| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
၁၀. ဒသမသိက္ခာပဒံ
10. Dasamasikkhāpadaṃ
၈၃၅. ဒသမေ သောဏ္ဍာ ဝာတိ သုရာသောဏ္ဍာ ဝာ။ မောရောတိ မယူရော။ သုဝောတိ သုကော။ မက္ကဋောတိ ဝာနရော။ အာဒိသဒ္ဒေန သပ္ပာဒယော သင္ဂဏ္ဟာတိ, မက္ကဋာဒယောပိ နစ္စန္တူတိ သမ္ဗန္ဓော။ အသံယတဘိက္ခူနန္တိ ဝာစသိကကမ္မေ အသံယတာနံ ဘိက္ခူနံ, ဓမ္မဘာဏကဂီတံ ဝာ ဟောတူတိ ယောဇနာ။ တန္တိယာ ဂုဏေန ဗဒ္ဓာ တန္တိဗဒ္ဓာ။ ‘‘ဘိ’’န္တိသင္ခာတော ရာသဒ္ဒော ဧတိသ္သာတိ ဘေရိ။ ကုဋေန ကတာ ဘေရိ ကုဋဘေရိ, တာယ ဝာဒိတံ ကုဋဘေရိဝာဒိတံ, တံ ဝာ။ ဥဒကဘေရီတိ ဥဒကေန ပက္ခိတ္တာ ဘေရိ, တာယ ဝာဒိတမ္ပိ ဟောတူတိ သမ္ဗန္ဓော။
835. Dasame soṇḍā vāti surāsoṇḍā vā. Moroti mayūro. Suvoti suko. Makkaṭoti vānaro. Ādisaddena sappādayo saṅgaṇhāti, makkaṭādayopi naccantūti sambandho. Asaṃyatabhikkhūnanti vācasikakamme asaṃyatānaṃ bhikkhūnaṃ, dhammabhāṇakagītaṃ vā hotūti yojanā. Tantiyā guṇena baddhā tantibaddhā. ‘‘Bhi’’ntisaṅkhāto rāsaddo etissāti bheri. Kuṭena katā bheri kuṭabheri, tāya vāditaṃ kuṭabherivāditaṃ, taṃ vā. Udakabherīti udakena pakkhittā bheri, tāya vāditampi hotūti sambandho.
၈၃၆. တေသံယေဝာတိ ယေသံ နစ္စံ ပသ္သတိ, တေသံယေဝ။ ယဒိ ပန နစ္စဂီတဝာဒိတေ ဝိသုံ ဝိသုံ ပသ္သတိ သုဏာတိ, ပာဋေက္ကာ အာပတ္တိယောတိ ဒသ္သေန္တော အာဟ ‘‘သစေ ပနာ’’တိအာဒိ။ အညတောတိ အညတော ဒေသတော, ပသ္သတီတိ သမ္ဗန္ဓော။ ‘‘ဩလောကေတ္ဝာ’’တိ ပဒေ အပေက္ခိတေ ဥပယောဂတ္ထေ တောပစ္စယော ဟောတိ။ အညံ ဩလောကေတ္ဝာတိ ဟိ အတ္ထော။ အညတော ဝာဒေန္တေ ပသ္သတီတိ ယောဇနာ။ ဘိက္ခုနီ န လဘတီတိ သမ္ဗန္ဓော။ အညေ ဝတ္တုမ္ပီတိ သမ္ဗန္ဓော။ ဥပဟာရန္တိ ပူဇံ။ ဥပဋ္ဌာနန္တိ ပာရိစရိယံ။ သဗ္ဗတ္ထာတိ သဗ္ဗေသု သယံ နစ္စာဒီသု။
836.Tesaṃyevāti yesaṃ naccaṃ passati, tesaṃyeva. Yadi pana naccagītavādite visuṃ visuṃ passati suṇāti, pāṭekkā āpattiyoti dassento āha ‘‘sace panā’’tiādi. Aññatoti aññato desato, passatīti sambandho. ‘‘Oloketvā’’ti pade apekkhite upayogatthe topaccayo hoti. Aññaṃ oloketvāti hi attho. Aññato vādente passatīti yojanā. Bhikkhunī na labhatīti sambandho. Aññe vattumpīti sambandho. Upahāranti pūjaṃ. Upaṭṭhānanti pāricariyaṃ. Sabbatthāti sabbesu sayaṃ naccādīsu.
၈၃၇. အန္တရာရာမေ ဝာတိ အာရာမသ္သ အန္တရေ ဝာ။ ဗဟိအာရာမေ ဝာတိ အာရာမသ္သ ဗဟိ ဝာ။ အညေန ဝာတိ သလာကဘတ္တာဒီဟိ အညေန ဝာ။ တာဒိသေနာတိ ယာဒိသော စောရာဒိဥပဒ္ဒဝော, တာဒိသေနာတိ။ ဒသမံ။
837.Antarārāme vāti ārāmassa antare vā. Bahiārāme vāti ārāmassa bahi vā. Aññena vāti salākabhattādīhi aññena vā. Tādisenāti yādiso corādiupaddavo, tādisenāti. Dasamaṃ.
လသုဏဝဂ္ဂော ပဌမော။
Lasuṇavaggo paṭhamo.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ဘိက္ခုနီဝိဘင္ဂ • Bhikkhunīvibhaṅga / ၁၀. ဒသမသိက္ခာပဒံ • 10. Dasamasikkhāpadaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / ၁၀. ဒသမသိက္ခာပဒဝဏ္ဏနာ • 10. Dasamasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၁. လသုဏဝဂ္ဂဝဏ္ဏနာ • 1. Lasuṇavaggavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၁၀. ဒသမသိက္ခာပဒဝဏ္ဏနာ • 10. Dasamasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁. ပဌမလသုဏာဒိသိက္ခာပဒဝဏ္ဏနာ • 1. Paṭhamalasuṇādisikkhāpadavaṇṇanā
