| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
১০. দসকৰারো
10. Dasakavāro
৩৩০. দস আঘাতৰত্থূনি। দস আঘাতপটিৰিনযা। দস ৰিনীতৰত্থূনি। দসৰত্থুকা মিচ্ছাদিট্ঠি। দসৰত্থুকা সম্মাদিট্ঠি। দস অন্তগ্গাহিকা দিট্ঠি। দস মিচ্ছত্তা। দস সম্মত্তা। দস অকুসলকম্মপথা। দস কুসলকম্মপথা। দস অধম্মিকা সলাকগ্গাহা। দস ধম্মিকা সলাকগ্গাহা। সামণেরানং দস সিক্খাপদানি। দসহঙ্গেহি সমন্নাগতো সামণেরো নাসেতব্বো।
330. Dasa āghātavatthūni. Dasa āghātapaṭivinayā. Dasa vinītavatthūni. Dasavatthukā micchādiṭṭhi. Dasavatthukā sammādiṭṭhi. Dasa antaggāhikā diṭṭhi. Dasa micchattā. Dasa sammattā. Dasa akusalakammapathā. Dasa kusalakammapathā. Dasa adhammikā salākaggāhā. Dasa dhammikā salākaggāhā. Sāmaṇerānaṃ dasa sikkhāpadāni. Dasahaṅgehi samannāgato sāmaṇero nāsetabbo.
দসহঙ্গেহি সমন্নাগতো ৰিনযধরো বালো ত্ৰেৰ সঙ্খং গচ্ছতি – অত্তনো ভাসপরিযন্তং ন উগ্গণ্হাতি, পরস্স ভাসপরিযন্তং ন উগ্গণ্হাতি , অত্তনো ভাসপরিযন্তং অনুগ্গহেত্ৰা পরস্স ভাসপরিযন্তং অনুগ্গহেত্ৰা অধম্মেন কারেতি, অপ্পটিঞ্ঞায আপত্তিং ন জানাতি, আপত্তিযা মূলং ন জানাতি, আপত্তিসমুদযং ন জানাতি, আপত্তিনিরোধং ন জানাতি, আপত্তিনিরোধগামিনিং পটিপদং ন জানাতি।
Dasahaṅgehi samannāgato vinayadharo bālo tveva saṅkhaṃ gacchati – attano bhāsapariyantaṃ na uggaṇhāti, parassa bhāsapariyantaṃ na uggaṇhāti , attano bhāsapariyantaṃ anuggahetvā parassa bhāsapariyantaṃ anuggahetvā adhammena kāreti, appaṭiññāya āpattiṃ na jānāti, āpattiyā mūlaṃ na jānāti, āpattisamudayaṃ na jānāti, āpattinirodhaṃ na jānāti, āpattinirodhagāminiṃ paṭipadaṃ na jānāti.
দসহঙ্গেহি সমন্নাগতো ৰিনযধরো পণ্ডিতো ত্ৰেৰ সঙ্খং গচ্ছতি – অত্তনো ভাসপরিযন্তং উগ্গণ্হাতি, পরস্স ভাসপরিযন্তং উগ্গণ্হাতি, অত্তনো ভাসপরিযন্তং উগ্গহেত্ৰা পরস্স ভাসপরিযন্তং উগ্গহেত্ৰা ধম্মেন কারেতি, পটিঞ্ঞায আপত্তিং জানাতি, আপত্তিযা মূলং জানাতি, আপত্তিসমুদযং জানাতি, আপত্তিনিরোধং জানাতি, আপত্তিনিরোধগামিনিং পটিপদং জানাতি।
Dasahaṅgehi samannāgato vinayadharo paṇḍito tveva saṅkhaṃ gacchati – attano bhāsapariyantaṃ uggaṇhāti, parassa bhāsapariyantaṃ uggaṇhāti, attano bhāsapariyantaṃ uggahetvā parassa bhāsapariyantaṃ uggahetvā dhammena kāreti, paṭiññāya āpattiṃ jānāti, āpattiyā mūlaṃ jānāti, āpattisamudayaṃ jānāti, āpattinirodhaṃ jānāti, āpattinirodhagāminiṃ paṭipadaṃ jānāti.
