตานีติ ตณฺหาสมุทาจารา ตณฺหาปวตฺติโยฯ อชฺฌตฺติกสฺส อุปาทายาติ อชฺฌตฺติกํ ขนฺธปญฺจกํ อุปาทายฯ อิทญฺหิ อุปโยคเตฺถ สามิวจนํฯ อสฺมีติ โหตีติ ยเทตํ อชฺฌตฺตํ ขนฺธปญฺจกํ อุปาทาย ตณฺหามานทิฎฺฐิวเสน สมูหคาหโต ‘อสฺมี’ติ โหติ, ตสฺมิํ สตีติ อโตฺถฯ อิตฺถสฺมีติ โหตีติอาทีสุ ปน เอวํ สมูหโต ‘อห’นฺติ คหเณ สติ ตโต อนุปนิธาย จ อุปนิธาย จาติ ทฺวิธา คหณํ โหติฯ ตตฺถ อนุปนิธายาติ อญฺญํ อาการํ อนุปคมฺม สกภาวเมว อารมฺมณํ กตฺวา ‘อิตฺถสฺมี’ติ โหติ; ขตฺติยาทีสุ ‘อิทํปกาโร อห’นฺติ เอวํ ตณฺหามานทิฎฺฐิวเสน โหตีติ อโตฺถฯ อิทํ ตาว อนุปนิธาย คหณํฯ อุปนิธาย คหณํ ปน ทุวิธํ โหติ – สมโต จ อสมโต จฯ ตํ ทเสฺสตุํ เอวสฺมีติ จ อญฺญถาสฺมีติ จ วุตฺตํฯ ตตฺถ เอวสฺมีติ อิทํ สมโต อุปนิธาย คหณํ; ยถา อยํ ขตฺติโย, ยถา อยํ พฺราหฺมโณ, เอวํ อหมฺปีติ อโตฺถฯ อญฺญถาสฺมีติ อิทํ ปน อสมโต คหณํ; ยถายํ ขตฺติโย, ยถายํ พฺราหฺมโณ, ตโต อญฺญถา อหํ หีโน วา อธิโก วาติ อโตฺถฯ อิมานิ ตาว ปจฺจุปฺปนฺนวเสน จตฺตาริ ตณฺหาวิจริตานิฯ ภวิสฺสนฺติอาทีนิ ปน จตฺตาริ อนาคตวเสน วุตฺตานิฯ เสสํ ปุริมจตุเกฺก วุตฺตนเยเนว อโตฺถ เวทิตโพฺพฯ อสฺมีติ สสฺสโต อสฺมิฯ สาตสฺมีติ อสสฺสโต อสฺมิฯ อสสฺมีติ สตสฺมีติ วา ปาโฐฯ ตตฺถ อตฺถีติ อสํ; นิจฺจเสฺสตํ อธิวจนํฯ สีทตีติ สตํ; อนิจฺจเสฺสตํ อธิวจนํฯ อิติ อิมานิ เทฺว สสฺสตุเจฺฉทวเสน วุตฺตานีติ เวทิตพฺพานิฯ อิโต ปรานิ สิยนฺติอาทีนิ จตฺตาริ สํสยปริวิตกฺกวเสน วุตฺตานิฯ ตานิ ปุริมจตุเกฺก วุตฺตนเยเนว อตฺถโต เวทิตพฺพานิฯ อปาหํ สิยนฺติอาทีนิ ปน จตฺตาริ ‘‘อปิ นามาหํ ภเวยฺย’’นฺติ เอวํ ปตฺถนากปฺปนวเสน วุตฺตานิฯ ตานิ ปุริมจตุเกฺก วุตฺตนเยเนว เวทิตพฺพานิฯ เอวเมเตสุ –
973. Taṇhāvicaritaniddese taṇhāvicaritānīti taṇhāsamudācārā taṇhāpavattiyo. Ajjhattikassa upādāyāti ajjhattikaṃ khandhapañcakaṃ upādāya. Idañhi upayogatthe sāmivacanaṃ. Asmīti hotīti yadetaṃ ajjhattaṃ khandhapañcakaṃ upādāya taṇhāmānadiṭṭhivasena samūhagāhato ‘asmī’ti hoti, tasmiṃ satīti attho. Itthasmīti hotītiādīsu pana evaṃ samūhato ‘aha’nti gahaṇe sati tato anupanidhāya ca upanidhāya cāti dvidhā gahaṇaṃ hoti. Tattha anupanidhāyāti aññaṃ ākāraṃ anupagamma