| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
10. த³ஸமஸங்கா⁴தி³ஸேஸஸிக்கா²பத³ங்
10. Dasamasaṅghādisesasikkhāpadaṃ
727. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீஸங்கே⁴ன ஸமனுப⁴ட்டா² பி⁴க்கு²னியோ ஏவங் வதே³தி – ‘‘ஸங்ஸட்டா²வ அய்யே, தும்ஹே விஹரத². மா தும்ஹே நானா விஹரித்த². ஸந்தி ஸங்கே⁴ அஞ்ஞாபி பி⁴க்கு²னியோ ஏவாசாரா ஏவங்ஸத்³தா³ ஏவங்ஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. தா ஸங்கோ⁴ ந கிஞ்சி ஆஹ. தும்ஹஞ்ஞேவ 1 ஸங்கோ⁴ உஞ்ஞாய பரிப⁴வேன அக்க²ந்தியா வேப⁴ஸ்ஸியா 2 து³ப்³ப³ல்யா ஏவமாஹ – ‘ப⁴கி³னியோ கோ² ஸங்ஸட்டா² விஹரந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. விவிச்சதா²ய்யே. விவேகஞ்ஞேவ ப⁴கி³னீனங் ஸங்கோ⁴ வண்ணேதீ’’’தி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – கத²ஞ்ஹி நாம அய்யா து²ல்லனந்தா³ பி⁴க்கு²னீ ஸங்கே⁴ன ஸமனுப⁴ட்டா² பி⁴க்கு²னியோ ஏவங் வக்க²தி – ஸங்ஸட்டா²வ அய்யே, தும்ஹே விஹரத². மா தும்ஹே நானா விஹரித்த². ஸந்தி ஸங்கே⁴ அஞ்ஞாபி பி⁴க்கு²னியோ…பே॰… விவிச்சதா²ய்யே. விவேகஞ்ஞேவ ப⁴கி³னீனங் ஸங்கோ⁴ வண்ணேதீதி…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ ஸங்கே⁴ன ஸமனுப⁴ட்டா² பி⁴க்கு²னியோ ஏவங் வதே³தி – ஸங்ஸட்டா²வ அய்யே தும்ஹே விஹரத². மா தும்ஹே நானா விஹரித்த². ஸந்தி ஸங்கே⁴ அஞ்ஞாபி பி⁴க்கு²னியோ ஏவாசாரா ஏவங்ஸத்³தா³ ஏவங்ஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. தா ஸங்கோ⁴ ந கிஞ்சி ஆஹ. தும்ஹஞ்ஞேவ ஸங்கோ⁴ உஞ்ஞாய பரிப⁴வேன அக்க²ந்தியா வேப⁴ஸ்ஸியா து³ப்³ப³ல்யா ஏவமாஹ – ப⁴கி³னியோ கோ² ஸங்ஸட்டா² விஹரந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. விவிச்சதா²ய்யே. விவேகஞ்ஞேவ ப⁴கி³னீனங் ஸங்கோ⁴ வண்ணேதீதி? ‘‘ஸச்சங் ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஸங்கே⁴ன ஸமனுப⁴ட்டா² பி⁴க்கு²னியோ ஏவங் வக்க²தி – ஸங்ஸட்டா²வ அய்யே, தும்ஹே விஹரத². மா தும்ஹே நானா விஹரித்த². ஸந்தி ஸங்கே⁴ அஞ்ஞாபி பி⁴க்கு²னியோ…பே॰… விவிச்சதா²ய்யே. விவேகஞ்ஞேவ ப⁴கி³னீனங் ஸங்கோ⁴ வண்ணேதீதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
727. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunīsaṅghena samanubhaṭṭhā bhikkhuniyo evaṃ vadeti – ‘‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva 3 saṅgho uññāya paribhavena akkhantiyā vebhassiyā 4 dubbalyā evamāha – ‘bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’’’ti. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma ayyā thullanandā bhikkhunī saṅghena samanubhaṭṭhā bhikkhuniyo evaṃ vakkhati – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetīti…pe… saccaṃ kira, bhikkhave, thullanandā bhikkhunī saṅghena samanubhaṭṭhā bhikkhuniyo evaṃ vadeti – saṃsaṭṭhāva ayye tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetīti? ‘‘Saccaṃ bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī saṅghena samanubhaṭṭhā bhikkhuniyo evaṃ vakkhati – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetīti! Netaṃ, bhikkhave, appasannānaṃ vā pasādāya…pe… evañca pana bhikkhave, bhikkhuniyo imaṃ sikkhāpadaṃ uddisantu –
