| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
༡༠. དསཀཝཱརོ
10. Dasakavāro
༣༣༠. དས ཨཱགྷཱཏཝཏྠཱུནི། དས ཨཱགྷཱཏཔཊིཝིནཡཱ། དས ཝིནཱིཏཝཏྠཱུནི། དསཝཏྠུཀཱ མིཙྪཱདིཊྛི། དསཝཏྠུཀཱ སམྨཱདིཊྛི། དས ཨནྟགྒཱཧིཀཱ དིཊྛི། དས མིཙྪཏྟཱ། དས སམྨཏྟཱ། དས ཨཀུསལཀམྨཔཐཱ། དས ཀུསལཀམྨཔཐཱ། དས ཨདྷམྨིཀཱ སལཱཀགྒཱཧཱ། དས དྷམྨིཀཱ སལཱཀགྒཱཧཱ། སཱམཎེརཱནཾ དས སིཀྑཱཔདཱནི། དསཧངྒེཧི སམནྣཱགཏོ སཱམཎེརོ ནཱསེཏབྦོ།
330. Dasa āghātavatthūni. Dasa āghātapaṭivinayā. Dasa vinītavatthūni. Dasavatthukā micchādiṭṭhi. Dasavatthukā sammādiṭṭhi. Dasa antaggāhikā diṭṭhi. Dasa micchattā. Dasa sammattā. Dasa akusalakammapathā. Dasa kusalakammapathā. Dasa adhammikā salākaggāhā. Dasa dhammikā salākaggāhā. Sāmaṇerānaṃ dasa sikkhāpadāni. Dasahaṅgehi samannāgato sāmaṇero nāsetabbo.
དསཧངྒེཧི སམནྣཱགཏོ ཝིནཡདྷརོ བཱལོ ཏྭེཝ སངྑཾ གཙྪཏི – ཨཏྟནོ བྷཱསཔརིཡནྟཾ ན ཨུགྒཎྷཱཏི, པརསྶ བྷཱསཔརིཡནྟཾ ན ཨུགྒཎྷཱཏི , ཨཏྟནོ བྷཱསཔརིཡནྟཾ ཨནུགྒཧེཏྭཱ པརསྶ བྷཱསཔརིཡནྟཾ ཨནུགྒཧེཏྭཱ ཨདྷམྨེན ཀཱརེཏི, ཨཔྤཊིཉྙཱཡ ཨཱཔཏྟིཾ ན ཛཱནཱཏི, ཨཱཔཏྟིཡཱ མཱུལཾ ན ཛཱནཱཏི, ཨཱཔཏྟིསམུདཡཾ ན ཛཱནཱཏི, ཨཱཔཏྟིནིརོདྷཾ ན ཛཱནཱཏི, ཨཱཔཏྟིནིརོདྷགཱམིནིཾ པཊིཔདཾ ན ཛཱནཱཏི།
Dasahaṅgehi samannāgato vinayadharo bālo tveva saṅkhaṃ gacchati – attano bhāsapariyantaṃ na uggaṇhāti, parassa bhāsapariyantaṃ na uggaṇhāti , attano bhāsapariyantaṃ anuggahetvā parassa bhāsapariyantaṃ anuggahetvā adhammena kāreti, appaṭiññāya āpattiṃ na jānāti, āpattiyā mūlaṃ na jānāti, āpattisamudayaṃ na jānāti, āpattinirodhaṃ na jānāti, āpattinirodhagāminiṃ paṭipadaṃ na jānāti.