sakabhāvameva ārammaṇaṃ katvā ‘itthasmī’ti hoti; khattiyādīsu ‘idaṃpakāro aha’nti evaṃ taṇhāmānadiṭṭhivasena hotīti attho. Idaṃ tāva anupanidhāya gahaṇaṃ. Upanidhāya gahaṇaṃ pana duvidhaṃ hoti – samato ca asamato ca. Taṃ dassetuṃ evasmīti ca aññathāsmīti ca vuttaṃ. Tattha evasmīti idaṃ samato upanidhāya gahaṇaṃ; yathā ayaṃ khattiyo, yathā ayaṃ brāhmaṇo, evaṃ ahampīti attho. Aññathāsmīti idaṃ pana asamato gahaṇaṃ; yathāyaṃ khattiyo, yathāyaṃ brāhmaṇo, tato aññathā ahaṃ hīno vā adhiko vāti attho. Imāni tāva paccuppannavasena cattāri taṇhāvicaritāni. Bhavissantiādīni pana cattāri anāgatavasena vuttāni. Sesaṃ purimacatukke vuttanayeneva attho veditabbo. Asmīti sassato asmi. Sātasmīti asassato asmi. Asasmīti satasmīti vā pāṭho. Tattha atthīti asaṃ; niccassetaṃ adhivacanaṃ. Sīdatīti sataṃ; aniccassetaṃ adhivacanaṃ. Iti imāni dve sassatucchedavasena vuttānīti veditabbāni. Ito parāni siyantiādīni cattāri saṃsayaparivitakkavasena vuttāni. Tāni purimacatukke vuttanayeneva atthato veditabbāni. Apāhaṃ siyantiādīni pana cattāri ‘‘api nāmāhaṃ bhaveyya’’nti evaṃ patthanākappanavasena vuttāni. Tāni purimacatukke vuttanayeneva veditabbāni. Evametesu –
เทฺว ทิฎฺฐิสีสา จตฺตาโร, สุทฺธสีสา สีสมูลกา;
Dve diṭṭhisīsā cattāro, suddhasīsā sīsamūlakā;
ตโย ตโยติ เอตานิ, อฎฺฐารส วิภาวเยฯ
Tayo tayoti etāni, aṭṭhārasa vibhāvaye.
เอเตสุ หิ สสฺสตุเจฺฉทวเสน วุตฺตา เทฺว ทิฎฺฐิสีสา นามฯ อสฺมีติ, ภวิสฺสนฺติ, สิยนฺติ, อปาหํ สิยนฺติ เอเต จตฺตาโร สุทฺธสีสาเอวฯ อิตฺถสฺมีติ อาทโย ตโย ตโยติ ทฺวาทส สีสมูลกา นามาติฯ เอวเมเต เทฺว ทิฎฺฐิสีสา, จตฺตาโร สุทฺธสีสา, ทฺวาทส สีสมูลกาติ อฎฺฐารส ตณฺหาวิจริตธมฺมา เวทิตพฺพาฯ
Etesu hi sassatucchedavasena vuttā dve diṭṭhisīsā nāma. Asmīti, bhavissanti, siyanti, apāhaṃ siyanti ete cattāro suddhasīsāeva. Itthasmīti ādayo tayo tayoti dvādasa sīsamūlakā nāmāti. Evamete dve diṭṭhisīsā, cattāro suddhasīsā, dvādasa sīsamūlakāti aṭṭhārasa taṇhāvicaritadhammā veditabbā.
