| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༡༠. དསམསིཀྑཱཔདཾ
10. Dasamasikkhāpadaṃ
༧༧༨. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཐུལླནནྡཱ བྷིཀྑུནཱི བཧུསྶུཏཱ ཧོཏི བྷཱཎིཀཱ ཝིསཱརདཱ པཊྚཱ དྷམྨིཾ ཀཐཾ ཀཱཏུཾ། བཧཱུ མནུསྶཱ ཐུལླནནྡཾ བྷིཀྑུནིཾ པཡིརུཔཱསནྟི། ཏེན ཁོ པན སམཡེན ཐུལླནནྡཱཡ བྷིཀྑུནིཡཱ པརིཝེཎཾ ཨུནྡྲིཡཏི 1། མནུསྶཱ ཐུལླནནྡཾ བྷིཀྑུནིཾ ཨེཏདཝོཙུཾ – ‘‘ཀིསྶིདཾ ཏེ, ཨཡྻེ, པརིཝེཎཾ ཨུནྡྲིཡཏཱི’’ཏི? ‘‘ནཏྠཱཝུསོ, དཱཡཀཱ, ནཏྠི ཀཱརཀཱ’’ཏི། ཨཐ ཁོ ཏེ མནུསྶཱ ཐུལླནནྡཱཡ བྷིཀྑུནིཡཱ པརིཝེཎཏྠཱཡ ཚནྡཀཾ སངྒྷརིཏྭཱ ཐུལླནནྡཱཡ བྷིཀྑུནིཡཱ པརིཀྑཱརཾ ཨདཾསུ། ཐུལླནནྡཱ བྷིཀྑུནཱི ཏེན ཙ པརིཀྑཱརེན སཡམྤི ཡཱཙིཏྭཱ བྷེསཛྫཾ ཙེཏཱཔེཏྭཱ པརིབྷུཉྫི། མནུསྶཱ ཛཱནིཏྭཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻཱ ཐུལླནནྡཱ ཨཉྙདཏྠིཀེན པརིཀྑཱརེན ཨཉྙུདྡིསིཀེན པུགྒལིཀེན སཉྙཱཙིཀེན ཨཉྙཾ ཙེཏཱཔེསྶཏཱི’’ཏི…པེ॰… སཙྩཾ ཀིར, བྷིཀྑཝེ, ཐུལླནནྡཱ བྷིཀྑུནཱི ཨཉྙདཏྠིཀེན པརིཀྑཱརེན ཨཉྙུདྡིསིཀེན པུགྒལིཀེན སཉྙཱཙིཀེན ཨཉྙཾ ཙེཏཱཔེཏཱིཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, ཐུལླནནྡཱ བྷིཀྑུནཱི ཨཉྙདཏྠིཀེན པརིཀྑཱརེན ཨཉྙུདྡིསིཀེན པུགྒལིཀེན སཉྙཱཙིཀེན ཨཉྙཾ ཙེཏཱཔེསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
778. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī bahussutā hoti bhāṇikā visāradā paṭṭā dhammiṃ kathaṃ kātuṃ. Bahū manussā thullanandaṃ bhikkhuniṃ payirupāsanti. Tena kho pana samayena thullanandāya bhikkhuniyā pariveṇaṃ undriyati 2. Manussā thullanandaṃ bhikkhuniṃ etadavocuṃ – ‘‘kissidaṃ te, ayye, pariveṇaṃ undriyatī’’ti? ‘‘Natthāvuso, dāyakā, natthi kārakā’’ti. Atha kho te manussā thullanandāya bhikkhuniyā pariveṇatthāya chandakaṃ saṅgharitvā thullanandāya bhikkhuniyā parikkhāraṃ adaṃsu. Thullanandā bhikkhunī tena ca parikkhārena sayampi yācitvā bhesajjaṃ cetāpetvā paribhuñji. Manussā jānitvā ujjhāyanti khiyyanti vipācenti – ‘‘kathañhi nāma ayyā thullanandā aññadatthikena parikkhārena aññuddisikena puggalikena saññācikena aññaṃ cetāpessatī’’ti…pe… saccaṃ kira, bhikkhave, thullanandā bhikkhunī aññadatthikena parikkhārena aññuddisikena puggalikena saññācikena aññaṃ cetāpetīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī aññadatthikena parikkhārena aññuddisikena puggalikena saññācikena aññaṃ cetāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༧༧༩. ‘‘ཡཱ པན བྷིཀྑུནཱི ཨཉྙདཏྠིཀེན པརིཀྑཱརེན ཨཉྙུདྡིསིཀེན པུགྒལིཀེན སཉྙཱཙིཀེན ཨཉྙཾ ཙེཏཱཔེཡྻ, ནིསྶགྒིཡཾ པཱཙིཏྟིཡ’’ནྟི།
779.‘‘Yā pana bhikkhunī aññadatthikena parikkhārena aññuddisikena puggalikena saññācikena aññaṃ cetāpeyya, nissaggiyaṃ pācittiya’’nti.
༧༨༠. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
780.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ཨཉྙདཏྠིཀེན པརིཀྑཱརེན ཨཉྙུདྡིསིཀེནཱཏི ཨཉྙསྶཏྠཱཡ དིནྣེན།
Aññadatthikena parikkhārena aññuddisikenāti aññassatthāya dinnena.
