| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
10. දසකවාරො
10. Dasakavāro
330. දස ආඝාතවත්‌ථූනි. දස ආඝාතපටිවිනයා. දස විනීතවත්‌ථූනි. දසවත්‌ථුකා මිච්‌ඡාදිට්‌ඨි. දසවත්‌ථුකා සම්‌මාදිට්‌ඨි. දස අන්‌තග්‌ගාහිකා දිට්‌ඨි. දස මිච්‌ඡත්‌තා. දස සම්‌මත්‌තා. දස අකුසලකම්‌මපථා. දස කුසලකම්‌මපථා. දස අධම්‌මිකා සලාකග්‌ගාහා. දස ධම්‌මිකා සලාකග්‌ගාහා. සාමණෙරානං දස සික්‌ඛාපදානි. දසහඞ්‌ගෙහි සමන්‌නාගතො සාමණෙරො නාසෙතබ්‌බො.
330. Dasa āghātavatthūni. Dasa āghātapaṭivinayā. Dasa vinītavatthūni. Dasavatthukā micchādiṭṭhi. Dasavatthukā sammādiṭṭhi. Dasa antaggāhikā diṭṭhi. Dasa micchattā. Dasa sammattā. Dasa akusalakammapathā. Dasa kusalakammapathā. Dasa adhammikā salākaggāhā. Dasa dhammikā salākaggāhā. Sāmaṇerānaṃ dasa sikkhāpadāni. Dasahaṅgehi samannāgato sāmaṇero nāsetabbo.
දසහඞ්‌ගෙහි සමන්‌නාගතො විනයධරො බාලො ත්‌වෙව සඞ්‌ඛං ගච්‌ඡති – අත්‌තනො භාසපරියන්‌තං න උග්‌ගණ්‌හාති, පරස්‌ස භාසපරියන්‌තං න උග්‌ගණ්‌හාති , අත්‌තනො භාසපරියන්‌තං අනුග්‌ගහෙත්‌වා පරස්‌ස භාසපරියන්‌තං අනුග්‌ගහෙත්‌වා අධම්‌මෙන කාරෙති, අප්‌පටිඤ්‌ඤාය ආපත්‌තිං න ජානාති, ආපත්‌තියා මූලං න ජානාති, ආපත්‌තිසමුදයං න ජානාති, ආපත්‌තිනිරොධං න ජානාති, ආපත්‌තිනිරොධගාමිනිං පටිපදං න ජානාති.
Dasahaṅgehi samannāgato vinayadharo bālo tveva saṅkhaṃ gacchati – attano bhāsapariyantaṃ na uggaṇhāti, parassa bhāsapariyantaṃ na uggaṇhāti , attano bhāsapariyantaṃ anuggahetvā parassa bhāsapariyantaṃ anuggahetvā adhammena kāreti, appaṭiññāya āpattiṃ na jānāti, āpattiyā mūlaṃ na jānāti, āpattisamudayaṃ na jānāti, āpattinirodhaṃ na jānāti, āpattinirodhagāminiṃ paṭipadaṃ na jānāti.
දසහඞ්‌ගෙහි සමන්‌නාගතො විනයධරො පණ්‌ඩිතො ත්‌වෙව සඞ්‌ඛං ගච්‌ඡති – අත්‌තනො භාසපරියන්‌තං උග්‌ගණ්‌හාති, පරස්‌ස භාසපරියන්‌තං උග්‌ගණ්‌හාති, අත්‌තනො භාසපරියන්‌තං උග්‌ගහෙත්‌වා පරස්‌ස භාසපරියන්‌තං උග්‌ගහෙත්‌වා ධම්‌මෙන කාරෙති, පටිඤ්‌ඤාය ආපත්‌තිං ජානාති, ආපත්‌තියා මූලං ජානාති, ආපත්‌තිසමුදයං ජානාති, ආපත්‌තිනිරොධං ජානාති, ආපත්‌තිනිරොධගාමිනිං පටිපදං ජානාති.