অপরেহিপি দসহঙ্গেহি সমন্নাগতো ৰিনযধরো বালো ত্ৰেৰ সঙ্খং গচ্ছতি – অধিকরণং ন জানাতি, অধিকরণস্স মূলং ন জানাতি, অধিকরণসমুদযং ন জানাতি, অধিকরণনিরোধং ন জানাতি, অধিকরণনিরোধগামিনিং পটিপদং ন জানাতি, ৰত্থুং ন জানাতি, নিদানং 1 ন জানাতি, পঞ্ঞত্তিং ন জানাতি, অনুপঞ্ঞত্তিং ন জানাতি , অনুসন্ধিৰচনপথং ন জানাতি।
Aparehipi dasahaṅgehi samannāgato vinayadharo bālo tveva saṅkhaṃ gacchati – adhikaraṇaṃ na jānāti, adhikaraṇassa mūlaṃ na jānāti, adhikaraṇasamudayaṃ na jānāti, adhikaraṇanirodhaṃ na jānāti, adhikaraṇanirodhagāminiṃ paṭipadaṃ na jānāti, vatthuṃ na jānāti, nidānaṃ 2 na jānāti, paññattiṃ na jānāti, anupaññattiṃ na jānāti , anusandhivacanapathaṃ na jānāti.
দসহঙ্গেহি সমন্নাগতো ৰিনযধরো পণ্ডিতো ত্ৰেৰ সঙ্খং গচ্ছতি – অধিকরণং জানাতি, অধিকরণস্স মূলং জানাতি, অধিকরণসমুদযং জানাতি, অধিকরণনিরোধং জানাতি, অধিকরণনিরোধগামিনিং পটিপদং জানাতি, ৰত্থুং জানাতি, নিদানং জানাতি, পঞ্ঞত্তিং জানাতি, অনুপঞ্ঞত্তিং জানাতি, অনুসন্ধিৰচনপথং জানাতি।
Dasahaṅgehi samannāgato vinayadharo paṇḍito tveva saṅkhaṃ gacchati – adhikaraṇaṃ jānāti, adhikaraṇassa mūlaṃ jānāti, adhikaraṇasamudayaṃ jānāti, adhikaraṇanirodhaṃ jānāti, adhikaraṇanirodhagāminiṃ paṭipadaṃ jānāti, vatthuṃ jānāti, nidānaṃ jānāti, paññattiṃ jānāti, anupaññattiṃ jānāti, anusandhivacanapathaṃ jānāti.
অপরেহিপি দসহঙ্গেহি সমন্নাগতো ৰিনযধরো বালো ত্ৰেৰ সঙ্খং গচ্ছতি – ঞত্তিং ন জানাতি, ঞত্তিযা করণং ন জানাতি, ন পুব্বকুসলো হোতি, ন অপরকুসলো হোতি, অকালঞ্ঞূ চ হোতি, আপত্তানাপত্তিং ন জানাতি, লহুকগরুকং আপত্তিং ন জানাতি, সাৰসেসানৰসেসং আপত্তিং ন জানাতি, দুট্ঠুল্লাদুট্ঠুল্লং আপত্তিং ন জানাতি, আচরিযপরম্পরা খো পনস্স ন সুগ্গহিতা হোতি ন সুমনসিকতা ন সূপধারিতা।
Aparehipi dasahaṅgehi samannāgato vinayadharo bālo tveva saṅkhaṃ gacchati – ñattiṃ na jānāti, ñattiyā karaṇaṃ na jānāti, na pubbakusalo hoti, na aparakusalo hoti, akālaññū ca hoti, āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, ācariyaparamparā kho panassa na suggahitā hoti na sumanasikatā na sūpadhāritā.
দসহঙ্গেহি সমন্নাগতো ৰিনযধরো পণ্ডিতো ত্ৰেৰ সঙ্খং গচ্ছতি – ঞত্তিং জানাতি, ঞত্তিযা করণং জানাতি, পুব্বকুসলো হোতি, অপরকুসলো হোতি, কালঞ্ঞূ চ হোতি, আপত্তানাপত্তিং জানাতি, লহুকগরুকং আপত্তিং জানাতি, সাৰসেসানৰসেসং আপত্তিং জানাতি, দুট্ঠুল্লাদুট্ঠুল্লং আপত্তিং জানাতি, আচরিযপরম্পরা খো পনস্স সুগ্গহিতা হোতি সুমনসিকতা সূপধারিতা।
Dasahaṅgehi samannāgato vinayadharo paṇḍito tveva saṅkhaṃ gacchati – ñattiṃ jānāti, ñattiyā karaṇaṃ jānāti, pubbakusalo hoti, aparakusalo hoti, kālaññū ca hoti, āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, ācariyaparamparā kho panassa suggahitā hoti sumanasikatā sūpadhāritā.