๙๗๔. อิทานิ ปฎิปาฎิยาว เต ธเมฺม ภาเชตฺวา ทเสฺสตุํ กถญฺจ อสฺมีติ โหตีติอาทิ อารทฺธํฯ ตตฺถ กญฺจิ ธมฺมํ อนวการิํ กริตฺวาติ รูปเวทนาทีสุ กญฺจิ เอกธมฺมมฺปิ อวินิโพฺภคํ กตฺวา, เอเกกโต อคฺคเหตฺวา, สมูหโตว คเหตฺวาติ อโตฺถฯ อสฺมีติ ฉนฺทํ ปฎิลภตีติ ปญฺจกฺขเนฺธ นิรวเสสโต คเหตฺวา ‘อห’นฺติ ตณฺหํ ปฎิลภติฯ มานทิฎฺฐีสุปิ เอเสว นโยฯ ตตฺถ กิญฺจาปิ อยํ ตณฺหาวิจริตนิเทฺทโส, มานทิฎฺฐิโย ปน น วินา ตณฺหาย, ตสฺมา ตเทกฎฺฐวเสน อิธ วุตฺตาฯ ตณฺหาสีเสน วา ปปญฺจตฺตยมฺปิ อุทฺทิฎฺฐํฯ ตํ อุเทฺทสานุรูเปเนว นิทฺทิสิตุมฺปิ มานทิฎฺฐิโย คหิตาฯ ตณฺหาปปญฺจํ วา ทเสฺสโนฺต เตเนว สทฺธิํ เสสปปเญฺจปิ ทเสฺสตุํ เอวมาหฯ
974. Idāni paṭipāṭiyāva te dhamme bhājetvā dassetuṃ kathañca asmīti hotītiādi āraddhaṃ. Tattha kañci dhammaṃ anavakāriṃ karitvāti rūpavedanādīsu kañci ekadhammampi avinibbhogaṃ katvā, ekekato aggahetvā, samūhatova gahetvāti attho. Asmīti chandaṃ paṭilabhatīti pañcakkhandhe niravasesato gahetvā ‘aha’nti taṇhaṃ paṭilabhati. Mānadiṭṭhīsupi eseva nayo. Tattha kiñcāpi ayaṃ taṇhāvicaritaniddeso, mānadiṭṭhiyo pana na vinā taṇhāya, tasmā tadekaṭṭhavasena idha vuttā. Taṇhāsīsena vā papañcattayampi uddiṭṭhaṃ. Taṃ uddesānurūpeneva niddisitumpi mānadiṭṭhiyo gahitā. Taṇhāpapañcaṃ vā dassento teneva saddhiṃ sesapapañcepi dassetuṃ evamāha.
ตสฺมิํ สติ อิมานิ ปปญฺจิตานีติ ตสฺมิํ ‘‘อสฺมีติ ฉนฺทํ ปฎิลภตี’’ติอาทินา นเยน วุเตฺต ปปญฺจตฺตเย สติ ปุน อิมานิ ‘‘อิตฺถสฺมีติ วา’’ติอาทีนิ ปปญฺจิตานิ โหนฺตีติ อโตฺถฯ
Tasmiṃ sati imāni papañcitānīti tasmiṃ ‘‘asmīti chandaṃ paṭilabhatī’’tiādinā nayena vutte papañcattaye sati puna imāni ‘‘itthasmīti vā’’tiādīni papañcitāni hontīti attho.