728. ‘‘யா பன பி⁴க்கு²னீ ஏவங் வதெ³ய்ய – ‘ஸங்ஸட்டா²வ அய்யே, தும்ஹே விஹரத². மா தும்ஹே நானா விஹரித்த². ஸந்தி ஸங்கே⁴ அஞ்ஞாபி பி⁴க்கு²னியோ ஏவாசாரா ஏவங்ஸத்³தா³ ஏவங்ஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. தா ஸங்கோ⁴ ந கிஞ்சி ஆஹ. தும்ஹஞ்ஞேவ ஸங்கோ⁴ உஞ்ஞாய பரிப⁴வேன அக்க²ந்தியா வேப⁴ஸ்ஸியா து³ப்³ப³ல்யா ஏவமாஹ – ப⁴கி³னியோ கோ² ஸங்ஸட்டா² விஹரந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. விவிச்சதா²ய்யே. விவேகஞ்ஞேவ ப⁴கி³னீனங் ஸங்கோ⁴ வண்ணேதீ’தி. ஸா பி⁴க்கு²னீ பி⁴க்கு²னீஹி ஏவமஸ்ஸ வசனீயா – ‘மா, அய்யே, ஏவங் அவச – ஸங்ஸட்டா²வ அய்யே, தும்ஹே விஹரத². மா தும்ஹே நானா விஹரித்த². ஸந்தி ஸங்கே⁴ அஞ்ஞாபி பி⁴க்கு²னியோ ஏவாசாரா ஏவங்ஸத்³தா³ ஏவங்ஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. தா ஸங்கோ⁴ ந கிஞ்சி ஆஹ. தும்ஹஞ்ஞேவ ஸங்கோ⁴ உஞ்ஞாய பரிப⁴வேன அக்க²ந்தியா வேப⁴ஸ்ஸியா து³ப்³ப³ல்யா ஏவமாஹ – ப⁴கி³னியோ கோ² ஸங்ஸட்டா² விஹரந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. விவிச்சதா²ய்யே. விவேகஞ்ஞேவ ப⁴கி³னீனங் ஸங்கோ⁴ வண்ணேதீ’தி. ஏவஞ்ச ஸா பி⁴க்கு²னீ பி⁴க்கு²னீஹி வுச்சமானா ததே²வ பக்³க³ண்ஹெய்ய, ஸா பி⁴க்கு²னீ பி⁴க்கு²னீஹி யாவததியங் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய. யாவததியஞ்சே ஸமனுபா⁴ஸீயமானா தங் படினிஸ்ஸஜ்ஜெய்ய, இச்சேதங் குஸலங்; நோ சே படினிஸ்ஸஜ்ஜெய்ய, அயம்பி பி⁴க்கு²னீ யாவததியகங் த⁴ம்மங் ஆபன்னா நிஸ்ஸாரணீயங் ஸங்கா⁴தி³ஸேஸ’’ந்தி.
728.‘‘Yāpana bhikkhunī evaṃ vadeyya – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Sā bhikkhunī bhikkhunīhi evamassa vacanīyā – ‘mā, ayye, evaṃ avaca – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya. Yāvatatiyañce samanubhāsīyamānā taṃ paṭinissajjeyya, iccetaṃ kusalaṃ; no ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesa’’nti.
729. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
729.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ஏவங் வதெ³ய்யாதி – ‘‘ஸங்ஸட்டா²வ அய்யே, தும்ஹே விஹரத². மா தும்ஹே நானா விஹரித்த². ஸந்தி ஸங்கே⁴ அஞ்ஞாபி பி⁴க்கு²னியோ ஏவாசாரா ஏவங்ஸத்³தா³ ஏவங்ஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. தா ஸங்கோ⁴ ந கிஞ்சி ஆஹ’’.
Evaṃ vadeyyāti – ‘‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha’’.
தும்ஹஞ்ஞேவ ஸங்கோ⁴ உஞ்ஞாயாதி அவஞ்ஞாய.
Tumhaññeva saṅgho uññāyāti avaññāya.
பரிப⁴வேனாதி பாரிப⁴ப்³யதா.