অপরেহিপি দসহঙ্গেহি সমন্নাগতো ৰিনযধরো বালো ত্ৰেৰ সঙ্খং গচ্ছতি – আপত্তানাপত্তিং ন জানাতি, লহুকগরুকং আপত্তিং ন জানাতি, সাৰসেসানৰসেসং আপত্তিং ন জানাতি, দুট্ঠুল্লাদুট্ঠুল্লং আপত্তিং ন জানাতি, উভযানি খো পনস্স পাতিমোক্খানি ৰিত্থারেন ন স্ৰাগতানি হোন্তি ন সুৰিভত্তানি ন সুপ্পৰত্তীনি ন সুৰিনিচ্ছিতানি সুত্তসো অনুব্যঞ্জনসো , আপত্তানাপত্তিং ন জানাতি, লহুকগরুকং আপত্তিং ন জানাতি, সাৰসেসানৰসেসং আপত্তিং ন জানাতি, দুট্ঠুল্লাদুট্ঠুল্লং আপত্তিং ন জানাতি, অধিকরণে চ ন ৰিনিচ্ছযকুসলো হোতি।
Aparehipi dasahaṅgehi samannāgato vinayadharo bālo tveva saṅkhaṃ gacchati – āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, ubhayāni kho panassa pātimokkhāni vitthārena na svāgatāni honti na suvibhattāni na suppavattīni na suvinicchitāni suttaso anubyañjanaso , āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, adhikaraṇe ca na vinicchayakusalo hoti.
দসহঙ্গেহি সমন্নাগতো ৰিনযধরো পণ্ডিতো ত্ৰেৰ সঙ্খং গচ্ছতি – আপত্তানাপত্তিং জানাতি, লহুকগরুকং আপত্তিং জানাতি, সাৰসেসানৰসেসং আপত্তিং জানাতি, দুট্ঠুল্লাদুট্ঠুল্লং আপত্তিং জানাতি, উভযানি খো পনস্স পাতিমোক্খানি ৰিত্থারেন স্ৰাগতানি হোন্তি সুৰিভত্তানি সুপ্পৰত্তীনি সুৰিনিচ্ছিতানি সুত্তসো অনুব্যঞ্জনসো, আপত্তানাপত্তিং জানাতি, লহুকগরুকং আপত্তিং জানাতি, সাৰসেসানৰসেসং আপত্তিং জানাতি, দুট্ঠুল্লাদুট্ঠুল্লং আপত্তিং জানাতি, অধিকরণে চ ৰিনিচ্ছযকুসলো হোতি।
Dasahaṅgehi samannāgato vinayadharo paṇḍito tveva saṅkhaṃ gacchati – āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso, āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, adhikaraṇe ca vinicchayakusalo hoti.
3 দসহঙ্গেহি সমন্নাগতো ভিক্খু উব্বাহিকায সম্মন্নিতব্বো। দস অত্থৰসে পটিচ্চ তথাগতেন সাৰকানং সিক্খাপদং পঞ্ঞত্তং। দস আদীনৰা রাজন্তেপুরপ্পৰেসনে। দস দানৰত্থূনি। দস রতনানি। দসৰগ্গো ভিক্খুসঙ্ঘো। দসৰগ্গেন গণেন উপসম্পাদেতব্বং। দস পংসুকূলানি। দস চীৰরধারণা 4। দসাহপরমং অতিরেকচীৰরং ধারেতব্বং । দস সুক্কানি। দস ইত্থিযো। দস ভরিযাযো। ৰেসালিযা দস ৰত্থূনি দীপেন্তি। দস পুগ্গলা অৰন্দিযা। দস অক্কোসৰত্থূনি। দসহাকারেহি পেসুঞ্ঞং উপসংহরতি। দস সেনাসনানি। দস ৰরানি যাচিংসু। দস অধম্মিকানি পাতিমোক্খট্ঠপনানি। দস ধম্মিকানি পাতিমোক্খট্ঠপনানি। দসানিসংসা যাগুযা। দস মংসা অকপ্পিযা। দস পরমানি। দসৰস্সেন ভিক্খুনা ব্যত্তেন পটিবলেন পব্বাজেতব্বং উপসম্পাদেতব্বং নিস্সযো দাতব্বো সামণেরো উপট্ঠাপেতব্বো। দসৰস্সায ভিক্খুনিযা ব্যত্তায পটিবলায পব্বাজেতব্বং উপসম্পাদেতব্বং নিস্সযো দাতব্বো সামণেরী উপট্ঠাপেতব্বা। দসৰস্সায ভিক্খুনিযা ব্যত্তায পটিবলায ৰুট্ঠাপনসম্মুতি সাদিতব্বা। দসৰস্সায গিহিগতায সিক্খা দাতব্বাতি।
