| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
10. දසමසික්‌ඛාපදං
10. Dasamasikkhāpadaṃ
879. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන චණ්‌ඩකාළී භික්‌ඛුනී භික්‌ඛුනීහි සද්‌ධිං භණ්‌ඩිත්‌වා අත්‌තානං වධිත්‌වා වධිත්‌වා රොදති. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා චණ්‌ඩකාළී අත්‌තානං වධිත්‌වා වධිත්‌වා රොදිස්‌සතී’’ති…පෙ.… සච්‌චං කිර, භික්‌ඛවෙ, චණ්‌ඩකාළී භික්‌ඛුනී අත්‌තානං වධිත්‌වා වධිත්‌වා රොදතීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, චණ්‌ඩකාළී භික්‌ඛුනී අත්‌තානං වධිත්‌වා වධිත්‌වා රොදිස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
879. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena caṇḍakāḷī bhikkhunī bhikkhunīhi saddhiṃ bhaṇḍitvā attānaṃ vadhitvā vadhitvā rodati. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā caṇḍakāḷī attānaṃ vadhitvā vadhitvā rodissatī’’ti…pe… saccaṃ kira, bhikkhave, caṇḍakāḷī bhikkhunī attānaṃ vadhitvā vadhitvā rodatīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, caṇḍakāḷī bhikkhunī attānaṃ vadhitvā vadhitvā rodissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
880. ‘‘යා පන භික්‌ඛුනී අත්‌තානං වධිත්‌වා වධිත්‌වා රොදෙය්‍ය, පාචිත්‌තිය’’න්‌ති.
880.‘‘Yāpana bhikkhunī attānaṃ vadhitvā vadhitvā rodeyya, pācittiya’’nti.
881. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
881.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
අත්‌තානන්‌ති පච්‌චත්‌තං. වධිත්‌වා වධිත්‌වා රොදති, ආපත්‌ති පාචිත්‌තියස්‌ස. වධති න රොදති, ආපත්‌ති දුක්‌කටස්‌ස. රොදති න වධති, ආපත්‌ති දුක්‌කටස්‌ස.
Attānanti paccattaṃ. Vadhitvā vadhitvā rodati, āpatti pācittiyassa. Vadhati na rodati, āpatti dukkaṭassa. Rodati na vadhati, āpatti dukkaṭassa.
882. අනාපත්‌ති ඤාතිබ්‍යසනෙන වා භොගබ්‍යසනෙන වා රොගබ්‍යසනෙන වා ඵුට්‌ඨා රොදති න වධති, උම්‌මත්‌තිකාය, ආදිකම්‌මිකායාති.
882. Anāpatti ñātibyasanena vā bhogabyasanena vā rogabyasanena vā phuṭṭhā rodati na vadhati, ummattikāya, ādikammikāyāti.
දසමසික්‌ඛාපදං නිට්‌ඨිතං.
Dasamasikkhāpadaṃ niṭṭhitaṃ.
අන්‌ධකාරවග්‌ගො දුතියො.
Andhakāravaggo dutiyo.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 10. දසමසික්‌ඛාපදවණ්‌ණනා • 10. Dasamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 10. දසමසික්‌ඛාපදවණ්‌ණනා • 10. Dasamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමාදිසික්‌ඛාපදවණ්‌ණනා • 1. Paṭhamādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 10. දසමසික්‌ඛාපදං • 10. Dasamasikkhāpadaṃ
