| Library / Tipiṭaka / ತಿಪಿಟಕ • Tipiṭaka / ಪರಿವಾರಪಾಳಿ • Parivārapāḷi |
೧೦. ದಸಕವಾರೋ
10. Dasakavāro
೩೩೦. ದಸ ಆಘಾತವತ್ಥೂನಿ। ದಸ ಆಘಾತಪಟಿವಿನಯಾ। ದಸ ವಿನೀತವತ್ಥೂನಿ। ದಸವತ್ಥುಕಾ ಮಿಚ್ಛಾದಿಟ್ಠಿ। ದಸವತ್ಥುಕಾ ಸಮ್ಮಾದಿಟ್ಠಿ। ದಸ ಅನ್ತಗ್ಗಾಹಿಕಾ ದಿಟ್ಠಿ। ದಸ ಮಿಚ್ಛತ್ತಾ। ದಸ ಸಮ್ಮತ್ತಾ। ದಸ ಅಕುಸಲಕಮ್ಮಪಥಾ। ದಸ ಕುಸಲಕಮ್ಮಪಥಾ। ದಸ ಅಧಮ್ಮಿಕಾ ಸಲಾಕಗ್ಗಾಹಾ। ದಸ ಧಮ್ಮಿಕಾ ಸಲಾಕಗ್ಗಾಹಾ। ಸಾಮಣೇರಾನಂ ದಸ ಸಿಕ್ಖಾಪದಾನಿ। ದಸಹಙ್ಗೇಹಿ ಸಮನ್ನಾಗತೋ ಸಾಮಣೇರೋ ನಾಸೇತಬ್ಬೋ।
330. Dasa āghātavatthūni. Dasa āghātapaṭivinayā. Dasa vinītavatthūni. Dasavatthukā micchādiṭṭhi. Dasavatthukā sammādiṭṭhi. Dasa antaggāhikā diṭṭhi. Dasa micchattā. Dasa sammattā. Dasa akusalakammapathā. Dasa kusalakammapathā. Dasa adhammikā salākaggāhā. Dasa dhammikā salākaggāhā. Sāmaṇerānaṃ dasa sikkhāpadāni. Dasahaṅgehi samannāgato sāmaṇero nāsetabbo.
ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ಅತ್ತನೋ ಭಾಸಪರಿಯನ್ತಂ ನ ಉಗ್ಗಣ್ಹಾತಿ, ಪರಸ್ಸ ಭಾಸಪರಿಯನ್ತಂ ನ ಉಗ್ಗಣ್ಹಾತಿ , ಅತ್ತನೋ ಭಾಸಪರಿಯನ್ತಂ ಅನುಗ್ಗಹೇತ್ವಾ ಪರಸ್ಸ ಭಾಸಪರಿಯನ್ತಂ ಅನುಗ್ಗಹೇತ್ವಾ ಅಧಮ್ಮೇನ ಕಾರೇತಿ, ಅಪ್ಪಟಿಞ್ಞಾಯ ಆಪತ್ತಿಂ ನ ಜಾನಾತಿ, ಆಪತ್ತಿಯಾ ಮೂಲಂ ನ ಜಾನಾತಿ, ಆಪತ್ತಿಸಮುದಯಂ ನ ಜಾನಾತಿ, ಆಪತ್ತಿನಿರೋಧಂ ನ ಜಾನಾತಿ, ಆಪತ್ತಿನಿರೋಧಗಾಮಿನಿಂ ಪಟಿಪದಂ ನ ಜಾನಾತಿ।
Dasahaṅgehi samannāgato vinayadharo bālo tveva saṅkhaṃ gacchati – attano bhāsapariyantaṃ na uggaṇhāti, parassa bhāsapariyantaṃ na uggaṇhāti , attano bhāsapariyantaṃ anuggahetvā parassa bhāsapariyantaṃ anuggahetvā adhammena kāreti, appaṭiññāya āpattiṃ na jānāti, āpattiyā mūlaṃ na jānāti, āpattisamudayaṃ na jānāti, āpattinirodhaṃ na jānāti, āpattinirodhagāminiṃ paṭipadaṃ na jānāti.
ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋ ತ್ವೇವ ಸಙ್ಖಂ ಗಚ್ಛತಿ – ಅತ್ತನೋ ಭಾಸಪರಿಯನ್ತಂ ಉಗ್ಗಣ್ಹಾತಿ, ಪರಸ್ಸ ಭಾಸಪರಿಯನ್ತಂ ಉಗ್ಗಣ್ಹಾತಿ, ಅತ್ತನೋ ಭಾಸಪರಿಯನ್ತಂ ಉಗ್ಗಹೇತ್ವಾ ಪರಸ್ಸ ಭಾಸಪರಿಯನ್ತಂ ಉಗ್ಗಹೇತ್ವಾ ಧಮ್ಮೇನ ಕಾರೇತಿ, ಪಟಿಞ್ಞಾಯ ಆಪತ್ತಿಂ ಜಾನಾತಿ, ಆಪತ್ತಿಯಾ ಮೂಲಂ ಜಾನಾತಿ, ಆಪತ್ತಿಸಮುದಯಂ ಜಾನಾತಿ, ಆಪತ್ತಿನಿರೋಧಂ ಜಾನಾತಿ, ಆಪತ್ತಿನಿರೋಧಗಾಮಿನಿಂ ಪಟಿಪದಂ ಜಾನಾತಿ।
Dasahaṅgehi samannāgato vinayadharo paṇḍito tveva saṅkhaṃ gacchati – attano bhāsapariyantaṃ uggaṇhāti, parassa bhāsapariyantaṃ uggaṇhāti, attano bhāsapariyantaṃ uggahetvā parassa bhāsapariyantaṃ uggahetvā dhammena kāreti, paṭiññāya āpattiṃ jānāti, āpattiyā mūlaṃ jānāti, āpattisamudayaṃ jānāti, āpattinirodhaṃ jānāti, āpattinirodhagāminiṃ paṭipadaṃ jānāti.
ಅಪರೇಹಿಪಿ ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ಅಧಿಕರಣಂ ನ ಜಾನಾತಿ, ಅಧಿಕರಣಸ್ಸ ಮೂಲಂ ನ ಜಾನಾತಿ, ಅಧಿಕರಣಸಮುದಯಂ ನ ಜಾನಾತಿ, ಅಧಿಕರಣನಿರೋಧಂ ನ ಜಾನಾತಿ, ಅಧಿಕರಣನಿರೋಧಗಾಮಿನಿಂ ಪಟಿಪದಂ ನ ಜಾನಾತಿ, ವತ್ಥುಂ ನ ಜಾನಾತಿ, ನಿದಾನಂ 1 ನ ಜಾನಾತಿ, ಪಞ್ಞತ್ತಿಂ ನ ಜಾನಾತಿ, ಅನುಪಞ್ಞತ್ತಿಂ ನ ಜಾನಾತಿ , ಅನುಸನ್ಧಿವಚನಪಥಂ ನ ಜಾನಾತಿ।
Aparehipi dasahaṅgehi samannāgato vinayadharo bālo tveva saṅkhaṃ gacchati – adhikaraṇaṃ na jānāti, adhikaraṇassa mūlaṃ na jānāti, adhikaraṇasamudayaṃ na jānāti, adhikaraṇanirodhaṃ na jānāti, adhikaraṇanirodhagāminiṃ paṭipadaṃ na jānāti, vatthuṃ na jānāti, nidānaṃ 2 na jānāti, paññattiṃ na jānāti, anupaññattiṃ na jānāti , anusandhivacanapathaṃ na jānāti.
ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋ ತ್ವೇವ ಸಙ್ಖಂ ಗಚ್ಛತಿ – ಅಧಿಕರಣಂ ಜಾನಾತಿ, ಅಧಿಕರಣಸ್ಸ ಮೂಲಂ ಜಾನಾತಿ, ಅಧಿಕರಣಸಮುದಯಂ ಜಾನಾತಿ, ಅಧಿಕರಣನಿರೋಧಂ ಜಾನಾತಿ, ಅಧಿಕರಣನಿರೋಧಗಾಮಿನಿಂ ಪಟಿಪದಂ ಜಾನಾತಿ, ವತ್ಥುಂ ಜಾನಾತಿ, ನಿದಾನಂ ಜಾನಾತಿ, ಪಞ್ಞತ್ತಿಂ ಜಾನಾತಿ, ಅನುಪಞ್ಞತ್ತಿಂ ಜಾನಾತಿ, ಅನುಸನ್ಧಿವಚನಪಥಂ ಜಾನಾತಿ।
Dasahaṅgehi samannāgato vinayadharo paṇḍito tveva saṅkhaṃ gacchati – adhikaraṇaṃ jānāti, adhikaraṇassa mūlaṃ jānāti, adhikaraṇasamudayaṃ jānāti, adhikaraṇanirodhaṃ jānāti, adhikaraṇanirodhagāminiṃ paṭipadaṃ jānāti, vatthuṃ jānāti, nidānaṃ jānāti, paññattiṃ jānāti, anupaññattiṃ jānāti, anusandhivacanapathaṃ jānāti.
ಅಪರೇಹಿಪಿ ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ಞತ್ತಿಂ ನ ಜಾನಾತಿ, ಞತ್ತಿಯಾ ಕರಣಂ ನ ಜಾನಾತಿ, ನ ಪುಬ್ಬಕುಸಲೋ ಹೋತಿ, ನ ಅಪರಕುಸಲೋ ಹೋತಿ, ಅಕಾಲಞ್ಞೂ ಚ ಹೋತಿ, ಆಪತ್ತಾನಾಪತ್ತಿಂ ನ ಜಾನಾತಿ, ಲಹುಕಗರುಕಂ ಆಪತ್ತಿಂ ನ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ನ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ನ ಜಾನಾತಿ, ಆಚರಿಯಪರಮ್ಪರಾ ಖೋ ಪನಸ್ಸ ನ ಸುಗ್ಗಹಿತಾ ಹೋತಿ ನ ಸುಮನಸಿಕತಾ ನ ಸೂಪಧಾರಿತಾ।
Aparehipi dasahaṅgehi samannāgato vinayadharo bālo tveva saṅkhaṃ gacchati – ñattiṃ na jānāti, ñattiyā karaṇaṃ na jānāti, na pubbakusalo hoti, na aparakusalo hoti, akālaññū ca hoti, āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, ācariyaparamparā kho panassa na suggahitā hoti na sumanasikatā na sūpadhāritā.
ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋ ತ್ವೇವ ಸಙ್ಖಂ ಗಚ್ಛತಿ – ಞತ್ತಿಂ ಜಾನಾತಿ, ಞತ್ತಿಯಾ ಕರಣಂ ಜಾನಾತಿ, ಪುಬ್ಬಕುಸಲೋ ಹೋತಿ, ಅಪರಕುಸಲೋ ಹೋತಿ, ಕಾಲಞ್ಞೂ ಚ ಹೋತಿ, ಆಪತ್ತಾನಾಪತ್ತಿಂ ಜಾನಾತಿ, ಲಹುಕಗರುಕಂ ಆಪತ್ತಿಂ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ಜಾನಾತಿ, ಆಚರಿಯಪರಮ್ಪರಾ ಖೋ ಪನಸ್ಸ ಸುಗ್ಗಹಿತಾ ಹೋತಿ ಸುಮನಸಿಕತಾ ಸೂಪಧಾರಿತಾ।
Dasahaṅgehi samannāgato vinayadharo paṇḍito tveva saṅkhaṃ gacchati – ñattiṃ jānāti, ñattiyā karaṇaṃ jānāti, pubbakusalo hoti, aparakusalo hoti, kālaññū ca hoti, āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, ācariyaparamparā kho panassa suggahitā hoti sumanasikatā sūpadhāritā.