Paribhavenāti pāribhabyatā.
அக்க²ந்தியாதி கோபேன.
Akkhantiyāti kopena.
து³ப்³ப³ல்யாதி அபக்க²தா.
Dubbalyāti apakkhatā.
ஏவமாஹ – ‘‘ப⁴கி³னியோ கோ² ஸங்ஸட்டா² விஹரந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. விசிச்சதா²ய்யே. விவேகஞ்ஞேவ ப⁴கி³னீனங் ஸங்கோ⁴ வண்ணேதீ’’தி.
Evamāha – ‘‘bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viciccathāyye. Vivekaññeva bhaginīnaṃ saṅgho vaṇṇetī’’ti.
ஸா பி⁴க்கு²னீதி யா ஸா ஏவங்வாதி³னீ பி⁴க்கு²னீ.
Sā bhikkhunīti yā sā evaṃvādinī bhikkhunī.
பி⁴க்கு²னீஹீதி அஞ்ஞாஹி பி⁴க்கு²னீஹி.
Bhikkhunīhīti aññāhi bhikkhunīhi.
யா பஸ்ஸந்தி யா ஸுணந்தி தாஹி வத்தப்³பா³ – ‘‘மாய்யே, ஏவங் அவச – ‘ஸங்ஸட்டா²வ அய்யே, தும்ஹே விஹரத². மா தும்ஹே நானா விஹரித்த². ஸந்தி ஸங்கே⁴ அஞ்ஞாபி பி⁴க்கு²னியோ…பே॰… விவிச்சதா²ய்யே. விவேகஞ்ஞேவ ப⁴கி³னீனங் ஸங்கோ⁴ வண்ணேதீ’’தி. து³தியம்பி வத்தப்³பா³. ததியம்பி வத்தப்³பா³. ஸசே படினிஸ்ஸஜ்ஜதி, இச்சேதங் குஸலங்; நோ சே படினிஸ்ஸஜ்ஜதி, ஆபத்தி து³க்கடஸ்ஸ. ஸுத்வா ந வத³ந்தி, ஆபத்தி து³க்கடஸ்ஸ. ஸா பி⁴க்கு²னீ ஸங்க⁴மஜ்ஜ²ம்பி ஆகட்³டி⁴த்வா வத்தப்³பா³ – ‘‘மாய்யே, ஏவங் அவச – ‘ஸங்ஸட்டா²வ அய்யே, தும்ஹே விஹரத². மா தும்ஹே நானா விஹரித்த². ஸந்தி ஸங்கே⁴ அஞ்ஞாபி பி⁴க்கு²னியோ…பே॰… விவிச்சதா²ய்யே. விவேகஞ்ஞேவ ப⁴கி³னீனங் ஸங்கோ⁴ வண்ணேதீ’’’தி. து³தியம்பி வத்தப்³பா³. ததியம்பி வத்தப்³பா³. ஸசே படினிஸ்ஸஜ்ஜதி, இச்சேதங் குஸலங்; நோ சே படினிஸ்ஸஜ்ஜதி, ஆபத்தி து³க்கடஸ்ஸ. ஸா பி⁴க்கு²னீ ஸமனுபா⁴ஸிதப்³பா³. ஏவஞ்ச பன, பி⁴க்க²வே, ஸமனுபா⁴ஸிதப்³பா³. ப்³யத்தாய பி⁴க்கு²னியா படிப³லாய ஸங்கோ⁴ ஞாபேதப்³போ³ –
Yā passanti yā suṇanti tāhi vattabbā – ‘‘māyye, evaṃ avaca – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetī’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sutvā na vadanti, āpatti dukkaṭassa. Sā bhikkhunī saṅghamajjhampi ākaḍḍhitvā vattabbā – ‘‘māyye, evaṃ avaca – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetī’’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sā bhikkhunī samanubhāsitabbā. Evañca pana, bhikkhave, samanubhāsitabbā. Byattāya bhikkhuniyā paṭibalāya saṅgho ñāpetabbo –