དསཧངྒེཧི སམནྣཱགཏོ ཝིནཡདྷརོ པཎྜིཏོ ཏྭེཝ སངྑཾ གཙྪཏི – ཨཏྟནོ བྷཱསཔརིཡནྟཾ ཨུགྒཎྷཱཏི, པརསྶ བྷཱསཔརིཡནྟཾ ཨུགྒཎྷཱཏི, ཨཏྟནོ བྷཱསཔརིཡནྟཾ ཨུགྒཧེཏྭཱ པརསྶ བྷཱསཔརིཡནྟཾ ཨུགྒཧེཏྭཱ དྷམྨེན ཀཱརེཏི, པཊིཉྙཱཡ ཨཱཔཏྟིཾ ཛཱནཱཏི, ཨཱཔཏྟིཡཱ མཱུལཾ ཛཱནཱཏི, ཨཱཔཏྟིསམུདཡཾ ཛཱནཱཏི, ཨཱཔཏྟིནིརོདྷཾ ཛཱནཱཏི, ཨཱཔཏྟིནིརོདྷགཱམིནིཾ པཊིཔདཾ ཛཱནཱཏི།
Dasahaṅgehi samannāgato vinayadharo paṇḍito tveva saṅkhaṃ gacchati – attano bhāsapariyantaṃ uggaṇhāti, parassa bhāsapariyantaṃ uggaṇhāti, attano bhāsapariyantaṃ uggahetvā parassa bhāsapariyantaṃ uggahetvā dhammena kāreti, paṭiññāya āpattiṃ jānāti, āpattiyā mūlaṃ jānāti, āpattisamudayaṃ jānāti, āpattinirodhaṃ jānāti, āpattinirodhagāminiṃ paṭipadaṃ jānāti.
ཨཔརེཧིཔི དསཧངྒེཧི སམནྣཱགཏོ ཝིནཡདྷརོ བཱལོ ཏྭེཝ སངྑཾ གཙྪཏི – ཨདྷིཀརཎཾ ན ཛཱནཱཏི, ཨདྷིཀརཎསྶ མཱུལཾ ན ཛཱནཱཏི, ཨདྷིཀརཎསམུདཡཾ ན ཛཱནཱཏི, ཨདྷིཀརཎནིརོདྷཾ ན ཛཱནཱཏི, ཨདྷིཀརཎནིརོདྷགཱམིནིཾ པཊིཔདཾ ན ཛཱནཱཏི, ཝཏྠུཾ ན ཛཱནཱཏི, ནིདཱནཾ 1 ན ཛཱནཱཏི, པཉྙཏྟིཾ ན ཛཱནཱཏི, ཨནུཔཉྙཏྟིཾ ན ཛཱནཱཏི , ཨནུསནྡྷིཝཙནཔཐཾ ན ཛཱནཱཏི།
Aparehipi dasahaṅgehi samannāgato vinayadharo bālo tveva saṅkhaṃ gacchati – adhikaraṇaṃ na jānāti, adhikaraṇassa mūlaṃ na jānāti, adhikaraṇasamudayaṃ na jānāti, adhikaraṇanirodhaṃ na jānāti, adhikaraṇanirodhagāminiṃ paṭipadaṃ na jānāti, vatthuṃ na jānāti, nidānaṃ 2 na jānāti, paññattiṃ na jānāti, anupaññattiṃ na jānāti , anusandhivacanapathaṃ na jānāti.
དསཧངྒེཧི སམནྣཱགཏོ ཝིནཡདྷརོ པཎྜིཏོ ཏྭེཝ སངྑཾ གཙྪཏི – ཨདྷིཀརཎཾ ཛཱནཱཏི, ཨདྷིཀརཎསྶ མཱུལཾ ཛཱནཱཏི, ཨདྷིཀརཎསམུདཡཾ ཛཱནཱཏི, ཨདྷིཀརཎནིརོདྷཾ ཛཱནཱཏི, ཨདྷིཀརཎནིརོདྷགཱམིནིཾ པཊིཔདཾ ཛཱནཱཏི, ཝཏྠུཾ ཛཱནཱཏི, ནིདཱནཾ ཛཱནཱཏི, པཉྙཏྟིཾ ཛཱནཱཏི, ཨནུཔཉྙཏྟིཾ ཛཱནཱཏི, ཨནུསནྡྷིཝཙནཔཐཾ ཛཱནཱཏི།
Dasahaṅgehi samannāgato vinayadharo paṇḍito tveva saṅkhaṃ gacchati – adhikaraṇaṃ jānāti, adhikaraṇassa mūlaṃ jānāti, adhikaraṇasamudayaṃ jānāti, adhikaraṇanirodhaṃ jānāti, adhikaraṇanirodhagāminiṃ paṭipadaṃ jānāti, vatthuṃ jānāti, nidānaṃ jānāti, paññattiṃ jānāti, anupaññattiṃ jānāti, anusandhivacanapathaṃ jānāti.