ಅಪರೇಹಿಪಿ ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ಆಪತ್ತಾನಾಪತ್ತಿಂ ನ ಜಾನಾತಿ, ಲಹುಕಗರುಕಂ ಆಪತ್ತಿಂ ನ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ನ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ನ ಜಾನಾತಿ, ಉಭಯಾನಿ ಖೋ ಪನಸ್ಸ ಪಾತಿಮೋಕ್ಖಾನಿ ವಿತ್ಥಾರೇನ ನ ಸ್ವಾಗತಾನಿ ಹೋನ್ತಿ ನ ಸುವಿಭತ್ತಾನಿ ನ ಸುಪ್ಪವತ್ತೀನಿ ನ ಸುವಿನಿಚ್ಛಿತಾನಿ ಸುತ್ತಸೋ ಅನುಬ್ಯಞ್ಜನಸೋ , ಆಪತ್ತಾನಾಪತ್ತಿಂ ನ ಜಾನಾತಿ, ಲಹುಕಗರುಕಂ ಆಪತ್ತಿಂ ನ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ನ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ನ ಜಾನಾತಿ, ಅಧಿಕರಣೇ ಚ ನ ವಿನಿಚ್ಛಯಕುಸಲೋ ಹೋತಿ।
Aparehipi dasahaṅgehi samannāgato vinayadharo bālo tveva saṅkhaṃ gacchati – āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, ubhayāni kho panassa pātimokkhāni vitthārena na svāgatāni honti na suvibhattāni na suppavattīni na suvinicchitāni suttaso anubyañjanaso , āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, adhikaraṇe ca na vinicchayakusalo hoti.
ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋ ತ್ವೇವ ಸಙ್ಖಂ ಗಚ್ಛತಿ – ಆಪತ್ತಾನಾಪತ್ತಿಂ ಜಾನಾತಿ, ಲಹುಕಗರುಕಂ ಆಪತ್ತಿಂ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ಜಾನಾತಿ, ಉಭಯಾನಿ ಖೋ ಪನಸ್ಸ ಪಾತಿಮೋಕ್ಖಾನಿ ವಿತ್ಥಾರೇನ ಸ್ವಾಗತಾನಿ ಹೋನ್ತಿ ಸುವಿಭತ್ತಾನಿ ಸುಪ್ಪವತ್ತೀನಿ ಸುವಿನಿಚ್ಛಿತಾನಿ ಸುತ್ತಸೋ ಅನುಬ್ಯಞ್ಜನಸೋ, ಆಪತ್ತಾನಾಪತ್ತಿಂ ಜಾನಾತಿ, ಲಹುಕಗರುಕಂ ಆಪತ್ತಿಂ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ಜಾನಾತಿ, ಅಧಿಕರಣೇ ಚ ವಿನಿಚ್ಛಯಕುಸಲೋ ಹೋತಿ।
Dasahaṅgehi samannāgato vinayadharo paṇḍito tveva saṅkhaṃ gacchati – āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso, āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, adhikaraṇe ca vinicchayakusalo hoti.