730. ‘‘ஸுணாது மே, அய்யே, ஸங்கோ⁴. அயங் இத்த²ன்னாமா பி⁴க்கு²னீ ஸங்கே⁴ன ஸமனுப⁴ட்டா² பி⁴க்கு²னியோ ஏவங் வதே³தி – ‘ஸங்ஸட்டா²வ அய்யே, தும்ஹே விஹரத². மா தும்ஹே நானா விஹரித்த². ஸந்தி ஸங்கே⁴ அஞ்ஞாபி பி⁴க்கு²னியோ ஏவாசாரா ஏவங்ஸத்³தா³ ஏவங்ஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. தா ஸங்கோ⁴ ந கிஞ்சி ஆஹ. தும்ஹஞ்ஞேவ ஸங்கோ⁴ உஞ்ஞாய பரிப⁴வேன அக்க²ந்தியா வேப⁴ஸ்ஸியா து³ப்³ப³ல்யா ஏவமாஹ – ப⁴கி³னியோ கோ² ஸங்ஸட்டா² விஹரந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா அஞ்ஞமஞ்ஞிஸ்ஸா வஜ்ஜப்படிச்சா²தி³கா . விவிச்சதா²ய்யே. விவேகஞ்ஞேவ ப⁴கி³னீனங் ஸங்கோ⁴ வண்ணேதீ’தி. ஸா தங் வத்து²ங் ந படினிஸ்ஸஜ்ஜதி. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங் பி⁴க்கு²னிங் ஸமனுபா⁴ஸெய்ய தஸ்ஸ வத்து²ஸ்ஸ படினிஸ்ஸக்³கா³ய. ஏஸா ஞத்தி.
730. ‘‘Suṇātu me, ayye, saṅgho. Ayaṃ itthannāmā bhikkhunī saṅghena samanubhaṭṭhā bhikkhuniyo evaṃ vadeti – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā aññamaññissā vajjappaṭicchādikā . Viviccathāyye. Vivekaññeva bhaginīnaṃ saṅgho vaṇṇetī’ti. Sā taṃ vatthuṃ na paṭinissajjati. Yadi saṅghassa pattakallaṃ, saṅgho itthannāmaṃ bhikkhuniṃ samanubhāseyya tassa vatthussa paṭinissaggāya. Esā ñatti.
‘‘ஸுணாது மே, அய்யே, ஸங்கோ⁴. அயங் இத்த²ன்னாமா பி⁴க்கு²னீ ஸங்கே⁴ன ஸமனுப⁴ட்டா² பி⁴க்கு²னியோ ஏவங் வதே³தி – ‘ஸங்ஸட்டா²வ அய்யே, தும்ஹே விஹரத². மா தும்ஹே நானா விஹரித்த². ஸந்தி ஸங்கே⁴ அஞ்ஞாபி பி⁴க்கு²னியோ ஏவாசாரா ஏவங்ஸத்³தா³ ஏவங்ஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. தா ஸங்கோ⁴ ந கிஞ்சி ஆஹ. தும்ஹஞ்ஞேவ ஸங்கோ⁴ உஞ்ஞாய பரிப⁴வேன அக்க²ந்தியா வேப⁴ஸ்ஸியா து³ப்³ப³ல்யா ஏவமாஹ – ப⁴கி³னியோ கோ² ஸங்ஸட்டா² விஹரந்தி பாபாசாரா பாபஸத்³தா³ பாபஸிலோகா, பி⁴க்கு²னிஸங்க⁴ஸ்ஸ விஹேஸிகா, அஞ்ஞமஞ்ஞிஸ்ஸா வஜ்ஜப்படிச்சா²தி³கா. விவிச்சதா²ய்யே. விவேகஞ்ஞேவ ப⁴கி³னீனங் ஸங்கோ⁴ வண்ணேதீ’தி. ஸா தங் வத்து²ங் ந படினிஸ்ஸஜ்ஜதி. ஸங்கோ⁴ இத்த²ன்னாமங் பி⁴க்கு²னிங் ஸமனுபா⁴ஸதி தஸ்ஸ வத்து²ஸ்ஸ படினிஸ்ஸக்³கா³ய. யஸ்ஸா அய்யாய க²மதி இத்த²ன்னாமாய பி⁴க்கு²னியா ஸமனுபா⁴ஸனா தஸ்ஸ வத்து²ஸ்ஸ படினிஸ்ஸக்³கா³ய, ஸா துண்ஹஸ்ஸ; யஸ்ஸா நக்க²மதி, ஸா பா⁴ஸெய்ய.