Dasahaṅgehi samannāgato vinayadharo paṇḍito tveva saṅkhaṃ gacchati – attano bhāsapariyantaṃ uggaṇhāti, parassa bhāsapariyantaṃ uggaṇhāti, attano bhāsapariyantaṃ uggahetvā parassa bhāsapariyantaṃ uggahetvā dhammena kāreti, paṭiññāya āpattiṃ jānāti, āpattiyā mūlaṃ jānāti, āpattisamudayaṃ jānāti, āpattinirodhaṃ jānāti, āpattinirodhagāminiṃ paṭipadaṃ jānāti.
අපරෙහිපි දසහඞ්‌ගෙහි සමන්‌නාගතො විනයධරො බාලො ත්‌වෙව සඞ්‌ඛං ගච්‌ඡති – අධිකරණං න ජානාති, අධිකරණස්‌ස මූලං න ජානාති, අධිකරණසමුදයං න ජානාති, අධිකරණනිරොධං න ජානාති, අධිකරණනිරොධගාමිනිං පටිපදං න ජානාති, වත්‌ථුං න ජානාති, නිදානං 1 න ජානාති, පඤ්‌ඤත්‌තිං න ජානාති, අනුපඤ්‌ඤත්‌තිං න ජානාති , අනුසන්‌ධිවචනපථං න ජානාති.
Aparehipi dasahaṅgehi samannāgato vinayadharo bālo tveva saṅkhaṃ gacchati – adhikaraṇaṃ na jānāti, adhikaraṇassa mūlaṃ na jānāti, adhikaraṇasamudayaṃ na jānāti, adhikaraṇanirodhaṃ na jānāti, adhikaraṇanirodhagāminiṃ paṭipadaṃ na jānāti, vatthuṃ na jānāti, nidānaṃ 2 na jānāti, paññattiṃ na jānāti, anupaññattiṃ na jānāti , anusandhivacanapathaṃ na jānāti.
දසහඞ්‌ගෙහි සමන්‌නාගතො විනයධරො පණ්‌ඩිතො ත්‌වෙව සඞ්‌ඛං ගච්‌ඡති – අධිකරණං ජානාති, අධිකරණස්‌ස මූලං ජානාති, අධිකරණසමුදයං ජානාති, අධිකරණනිරොධං ජානාති, අධිකරණනිරොධගාමිනිං පටිපදං ජානාති, වත්‌ථුං ජානාති, නිදානං ජානාති, පඤ්‌ඤත්‌තිං ජානාති, අනුපඤ්‌ඤත්‌තිං ජානාති, අනුසන්‌ධිවචනපථං ජානාති.
Dasahaṅgehi samannāgato vinayadharo paṇḍito tveva saṅkhaṃ gacchati – adhikaraṇaṃ jānāti, adhikaraṇassa mūlaṃ jānāti, adhikaraṇasamudayaṃ jānāti, adhikaraṇanirodhaṃ jānāti, adhikaraṇanirodhagāminiṃ paṭipadaṃ jānāti, vatthuṃ jānāti, nidānaṃ jānāti, paññattiṃ jānāti, anupaññattiṃ jānāti, anusandhivacanapathaṃ jānāti.
අපරෙහිපි දසහඞ්‌ගෙහි සමන්‌නාගතො විනයධරො බාලො ත්‌වෙව සඞ්‌ඛං ගච්‌ඡති – ඤත්‌තිං න ජානාති, ඤත්‌තියා කරණං න ජානාති, න පුබ්‌බකුසලො හොති, න අපරකුසලො හොති, අකාලඤ්‌ඤූ ච හොති, ආපත්‌තානාපත්‌තිං න ජානාති, ලහුකගරුකං ආපත්‌තිං න ජානාති, සාවසෙසානවසෙසං ආපත්‌තිං න ජානාති, දුට්‌ඨුල්‌ලාදුට්‌ඨුල්‌ලං ආපත්‌තිං න ජානාති, ආචරියපරම්‌පරා ඛො පනස්‌ස න සුග්‌ගහිතා හොති න සුමනසිකතා න සූපධාරිතා.
