| Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ • Bhikkhunīvibhaṅga |
၁၀. ဒသမသိက္ခာပဒံ
10. Dasamasikkhāpadaṃ
၁၀၆၂. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန အညတရာ ဘိက္ခုနီ ပသာခေ ဇာတံ ဂဏ္ဍံ ပုရိသေန သဒ္ဓိံ ဧကေနေကာ ဘေဒာပေသိ။ အထ ခော သော ပုရိသော တံ ဘိက္ခုနိံ ဒူသေတုံ ဥပက္ကမိ။ သာ ဝိသ္သရမကာသိ။ ဘိက္ခုနိယော ဥပဓာဝိတ္ဝာ တံ ဘိက္ခုနိံ ဧတဒဝောစုံ – ‘‘ကိသ္သ တ္ဝံ, အယ္ယေ, ဝိသ္သရမကာသီ’’တိ? အထ ခော သာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဘိက္ခုနီ ပသာခေ ဇာတံ ဂဏ္ဍံ ပုရိသေန သဒ္ဓိံ ဧကေနေကာ ဘေဒာပေသ္သတီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ ပသာခေ ဇာတံ ဂဏ္ဍံ ပုရိသေန သဒ္ဓိံ ဧကေနေကာ ဘေဒာပေတီတိ 1? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ, ဘိက္ခဝေ, ဘိက္ခုနီ ပသာခေ ဇာတံ ဂဏ္ဍံ ပုရိသေန သဒ္ဓိံ ဧကေနေကာ ဘေဒာပေသ္သတိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –
1062. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarā bhikkhunī pasākhe jātaṃ gaṇḍaṃ purisena saddhiṃ ekenekā bhedāpesi. Atha kho so puriso taṃ bhikkhuniṃ dūsetuṃ upakkami. Sā vissaramakāsi. Bhikkhuniyo upadhāvitvā taṃ bhikkhuniṃ etadavocuṃ – ‘‘kissa tvaṃ, ayye, vissaramakāsī’’ti? Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī pasākhe jātaṃ gaṇḍaṃ purisena saddhiṃ ekenekā bhedāpessatī’’ti…pe… saccaṃ kira, bhikkhave, bhikkhunī pasākhe jātaṃ gaṇḍaṃ purisena saddhiṃ ekenekā bhedāpetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī pasākhe jātaṃ gaṇḍaṃ purisena saddhiṃ ekenekā bhedāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
၁၀၆၃. ‘‘ယာ ပန ဘိက္ခုနီ ပသာခေ ဇာတံ ဂဏ္ဍံ ဝာ ရုဓိတံ ဝာ အနပလောကေတ္ဝာ သင္ဃံ ဝာ ဂဏံ ဝာ ပုရိသေန သဒ္ဓိံ ဧကေနေကာ ဘေဒာပေယ္ယ ဝာ ဖာလာပေယ္ယ ဝာ ဓောဝာပေယ္ယ ဝာ အာလိမ္ပာပေယ္ယ ဝာ ဗန္ဓာပေယ္ယ ဝာ မောစာပေယ္ယ ဝာ, ပာစိတ္တိယ’’န္တိ။
1063.‘‘Yā pana bhikkhunī pasākhe jātaṃ gaṇḍaṃ vā rudhitaṃ vā anapaloketvā saṅghaṃ vā gaṇaṃ vā purisena saddhiṃ ekenekā bhedāpeyya vā phālāpeyya vā dhovāpeyya vā ālimpāpeyya vā bandhāpeyya vā mocāpeyya vā, pācittiya’’nti.
၁၀၆၄. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။
1064.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ပသာခံ နာမ အဓောနာဘိ ဥဗ္ဘဇာဏုမဏ္ဍလံ။ ဇာတန္တိ တတ္ထ ဇာတံ။ ဂဏ္ဍော နာမ ယော ကောစိ ဂဏ္ဍော။ ရုဓိတံ နာမ ယံ ကိဉ္စိ ဝဏံ။ အနပလောကေတ္ဝာတိ အနာပုစ္ဆာ။ သင္ဃော နာမ ဘိက္ခုနိသင္ဃော ဝုစ္စတိ။ ဂဏော နာမ သမ္ဗဟုလာ ဘိက္ခုနိယော ဝုစ္စန္တိ။ ပုရိသော နာမ မနုသ္သပုရိသော, န ယက္ခော, န ပေတော, န တိရစ္ဆာနဂတော, ဝိညူ ပဋိဗလော ဒူသေတုံ။ သဒ္ဓိန္တိ ဧကတော။ ဧကေနေကာတိ ပုရိသော စေဝ ဟောတိ ဘိက္ခုနီ စ။
Pasākhaṃ nāma adhonābhi ubbhajāṇumaṇḍalaṃ. Jātanti tattha jātaṃ. Gaṇḍo nāma yo koci gaṇḍo. Rudhitaṃ nāma yaṃ kiñci vaṇaṃ. Anapaloketvāti anāpucchā. Saṅgho nāma bhikkhunisaṅgho vuccati. Gaṇo nāma sambahulā bhikkhuniyo vuccanti. Puriso nāma manussapuriso, na yakkho, na peto, na tiracchānagato, viññū paṭibalo dūsetuṃ. Saddhinti ekato. Ekenekāti puriso ceva hoti bhikkhunī ca.