‘‘Suṇātu me, ayye, saṅgho. Ayaṃ itthannāmā bhikkhunī saṅghena samanubhaṭṭhā bhikkhuniyo evaṃ vadeti – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Sā taṃ vatthuṃ na paṭinissajjati. Saṅgho itthannāmaṃ bhikkhuniṃ samanubhāsati tassa vatthussa paṭinissaggāya. Yassā ayyāya khamati itthannāmāya bhikkhuniyā samanubhāsanā tassa vatthussa paṭinissaggāya, sā tuṇhassa; yassā nakkhamati, sā bhāseyya.
‘‘து³தியம்பி ஏதமத்த²ங் வதா³மி…பே॰… ததியம்பி ஏதமத்த²ங் வதா³மி…பே॰….
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘ஸமனுப⁴ட்டா² ஸங்கே⁴ன இத்த²ன்னாமா பி⁴க்கு²னீ தஸ்ஸ வத்து²ஸ்ஸ படினிஸ்ஸக்³கா³ய. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Samanubhaṭṭhā saṅghena itthannāmā bhikkhunī tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
ஞத்தியா து³க்கடங், த்³வீஹி கம்மவாசாஹி து²ல்லச்சயா, கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ. ஸங்கா⁴தி³ஸேஸங் அஜ்ஜா²பஜ்ஜந்தியா ஞத்தியா து³க்கடங், த்³வீஹி கம்மவாசாஹி து²ல்லச்சயா படிப்பஸ்ஸம்ப⁴ந்தி.
Ñattiyā dukkaṭaṃ, dvīhi kammavācāhi thullaccayā, kammavācāpariyosāne āpatti saṅghādisesassa. Saṅghādisesaṃ ajjhāpajjantiyā ñattiyā dukkaṭaṃ, dvīhi kammavācāhi thullaccayā paṭippassambhanti.
அயம்பீதி புரிமாயோ உபாதா³ய வுச்சதி.
Ayampīti purimāyo upādāya vuccati.
யாவததியகந்தி யாவததியங் ஸமனுபா⁴ஸனாய ஆபஜ்ஜதி, ந ஸஹவத்து²ஜ்ஜா²சாரா.
Yāvatatiyakanti yāvatatiyaṃ samanubhāsanāya āpajjati, na sahavatthujjhācārā.
நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.
Nissāraṇīyanti saṅghamhā nissārīyati.
ஸங்கா⁴தி³ஸேஸோதி ஸங்கோ⁴வ தஸ்ஸா ஆபத்தியா மானத்தங் தே³தி, மூலாய படிகஸ்ஸதி, அப்³பே⁴தி, ந ஸம்ப³ஹுலா ந ஏகா பி⁴க்கு²னீ. தேன வுச்சதி ‘‘ஸங்கா⁴தி³ஸேஸோ’’தி. தஸ்ஸேவ ஆபத்தினிகாயஸ்ஸ நாமகம்மங் அதி⁴வசனங், தேனபி வுச்சதி ‘‘ஸங்கா⁴தி³ஸேஸோ’’தி.
Saṅghādisesoti saṅghova tassā āpattiyā mānattaṃ deti, mūlāya paṭikassati, abbheti, na sambahulā na ekā bhikkhunī. Tena vuccati ‘‘saṅghādiseso’’ti. Tasseva āpattinikāyassa nāmakammaṃ adhivacanaṃ, tenapi vuccati ‘‘saṅghādiseso’’ti.
731. த⁴ம்மகம்மே த⁴ம்மகம்மஸஞ்ஞா ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ . த⁴ம்மகம்மே வேமதிகா ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ. த⁴ம்மகம்மே அத⁴ம்மகம்மஸஞ்ஞா ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.
731. Dhammakamme dhammakammasaññā na paṭinissajjati, āpatti saṅghādisesassa . Dhammakamme vematikā na paṭinissajjati, āpatti saṅghādisesassa. Dhammakamme adhammakammasaññā na paṭinissajjati, āpatti saṅghādisesassa.
அத⁴ம்மகம்மே த⁴ம்மகம்மஸஞ்ஞா, ஆபத்தி து³க்கடஸ்ஸ. அத⁴ம்மகம்மே வேமதிகா, ஆபத்தி து³க்கடஸ்ஸ. அத⁴ம்மகம்மே அத⁴ம்மகம்மஸஞ்ஞா, ஆபத்தி து³க்கடஸ்ஸ.