ཨཔརེཧིཔི དསཧངྒེཧི སམནྣཱགཏོ ཝིནཡདྷརོ བཱལོ ཏྭེཝ སངྑཾ གཙྪཏི – ཉཏྟིཾ ན ཛཱནཱཏི, ཉཏྟིཡཱ ཀརཎཾ ན ཛཱནཱཏི, ན པུབྦཀུསལོ ཧོཏི, ན ཨཔརཀུསལོ ཧོཏི, ཨཀཱལཉྙཱུ ཙ ཧོཏི, ཨཱཔཏྟཱནཱཔཏྟིཾ ན ཛཱནཱཏི, ལཧུཀགརུཀཾ ཨཱཔཏྟིཾ ན ཛཱནཱཏི, སཱཝསེསཱནཝསེསཾ ཨཱཔཏྟིཾ ན ཛཱནཱཏི, དུཊྛུལླཱདུཊྛུལླཾ ཨཱཔཏྟིཾ ན ཛཱནཱཏི, ཨཱཙརིཡཔརམྤརཱ ཁོ པནསྶ ན སུགྒཧིཏཱ ཧོཏི ན སུམནསིཀཏཱ ན སཱུཔདྷཱརིཏཱ།
Aparehipi dasahaṅgehi samannāgato vinayadharo bālo tveva saṅkhaṃ gacchati – ñattiṃ na jānāti, ñattiyā karaṇaṃ na jānāti, na pubbakusalo hoti, na aparakusalo hoti, akālaññū ca hoti, āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, ācariyaparamparā kho panassa na suggahitā hoti na sumanasikatā na sūpadhāritā.
དསཧངྒེཧི སམནྣཱགཏོ ཝིནཡདྷརོ པཎྜིཏོ ཏྭེཝ སངྑཾ གཙྪཏི – ཉཏྟིཾ ཛཱནཱཏི, ཉཏྟིཡཱ ཀརཎཾ ཛཱནཱཏི, པུབྦཀུསལོ ཧོཏི, ཨཔརཀུསལོ ཧོཏི, ཀཱལཉྙཱུ ཙ ཧོཏི, ཨཱཔཏྟཱནཱཔཏྟིཾ ཛཱནཱཏི, ལཧུཀགརུཀཾ ཨཱཔཏྟིཾ ཛཱནཱཏི, སཱཝསེསཱནཝསེསཾ ཨཱཔཏྟིཾ ཛཱནཱཏི, དུཊྛུལླཱདུཊྛུལླཾ ཨཱཔཏྟིཾ ཛཱནཱཏི, ཨཱཙརིཡཔརམྤརཱ ཁོ པནསྶ སུགྒཧིཏཱ ཧོཏི སུམནསིཀཏཱ སཱུཔདྷཱརིཏཱ།
Dasahaṅgehi samannāgato vinayadharo paṇḍito tveva saṅkhaṃ gacchati – ñattiṃ jānāti, ñattiyā karaṇaṃ jānāti, pubbakusalo hoti, aparakusalo hoti, kālaññū ca hoti, āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, ācariyaparamparā kho panassa suggahitā hoti sumanasikatā sūpadhāritā.