3 ದಸಹಙ್ಗೇಹಿ ಸಮನ್ನಾಗತೋ ಭಿಕ್ಖು ಉಬ್ಬಾಹಿಕಾಯ ಸಮ್ಮನ್ನಿತಬ್ಬೋ। ದಸ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದಸ ಆದೀನವಾ ರಾಜನ್ತೇಪುರಪ್ಪವೇಸನೇ। ದಸ ದಾನವತ್ಥೂನಿ। ದಸ ರತನಾನಿ। ದಸವಗ್ಗೋ ಭಿಕ್ಖುಸಙ್ಘೋ। ದಸವಗ್ಗೇನ ಗಣೇನ ಉಪಸಮ್ಪಾದೇತಬ್ಬಂ। ದಸ ಪಂಸುಕೂಲಾನಿ। ದಸ ಚೀವರಧಾರಣಾ 4। ದಸಾಹಪರಮಂ ಅತಿರೇಕಚೀವರಂ ಧಾರೇತಬ್ಬಂ । ದಸ ಸುಕ್ಕಾನಿ। ದಸ ಇತ್ಥಿಯೋ। ದಸ ಭರಿಯಾಯೋ। ವೇಸಾಲಿಯಾ ದಸ ವತ್ಥೂನಿ ದೀಪೇನ್ತಿ। ದಸ ಪುಗ್ಗಲಾ ಅವನ್ದಿಯಾ। ದಸ ಅಕ್ಕೋಸವತ್ಥೂನಿ। ದಸಹಾಕಾರೇಹಿ ಪೇಸುಞ್ಞಂ ಉಪಸಂಹರತಿ। ದಸ ಸೇನಾಸನಾನಿ। ದಸ ವರಾನಿ ಯಾಚಿಂಸು। ದಸ ಅಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನಿ। ದಸ ಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನಿ। ದಸಾನಿಸಂಸಾ ಯಾಗುಯಾ। ದಸ ಮಂಸಾ ಅಕಪ್ಪಿಯಾ। ದಸ ಪರಮಾನಿ। ದಸವಸ್ಸೇನ ಭಿಕ್ಖುನಾ ಬ್ಯತ್ತೇನ ಪಟಿಬಲೇನ ಪಬ್ಬಾಜೇತಬ್ಬಂ ಉಪಸಮ್ಪಾದೇತಬ್ಬಂ ನಿಸ್ಸಯೋ ದಾತಬ್ಬೋ ಸಾಮಣೇರೋ ಉಪಟ್ಠಾಪೇತಬ್ಬೋ। ದಸವಸ್ಸಾಯ ಭಿಕ್ಖುನಿಯಾ ಬ್ಯತ್ತಾಯ ಪಟಿಬಲಾಯ ಪಬ್ಬಾಜೇತಬ್ಬಂ ಉಪಸಮ್ಪಾದೇತಬ್ಬಂ ನಿಸ್ಸಯೋ ದಾತಬ್ಬೋ ಸಾಮಣೇರೀ ಉಪಟ್ಠಾಪೇತಬ್ಬಾ। ದಸವಸ್ಸಾಯ ಭಿಕ್ಖುನಿಯಾ ಬ್ಯತ್ತಾಯ ಪಟಿಬಲಾಯ ವುಟ್ಠಾಪನಸಮ್ಮುತಿ ಸಾದಿತಬ್ಬಾ। ದಸವಸ್ಸಾಯ ಗಿಹಿಗತಾಯ ಸಿಕ್ಖಾ ದಾತಬ್ಬಾತಿ।
5 Dasahaṅgehi samannāgato bhikkhu ubbāhikāya sammannitabbo. Dasa atthavase paṭicca tathāgatena sāvakānaṃ sikkhāpadaṃ paññattaṃ. Dasa ādīnavā rājantepurappavesane. Dasa dānavatthūni. Dasa ratanāni. Dasavaggo bhikkhusaṅgho. Dasavaggena gaṇena upasampādetabbaṃ. Dasa paṃsukūlāni. Dasa cīvaradhāraṇā 6. Dasāhaparamaṃ atirekacīvaraṃ dhāretabbaṃ . Dasa sukkāni. Dasa itthiyo. Dasa bhariyāyo. Vesāliyā dasa vatthūni dīpenti. Dasa puggalā avandiyā. Dasa akkosavatthūni. Dasahākārehi pesuññaṃ upasaṃharati. Dasa senāsanāni. Dasa varāni yāciṃsu. Dasa adhammikāni pātimokkhaṭṭhapanāni. Dasa dhammikāni pātimokkhaṭṭhapanāni. Dasānisaṃsā yāguyā. Dasa maṃsā akappiyā. Dasa paramāni. Dasavassena bhikkhunā byattena paṭibalena pabbājetabbaṃ upasampādetabbaṃ nissayo dātabbo sāmaṇero upaṭṭhāpetabbo. Dasavassāya bhikkhuniyā byattāya paṭibalāya pabbājetabbaṃ upasampādetabbaṃ nissayo dātabbo sāmaṇerī upaṭṭhāpetabbā. Dasavassāya bhikkhuniyā byattāya paṭibalāya vuṭṭhāpanasammuti sāditabbā. Dasavassāya gihigatāya sikkhā dātabbāti.
