| Library / Tipiṭaka / ತಿಪಿಟಕ • Tipiṭaka / ಭಿಕ್ಖುನೀವಿಭಙ್ಗ • Bhikkhunīvibhaṅga |
೧೦. ದಸಮಸಙ್ಘಾದಿಸೇಸಸಿಕ್ಖಾಪದಂ
10. Dasamasaṅghādisesasikkhāpadaṃ
೭೨೭. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ। ತೇನ ಖೋ ಪನ ಸಮಯೇನ ಥುಲ್ಲನನ್ದಾ ಭಿಕ್ಖುನೀಸಙ್ಘೇನ ಸಮನುಭಟ್ಠಾ ಭಿಕ್ಖುನಿಯೋ ಏವಂ ವದೇತಿ – ‘‘ಸಂಸಟ್ಠಾವ ಅಯ್ಯೇ, ತುಮ್ಹೇ ವಿಹರಥ। ಮಾ ತುಮ್ಹೇ ನಾನಾ ವಿಹರಿತ್ಥ। ಸನ್ತಿ ಸಙ್ಘೇ ಅಞ್ಞಾಪಿ ಭಿಕ್ಖುನಿಯೋ ಏವಾಚಾರಾ ಏವಂಸದ್ದಾ ಏವಂಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ತಾ ಸಙ್ಘೋ ನ ಕಿಞ್ಚಿ ಆಹ। ತುಮ್ಹಞ್ಞೇವ 1 ಸಙ್ಘೋ ಉಞ್ಞಾಯ ಪರಿಭವೇನ ಅಕ್ಖನ್ತಿಯಾ ವೇಭಸ್ಸಿಯಾ 2 ದುಬ್ಬಲ್ಯಾ ಏವಮಾಹ – ‘ಭಗಿನಿಯೋ ಖೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ವಿವಿಚ್ಚಥಾಯ್ಯೇ। ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀ’’’ತಿ। ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ॰… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಭಿಕ್ಖುನೀ ಸಙ್ಘೇನ ಸಮನುಭಟ್ಠಾ ಭಿಕ್ಖುನಿಯೋ ಏವಂ ವಕ್ಖತಿ – ಸಂಸಟ್ಠಾವ ಅಯ್ಯೇ, ತುಮ್ಹೇ ವಿಹರಥ। ಮಾ ತುಮ್ಹೇ ನಾನಾ ವಿಹರಿತ್ಥ। ಸನ್ತಿ ಸಙ್ಘೇ ಅಞ್ಞಾಪಿ ಭಿಕ್ಖುನಿಯೋ…ಪೇ॰… ವಿವಿಚ್ಚಥಾಯ್ಯೇ। ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀತಿ…ಪೇ॰… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಸಙ್ಘೇನ ಸಮನುಭಟ್ಠಾ ಭಿಕ್ಖುನಿಯೋ ಏವಂ ವದೇತಿ – ಸಂಸಟ್ಠಾವ ಅಯ್ಯೇ ತುಮ್ಹೇ ವಿಹರಥ। ಮಾ ತುಮ್ಹೇ ನಾನಾ ವಿಹರಿತ್ಥ। ಸನ್ತಿ ಸಙ್ಘೇ ಅಞ್ಞಾಪಿ ಭಿಕ್ಖುನಿಯೋ ಏವಾಚಾರಾ ಏವಂಸದ್ದಾ ಏವಂಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ತಾ ಸಙ್ಘೋ ನ ಕಿಞ್ಚಿ ಆಹ। ತುಮ್ಹಞ್ಞೇವ ಸಙ್ಘೋ ಉಞ್ಞಾಯ ಪರಿಭವೇನ ಅಕ್ಖನ್ತಿಯಾ ವೇಭಸ್ಸಿಯಾ ದುಬ್ಬಲ್ಯಾ ಏವಮಾಹ – ಭಗಿನಿಯೋ ಖೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ವಿವಿಚ್ಚಥಾಯ್ಯೇ। ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀತಿ? ‘‘ಸಚ್ಚಂ ಭಗವಾ’’ತಿ। ವಿಗರಹಿ ಬುದ್ಧೋ ಭಗವಾ…ಪೇ॰… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಸಙ್ಘೇನ ಸಮನುಭಟ್ಠಾ ಭಿಕ್ಖುನಿಯೋ ಏವಂ ವಕ್ಖತಿ – ಸಂಸಟ್ಠಾವ ಅಯ್ಯೇ, ತುಮ್ಹೇ ವಿಹರಥ। ಮಾ ತುಮ್ಹೇ ನಾನಾ ವಿಹರಿತ್ಥ। ಸನ್ತಿ ಸಙ್ಘೇ ಅಞ್ಞಾಪಿ ಭಿಕ್ಖುನಿಯೋ…ಪೇ॰… ವಿವಿಚ್ಚಥಾಯ್ಯೇ। ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ॰… ಏವಞ್ಚ ಪನ ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –
727. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunīsaṅghena samanubhaṭṭhā bhikkhuniyo evaṃ vadeti – ‘‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva 3 saṅgho uññāya paribhavena akkhantiyā vebhassiyā 4 dubbalyā evamāha – ‘bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’’’ti. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma ayyā thullanandā bhikkhunī saṅghena samanubhaṭṭhā bhikkhuniyo evaṃ vakkhati – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetīti…pe… saccaṃ kira, bhikkhave, thullanandā bhikkhunī saṅghena samanubhaṭṭhā bhikkhuniyo evaṃ vadeti – saṃsaṭṭhāva ayye tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetīti? ‘‘Saccaṃ bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī saṅghena samanubhaṭṭhā bhikkhuniyo evaṃ vakkhati – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetīti! Netaṃ, bhikkhave, appasannānaṃ vā pasādāya…pe… evañca pana bhikkhave, bhikkhuniyo imaṃ sikkhāpadaṃ uddisantu –
೭೨೮. ‘‘ಯಾ ಪನ ಭಿಕ್ಖುನೀ ಏವಂ ವದೇಯ್ಯ – ‘ಸಂಸಟ್ಠಾವ ಅಯ್ಯೇ, ತುಮ್ಹೇ ವಿಹರಥ। ಮಾ ತುಮ್ಹೇ ನಾನಾ ವಿಹರಿತ್ಥ। ಸನ್ತಿ ಸಙ್ಘೇ ಅಞ್ಞಾಪಿ ಭಿಕ್ಖುನಿಯೋ ಏವಾಚಾರಾ ಏವಂಸದ್ದಾ ಏವಂಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ತಾ ಸಙ್ಘೋ ನ ಕಿಞ್ಚಿ ಆಹ। ತುಮ್ಹಞ್ಞೇವ ಸಙ್ಘೋ ಉಞ್ಞಾಯ ಪರಿಭವೇನ ಅಕ್ಖನ್ತಿಯಾ ವೇಭಸ್ಸಿಯಾ ದುಬ್ಬಲ್ಯಾ ಏವಮಾಹ – ಭಗಿನಿಯೋ ಖೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ವಿವಿಚ್ಚಥಾಯ್ಯೇ। ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀ’ತಿ। ಸಾ ಭಿಕ್ಖುನೀ ಭಿಕ್ಖುನೀಹಿ ಏವಮಸ್ಸ ವಚನೀಯಾ – ‘ಮಾ, ಅಯ್ಯೇ, ಏವಂ ಅವಚ – ಸಂಸಟ್ಠಾವ ಅಯ್ಯೇ, ತುಮ್ಹೇ ವಿಹರಥ। ಮಾ ತುಮ್ಹೇ ನಾನಾ ವಿಹರಿತ್ಥ। ಸನ್ತಿ ಸಙ್ಘೇ ಅಞ್ಞಾಪಿ ಭಿಕ್ಖುನಿಯೋ ಏವಾಚಾರಾ ಏವಂಸದ್ದಾ ಏವಂಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ತಾ ಸಙ್ಘೋ ನ ಕಿಞ್ಚಿ ಆಹ। ತುಮ್ಹಞ್ಞೇವ ಸಙ್ಘೋ ಉಞ್ಞಾಯ ಪರಿಭವೇನ ಅಕ್ಖನ್ತಿಯಾ ವೇಭಸ್ಸಿಯಾ ದುಬ್ಬಲ್ಯಾ ಏವಮಾಹ – ಭಗಿನಿಯೋ ಖೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ವಿವಿಚ್ಚಥಾಯ್ಯೇ। ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀ’ತಿ। ಏವಞ್ಚ ಸಾ ಭಿಕ್ಖುನೀ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ। ಯಾವತತಿಯಞ್ಚೇ ಸಮನುಭಾಸೀಯಮಾನಾ ತಂ ಪಟಿನಿಸ್ಸಜ್ಜೇಯ್ಯ, ಇಚ್ಚೇತಂ ಕುಸಲಂ; ನೋ ಚೇ ಪಟಿನಿಸ್ಸಜ್ಜೇಯ್ಯ, ಅಯಮ್ಪಿ ಭಿಕ್ಖುನೀ ಯಾವತತಿಯಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ।
728.‘‘Yāpana bhikkhunī evaṃ vadeyya – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Sā bhikkhunī bhikkhunīhi evamassa vacanīyā – ‘mā, ayye, evaṃ avaca – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya. Yāvatatiyañce samanubhāsīyamānā taṃ paṭinissajjeyya, iccetaṃ kusalaṃ; no ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesa’’nti.
೭೨೯. ಯಾ ಪನಾತಿ ಯಾ ಯಾದಿಸಾ…ಪೇ॰… ಭಿಕ್ಖುನೀತಿ…ಪೇ॰… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ।
729.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ಏವಂ ವದೇಯ್ಯಾತಿ – ‘‘ಸಂಸಟ್ಠಾವ ಅಯ್ಯೇ, ತುಮ್ಹೇ ವಿಹರಥ। ಮಾ ತುಮ್ಹೇ ನಾನಾ ವಿಹರಿತ್ಥ। ಸನ್ತಿ ಸಙ್ಘೇ ಅಞ್ಞಾಪಿ ಭಿಕ್ಖುನಿಯೋ ಏವಾಚಾರಾ ಏವಂಸದ್ದಾ ಏವಂಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ತಾ ಸಙ್ಘೋ ನ ಕಿಞ್ಚಿ ಆಹ’’।
Evaṃ vadeyyāti – ‘‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha’’.
ತುಮ್ಹಞ್ಞೇವ ಸಙ್ಘೋ ಉಞ್ಞಾಯಾತಿ ಅವಞ್ಞಾಯ।
Tumhaññeva saṅgho uññāyāti avaññāya.
ಪರಿಭವೇನಾತಿ ಪಾರಿಭಬ್ಯತಾ।
Paribhavenāti pāribhabyatā.
ಅಕ್ಖನ್ತಿಯಾತಿ ಕೋಪೇನ।
Akkhantiyāti kopena.
ದುಬ್ಬಲ್ಯಾತಿ ಅಪಕ್ಖತಾ।
Dubbalyāti apakkhatā.
ಏವಮಾಹ – ‘‘ಭಗಿನಿಯೋ ಖೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ವಿಚಿಚ್ಚಥಾಯ್ಯೇ। ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀ’’ತಿ।
Evamāha – ‘‘bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viciccathāyye. Vivekaññeva bhaginīnaṃ saṅgho vaṇṇetī’’ti.
ಸಾ ಭಿಕ್ಖುನೀತಿ ಯಾ ಸಾ ಏವಂವಾದಿನೀ ಭಿಕ್ಖುನೀ।
Sā bhikkhunīti yā sā evaṃvādinī bhikkhunī.
ಭಿಕ್ಖುನೀಹೀತಿ ಅಞ್ಞಾಹಿ ಭಿಕ್ಖುನೀಹಿ।
Bhikkhunīhīti aññāhi bhikkhunīhi.
