| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၁၀. ဒသကဝာရော
10. Dasakavāro
၃၃၀. ဒသ အာဃာတဝတ္ထူနိ။ ဒသ အာဃာတပဋိဝိနယာ။ ဒသ ဝိနီတဝတ္ထူနိ။ ဒသဝတ္ထုကာ မိစ္ဆာဒိဋ္ဌိ။ ဒသဝတ္ထုကာ သမ္မာဒိဋ္ဌိ။ ဒသ အန္တဂ္ဂာဟိကာ ဒိဋ္ဌိ။ ဒသ မိစ္ဆတ္တာ။ ဒသ သမ္မတ္တာ။ ဒသ အကုသလကမ္မပထာ။ ဒသ ကုသလကမ္မပထာ။ ဒသ အဓမ္မိကာ သလာကဂ္ဂာဟာ။ ဒသ ဓမ္မိကာ သလာကဂ္ဂာဟာ။ သာမဏေရာနံ ဒသ သိက္ခာပဒာနိ။ ဒသဟင္ဂေဟိ သမန္နာဂတော သာမဏေရော နာသေတဗ္ဗော။
330. Dasa āghātavatthūni. Dasa āghātapaṭivinayā. Dasa vinītavatthūni. Dasavatthukā micchādiṭṭhi. Dasavatthukā sammādiṭṭhi. Dasa antaggāhikā diṭṭhi. Dasa micchattā. Dasa sammattā. Dasa akusalakammapathā. Dasa kusalakammapathā. Dasa adhammikā salākaggāhā. Dasa dhammikā salākaggāhā. Sāmaṇerānaṃ dasa sikkhāpadāni. Dasahaṅgehi samannāgato sāmaṇero nāsetabbo.
ဒသဟင္ဂေဟိ သမန္နာဂတော ဝိနယဓရော ဗာလော တ္ဝေဝ သင္ခံ ဂစ္ဆတိ – အတ္တနော ဘာသပရိယန္တံ န ဥဂ္ဂဏ္ဟာတိ, ပရသ္သ ဘာသပရိယန္တံ န ဥဂ္ဂဏ္ဟာတိ , အတ္တနော ဘာသပရိယန္တံ အနုဂ္ဂဟေတ္ဝာ ပရသ္သ ဘာသပရိယန္တံ အနုဂ္ဂဟေတ္ဝာ အဓမ္မေန ကာရေတိ, အပ္ပဋိညာယ အာပတ္တိံ န ဇာနာတိ, အာပတ္တိယာ မူလံ န ဇာနာတိ, အာပတ္တိသမုဒယံ န ဇာနာတိ, အာပတ္တိနိရောဓံ န ဇာနာတိ, အာပတ္တိနိရောဓဂာမိနိံ ပဋိပဒံ န ဇာနာတိ။
Dasahaṅgehi samannāgato vinayadharo bālo tveva saṅkhaṃ gacchati – attano bhāsapariyantaṃ na uggaṇhāti, parassa bhāsapariyantaṃ na uggaṇhāti , attano bhāsapariyantaṃ anuggahetvā parassa bhāsapariyantaṃ anuggahetvā adhammena kāreti, appaṭiññāya āpattiṃ na jānāti, āpattiyā mūlaṃ na jānāti, āpattisamudayaṃ na jānāti, āpattinirodhaṃ na jānāti, āpattinirodhagāminiṃ paṭipadaṃ na jānāti.
ဒသဟင္ဂေဟိ သမန္နာဂတော ဝိနယဓရော ပဏ္ဍိတော တ္ဝေဝ သင္ခံ ဂစ္ဆတိ – အတ္တနော ဘာသပရိယန္တံ ဥဂ္ဂဏ္ဟာတိ, ပရသ္သ ဘာသပရိယန္တံ ဥဂ္ဂဏ္ဟာတိ, အတ္တနော ဘာသပရိယန္တံ ဥဂ္ဂဟေတ္ဝာ ပရသ္သ ဘာသပရိယန္တံ ဥဂ္ဂဟေတ္ဝာ ဓမ္မေန ကာရေတိ, ပဋိညာယ အာပတ္တိံ ဇာနာတိ, အာပတ္တိယာ မူလံ ဇာနာတိ, အာပတ္တိသမုဒယံ ဇာနာတိ, အာပတ္တိနိရောဓံ ဇာနာတိ, အာပတ္တိနိရောဓဂာမိနိံ ပဋိပဒံ ဇာနာတိ။
Dasahaṅgehi samannāgato vinayadharo paṇḍito tveva saṅkhaṃ gacchati – attano bhāsapariyantaṃ uggaṇhāti, parassa bhāsapariyantaṃ uggaṇhāti, attano bhāsapariyantaṃ uggahetvā parassa bhāsapariyantaṃ uggahetvā dhammena kāreti, paṭiññāya āpattiṃ jānāti, āpattiyā mūlaṃ jānāti, āpattisamudayaṃ jānāti, āpattinirodhaṃ jānāti, āpattinirodhagāminiṃ paṭipadaṃ jānāti.
