| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༡༠. དསམསིཀྑཱཔདཾ
10. Dasamasikkhāpadaṃ
༡༡༡༥. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཐུལླནནྡཱ བྷིཀྑུནཱི སཧཛཱིཝིནིཾ ཝུཊྛཱཔེཏྭཱ ནེཝ ཝཱུཔཀཱསེཏི ན ཝཱུཔཀཱསཱཔེཏི། སཱམིཀོ ཨགྒཧེསི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻཱ ཐུལླནནྡཱ སཧཛཱིཝིནིཾ ཝུཊྛཱཔེཏྭཱ ནེཝ ཝཱུཔཀཱསེསྶཏི ན ཝཱུཔཀཱསཱཔེསྶཏི, སཱམིཀོ ཨགྒཧེསི ! སཙཱཡཾ བྷིཀྑུནཱི པཀྐནྟཱ ཨསྶ, ན ཙ སཱམིཀོ གཎྷེཡྻཱ’’ཏི…པེ॰… སཙྩཾ ཀིར, བྷིཀྑཝེ, ཐུལླནནྡཱ བྷིཀྑུནཱི སཧཛཱིཝིནིཾ ཝུཊྛཱཔེཏྭཱ ནེཝ ཝཱུཔཀཱསེཏི ན ཝཱུཔཀཱསཱཔེཏི 1, སཱམིཀོ ཨགྒཧེསཱིཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, ཐུལླནནྡཱ བྷིཀྑུནཱི སཧཛཱིཝིནིཾ ཝུཊྛཱཔེཏྭཱ ནེཝ ཝཱུཔཀཱསེསྶཏི ན ཝཱུཔཀཱསཱཔེསྶཏི, སཱམིཀོ ཨགྒཧེསི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
1115. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī sahajīviniṃ vuṭṭhāpetvā neva vūpakāseti na vūpakāsāpeti. Sāmiko aggahesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā sahajīviniṃ vuṭṭhāpetvā neva vūpakāsessati na vūpakāsāpessati, sāmiko aggahesi ! Sacāyaṃ bhikkhunī pakkantā assa, na ca sāmiko gaṇheyyā’’ti…pe… saccaṃ kira, bhikkhave, thullanandā bhikkhunī sahajīviniṃ vuṭṭhāpetvā neva vūpakāseti na vūpakāsāpeti 2, sāmiko aggahesīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī sahajīviniṃ vuṭṭhāpetvā neva vūpakāsessati na vūpakāsāpessati, sāmiko aggahesi! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༡༡༡༦. ‘‘ཡཱ པན བྷིཀྑུནཱི སཧཛཱིཝིནིཾ ཝུཊྛཱཔེཏྭཱ ནེཝ ཝཱུཔཀཱསེཡྻ ན ཝཱུཔཀཱསཱཔེཡྻ ཨནྟམསོ ཚཔྤཉྩཡོཛནཱནིཔི, པཱཙིཏྟིཡ’’ནྟི།
1116.‘‘Yā pana bhikkhunī sahajīviniṃ vuṭṭhāpetvā neva vūpakāseyya na vūpakāsāpeyya antamaso chappañcayojanānipi, pācittiya’’nti.
༡༡༡༧. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
1117.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
སཧཛཱིཝིནཱི ནཱམ སདྡྷིཝིཧཱརིནཱི ཝུཙྩཏི། ཝུཊྛཱཔེཏྭཱཏི ཨུཔསམྤཱདེཏྭཱ། ནེཝ ཝཱུཔཀཱསེཡྻཱཏི ན སཡཾ ཝཱུཔཀཱསེཡྻ། ན ཝཱུཔཀཱསཱཔེཡྻཱཏི ན ཨཉྙཾ ཨཱཎཱཔེཡྻ། ‘‘ནེཝ ཝཱུཔཀཱསེསྶཱམི ན ཝཱུཔཀཱསཱཔེསྶཱམི ཨནྟམསོ ཚཔྤཉྩཡོཛནཱནིཔཱི’’ཏི དྷུརཾ ནིཀྑིཏྟམཏྟེ ཨཱཔཏྟི པཱཙིཏྟིཡསྶ།
Sahajīvinī nāma saddhivihārinī vuccati. Vuṭṭhāpetvāti upasampādetvā. Nevavūpakāseyyāti na sayaṃ vūpakāseyya. Na vūpakāsāpeyyāti na aññaṃ āṇāpeyya. ‘‘Neva vūpakāsessāmi na vūpakāsāpessāmi antamaso chappañcayojanānipī’’ti dhuraṃ nikkhittamatte āpatti pācittiyassa.
༡༡༡༨. ཨནཱཔཏྟི སཏི ཨནྟརཱཡེ, པརིཡེསིཏྭཱ དུཏིཡིཀཾ བྷིཀྑུནིཾ ན ལབྷཏི, གིལཱནཱཡ, ཨཱཔདཱསུ, ཨུམྨཏྟིཀཱཡ, ཨཱདིཀམྨིཀཱཡཱཏི།
1118. Anāpatti sati antarāye, pariyesitvā dutiyikaṃ bhikkhuniṃ na labhati, gilānāya, āpadāsu, ummattikāya, ādikammikāyāti.
དསམསིཀྑཱཔདཾ ནིཊྛིཏཾ།
Dasamasikkhāpadaṃ niṭṭhitaṃ.
གབྦྷིནིཝགྒོ སཏྟམོ།
Gabbhinivaggo sattamo.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༡༠. དསམསིཀྑཱཔདཝཎྞནཱ • 10. Dasamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམཱདིསིཀྑཱཔདཝཎྞནཱ • 1. Paṭhamādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༠. དསམསིཀྑཱཔདཾ • 10. Dasamasikkhāpadaṃ