၁၀၆၅. ‘‘ဘိန္ဒာ’’တိ အာဏာပေတိ, အာပတ္တိ ဒုက္ကဋသ္သ။ ဘိန္နေ အာပတ္တိ ပာစိတ္တိယသ္သ။ ‘‘ဖာလေဟီ’’တိ အာဏာပေတိ, အာပတ္တိ ဒုက္ကဋသ္သ။ ဖာလိတေ အာပတ္တိ ပာစိတ္တိယသ္သ။ ‘‘ဓောဝာ’’တိ အာဏာပေတိ , အာပတ္တိ ဒုက္ကဋသ္သ။ ဓောဝိတေ 3 အာပတ္တိ ပာစိတ္တိယသ္သ။ ‘‘အာလိမ္ပာ’’တိ အာဏာပေတိ, အာပတ္တိ ဒုက္ကဋသ္သ။ လိတ္တေ 4 အာပတ္တိ ပာစိတ္တိယသ္သ။ ‘‘ဗန္ဓာဟီ’’တိ အာဏာပေတိ, အာပတ္တိ ဒုက္ကဋသ္သ။ ဗဒ္ဓေ အာပတ္တိ ပာစိတ္တိယသ္သ။ ‘‘မောစေဟီ’’တိ အာဏာပေတိ, အာပတ္တိ ဒုက္ကဋသ္သ။ မုတ္တေ အာပတ္တိ ပာစိတ္တိယသ္သ။
1065. ‘‘Bhindā’’ti āṇāpeti, āpatti dukkaṭassa. Bhinne āpatti pācittiyassa. ‘‘Phālehī’’ti āṇāpeti, āpatti dukkaṭassa. Phālite āpatti pācittiyassa. ‘‘Dhovā’’ti āṇāpeti , āpatti dukkaṭassa. Dhovite 5 āpatti pācittiyassa. ‘‘Ālimpā’’ti āṇāpeti, āpatti dukkaṭassa. Litte 6 āpatti pācittiyassa. ‘‘Bandhāhī’’ti āṇāpeti, āpatti dukkaṭassa. Baddhe āpatti pācittiyassa. ‘‘Mocehī’’ti āṇāpeti, āpatti dukkaṭassa. Mutte āpatti pācittiyassa.
၁၀၆၆. အနာပတ္တိ အပလောကေတ္ဝာ ဘေဒာပေတိ ဝာ ဖာလာပေတိ ဝာ ဓောဝာပေတိ ဝာ အာလိမ္ပာပေတိ ဝာ ဗန္ဓာပေတိ ဝာ မောစာပေတိ ဝာ, ယာ ကာစိ ဝိညူ ဒုတိယိကာ 7 ဟောတိ, ဥမ္မတ္တိကာယ, အာဒိကမ္မိကာယာတိ။
1066. Anāpatti apaloketvā bhedāpeti vā phālāpeti vā dhovāpeti vā ālimpāpeti vā bandhāpeti vā mocāpeti vā, yā kāci viññū dutiyikā 8 hoti, ummattikāya, ādikammikāyāti.
ဒသမသိက္ခာပဒံ နိဋ္ဌိတံ။
Dasamasikkhāpadaṃ niṭṭhitaṃ.
အာရာမဝဂ္ဂော ဆဋ္ဌော။
Ārāmavaggo chaṭṭho.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / ၁၀. ဒသမသိက္ခာပဒဝဏ္ဏနာ • 10. Dasamasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁. ပဌမာဒိသိက္ခာပဒဝဏ္ဏနာ • 1. Paṭhamādisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၀. ဒသမသိက္ခာပဒံ • 10. Dasamasikkhāpadaṃ