အပရေဟိပိ ဒသဟင္ဂေဟိ သမန္နာဂတော ဝိနယဓရော ဗာလော တ္ဝေဝ သင္ခံ ဂစ္ဆတိ – အဓိကရဏံ န ဇာနာတိ, အဓိကရဏသ္သ မူလံ န ဇာနာတိ, အဓိကရဏသမုဒယံ န ဇာနာတိ, အဓိကရဏနိရောဓံ န ဇာနာတိ, အဓိကရဏနိရောဓဂာမိနိံ ပဋိပဒံ န ဇာနာတိ, ဝတ္ထုံ န ဇာနာတိ, နိဒာနံ 1 န ဇာနာတိ, ပညတ္တိံ န ဇာနာတိ, အနုပညတ္တိံ န ဇာနာတိ , အနုသန္ဓိဝစနပထံ န ဇာနာတိ။
Aparehipi dasahaṅgehi samannāgato vinayadharo bālo tveva saṅkhaṃ gacchati – adhikaraṇaṃ na jānāti, adhikaraṇassa mūlaṃ na jānāti, adhikaraṇasamudayaṃ na jānāti, adhikaraṇanirodhaṃ na jānāti, adhikaraṇanirodhagāminiṃ paṭipadaṃ na jānāti, vatthuṃ na jānāti, nidānaṃ 2 na jānāti, paññattiṃ na jānāti, anupaññattiṃ na jānāti , anusandhivacanapathaṃ na jānāti.
ဒသဟင္ဂေဟိ သမန္နာဂတော ဝိနယဓရော ပဏ္ဍိတော တ္ဝေဝ သင္ခံ ဂစ္ဆတိ – အဓိကရဏံ ဇာနာတိ, အဓိကရဏသ္သ မူလံ ဇာနာတိ, အဓိကရဏသမုဒယံ ဇာနာတိ, အဓိကရဏနိရောဓံ ဇာနာတိ, အဓိကရဏနိရောဓဂာမိနိံ ပဋိပဒံ ဇာနာတိ, ဝတ္ထုံ ဇာနာတိ, နိဒာနံ ဇာနာတိ, ပညတ္တိံ ဇာနာတိ, အနုပညတ္တိံ ဇာနာတိ, အနုသန္ဓိဝစနပထံ ဇာနာတိ။
Dasahaṅgehi samannāgato vinayadharo paṇḍito tveva saṅkhaṃ gacchati – adhikaraṇaṃ jānāti, adhikaraṇassa mūlaṃ jānāti, adhikaraṇasamudayaṃ jānāti, adhikaraṇanirodhaṃ jānāti, adhikaraṇanirodhagāminiṃ paṭipadaṃ jānāti, vatthuṃ jānāti, nidānaṃ jānāti, paññattiṃ jānāti, anupaññattiṃ jānāti, anusandhivacanapathaṃ jānāti.
အပရေဟိပိ ဒသဟင္ဂေဟိ သမန္နာဂတော ဝိနယဓရော ဗာလော တ္ဝေဝ သင္ခံ ဂစ္ဆတိ – ဉတ္တိံ န ဇာနာတိ, ဉတ္တိယာ ကရဏံ န ဇာနာတိ, န ပုဗ္ဗကုသလော ဟောတိ, န အပရကုသလော ဟောတိ, အကာလညူ စ ဟောတိ, အာပတ္တာနာပတ္တိံ န ဇာနာတိ, လဟုကဂရုကံ အာပတ္တိံ န ဇာနာတိ, သာဝသေသာနဝသေသံ အာပတ္တိံ န ဇာနာတိ, ဒုဋ္ဌုလ္လာဒုဋ္ဌုလ္လံ အာပတ္တိံ န ဇာနာတိ, အာစရိယပရမ္ပရာ ခော ပနသ္သ န သုဂ္ဂဟိတာ ဟောတိ န သုမနသိကတာ န သူပဓာရိတာ။
Aparehipi dasahaṅgehi samannāgato vinayadharo bālo tveva saṅkhaṃ gacchati – ñattiṃ na jānāti, ñattiyā karaṇaṃ na jānāti, na pubbakusalo hoti, na aparakusalo hoti, akālaññū ca hoti, āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, ācariyaparamparā kho panassa na suggahitā hoti na sumanasikatā na sūpadhāritā.