5 Dasahaṅgehi samannāgato bhikkhu ubbāhikāya sammannitabbo. Dasa atthavase paṭicca tathāgatena sāvakānaṃ sikkhāpadaṃ paññattaṃ. Dasa ādīnavā rājantepurappavesane. Dasa dānavatthūni. Dasa ratanāni. Dasavaggo bhikkhusaṅgho. Dasavaggena gaṇena upasampādetabbaṃ. Dasa paṃsukūlāni. Dasa cīvaradhāraṇā 6. Dasāhaparamaṃ atirekacīvaraṃ dhāretabbaṃ . Dasa sukkāni. Dasa itthiyo. Dasa bhariyāyo. Vesāliyā dasa vatthūni dīpenti. Dasa puggalā avandiyā. Dasa akkosavatthūni. Dasahākārehi pesuññaṃ upasaṃharati. Dasa senāsanāni. Dasa varāni yāciṃsu. Dasa adhammikāni pātimokkhaṭṭhapanāni. Dasa dhammikāni pātimokkhaṭṭhapanāni. Dasānisaṃsā yāguyā. Dasa maṃsā akappiyā. Dasa paramāni. Dasavassena bhikkhunā byattena paṭibalena pabbājetabbaṃ upasampādetabbaṃ nissayo dātabbo sāmaṇero upaṭṭhāpetabbo. Dasavassāya bhikkhuniyā byattāya paṭibalāya pabbājetabbaṃ upasampādetabbaṃ nissayo dātabbo sāmaṇerī upaṭṭhāpetabbā. Dasavassāya bhikkhuniyā byattāya paṭibalāya vuṭṭhāpanasammuti sāditabbā. Dasavassāya gihigatāya sikkhā dātabbāti.
দসকং নিট্ঠিতং।
Dasakaṃ niṭṭhitaṃ.
তস্সুদ্দানং –
Tassuddānaṃ –
আঘাতং ৰিনযং ৰত্থু, মিচ্ছা সম্মা চ অন্তগা।
Āghātaṃ vinayaṃ vatthu, micchā sammā ca antagā;
মিচ্ছত্তা চেৰ সম্মত্তা, অকুসলা কুসলাপি চ॥
Micchattā ceva sammattā, akusalā kusalāpi ca.
সলাকা অধম্মা ধম্মা, সামণেরা চ নাসনা।
Salākā adhammā dhammā, sāmaṇerā ca nāsanā;
ভাসাধিকরণঞ্চেৰ, ঞত্তিলহুকমেৰ চ॥
Bhāsādhikaraṇañceva, ñattilahukameva ca.
লহুকা গরুকা এতে, কণ্হসুক্কা ৰিজানথ।
Lahukā garukā ete, kaṇhasukkā vijānatha;
উব্বাহিকা চ সিক্খা চ, অন্তেপুরে চ ৰত্থূনি॥
Ubbāhikā ca sikkhā ca, antepure ca vatthūni.
রতনং দসৰগ্গো চ, তথেৰ উপসম্পদা।
Ratanaṃ dasavaggo ca, tatheva upasampadā;
পংসুকূলধারণা চ, দসাহসুক্কইত্থিযো॥
Paṃsukūladhāraṇā ca, dasāhasukkaitthiyo.
ভরিযা দস ৰত্থূনি, অৰন্দিযক্কোসেন চ।
Bhariyā dasa vatthūni, avandiyakkosena ca;
পেসুঞ্ঞঞ্চেৰ সেনানি, ৰরানি চ অধম্মিকা॥
Pesuññañceva senāni, varāni ca adhammikā.
ধম্মিকা যাগুমংসা চ, পরমা ভিক্খু ভিক্খুনী।
Dhammikā yāgumaṃsā ca, paramā bhikkhu bhikkhunī;
ৰুট্ঠাপনা গিহিগতা, দসকা সুপ্পকাসিতাতি॥
Vuṭṭhāpanā gihigatā, dasakā suppakāsitāti.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / দসকৰারৰণ্ণনা • Dasakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / দসকৰারৰণ্ণনা • Dasakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / দসকৰারৰণ্ণনা • Dasakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ছক্কৰারাদিৰণ্ণনা • Chakkavārādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / একুত্তরিকনযো দসকৰারৰণ্ণনা • Ekuttarikanayo dasakavāravaṇṇanā
