| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
১০. দসমসঙ্ঘাদিসেসসিক্খাপদং
10. Dasamasaṅghādisesasikkhāpadaṃ
৭২৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনীসঙ্ঘেন সমনুভট্ঠা ভিক্খুনিযো এৰং ৰদেতি – ‘‘সংসট্ঠাৰ অয্যে, তুম্হে ৰিহরথ। মা তুম্হে নানা ৰিহরিত্থ। সন্তি সঙ্ঘে অঞ্ঞাপি ভিক্খুনিযো এৰাচারা এৰংসদ্দা এৰংসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা। তা সঙ্ঘো ন কিঞ্চি আহ। তুম্হঞ্ঞেৰ 1 সঙ্ঘো উঞ্ঞায পরিভৰেন অক্খন্তিযা ৰেভস্সিযা 2 দুব্বল্যা এৰমাহ – ‘ভগিনিযো খো সংসট্ঠা ৰিহরন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা। ৰিৰিচ্চথায্যে। ৰিৰেকঞ্ঞেৰ ভগিনীনং সঙ্ঘো ৰণ্ণেতী’’’তি। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – কথঞ্হি নাম অয্যা থুল্লনন্দা ভিক্খুনী সঙ্ঘেন সমনুভট্ঠা ভিক্খুনিযো এৰং ৰক্খতি – সংসট্ঠাৰ অয্যে, তুম্হে ৰিহরথ। মা তুম্হে নানা ৰিহরিত্থ। সন্তি সঙ্ঘে অঞ্ঞাপি ভিক্খুনিযো…পে॰… ৰিৰিচ্চথায্যে। ৰিৰেকঞ্ঞেৰ ভগিনীনং সঙ্ঘো ৰণ্ণেতীতি…পে॰… সচ্চং কির, ভিক্খৰে, থুল্লনন্দা ভিক্খুনী সঙ্ঘেন সমনুভট্ঠা ভিক্খুনিযো এৰং ৰদেতি – সংসট্ঠাৰ অয্যে তুম্হে ৰিহরথ। মা তুম্হে নানা ৰিহরিত্থ। সন্তি সঙ্ঘে অঞ্ঞাপি ভিক্খুনিযো এৰাচারা এৰংসদ্দা এৰংসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা। তা সঙ্ঘো ন কিঞ্চি আহ। তুম্হঞ্ঞেৰ সঙ্ঘো উঞ্ঞায পরিভৰেন অক্খন্তিযা ৰেভস্সিযা দুব্বল্যা এৰমাহ – ভগিনিযো খো সংসট্ঠা ৰিহরন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা। ৰিৰিচ্চথায্যে। ৰিৰেকঞ্ঞেৰ ভগিনীনং সঙ্ঘো ৰণ্ণেতীতি? ‘‘সচ্চং ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী সঙ্ঘেন সমনুভট্ঠা ভিক্খুনিযো এৰং ৰক্খতি – সংসট্ঠাৰ অয্যে, তুম্হে ৰিহরথ। মা তুম্হে নানা ৰিহরিত্থ। সন্তি সঙ্ঘে অঞ্ঞাপি ভিক্খুনিযো…পে॰… ৰিৰিচ্চথায্যে। ৰিৰেকঞ্ঞেৰ ভগিনীনং সঙ্ঘো ৰণ্ণেতীতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন ভিক্খৰে, ভিক্খুনিযো ইমং সিক্খাপদং উদ্দিসন্তু –
727. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunīsaṅghena samanubhaṭṭhā bhikkhuniyo evaṃ vadeti – ‘‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva 3 saṅgho uññāya paribhavena akkhantiyā vebhassiyā 4 dubbalyā evamāha – ‘bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’’’ti. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma ayyā thullanandā bhikkhunī saṅghena samanubhaṭṭhā bhikkhuniyo evaṃ vakkhati – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetīti…pe… saccaṃ kira, bhikkhave, thullanandā bhikkhunī saṅghena samanubhaṭṭhā bhikkhuniyo evaṃ vadeti – saṃsaṭṭhāva ayye tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetīti? ‘‘Saccaṃ bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī saṅghena samanubhaṭṭhā bhikkhuniyo evaṃ vakkhati – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetīti! Netaṃ, bhikkhave, appasannānaṃ vā pasādāya…pe… evañca pana bhikkhave, bhikkhuniyo imaṃ sikkhāpadaṃ uddisantu –
৭২৮. ‘‘যা পন ভিক্খুনী এৰং ৰদেয্য – ‘সংসট্ঠাৰ অয্যে, তুম্হে ৰিহরথ। মা তুম্হে নানা ৰিহরিত্থ। সন্তি সঙ্ঘে অঞ্ঞাপি ভিক্খুনিযো এৰাচারা এৰংসদ্দা এৰংসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা। তা সঙ্ঘো ন কিঞ্চি আহ। তুম্হঞ্ঞেৰ সঙ্ঘো উঞ্ঞায পরিভৰেন অক্খন্তিযা ৰেভস্সিযা দুব্বল্যা এৰমাহ – ভগিনিযো খো সংসট্ঠা ৰিহরন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা। ৰিৰিচ্চথায্যে। ৰিৰেকঞ্ঞেৰ ভগিনীনং সঙ্ঘো ৰণ্ণেতী’তি। সা ভিক্খুনী ভিক্খুনীহি এৰমস্স ৰচনীযা – ‘মা, অয্যে, এৰং অৰচ – সংসট্ঠাৰ অয্যে, তুম্হে ৰিহরথ। মা তুম্হে নানা ৰিহরিত্থ। সন্তি সঙ্ঘে অঞ্ঞাপি ভিক্খুনিযো এৰাচারা এৰংসদ্দা এৰংসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা। তা সঙ্ঘো ন কিঞ্চি আহ। তুম্হঞ্ঞেৰ সঙ্ঘো উঞ্ঞায পরিভৰেন অক্খন্তিযা ৰেভস্সিযা দুব্বল্যা এৰমাহ – ভগিনিযো খো সংসট্ঠা ৰিহরন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা। ৰিৰিচ্চথায্যে। ৰিৰেকঞ্ঞেৰ ভগিনীনং সঙ্ঘো ৰণ্ণেতী’তি। এৰঞ্চ সা ভিক্খুনী ভিক্খুনীহি ৰুচ্চমানা তথেৰ পগ্গণ্হেয্য, সা ভিক্খুনী ভিক্খুনীহি যাৰততিযং সমনুভাসিতব্বা তস্স পটিনিস্সগ্গায। যাৰততিযঞ্চে সমনুভাসীযমানা তং পটিনিস্সজ্জেয্য, ইচ্চেতং কুসলং; নো চে পটিনিস্সজ্জেয্য, অযম্পি ভিক্খুনী যাৰততিযকং ধম্মং আপন্না নিস্সারণীযং সঙ্ঘাদিসেস’’ন্তি।
728.‘‘Yāpana bhikkhunī evaṃ vadeyya – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Sā bhikkhunī bhikkhunīhi evamassa vacanīyā – ‘mā, ayye, evaṃ avaca – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya. Yāvatatiyañce samanubhāsīyamānā taṃ paṭinissajjeyya, iccetaṃ kusalaṃ; no ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesa’’nti.
৭২৯. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি।
729.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
এৰং ৰদেয্যাতি – ‘‘সংসট্ঠাৰ অয্যে, তুম্হে ৰিহরথ। মা তুম্হে নানা ৰিহরিত্থ। সন্তি সঙ্ঘে অঞ্ঞাপি ভিক্খুনিযো এৰাচারা এৰংসদ্দা এৰংসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা। তা সঙ্ঘো ন কিঞ্চি আহ’’।
Evaṃ vadeyyāti – ‘‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha’’.