ဒသဟင္ဂေဟိ သမန္နာဂတော ဝိနယဓရော ပဏ္ဍိတော တ္ဝေဝ သင္ခံ ဂစ္ဆတိ – ဉတ္တိံ ဇာနာတိ, ဉတ္တိယာ ကရဏံ ဇာနာတိ, ပုဗ္ဗကုသလော ဟောတိ, အပရကုသလော ဟောတိ, ကာလညူ စ ဟောတိ, အာပတ္တာနာပတ္တိံ ဇာနာတိ, လဟုကဂရုကံ အာပတ္တိံ ဇာနာတိ, သာဝသေသာနဝသေသံ အာပတ္တိံ ဇာနာတိ, ဒုဋ္ဌုလ္လာဒုဋ္ဌုလ္လံ အာပတ္တိံ ဇာနာတိ, အာစရိယပရမ္ပရာ ခော ပနသ္သ သုဂ္ဂဟိတာ ဟောတိ သုမနသိကတာ သူပဓာရိတာ။
Dasahaṅgehi samannāgato vinayadharo paṇḍito tveva saṅkhaṃ gacchati – ñattiṃ jānāti, ñattiyā karaṇaṃ jānāti, pubbakusalo hoti, aparakusalo hoti, kālaññū ca hoti, āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, ācariyaparamparā kho panassa suggahitā hoti sumanasikatā sūpadhāritā.
အပရေဟိပိ ဒသဟင္ဂေဟိ သမန္နာဂတော ဝိနယဓရော ဗာလော တ္ဝေဝ သင္ခံ ဂစ္ဆတိ – အာပတ္တာနာပတ္တိံ န ဇာနာတိ, လဟုကဂရုကံ အာပတ္တိံ န ဇာနာတိ, သာဝသေသာနဝသေသံ အာပတ္တိံ န ဇာနာတိ, ဒုဋ္ဌုလ္လာဒုဋ္ဌုလ္လံ အာပတ္တိံ န ဇာနာတိ, ဥဘယာနိ ခော ပနသ္သ ပာတိမောက္ခာနိ ဝိတ္ထာရေန န သ္ဝာဂတာနိ ဟောန္တိ န သုဝိဘတ္တာနိ န သုပ္ပဝတ္တီနိ န သုဝိနိစ္ဆိတာနိ သုတ္တသော အနုဗ္ယဉ္ဇနသော , အာပတ္တာနာပတ္တိံ န ဇာနာတိ, လဟုကဂရုကံ အာပတ္တိံ န ဇာနာတိ, သာဝသေသာနဝသေသံ အာပတ္တိံ န ဇာနာတိ, ဒုဋ္ဌုလ္လာဒုဋ္ဌုလ္လံ အာပတ္တိံ န ဇာနာတိ, အဓိကရဏေ စ န ဝိနိစ္ဆယကုသလော ဟောတိ။
Aparehipi dasahaṅgehi samannāgato vinayadharo bālo tveva saṅkhaṃ gacchati – āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, ubhayāni kho panassa pātimokkhāni vitthārena na svāgatāni honti na suvibhattāni na suppavattīni na suvinicchitāni suttaso anubyañjanaso , āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, adhikaraṇe ca na vinicchayakusalo hoti.
