| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
10. දසමසික්‌ඛාපදං
10. Dasamasikkhāpadaṃ
833. තෙන සමයෙන බුද්‌ධො භගවා රාජගහෙ විහරති වෙළුවනෙ කලන්‌දකනිවාපෙ. තෙන ඛො පන සමයෙන රාජගහෙ ගිරග්‌ගසමජ්‌ජො හොති. ඡබ්‌බග්‌ගියා භික්‌ඛුනියො ගිරග්‌ගසමජ්‌ජං දස්‌සනාය අගමංසු. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛුනියො නච්‌චම්‌පි ගීතම්‌පි වාදිතම්‌පි දස්‌සනාය ගච්‌ඡිස්‌සන්‌ති, සෙය්‍යථාපි ගිහිනියො කාමභොගිනියො’’ති! අස්‌සොසුං ඛො භික්‌ඛුනියො තෙසං මනුස්‌සානං උජ්‌ඣායන්‌තානං ඛිය්‍යන්‌තානං විපාචෙන්‌තානං. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ඡබ්‌බග්‌ගියා භික්‌ඛුනියො නච්‌චම්‌පි ගීතම්‌පි වාදිතම්‌පි දස්‌සනාය ගච්‌ඡිස්‌සන්‌තී’’ති…පෙ.… සච්‌චං කිර, භික්‌ඛවෙ, ඡබ්‌බග්‌ගියා භික්‌ඛුනියො නච්‌චම්‌පි ගීතම්‌පි වාදිතම්‌පි දස්‌සනාය ගච්‌ඡන්‌තීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ඡබ්‌බග්‌ගියා භික්‌ඛුනියො නච්‌චම්‌පි ගීතම්‌පි වාදිතම්‌පි දස්‌සනාය ගච්‌ඡිස්‌සන්‌ති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
833. Tena samayena buddho bhagavā rājagahe viharati veḷuvane kalandakanivāpe. Tena kho pana samayena rājagahe giraggasamajjo hoti. Chabbaggiyā bhikkhuniyo giraggasamajjaṃ dassanāya agamaṃsu. Manussā ujjhāyanti khiyyanti vipācenti – ‘‘kathañhi nāma bhikkhuniyo naccampi gītampi vāditampi dassanāya gacchissanti, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo naccampi gītampi vāditampi dassanāya gacchissantī’’ti…pe… saccaṃ kira, bhikkhave, chabbaggiyā bhikkhuniyo naccampi gītampi vāditampi dassanāya gacchantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo naccampi gītampi vāditampi dassanāya gacchissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
834. ‘‘යා පන භික්‌ඛුනී නච්‌චං වා ගීතං වා වාදිතං වා දස්‌සනාය ගච්‌ඡෙය්‍ය, පාචිත්‌තිය’’න්‌ති.
834.‘‘Yāpana bhikkhunī naccaṃ vā gītaṃ vā vāditaṃ vā dassanāya gaccheyya, pācittiya’’nti.
835. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
835.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
නච්‌චං නාම යං කිඤ්‌චි නච්‌චං. ගීතං නාම යං කිඤ්‌චි ගීතං. වාදිතං නාම යං කිඤ්‌චි වාදිතං.
Naccaṃ nāma yaṃ kiñci naccaṃ. Gītaṃ nāma yaṃ kiñci gītaṃ. Vāditaṃ nāma yaṃ kiñci vāditaṃ.
836. දස්‌සනාය ගච්‌ඡති, ආපත්‌ති දුක්‌කටස්‌ස. යත්‌ථ ඨිතා පස්‌සති වා සුණාති වා, ආපත්‌ති පාචිත්‌තියස්‌ස. දස්‌සනූපචාරං විජහිත්‌වා පුනප්‌පුනං පස්‌සති වා සුණාති වා, ආපත්‌ති පාචිත්‌තියස්‌ස. එකමෙකං දස්‌සනාය ගච්‌ඡති, ආපත්‌ති දුක්‌කටස්‌ස. යත්‌ථ ඨිතා පස්‌සති වා සුණාති වා, ආපත්‌ති පාචිත්‌තියස්‌ස. දස්‌සනූපචාරං විජහිත්‌වා පුනප්‌පුනං පස්‌සති වා සුණාති වා, ආපත්‌ති පාචිත්‌තියස්‌ස.
836. Dassanāya gacchati, āpatti dukkaṭassa. Yattha ṭhitā passati vā suṇāti vā, āpatti pācittiyassa. Dassanūpacāraṃ vijahitvā punappunaṃ passati vā suṇāti vā, āpatti pācittiyassa. Ekamekaṃ dassanāya gacchati, āpatti dukkaṭassa. Yattha ṭhitā passati vā suṇāti vā, āpatti pācittiyassa. Dassanūpacāraṃ vijahitvā punappunaṃ passati vā suṇāti vā, āpatti pācittiyassa.
837. අනාපත්‌ති ආරාමෙ ඨිතා පස්‌සති වා සුණාති වා, භික්‌ඛුනියා ඨිතොකාසං වා නිසින්‌නොකාසං වා නිපන්‌නොකාසං වා ආගන්‌ත්‌වා නච්‌චන්‌ති වා ගායන්‌ති වා වාදෙන්‌ති වා, පටිපථං ගච්‌ඡන්‌තී පස්‌සති වා සුණාති වා, සති කරණීයෙ ගන්‌ත්‌වා පස්‌සති වා සුණාති වා, ආපදාසු, උම්‌මත්‌තිකාය, ආදිකම්‌මිකායාති.
837. Anāpatti ārāme ṭhitā passati vā suṇāti vā, bhikkhuniyā ṭhitokāsaṃ vā nisinnokāsaṃ vā nipannokāsaṃ vā āgantvā naccanti vā gāyanti vā vādenti vā, paṭipathaṃ gacchantī passati vā suṇāti vā, sati karaṇīye gantvā passati vā suṇāti vā, āpadāsu, ummattikāya, ādikammikāyāti.
දසමසික්‌ඛාපදං නිට්‌ඨිතං.
Dasamasikkhāpadaṃ niṭṭhitaṃ.
ලසුණවග්‌ගො පඨමො.
Lasuṇavaggo paṭhamo.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 10. දසමසික්‌ඛාපදවණ්‌ණනා • 10. Dasamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 1. ලසුණවග්‌ගවණ්‌ණනා • 1. Lasuṇavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 10. දසමසික්‌ඛාපදවණ්‌ණනා • 10. Dasamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමලසුණාදිසික්‌ඛාපදවණ්‌ණනා • 1. Paṭhamalasuṇādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 10. දසමසික්‌ඛාපදං • 10. Dasamasikkhāpadaṃ