Aparehipi dasahaṅgehi samannāgato vinayadharo bālo tveva saṅkhaṃ gacchati – ñattiṃ na jānāti, ñattiyā karaṇaṃ na jānāti, na pubbakusalo hoti, na aparakusalo hoti, akālaññū ca hoti, āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, ācariyaparamparā kho panassa na suggahitā hoti na sumanasikatā na sūpadhāritā.
දසහඞ්‌ගෙහි සමන්‌නාගතො විනයධරො පණ්‌ඩිතො ත්‌වෙව සඞ්‌ඛං ගච්‌ඡති – ඤත්‌තිං ජානාති, ඤත්‌තියා කරණං ජානාති, පුබ්‌බකුසලො හොති, අපරකුසලො හොති, කාලඤ්‌ඤූ ච හොති, ආපත්‌තානාපත්‌තිං ජානාති, ලහුකගරුකං ආපත්‌තිං ජානාති, සාවසෙසානවසෙසං ආපත්‌තිං ජානාති, දුට්‌ඨුල්‌ලාදුට්‌ඨුල්‌ලං ආපත්‌තිං ජානාති, ආචරියපරම්‌පරා ඛො පනස්‌ස සුග්‌ගහිතා හොති සුමනසිකතා සූපධාරිතා.
Dasahaṅgehi samannāgato vinayadharo paṇḍito tveva saṅkhaṃ gacchati – ñattiṃ jānāti, ñattiyā karaṇaṃ jānāti, pubbakusalo hoti, aparakusalo hoti, kālaññū ca hoti, āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, ācariyaparamparā kho panassa suggahitā hoti sumanasikatā sūpadhāritā.
අපරෙහිපි දසහඞ්‌ගෙහි සමන්‌නාගතො විනයධරො බාලො ත්‌වෙව සඞ්‌ඛං ගච්‌ඡති – ආපත්‌තානාපත්‌තිං න ජානාති, ලහුකගරුකං ආපත්‌තිං න ජානාති, සාවසෙසානවසෙසං ආපත්‌තිං න ජානාති, දුට්‌ඨුල්‌ලාදුට්‌ඨුල්‌ලං ආපත්‌තිං න ජානාති, උභයානි ඛො පනස්‌ස පාතිමොක්‌ඛානි විත්‌ථාරෙන න ස්‌වාගතානි හොන්‌ති න සුවිභත්‌තානි න සුප්‌පවත්‌තීනි න සුවිනිච්‌ඡිතානි සුත්‌තසො අනුබ්‍යඤ්‌ජනසො , ආපත්‌තානාපත්‌තිං න ජානාති, ලහුකගරුකං ආපත්‌තිං න ජානාති, සාවසෙසානවසෙසං ආපත්‌තිං න ජානාති, දුට්‌ඨුල්‌ලාදුට්‌ඨුල්‌ලං ආපත්‌තිං න ජානාති, අධිකරණෙ ච න විනිච්‌ඡයකුසලො හොති.
Aparehipi dasahaṅgehi samannāgato vinayadharo bālo tveva saṅkhaṃ gacchati – āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, ubhayāni kho panassa pātimokkhāni vitthārena na svāgatāni honti na suvibhattāni na suppavattīni na suvinicchitāni suttaso anubyañjanaso , āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, adhikaraṇe ca na vinicchayakusalo hoti.