ཨཔརེཧིཔི དསཧངྒེཧི སམནྣཱགཏོ ཝིནཡདྷརོ བཱལོ ཏྭེཝ སངྑཾ གཙྪཏི – ཨཱཔཏྟཱནཱཔཏྟིཾ ན ཛཱནཱཏི, ལཧུཀགརུཀཾ ཨཱཔཏྟིཾ ན ཛཱནཱཏི, སཱཝསེསཱནཝསེསཾ ཨཱཔཏྟིཾ ན ཛཱནཱཏི, དུཊྛུལླཱདུཊྛུལླཾ ཨཱཔཏྟིཾ ན ཛཱནཱཏི, ཨུབྷཡཱནི ཁོ པནསྶ པཱཏིམོཀྑཱནི ཝིཏྠཱརེན ན སྭཱགཏཱནི ཧོནྟི ན སུཝིབྷཏྟཱནི ན སུཔྤཝཏྟཱིནི ན སུཝིནིཙྪིཏཱནི སུཏྟསོ ཨནུབྱཉྫནསོ , ཨཱཔཏྟཱནཱཔཏྟིཾ ན ཛཱནཱཏི, ལཧུཀགརུཀཾ ཨཱཔཏྟིཾ ན ཛཱནཱཏི, སཱཝསེསཱནཝསེསཾ ཨཱཔཏྟིཾ ན ཛཱནཱཏི, དུཊྛུལླཱདུཊྛུལླཾ ཨཱཔཏྟིཾ ན ཛཱནཱཏི, ཨདྷིཀརཎེ ཙ ན ཝིནིཙྪཡཀུསལོ ཧོཏི།
Aparehipi dasahaṅgehi samannāgato vinayadharo bālo tveva saṅkhaṃ gacchati – āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, ubhayāni kho panassa pātimokkhāni vitthārena na svāgatāni honti na suvibhattāni na suppavattīni na suvinicchitāni suttaso anubyañjanaso , āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, adhikaraṇe ca na vinicchayakusalo hoti.
དསཧངྒེཧི སམནྣཱགཏོ ཝིནཡདྷརོ པཎྜིཏོ ཏྭེཝ སངྑཾ གཙྪཏི – ཨཱཔཏྟཱནཱཔཏྟིཾ ཛཱནཱཏི, ལཧུཀགརུཀཾ ཨཱཔཏྟིཾ ཛཱནཱཏི, སཱཝསེསཱནཝསེསཾ ཨཱཔཏྟིཾ ཛཱནཱཏི, དུཊྛུལླཱདུཊྛུལླཾ ཨཱཔཏྟིཾ ཛཱནཱཏི, ཨུབྷཡཱནི ཁོ པནསྶ པཱཏིམོཀྑཱནི ཝིཏྠཱརེན སྭཱགཏཱནི ཧོནྟི སུཝིབྷཏྟཱནི སུཔྤཝཏྟཱིནི སུཝིནིཙྪིཏཱནི སུཏྟསོ ཨནུབྱཉྫནསོ, ཨཱཔཏྟཱནཱཔཏྟིཾ ཛཱནཱཏི, ལཧུཀགརུཀཾ ཨཱཔཏྟིཾ ཛཱནཱཏི, སཱཝསེསཱནཝསེསཾ ཨཱཔཏྟིཾ ཛཱནཱཏི, དུཊྛུལླཱདུཊྛུལླཾ ཨཱཔཏྟིཾ ཛཱནཱཏི, ཨདྷིཀརཎེ ཙ ཝིནིཙྪཡཀུསལོ ཧོཏི།
Dasahaṅgehi samannāgato vinayadharo paṇḍito tveva saṅkhaṃ gacchati – āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso, āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, adhikaraṇe ca vinicchayakusalo hoti.