তুম্হঞ্ঞেৰ সঙ্ঘো উঞ্ঞাযাতি অৰঞ্ঞায।
Tumhaññeva saṅgho uññāyāti avaññāya.
পরিভৰেনাতি পারিভব্যতা।
Paribhavenāti pāribhabyatā.
অক্খন্তিযাতি কোপেন।
Akkhantiyāti kopena.
দুব্বল্যাতি অপক্খতা।
Dubbalyāti apakkhatā.
এৰমাহ – ‘‘ভগিনিযো খো সংসট্ঠা ৰিহরন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা। ৰিচিচ্চথায্যে। ৰিৰেকঞ্ঞেৰ ভগিনীনং সঙ্ঘো ৰণ্ণেতী’’তি।
Evamāha – ‘‘bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viciccathāyye. Vivekaññeva bhaginīnaṃ saṅgho vaṇṇetī’’ti.
সা ভিক্খুনীতি যা সা এৰংৰাদিনী ভিক্খুনী।
Sā bhikkhunīti yā sā evaṃvādinī bhikkhunī.
ভিক্খুনীহীতি অঞ্ঞাহি ভিক্খুনীহি।
Bhikkhunīhīti aññāhi bhikkhunīhi.
যা পস্সন্তি যা সুণন্তি তাহি ৰত্তব্বা – ‘‘মায্যে, এৰং অৰচ – ‘সংসট্ঠাৰ অয্যে, তুম্হে ৰিহরথ। মা তুম্হে নানা ৰিহরিত্থ। সন্তি সঙ্ঘে অঞ্ঞাপি ভিক্খুনিযো…পে॰… ৰিৰিচ্চথায্যে। ৰিৰেকঞ্ঞেৰ ভগিনীনং সঙ্ঘো ৰণ্ণেতী’’তি। দুতিযম্পি ৰত্তব্বা। ততিযম্পি ৰত্তব্বা। সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স। সুত্ৰা ন ৰদন্তি, আপত্তি দুক্কটস্স। সা ভিক্খুনী সঙ্ঘমজ্ঝম্পি আকড্ঢিত্ৰা ৰত্তব্বা – ‘‘মায্যে, এৰং অৰচ – ‘সংসট্ঠাৰ অয্যে, তুম্হে ৰিহরথ। মা তুম্হে নানা ৰিহরিত্থ। সন্তি সঙ্ঘে অঞ্ঞাপি ভিক্খুনিযো…পে॰… ৰিৰিচ্চথায্যে। ৰিৰেকঞ্ঞেৰ ভগিনীনং সঙ্ঘো ৰণ্ণেতী’’’তি। দুতিযম্পি ৰত্তব্বা। ততিযম্পি ৰত্তব্বা। সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স। সা ভিক্খুনী সমনুভাসিতব্বা। এৰঞ্চ পন, ভিক্খৰে, সমনুভাসিতব্বা। ব্যত্তায ভিক্খুনিযা পটিবলায সঙ্ঘো ঞাপেতব্বো –
Yā passanti yā suṇanti tāhi vattabbā – ‘‘māyye, evaṃ avaca – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetī’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sutvā na vadanti, āpatti dukkaṭassa. Sā bhikkhunī saṅghamajjhampi ākaḍḍhitvā vattabbā – ‘‘māyye, evaṃ avaca – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetī’’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sā bhikkhunī samanubhāsitabbā. Evañca pana, bhikkhave, samanubhāsitabbā. Byattāya bhikkhuniyā paṭibalāya saṅgho ñāpetabbo –
