| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
10. දසමසික්‌ඛාපදං
10. Dasamasikkhāpadaṃ
1062. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන අඤ්‌ඤතරා භික්‌ඛුනී පසාඛෙ ජාතං ගණ්‌ඩං පුරිසෙන සද්‌ධිං එකෙනෙකා භෙදාපෙසි. අථ ඛො සො පුරිසො තං භික්‌ඛුනිං දූසෙතුං උපක්‌කමි. සා විස්‌සරමකාසි. භික්‌ඛුනියො උපධාවිත්‌වා තං භික්‌ඛුනිං එතදවොචුං – ‘‘කිස්‌ස ත්‌වං, අය්‍යෙ, විස්‌සරමකාසී’’ති? අථ ඛො සා භික්‌ඛුනී භික්‌ඛුනීනං එතමත්‌ථං ආරොචෙසි. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛුනී පසාඛෙ ජාතං ගණ්‌ඩං පුරිසෙන සද්‌ධිං එකෙනෙකා භෙදාපෙස්‌සතී’’ති…පෙ.… සච්‌චං කිර, භික්‌ඛවෙ, භික්‌ඛුනී පසාඛෙ ජාතං ගණ්‌ඩං පුරිසෙන සද්‌ධිං එකෙනෙකා භෙදාපෙතීති 1? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, භික්‌ඛුනී පසාඛෙ ජාතං ගණ්‌ඩං පුරිසෙන සද්‌ධිං එකෙනෙකා භෙදාපෙස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
1062. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarā bhikkhunī pasākhe jātaṃ gaṇḍaṃ purisena saddhiṃ ekenekā bhedāpesi. Atha kho so puriso taṃ bhikkhuniṃ dūsetuṃ upakkami. Sā vissaramakāsi. Bhikkhuniyo upadhāvitvā taṃ bhikkhuniṃ etadavocuṃ – ‘‘kissa tvaṃ, ayye, vissaramakāsī’’ti? Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī pasākhe jātaṃ gaṇḍaṃ purisena saddhiṃ ekenekā bhedāpessatī’’ti…pe… saccaṃ kira, bhikkhave, bhikkhunī pasākhe jātaṃ gaṇḍaṃ purisena saddhiṃ ekenekā bhedāpetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī pasākhe jātaṃ gaṇḍaṃ purisena saddhiṃ ekenekā bhedāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1063. ‘‘යා පන භික්‌ඛුනී පසාඛෙ ජාතං ගණ්‌ඩං වා රුධිතං වා අනපලොකෙත්‌වා සඞ්‌ඝං වා ගණං වා පුරිසෙන සද්‌ධිං එකෙනෙකා භෙදාපෙය්‍ය වා ඵාලාපෙය්‍ය වා ධොවාපෙය්‍ය වා ආලිම්‌පාපෙය්‍ය වා බන්‌ධාපෙය්‍ය වා මොචාපෙය්‍ය වා, පාචිත්‌තිය’’න්‌ති.
1063.‘‘Yā pana bhikkhunī pasākhe jātaṃ gaṇḍaṃ vā rudhitaṃ vā anapaloketvā saṅghaṃ vā gaṇaṃ vā purisena saddhiṃ ekenekā bhedāpeyya vā phālāpeyya vā dhovāpeyya vā ālimpāpeyya vā bandhāpeyya vā mocāpeyya vā, pācittiya’’nti.
1064. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
1064.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
පසාඛං නාම අධොනාභි උබ්‌භජාණුමණ්‌ඩලං. ජාතන්‌ති තත්‌ථ ජාතං. ගණ්‌ඩො නාම යො කොචි ගණ්‌ඩො. රුධිතං නාම යං කිඤ්‌චි වණං. අනපලොකෙත්‌වාති අනාපුච්‌ඡා. සඞ්‌ඝො නාම භික්‌ඛුනිසඞ්‌ඝො වුච්‌චති. ගණො නාම සම්‌බහුලා භික්‌ඛුනියො වුච්‌චන්‌ති. පුරිසො නාම මනුස්‌සපුරිසො, න යක්‌ඛො, න පෙතො, න තිරච්‌ඡානගතො, විඤ්‌ඤූ පටිබලො දූසෙතුං. සද්‌ධින්‌ති එකතො. එකෙනෙකාති පුරිසො චෙව හොති භික්‌ඛුනී ච.