ဒသဟင္ဂေဟိ သမန္နာဂတော ဝိနယဓရော ပဏ္ဍိတော တ္ဝေဝ သင္ခံ ဂစ္ဆတိ – အာပတ္တာနာပတ္တိံ ဇာနာတိ, လဟုကဂရုကံ အာပတ္တိံ ဇာနာတိ, သာဝသေသာနဝသေသံ အာပတ္တိံ ဇာနာတိ, ဒုဋ္ဌုလ္လာဒုဋ္ဌုလ္လံ အာပတ္တိံ ဇာနာတိ, ဥဘယာနိ ခော ပနသ္သ ပာတိမောက္ခာနိ ဝိတ္ထာရေန သ္ဝာဂတာနိ ဟောန္တိ သုဝိဘတ္တာနိ သုပ္ပဝတ္တီနိ သုဝိနိစ္ဆိတာနိ သုတ္တသော အနုဗ္ယဉ္ဇနသော, အာပတ္တာနာပတ္တိံ ဇာနာတိ, လဟုကဂရုကံ အာပတ္တိံ ဇာနာတိ, သာဝသေသာနဝသေသံ အာပတ္တိံ ဇာနာတိ, ဒုဋ္ဌုလ္လာဒုဋ္ဌုလ္လံ အာပတ္တိံ ဇာနာတိ, အဓိကရဏေ စ ဝိနိစ္ဆယကုသလော ဟောတိ။
Dasahaṅgehi samannāgato vinayadharo paṇḍito tveva saṅkhaṃ gacchati – āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso, āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, adhikaraṇe ca vinicchayakusalo hoti.
3 ဒသဟင္ဂေဟိ သမန္နာဂတော ဘိက္ခု ဥဗ္ဗာဟိကာယ သမ္မန္နိတဗ္ဗော။ ဒသ အတ္ထဝသေ ပဋိစ္စ တထာဂတေန သာဝကာနံ သိက္ခာပဒံ ပညတ္တံ။ ဒသ အာဒီနဝာ ရာဇန္တေပုရပ္ပဝေသနေ။ ဒသ ဒာနဝတ္ထူနိ။ ဒသ ရတနာနိ။ ဒသဝဂ္ဂော ဘိက္ခုသင္ဃော။ ဒသဝဂ္ဂေန ဂဏေန ဥပသမ္ပာဒေတဗ္ဗံ။ ဒသ ပံသုကူလာနိ။ ဒသ စီဝရဓာရဏာ 4။ ဒသာဟပရမံ အတိရေကစီဝရံ ဓာရေတဗ္ဗံ ။ ဒသ သုက္ကာနိ။ ဒသ ဣတ္ထိယော။ ဒသ ဘရိယာယော။ ဝေသာလိယာ ဒသ ဝတ္ထူနိ ဒီပေန္တိ။ ဒသ ပုဂ္ဂလာ အဝန္ဒိယာ။ ဒသ အက္ကောသဝတ္ထူနိ။ ဒသဟာကာရေဟိ ပေသုညံ ဥပသံဟရတိ။ ဒသ သေနာသနာနိ။ ဒသ ဝရာနိ ယာစိံသု။ ဒသ အဓမ္မိကာနိ ပာတိမောက္ခဋ္ဌပနာနိ။ ဒသ ဓမ္မိကာနိ ပာတိမောက္ခဋ္ဌပနာနိ။ ဒသာနိသံသာ ယာဂုယာ။ ဒသ မံသာ အကပ္ပိယာ။ ဒသ ပရမာနိ။ ဒသဝသ္သေန ဘိက္ခုနာ ဗ္ယတ္တေန ပဋိဗလေန ပဗ္ဗာဇေတဗ္ဗံ ဥပသမ္ပာဒေတဗ္ဗံ နိသ္သယော ဒာတဗ္ဗော သာမဏေရော ဥပဋ္ဌာပေတဗ္ဗော။ ဒသဝသ္သာယ ဘိက္ခုနိယာ ဗ္ယတ္တာယ ပဋိဗလာယ ပဗ္ဗာဇေတဗ္ဗံ ဥပသမ္ပာဒေတဗ္ဗံ နိသ္သယော ဒာတဗ္ဗော သာမဏေရီ ဥပဋ္ဌာပေတဗ္ဗာ။ ဒသဝသ္သာယ ဘိက္ခုနိယာ ဗ္ယတ္တာယ ပဋိဗလာယ ဝုဋ္ဌာပနသမ္မုတိ သာဒိတဗ္ဗာ။ ဒသဝသ္သာယ ဂိဟိဂတာယ သိက္ခာ ဒာတဗ္ဗာတိ။
5 Dasahaṅgehi samannāgato bhikkhu ubbāhikāya sammannitabbo. Dasa atthavase paṭicca tathāgatena sāvakānaṃ sikkhāpadaṃ paññattaṃ. Dasa ādīnavā rājantepurappavesane. Dasa dānavatthūni. Dasa ratanāni. Dasavaggo bhikkhusaṅgho. Dasavaggena gaṇena upasampādetabbaṃ. Dasa paṃsukūlāni. Dasa cīvaradhāraṇā 6. Dasāhaparamaṃ atirekacīvaraṃ dhāretabbaṃ . Dasa sukkāni. Dasa itthiyo. Dasa bhariyāyo. Vesāliyā dasa vatthūni dīpenti. Dasa puggalā avandiyā. Dasa