ಯಾ ಪಸ್ಸನ್ತಿ ಯಾ ಸುಣನ್ತಿ ತಾಹಿ ವತ್ತಬ್ಬಾ – ‘‘ಮಾಯ್ಯೇ, ಏವಂ ಅವಚ – ‘ಸಂಸಟ್ಠಾವ ಅಯ್ಯೇ, ತುಮ್ಹೇ ವಿಹರಥ। ಮಾ ತುಮ್ಹೇ ನಾನಾ ವಿಹರಿತ್ಥ। ಸನ್ತಿ ಸಙ್ಘೇ ಅಞ್ಞಾಪಿ ಭಿಕ್ಖುನಿಯೋ…ಪೇ॰… ವಿವಿಚ್ಚಥಾಯ್ಯೇ। ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀ’’ತಿ। ದುತಿಯಮ್ಪಿ ವತ್ತಬ್ಬಾ। ತತಿಯಮ್ಪಿ ವತ್ತಬ್ಬಾ। ಸಚೇ ಪಟಿನಿಸ್ಸಜ್ಜತಿ, ಇಚ್ಚೇತಂ ಕುಸಲಂ; ನೋ ಚೇ ಪಟಿನಿಸ್ಸಜ್ಜತಿ, ಆಪತ್ತಿ ದುಕ್ಕಟಸ್ಸ। ಸುತ್ವಾ ನ ವದನ್ತಿ, ಆಪತ್ತಿ ದುಕ್ಕಟಸ್ಸ। ಸಾ ಭಿಕ್ಖುನೀ ಸಙ್ಘಮಜ್ಝಮ್ಪಿ ಆಕಡ್ಢಿತ್ವಾ ವತ್ತಬ್ಬಾ – ‘‘ಮಾಯ್ಯೇ, ಏವಂ ಅವಚ – ‘ಸಂಸಟ್ಠಾವ ಅಯ್ಯೇ, ತುಮ್ಹೇ ವಿಹರಥ। ಮಾ ತುಮ್ಹೇ ನಾನಾ ವಿಹರಿತ್ಥ। ಸನ್ತಿ ಸಙ್ಘೇ ಅಞ್ಞಾಪಿ ಭಿಕ್ಖುನಿಯೋ…ಪೇ॰… ವಿವಿಚ್ಚಥಾಯ್ಯೇ। ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀ’’’ತಿ। ದುತಿಯಮ್ಪಿ ವತ್ತಬ್ಬಾ। ತತಿಯಮ್ಪಿ ವತ್ತಬ್ಬಾ। ಸಚೇ ಪಟಿನಿಸ್ಸಜ್ಜತಿ, ಇಚ್ಚೇತಂ ಕುಸಲಂ; ನೋ ಚೇ ಪಟಿನಿಸ್ಸಜ್ಜತಿ, ಆಪತ್ತಿ ದುಕ್ಕಟಸ್ಸ। ಸಾ ಭಿಕ್ಖುನೀ ಸಮನುಭಾಸಿತಬ್ಬಾ। ಏವಞ್ಚ ಪನ, ಭಿಕ್ಖವೇ, ಸಮನುಭಾಸಿತಬ್ಬಾ। ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –
Yā passanti yā suṇanti tāhi vattabbā – ‘‘māyye, evaṃ avaca – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetī’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sutvā na vadanti, āpatti dukkaṭassa. Sā bhikkhunī saṅghamajjhampi ākaḍḍhitvā vattabbā – ‘‘māyye, evaṃ avaca – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetī’’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sā bhikkhunī samanubhāsitabbā. Evañca pana, bhikkhave, samanubhāsitabbā. Byattāya bhikkhuniyā paṭibalāya saṅgho ñāpetabbo –
೭೩೦. ‘‘ಸುಣಾತು ಮೇ, ಅಯ್ಯೇ, ಸಙ್ಘೋ। ಅಯಂ ಇತ್ಥನ್ನಾಮಾ ಭಿಕ್ಖುನೀ ಸಙ್ಘೇನ ಸಮನುಭಟ್ಠಾ ಭಿಕ್ಖುನಿಯೋ ಏವಂ ವದೇತಿ – ‘ಸಂಸಟ್ಠಾವ ಅಯ್ಯೇ, ತುಮ್ಹೇ ವಿಹರಥ। ಮಾ ತುಮ್ಹೇ ನಾನಾ ವಿಹರಿತ್ಥ। ಸನ್ತಿ ಸಙ್ಘೇ ಅಞ್ಞಾಪಿ ಭಿಕ್ಖುನಿಯೋ ಏವಾಚಾರಾ ಏವಂಸದ್ದಾ ಏವಂಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ತಾ ಸಙ್ಘೋ ನ ಕಿಞ್ಚಿ ಆಹ। ತುಮ್ಹಞ್ಞೇವ ಸಙ್ಘೋ ಉಞ್ಞಾಯ ಪರಿಭವೇನ ಅಕ್ಖನ್ತಿಯಾ ವೇಭಸ್ಸಿಯಾ ದುಬ್ಬಲ್ಯಾ ಏವಮಾಹ – ಭಗಿನಿಯೋ ಖೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ । ವಿವಿಚ್ಚಥಾಯ್ಯೇ। ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀ’ತಿ। ಸಾ ತಂ ವತ್ಥುಂ ನ ಪಟಿನಿಸ್ಸಜ್ಜತಿ। ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮನುಭಾಸೇಯ್ಯ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ। ಏಸಾ ಞತ್ತಿ।