Pasākhaṃ nāma adhonābhi ubbhajāṇumaṇḍalaṃ. Jātanti tattha jātaṃ. Gaṇḍo nāma yo koci gaṇḍo. Rudhitaṃ nāma yaṃ kiñci vaṇaṃ. Anapaloketvāti anāpucchā. Saṅgho nāma bhikkhunisaṅgho vuccati. Gaṇo nāma sambahulā bhikkhuniyo vuccanti. Puriso nāma manussapuriso, na yakkho, na peto, na tiracchānagato, viññū paṭibalo dūsetuṃ. Saddhinti ekato. Ekenekāti puriso ceva hoti bhikkhunī ca.
1065. ‘‘භින්‌දා’’ති ආණාපෙති, ආපත්‌ති දුක්‌කටස්‌ස. භින්‌නෙ ආපත්‌ති පාචිත්‌තියස්‌ස. ‘‘ඵාලෙහී’’ති ආණාපෙති, ආපත්‌ති දුක්‌කටස්‌ස. ඵාලිතෙ ආපත්‌ති පාචිත්‌තියස්‌ස. ‘‘ධොවා’’ති ආණාපෙති , ආපත්‌ති දුක්‌කටස්‌ස. ධොවිතෙ 3 ආපත්‌ති පාචිත්‌තියස්‌ස. ‘‘ආලිම්‌පා’’ති ආණාපෙති, ආපත්‌ති දුක්‌කටස්‌ස. ලිත්‌තෙ 4 ආපත්‌ති පාචිත්‌තියස්‌ස. ‘‘බන්‌ධාහී’’ති ආණාපෙති, ආපත්‌ති දුක්‌කටස්‌ස. බද්‌ධෙ ආපත්‌ති පාචිත්‌තියස්‌ස. ‘‘මොචෙහී’’ති ආණාපෙති, ආපත්‌ති දුක්‌කටස්‌ස. මුත්‌තෙ ආපත්‌ති පාචිත්‌තියස්‌ස.
1065. ‘‘Bhindā’’ti āṇāpeti, āpatti dukkaṭassa. Bhinne āpatti pācittiyassa. ‘‘Phālehī’’ti āṇāpeti, āpatti dukkaṭassa. Phālite āpatti pācittiyassa. ‘‘Dhovā’’ti āṇāpeti , āpatti dukkaṭassa. Dhovite 5 āpatti pācittiyassa. ‘‘Ālimpā’’ti āṇāpeti, āpatti dukkaṭassa. Litte 6 āpatti pācittiyassa. ‘‘Bandhāhī’’ti āṇāpeti, āpatti dukkaṭassa. Baddhe āpatti pācittiyassa. ‘‘Mocehī’’ti āṇāpeti, āpatti dukkaṭassa. Mutte āpatti pācittiyassa.
1066. අනාපත්‌ති අපලොකෙත්‌වා භෙදාපෙති වා ඵාලාපෙති වා ධොවාපෙති වා ආලිම්‌පාපෙති වා බන්‌ධාපෙති වා මොචාපෙති වා, යා කාචි විඤ්‌ඤූ දුතියිකා 7 හොති, උම්‌මත්‌තිකාය, ආදිකම්‌මිකායාති.
1066. Anāpatti apaloketvā bhedāpeti vā phālāpeti vā dhovāpeti vā ālimpāpeti vā bandhāpeti vā mocāpeti vā, yā kāci viññū dutiyikā 8 hoti, ummattikāya, ādikammikāyāti.
දසමසික්‌ඛාපදං නිට්‌ඨිතං.
Dasamasikkhāpadaṃ niṭṭhitaṃ.
ආරාමවග්‌ගො ඡට්‌ඨො.
Ārāmavaggo chaṭṭho.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 10. දසමසික්‌ඛාපදවණ්‌ණනා • 10. Dasamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමාදිසික්‌ඛාපදවණ්‌ණනා • 1. Paṭhamādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 10. දසමසික්‌ඛාපදං • 10. Dasamasikkhāpadaṃ