ขตฺติโยสฺมีติอาทีสุ อภิเสกเสนามจฺจาทินา ‘ขตฺติโย อหํ’, มนฺตเชฺฌน โปโรหิจฺจาทินา ‘พฺราหฺมโณ อหํ’, กสิโครกฺขาทินา ‘เวโสฺส อหํ’, อสิตพฺยาภงฺคิตาย ‘สุโทฺท อหํ’ , คิหิพฺยญฺชเนน ‘คหโฎฺฐ อห’นฺติ อิมินา นเยน อโตฺถ เวทิตโพฺพฯ เอวํ อิตฺถสฺมีติ โหตีติ เอวํ ขตฺติยาทีสุ ขตฺติยาทิปฺปการํ อตฺตนิ อุปฺปาทยิตฺวา ‘อิตฺถํปกาโร อห’นฺติ โหติฯ
Khattiyosmītiādīsu abhisekasenāmaccādinā ‘khattiyo ahaṃ’, mantajjhena porohiccādinā ‘brāhmaṇo ahaṃ’, kasigorakkhādinā ‘vesso ahaṃ’, asitabyābhaṅgitāya ‘suddo ahaṃ’ , gihibyañjanena ‘gahaṭṭho aha’nti iminā nayena attho veditabbo. Evaṃ itthasmīti hotīti evaṃ khattiyādīsu khattiyādippakāraṃ attani uppādayitvā ‘itthaṃpakāro aha’nti hoti.
ยถา โส ขตฺติโยติอาทีสุ ‘ยถา โส อภิเสกเสนามจฺจาทินา ขตฺติโย, ตถา ‘อหมฺปิ ขตฺติโย’ติ อิมินา นเยน อโตฺถ เวทิตโพฺพฯ ทุติยนเย ‘ยถา โส อภิเสกเสนามจฺจาทินา ขตฺติโย, นาหํ ตถา ขตฺติโย; อหํ ปน ตโต หีโน วา เสโฎฺฐ วา’ติ อิมินา นเยน อโตฺถ เวทิตโพฺพฯ ภวิสฺสนฺติอาทินิเทฺทสาทีสุปิ เอเสว นโยฯ
Yathā so khattiyotiādīsu ‘yathā so abhisekasenāmaccādinā khattiyo, tathā ‘ahampi khattiyo’ti iminā nayena attho veditabbo. Dutiyanaye ‘yathā so abhisekasenāmaccādinā khattiyo, nāhaṃ tathā khattiyo; ahaṃ pana tato hīno vā seṭṭho vā’ti iminā nayena attho veditabbo. Bhavissantiādiniddesādīsupi eseva nayo.
๙๗๕. เอวํ อชฺฌตฺติกสฺส อุปาทาย ตณฺหาวิจริตานิ ภาเชตฺวา อิทานิ พาหิรสฺส อุปาทาย ตณฺหาวิจริตานิ ภาเชตุํ ตตฺถ กตมานีติอาทิมาหฯ ตตฺถ พาหิรสฺส อุปาทายาติ พาหิรํ ขนฺธปญฺจกํ อุปาทายฯ อิทมฺปิ หิ อุปโยคเตฺถ สามิวจนํฯ อิมินาติ อิมินา รูเปน วา…เป.… วิญฺญาเณน วาฯ อวเสสํ ปน อุเทฺทสวาเร ตาว วุตฺตนเยเนว เวทิตพฺพํฯ
975. Evaṃ ajjhattikassa upādāya taṇhāvicaritāni bhājetvā idāni bāhirassa upādāya taṇhāvicaritāni bhājetuṃ tattha katamānītiādimāha. Tattha bāhirassa upādāyāti bāhiraṃ khandhapañcakaṃ upādāya. Idampi hi upayogatthe sāmivacanaṃ. Imināti iminā rūpena vā…pe… viññāṇena vā. Avasesaṃ pana uddesavāre tāva vuttanayeneva veditabbaṃ.