730. ‘‘Suṇātu me, ayye, saṅgho. Ayaṃ itthannāmā bhikkhunī saṅghena samanubhaṭṭhā bhikkhuniyo evaṃ vadeti – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā aññamaññissā vajjappaṭicchādikā . Viviccathāyye. Vivekaññeva bhaginīnaṃ saṅgho vaṇṇetī’ti. Sā taṃ vatthuṃ na paṭinissajjati. Yadi saṅghassa pattakallaṃ, saṅgho itthannāmaṃ bhikkhuniṃ samanubhāseyya tassa vatthussa paṭinissaggāya. Esā ñatti.
‘‘ಸುಣಾತು ಮೇ, ಅಯ್ಯೇ, ಸಙ್ಘೋ। ಅಯಂ ಇತ್ಥನ್ನಾಮಾ ಭಿಕ್ಖುನೀ ಸಙ್ಘೇನ ಸಮನುಭಟ್ಠಾ ಭಿಕ್ಖುನಿಯೋ ಏವಂ ವದೇತಿ – ‘ಸಂಸಟ್ಠಾವ ಅಯ್ಯೇ, ತುಮ್ಹೇ ವಿಹರಥ। ಮಾ ತುಮ್ಹೇ ನಾನಾ ವಿಹರಿತ್ಥ। ಸನ್ತಿ ಸಙ್ಘೇ ಅಞ್ಞಾಪಿ ಭಿಕ್ಖುನಿಯೋ ಏವಾಚಾರಾ ಏವಂಸದ್ದಾ ಏವಂಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ತಾ ಸಙ್ಘೋ ನ ಕಿಞ್ಚಿ ಆಹ। ತುಮ್ಹಞ್ಞೇವ ಸಙ್ಘೋ ಉಞ್ಞಾಯ ಪರಿಭವೇನ ಅಕ್ಖನ್ತಿಯಾ ವೇಭಸ್ಸಿಯಾ ದುಬ್ಬಲ್ಯಾ ಏವಮಾಹ – ಭಗಿನಿಯೋ ಖೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ವಿವಿಚ್ಚಥಾಯ್ಯೇ। ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀ’ತಿ। ಸಾ ತಂ ವತ್ಥುಂ ನ ಪಟಿನಿಸ್ಸಜ್ಜತಿ। ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮನುಭಾಸತಿ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ। ಯಸ್ಸಾ ಅಯ್ಯಾಯ ಖಮತಿ ಇತ್ಥನ್ನಾಮಾಯ ಭಿಕ್ಖುನಿಯಾ ಸಮನುಭಾಸನಾ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ, ಸಾ ತುಣ್ಹಸ್ಸ; ಯಸ್ಸಾ ನಕ್ಖಮತಿ, ಸಾ ಭಾಸೇಯ್ಯ।
‘‘Suṇātu me, ayye, saṅgho. Ayaṃ itthannāmā bhikkhunī saṅghena samanubhaṭṭhā bhikkhuniyo evaṃ vadeti – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Sā taṃ vatthuṃ na paṭinissajjati. Saṅgho itthannāmaṃ bhikkhuniṃ samanubhāsati tassa vatthussa paṭinissaggāya. Yassā ayyāya khamati itthannāmāya bhikkhuniyā samanubhāsanā tassa vatthussa paṭinissaggāya, sā tuṇhassa; yassā nakkhamati, sā bhāseyya.
‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ॰… ತತಿಯಮ್ಪಿ ಏತಮತ್ಥಂ ವದಾಮಿ…ಪೇ॰…।
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘ಸಮನುಭಟ್ಠಾ ಸಙ್ಘೇನ ಇತ್ಥನ್ನಾಮಾ ಭಿಕ್ಖುನೀ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ। ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ।
‘‘Samanubhaṭṭhā saṅghena itthannāmā bhikkhunī tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
ಞತ್ತಿಯಾ ದುಕ್ಕಟಂ, ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ, ಕಮ್ಮವಾಚಾಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ। ಸಙ್ಘಾದಿಸೇಸಂ ಅಜ್ಝಾಪಜ್ಜನ್ತಿಯಾ ಞತ್ತಿಯಾ ದುಕ್ಕಟಂ, ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ ಪಟಿಪ್ಪಸ್ಸಮ್ಭನ್ತಿ।
Ñattiyā dukkaṭaṃ, dvīhi kammavācāhi thullaccayā, kammavācāpariyosāne āpatti saṅghādisesassa. Saṅghādisesaṃ ajjhāpajjantiyā ñattiyā dukkaṭaṃ, dvīhi kammavācāhi thullaccayā paṭippassambhanti.
ಅಯಮ್ಪೀತಿ ಪುರಿಮಾಯೋ ಉಪಾದಾಯ ವುಚ್ಚತಿ।
Ayampīti purimāyo upādāya vuccati.
ಯಾವತತಿಯಕನ್ತಿ ಯಾವತತಿಯಂ ಸಮನುಭಾಸನಾಯ ಆಪಜ್ಜತಿ, ನ ಸಹವತ್ಥುಜ್ಝಾಚಾರಾ।
Yāvatatiyakanti yāvatatiyaṃ samanubhāsanāya āpajjati, na sahavatthujjhācārā.
ನಿಸ್ಸಾರಣೀಯನ್ತಿ ಸಙ್ಘಮ್ಹಾ ನಿಸ್ಸಾರೀಯತಿ।
Nissāraṇīyanti saṅghamhā nissārīyati.
ಸಙ್ಘಾದಿಸೇಸೋತಿ ಸಙ್ಘೋವ ತಸ್ಸಾ ಆಪತ್ತಿಯಾ ಮಾನತ್ತಂ ದೇತಿ, ಮೂಲಾಯ ಪಟಿಕಸ್ಸತಿ, ಅಬ್ಭೇತಿ, ನ ಸಮ್ಬಹುಲಾ ನ ಏಕಾ ಭಿಕ್ಖುನೀ। ತೇನ ವುಚ್ಚತಿ ‘‘ಸಙ್ಘಾದಿಸೇಸೋ’’ತಿ। ತಸ್ಸೇವ ಆಪತ್ತಿನಿಕಾಯಸ್ಸ ನಾಮಕಮ್ಮಂ ಅಧಿವಚನಂ, ತೇನಪಿ ವುಚ್ಚತಿ ‘‘ಸಙ್ಘಾದಿಸೇಸೋ’’ತಿ।
Saṅghādisesoti saṅghova tassā āpattiyā mānattaṃ deti, mūlāya paṭikassati, abbheti, na sambahulā na ekā bhikkhunī. Tena vuccati ‘‘saṅghādiseso’’ti. Tasseva āpattinikāyassa nāmakammaṃ adhivacanaṃ, tenapi vuccati ‘‘saṅghādiseso’’ti.