Adhammakamme dhammakammasaññā, āpatti dukkaṭassa. Adhammakamme vematikā, āpatti dukkaṭassa. Adhammakamme adhammakammasaññā, āpatti dukkaṭassa.
732. அனாபத்தி அஸமனுபா⁴ஸந்தியா, படினிஸ்ஸஜ்ஜந்தியா, உம்மத்திகாய, ஆதி³கம்மிகாயாதி.
732. Anāpatti asamanubhāsantiyā, paṭinissajjantiyā, ummattikāya, ādikammikāyāti.
த³ஸமஸங்கா⁴தி³ஸேஸஸிக்கா²பத³ங் நிட்டி²தங்.
Dasamasaṅghādisesasikkhāpadaṃ niṭṭhitaṃ.
உத்³தி³ட்டா² கோ², அய்யாயோ, ஸத்தரஸ ஸங்கா⁴தி³ஸேஸா த⁴ம்மா – நவ பட²மாபத்திகா, அட்ட² யாவததியகா. யேஸங் பி⁴க்கு²னீ அஞ்ஞதரங் வா அஞ்ஞதரங் வா ஆபஜ்ஜதி, தாய பி⁴க்கு²னியா உப⁴தோஸங்கே⁴ பக்க²மானத்தங் சரிதப்³ப³ங். சிண்ணமானத்தா பி⁴க்கு²னீ யத்த² ஸியா வீஸதிக³ணோ பி⁴க்கு²னிஸங்கோ⁴ தத்த² (ஸா பி⁴க்கு²னீ) 7 அப்³பே⁴தப்³பா³. ஏகாயபி சே ஊனோ வீஸதிக³ணோ பி⁴க்கு²னிஸங்கோ⁴ தங் பி⁴க்கு²னிங் அப்³பெ⁴ய்ய. ஸா ச பி⁴க்கு²னீ அனப்³பி⁴தா, தா ச பி⁴க்கு²னியோ கா³ரய்ஹா, அயங் தத்த² ஸாமீசி.
Uddiṭṭhā kho, ayyāyo, sattarasa saṅghādisesā dhammā – nava paṭhamāpattikā, aṭṭha yāvatatiyakā. Yesaṃ bhikkhunī aññataraṃ vā aññataraṃ vā āpajjati, tāya bhikkhuniyā ubhatosaṅghe pakkhamānattaṃ caritabbaṃ. Ciṇṇamānattā bhikkhunī yattha siyā vīsatigaṇo bhikkhunisaṅgho tattha (sā bhikkhunī) 8 abbhetabbā. Ekāyapi ce ūno vīsatigaṇo bhikkhunisaṅgho taṃ bhikkhuniṃ abbheyya. Sā ca bhikkhunī anabbhitā, tā ca bhikkhuniyo gārayhā, ayaṃ tattha sāmīci.
தத்தா²ய்யாயோ புச்சா²மி – ‘‘கச்சித்த² பரிஸுத்³தா⁴’’? து³தியம்பி புச்சா²மி – ‘‘கச்சித்த² பரிஸுத்³தா⁴’’? ததியம்பி புச்சா²மி – ‘‘கச்சித்த² பரிஸுத்³தா⁴’’? பரிஸுத்³தெ⁴த்தா²ய்யாயோ, தஸ்மா துண்ஹீ, ஏவமேதங் தா⁴ரயாமீதி.
Tatthāyyāyo pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyyāyo, tasmā tuṇhī, evametaṃ dhārayāmīti.
ஸத்தரஸகங் நிட்டி²தங்.
Sattarasakaṃ niṭṭhitaṃ.
பி⁴க்கு²னிவிப⁴ங்கே³ ஸங்கா⁴தி³ஸேஸகண்ட³ங் நிட்டி²தங்.
Bhikkhunivibhaṅge saṅghādisesakaṇḍaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 10. த³ஸமஸங்கா⁴தி³ஸேஸஸிக்கா²பத³வண்ணனா • 10. Dasamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 9. நவமஸங்கா⁴தி³ஸேஸஸிக்கா²பத³வண்ணனா • 9. Navamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. ச²ட்ட²ஸங்கா⁴தி³ஸேஸஸிக்கா²பத³வண்ணனா • 6. Chaṭṭhasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 10. த³ஸமஸங்கா⁴தி³ஸேஸஸிக்கா²பத³ங் • 10. Dasamasaṅghādisesasikkhāpadaṃ
