| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
10. දසමසික්‌ඛාපදං
10. Dasamasikkhāpadaṃ
925. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන අඤ්‌ඤතරෙන උපාසකෙන සඞ්‌ඝං උද්‌දිස්‌ස විහාරො කාරාපිතො හොති. සො තස්‌ස විහාරස්‌ස මහෙ උභතොසඞ්‌ඝස්‌ස අකාලචීවරං දාතුකාමො හොති. තෙන ඛො පන සමයෙන උභතොසඞ්‌ඝස්‌ස කථිනං අත්‌ථතං හොති. අථ ඛො සො උපාසකො සඞ්‌ඝං උපසඞ්‌කමිත්‌වා කථිනුද්‌ධාරං යාචි. භගවතො එතමත්‌ථං ආරොචෙසුං. අථ ඛො භගවා එතස්‌මිං නිදානෙ එතස්‌මිං පකරණෙ ධම්‌මිං කථං කත්‌වා භික්‌ඛූ ආමන්‌තෙසි – ‘‘අනුජානාමි, භික්‌ඛවෙ, කථිනං උද්‌ධරිතුං. එවඤ්‌ච පන භික්‌ඛවෙ කථිනං උද්‌ධරිතබ්‌බං. බ්‍යත්‌තෙන භික්‌ඛුනා පටිබලෙන සඞ්‌ඝො ඤාපෙතබ්‌බො –
925. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarena upāsakena saṅghaṃ uddissa vihāro kārāpito hoti. So tassa vihārassa mahe ubhatosaṅghassa akālacīvaraṃ dātukāmo hoti. Tena kho pana samayena ubhatosaṅghassa kathinaṃ atthataṃ hoti. Atha kho so upāsako saṅghaṃ upasaṅkamitvā kathinuddhāraṃ yāci. Bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, kathinaṃ uddharituṃ. Evañca pana bhikkhave kathinaṃ uddharitabbaṃ. Byattena bhikkhunā paṭibalena saṅgho ñāpetabbo –
926. ‘‘සුණාතු මෙ, භන්‌තෙ, සඞ්‌ඝො. යදි සඞ්‌ඝස්‌ස පත්‌තකල්‌ලං, සඞ්‌ඝො කථිනං උද්‌ධරෙය්‍ය. එසා ඤත්‌ති.
926. ‘‘Suṇātu me, bhante, saṅgho. Yadi saṅghassa pattakallaṃ, saṅgho kathinaṃ uddhareyya. Esā ñatti.
‘‘සුණාතු මෙ, භන්‌තෙ, සඞ්‌ඝො. සඞ්‌ඝො කථිනං උද්‌ධරති. යස්‌සායස්‌මතො ඛමති කථිනස්‌ස උද්‌ධාරො, සො තුණ්‌හස්‌ස; යස්‌ස නක්‌ඛමති, සො භාසෙය්‍ය.
‘‘Suṇātu me, bhante, saṅgho. Saṅgho kathinaṃ uddharati. Yassāyasmato khamati kathinassa uddhāro, so tuṇhassa; yassa nakkhamati, so bhāseyya.
‘‘උබ්‌භතං සඞ්‌ඝෙන කථිනං, ඛමති සඞ්‌ඝස්‌ස, තස්‌මා තුණ්‌හී, එවමෙතං ධාරයාමී’’ති.
‘‘Ubbhataṃ saṅghena kathinaṃ, khamati saṅghassa, tasmā tuṇhī, evametaṃ dhārayāmī’’ti.