೭೩೧. ಧಮ್ಮಕಮ್ಮೇ ಧಮ್ಮಕಮ್ಮಸಞ್ಞಾ ನ ಪಟಿನಿಸ್ಸಜ್ಜತಿ, ಆಪತ್ತಿ ಸಙ್ಘಾದಿಸೇಸಸ್ಸ । ಧಮ್ಮಕಮ್ಮೇ ವೇಮತಿಕಾ ನ ಪಟಿನಿಸ್ಸಜ್ಜತಿ, ಆಪತ್ತಿ ಸಙ್ಘಾದಿಸೇಸಸ್ಸ। ಧಮ್ಮಕಮ್ಮೇ ಅಧಮ್ಮಕಮ್ಮಸಞ್ಞಾ ನ ಪಟಿನಿಸ್ಸಜ್ಜತಿ, ಆಪತ್ತಿ ಸಙ್ಘಾದಿಸೇಸಸ್ಸ।
731. Dhammakamme dhammakammasaññā na paṭinissajjati, āpatti saṅghādisesassa . Dhammakamme vematikā na paṭinissajjati, āpatti saṅghādisesassa. Dhammakamme adhammakammasaññā na paṭinissajjati, āpatti saṅghādisesassa.
ಅಧಮ್ಮಕಮ್ಮೇ ಧಮ್ಮಕಮ್ಮಸಞ್ಞಾ, ಆಪತ್ತಿ ದುಕ್ಕಟಸ್ಸ। ಅಧಮ್ಮಕಮ್ಮೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ। ಅಧಮ್ಮಕಮ್ಮೇ ಅಧಮ್ಮಕಮ್ಮಸಞ್ಞಾ, ಆಪತ್ತಿ ದುಕ್ಕಟಸ್ಸ।
Adhammakamme dhammakammasaññā, āpatti dukkaṭassa. Adhammakamme vematikā, āpatti dukkaṭassa. Adhammakamme adhammakammasaññā, āpatti dukkaṭassa.
೭೩೨. ಅನಾಪತ್ತಿ ಅಸಮನುಭಾಸನ್ತಿಯಾ, ಪಟಿನಿಸ್ಸಜ್ಜನ್ತಿಯಾ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ।
732. Anāpatti asamanubhāsantiyā, paṭinissajjantiyā, ummattikāya, ādikammikāyāti.
ದಸಮಸಙ್ಘಾದಿಸೇಸಸಿಕ್ಖಾಪದಂ ನಿಟ್ಠಿತಂ।
Dasamasaṅghādisesasikkhāpadaṃ niṭṭhitaṃ.