3 དསཧངྒེཧི སམནྣཱགཏོ བྷིཀྑུ ཨུབྦཱཧིཀཱཡ སམྨནྣིཏབྦོ། དས ཨཏྠཝསེ པཊིཙྩ ཏཐཱགཏེན སཱཝཀཱནཾ སིཀྑཱཔདཾ པཉྙཏྟཾ། དས ཨཱདཱིནཝཱ རཱཛནྟེཔུརཔྤཝེསནེ། དས དཱནཝཏྠཱུནི། དས རཏནཱནི། དསཝགྒོ བྷིཀྑུསངྒྷོ། དསཝགྒེན གཎེན ཨུཔསམྤཱདེཏབྦཾ། དས པཾསུཀཱུལཱནི། དས ཙཱིཝརདྷཱརཎཱ 4། དསཱཧཔརམཾ ཨཏིརེཀཙཱིཝརཾ དྷཱརེཏབྦཾ ། དས སུཀྐཱནི། དས ཨིཏྠིཡོ། དས བྷརིཡཱཡོ། ཝེསཱལིཡཱ དས ཝཏྠཱུནི དཱིཔེནྟི། དས པུགྒལཱ ཨཝནྡིཡཱ། དས ཨཀྐོསཝཏྠཱུནི། དསཧཱཀཱརེཧི པེསུཉྙཾ ཨུཔསཾཧརཏི། དས སེནཱསནཱནི། དས ཝརཱནི ཡཱཙིཾསུ། དས ཨདྷམྨིཀཱནི པཱཏིམོཀྑཊྛཔནཱནི། དས དྷམྨིཀཱནི པཱཏིམོཀྑཊྛཔནཱནི། དསཱནིསཾསཱ ཡཱགུཡཱ། དས མཾསཱ ཨཀཔྤིཡཱ། དས པརམཱནི། དསཝསྶེན བྷིཀྑུནཱ བྱཏྟེན པཊིབལེན པབྦཱཛེཏབྦཾ ཨུཔསམྤཱདེཏབྦཾ ནིསྶཡོ དཱཏབྦོ སཱམཎེརོ ཨུཔཊྛཱཔེཏབྦོ། དསཝསྶཱཡ བྷིཀྑུནིཡཱ བྱཏྟཱཡ པཊིབལཱཡ པབྦཱཛེཏབྦཾ ཨུཔསམྤཱདེཏབྦཾ ནིསྶཡོ དཱཏབྦོ སཱམཎེརཱི ཨུཔཊྛཱཔེཏབྦཱ། དསཝསྶཱཡ བྷིཀྑུནིཡཱ བྱཏྟཱཡ པཊིབལཱཡ ཝུཊྛཱཔནསམྨུཏི སཱདིཏབྦཱ། དསཝསྶཱཡ གིཧིགཏཱཡ སིཀྑཱ དཱཏབྦཱཏི།
5 Dasahaṅgehi samannāgato bhikkhu ubbāhikāya sammannitabbo. Dasa atthavase paṭicca tathāgatena sāvakānaṃ sikkhāpadaṃ paññattaṃ. Dasa ādīnavā rājantepurappavesane. Dasa dānavatthūni. Dasa ratanāni. Dasavaggo bhikkhusaṅgho. Dasavaggena gaṇena upasampādetabbaṃ. Dasa paṃsukūlāni. Dasa cīvaradhāraṇā 6. Dasāhaparamaṃ atirekacīvaraṃ dhāretabbaṃ . Dasa sukkāni. Dasa itthiyo. Dasa bhariyāyo. Vesāliyā dasa vatthūni dīpenti. Dasa puggalā avandiyā. Dasa akkosavatthūni. Dasahākārehi pesuññaṃ upasaṃharati. Dasa senāsanāni. Dasa varāni yāciṃsu. Dasa adhammikāni pātimokkhaṭṭhapanāni. Dasa dhammikāni pātimokkhaṭṭhapanāni. Dasānisaṃsā yāguyā. Dasa maṃsā akappiyā. Dasa paramāni. Dasavassena bhikkhunā byattena paṭibalena pabbājetabbaṃ upasampādetabbaṃ nissayo dātabbo sāmaṇero upaṭṭhāpetabbo. Dasavassāya bhikkhuniyā byattāya paṭibalāya pabbājetabbaṃ upasampādetabbaṃ nissayo dātabbo sāmaṇerī upaṭṭhāpetabbā. Dasavassāya bhikkhuniyā byattāya paṭibalāya vuṭṭhāpanasammuti sāditabbā. Dasavassāya gihigatāya sikkhā dātabbāti.