৭৩০. ‘‘সুণাতু মে, অয্যে, সঙ্ঘো। অযং ইত্থন্নামা ভিক্খুনী সঙ্ঘেন সমনুভট্ঠা ভিক্খুনিযো এৰং ৰদেতি – ‘সংসট্ঠাৰ অয্যে, তুম্হে ৰিহরথ। মা তুম্হে নানা ৰিহরিত্থ। সন্তি সঙ্ঘে অঞ্ঞাপি ভিক্খুনিযো এৰাচারা এৰংসদ্দা এৰংসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা। তা সঙ্ঘো ন কিঞ্চি আহ। তুম্হঞ্ঞেৰ সঙ্ঘো উঞ্ঞায পরিভৰেন অক্খন্তিযা ৰেভস্সিযা দুব্বল্যা এৰমাহ – ভগিনিযো খো সংসট্ঠা ৰিহরন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা অঞ্ঞমঞ্ঞিস্সা ৰজ্জপ্পটিচ্ছাদিকা । ৰিৰিচ্চথায্যে। ৰিৰেকঞ্ঞেৰ ভগিনীনং সঙ্ঘো ৰণ্ণেতী’তি। সা তং ৰত্থুং ন পটিনিস্সজ্জতি। যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুনিং সমনুভাসেয্য তস্স ৰত্থুস্স পটিনিস্সগ্গায। এসা ঞত্তি।
730. ‘‘Suṇātu me, ayye, saṅgho. Ayaṃ itthannāmā bhikkhunī saṅghena samanubhaṭṭhā bhikkhuniyo evaṃ vadeti – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā aññamaññissā vajjappaṭicchādikā . Viviccathāyye. Vivekaññeva bhaginīnaṃ saṅgho vaṇṇetī’ti. Sā taṃ vatthuṃ na paṭinissajjati. Yadi saṅghassa pattakallaṃ, saṅgho itthannāmaṃ bhikkhuniṃ samanubhāseyya tassa vatthussa paṭinissaggāya. Esā ñatti.
‘‘সুণাতু মে, অয্যে, সঙ্ঘো। অযং ইত্থন্নামা ভিক্খুনী সঙ্ঘেন সমনুভট্ঠা ভিক্খুনিযো এৰং ৰদেতি – ‘সংসট্ঠাৰ অয্যে, তুম্হে ৰিহরথ। মা তুম্হে নানা ৰিহরিত্থ। সন্তি সঙ্ঘে অঞ্ঞাপি ভিক্খুনিযো এৰাচারা এৰংসদ্দা এৰংসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা। তা সঙ্ঘো ন কিঞ্চি আহ। তুম্হঞ্ঞেৰ সঙ্ঘো উঞ্ঞায পরিভৰেন অক্খন্তিযা ৰেভস্সিযা দুব্বল্যা এৰমাহ – ভগিনিযো খো সংসট্ঠা ৰিহরন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা। ৰিৰিচ্চথায্যে। ৰিৰেকঞ্ঞেৰ ভগিনীনং সঙ্ঘো ৰণ্ণেতী’তি। সা তং ৰত্থুং ন পটিনিস্সজ্জতি। সঙ্ঘো ইত্থন্নামং ভিক্খুনিং সমনুভাসতি তস্স ৰত্থুস্স পটিনিস্সগ্গায। যস্সা অয্যায খমতি ইত্থন্নামায ভিক্খুনিযা সমনুভাসনা তস্স ৰত্থুস্স পটিনিস্সগ্গায, সা তুণ্হস্স; যস্সা নক্খমতি, সা ভাসেয্য।
‘‘Suṇātu me, ayye, saṅgho. Ayaṃ itthannāmā bhikkhunī saṅghena samanubhaṭṭhā bhikkhuniyo evaṃ vadeti – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Sā taṃ vatthuṃ na paṭinissajjati. Saṅgho itthannāmaṃ bhikkhuniṃ samanubhāsati tassa vatthussa paṭinissaggāya. Yassā ayyāya khamati itthannāmāya bhikkhuniyā samanubhāsanā tassa vatthussa paṭinissaggāya, sā tuṇhassa; yassā nakkhamati, sā bhāseyya.
‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি…পে॰…।
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘সমনুভট্ঠা সঙ্ঘেন ইত্থন্নামা ভিক্খুনী তস্স ৰত্থুস্স পটিনিস্সগ্গায। খমতি সঙ্ঘস্স, তস্মা তুণ্হী, এৰমেতং ধারযামী’’তি।
‘‘Samanubhaṭṭhā saṅghena itthannāmā bhikkhunī tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
ঞত্তিযা দুক্কটং, দ্ৰীহি কম্মৰাচাহি থুল্লচ্চযা, কম্মৰাচাপরিযোসানে আপত্তি সঙ্ঘাদিসেসস্স। সঙ্ঘাদিসেসং অজ্ঝাপজ্জন্তিযা ঞত্তিযা দুক্কটং, দ্ৰীহি কম্মৰাচাহি থুল্লচ্চযা পটিপ্পস্সম্ভন্তি।
Ñattiyā dukkaṭaṃ, dvīhi kammavācāhi thullaccayā, kammavācāpariyosāne āpatti saṅghādisesassa. Saṅghādisesaṃ ajjhāpajjantiyā ñattiyā dukkaṭaṃ, dvīhi kammavācāhi thullaccayā paṭippassambhanti.
অযম্পীতি পুরিমাযো উপাদায ৰুচ্চতি।
Ayampīti purimāyo upādāya vuccati.
যাৰততিযকন্তি যাৰততিযং সমনুভাসনায আপজ্জতি, ন সহৰত্থুজ্ঝাচারা।
Yāvatatiyakanti yāvatatiyaṃ samanubhāsanāya āpajjati, na sahavatthujjhācārā.
নিস্সারণীযন্তি সঙ্ঘম্হা নিস্সারীযতি।
Nissāraṇīyanti saṅghamhā nissārīyati.
সঙ্ঘাদিসেসোতি সঙ্ঘোৰ তস্সা আপত্তিযা মানত্তং দেতি, মূলায পটিকস্সতি, অব্ভেতি, ন সম্বহুলা ন একা ভিক্খুনী। তেন ৰুচ্চতি ‘‘সঙ্ঘাদিসেসো’’তি। তস্সেৰ আপত্তিনিকাযস্স নামকম্মং অধিৰচনং, তেনপি ৰুচ্চতি ‘‘সঙ্ঘাদিসেসো’’তি।
Saṅghādisesoti saṅghova tassā āpattiyā mānattaṃ deti, mūlāya paṭikassati, abbheti, na sambahulā na ekā bhikkhunī. Tena vuccati ‘‘saṅghādiseso’’ti. Tasseva āpattinikāyassa nāmakammaṃ adhivacanaṃ, tenapi vuccati ‘‘saṅghādiseso’’ti.
৭৩১. ধম্মকম্মে ধম্মকম্মসঞ্ঞা ন পটিনিস্সজ্জতি, আপত্তি সঙ্ঘাদিসেসস্স । ধম্মকম্মে ৰেমতিকা ন পটিনিস্সজ্জতি, আপত্তি সঙ্ঘাদিসেসস্স। ধম্মকম্মে অধম্মকম্মসঞ্ঞা ন পটিনিস্সজ্জতি, আপত্তি সঙ্ঘাদিসেসস্স।
731. Dhammakamme dhammakammasaññā na paṭinissajjati, āpatti saṅghādisesassa . Dhammakamme vematikā na paṭinissajjati, āpatti saṅghādisesassa. Dhammakamme adhammakammasaññā na paṭinissajjati, āpatti saṅghādisesassa.
অধম্মকম্মে ধম্মকম্মসঞ্ঞা, আপত্তি দুক্কটস্স। অধম্মকম্মে ৰেমতিকা, আপত্তি দুক্কটস্স। অধম্মকম্মে অধম্মকম্মসঞ্ঞা, আপত্তি দুক্কটস্স।
Adhammakamme dhammakammasaññā, āpatti dukkaṭassa. Adhammakamme vematikā, āpatti dukkaṭassa. Adhammakamme adhammakammasaññā, āpatti dukkaṭassa.