๙๗๖. นิเทฺทสวาเร ปน อวการิํ กริตฺวาติ วินิโพฺภคํ กตฺวาฯ อิมินา อสฺมีติ ฉนฺทํ ปฎิลภตีติอาทีสุ อิมินา รูเปน วา…เป.… วิญฺญาเณน วาติ เอวํ ปญฺจกฺขเนฺธ เอกเทสโต คเหตฺวา อิมินา ‘อห’นฺติ ฉนฺทาทีนิ ปฎิลภตีติ เอวมโตฺถ เวทิตโพฺพฯ
976. Niddesavāre pana avakāriṃ karitvāti vinibbhogaṃ katvā. Iminā asmīti chandaṃ paṭilabhatītiādīsu iminā rūpena vā…pe… viññāṇena vāti evaṃ pañcakkhandhe ekadesato gahetvā iminā ‘aha’nti chandādīni paṭilabhatīti evamattho veditabbo.
อิมินา ขตฺติโยสฺมีติอาทีสุ ‘อิมินา ฉเตฺตน วา ขเคฺคน วา อภิเสกเสนามจฺจาทินา วา ขตฺติโย อห’นฺติ เอวํ ปุริมนเยเนว อโตฺถ เวทิตโพฺพฯ อิมินาติ ปทมตฺตเมว เหตฺถ วิเสโสฯ
Iminā khattiyosmītiādīsu ‘iminā chattena vā khaggena vā abhisekasenāmaccādinā vā khattiyo aha’nti evaṃ purimanayeneva attho veditabbo. Imināti padamattameva hettha viseso.
ยถา โส ขตฺติโยติอาทีสุปิ อิมินาติ วุตฺตปทเมว วิเสโสฯ ตสฺมา ตสฺส วเสน ยถา ขตฺติโย, เอวํ อหมฺปิ อิมินา ขเคฺคน วา ฉเตฺตน วา อภิเสกเสนามจฺจาทินา วา ขตฺติโยติ เอวํ โยเชตฺวา สพฺพปเทสุ อโตฺถ เวทิตโพฺพฯ อิมินา นิโจฺจสฺมีติ ปญฺจกฺขเนฺธ อนวการิํ กตฺวา รูปาทีสุ เอกเมว ธมฺมํ ‘อห’นฺติ คเหตฺวา ‘อิมินา ขเคฺคน วา ฉเตฺตน วา อหํ นิโจฺจ ธุโว’ติ มญฺญติฯ อุเจฺฉททิฎฺฐิยมฺปิ เอเสว นโยฯ เสสํ สพฺพตฺถ วุตฺตนเยเนว เวทิตพฺพํฯ
Yathā so khattiyotiādīsupi imināti vuttapadameva viseso. Tasmā tassa vasena yathā khattiyo, evaṃ ahampi iminā khaggena vā chattena vā abhisekasenāmaccādinā vā khattiyoti evaṃ yojetvā sabbapadesu attho veditabbo. Iminā niccosmīti pañcakkhandhe anavakāriṃ katvā rūpādīsu ekameva dhammaṃ ‘aha’nti gahetvā ‘iminā khaggena vā chattena vā ahaṃ nicco dhuvo’ti maññati. Ucchedadiṭṭhiyampi eseva nayo. Sesaṃ sabbattha vuttanayeneva veditabbaṃ.
