| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
༡༠. དསམསིཀྑཱཔདཾ
10. Dasamasikkhāpadaṃ
༨༣༥. དསམེ སོཎྜཱ ཝཱཏི སུརཱསོཎྜཱ ཝཱ། མོརོཏི མཡཱུརོ། སུཝོཏི སུཀོ། མཀྐཊོཏི ཝཱནརོ། ཨཱདིསདྡེན སཔྤཱདཡོ སངྒཎྷཱཏི, མཀྐཊཱདཡོཔི ནཙྩནྟཱུཏི སམྦནྡྷོ། ཨསཾཡཏབྷིཀྑཱུནནྟི ཝཱཙསིཀཀམྨེ ཨསཾཡཏཱནཾ བྷིཀྑཱུནཾ, དྷམྨབྷཱཎཀགཱིཏཾ ཝཱ ཧོཏཱུཏི ཡོཛནཱ། ཏནྟིཡཱ གུཎེན བདྡྷཱ ཏནྟིབདྡྷཱ། ‘‘བྷི’’ནྟིསངྑཱཏོ རཱསདྡོ ཨེཏིསྶཱཏི བྷེརི། ཀུཊེན ཀཏཱ བྷེརི ཀུཊབྷེརི, ཏཱཡ ཝཱདིཏཾ ཀུཊབྷེརིཝཱདིཏཾ, ཏཾ ཝཱ། ཨུདཀབྷེརཱིཏི ཨུདཀེན པཀྑིཏྟཱ བྷེརི, ཏཱཡ ཝཱདིཏམྤི ཧོཏཱུཏི སམྦནྡྷོ།
835. Dasame soṇḍā vāti surāsoṇḍā vā. Moroti mayūro. Suvoti suko. Makkaṭoti vānaro. Ādisaddena sappādayo saṅgaṇhāti, makkaṭādayopi naccantūti sambandho. Asaṃyatabhikkhūnanti vācasikakamme asaṃyatānaṃ bhikkhūnaṃ, dhammabhāṇakagītaṃ vā hotūti yojanā. Tantiyā guṇena baddhā tantibaddhā. ‘‘Bhi’’ntisaṅkhāto rāsaddo etissāti bheri. Kuṭena katā bheri kuṭabheri, tāya vāditaṃ kuṭabherivāditaṃ, taṃ vā. Udakabherīti udakena pakkhittā bheri, tāya vāditampi hotūti sambandho.
༨༣༦. ཏེསཾཡེཝཱཏི ཡེསཾ ནཙྩཾ པསྶཏི, ཏེསཾཡེཝ། ཡདི པན ནཙྩགཱིཏཝཱདིཏེ ཝིསུཾ ཝིསུཾ པསྶཏི སུཎཱཏི, པཱཊེཀྐཱ ཨཱཔཏྟིཡོཏི དསྶེནྟོ ཨཱཧ ‘‘སཙེ པནཱ’’ཏིཨཱདི། ཨཉྙཏོཏི ཨཉྙཏོ དེསཏོ, པསྶཏཱིཏི སམྦནྡྷོ། ‘‘ཨོལོཀེཏྭཱ’’ཏི པདེ ཨཔེཀྑིཏེ ཨུཔཡོགཏྠེ ཏོཔཙྩཡོ ཧོཏི། ཨཉྙཾ ཨོལོཀེཏྭཱཏི ཧི ཨཏྠོ། ཨཉྙཏོ ཝཱདེནྟེ པསྶཏཱིཏི ཡོཛནཱ། བྷིཀྑུནཱི ན ལབྷཏཱིཏི སམྦནྡྷོ། ཨཉྙེ ཝཏྟུམྤཱིཏི སམྦནྡྷོ། ཨུཔཧཱརནྟི པཱུཛཾ། ཨུཔཊྛཱནནྟི པཱརིཙརིཡཾ། སབྦཏྠཱཏི སབྦེསུ སཡཾ ནཙྩཱདཱིསུ།
836.Tesaṃyevāti yesaṃ naccaṃ passati, tesaṃyeva. Yadi pana naccagītavādite visuṃ visuṃ passati suṇāti, pāṭekkā āpattiyoti dassento āha ‘‘sace panā’’tiādi. Aññatoti aññato desato, passatīti sambandho. ‘‘Oloketvā’’ti pade apekkhite upayogatthe topaccayo hoti. Aññaṃ oloketvāti hi attho. Aññato vādente passatīti yojanā. Bhikkhunī na labhatīti sambandho. Aññe vattumpīti sambandho. Upahāranti pūjaṃ. Upaṭṭhānanti pāricariyaṃ. Sabbatthāti sabbesu sayaṃ naccādīsu.
༨༣༧. ཨནྟརཱརཱམེ ཝཱཏི ཨཱརཱམསྶ ཨནྟརེ ཝཱ། བཧིཨཱརཱམེ ཝཱཏི ཨཱརཱམསྶ བཧི ཝཱ། ཨཉྙེན ཝཱཏི སལཱཀབྷཏྟཱདཱིཧི ཨཉྙེན ཝཱ། ཏཱདིསེནཱཏི ཡཱདིསོ ཙོརཱདིཨུཔདྡཝོ, ཏཱདིསེནཱཏི། དསམཾ།
837.Antarārāme vāti ārāmassa antare vā. Bahiārāme vāti ārāmassa bahi vā. Aññena vāti salākabhattādīhi aññena vā. Tādisenāti yādiso corādiupaddavo, tādisenāti. Dasamaṃ.
ལསུཎཝགྒོ པཋམོ།
Lasuṇavaggo paṭhamo.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / བྷིཀྑུནཱིཝིབྷངྒ • Bhikkhunīvibhaṅga / ༡༠. དསམསིཀྑཱཔདཾ • 10. Dasamasikkhāpadaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༡༠. དསམསིཀྑཱཔདཝཎྞནཱ • 10. Dasamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༡. ལསུཎཝགྒཝཎྞནཱ • 1. Lasuṇavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༡༠. དསམསིཀྑཱཔདཝཎྞནཱ • 10. Dasamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམལསུཎཱདིསིཀྑཱཔདཝཎྞནཱ • 1. Paṭhamalasuṇādisikkhāpadavaṇṇanā