akkosavatthūni. Dasahākārehi pesuññaṃ upasaṃharati. Dasa senāsanāni. Dasa varāni yāciṃsu. Dasa adhammikāni pātimokkhaṭṭhapanāni. Dasa dhammikāni pātimokkhaṭṭhapanāni. Dasānisaṃsā yāguyā. Dasa maṃsā akappiyā. Dasa paramāni. Dasavassena bhikkhunā byattena paṭibalena pabbājetabbaṃ upasampādetabbaṃ nissayo dātabbo sāmaṇero upaṭṭhāpetabbo. Dasavassāya bhikkhuniyā byattāya paṭibalāya pabbājetabbaṃ upasampādetabbaṃ nissayo dātabbo sāmaṇerī upaṭṭhāpetabbā. Dasavassāya bhikkhuniyā byattāya paṭibalāya vuṭṭhāpanasammuti sāditabbā. Dasavassāya gihigatāya sikkhā dātabbāti.
ဒသကံ နိဋ္ဌိတံ။
Dasakaṃ niṭṭhitaṃ.
တသ္သုဒ္ဒာနံ –
Tassuddānaṃ –
အာဃာတံ ဝိနယံ ဝတ္ထု၊ မိစ္ဆာ သမ္မာ စ အန္တဂာ။
Āghātaṃ vinayaṃ vatthu, micchā sammā ca antagā;
မိစ္ဆတ္တာ စေဝ သမ္မတ္တာ၊ အကုသလာ ကုသလာပိ စ။
Micchattā ceva sammattā, akusalā kusalāpi ca.
သလာကာ အဓမ္မာ ဓမ္မာ၊ သာမဏေရာ စ နာသနာ။
Salākā adhammā dhammā, sāmaṇerā ca nāsanā;
ဘာသာဓိကရဏဉ္စေဝ၊ ဉတ္တိလဟုကမေဝ စ။
Bhāsādhikaraṇañceva, ñattilahukameva ca.
လဟုကာ ဂရုကာ ဧတေ၊ ကဏ္ဟသုက္ကာ ဝိဇာနထ။
Lahukā garukā ete, kaṇhasukkā vijānatha;
ဥဗ္ဗာဟိကာ စ သိက္ခာ စ၊ အန္တေပုရေ စ ဝတ္ထူနိ။
Ubbāhikā ca sikkhā ca, antepure ca vatthūni.
ရတနံ ဒသဝဂ္ဂော စ၊ တထေဝ ဥပသမ္ပဒာ။
Ratanaṃ dasavaggo ca, tatheva upasampadā;
ပံသုကူလဓာရဏာ စ၊ ဒသာဟသုက္ကဣတ္ထိယော။
Paṃsukūladhāraṇā ca, dasāhasukkaitthiyo.
ဘရိယာ ဒသ ဝတ္ထူနိ၊ အဝန္ဒိယက္ကောသေန စ။
Bhariyā dasa vatthūni, avandiyakkosena ca;
ပေသုညဉ္စေဝ သေနာနိ၊ ဝရာနိ စ အဓမ္မိကာ။
Pesuññañceva senāni, varāni ca adhammikā.
ဓမ္မိကာ ယာဂုမံသာ စ၊ ပရမာ ဘိက္ခု ဘိက္ခုနီ။
Dhammikā yāgumaṃsā ca, paramā bhikkhu bhikkhunī;
ဝုဋ္ဌာပနာ ဂိဟိဂတာ၊ ဒသကာ သုပ္ပကာသိတာတိ။
Vuṭṭhāpanā gihigatā, dasakā suppakāsitāti.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / ဒသကဝာရဝဏ္ဏနာ • Dasakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဒသကဝာရဝဏ္ဏနာ • Dasakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ဒသကဝာရဝဏ္ဏနာ • Dasakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဆက္ကဝာရာဒိဝဏ္ဏနာ • Chakkavārādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ဧကုတ္တရိကနယော ဒသကဝာရဝဏ္ဏနာ • Ekuttarikanayo dasakavāravaṇṇanā