อิติ เอวรูปานิ อตีตานิ ฉตฺติํสาติ เอเกกสฺส ปุคฺคลสฺส อตีเต ฉตฺติํสฯ อนาคตานิ ฉตฺติํสาติ เอเกกเสฺสว อนาคเต ฉตฺติํสฯ ปจฺจุปฺปนฺนานิ ฉตฺติํสาติ เอเกกสฺส วา ปุคฺคลสฺส ยถาลาภวเสน พหุนํ วา ปจฺจุปฺปเนฺน ฉตฺติํสฯ สพฺพสตฺตานํ ปน เอกํเสเนว อตีเต ฉตฺติํส, อนาคเต ฉตฺติํส, ปจฺจุปฺปเนฺน ฉตฺติํสาติ เวทิตพฺพานิฯ อนนฺตา หิ อสทิสตณฺหามานทิฎฺฐิเภทา สตฺตาฯ อฎฺฐตณฺหาวิจริตสตํ โหตีติ เอตฺถ ปน อฎฺฐสตสงฺขาตํ ตณฺหาวิจริตํ โหตีติ เอวมโตฺถ ทฎฺฐโพฺพฯ เสสํ สพฺพตฺถ อุตฺตานตฺถเมวาติฯ
Iti evarūpāni atītāni chattiṃsāti ekekassa puggalassa atīte chattiṃsa. Anāgatāni chattiṃsāti ekekasseva anāgate chattiṃsa. Paccuppannāni chattiṃsāti ekekassa vā puggalassa yathālābhavasena bahunaṃ vā paccuppanne chattiṃsa. Sabbasattānaṃ pana ekaṃseneva atīte chattiṃsa, anāgate chattiṃsa, paccuppanne chattiṃsāti veditabbāni. Anantā hi asadisataṇhāmānadiṭṭhibhedā sattā. Aṭṭhataṇhāvicaritasataṃ hotīti ettha pana aṭṭhasatasaṅkhātaṃ taṇhāvicaritaṃ hotīti evamattho daṭṭhabbo. Sesaṃ sabbattha uttānatthamevāti.
ตณฺหาวิจริตนิเทฺทสวณฺณนาฯ
Taṇhāvicaritaniddesavaṇṇanā.
ทิฎฺฐิคตนิเทฺทสวณฺณนา
Diṭṭhigataniddesavaṇṇanā
๙๗๗. ทิฎฺฐิคตนิเทฺทเส พฺรหฺมชาเล เวยฺยากรเณติ พฺรหฺมชาลนามเก เวยฺยากรเณ, ทีฆนิกายสฺส ปฐมสุตฺตเนฺตฯ วุตฺตานิ ภควตาติ สตฺถารา สยํ อาหจฺจ ภาสิตานิฯ จตฺตาโร สสฺสตวาทาติอาทีสุ ‘‘เต จ โภโนฺต สมณพฺราหฺมณา กิมาคมฺม กิมารพฺภ สสฺสตวาทา สสฺสตํ อตฺตานญฺจ โลกญฺจ ปญฺญาเปนฺติ จตูหิ วตฺถูหี’’ติอาทินา (ที. นิ. ๑.๒๙-๓๐) พฺรหฺมชาเล วุตฺตนเยเนว ปเภโท จ อโตฺถ จ เวทิตโพฺพติฯ
977. Diṭṭhigataniddese brahmajāle veyyākaraṇeti brahmajālanāmake veyyākaraṇe, dīghanikāyassa paṭhamasuttante. Vuttāni bhagavatāti satthārā sayaṃ āhacca bhāsitāni. Cattāro sassatavādātiādīsu ‘‘te ca bhonto samaṇabrāhmaṇā kimāgamma kimārabbha sassatavādā sassataṃ attānañca lokañca paññāpenti catūhi vatthūhī’’tiādinā (dī. ni. 1.29-30) brahmajāle vuttanayeneva pabhedo ca attho ca veditabboti.
สโมฺมหวิโนทนิยา วิภงฺคฎฺฐกถาย
Sammohavinodaniyā vibhaṅgaṭṭhakathāya
ขุทฺทกวตฺถุวิภงฺควณฺณนา นิฎฺฐิตาฯ
Khuddakavatthuvibhaṅgavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / อภิธมฺมปิฎก • Abhidhammapiṭaka / วิภงฺคปาฬิ • Vibhaṅgapāḷi / ๑๗. ขุทฺทกวตฺถุวิภโงฺค • 17. Khuddakavatthuvibhaṅgo
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / วิภงฺค-มูลฎีกา • Vibhaṅga-mūlaṭīkā / ๑๗. ขุทฺทกวตฺถุวิภโงฺค • 17. Khuddakavatthuvibhaṅgo
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / วิภงฺค-อนุฎีกา • Vibhaṅga-anuṭīkā / ๑๗. ขุทฺทกวตฺถุวิภโงฺค • 17. Khuddakavatthuvibhaṅgo
