| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
10. த³ஸமஸிக்கா²பத³ங்
10. Dasamasikkhāpadaṃ
835. த³ஸமே ஸொண்டா³ வாதி ஸுராஸொண்டா³ வா. மோரோதி மயூரோ. ஸுவோதி ஸுகோ. மக்கடோதி வானரோ. ஆதி³ஸத்³தே³ன ஸப்பாத³யோ ஸங்க³ண்ஹாதி, மக்கடாத³யோபி நச்சந்தூதி ஸம்ப³ந்தோ⁴. அஸங்யதபி⁴க்கூ²னந்தி வாசஸிககம்மே அஸங்யதானங் பி⁴க்கூ²னங், த⁴ம்மபா⁴ணககீ³தங் வா ஹோதூதி யோஜனா. தந்தியா கு³ணேன ப³த்³தா⁴ தந்திப³த்³தா⁴. ‘‘பி⁴’’ந்திஸங்கா²தோ ராஸத்³தோ³ ஏதிஸ்ஸாதி பே⁴ரி. குடேன கதா பே⁴ரி குடபே⁴ரி, தாய வாதி³தங் குடபே⁴ரிவாதி³தங், தங் வா. உத³கபே⁴ரீதி உத³கேன பக்கி²த்தா பே⁴ரி, தாய வாதி³தம்பி ஹோதூதி ஸம்ப³ந்தோ⁴.
835. Dasame soṇḍā vāti surāsoṇḍā vā. Moroti mayūro. Suvoti suko. Makkaṭoti vānaro. Ādisaddena sappādayo saṅgaṇhāti, makkaṭādayopi naccantūti sambandho. Asaṃyatabhikkhūnanti vācasikakamme asaṃyatānaṃ bhikkhūnaṃ, dhammabhāṇakagītaṃ vā hotūti yojanā. Tantiyā guṇena baddhā tantibaddhā. ‘‘Bhi’’ntisaṅkhāto rāsaddo etissāti bheri. Kuṭena katā bheri kuṭabheri, tāya vāditaṃ kuṭabherivāditaṃ, taṃ vā. Udakabherīti udakena pakkhittā bheri, tāya vāditampi hotūti sambandho.
836. தேஸங்யேவாதி யேஸங் நச்சங் பஸ்ஸதி, தேஸங்யேவ. யதி³ பன நச்சகீ³தவாதி³தே விஸுங் விஸுங் பஸ்ஸதி ஸுணாதி, பாடேக்கா ஆபத்தியோதி த³ஸ்ஸெந்தோ ஆஹ ‘‘ஸசே பனா’’திஆதி³. அஞ்ஞதோதி அஞ்ஞதோ தே³ஸதோ, பஸ்ஸதீதி ஸம்ப³ந்தோ⁴. ‘‘ஓலோகெத்வா’’தி பதே³ அபெக்கி²தே உபயோக³த்தே² தோபச்சயோ ஹோதி. அஞ்ஞங் ஓலோகெத்வாதி ஹி அத்தோ². அஞ்ஞதோ வாதெ³ந்தே பஸ்ஸதீதி யோஜனா. பி⁴க்கு²னீ ந லப⁴தீதி ஸம்ப³ந்தோ⁴. அஞ்ஞே வத்தும்பீதி ஸம்ப³ந்தோ⁴. உபஹாரந்தி பூஜங். உபட்டா²னந்தி பாரிசரியங். ஸப்³ப³த்தா²தி ஸப்³பே³ஸு ஸயங் நச்சாதீ³ஸு.
836.Tesaṃyevāti yesaṃ naccaṃ passati, tesaṃyeva. Yadi pana naccagītavādite visuṃ visuṃ passati suṇāti, pāṭekkā āpattiyoti dassento āha ‘‘sace panā’’tiādi. Aññatoti aññato desato, passatīti sambandho. ‘‘Oloketvā’’ti pade apekkhite upayogatthe topaccayo hoti. Aññaṃ oloketvāti hi attho. Aññato vādente passatīti yojanā. Bhikkhunī na labhatīti sambandho. Aññe vattumpīti sambandho. Upahāranti pūjaṃ. Upaṭṭhānanti pāricariyaṃ. Sabbatthāti sabbesu sayaṃ naccādīsu.
837. அந்தராராமே வாதி ஆராமஸ்ஸ அந்தரே வா. ப³ஹிஆராமே வாதி ஆராமஸ்ஸ ப³ஹி வா. அஞ்ஞேன வாதி ஸலாகப⁴த்தாதீ³ஹி அஞ்ஞேன வா. தாதி³ஸேனாதி யாதி³ஸோ சோராதி³உபத்³த³வோ, தாதி³ஸேனாதி. த³ஸமங்.
837.Antarārāme vāti ārāmassa antare vā. Bahiārāme vāti ārāmassa bahi vā. Aññena vāti salākabhattādīhi aññena vā. Tādisenāti yādiso corādiupaddavo, tādisenāti. Dasamaṃ.
லஸுணவக்³கோ³ பட²மோ.
Lasuṇavaggo paṭhamo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 10. த³ஸமஸிக்கா²பத³ங் • 10. Dasamasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 10. த³ஸமஸிக்கா²பத³வண்ணனா • 10. Dasamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. லஸுணவக்³க³வண்ணனா • 1. Lasuṇavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. த³ஸமஸிக்கா²பத³வண்ணனா • 10. Dasamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மலஸுணாதி³ஸிக்கா²பத³வண்ணனா • 1. Paṭhamalasuṇādisikkhāpadavaṇṇanā