ಉದ್ದಿಟ್ಠಾ ಖೋ, ಅಯ್ಯಾಯೋ, ಸತ್ತರಸ ಸಙ್ಘಾದಿಸೇಸಾ ಧಮ್ಮಾ – ನವ ಪಠಮಾಪತ್ತಿಕಾ, ಅಟ್ಠ ಯಾವತತಿಯಕಾ। ಯೇಸಂ ಭಿಕ್ಖುನೀ ಅಞ್ಞತರಂ ವಾ ಅಞ್ಞತರಂ ವಾ ಆಪಜ್ಜತಿ, ತಾಯ ಭಿಕ್ಖುನಿಯಾ ಉಭತೋಸಙ್ಘೇ ಪಕ್ಖಮಾನತ್ತಂ ಚರಿತಬ್ಬಂ। ಚಿಣ್ಣಮಾನತ್ತಾ ಭಿಕ್ಖುನೀ ಯತ್ಥ ಸಿಯಾ ವೀಸತಿಗಣೋ ಭಿಕ್ಖುನಿಸಙ್ಘೋ ತತ್ಥ (ಸಾ ಭಿಕ್ಖುನೀ) 7 ಅಬ್ಭೇತಬ್ಬಾ। ಏಕಾಯಪಿ ಚೇ ಊನೋ ವೀಸತಿಗಣೋ ಭಿಕ್ಖುನಿಸಙ್ಘೋ ತಂ ಭಿಕ್ಖುನಿಂ ಅಬ್ಭೇಯ್ಯ। ಸಾ ಚ ಭಿಕ್ಖುನೀ ಅನಬ್ಭಿತಾ, ತಾ ಚ ಭಿಕ್ಖುನಿಯೋ ಗಾರಯ್ಹಾ, ಅಯಂ ತತ್ಥ ಸಾಮೀಚಿ।
Uddiṭṭhā kho, ayyāyo, sattarasa saṅghādisesā dhammā – nava paṭhamāpattikā, aṭṭha yāvatatiyakā. Yesaṃ bhikkhunī aññataraṃ vā aññataraṃ vā āpajjati, tāya bhikkhuniyā ubhatosaṅghe pakkhamānattaṃ caritabbaṃ. Ciṇṇamānattā bhikkhunī yattha siyā vīsatigaṇo bhikkhunisaṅgho tattha (sā bhikkhunī) 8 abbhetabbā. Ekāyapi ce ūno vīsatigaṇo bhikkhunisaṅgho taṃ bhikkhuniṃ abbheyya. Sā ca bhikkhunī anabbhitā, tā ca bhikkhuniyo gārayhā, ayaṃ tattha sāmīci.
ತತ್ಥಾಯ್ಯಾಯೋ ಪುಚ್ಛಾಮಿ – ‘‘ಕಚ್ಚಿತ್ಥ ಪರಿಸುದ್ಧಾ’’? ದುತಿಯಮ್ಪಿ ಪುಚ್ಛಾಮಿ – ‘‘ಕಚ್ಚಿತ್ಥ ಪರಿಸುದ್ಧಾ’’? ತತಿಯಮ್ಪಿ ಪುಚ್ಛಾಮಿ – ‘‘ಕಚ್ಚಿತ್ಥ ಪರಿಸುದ್ಧಾ’’? ಪರಿಸುದ್ಧೇತ್ಥಾಯ್ಯಾಯೋ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ।
Tatthāyyāyo pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyyāyo, tasmā tuṇhī, evametaṃ dhārayāmīti.
ಸತ್ತರಸಕಂ ನಿಟ್ಠಿತಂ।
Sattarasakaṃ niṭṭhitaṃ.
ಭಿಕ್ಖುನಿವಿಭಙ್ಗೇ ಸಙ್ಘಾದಿಸೇಸಕಣ್ಡಂ ನಿಟ್ಠಿತಂ।
Bhikkhunivibhaṅge saṅghādisesakaṇḍaṃ niṭṭhitaṃ.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಭಿಕ್ಖುನೀವಿಭಙ್ಗ-ಅಟ್ಠಕಥಾ • Bhikkhunīvibhaṅga-aṭṭhakathā / ೧೦. ದಸಮಸಙ್ಘಾದಿಸೇಸಸಿಕ್ಖಾಪದವಣ್ಣನಾ • 10. Dasamasaṅghādisesasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೯. ನವಮಸಙ್ಘಾದಿಸೇಸಸಿಕ್ಖಾಪದವಣ್ಣನಾ • 9. Navamasaṅghādisesasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೬. ಛಟ್ಠಸಙ್ಘಾದಿಸೇಸಸಿಕ್ಖಾಪದವಣ್ಣನಾ • 6. Chaṭṭhasaṅghādisesasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧೦. ದಸಮಸಙ್ಘಾದಿಸೇಸಸಿಕ್ಖಾಪದಂ • 10. Dasamasaṅghādisesasikkhāpadaṃ