৭৩২. অনাপত্তি অসমনুভাসন্তিযা, পটিনিস্সজ্জন্তিযা, উম্মত্তিকায, আদিকম্মিকাযাতি।
732. Anāpatti asamanubhāsantiyā, paṭinissajjantiyā, ummattikāya, ādikammikāyāti.
দসমসঙ্ঘাদিসেসসিক্খাপদং নিট্ঠিতং।
Dasamasaṅghādisesasikkhāpadaṃ niṭṭhitaṃ.
উদ্দিট্ঠা খো, অয্যাযো, সত্তরস সঙ্ঘাদিসেসা ধম্মা – নৰ পঠমাপত্তিকা, অট্ঠ যাৰততিযকা। যেসং ভিক্খুনী অঞ্ঞতরং ৰা অঞ্ঞতরং ৰা আপজ্জতি, তায ভিক্খুনিযা উভতোসঙ্ঘে পক্খমানত্তং চরিতব্বং। চিণ্ণমানত্তা ভিক্খুনী যত্থ সিযা ৰীসতিগণো ভিক্খুনিসঙ্ঘো তত্থ (সা ভিক্খুনী) 7 অব্ভেতব্বা। একাযপি চে ঊনো ৰীসতিগণো ভিক্খুনিসঙ্ঘো তং ভিক্খুনিং অব্ভেয্য। সা চ ভিক্খুনী অনব্ভিতা, তা চ ভিক্খুনিযো গারয্হা, অযং তত্থ সামীচি।
Uddiṭṭhā kho, ayyāyo, sattarasa saṅghādisesā dhammā – nava paṭhamāpattikā, aṭṭha yāvatatiyakā. Yesaṃ bhikkhunī aññataraṃ vā aññataraṃ vā āpajjati, tāya bhikkhuniyā ubhatosaṅghe pakkhamānattaṃ caritabbaṃ. Ciṇṇamānattā bhikkhunī yattha siyā vīsatigaṇo bhikkhunisaṅgho tattha (sā bhikkhunī) 8 abbhetabbā. Ekāyapi ce ūno vīsatigaṇo bhikkhunisaṅgho taṃ bhikkhuniṃ abbheyya. Sā ca bhikkhunī anabbhitā, tā ca bhikkhuniyo gārayhā, ayaṃ tattha sāmīci.
তত্থায্যাযো পুচ্ছামি – ‘‘কচ্চিত্থ পরিসুদ্ধা’’? দুতিযম্পি পুচ্ছামি – ‘‘কচ্চিত্থ পরিসুদ্ধা’’? ততিযম্পি পুচ্ছামি – ‘‘কচ্চিত্থ পরিসুদ্ধা’’? পরিসুদ্ধেত্থায্যাযো, তস্মা তুণ্হী, এৰমেতং ধারযামীতি।
Tatthāyyāyo pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyyāyo, tasmā tuṇhī, evametaṃ dhārayāmīti.
সত্তরসকং নিট্ঠিতং।
Sattarasakaṃ niṭṭhitaṃ.
ভিক্খুনিৰিভঙ্গে সঙ্ঘাদিসেসকণ্ডং নিট্ঠিতং।
Bhikkhunivibhaṅge saṅghādisesakaṇḍaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / ১০. দসমসঙ্ঘাদিসেসসিক্খাপদৰণ্ণনা • 10. Dasamasaṅghādisesasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৯. নৰমসঙ্ঘাদিসেসসিক্খাপদৰণ্ণনা • 9. Navamasaṅghādisesasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৬. ছট্ঠসঙ্ঘাদিসেসসিক্খাপদৰণ্ণনা • 6. Chaṭṭhasaṅghādisesasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১০. দসমসঙ্ঘাদিসেসসিক্খাপদং • 10. Dasamasaṅghādisesasikkhāpadaṃ