དསཀཾ ནིཊྛིཏཾ།
Dasakaṃ niṭṭhitaṃ.
ཏསྶུདྡཱནཾ –
Tassuddānaṃ –
ཨཱགྷཱཏཾ ཝིནཡཾ ཝཏྠུ, མིཙྪཱ སམྨཱ ཙ ཨནྟགཱ།
Āghātaṃ vinayaṃ vatthu, micchā sammā ca antagā;
མིཙྪཏྟཱ ཙེཝ སམྨཏྟཱ, ཨཀུསལཱ ཀུསལཱཔི ཙ༎
Micchattā ceva sammattā, akusalā kusalāpi ca.
སལཱཀཱ ཨདྷམྨཱ དྷམྨཱ, སཱམཎེརཱ ཙ ནཱསནཱ།
Salākā adhammā dhammā, sāmaṇerā ca nāsanā;
བྷཱསཱདྷིཀརཎཉྩེཝ, ཉཏྟིལཧུཀམེཝ ཙ༎
Bhāsādhikaraṇañceva, ñattilahukameva ca.
ལཧུཀཱ གརུཀཱ ཨེཏེ, ཀཎྷསུཀྐཱ ཝིཛཱནཐ།
Lahukā garukā ete, kaṇhasukkā vijānatha;
ཨུབྦཱཧིཀཱ ཙ སིཀྑཱ ཙ, ཨནྟེཔུརེ ཙ ཝཏྠཱུནི༎
Ubbāhikā ca sikkhā ca, antepure ca vatthūni.
རཏནཾ དསཝགྒོ ཙ, ཏཐེཝ ཨུཔསམྤདཱ།
Ratanaṃ dasavaggo ca, tatheva upasampadā;
པཾསུཀཱུལདྷཱརཎཱ ཙ, དསཱཧསུཀྐཨིཏྠིཡོ༎
Paṃsukūladhāraṇā ca, dasāhasukkaitthiyo.
བྷརིཡཱ དས ཝཏྠཱུནི, ཨཝནྡིཡཀྐོསེན ཙ།
Bhariyā dasa vatthūni, avandiyakkosena ca;
པེསུཉྙཉྩེཝ སེནཱནི, ཝརཱནི ཙ ཨདྷམྨིཀཱ༎
Pesuññañceva senāni, varāni ca adhammikā.
དྷམྨིཀཱ ཡཱགུམཾསཱ ཙ, པརམཱ བྷིཀྑུ བྷིཀྑུནཱི།
Dhammikā yāgumaṃsā ca, paramā bhikkhu bhikkhunī;
ཝུཊྛཱཔནཱ གིཧིགཏཱ, དསཀཱ སུཔྤཀཱསིཏཱཏི༎
Vuṭṭhāpanā gihigatā, dasakā suppakāsitāti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / དསཀཝཱརཝཎྞནཱ • Dasakavāravaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / དསཀཝཱརཝཎྞནཱ • Dasakavāravaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / དསཀཝཱརཝཎྞནཱ • Dasakavāravaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཚཀྐཝཱརཱདིཝཎྞནཱ • Chakkavārādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཨེཀུཏྟརིཀནཡོ དསཀཝཱརཝཎྞནཱ • Ekuttarikanayo dasakavāravaṇṇanā