927. අථ ඛො සො උපාසකො භික්‌ඛුනිසඞ්‌ඝං උපසඞ්‌කමිත්‌වා කථිනුද්‌ධාරං යාචි. ථුල්‌ලනන්‌දා භික්‌ඛුනී – ‘‘චීවරං අම්‌හාකං භවිස්‌සතී’’ති කථිනුද්‌ධාරං පටිබාහි. අථ ඛො සො උපාසකො උජ්‌ඣායති ඛිය්‍යති විපාචෙති – ‘‘කථඤ්‌හි නාම භික්‌ඛුනියො අම්‌හාකං කථිනුද්‌ධාරං න දස්‌සන්‌තී’’ති! අස්‌සොසුං ඛො භික්‌ඛුනියො තස්‌ස උපාසකස්‌ස උජ්‌ඣායන්‌තස්‌ස ඛිය්‍යන්‌තස්‌ස විපාචෙන්‌තස්‌ස. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා ධම්‌මිකං කථිනුද්‌ධාරං පටිබාහිස්‌සතී’’ති…පෙ.… සච්‌චං කිර, භික්‌ඛවෙ, ථුල්‌ලනන්‌දා භික්‌ඛුනී ධම්‌මිකං කථිනුද්‌ධාරං පටිබාහතීති 1? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ථුල්‌ලනන්‌දා භික්‌ඛුනී ධම්‌මිකං කථිනුද්‌ධාරං පටිබාහිස්‌සති ! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
927. Atha kho so upāsako bhikkhunisaṅghaṃ upasaṅkamitvā kathinuddhāraṃ yāci. Thullanandā bhikkhunī – ‘‘cīvaraṃ amhākaṃ bhavissatī’’ti kathinuddhāraṃ paṭibāhi. Atha kho so upāsako ujjhāyati khiyyati vipāceti – ‘‘kathañhi nāma bhikkhuniyo amhākaṃ kathinuddhāraṃ na dassantī’’ti! Assosuṃ kho bhikkhuniyo tassa upāsakassa ujjhāyantassa khiyyantassa vipācentassa. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā dhammikaṃ kathinuddhāraṃ paṭibāhissatī’’ti…pe… saccaṃ kira, bhikkhave, thullanandā bhikkhunī dhammikaṃ kathinuddhāraṃ paṭibāhatīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī dhammikaṃ kathinuddhāraṃ paṭibāhissati ! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
928. ‘‘යා පන භික්‌ඛුනී ධම්‌මිකං කථිනුද්‌ධාරං පටිබාහෙය්‍ය, පාචිත්‌තිය’’න්‌ති.
928.‘‘Yā pana bhikkhunī dhammikaṃ kathinuddhāraṃ paṭibāheyya, pācittiya’’nti.
929. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
929.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ධම්‌මිකො නාම කථිනුද්‌ධාරො සමග්‌ගො භික්‌ඛුනිසඞ්‌ඝො සන්‌නිපතිත්‌වා උද්‌ධරති.
Dhammiko nāma kathinuddhāro samaggo bhikkhunisaṅgho sannipatitvā uddharati.
පටිබාහෙය්‍යාති ‘‘කථං ඉදං කථිනං න උද්‌ධරෙය්‍යා’’ති 3 පටිබාහති, ආපත්‌ති පාචිත්‌තියස්‌ස.
Paṭibāheyyāti ‘‘kathaṃ idaṃ kathinaṃ na uddhareyyā’’ti 4 paṭibāhati, āpatti pācittiyassa.
930. ධම්‌මිකෙ ධම්‌මිකසඤ්‌ඤා පටිබාහති, ආපත්‌ති පාචිත්‌තියස්‌ස. ධම්‌මිකෙ වෙමතිකා පටිබාහති, ආපත්‌ති දුක්‌කටස්‌ස. ධම්‌මිකෙ අධම්‌මිකසඤ්‌ඤා පටිබාහති, අනාපත්‌ති. අධම්‌මිකෙ ධම්‌මිකසඤ්‌ඤා, ආපත්‌ති දුක්‌කටස්‌ස. අධම්‌මිකෙ වෙමතිකා, ආපත්‌ති දුක්‌කටස්‌ස. අධම්‌මිකෙ අධම්‌මිකසඤ්‌ඤා, අනාපත්‌ති.
930. Dhammike dhammikasaññā paṭibāhati, āpatti pācittiyassa. Dhammike vematikā paṭibāhati, āpatti dukkaṭassa. Dhammike adhammikasaññā paṭibāhati, anāpatti. Adhammike dhammikasaññā, āpatti dukkaṭassa. Adhammike vematikā, āpatti dukkaṭassa. Adhammike adhammikasaññā, anāpatti.
931. අනාපත්‌ති අනිසංසං දස්‌සෙත්‌වා පටිබාහති, උම්‌මත්‌තිකාය, ආදිකම්‌මිකායාති .
931. Anāpatti anisaṃsaṃ dassetvā paṭibāhati, ummattikāya, ādikammikāyāti .
දසමසික්‌ඛාපදං නිට්‌ඨිතං.
Dasamasikkhāpadaṃ niṭṭhitaṃ.
නග්‌ගවග්‌ගො තතියො.
Naggavaggo tatiyo.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 10. දසමසික්‌ඛාපදවණ්‌ණනා • 10. Dasamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 3. නග්‌ගවග්‌ගවණ්‌ණනා • 3. Naggavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 10. දසමසික්‌ඛාපදවණ්‌ණනා • 10. Dasamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමාදිසික්‌ඛාපදවණ්‌ණනා • 1. Paṭhamādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 10. දසමසික්‌ඛාපදං • 10. Dasamasikkhāpadaṃ
