| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
10. த³ஸமஸிக்கா²பத³ங்
10. Dasamasikkhāpadaṃ
973. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன பி⁴க்கு²னியோ தத்தே²வ ராஜக³ஹே வஸ்ஸங் வஸந்தி, தத்த² ஹேமந்தங், தத்த² கி³ம்ஹங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘ஆஹுந்த³ரிகா பி⁴க்கு²னீனங் தி³ஸா அந்த⁴காரா, ந இமாஸங் தி³ஸா பக்கா²யந்தீ’’தி. அஸ்ஸோஸுங் கோ² பி⁴க்கு²னியோ தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தா பி⁴க்கு²னியோ பி⁴க்கூ²னங் ஏதமத்த²ங் ஆரோசேஸுங். பி⁴க்கூ² ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, பி⁴க்கு²னீனங் ஸிக்கா²பத³ங் பஞ்ஞபெஸ்ஸாமி த³ஸ அத்த²வஸே படிச்ச – ஸங்க⁴ஸுட்டு²தாய…பே॰… ஸத்³த⁴ம்மட்டி²தியா வினயானுக்³க³ஹாய. ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
973. Tena samayena buddho bhagavā rājagahe viharati veḷuvane kalandakanivāpe. Tena kho pana samayena bhikkhuniyo tattheva rājagahe vassaṃ vasanti, tattha hemantaṃ, tattha gimhaṃ. Manussā ujjhāyanti khiyyanti vipācenti – ‘‘āhundarikā bhikkhunīnaṃ disā andhakārā, na imāsaṃ disā pakkhāyantī’’ti. Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho tā bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘tena hi, bhikkhave, bhikkhunīnaṃ sikkhāpadaṃ paññapessāmi dasa atthavase paṭicca – saṅghasuṭṭhutāya…pe… saddhammaṭṭhitiyā vinayānuggahāya. Evañca pana, bhikkhave, bhikkhuniyo imaṃ sikkhāpadaṃ uddisantu –
974. ‘‘யா பன பி⁴க்கு²னீ வஸ்ஸங்வுட்டா² சாரிகங் ந பக்கமெய்ய அந்தமஸோ ச²ப்பஞ்சயோஜனானிபி, பாசித்திய’’ந்தி.
974.‘‘Yā pana bhikkhunī vassaṃvuṭṭhā cārikaṃ na pakkameyya antamaso chappañcayojanānipi, pācittiya’’nti.
975. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
975.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
வஸ்ஸங்வுட்டா² நாம புரிமங் வா தேமாஸங் பச்சி²மங் வா தேமாஸங் வுட்டா².
Vassaṃvuṭṭhā nāma purimaṃ vā temāsaṃ pacchimaṃ vā temāsaṃ vuṭṭhā.
‘‘சாரிகங் ந பக்கமிஸ்ஸாமி அந்தமஸோ ச²ப்பஞ்சயோஜனானிபீ’’தி து⁴ரங் நிக்கி²த்தமத்தே ஆபத்தி பாசித்தியஸ்ஸ.
‘‘Cārikaṃ na pakkamissāmi antamaso chappañcayojanānipī’’ti dhuraṃ nikkhittamatte āpatti pācittiyassa.
976. அனாபத்தி ஸதி அந்தராயே, பரியேஸித்வா து³தியிகங் பி⁴க்கு²னிங் ந லப⁴தி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.
976. Anāpatti sati antarāye, pariyesitvā dutiyikaṃ bhikkhuniṃ na labhati, gilānāya, āpadāsu, ummattikāya, ādikammikāyāti.
த³ஸமஸிக்கா²பத³ங் நிட்டி²தங்.
Dasamasikkhāpadaṃ niṭṭhitaṃ.
துவட்டவக்³கோ³ சதுத்தோ².
Tuvaṭṭavaggo catuttho.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 10. த³ஸமஸிக்கா²பத³வண்ணனா • 10. Dasamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. த³ஸமஸிக்கா²பத³வண்ணனா • 10. Dasamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 10. த³ஸமஸிக்கா²பத³வண்ணனா • 10. Dasamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 10. த³ஸமஸிக்கா²பத³ங் • 10. Dasamasikkhāpadaṃ
