| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
১০. দসমসিক্খাপদং
10. Dasamasikkhāpadaṃ
৭৭৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনী বহুস্সুতা হোতি ভাণিকা ৰিসারদা পট্টা ধম্মিং কথং কাতুং। বহূ মনুস্সা থুল্লনন্দং ভিক্খুনিং পযিরুপাসন্তি। তেন খো পন সমযেন থুল্লনন্দায ভিক্খুনিযা পরিৰেণং উন্দ্রিযতি 1। মনুস্সা থুল্লনন্দং ভিক্খুনিং এতদৰোচুং – ‘‘কিস্সিদং তে, অয্যে, পরিৰেণং উন্দ্রিযতী’’তি? ‘‘নত্থাৰুসো, দাযকা, নত্থি কারকা’’তি। অথ খো তে মনুস্সা থুল্লনন্দায ভিক্খুনিযা পরিৰেণত্থায ছন্দকং সঙ্ঘরিত্ৰা থুল্লনন্দায ভিক্খুনিযা পরিক্খারং অদংসু। থুল্লনন্দা ভিক্খুনী তেন চ পরিক্খারেন সযম্পি যাচিত্ৰা ভেসজ্জং চেতাপেত্ৰা পরিভুঞ্জি। মনুস্সা জানিত্ৰা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা অঞ্ঞদত্থিকেন পরিক্খারেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেস্সতী’’তি…পে॰… সচ্চং কির, ভিক্খৰে, থুল্লনন্দা ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেতীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
778. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī bahussutā hoti bhāṇikā visāradā paṭṭā dhammiṃ kathaṃ kātuṃ. Bahū manussā thullanandaṃ bhikkhuniṃ payirupāsanti. Tena kho pana samayena thullanandāya bhikkhuniyā pariveṇaṃ undriyati 2. Manussā thullanandaṃ bhikkhuniṃ etadavocuṃ – ‘‘kissidaṃ te, ayye, pariveṇaṃ undriyatī’’ti? ‘‘Natthāvuso, dāyakā, natthi kārakā’’ti. Atha kho te manussā thullanandāya bhikkhuniyā pariveṇatthāya chandakaṃ saṅgharitvā thullanandāya bhikkhuniyā parikkhāraṃ adaṃsu. Thullanandā bhikkhunī tena ca parikkhārena sayampi yācitvā bhesajjaṃ cetāpetvā paribhuñji. Manussā jānitvā ujjhāyanti khiyyanti vipācenti – ‘‘kathañhi nāma ayyā thullanandā aññadatthikena parikkhārena aññuddisikena puggalikena saññācikena aññaṃ cetāpessatī’’ti…pe… saccaṃ kira, bhikkhave, thullanandā bhikkhunī aññadatthikena parikkhārena aññuddisikena puggalikena saññācikena aññaṃ cetāpetīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī aññadatthikena parikkhārena aññuddisikena puggalikena saññācikena aññaṃ cetāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
৭৭৯. ‘‘যা পন ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেয্য, নিস্সগ্গিযং পাচিত্তিয’’ন্তি।
779.‘‘Yā pana bhikkhunī aññadatthikena parikkhārena aññuddisikena puggalikena saññācikena aññaṃ cetāpeyya, nissaggiyaṃ pācittiya’’nti.
৭৮০. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি।
780.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
অঞ্ঞদত্থিকেন পরিক্খারেন অঞ্ঞুদ্দিসিকেনাতি অঞ্ঞস্সত্থায দিন্নেন।
Aññadatthikena parikkhārena aññuddisikenāti aññassatthāya dinnena.
পুগ্গলিকেনাতি একায ভিক্খুনিযা, ন সঙ্ঘস্স, ন গণস্স।
Puggalikenāti ekāya bhikkhuniyā, na saṅghassa, na gaṇassa.
সঞ্ঞাচিকেনাতি সযং যাচিত্ৰা।
Saññācikenāti sayaṃ yācitvā.
অঞ্ঞং চেতাপেয্যাতি যংঅত্থায দিন্নং তং ঠপেত্ৰা অঞ্ঞং চেতাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ‘‘ইদং মে, অয্যে, অঞ্ঞদত্থিকেন পরিক্খারেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি।
Aññaṃcetāpeyyāti yaṃatthāya dinnaṃ taṃ ṭhapetvā aññaṃ cetāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbaṃ…pe… ‘‘idaṃ me, ayye, aññadatthikena parikkhārena aññuddisikena puggalikena saññācikena aññaṃ cetāpitaṃ nissaggiyaṃ, imāhaṃ saṅghassa nissajjāmī’’ti…pe… dadeyyāti…pe… dadeyyunti…pe… ayyāya dammīti.
৭৮১. অঞ্ঞদত্থিকে অঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞদত্থিকে ৰেমতিকা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞদত্থিকে অনঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং। নিস্সট্ঠং পটিলভিত্ৰা যথাদানে উপনেতব্বং।
781. Aññadatthike aññadatthikasaññā aññaṃ cetāpeti, nissaggiyaṃ pācittiyaṃ. Aññadatthike vematikā aññaṃ cetāpeti, nissaggiyaṃ pācittiyaṃ. Aññadatthike anaññadatthikasaññā aññaṃ cetāpeti, nissaggiyaṃ pācittiyaṃ. Nissaṭṭhaṃ paṭilabhitvā yathādāne upanetabbaṃ.
অনঞ্ঞদত্থিকে অঞ্ঞদত্থিকসঞ্ঞা, আপত্তি দুক্কটস্স। অনঞ্ঞদত্থিকে ৰেমতিকা, আপত্তি দুক্কটস্স। অনঞ্ঞদত্থিকে অনঞ্ঞদত্থিকসঞ্ঞা, অনাপত্তি।
Anaññadatthike aññadatthikasaññā, āpatti dukkaṭassa. Anaññadatthike vematikā, āpatti dukkaṭassa. Anaññadatthike anaññadatthikasaññā, anāpatti.
৭৮২. অনাপত্তি সেসকং উপনেতি, সামিকে অপলোকেত্ৰা উপনেতি, আপদাসু, উম্মত্তিকায, আদিকম্মিকাযাতি।
782. Anāpatti sesakaṃ upaneti, sāmike apaloketvā upaneti, āpadāsu, ummattikāya, ādikammikāyāti.
দসমসিক্খাপদং নিট্ঠিতং।
Dasamasikkhāpadaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / দসমনিস্সগ্গিযপাচিত্তিযসিক্খাপদৰণ্ণনা • Dasamanissaggiyapācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১০. দসমনিস্সগ্গিযপাচিত্তিযসিক্খাপদৰণ্ণনা • 10. Dasamanissaggiyapācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. দুতিযনিস্সগ্গিযাদিপাচিত্তিযসিক্খাপদৰণ্ণনা • 2. Dutiyanissaggiyādipācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১০. দসমনিস্সগ্গিযপাচিত্তিযসিক্খাপদং • 10. Dasamanissaggiyapācittiyasikkhāpadaṃ