པུགྒལིཀེནཱཏི ཨེཀཱཡ བྷིཀྑུནིཡཱ, ན སངྒྷསྶ, ན གཎསྶ།
Puggalikenāti ekāya bhikkhuniyā, na saṅghassa, na gaṇassa.
སཉྙཱཙིཀེནཱཏི སཡཾ ཡཱཙིཏྭཱ།
Saññācikenāti sayaṃ yācitvā.
ཨཉྙཾ ཙེཏཱཔེཡྻཱཏི ཡཾཨཏྠཱཡ དིནྣཾ ཏཾ ཋཔེཏྭཱ ཨཉྙཾ ཙེཏཱཔེཏི, པཡོགེ དུཀྐཊཾ། པཊིལཱབྷེན ནིསྶགྒིཡཾ ཧོཏི། ནིསྶཛྫིཏབྦཾ སངྒྷསྶ ཝཱ གཎསྶ ཝཱ ཨེཀབྷིཀྑུནིཡཱ ཝཱ། ཨེཝཉྩ པན, བྷིཀྑཝེ, ནིསྶཛྫིཏབྦཾ…པེ॰… ‘‘ཨིདཾ མེ, ཨཡྻེ, ཨཉྙདཏྠིཀེན པརིཀྑཱརེན ཨཉྙུདྡིསིཀེན པུགྒལིཀེན སཉྙཱཙིཀེན ཨཉྙཾ ཙེཏཱཔིཏཾ ནིསྶགྒིཡཾ, ཨིམཱཧཾ སངྒྷསྶ ནིསྶཛྫཱམཱི’’ཏི…པེ॰… དདེཡྻཱཏི…པེ॰… དདེཡྻུནྟི…པེ॰… ཨཡྻཱཡ དམྨཱིཏི།
Aññaṃcetāpeyyāti yaṃatthāya dinnaṃ taṃ ṭhapetvā aññaṃ cetāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbaṃ…pe… ‘‘idaṃ me, ayye, aññadatthikena parikkhārena aññuddisikena puggalikena saññācikena aññaṃ cetāpitaṃ nissaggiyaṃ, imāhaṃ saṅghassa nissajjāmī’’ti…pe… dadeyyāti…pe… dadeyyunti…pe… ayyāya dammīti.
༧༨༡. ཨཉྙདཏྠིཀེ ཨཉྙདཏྠིཀསཉྙཱ ཨཉྙཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཨཉྙདཏྠིཀེ ཝེམཏིཀཱ ཨཉྙཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཨཉྙདཏྠིཀེ ཨནཉྙདཏྠིཀསཉྙཱ ཨཉྙཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ནིསྶཊྛཾ པཊིལབྷིཏྭཱ ཡཐཱདཱནེ ཨུཔནེཏབྦཾ།
781. Aññadatthike aññadatthikasaññā aññaṃ cetāpeti, nissaggiyaṃ pācittiyaṃ. Aññadatthike vematikā aññaṃ cetāpeti, nissaggiyaṃ pācittiyaṃ. Aññadatthike anaññadatthikasaññā aññaṃ cetāpeti, nissaggiyaṃ pācittiyaṃ. Nissaṭṭhaṃ paṭilabhitvā yathādāne upanetabbaṃ.
ཨནཉྙདཏྠིཀེ ཨཉྙདཏྠིཀསཉྙཱ, ཨཱཔཏྟི དུཀྐཊསྶ། ཨནཉྙདཏྠིཀེ ཝེམཏིཀཱ, ཨཱཔཏྟི དུཀྐཊསྶ། ཨནཉྙདཏྠིཀེ ཨནཉྙདཏྠིཀསཉྙཱ, ཨནཱཔཏྟི།
Anaññadatthike aññadatthikasaññā, āpatti dukkaṭassa. Anaññadatthike vematikā, āpatti dukkaṭassa. Anaññadatthike anaññadatthikasaññā, anāpatti.
༧༨༢. ཨནཱཔཏྟི སེསཀཾ ཨུཔནེཏི, སཱམིཀེ ཨཔལོཀེཏྭཱ ཨུཔནེཏི, ཨཱཔདཱསུ, ཨུམྨཏྟིཀཱཡ, ཨཱདིཀམྨིཀཱཡཱཏི།
782. Anāpatti sesakaṃ upaneti, sāmike apaloketvā upaneti, āpadāsu, ummattikāya, ādikammikāyāti.
དསམསིཀྑཱཔདཾ ནིཊྛིཏཾ།
Dasamasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / དསམནིསྶགྒིཡཔཱཙིཏྟིཡསིཀྑཱཔདཝཎྞནཱ • Dasamanissaggiyapācittiyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༡༠. དསམནིསྶགྒིཡཔཱཙིཏྟིཡསིཀྑཱཔདཝཎྞནཱ • 10. Dasamanissaggiyapācittiyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༢. དུཏིཡནིསྶགྒིཡཱདིཔཱཙིཏྟིཡསིཀྑཱཔདཝཎྞནཱ • 2. Dutiyanissaggiyādipācittiyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༠. དསམནིསྶགྒིཡཔཱཙིཏྟིཡསིཀྑཱཔདཾ • 10. Dasamanissaggiyapācittiyasikkhāpadaṃ