දසහඞ්‌ගෙහි සමන්‌නාගතො විනයධරො පණ්‌ඩිතො ත්‌වෙව සඞ්‌ඛං ගච්‌ඡති – ආපත්‌තානාපත්‌තිං ජානාති, ලහුකගරුකං ආපත්‌තිං ජානාති, සාවසෙසානවසෙසං ආපත්‌තිං ජානාති, දුට්‌ඨුල්‌ලාදුට්‌ඨුල්‌ලං ආපත්‌තිං ජානාති, උභයානි ඛො පනස්‌ස පාතිමොක්‌ඛානි විත්‌ථාරෙන ස්‌වාගතානි හොන්‌ති සුවිභත්‌තානි සුප්‌පවත්‌තීනි සුවිනිච්‌ඡිතානි සුත්‌තසො අනුබ්‍යඤ්‌ජනසො, ආපත්‌තානාපත්‌තිං ජානාති, ලහුකගරුකං ආපත්‌තිං ජානාති, සාවසෙසානවසෙසං ආපත්‌තිං ජානාති, දුට්‌ඨුල්‌ලාදුට්‌ඨුල්‌ලං ආපත්‌තිං ජානාති, අධිකරණෙ ච විනිච්‌ඡයකුසලො හොති.
Dasahaṅgehi samannāgato vinayadharo paṇḍito tveva saṅkhaṃ gacchati – āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso, āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, adhikaraṇe ca vinicchayakusalo hoti.
3 දසහඞ්‌ගෙහි සමන්‌නාගතො භික්‌ඛු උබ්‌බාහිකාය සම්‌මන්‌නිතබ්‌බො. දස අත්‌ථවසෙ පටිච්‌ච තථාගතෙන සාවකානං සික්‌ඛාපදං පඤ්‌ඤත්‌තං. දස ආදීනවා රාජන්‌තෙපුරප්‌පවෙසනෙ. දස දානවත්‌ථූනි. දස රතනානි. දසවග්‌ගො භික්‌ඛුසඞ්‌ඝො. දසවග්‌ගෙන ගණෙන උපසම්‌පාදෙතබ්‌බං. දස පංසුකූලානි. දස චීවරධාරණා 4. දසාහපරමං අතිරෙකචීවරං ධාරෙතබ්‌බං . දස සුක්‌කානි. දස ඉත්‌ථියො. දස භරියායො. වෙසාලියා දස වත්‌ථූනි දීපෙන්‌ති. දස පුග්‌ගලා අවන්‌දියා. දස අක්‌කොසවත්‌ථූනි. දසහාකාරෙහි පෙසුඤ්‌ඤං උපසංහරති. දස සෙනාසනානි. දස වරානි යාචිංසු. දස අධම්‌මිකානි පාතිමොක්‌ඛට්‌ඨපනානි. දස ධම්‌මිකානි පාතිමොක්‌ඛට්‌ඨපනානි. දසානිසංසා යාගුයා. දස මංසා අකප්‌පියා. දස පරමානි. දසවස්‌සෙන භික්‌ඛුනා බ්‍යත්‌තෙන පටිබලෙන පබ්‌බාජෙතබ්‌බං උපසම්‌පාදෙතබ්‌බං නිස්‌සයො දාතබ්‌බො සාමණෙරො උපට්‌ඨාපෙතබ්‌බො. දසවස්‌සාය භික්‌ඛුනියා බ්‍යත්‌තාය පටිබලාය පබ්‌බාජෙතබ්‌බං උපසම්‌පාදෙතබ්‌බං නිස්‌සයො දාතබ්‌බො සාමණෙරී උපට්‌ඨාපෙතබ්‌බා. දසවස්‌සාය භික්‌ඛුනියා බ්‍යත්‌තාය පටිබලාය වුට්‌ඨාපනසම්‌මුති සාදිතබ්‌බා. දසවස්‌සාය ගිහිගතාය සික්‌ඛා දාතබ්‌බාති.