ದಸಕಂ ನಿಟ್ಠಿತಂ।
Dasakaṃ niṭṭhitaṃ.
ತಸ್ಸುದ್ದಾನಂ –
Tassuddānaṃ –
ಆಘಾತಂ ವಿನಯಂ ವತ್ಥು, ಮಿಚ್ಛಾ ಸಮ್ಮಾ ಚ ಅನ್ತಗಾ।
Āghātaṃ vinayaṃ vatthu, micchā sammā ca antagā;
ಮಿಚ್ಛತ್ತಾ ಚೇವ ಸಮ್ಮತ್ತಾ, ಅಕುಸಲಾ ಕುಸಲಾಪಿ ಚ॥
Micchattā ceva sammattā, akusalā kusalāpi ca.
ಸಲಾಕಾ ಅಧಮ್ಮಾ ಧಮ್ಮಾ, ಸಾಮಣೇರಾ ಚ ನಾಸನಾ।
Salākā adhammā dhammā, sāmaṇerā ca nāsanā;
ಭಾಸಾಧಿಕರಣಞ್ಚೇವ, ಞತ್ತಿಲಹುಕಮೇವ ಚ॥
Bhāsādhikaraṇañceva, ñattilahukameva ca.
ಲಹುಕಾ ಗರುಕಾ ಏತೇ, ಕಣ್ಹಸುಕ್ಕಾ ವಿಜಾನಥ।
Lahukā garukā ete, kaṇhasukkā vijānatha;
ಉಬ್ಬಾಹಿಕಾ ಚ ಸಿಕ್ಖಾ ಚ, ಅನ್ತೇಪುರೇ ಚ ವತ್ಥೂನಿ॥
Ubbāhikā ca sikkhā ca, antepure ca vatthūni.
ರತನಂ ದಸವಗ್ಗೋ ಚ, ತಥೇವ ಉಪಸಮ್ಪದಾ।
Ratanaṃ dasavaggo ca, tatheva upasampadā;
ಪಂಸುಕೂಲಧಾರಣಾ ಚ, ದಸಾಹಸುಕ್ಕಇತ್ಥಿಯೋ॥
Paṃsukūladhāraṇā ca, dasāhasukkaitthiyo.
ಭರಿಯಾ ದಸ ವತ್ಥೂನಿ, ಅವನ್ದಿಯಕ್ಕೋಸೇನ ಚ।
Bhariyā dasa vatthūni, avandiyakkosena ca;
ಪೇಸುಞ್ಞಞ್ಚೇವ ಸೇನಾನಿ, ವರಾನಿ ಚ ಅಧಮ್ಮಿಕಾ॥
Pesuññañceva senāni, varāni ca adhammikā.
ಧಮ್ಮಿಕಾ ಯಾಗುಮಂಸಾ ಚ, ಪರಮಾ ಭಿಕ್ಖು ಭಿಕ್ಖುನೀ।
Dhammikā yāgumaṃsā ca, paramā bhikkhu bhikkhunī;
ವುಟ್ಠಾಪನಾ ಗಿಹಿಗತಾ, ದಸಕಾ ಸುಪ್ಪಕಾಸಿತಾತಿ॥
Vuṭṭhāpanā gihigatā, dasakā suppakāsitāti.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / ದಸಕವಾರವಣ್ಣನಾ • Dasakavāravaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ದಸಕವಾರವಣ್ಣನಾ • Dasakavāravaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ದಸಕವಾರವಣ್ಣನಾ • Dasakavāravaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಛಕ್ಕವಾರಾದಿವಣ್ಣನಾ • Chakkavārādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಏಕುತ್ತರಿಕನಯೋ ದಸಕವಾರವಣ್ಣನಾ • Ekuttarikanayo dasakavāravaṇṇanā