5 Dasahaṅgehi samannāgato bhikkhu ubbāhikāya sammannitabbo. Dasa atthavase paṭicca tathāgatena sāvakānaṃ sikkhāpadaṃ paññattaṃ. Dasa ādīnavā rājantepurappavesane. Dasa dānavatthūni. Dasa ratanāni. Dasavaggo bhikkhusaṅgho. Dasavaggena gaṇena upasampādetabbaṃ. Dasa paṃsukūlāni. Dasa cīvaradhāraṇā 6. Dasāhaparamaṃ atirekacīvaraṃ dhāretabbaṃ . Dasa sukkāni. Dasa itthiyo. Dasa bhariyāyo. Vesāliyā dasa vatthūni dīpenti. Dasa puggalā avandiyā. Dasa akkosavatthūni. Dasahākārehi pesuññaṃ upasaṃharati. Dasa senāsanāni. Dasa varāni yāciṃsu. Dasa adhammikāni pātimokkhaṭṭhapanāni. Dasa dhammikāni pātimokkhaṭṭhapanāni. Dasānisaṃsā yāguyā. Dasa maṃsā akappiyā. Dasa paramāni. Dasavassena bhikkhunā byattena paṭibalena pabbājetabbaṃ upasampādetabbaṃ nissayo dātabbo sāmaṇero upaṭṭhāpetabbo. Dasavassāya bhikkhuniyā byattāya paṭibalāya pabbājetabbaṃ upasampādetabbaṃ nissayo dātabbo sāmaṇerī upaṭṭhāpetabbā. Dasavassāya bhikkhuniyā byattāya paṭibalāya vuṭṭhāpanasammuti sāditabbā. Dasavassāya gihigatāya sikkhā dātabbāti.
දසකං නිට්‌ඨිතං.
Dasakaṃ niṭṭhitaṃ.
තස්‌සුද්‌දානං –
Tassuddānaṃ –
ආඝාතං විනයං වත්‌ථු, මිච්‌ඡා සම්‌මා ච අන්‌තගා;
Āghātaṃ vinayaṃ vatthu, micchā sammā ca antagā;
මිච්‌ඡත්‌තා චෙව සම්‌මත්‌තා, අකුසලා කුසලාපි ච.
Micchattā ceva sammattā, akusalā kusalāpi ca.
සලාකා අධම්‌මා ධම්‌මා, සාමණෙරා ච නාසනා;
Salākā adhammā dhammā, sāmaṇerā ca nāsanā;
භාසාධිකරණඤ්‌චෙව, ඤත්‌තිලහුකමෙව ච.
Bhāsādhikaraṇañceva, ñattilahukameva ca.
ලහුකා ගරුකා එතෙ, කණ්‌හසුක්‌කා විජානථ;
Lahukā garukā ete, kaṇhasukkā vijānatha;
උබ්‌බාහිකා ච සික්‌ඛා ච, අන්‌තෙපුරෙ ච වත්‌ථූනි.
Ubbāhikā ca sikkhā ca, antepure ca vatthūni.
රතනං දසවග්‌ගො ච, තථෙව උපසම්‌පදා;
Ratanaṃ dasavaggo ca, tatheva upasampadā;
පංසුකූලධාරණා ච, දසාහසුක්‌කඉත්‌ථියො.
Paṃsukūladhāraṇā ca, dasāhasukkaitthiyo.
භරියා දස වත්‌ථූනි, අවන්‌දියක්‌කොසෙන ච;
Bhariyā dasa vatthūni, avandiyakkosena ca;
පෙසුඤ්‌ඤඤ්‌චෙව සෙනානි, වරානි ච අධම්‌මිකා.
Pesuññañceva senāni, varāni ca adhammikā.
ධම්‌මිකා යාගුමංසා ච, පරමා භික්‌ඛු භික්‌ඛුනී;
Dhammikā yāgumaṃsā ca, paramā bhikkhu bhikkhunī;
වුට්‌ඨාපනා ගිහිගතා, දසකා සුප්‌පකාසිතාති.
Vuṭṭhāpanā gihigatā, dasakā suppakāsitāti.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / දසකවාරවණ්‌ණනා • Dasakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / දසකවාරවණ්‌ණනා • Dasakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / දසකවාරවණ්‌ණනා • Dasakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ඡක්‌කවාරාදිවණ්‌ණනා • Chakkavārādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / එකුත්‌තරිකනයො දසකවාරවණ්‌ණනා • Ekuttarikanayo dasakavāravaṇṇanā
